༡༧. ས་ཏྟ་ར་ས་མ་ཝ་གྒོ
(༡༦༦) ༡. ཨ་ར་ཧ་ཏོ པུ་ཉྙཱུ་པ་ཙ་ཡ་ཀ་ཐཱ
༧༧༦. ཨ་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ་ཏི? ཨཱ་མ་ནྟཱ. ཨ་ཏྠི ཨ་ར་ཧ་ཏོ ཨ་པུ་ཉྙཱུ་པ་ཙ་ཡོ་ཏི? ན ཧེ་ཝཾ ཝ་ཏྟ་བྦེ…པེ… ན་ཏྠི ཨ་ར་ཧ་ཏོ ཨ་པུ་ཉྙཱུ་པ་ཙ་ཡོ་ཏི? ཨཱ་མ་ནྟཱ. ན་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ་ཏི? ན ཧེ་ཝཾ ཝ་ཏྟ་བྦེ…པེ….
༧༧༧. ཨ་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ་ཏི? ཨཱ་མ་ནྟཱ. ཨ་ར་ཧཱ པུ་ཉྙཱ་བྷི་ས་ངྑཱ་རཾ ཨ་བྷི་ས་ངྑ་རོ་ཏི, ཨཱ་ནེ་ཉྫཱ་བྷི་ས་ངྑཱ་རཾ ཨ་བྷི་ས་ངྑ་རོ་ཏི, ག་ཏི་སཾ་ཝ་ཏྟ་ནི་ཡཾ ཀ་མྨཾ ཀ་རོ་ཏི, བྷ་ཝ་སཾ་ཝ་ཏྟ་ནི་ཡཾ ཀ་མྨཾ ཀ་རོ་ཏི, ཨི་སྶ་རི་ཡ་སཾ་ཝ་ཏྟ་ནི་ཡཾ ཀ་མྨཾ ཀ་རོ་ཏི, ཨ་དྷི་པ་ཙྩ་སཾ་ཝ་ཏྟ་ནི་ཡཾ [ཨཱ་དྷི་པ་ཙྩ་སཾ་ཝ་ཏྟ་ནི་ཀཾ (?)] ཀ་མྨཾ ཀ་རོ་ཏི, མ་ཧཱ་བྷོ་ག་སཾ་ཝ་ཏྟ་ནི་ཡཾ ཀ་མྨཾ ཀ་རོ་ཏི, མ་ཧཱ་པ་རི་ཝཱ་ར་སཾ་ཝ་ཏྟ་ནི་ཡཾ ཀ་མྨཾ ཀ་རོ་ཏི, དེ་ཝ་སོ་བྷ་གྱ་སཾ་ཝ་ཏྟ་ནི་ཡཾ ཀ་མྨཾ ཀ་རོ་ཏི, མ་ནུ་སྶ་སོ་བྷ་གྱ་སཾ་ཝ་ཏྟ་ནི་ཡཾ ཀ་མྨཾ ཀ་རོ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
༧༧༨. ཨ་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ་ཏི? ཨཱ་མ་ནྟཱ. ཨ་ར་ཧཱ ཨཱ་ཙི་ནཱ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… ཨ་ར་ཧཱ ཨ་པ་ཙི་ནཱ་ཏཱི་ཏི? ན ཧེ་ཝཾ ཝ་ཏྟ་བྦེ …པེ… ཨ་ར་ཧཱ པ་ཛ་ཧ་ཏཱི་ཏི…པེ… ཨ་ར་ཧཱ ཨུ་པཱ་དི་ཡ་ཏཱི་ཏི…པེ… ཨ་ར་ཧཱ ཝི་སི་ནེ་ཏཱི་ཏི…པེ… ཨ་ར་ཧཱ ཨུ་སྶི་ནེ་ཏཱི་ཏི…པེ… ཨ་ར་ཧཱ ཝི་དྷཱུ་པེ་ཏཱི་ཏི …པེ… ཨ་ར་ཧཱ ས་ནྡྷཱུ་པེ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… ན་ནུ ཨ་ར་ཧཱ ནེ་ཝཱ་ཙི་ནཱ་ཏི ན ཨ་པ་ཙི་ནཱ་ཏི ཨ་པ་ཙི་ནི་ཏྭཱ ཋི་ཏོ་ཏི? ཨཱ་མ་ནྟཱ. ཧ་ཉྩི ཨ་ར་ཧཱ ནེ་ཝཱ་ཙི་ནཱ་ཏི ནཱ་པ་ཙི་ནཱ་ཏི ཨ་པ་ཙི་ནི་ཏྭཱ ཋི་ཏོ, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ’’ཏི.
ན་ནུ ཨ་ར་ཧཱ ནེ་ཝ པ་ཛ་ཧ་ཏི ན ཨུ་པཱ་དི་ཡ་ཏི པ་ཛ་ཧི་ཏྭཱ ཋི་ཏོ, ནེ་ཝ ཝི་སི་ནེ་ཏི ན ཨུ་སྶི་ནེ་ཏི ཝི་སི་ནེ་ཏྭཱ ཋི་ཏོ, ནེ་ཝ ཝི་དྷཱུ་པེ་ཏི ན ས་ནྡྷཱུ་པེ་ཏི ཝི་དྷཱུ་པེ་ཏྭཱ ཋི་ཏོ་ཏི? ཨཱ་མ་ནྟཱ. ཧ་ཉྩི ཨ་ར་ཧཱ ནེ་ཝ ཝི་དྷཱུ་པེ་ཏི ན ས་ནྡྷཱུ་པེ་ཏི ཝི་དྷཱུ་པེ་ཏྭཱ ཋི་ཏོ, ནོ ཙ ཝ་ཏ རེ ཝ་ཏྟ་བྦེ – ‘‘ཨ་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ’’ཏི.
༧༧༩. ན་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ་ཏི? ཨཱ་མ་ནྟཱ. ཨ་ར་ཧཱ དཱ་ནཾ ད་དེ་ཡྻཱ་ཏི? ཨཱ་མ་ནྟཱ. ཧ་ཉྩི ཨ་ར་ཧཱ དཱ་ནཾ ད་དེ་ཡྻ, ནོ ཙ ཝ་ཏ རེ ཝ་ཏྟ་བྦེ – ‘‘ན་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ’’ཏི.
ཨ་ར་ཧཱ ཙཱི་ཝ་རཾ ད་དེ་ཡྻ…པེ… པི་ཎྜ་པཱ་ཏཾ ད་དེ་ཡྻ… སེ་ནཱ་ས་ནཾ ད་དེ་ཡྻ… གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ ད་དེ་ཡྻ… ཁཱ་ད་ནཱི་ཡཾ ད་དེ་ཡྻ… བྷོ་ཛ་ནཱི་ཡཾ ད་དེ་ཡྻ… པཱ་ནཱི་ཡཾ ད་དེ་ཡྻ… ཙེ་ཏི་ཡཾ ཝ་ནྡེ་ཡྻ… ཙེ་ཏི་ཡེ མཱ་ལཾ ཨཱ་རོ་པེ་ཡྻ… ག་ནྡྷཾ ཨཱ་རོ་པེ་ཡྻ… ཝི་ལེ་པ་ནཾ ཨཱ་རོ་པེ་ཡྻ…པེ… ཙེ་ཏི་ཡཾ ཨ་བྷི་ད་ཀྑི་ཎཾ [པ་ད་ཀྑི་ཎཾ (?)] ཀ་རེ་ཡྻཱ་ཏི? ཨཱ་མ་ནྟཱ. ཧ་ཉྩི ཨ་ར་ཧཱ ཙེ་ཏི་ཡཾ ཨ་བྷི་ད་ཀྑི་ཎཾ ཀ་རེ་ཡྻ, ནོ ཙ ཝ་ཏ རེ ཝ་ཏྟ་བྦེ – ‘‘ན་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ’’ཏི.
ཨ་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ་ཏི་ཀ་ཐཱ ནི་ཊྛི་ཏཱ.
༡༧. ས་ཏྟ་ར་ས་མ་ཝ་གྒོ
(༡༦༧) ༢. ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ་ཏི་ཀ་ཐཱ
༧༨༠. ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ་ཏི? ཨཱ་མ་ནྟཱ. ན་ཏྠི ཨ་ར་ཧ་ནྟ་གྷཱ་ཏ་ཀོ་ཏི? ན ཧེ་ཝཾ ཝ་ཏྟ་བྦེ…པེ… ཨ་ཏྠི ཨ་ར་ཧ་ནྟ་གྷཱ་ཏ་ཀོ་ཏི? ཨཱ་མ་ནྟཱ. ཨ་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ་ཏི? ན ཧེ་ཝཾ ཝ་ཏྟ་བྦེ…པེ… ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ་ཏི? ཨཱ་མ་ནྟཱ. ཡོ ཨ་ར་ཧ་ནྟཾ ཛཱི་ཝི་ཏཱ ཝོ་རོ་པེ་ཏི, ས་ཏི ཛཱི་ཝི་ཏེ ཛཱི་ཝི་ཏཱ་ཝ་སེ་སེ ཛཱི་ཝི་ཏཱ ཝོ་རོ་པེ་ཏི, ཨ་ས་ཏི ཛཱི་ཝི་ཏེ ཛཱི་ཝི་ཏཱ་ཝ་སེ་སེ ཛཱི་ཝི་ཏཱ ཝོ་རོ་པེ་ཏཱི་ཏི? ས་ཏི ཛཱི་ཝི་ཏེ ཛཱི་ཝི་ཏཱ་ཝ་སེ་སེ ཛཱི་ཝི་ཏཱ ཝོ་རོ་པེ་ཏཱི་ཏི. ཧ་ཉྩི ས་ཏི ཛཱི་ཝི་ཏེ ཛཱི་ཝི་ཏཱ་ཝ་སེ་སེ ཛཱི་ཝི་ཏཱ ཝོ་རོ་པེ་ཏི, ནོ ཙ ཝ་ཏ རེ ཝ་ཏྟ་བྦེ – ‘‘ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ’’ཏི. ཨ་ས་ཏི ཛཱི་ཝི་ཏེ ཛཱི་ཝི་ཏཱ་ཝ་སེ་སེ ཛཱི་ཝི་ཏཱ ཝོ་རོ་པེ་ཏཱི་ཏི, ན་ཏྠི ཨ་ར་ཧ་ནྟ་གྷཱ་ཏ་ཀོ་ཏི? ན ཧེ་ཝཾ ཝ་ཏྟ་བྦེ…པེ….
༧༨༡. ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ་ཏི? ཨཱ་མ་ནྟཱ. ཨ་ར་ཧ་ཏོ ཀཱ་ཡེ ཝི་སཾ ན ཀ་མེ་ཡྻ, ས་ཏྠཾ ན ཀ་མེ་ཡྻ, ཨ་གྒི ན ཀ་མེ་ཡྻཱ་ཏི? ན ཧེ་ཝཾ ཝ་ཏྟ་བྦེ…པེ… ན་ནུ ཨ་ར་ཧ་ཏོ ཀཱ་ཡེ ཝི་སཾ ཀ་མེ་ཡྻ, ས་ཏྠཾ ཀ་མེ་ཡྻ, ཨ་གྒི ཀ་མེ་ཡྻཱ་ཏི? ཨཱ་མ་ནྟཱ. ཧ་ཉྩི ཨ་ར་ཧ་ཏོ ཀཱ་ཡེ ཝི་སཾ ཀ་མེ་ཡྻ, ས་ཏྠཾ ཀ་མེ་ཡྻ, ཨ་གྒི ཀ་མེ་ཡྻ, ནོ ཙ ཝ་ཏ རེ ཝ་ཏྟ་བྦེ – ‘‘ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ’’ཏི.
ཨ་ར་ཧ་ཏོ ཀཱ་ཡེ ཝི་སཾ ན ཀ་མེ་ཡྻ, ས་ཏྠཾ ན ཀ་མེ་ཡྻ, ཨ་གྒི ན ཀ་མེ་ཡྻཱ་ཏི? ཨཱ་མ་ནྟཱ. ན་ཏྠི ཨ་ར་ཧ་ནྟ་གྷཱ་ཏ་ཀོ་ཏི? ན ཧེ་ཝཾ ཝ་ཏྟ་བྦེ…པེ….
༧༨༢. ཨ་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ནཱ་ཧཾ, བྷི་ཀྑ་ཝེ, ས་ཉྩེ་ཏ་ནི་ཀཱ་ནཾ ཀ་མྨཱ་ནཾ ཀ་ཏཱ་ནཾ ཨུ་པ་ཙི་ཏཱ་ནཾ ཨ་པྤ་ཊི་སཾ་ཝེ་དི་ཏྭཱ བྱ་ནྟཱི་བྷཱ་ཝཾ ཝ་དཱ་མི; ཏ་ཉྩ ཁོ དི་ཊྛེ་ཝ དྷ་མྨེ ཨུ་པ་པ་ཛྫཾ ཝཱ ཨ་པ་རེ ཝཱ པ་རི་ཡཱ་ཡེ’’ཏི. ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ་ཏི.
ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩཱུ་ཏི་ཀ་ཐཱ ནི་ཊྛི་ཏཱ.
༡༧. ས་ཏྟ་ར་ས་མ་ཝ་གྒོ
(༡༦༨) ༣. ས་བྦ་མི་དཾ ཀ་མྨ་ཏོ་ཏི་ཀ་ཐཱ
༧༨༣. ས་བྦ་མི་དཾ ཀ་མྨ་ཏོ་ཏི? ཨཱ་མ་ནྟཱ. ཀ་མྨ་མྤི ཀ་མྨ་ཏོ་ཏི? ན ཧེ་ཝཾ ཝ་ཏྟ་བྦེ…པེ… ས་བྦ་མི་དཾ ཀ་མྨ་ཏོ་ཏི? ཨཱ་མ་ནྟཱ. ས་བྦ་མི་དཾ པུ་བྦེ་ཀ་ཏ་ཧེ་ཏཱུ་ཏི? ན ཧེ་ཝཾ ཝ་ཏྟ་བྦེ…པེ… ས་བྦ་མི་དཾ ཀ་མྨ་ཏོ་ཏི? ཨཱ་མ་ནྟཱ. ས་བྦ་མི་དཾ ཀ་མྨ་ཝི་པཱ་ཀ་ཏོ་ཏི? ན ཧེ་ཝཾ ཝ་ཏྟ་བྦེ…པེ….
༧༨༤. ས་བྦ་མི་དཾ ཀ་མྨ་ཝི་པཱ་ཀ་ཏོ་ཏི? ཨཱ་མ་ནྟཱ. ཀ་མྨ་ཝི་པཱ་ཀེ་ན པཱ་ཎཾ ཧ་ནེ་ཡྻཱ་ཏི? ཨཱ་མ་ནྟཱ. པཱ་ཎཱ་ཏི་པཱ་ཏོ ས་ཕ་ལོ་ཏི? ཨཱ་མ་ནྟཱ. ཀ་མྨ་ཝི་པཱ་ཀོ ས་ཕ་ལོ་ཏི? ན ཧེ་ཝཾ ཝ་ཏྟ་བྦེ…པེ… ཀ་མྨ་ཝི་པཱ་ཀོ ཨ་ཕ་ལོ་ཏི? ཨཱ་མ་ནྟཱ. པཱ་ཎཱ་ཏི་པཱ་ཏོ ཨ་ཕ་ལོ་ཏི? ན ཧེ་ཝཾ ཝ་ཏྟ་བྦེ…པེ….
ཀ་མྨ་ཝི་པཱ་ཀེ་ན ཨ་དི་ནྣཾ ཨཱ་དི་ཡེ་ཡྻ…པེ… མུ་སཱ བྷ་ཎེ་ཡྻ… པི་སུ་ཎཾ བྷ་ཎེ་ཡྻ… ཕ་རུ་སཾ བྷ་ཎེ་ཡྻ… ས་མྥཾ པ་ལ་པེ་ཡྻ… ས་ནྡྷིཾ ཚི་ནྡེ་ཡྻ… ནི་ལློ་པཾ ཧ་རེ་ཡྻ… ཨེ་ཀཱ་གཱ་རི་ཀཾ ཀ་རེ་ཡྻ… པ་རི་པ་ནྠེ ཏི་ཊྛེ་ཡྻ… པ་ར་དཱ་རཾ ག་ཙྪེ་ཡྻ… གཱ་མ་གྷཱ་ཏ་ཀཾ ཀ་རེ་ཡྻ… ནི་ག་མ་གྷཱ་ཏ་ཀཾ ཀ་རེ་ཡྻ… ཀ་མྨ་ཝི་པཱ་ཀེ་ན དཱ་ནཾ ད་དེ་ཡྻ… ཙཱི་ཝ་རཾ ད་དེ་ཡྻ … པི་ཎྜ་པཱ་ཏཾ ད་དེ་ཡྻ… སེ་ནཱ་ས་ནཾ ད་དེ་ཡྻ… གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ ད་དེ་ཡྻཱ་ཏི? ཨཱ་མ་ནྟཱ. གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རོ ས་ཕ་ལོ་ཏི? ཨཱ་མ་ནྟཱ. ཀ་མྨ་ཝི་པཱ་ཀོ ས་ཕ་ལོ་ཏི? ན ཧེ་ཝཾ ཝ་ཏྟ་བྦེ…པེ… ཀ་མྨ་ཝི་པཱ་ཀོ ཨ་ཕ་ལོ་ཏི? ཨཱ་མ་ནྟཱ. གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རོ ཨ་ཕ་ལོ་ཏི? ན ཧེ་ཝཾ ཝ་ཏྟ་བྦེ…པེ….
༧༨༥. ན ཝ་ཏྟ་བྦཾ – ‘‘ས་བྦ་མི་དཾ ཀ་མྨ་ཏོ’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ –
‘‘ཀ་མྨུ་ནཱ ཝ་ཏྟ་ཏཱི [ཝ་ཏྟ་ཏི (པཱི. ཀ., མ. ནི. ༢.༤༦༠), ཝ་ཏྟ་ཏེ (?)] ལོ་ཀོ, ཀ་མྨུ་ནཱ ཝ་ཏྟ་ཏཱི [ཝ་ཏྟ་ཏི (པཱི. ཀ., མ. ནི. ༢.༤༦༠), ཝ་ཏྟ་ཏེ (?)] པ་ཛཱ;
ཀ་མྨ་ནི་བ་ནྡྷ་ནཱ ས་ཏྟཱ, ར་ཐ་སྶཱ་ཎཱི་ཝ ཡཱ་ཡ་ཏོ [མ. ནི. ༢.༤༦༠; སུ. ནི. ༦༥༩].
‘‘ཀ་མྨེ་ན ཀི་ཏྟིཾ ལ་བྷ་ཏེ པ་སཾ་སཾ,
ཀ་མྨེ་ན ཛཱ་ནི་ཉྩ ཝ་དྷ་ཉྩ བ་ནྡྷཾ;
ཏཾ ཀ་མྨཾ ནཱ་ནཱ་ཀ་ར་ཎཾ ཝི་དི་ཏྭཱ,
ཀ་སྨཱ ཝ་དེ ན་ཏྠི ཀ་མྨ་ནྟི ལོ་ཀེ’’ཏི.
ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ‘‘ས་བྦ་མི་དཾ ཀ་མྨ་ཏོ’’ཏི.
ས་བྦ་མི་དཾ ཀ་མྨ་ཏོ་ཏི་ཀ་ཐཱ ནི་ཊྛི་ཏཱ.
༡༧. ས་ཏྟ་ར་ས་མ་ཝ་གྒོ
(༡༦༩) ༤. ཨི་ནྡྲི་ཡ་བ་དྡྷ་ཀ་ཐཱ
༧༨༦. ཨི་ནྡྲི་ཡ་བ་དྡྷ་ཉྙེ་ཝ དུ་ཀྑ་ནྟི? ཨཱ་མ་ནྟཱ. ཨི་ནྡྲི་ཡ་བ་དྡྷ་ཉྙེ་ཝ ཨ་ནི་ཙྩཾ ས་ངྑ་ཏཾ པ་ཊི་ཙྩ་ས་མུ་པྤ་ནྣཾ ཁ་ཡ་དྷ་མྨཾ ཝ་ཡ་དྷ་མྨཾ ཝི་རཱ་ག་དྷ་མྨཾ ནི་རོ་དྷ་དྷ་མྨཾ ཝི་པ་རི་ཎཱ་མ་དྷ་མྨ་ནྟི? ན ཧེ་ཝཾ ཝ་ཏྟ་བྦེ…པེ… ན་ནུ ཨ་ནི་ནྡྲི་ཡ་བ་དྡྷཾ ཨ་ནི་ཙྩཾ ས་ངྑ་ཏཾ པ་ཊི་ཙྩ་ས་མུ་པྤ་ནྣཾ ཁ་ཡ་དྷ་མྨཾ ཝ་ཡ་དྷ་མྨཾ ཝི་རཱ་ག་དྷ་མྨཾ ནི་རོ་དྷ་དྷ་མྨཾ ཝི་པ་རི་ཎཱ་མ་དྷ་མྨ་ནྟི? ཨཱ་མ་ནྟཱ. ཧ་ཉྩི ཨ་ནི་ནྡྲི་ཡ་བ་དྡྷཾ ཨ་ནི་ཙྩཾ ས་ངྑ་ཏཾ པ་ཊི་ཙྩ་ས་མུ་པྤ་ནྣཾ ཁ་ཡ་དྷ་མྨཾ ཝ་ཡ་དྷ་མྨཾ ཝི་རཱ་ག་དྷ་མྨཾ ནི་རོ་དྷ་དྷ་མྨཾ ཝི་པ་རི་ཎཱ་མ་དྷ་མྨཾ, ནོ ཙ ཝ་ཏ རེ ཝ་ཏྟ་བྦེ – ‘‘ཨི་ནྡྲི་ཡ་བ་དྡྷ་ཉྙེ་ཝ དུ་ཀྑ’’ནྟི.
ཨ་ནི་ནྡྲི་ཡ་བ་དྡྷཾ ཨ་ནི་ཙྩཾ ས་ངྑ་ཏཾ པ་ཊི་ཙྩ་ས་མུ་པྤ་ནྣཾ…པེ… ཝི་པ་རི་ཎཱ་མ་དྷ་མྨཾ, ཏ་ཉྩ ན དུ་ཀྑ་ནྟི? ཨཱ་མ་ནྟཱ. ཨི་ནྡྲི་ཡ་བ་དྡྷཾ ཨ་ནི་ཙྩཾ ས་ངྑ་ཏཾ…པེ… ཝི་པ་རི་ཎཱ་མ་དྷ་མྨཾ, ཏ་ཉྩ ན དུ་ཀྑ་ནྟི? ན ཧེ་ཝཾ ཝ་ཏྟ་བྦེ…པེ….
ཨི་ནྡྲི་ཡ་བ་དྡྷཾ ཨ་ནི་ཙྩཾ ས་ངྑ་ཏཾ…པེ… ཝི་པ་རི་ཎཱ་མ་དྷ་མྨཾ, ཏ་ཉྩ དུ་ཀྑ་ནྟི [ཨི་དཾ-པུ་ཙྪཱ་དྭ་ཡེ་ན པུ་རི་མ་པུ་ཙྪཱ་དྭ་ཡ་སྶ པུ་ར་ཏོ བྷ་ཝི་ཏ་བྦཾ]? ཨཱ་མ་ནྟཱ. ཨ་ནི་ནྡྲི་ཡ་བ་དྡྷཾ ཨ་ནི་ཙྩཾ ས་ངྑ་ཏཾ…པེ… ཝི་པ་རི་ཎཱ་མ་དྷ་མྨཾ, ཏ་ཉྩ དུ་ཀྑ་ནྟི [ཨི་དཾ-པུ་ཙྪཱ་དྭ་ཡེ་ན པུ་རི་མ་པུ་ཙྪཱ་དྭ་ཡ་སྶ པུ་ར་ཏོ བྷ་ཝི་ཏ་བྦཾ]? ན ཧེ་ཝཾ ཝ་ཏྟ་བྦེ…པེ….
༧༨༧. ཨི་ནྡྲི་ཡ་བ་དྡྷ་ཉྙེ་ཝ དུ་ཀྑ་ནྟི? ཨཱ་མ་ནྟཱ. ན་ནུ ཡ་ད་ནི་ཙྩཾ ཏཾ དུ་ཀྑཾ [སཾ. ནི. ༣.༡༥] ཝུ་ཏྟཾ བྷ་ག་ཝ་ཏཱ – ‘‘ཨ་ནི་ནྡྲི་ཡ་བ་དྡྷཾ ཨ་ནི་ཙྩ’’ནྟི? ཨཱ་མ་ནྟཱ. ཧ་ཉྩི ཡ་ད་ནི་ཙྩཾ ཏཾ དུ་ཀྑཾ [སཾ. ནི. ༣.༡༥] ཝུ་ཏྟཾ བྷ་ག་ཝ་ཏཱ – ཨ་ནི་ནྡྲི་ཡ་བ་དྡྷཾ ཨ་ནི་ཙྩཾ, ནོ ཙ ཝ་ཏ རེ ཝ་ཏྟ་བྦེ – ‘‘ཨི་ནྡྲི་ཡ་བ་དྡྷ་ཉྙེ་ཝ དུ་ཀྑ’’ནྟི.
༧༨༨. ན ཝ་ཏྟ་བྦཾ – ‘‘ཨི་ནྡྲི་ཡ་བ་དྡྷ་ཉྙེ་ཝ དུ་ཀྑ’’ནྟི? ཨཱ་མ་ནྟཱ. ཡ་ཐཱ ཨི་ནྡྲི་ཡ་བ་དྡྷ་སྶ དུ་ཀྑ་སྶ པ་རི་ཉྙཱ་ཡ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏི, ཨེ་ཝ་མེ་ཝཾ ཨ་ནི་ནྡྲི་ཡ་བ་དྡྷ་སྶ དུ་ཀྑ་སྶ པ་རི་ཉྙཱ་ཡ བྷ་ག་ཝ་ཏི བྲ་ཧྨ་ཙ་རི་ཡཾ ཝུ་སྶ་ཏཱི་ཏི? ན ཧེ་ཝཾ ཝ་ཏྟ་བྦེ…པེ… ཡ་ཐཱ ཨི་ནྡྲི་ཡ་བ་དྡྷཾ དུ་ཀྑཾ པ་རི་ཉྙཱ་ཏཾ ན པུ་ན ཨུ་པྤ་ཛྫ་ཏི, ཨེ་ཝ་མེ་ཝཾ ཨ་ནི་ནྡྲི་ཡ་བ་དྡྷཾ དུ་ཀྑཾ པ་རི་ཉྙཱ་ཏཾ ན པུ་ན ཨུ་པྤ་ཛྫ་ཏཱི་ཏི? ན ཧེ་ཝཾ ཝ་ཏྟ་བྦེ. ཏེ་ན ཧི ཨི་ནྡྲི་ཡ་བ་དྡྷ་ཉྙེ་ཝ དུ་ཀྑ་ནྟི.
ཨི་ནྡྲི་ཡ་བ་དྡྷ་ཀ་ཐཱ ནི་ཊྛི་ཏཱ.
༡༧. ས་ཏྟ་ར་ས་མ་ཝ་གྒོ
(༡༧༠) ༥. ཋ་པེ་ཏྭཱ ཨ་རི་ཡ་མ་གྒ་ནྟི་ཀ་ཐཱ
༧༨༩. ཋ་པེ་ཏྭཱ ཨ་རི་ཡ་མ་གྒཾ ཨ་ཝ་སེ་སཱ ས་ངྑཱ་རཱ དུ་ཀྑཱ་ཏི? ཨཱ་མ་ནྟཱ. དུ་ཀྑ་ས་མུ་ད་ཡོ་པི དུ་ཀྑོ་ཏི? ན ཧེ་ཝཾ ཝ་ཏྟ་བྦེ…པེ… དུ་ཀྑ་ས་མུ་ད་ཡོ་པི དུ་ཀྑོ་ཏི? ཨཱ་མ་ནྟཱ. ཏཱི་ཎེ་ཝ ཨ་རི་ཡ་ས་ཙྩཱ་ནཱི་ཏི? ན ཧེ་ཝཾ ཝ་ཏྟ་བྦེ…པེ… ཏཱི་ཎེ་ཝ ཨ་རི་ཡ་ས་ཙྩཱ་ནཱི་ཏི? ཨཱ་མ་ནྟཱ. ན་ནུ ཙ་ཏྟཱ་རི ཨ་རི་ཡ་ས་ཙྩཱ་ནི ཝུ་ཏྟཱ་ནི བྷ་ག་ཝ་ཏཱ – དུ་ཀྑཾ, དུ་ཀྑ་ས་མུ་ད་ཡོ, དུ་ཀྑ་ནི་རོ་དྷོ, དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ་ཏི? ཨཱ་མ་ནྟཱ. ཧ་ཉྩི ཙ་ཏྟཱ་རི ཨ་རི་ཡ་ས་ཙྩཱ་ནི ཝུ་ཏྟཱ་ནི བྷ་ག་ཝ་ཏཱ – དུ་ཀྑཾ, དུ་ཀྑ་ས་མུ་ད་ཡོ, དུ་ཀྑ་ནི་རོ་དྷོ, དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ; ནོ ཙ ཝ་ཏ རེ ཝ་ཏྟ་བྦེ – ‘‘ཏཱི་ཎེ་ཝ ཨ་རི་ཡ་ས་ཙྩཱ་ནཱི’’ཏི.
དུ་ཀྑ་ས་མུ་ད་ཡོ་པི དུ་ཀྑོ་ཏི? ཨཱ་མ་ནྟཱ. ཀེ་ན་ཊྛེ་ནཱ་ཏི? ཨ་ནི་ཙྩ་ཊྛེ་ན. ཨ་རི་ཡ་མ་གྒོ ཨ་ནི་ཙྩོ་ཏི? ཨཱ་མ་ནྟཱ. ཨ་རི་ཡ་མ་གྒོ དུ་ཀྑོ་ཏི? ན ཧེ་ཝཾ ཝ་ཏྟ་བྦེ…པེ….
ཨ་རི་ཡ་མ་གྒོ ཨ་ནི་ཙྩོ, སོ ཙ ན དུ་ཀྑོ་ཏི? ཨཱ་མ་ནྟཱ. དུ་ཀྑ་ས་མུ་ད་ཡོ ཨ་ནི་ཙྩོ, སོ ཙ ན དུ་ཀྑོ་ཏི? ན ཧེ་ཝཾ ཝ་ཏྟ་བྦེ…པེ… དུ་ཀྑ་ས་མུ་ད་ཡོ ཨ་ནི་ཙྩོ, སོ ཙ དུ་ཀྑོ་ཏི? ཨཱ་མ་ནྟཱ. ཨ་རི་ཡ་མ་གྒོ ཨ་ནི་ཙྩོ, སོ ཙ དུ་ཀྑོ་ཏི? ན ཧེ་ཝཾ ཝ་ཏྟ་བྦེ…པེ….
༧༩༠. ན ཝ་ཏྟ་བྦཾ – ‘‘ཋ་པེ་ཏྭཱ ཨ་རི་ཡ་མ་གྒཾ ཨ་ཝ་སེ་སཱ ས་ངྑཱ་རཱ དུ་ཀྑཱ’’ཏི? ཨཱ་མ་ནྟཱ. ན་ནུ སཱ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ་ཏི? ཨཱ་མ་ནྟཱ. ཧ་ཉྩི སཱ དུ་ཀྑ་ནི་རོ་དྷ་གཱ་མི་ནཱི པ་ཊི་པ་དཱ, ཏེ་ན ཝ་ཏ རེ ཝ་ཏྟ་བྦེ – ‘‘ཋ་པེ་ཏྭཱ ཨ་རི་ཡ་མ་གྒཾ ཨ་ཝ་སེ་སཱ ས་ངྑཱ་རཱ དུ་ཀྑཱ’’ཏི.
ཋ་པེ་ཏྭཱ ཨ་རི་ཡ་མ་གྒ་ནྟི་ཀ་ཐཱ ནི་ཊྛི་ཏཱ.
༡༧. ས་ཏྟ་ར་ས་མ་ཝ་གྒོ
(༡༧༡) ༦. ན ཝ་ཏྟ་བྦཾ ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏི་ཀ་ཐཱ
༧༩༡. ན ཝ་ཏྟ་བྦཾ – ‘‘ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི’’ཏི? ཨཱ་མ་ནྟཱ. ན་ནུ ས་ངྒྷོ ཨཱ་ཧུ་ནེ་ཡྻོ པཱ་ཧུ་ནེ་ཡྻོ ད་ཀྑི་ཎེ་ཡྻོ ཨ་ཉྫ་ལི་ཀ་ར་ཎཱི་ཡོ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ་ཏི? ཨཱ་མ་ནྟཱ. ཧ་ཉྩི ས་ངྒྷོ ཨཱ་ཧུ་ནེ་ཡྻོ པཱ་ཧུ་ནེ་ཡྻོ ད་ཀྑི་ཎེ་ཡྻོ ཨ་ཉྫ་ལི་ཀ་ར་ཎཱི་ཡོ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི’’ཏི.
ན ཝ་ཏྟ་བྦཾ – ‘‘ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི’’ཏི? ཨཱ་མ་ནྟཱ. ན་ནུ ཙ་ཏྟཱ་རོ པུ་རི་ས་ཡུ་གཱ ཨ་ཊྛ་པུ་རི་ས་པུ་གྒ་ལཱ ད་ཀྑི་ཎེ་ཡྻཱ ཝུ་ཏྟཱ བྷ་ག་ཝ་ཏཱ་ཏི? ཨཱ་མ་ནྟཱ. ཧ་ཉྩི ཙ་ཏྟཱ་རོ པུ་རི་ས་ཡུ་གཱ ཨ་ཊྛ པུ་རི་ས་པུ་གྒ་ལཱ ད་ཀྑི་ཎེ་ཡྻཱ ཝུ་ཏྟཱ བྷ་ག་ཝ་ཏཱ, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི’’ཏི.
ན ཝ་ཏྟ་བྦཾ – ‘‘ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི’’ཏི? ཨཱ་མ་ནྟཱ. ན་ནུ ཨ་ཏྠི ཀེ་ཙི ས་ངྒྷ་སྶ དཱ་ནཾ དེ་ནྟཱི་ཏི? ཨཱ་མ་ནྟཱ. ཧ་ཉྩི ཨ་ཏྠི ཀེ་ཙི ས་ངྒྷ་སྶ དཱ་ནཾ དེ་ནྟི, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི’’ཏི. ན་ནུ ཨ་ཏྠི ཀེ་ཙི ས་ངྒྷ་སྶ ཙཱི་ཝ་རཾ དེ་ནྟི…པེ… པི་ཎྜ་པཱ་ཏཾ དེ་ནྟི… སེ་ནཱ་ས་ནཾ དེ་ནྟི… གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ དེ་ནྟི… ཁཱ་ད་ནཱི་ཡཾ དེ་ནྟི… བྷོ་ཛ་ནཱི་ཡཾ དེ་ནྟི…པེ… པཱ་ནཱི་ཡཾ དེ་ནྟཱི་ཏི? ཨཱ་མ་ནྟཱ. ཧ་ཉྩི ཨ་ཏྠི ཀེ་ཙི ས་ངྒྷ་སྶ པཱ་ནཱི་ཡཾ དེ་ནྟི, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི’’ཏི.
ན ཝ་ཏྟ་བྦཾ – ‘‘ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ –
‘‘ཨཱ་ཧུ་ཏིཾ ཛཱ་ཏ་ཝེ་དོ་ཝ, མ་ཧཱ་མེ་གྷཾ་ཝ མེ་ད་ནཱི;
ས་ངྒྷོ ས་མཱ་དྷི་ས་མྤ་ནྣོ, པ་ཊི་གྒ་ཎྷཱ་ཏི ད་ཀྑི་ཎ’’ནྟི.
ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི་ཏི.
༧༩༢. ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི་ཏི? ཨཱ་མ་ནྟཱ. མ་གྒོ པ་ཊི་གྒ་ཎྷཱ་ཏི, ཕ་ལཾ པ་ཊི་གྒ་ཎྷཱ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
ན ཝ་ཏྟ་བྦཾ ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏཱི་ཏི་ཀ་ཐཱ ནི་ཊྛི་ཏཱ.
༡༧. ས་ཏྟ་ར་ས་མ་ཝ་གྒོ
(༡༧༢) ༧. ན ཝ་ཏྟ་བྦཾ ས་ངྒྷོ ད་ཀྑི་ཎཾ ཝི་སོ་དྷེ་ཏཱི་ཏི་ཀ་ཐཱ
༧༩༣. ན ཝ་ཏྟ་བྦཾ – ‘‘ས་ངྒྷོ ད་ཀྑི་ཎཾ ཝི་སོ་དྷེ་ཏཱི’’ཏི? ཨཱ་མ་ནྟཱ. ན་ནུ ས་ངྒྷོ ཨཱ་ཧུ་ནེ་ཡྻོ པཱ་ཧུ་ནེ་ཡྻོ ད་ཀྑི་ཎེ་ཡྻོ ཨ་ཉྫ་ལི་ཀ་ར་ཎཱི་ཡོ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ་ཏི? ཨཱ་མ་ནྟཱ. ཧ་ཉྩི ས་ངྒྷོ ཨཱ་ཧུ་ནེ་ཡྻོ…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷོ ད་ཀྑི་ཎཾ ཝི་སོ་དྷེ་ཏཱི’’ཏི.
ན ཝ་ཏྟ་བྦཾ – ‘‘ས་ངྒྷོ ད་ཀྑི་ཎཾ ཝི་སོ་དྷེ་ཏཱི’’ཏི? ཨཱ་མ་ནྟཱ. ན་ནུ ཙ་ཏྟཱ་རོ པུ་རི་ས་ཡུ་གཱ ཨ་ཊྛ པུ་རི་ས་པུ་གྒ་ལཱ ད་ཀྑི་ཎེ་ཡྻཱ ཝུ་ཏྟཱ བྷ་ག་ཝ་ཏཱ་ཏི? ཨཱ་མ་ནྟཱ. ཧ་ཉྩི ཙ་ཏྟཱ་རོ པུ་རི་ས་ཡུ་གཱ ཨ་ཊྛ པུ་རི་ས་པུ་གྒ་ལཱ ད་ཀྑི་ཎེ་ཡྻཱ ཝུ་ཏྟཱ བྷ་ག་ཝ་ཏཱ, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷོ ད་ཀྑི་ཎཾ ཝི་སོ་དྷེ་ཏཱི’’ཏི.
ན ཝ་ཏྟ་བྦཾ – ‘‘ས་ངྒྷོ ད་ཀྑི་ཎཾ ཝི་སོ་དྷེ་ཏཱི’’ཏི? ཨཱ་མ་ནྟཱ. ན་ནུ ཨ་ཏྠི ཀེ་ཙི ས་ངྒྷ་སྶ དཱ་ནཾ ད་ཏྭཱ ད་ཀྑི་ཎཾ ཨཱ་རཱ་དྷེ་ནྟཱི་ཏི? ཨཱ་མ་ནྟཱ. ཧ་ཉྩི ཨ་ཏྠི ཀེ་ཙི ས་ངྒྷ་སྶ དཱ་ནཾ ད་ཏྭཱ ད་ཀྑི་ཎཾ ཨཱ་རཱ་དྷེ་ནྟི, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷོ ད་ཀྑི་ཎཾ ཝི་སོ་དྷེ་ཏཱི’’ཏི.
ན་ནུ ཨ་ཏྠི ཀེ་ཙི ས་ངྒྷ་སྶ ཙཱི་ཝ་རཾ ད་ཏྭཱ…པེ… པི་ཎྜ་པཱ་ཏཾ ད་ཏྭཱ…པེ… སེ་ནཱ་ས་ནཾ ད་ཏྭཱ… གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ ད་ཏྭཱ… ཁཱ་ད་ནཱི་ཡཾ ད་ཏྭཱ… བྷོ་ཛ་ནཱི་ཡཾ ད་ཏྭཱ…པེ… པཱ་ནཱི་ཡཾ ད་ཏྭཱ ད་ཀྑི་ཎཾ ཨཱ་རཱ་དྷེ་ནྟཱི་ཏི? ཨཱ་མ་ནྟཱ. ཧ་ཉྩི ཨ་ཏྠི ཀེ་ཙི ས་ངྒྷ་སྶ པཱ་ནཱི་ཡཾ ད་ཏྭཱ ད་ཀྑི་ཎཾ ཨཱ་རཱ་དྷེ་ནྟི, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷོ ད་ཀྑི་ཎཾ ཝི་སོ་དྷེ་ཏཱི’’ཏི.
༧༩༤. ས་ངྒྷོ ད་ཀྑི་ཎཾ ཝི་སོ་དྷེ་ཏཱི་ཏི? ཨཱ་མ་ནྟཱ. མ་གྒོ ཝི་སོ་དྷེ་ཏི, ཕ་ལཾ ཝི་སོ་དྷེ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
ན ཝ་ཏྟ་བྦཾ ས་ངྒྷོ ད་ཀྑི་ཎཾ ཝི་སོ་དྷེ་ཏཱི་ཏི་ཀ་ཐཱ ནི་ཊྛི་ཏཱ.
༡༧. ས་ཏྟ་ར་ས་མ་ཝ་གྒོ
(༡༧༣) ༨. ན ཝ་ཏྟ་བྦཾ ས་ངྒྷོ བྷུ་ཉྫ་ཏཱི་ཏི་ཀ་ཐཱ
༧༩༥. ན ཝ་ཏྟ་བྦཾ – ‘‘ས་ངྒྷོ བྷུ་ཉྫ་ཏི པི་ཝ་ཏི ཁཱ་ད་ཏི སཱ་ཡ་ཏཱི’’ཏི? ཨཱ་མ་ནྟཱ. ན་ནུ ཨ་ཏྠི ཀེ་ཙི ས་ངྒྷ་བྷ་ཏྟཱ་ནི ཀ་རོ་ནྟི, ཨུ་དྡེ་ས་བྷ་ཏྟཱ་ནི ཀ་རོ་ནྟི, ཡཱ་གུ་པཱ་ནཱ་ནི ཀ་རོ་ནྟཱི་ཏི? ཨཱ་མ་ནྟཱ. ཧ་ཉྩི ཨ་ཏྠི ཀེ་ཙི ས་ངྒྷ་བྷ་ཏྟཱ་ནི ཀ་རོ་ནྟི, ཨུ་དྡེ་ས་བྷ་ཏྟཱ་ནི ཀ་རོ་ནྟི, ཡཱ་གུ་པཱ་ནཱ་ནི ཀ་རོ་ནྟི, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷོ བྷུ་ཉྫ་ཏི པི་ཝ་ཏི ཁཱ་ད་ཏི སཱ་ཡ་ཏཱི’’ཏི.
ན ཝ་ཏྟ་བྦཾ – ‘‘ས་ངྒྷོ བྷུ་ཉྫ་ཏི པི་ཝ་ཏི ཁཱ་ད་ཏི སཱ་ཡ་ཏཱི’’ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ག་ཎ་བྷོ་ཛ་ནཾ པ་ར་མྤ་ར་བྷོ་ཛ་ནཾ ཨ་ཏི་རི་ཏྟ་བྷོ་ཛ་ནཾ ཨ་ན་ཏི་རི་ཏྟ་བྷོ་ཛ་ན’’ནྟི? ཨཱ་མ་ནྟཱ. ཧ་ཉྩི ཝུ་ཏྟཾ བྷ་ག་ཝ་ཏཱ – ‘‘ག་ཎ་བྷོ་ཛ་ནཾ པ་ར་མྤ་ར་བྷོ་ཛ་ནཾ ཨ་ཏི་རི་ཏྟ་བྷོ་ཛ་ནཾ ཨ་ན་ཏི་རི་ཏྟ་བྷོ་ཛ་ནཾ’’, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷོ བྷུ་ཉྫ་ཏི པི་ཝ་ཏི ཁཱ་ད་ཏི སཱ་ཡ་ཏཱི’’ཏི.
ན ཝ་ཏྟ་བྦཾ – ‘‘ས་ངྒྷོ བྷུ་ཉྫ་ཏི པི་ཝ་ཏི ཁཱ་ད་ཏི སཱ་ཡ་ཏཱི’’ཏི? ཨཱ་མ་ནྟཱ. ན་ནུ ཨ་ཊྛ པཱ་ནཱ་ནི ཝུ་ཏྟཱ་ནི བྷ་ག་ཝ་ཏཱ – ཨ་མྦ་པཱ་ནཾ, ཛ་མྦུ་པཱ་ནཾ, ཙོ་ཙ་པཱ་ནཾ, མོ་ཙ་པཱ་ནཾ, མ་དྷུ་ཀ་པཱ་ནཾ, [མ་དྷུ་པཱ་ནཾ (སཱི. སྱཱ. ཀཾ. པཱི.) མ་ཧཱ་ཝ. ༣༠༠ པ་ན པ་སྶི་ཏ་བྦཾ] མུ་དྡི་ཀ་པཱ་ནཾ, སཱ་ལུ་ཀ་པཱ་ནཾ, ཕཱ་རུ་ས་ཀ་པཱ་ན་ནྟི? ཨཱ་མ་ནྟཱ. ཧ་ཉྩི ཨ་ཊྛ པཱ་ནཱ་ནི ཝུ་ཏྟཱ་ནི བྷ་ག་ཝ་ཏཱ – ཨ་མྦ་པཱ་ནཾ, ཛ་མྦུ་པཱ་ནཾ, ཙོ་ཙ་པཱ་ནཾ, མོ་ཙ་པཱ་ནཾ, མ་དྷུ་ཀ་པཱ་ནཾ, མུ་དྡི་ཀ་པཱ་ནཾ, སཱ་ལུ་ཀ་པཱ་ནཾ, ཕཱ་རུ་ས་ཀ་པཱ་ནཾ, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷོ བྷུ་ཉྫ་ཏི པི་ཝ་ཏི ཁཱ་ད་ཏི སཱ་ཡ་ཏཱི’’ཏི.
༧༩༦. ས་ངྒྷོ བྷུ་ཉྫ་ཏི པི་ཝ་ཏི ཁཱ་ད་ཏི སཱ་ཡ་ཏཱི་ཏི? ཨཱ་མ་ནྟཱ. མ་གྒོ བྷུ་ཉྫ་ཏི པི་ཝ་ཏི ཁཱ་ད་ཏི སཱ་ཡ་ཏི, ཕ་ལཾ བྷུ་ཉྫ་ཏི པི་ཝ་ཏི ཁཱ་ད་ཏི སཱ་ཡ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
ན ཝ་ཏྟ་བྦཾ ས་ངྒྷོ བྷུ་ཉྫ་ཏཱི་ཏི་ཀ་ཐཱ ནི་ཊྛི་ཏཱ.
༡༧. ས་ཏྟ་ར་ས་མ་ཝ་གྒོ
(༡༧༤) ༩. ན ཝ་ཏྟ་བྦཾ ས་ངྒྷ་སྶ་དི་ནྣཾ མ་ཧ་པྥ་ལ་ནྟི་ཀ་ཐཱ
༧༩༧. ན ཝ་ཏྟ་བྦཾ – ‘‘ས་ངྒྷ་སྶ དི་ནྣཾ མ་ཧ་པྥ་ལ’’ནྟི? ཨཱ་མ་ནྟཱ. ན་ནུ ས་ངྒྷོ ཨཱ་ཧུ་ནེ་ཡྻོ པཱ་ཧུ་ནེ་ཡྻོ ད་ཀྑི་ཎེ་ཡྻོ ཨ་ཉྫ་ལི་ཀ་ར་ཎཱི་ཡོ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ་ཏི? ཨཱ་མ་ནྟཱ. ཧ་ཉྩི ས་ངྒྷོ ཨཱ་ཧུ་ནེ་ཡྻོ…པེ… ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷ་སྶ དི་ནྣཾ མ་ཧ་པྥ་ལ’’ནྟི.
ན ཝ་ཏྟ་བྦཾ – ‘‘ས་ངྒྷ་སྶ དི་ནྣཾ མ་ཧ་པྥ་ལ’’ནྟི? ཨཱ་མ་ནྟཱ. ན་ནུ ཙ་ཏྟཱ་རོ པུ་རི་ས་ཡུ་གཱ ཨ་ཊྛ པུ་རི་ས་པུ་གྒ་ལཱ ད་ཀྑི་ཎེ་ཡྻཱ ཝུ་ཏྟཱ བྷ་ག་ཝ་ཏཱ་ཏི? ཨཱ་མ་ནྟཱ. ཧ་ཉྩི ཙ་ཏྟཱ་རོ པུ་རི་ས་ཡུ་གཱ ཨ་ཊྛ པུ་རི་ས་པུ་གྒ་ལཱ ད་ཀྑི་ཎེ་ཡྻཱ ཝུ་ཏྟཱ བྷ་ག་ཝ་ཏཱ, ཏེ་ན ཝ་ཏ རེ ཝ་ཏྟ་བྦེ – ‘‘ས་ངྒྷ་སྶ དི་ནྣཾ མ་ཧ་པྥ་ལ’’ནྟི.
༧༩༨. ན ཝ་ཏྟ་བྦཾ – ‘‘ས་ངྒྷ་སྶ དི་ནྣཾ མ་ཧ་པྥ་ལ’’ནྟི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ས་ངྒྷེ, གོ་ཏ་མི, དེ་ཧི, ས་ངྒྷེ ཏེ དི་ནྣེ ཨ་ཧ་ཉྩེ་ཝ པཱུ་ཛི་ཏོ བྷ་ཝི་སྶཱ་མི ས་ངྒྷོ ཙཱ’’ཏི [མ. ནི. ༣.༣༧༦]. ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ས་ངྒྷ་སྶ དི་ནྣཾ མ་ཧ་པྥ་ལ་ནྟི.
ན ཝ་ཏྟ་བྦཾ – ‘‘ས་ངྒྷ་སྶ དི་ནྣཾ མ་ཧ་པྥ་ལ’’ནྟི? ཨཱ་མ་ནྟཱ. ན་ནུ ས་ཀྐོ དེ་ཝཱ་ན་མི་ནྡོ བྷ་ག་ཝ་ནྟཾ ཨེ་ཏ་ད་ཝོ་ཙ –
‘‘ཡ་ཛ་མཱ་ནཱ་ནཾ མ་ནུ་སྶཱ་ནཾ, པུ་ཉྙ་པེ་ཀྑཱ་ན པཱ་ཎི་ནཾ;
ཀ་རོ་ཏཾ ཨོ་པ་དྷི་ཀཾ པུ་ཉྙཾ, ཀ་ཏྠ དི་ནྣཾ མ་ཧ་པྥ་ལ་ནྟི.
‘‘ཙ་ཏྟཱ་རོ ཙ པ་ཊི་པ་ནྣཱ, ཙ་ཏྟཱ་རོ ཙ ཕ་ལེ ཋི་ཏཱ;
ཨེ་ས ས་ངྒྷོ ཨུ་ཛུ་བྷཱུ་ཏོ, པ་ཉྙཱ་སཱི་ལ་ས་མཱ་ཧི་ཏོ.
‘‘ཡ་ཛ་མཱ་ནཱ་ནཾ མ་ནུ་སྶཱ་ནཾ, པུ་ཉྙ་པེ་ཀྑཱ་ན པཱ་ཎི་ནཾ;
ཀ་རོ་ཏཾ ཨོ་པ་དྷི་ཀཾ པུ་ཉྙཾ, ས་ངྒྷེ དི་ནྣཾ མ་ཧ་པྥ་ལ’’ནྟི [སཾ. ནི. ༡.༢༦༢; ཝི. ཝ. ༦༤༢, ༧༥༡].
‘‘ཨེ་སོ ཧི ས་ངྒྷོ ཝི་པུ་ལོ མ་ཧ་གྒ་ཏོ,
ཨེ་ས་པྤ་མེ་ཡྻོ ཨུ་ད་དྷཱི་ཝ སཱ་ག་རོ;
ཨེ་ཏེ ཧི སེ་ཊྛཱ ན་ར་ཝཱི་ར་སཱ་ཝ་ཀཱ [ན་ར་སཱི་ཧ་སཱ་ཝ་ཀཱ (ཀ.)],
པ་བྷ་ངྐ་རཱ དྷ་མྨ་མུ་དཱི་ར་ཡ་ནྟི.
‘‘ཏེ་སཾ སུ་དི་ནྣཾ སུ་ཧུ་ཏཾ སུ་ཡི་ཊྛཾ,
ཡེ ས་ངྒྷ་མུ་དྡི་སྶ ད་ད་ནྟི དཱ་ནཾ;
སཱ ད་ཀྑི་ཎཱ ས་ངྒྷ་ག་ཏཱ པ་ཏི་ཊྛི་ཏཱ,
མ་ཧ་པྥ་ལཱ ལོ་ཀ་ཝི་དཱུ་ན ཝ་ཎྞི་ཏཱ.
‘‘ཨེ་ཏཱ་དི་སཾ ཡ་ཉྙ་མ་ནུ་སྶ་ར་ནྟཱ,
ཡེ ཝེ་ད་ཛཱ་ཏཱ ཝི་ཙ་ར་ནྟི [ཝི་ཧ་ར་ནྟི (སཱི. ཀ.)] ལོ་ཀེ;
ཝི་ནེ་ཡྻ མ་ཙྪེ་ར་མ་ལཾ ས་མཱུ་ལཾ,
ཨ་ནི་ནྡི་ཏཱ ས་གྒ་མུ་པེ་ནྟི ཋཱ་ན’’ནྟི [ཝི. ཝ. ༦༤༥, ༧༥༤].
ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ས་ངྒྷ་སྶ དི་ནྣཾ མ་ཧ་པྥ་ལ་ནྟི.
ན ཝ་ཏྟ་བྦཾ ས་ངྒྷ་སྶ དི་ནྣཾ མ་ཧ་པྥ་ལ་ནྟི་ཀ་ཐཱ ནི་ཊྛི་ཏཱ.
༡༧. ས་ཏྟ་ར་ས་མ་ཝ་གྒོ
(༡༧༥) ༡༠. ན ཝ་ཏྟ་བྦཾ བུ་དྡྷ་སྶ་དི་ནྣཾ མ་ཧ་པྥ་ལ་ནྟི་ཀ་ཐཱ
༧༩༩. ན ཝ་ཏྟ་བྦཾ – ‘‘བུ་དྡྷ་སྶ དི་ནྣཾ མ་ཧ་པྥ་ལ’’ནྟི? ཨཱ་མ་ནྟཱ. ན་ནུ བྷ་ག་ཝཱ དྭི་པ་དཱ་ནཾ ཨ་གྒོ, དྭི་པ་དཱ་ནཾ སེ་ཊྛོ, དྭི་པ་དཱ་ནཾ པ་མོ་ཀྑོ, དྭི་པ་དཱ་ནཾ ཨུ་ཏྟ་མོ, དྭི་པ་དཱ་ནཾ པ་ཝ་རོ ཨ་ས་མོ ཨ་ས་མ་ས་མོ ཨ་པྤ་ཊི་ས་མོ ཨ་པྤ་ཊི་བྷཱ་གོ ཨ་པྤ་ཊི་པུ་གྒ་ལོ་ཏི? ཨཱ་མ་ནྟཱ. ཧ་ཉྩི བྷ་ག་ཝཱ དྭི་པ་དཱ་ནཾ ཨ་གྒོ, དྭི་པ་དཱ་ནཾ སེ་ཊྛོ, དྭི་པ་དཱ་ནཾ པ་མོ་ཀྑོ, དྭི་པ་དཱ་ནཾ ཨུ་ཏྟ་མོ, དྭི་པ་དཱ་ནཾ པ་ཝ་རོ ཨ་ས་མོ ཨ་ས་མ་ས་མོ ཨ་པྤ་ཊི་ས་མོ ཨ་པྤ་ཊི་བྷཱ་གོ ཨ་པྤ་ཊི་པུ་གྒ་ལོ, ཏེ་ན ཝ་ཏ རེ ཝ་ཏྟ་བྦེ – ‘‘བུ་དྡྷ་སྶ དི་ནྣཾ མ་ཧ་པྥ་ལ’’ནྟི.
ན ཝ་ཏྟ་བྦཾ – ‘‘བུ་དྡྷ་སྶ དི་ནྣཾ མ་ཧ་པྥ་ལ’’ནྟི? ཨཱ་མ་ནྟཱ. ཨ་ཏྠི ཀོ་ཙི བུ་དྡྷེ་ན ས་མ་ས་མོ – སཱི་ལེ་ན ས་མཱ་དྷི་ནཱ པ་ཉྙཱ་ཡཱ་ཏི? ན་ཏྠི. ཧ་ཉྩི ན་ཏྠི ཀོ་ཙི བུ་དྡྷེ་ན ས་མ་ས་མོ – སཱི་ལེ་ན ས་མཱ་དྷི་ནཱ པ་ཉྙཱ་ཡ, ཏེ་ན ཝ་ཏ རེ ཝ་ཏྟ་བྦེ – ‘‘བུ་དྡྷ་སྶ དི་ནྣཾ མ་ཧ་པྥ་ལ’’ནྟི.
ན ཝ་ཏྟ་བྦཾ – ‘‘བུ་དྡྷ་སྶ དི་ནྣཾ མ་ཧ་པྥ་ལ’’ནྟི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ –
‘‘ན་ཡི་མ་སྨིཾ ཝཱ ལོ་ཀེ པ་ར་སྨིཾ ཝཱ པ་ན,
བུ་དྡྷེ་ན སེ་ཊྛོ ཙ ས་མོ ཙ ཝི་ཛྫ་ཏི;
ཡ་མཱ་ཧུ་ནེ་ཡྻཱ་ནཾ ཨ་གྒ་ཏཾ ག་ཏོ,
པུ་ཉྙ་ཏྠི་ཀཱ་ནཾ ཝི་པུ་ལ་པྥ་ལེ་སི་ན’’ནྟི [ཝི. ཝ. ༡༠༤༧].
ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི བུ་དྡྷ་སྶ དི་ནྣཾ མ་ཧ་པྥ་ལ་ནྟི.
ན ཝ་ཏྟ་བྦཾ བུ་དྡྷ་སྶ དི་ནྣཾ མ་ཧ་པྥ་ལ་ནྟི་ཀ་ཐཱ ནི་ཊྛི་ཏཱ.
༡༧. ས་ཏྟ་ར་ས་མ་ཝ་གྒོ
(༡༧༦) ༡༡. ད་ཀྑི་ཎཱ་ཝི་སུ་དྡྷི་ཀ་ཐཱ
༨༠༠. དཱ་ཡ་ཀ་ཏོ་ཝ དཱ་ནཾ ཝི་སུ་ཛ྄ཛྷ་ཏི, ནོ པ་ཊི་གྒཱ་ཧ་ཀ་ཏོ་ཏི? ཨཱ་མ་ནྟཱ. ན་ནུ ཨ་ཏྠི ཀེ་ཙི པ་ཊི་གྒཱ་ཧ་ཀཱ ཨཱ་ཧུ་ནེ་ཡྻཱ པཱ་ཧུ་ནེ་ཡྻཱ ད་ཀྑི་ཎེ་ཡྻཱ ཨ་ཉྫ་ལི་ཀ་ར་ཎཱི་ཡཱ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶཱ་ཏི? ཨཱ་མ་ནྟཱ. ཧ་ཉྩི ཨ་ཏྠི ཀེ་ཙི པ་ཊི་གྒཱ་ཧ་ཀཱ ཨཱ་ཧུ་ནེ་ཡྻཱ པཱ་ཧུ་ནེ་ཡྻཱ ད་ཀྑི་ཎེ་ཡྻཱ ཨ་ཉྫ་ལི་ཀ་ར་ཎཱི་ཡཱ ཨ་ནུ་ཏྟ་རཾ པུ་ཉྙ་ཀྑེ་ཏྟཾ ལོ་ཀ་སྶ, ནོ ཙ ཝ་ཏ རེ ཝ་ཏྟ་བྦེ – ‘‘དཱ་ཡ་ཀ་ཏོ་ཝ དཱ་ནཾ ཝི་སུ་ཛ྄ཛྷ་ཏི, ནོ པ་ཊི་གྒཱ་ཧ་ཀ་ཏོ’’ཏི.
དཱ་ཡ་ཀ་ཏོ་ཝ དཱ་ནཾ ཝི་སུ་ཛ྄ཛྷ་ཏི, ནོ པ་ཊི་གྒཱ་ཧ་ཀ་ཏོ་ཏི? ཨཱ་མ་ནྟཱ. ན་ནུ ཙ་ཏྟཱ་རོ པུ་རི་ས་ཡུ་གཱ ཨ་ཊྛ པུ་རི་ས་པུ་གྒ་ལཱ ད་ཀྑི་ཎེ་ཡྻཱ ཝུ་ཏྟཱ བྷ་ག་ཝ་ཏཱ་ཏི? ཨཱ་མ་ནྟཱ. ཧ་ཉྩི ཙ་ཏྟཱ་རོ པུ་རི་ས་ཡུ་གཱ ཨ་ཊྛ པུ་རི་ས་པུ་གྒ་ལཱ ད་ཀྑི་ཎེ་ཡྻཱ ཝུ་ཏྟཱ བྷ་ག་ཝ་ཏཱ, ནོ ཙ ཝ་ཏ རེ ཝ་ཏྟ་བྦེ – ‘‘དཱ་ཡ་ཀ་ཏོ་ཝ དཱ་ནཾ ཝི་སུ་ཛ྄ཛྷ་ཏི, ནོ པ་ཊི་གྒཱ་ཧ་ཀ་ཏོ’’ཏི.
དཱ་ཡ་ཀ་ཏོ་ཝ དཱ་ནཾ ཝི་སུ་ཛ྄ཛྷ་ཏི, ནོ པ་ཊི་གྒཱ་ཧ་ཀ་ཏོ་ཏི? ཨཱ་མ་ནྟཱ. ན་ནུ ཨ་ཏྠི ཀེ་ཙི སོ་ཏཱ་པ་ནྣེ དཱ་ནཾ ད་ཏྭཱ ད་ཀྑི་ཎཾ ཨཱ་རཱ་དྷེ་ནྟཱི་ཏི? ཨཱ་མ་ནྟཱ. ཧ་ཉྩི ཨ་ཏྠི ཀེ་ཙི སོ་ཏཱ་པ་ནྣེ དཱ་ནཾ ད་ཏྭཱ ད་ཀྑི་ཎཾ ཨཱ་རཱ་དྷེ་ནྟི, ནོ ཙ ཝ་ཏ རེ ཝ་ཏྟ་བྦེ – ‘‘དཱ་ཡ་ཀ་ཏོ་ཝ དཱ་ནཾ ཝི་སུ་ཛ྄ཛྷ་ཏི, ནོ པ་ཊི་གྒཱ་ཧ་ཀ་ཏོ’’ཏི.
ན་ནུ ཨ་ཏྠི ཀེ་ཙི ས་ཀ་དཱ་གཱ་མི་སྶ…པེ… ཨ་ནཱ་གཱ་མི་སྶ…པེ… ཨ་ར་ཧ་ཏོ དཱ་ནཾ ད་ཏྭཱ ད་ཀྑི་ཎཾ ཨཱ་རཱ་དྷེ་ནྟཱི་ཏི? ཨཱ་མ་ནྟཱ. ཧ་ཉྩི ཨ་ཏྠི ཀེ་ཙི ཨ་ར་ཧ་ཏོ དཱ་ནཾ ད་ཏྭཱ ད་ཀྑི་ཎཾ ཨཱ་རཱ་དྷེ་ནྟི, ནོ ཙ ཝ་ཏ རེ ཝ་ཏྟ་བྦེ – ‘‘དཱ་ཡ་ཀ་ཏོ་ཝ དཱ་ནཾ ཝི་སུ་ཛ྄ཛྷ་ཏི, ནོ པ་ཊི་གྒཱ་ཧ་ཀ་ཏོ’’ཏི.
༨༠༡. པ་ཊི་གྒཱ་ཧ་ཀ་ཏོ དཱ་ནཾ ཝི་སུ་ཛ྄ཛྷ་ཏཱི་ཏི? ཨཱ་མ་ནྟཱ. ཨ་ཉྙོ ཨ་ཉྙ་སྶ ཀཱ་ར་ཀོ, པ་ར་ཀ་ཏཾ སུ་ཁ་དུ་ཀྑཾ, ཨ་ཉྙོ ཀ་རོ་ཏི ཨ་ཉྙོ པ་ཊི་སཾ་ཝེ་དེ་ཏཱི་ཏི? ན ཧེ་ཝཾ ཝ་ཏྟ་བྦེ…པེ….
དཱ་ཡ་ཀ་ཏོ་ཝ དཱ་ནཾ ཝི་སུ་ཛ྄ཛྷ་ཏི, ནོ པ་ཊི་གྒཱ་ཧ་ཀ་ཏོ་ཏི? ཨཱ་མ་ནྟཱ. ན་ནུ ཝུ་ཏྟཾ བྷ་ག་ཝ་ཏཱ – ‘‘ཙ་ཏ་སྶོ ཁོ ཨི་མཱ, ཨཱ་ན་ནྡ, ད་ཀྑི་ཎཱ ཝི་སུ་དྡྷི་ཡོ! ཀ་ཏ་མཱ ཙ་ཏ་སྶོ? ཨ་ཏྠཱ་ན་ནྡ, ད་ཀྑི་ཎཱ དཱ་ཡ་ཀ་ཏོ ཝི་སུ་ཛ྄ཛྷ་ཏི, ནོ པ་ཊི་གྒཱ་ཧ་ཀ་ཏོ; ཨ་ཏྠཱ་ན་ནྡ, ད་ཀྑི་ཎཱ པ་ཊི་གྒཱ་ཧ་ཀ་ཏོ ཝི་སུ་ཛ྄ཛྷ་ཏི, ནོ དཱ་ཡ་ཀ་ཏོ; ཨ་ཏྠཱ་ན་ནྡ, ད་ཀྑི་ཎཱ དཱ་ཡ་ཀ་ཏོ ཙེ་ཝ ཝི་སུ་ཛ྄ཛྷ་ཏི པ་ཊི་གྒཱ་ཧ་ཀ་ཏོ ཙ; ཨ་ཏྠཱ་ན་ནྡ, ད་ཀྑི་ཎཱ ནེ་ཝ དཱ་ཡ་ཀ་ཏོ ཝི་སུ་ཛ྄ཛྷ་ཏི, ནོ པ་ཊི་གྒཱ་ཧ་ཀ་ཏོ. ཨི་མཱ ཁོ, ཨཱ་ན་ནྡ, ཙ་ཏ་སྶོ ད་ཀྑི་ཎཱ ཝི་སུ་དྡྷི་ཡོ’’ཏི [མ. ནི. ༣.༣༨༡]. ཨ་ཏྠེ་ཝ སུ་ཏྟ་ནྟོ་ཏི? ཨཱ་མ་ནྟཱ. ཏེ་ན ཧི ན ཝ་ཏྟ་བྦཾ – ‘‘དཱ་ཡ་ཀ་ཏོ་ཝ དཱ་ནཾ ཝི་སུ་ཛ྄ཛྷ་ཏི, ནོ པ་ཊི་གྒཱ་ཧ་ཀ་ཏོ’’ཏི.
ད་ཀྑི་ཎཱ་ཝི་སུ་དྡྷི་ཀ་ཐཱ ནི་ཊྛི་ཏཱ.
ས་ཏྟ་ར་ས་མ་ཝ་གྒོ.
ཏ་སྶུ་དྡཱ་ནཾ –
ཨ་ཏྠི ཨ་ར་ཧ་ཏོ པུ་ཉྙཱུ་པ་ཙ་ཡོ, ན་ཏྠི ཨ་ར་ཧ་ཏོ ཨ་ཀཱ་ལ་མ་ཙྩུ, ས་བྦ་མི་དཾ ཀ་མྨ་ཏོ, ཨི་ནྡྲི་ཡ་བ་དྡྷ་ཉྙེ་ཝ དུ་ཀྑཾ, ཋ་པེ་ཏྭཱ ཨ་རི་ཡ་མ་གྒཾ ཨ་ཝ་སེ་སཱ ས་ངྑཱ་རཱ དུ་ཀྑཱ, ས་ངྒྷོ ད་ཀྑི་ཎཾ པ་ཊི་གྒ་ཎྷཱ་ཏི, ས་ངྒྷོ ད་ཀྑི་ཎཾ ཝི་སོ་དྷེ་ཏི, ས་ངྒྷོ བྷུ་ཉྫ་ཏི པི་ཝ་ཏི ཁཱ་ད་ཏི སཱ་ཡ་ཏི, ས་ངྒྷ་སྶ དི་ནྣཾ མ་ཧ་པྥ་ལཾ, ཨ་ཏྠི དཱ་ནཾ ཝི་སུ་དྡྷི་ཡཱ་ཏི [ཝི་སུ་ཛ྄ཛྷ་ཏཱི་ཏི (སྱཱ.)].