ཨ་དྷ་མྨ་ཝཱ་དུ་པྤ་ཏྟི
ཨ་ཡཾ པ་ན ཨཱ་དི་ཏོ པ་ཊྛཱ་ཡ སཱ་ས་ན་མ་ལ་བྷཱུ་ཏཱ་ནཾ ཨ་དྷ་མྨ་ཝཱ་དཱ་ནཾ ཨུ་པྤ་ཏྟི. ཨ་སོ་ཀ་ར་ཉྙོ ཧི ཀཱ་ལེ ཨུ་པྤ་བྦཱ་ཛེ་ཏྭཱ ནི་ཀྐ་ཌྜྷི་ཏཱ ཨ་ཉྙ་ཏི་ཏྠི་ཡཱ བུ་དྡྷ་སཱ་ས་ནེ ཨ་ལ་དྡྷ་པ་ཏི་ཊྛཱ ཀོ་དྷཱ་བྷི་བྷཱུ་ཏཱ པཱ་ཊ་ལི་པུ་ཏྟ་ཏོ ནི་ཀྑ་མི་ཏྭཱ རཱ་ཛ་ག་ཧས་མཱི་པེ ནཱ་ལ་ནྡཱ་ཡཾ ས་ནྣི་པ་ཏི་ཏྭཱ ཨེ་ཝཾ ས་མྨ་ནྟ་ཡིཾ་སུ ‘‘མ་ཧཱ་ཛ་ན་སྶ བུ་དྡྷ་སཱ་ས་ནེ ཨ་ན་ཝ་གཱ་ཧ་ཏྠཱ་ཡ ས་ཀྱཱ་ནཾ དྷ་མྨ་ཝི་ན་ཡོ ནཱ་སེ་ཏ་བྦོ, ཏ་ཉྩ ཁོ ཏེ་སཾ ས་མ་ཡཾ ཨ་ཛཱ་ན་ནྟེ་ཧི ན ས་ཀྐཱ ཀཱ་ཏུཾ, ཏ་སྨཱ ཡེ་ན ཀེ་ན་ཙི ཨུ་པཱ་ཡེ་ན པུ་ན་པི ཏ་ཏྠ པ་བྦ་ཛི་ཏ་བྦ་མེ་ཝཱ’’ཏི. ཏེ ཨེ་ཝཾ ས་མྨ་ནྟ་ཡི་ཏྭཱ པུ་ན ཨཱ་ག་ནྟྭཱ ཝི་སུ་དྡྷ་ཏྠེ་ར་ཝཱ་དཱི་ན་མ་ནྟ་རཾ པ་ཝི་སི་ཏུཾ ཨ་ས་ཀྐོ་ནྟཱ ཏ་ད་ཉྙེ་སཾ ས་ཏྟ་ར་ས་ནྣཾ མ་ཧཱ་ས་ངྒྷི་ཀཱ་དི་ནི་ཀཱ་ཡཱ་ནཾ ས་ནྟི་ཀཾ ཨུ་པ་ས་ངྐ་མི་ཏྭཱ ཨ་ཏྟ་ནོ ཨ་ཉྙ་ཏི་ཏྠི་ཡ་བྷཱ་ཝཾ ཨ་ཛཱ་ནཱ་པེ་ཏྭཱ པ་བྦ་ཛི་ཏྭཱ པི་ཊ་ཀ་ཏྟ་ཡ་མུ་གྒ་ཎྷི་ཏྭཱ ཏ་ཉྩ ཝི་པ་རི་ཝ་ཏྟེ་ཏྭཱ ཏ་ཏོ ཀོ་ས་མྦིཾ ག་ནྟྭཱ དྷ་མྨ་ཝི་ན་ཡ་ནཱ་ས་ནཱ་ཡ ཨུ་པཱ་ཡཾ མ་ནྟ་ཡི་ཏྭཱ ༢༥༣-བུ་དྡྷ་ཝ་སྶེ ཚ་སུ ཋཱ་ནེ་སུ ཝ་ས་ནྟཱ (༡) ཧེ་མ་ཝ་ཏི་ཀོ (༢) རཱ་ཛ་གི་རི་ཀོ (༣) སི་དྡྷ་ཏྠི་ཀོ (༤) པུ་བྦ་སེ་ལི་ཡོ (༥) ཨ་པ་ར་སེ་ལི་ཡོ (༦) ཝཱ་ཛི་རི་ཡོ (༧) ཝེ་ཏུ་ལློ (༨) ཨ་ནྡྷ་ཀོ (༩) ཨ་ཉྙ་མ་ཧཱ་ས་ངྒྷི་ཀོཏི ན་ཝ ཨ་བྷི་ན་ཝེ ནི་ཀཱ་ཡེ ཨུ་པྤཱ་དེ་སུཾ [ནི་ཀཱ་ཡ་ས་ངྒ་ཧེ ༩-པི་ཊྛེ]. ཏེ་སཾ ནཱ་མཱ་ནི ཙ ལ་དྡྷི་ཡོ ཙ ཀ་ཐཱ་ཝ་ཏྠུ་ཨ་ཊྛ་ཀ་ཐཱ་ཡཾ ཨཱ་ག་ཏཱ་ཡེ་ཝ.
ཏེ་སུ ཧེ་མ་ཝ་ཏི་ཀཱ ས་དྡྷ་མྨ་པ་ཏི་རཱུ་པ་ཀཾ བུ་དྡྷ་བྷཱ་སི་ཏ་བྷཱ་ཝེ་ན ད་སྶེ་ཏྭཱ
(༡) ཝ་ཎྞ་པི་ཊ་ཀཾ ནཱ་མ ག་ནྠཾ ཨ་ཀཾ་སུ.
རཱ་ཛ་གི་རི་ཀཱ (༢) ཨ་ངྒུ་ལི་མཱ་ལ་པི་ཊ་ཀཾ,
སི་དྡྷ་ཏྠི་ཀཱ (༣) གཱུ་ལ༹ྷ་ཝེ་སྶ་ནྟ་རཾ,
པུ་བྦ་སེ་ལི་ཡཱ (༤) ར་ཊྛ་པཱ་ལ་ག་ཛྫི་ཏཾ,
ཨ་པ་ར་སེ་ལི་ཡཱ (༥) ཨཱ་ལ༹་ཝ་ཀ་ག་ཛྫི་ཏཾ,
ཝ་ཛི་ར་པ་བྦ་ཏ་ཝཱ་སི་ནོ ཝཱ་ཛི་རི་ཡཱ (༦) གཱུ་ལ༹ྷ་ཝི་ན་ཡཾ ནཱ་མ ག་ནྠཾ ཨ་ཀཾ་སུ.
ཏེ་ཡེ་ཝ ས་བྦེ མཱ་ཡཱ་ཛཱ་ལ་ཏ་ནྟ-ས་མཱ་ཛ་ཏ་ནྟཱ་དི་ཀེ ཨ་ནེ་ཀེ ཏ་ནྟ་ག་ནྠེ ཙ, མ་རཱི་ཙི་ཀ་པྤ-ཧེ་ར་མྦྷ་ཀ་པྤཱ་དི་ཀེ ཨ་ནེ་ཀེ ཀ་པྤ་ག་ནྠེ ཙ ཨ་ཀཾ་སུ.
ཝེ་ཏུ་ལླ་ཝཱ་དི་ནོ པ་ན (༧) ཝེ་ཏུ་ལླ་པི་ཊ་ཀམ་ཀཾ་སུ.
ཨ་ནྡྷ་ཀཱ ཙ (༨) ར་ཏ་ན་ཀཱུ་ཊཱདི་ཀེ ག་ནྠེ,
ཨ་ཉྙ་མ་ཧཱ་ས་ངྒྷི་ཀཱ ཙ (༩) ཨ་ཀྑ་ར་སཱ་རི་ཡཱདི་སུ་ཏྟ་ནྟེ ཨ་ཀཾ་སུ [ནི་ཀཱ་ཡ་ས་ངྒ་ཧེ ༩-པི་ཊྛེ].
ཏེ་སུ པ་ན ས་དྡྷ་མྨ་པ་ཏི་རཱུ་པ་ཀེ་སུ ཝེ་ཏུ་ལླ་ཝཱ་དོ, ཝཱ་ཛི་རི་ཡ་ཝཱ་དོ, ར་ཏ་ན་ཀཱུ་ཊ་ས་ཏྠ་ནྟི ཨི་མཱ་ནི་ཡེ་ཝ ཏཱི་ཎི ལ་ངྐཱ་དཱི་པ་མུ་པཱ་ག་ཏཱ་ནི, ཨ་ཉྙཱ་ནི པ་ན ཝ་ཎྞ་པི་ཊ་ཀཱ་དཱི་ནི ཛ་མྦུ་དཱི་པེ་ཡེ་ཝ ནི་ཝ་ཏྟ་ནྟཱི་ཏི ནི་ཀཱ་ཡ་ས་ངྒ་ཧེ ཝུ་ཏྟཾ. ཝ་ཎྞ་པི་ཊ་ཀཱ་དཱི་ན་མྤི པ་ན ལ་ངྐཱ་དཱི་པ་མུ་པཱ་ག་ཏ་ཙྪཱ་ཡཱ དི་སྶ་ཏེ་ཝ. ཏ་ཐཱ ཧི ས་མ་ནྟ་པཱ་སཱ་དི་ཀཱ་ཡ ཝི་ན་ཡ་ཊྛ་ཀ་ཐཱ་ཡཾ (༣, ༩-པི་ཊྛེ)
‘‘ཝ་ཎྞ་པི་ཊ་ཀ ཨ་ངྒུ་ལི་མཱ་ལ་པི་ཊ་ཀ་ར་ཊྛ་པཱ་ལ་ག་ཛྫི་ཏ་ཨཱ་ལ༹་ཝ་ཀ་ག་ཛྫི་ཏ་གཱུ་ལ༹ྷ་མ་གྒ་གཱུ་ལ༹ྷ་ཝེ་སྶ་ནྟ་ར གཱུ་ལ༹ྷ་ཝི་ན་ཡ ཝེ་ད་ལླ་པི་ཊ་ཀཱ་ནི [ཨེ་ཏྠ ‘‘ཝེ་པུ་ལླ, ཝེ་ད་ལླཾ, ཝེ་ཏུ་ལླ་ནྟི ཨ་ཏྠ་ཀོ ཨེ་ཀཾ, བོ་དྷི་ས་ཏྟ་པི་ཊ་ཀ་སྶེ་ཝ ནཱ་མ’’ནྟི ཝེ་དི་ཏ་བྦཾ. ཏ་ཐཱ ཧི ཝུ་ཏྟཾ ཨ་ས་ངྒེ་ན ནཱ་མ ཨཱ་ཙ་རི་ཡེ་ན ཨ་བྷི་དྷ་མྨ་ས་མུ་ཙྩ་ཡེ ནཱ་མ མ་ཧཱ་ཡཱ་ནི་ཀ་ག་ནྟེ (༧༩-པི་ཊྛེ) ‘‘ཝེ་པུ་ལླཾ ཀ་ཏ་མཾ? བོ་དྷི་ས་ཏྟ་པི་ཊ་ཀ་ས་མྤ་ཡུ་ཏྟཾ བྷཱ་སི་ཏཾ. ཡ་དུ་ཙྩ་ཏེ ཝེ་པུ་ལླཾ, ཏཾ ཝེ་ད་ལླ་མ་པྱུ་ཙྩ་ཏེ, ཝེ་ཏུ་ལླ་མ་པྱུ་ཙྩ་ཏེ. ཀི་མ་ཏྠཾ ཝེ་པུ་ལླ་མུ་ཙྩ་ཏེ? ས་བྦ་ས་ཏྟཱ་ནཾ ཧི་ཏ་སུ་ཁཱ་དྷི་ཊྛཱ་ན་ཏོ, ཨུ་དཱ་ར་ག་མྦྷཱི་ར་དྷ་མྨ་དེ་ས་ནཱ་ཏོ ཙ. ཀི་མ་ཏྠ་མུ་ཙྩ་ཏེ ཝེ་ད་ལླཾ? ས་བྦཱ་ཝ་ར་ཎ་ཝི་ད་ལ་ན་ཏོ. ཀི་མ་ཏྠ་མུ་ཙྩ་ཏེ ཝེ་ཏུ་ལླཾ? ཨུ་པ་མཱ་ན་དྷ་མྨཱ་ནཾ ཏུ་ལ་ནཱ་བྷཱ་ཝ་ཏོ’’ཏི] པ་ན ཨ་བུ་དྡྷ་ཝ་ཙ་ནཱ་ནི་ཡེ་ཝཱ་ཏི ཝུ་ཏྟ’’ནྟི ཙ.
སཱ་ར་ཏྠ་པྤ་ཀཱ་སི་ནི་ཡཱ སཾ་ཡུ་ཏྟ་ཊྛ་ཀ་ཐཱ་ཡ་མྤི (༢, ༡༨༦-པི་ཊྛེ)
‘‘གཱུ་ལ༹ྷ་ཝི་ན་ཡཾ གཱུ་ལ༹ྷ་ཝེ་སྶ་ནྟ་རཾ གཱུ་ལ༹ྷ་མ་ཧོ་ས་དྷཾ ཝ་ཎྞ་པི་ཊ་ཀཾ ཨ་ངྒུ་ལི་མཱ་ལ་པི་ཊ་ཀཾ ར་ཊྛ་པཱ་ལ་ག་ཛྫི་ཏཾ ཨཱ་ལ༹་ཝ་ཀ་ག་ཛྫི་ཏཾ ཝེ་ད་ལླ་པི་ཊ་ཀ་ནྟི ཨ་བུ་དྡྷ་ཝ་ཙ་ནཾ ས་དྡྷ་མྨ་པ་ཏི་རཱུ་པ་ཀཾ ནཱ་མཱ’’ཏི ཙ–
ཏེ་སཾ པ་ཊི་ཀྑེ་པོ དི་སྶ་ཏི. ན ཧི ཏཱ་ནི ཨ་སུ་ཏྭཱ, ཏེ་ས་ཉྩ ཨ་ཏྠཾ ཨ་ཛཱ་ནི་ཏྭཱ སཱི་ཧ་ལ༹་ཊྛ་ཀ་ཐཱ་ཙ་རི་ཡེ་ཧི ཏཱ་ནི པ་ཊི་ཀྑི་པི་ཏུཾ ས་ཀྐཱ, ནཱ་པི ཏཾ པ་ཊི་ཀྑེ་པ་ཝ་ཙ་ནཾ ཛ་མྦུ་དཱི་པི་ཀ་ཊྛ་ཀ་ཐཱ་ཙ་རི་ཡཱ་ནཾ ཝ་ཙ་ནཾ བྷ་ཝི་ཏུཾ, མ་ཧཱ་མ་ཧི་ནྡ་ཏྠེ་ར་སྶ སཱི་ཧ་ལ༹་དཱི་པཾ ག་མ་ན་ས་མ་ཡེ ཏེ་སཾ་ཡེ་ཝ ཨ་བྷཱ་ཝ་ཏོ. ཏ་སྨཱ ཏཱ་ནི ཙ ཏ་ད་ཉྙཱ་ནི ཙ མ་ཧཱ་ཡཱ་ནི་ཀ་པི་ཊ་ཀཱ་ནི ཏཾ་ཀཱ་ལི་ཀཱ་ནི ཡེ་བྷུ་ཡྻེ་ན སཱི་ཧ་ལ༹་དཱི་པ་མུ་པཱ་ག་ཏཱ་ནཱི་ཏི ག་ཧེ་ཏ་བྦཱ་ནི. ཏེ་སུ ཙ ཝ་ཛྫི་པུ་ཏྟ་ཀ་ག་ཎཔ་རི་ཡཱ་པ་ནྣ་སྶ དྷ་མྨ་རུ་ཙི་ནི་ཀཱ་ཡ་སྶ པི་ཊ་ཀཱ་ནཾ ཏ་དུ་པཱ་ག་མ་ནཾ པུ་བྦེ་ཝ ཝུ་ཏྟཾ. ཏ་ད་ཉྙེ་སཾ པ་ན ཏ་དུ་པཱ་ག་མ་ནཾ ཨེ་ཝཾ ཝེ་དི་ཏ་བྦཾ.