༥. བྷཱ་ཝཱ་ཝ་བོ་དྷ་པ་རི་ཙྪེ་ད
༣༣༨. པ་ཊི་བྷཱ་ན་ཝ་ཏཱ ལོ་ཀ-ཝོ་ཧཱ་ར’མ་ནུ་སཱ་རི་ནཱ;
ཏ་ཏོ’ཙི་ཏྱ་ས་མུ་ལླཱ་ས-ཝེ་དི་ནཱ ཀ་ཝི་ནཱ པ་རཾ.
༣༣༨. ཏ་དེ་ཝ ཡ་ཐཱ་པ་ཊི་ཉྙཱ་ཏ་མ་ལ་ངྐཱ་ར་ཝི་བྷཱ་གཾ བོ་དྷེ་ཏྭཱ ས་མྤ་ཏི ར་ས་ཝ་ནྟཱ་ལ་ངྐཱ་ར་པྤ་ས་ངྒེ་ནཱ་དྷི་ག་ཏཾ ར་སཾ ས་ཀ་ལ སཾ་སཱ་ར་དུ་ཀྑ་ནི་སྶ ར་ཎེ་ཀ་ནི་མི་ཏྟ་ཝི་མུ་ཏྟི་ར་སེ་ཀ་ར་ས་ཝི་སུ་དྡྷ་ས་དྡྷ་མྨཱ་ག་མ་ཝི་གྒཱ་ཧ་ས་པྤཱི་ཎ་ནོ་ཎ་ཏ་མ་ཏཱི་ནཾ པ་ར་མ་ས་དྡྷཱ་ལཱུ་ན་མ་ན་དྷི་ག་ཏ་ཏྟེ་པི ལ་ཀྑ་ཎ་མ་ཏྟེ་ན ལོ་ཀ་ཝོ་ཧཱ་ར་ཀོ་ས་ལླ་མ་ཏྟ་པ་རི་གྒ་ཧཱ་ཡ ཀི་ཉྩི་མ་ཏྟ་མུ་པ་དི་སི་ཏུཾ ན སཱ་ཀ་ལླེ་ན ‘‘པ་ཊི་བྷཱ་ན་ཝ་ཏཱ’’ཏི་ཨཱ་དི་མཱ་ཧ. པ་ཊི་བྷཱ་ནཾ ཏཾ་ཏཾ་ཋཱ་ནཱ་ནུ་རཱུ་པ་པྤ་ཝ་ཏྟཱ པ་ཉྙཱ. སཱ ཧི ས་ར་ས་ར་ཙ་ནཱ་ཡ་ཙྩ་ནྟོ་པ་ཀཱ་རི་ཀཱ, ཏ་ཏོ་ཝ ཀ་བྦཾ ‘‘པ་ཊི་བྷཱ་ན’’ནྟི ཝུ་ཙྩ་ཏི. ཏེ་ནཱ་ཧ ‘‘པ་ཊི་བྷཱ་ན་ཝ་ཏཱ’’ཏི. ཀ་ཝི་ནཱ ལོ་ཀ་ཝོ་ཧཱ་རཱ་ནུ་ག་ནྟ་བྦོ. ཡོ ཧི ས་ཀ་ལཾ ལོ་ཀ་ཝོ་ཧཱ་རཾ ནཱ་ནུ་ས་ར་ཏི, སོ ཀ་ཝི་ཡེ་ཝ ན ཧོ་ཏི. ཏེ་ནཱ་ཧ ‘‘ལོ་ཀ་ཝོ་ཧཱ་ར་མ་ནུ་སཱ་རི་ནཱ’’ཏི. ཡ་ཏོ ཨོ་ཙི་ཏྱཾ ནཱ་མ ཀ་ཝཱི་ནཾ པ་ར་མཾ ར་ཧ་སྶཾ ལོ་ཀ་ཝོ་ཧཱ་རེ་པི ཨུ་ཙི་ཏ་ཉྙཱུ་ཡེ་ཝ པ་སཾ་སཱི་ཡ་ཏེ, ས་མུ་ཙི་ཏ་ལོ་ཀ་ཝོ་ཧཱ་རཱ་ནུ་སཱ་རེ་ནེ་ཝ ཙ ཝ་ཀྑ་མཱ་ནཱ་ནུ་ཀྐ་མེ་ན ཝི་ར་ཙི་ཏཱ ར་ཙ་ནཱ ས་ཙེ་ཏ་ནཱ་ནཾ ར་ས་སྶཱ་དཱ་ཡ ས་མྤ་ཛྫ་ཏེ, ཏ་སྨཱ ཨོ་ཙི་ཏྱེ ས་མུ་ལླ་ས་ཏྟཾ དི་ཏྟཾ ཕུ་ཊ་མེ་ཝ བ་ནྡྷ་ནཾ ཀཱ་ཏུཾ ཝ་ཊྚ་ཏི. ཏ་ཏོ་ཝ་ཙྩ་ནྟ་མོ་ཙི་ཏྱ་ས་མུ་ལླཱ་ས་ཝེ་དི་ནཱ ཀ་ཝི་ནཱ བྷ་ཝི་ཏ་བྦཾ. ཏེ་ནཱ་ཧ ‘‘པ་རཾ ཨོ་ཙི་ཏྱ་ས་མུ་ལླཱ་ས་ཝེ་དི་ནཱ’’ཏི. ས་བྦ་ཉྩེ་ཏཾ ‘‘ཀ་ཝི་ནཱ’’ཏི ཨེ་ཏྠ ཝི་སེ་ས་ནཾ, ‘‘ཀ་ཝི་ནཱ’’ཏི ཙེ་ཏཾ ‘‘ནི་བ་ནྡྷཱ’’ཏི ཨེ་ཏྠ ཨ་ཝུ་ཏྟོ ཀ་ཏྟཱ.
༣༣༨. ཨེ་ཝཾ ཡ་ཐཱ་པ་ཊི་ཉྙཱ་ཏཱ་ན་མ་ལ་ངྐཱ་རཱ་ནཾ ད་སྶ་ནཱ་ཝ་ས་རེ ར་ས་ཝ་ནྟཱ་ལ་ངྐཱ་ར་པྤ་ས་ངྒེ་ནཱ་དྷི་ག་ཏ་ན་ཝ་ཝི་དྷ་སི་ངྒཱ་རཱ་དི་ར་སེ ས་ཀ་ལ་སཾ་སཱ་ར་དུ་ཀྑ་ནི་སྶ་ར་ཎ་ཨ་ས་ཧཱ་ཡ་ཀ་ར་ཎ་བྷཱུ་ཏ་ཝི་མུ་ཏྟི་ར་སེ་ན ཨེ་ཀ་ར་ས་བྷཱུ་ཏེ ཨ་ཏི་པ་ཎཱི་ཏེ ས་དྡྷ་མྨཱ་མ་ཏ་ར་སེ་ཡེ་ཝ ལུ་དྡྷཱ་ནཾ ས་དྡྷཱ་བཱ་ཧུ་ལླ་སུ་དྡྷ་སཾ་ཡ་མཱ་ནཾ ཝི་མུ་ཁེ་པི ལ་ཀྑ་ཎ་མ་ཏྟ་པ་རི་ཉྙཱ་ཎེ་ན ལོ་ཀ་ཝོ་ཧཱ་རེ་སུ ཨ་ས་མྨོ་ཧ་ཏྠཾ ས་ངྑེ་པེ་ན ད་སྶེ་ཏུ་ཀཱ་མོ ཨི་དཱ་ནི ‘‘པ་ཊི་བྷཱ་ན་ཝ་ཏཱ’’ཨི་ཙྩཱ་དི་མཱ་ཧ. པ་ཊི་བྷཱ་ན་ཝ་ཏཱ ས་ར་ས་ར་ཙ་ནཱ་ཡ ཨ་ཙྩ་ནྟོ་པ་ཀཱ་ར་ཊྛཱ་ནོ་ཙི་ཏ་པ་ཉྙཱ་ཝི་སེ་ས་ཝ་ཏཱ ལོ་ཀ་ཝོ་ཧཱ་ར་མ་ནུ་སཱ་རི་ནཱ ས་ཀ་ལ་ལོ་ཀེ ཝོ་ཧཱ་རཱ་ནུ་རཱུ་པ་མ་ནུ་ག་ཏེ་ན ཏ་ཏོ ཡ་སྨཱ ཨོ་ཙི་ཏྱཾ ནཱ་མ ཧ་ད་ཡ་ཏོ ཨ་བ་ཧི ཀཱ་ཏ་བྦཾ, ར་ཧ་སྶ་མི་ཝ བ་ནྡྷ་ཏོ ཝི་ཡོ་ཛ་ནཱི་ཡཾ ན ཧོ་ཏི. ཏ་སྨཱ པ་རམ་ཏི་ས་ཡེ་ན ཨོ་ཙི་ཏྱ་ས་མུ་ལླཱ་ས་ཝེ་དི་ནཱ ཨུ་ཙི་ཏ་བྷཱ་ཝེ་ན ཝ་ཏྟུ་མི་ཙྪི་ཏ་ཏྠ་སྶ ཨུ་དྡཱི་པ་ན་སྶེ་ཝ ཨ་ནུ་རཱུ་པ་པྤ་ཀཱ་རེ་ན ཨི་ཊྛ་ཏྠ་སྶ ས་མུ་ལླཱ་ས་ནཾ དི་ཏྟིཾ ཛཱ་ན་ནྟེ་ན ཀ་ཝི་ནཱ བ་ནྡྷ་ཀཱ་ར་ཀེ་ན ནི་བ་ནྡྷཱ་ཏི ས་མྦ་ནྡྷོ. པ་ཊི་བྷཱ པ་ཊི་བྷཱ་ན་ནྟི པ་ཉྙཱ་ཡེ་ཏཾ ནཱ་མཾ, ཏ་ཏོ ཛཱ་ཏ་ཀ་བྦ་སྶ་པི པ་ཊི་བྷཱ་ཏི ཝུ་ཙྩ་མཱ་ན་ཏྟཱ ཨ་ཡཾ པ་ཉྙཱ་ཝི་སེ་སོ ར་ཙ་ནཱ་ཡ ཨ་ཙྩ་ནྟོ་པ་ཀཱ་རོ་ཏི ཉཱ་ཏ་བྦོ. པ་ཊི་བྷཱ་ན་མ་སྶ་ཏྠཱི་ཏི ཙ, ལོ་ཀ་སྶ ཝོ་ཧཱ་རོ་ཏི ཙ, ཏཾ ཨ་ནུ་ག་ཙྪ་ཏི སཱི་ལེ་ནཱ་ཏི ཙ, ཨོ་ཙི་ཏྱེ་ན ས་མུ་ལླཱ་སོ་ཏི ཙ, ཏཾ ཝི་ཛཱ་ནཱ་ཏི སཱི་ལེ་ནཱ་ཏི ཙ ཝི་གྒ་ཧོ.
༣༣༩. ཋཱ་ཡཱི་ས་མྦ་ནྡྷི་ནོ བྷཱ་ཝ-ཝི་བྷཱ་ཝཱ སཱ་ནུ་བྷཱ་ཝ་ཀཱ;
ས་མྤ་ཛྫ་ནྟི ནི་བ་ནྡྷཱ ཏེ, ར་ས་སྶཱ་དཱ་ཡ སཱ་དྷུ་ནཾ.
༣༣༩. ‘‘ཋཱ་ཡི’’ཙྩཱ་དི. ཋཱ་ཡི་ནོ ཝ་ཀྑ་མཱ་ན་ར་ཏྱཱ་ད་ཡོ ཏེ་ཧི ས་ཧ ས་མྦ་ནྡྷོ ཝི་བྷཱ་ཝཱ་དཱི་ཧི ཡོ་གེ ར་ཏྱཱ་དཱི་ན་མ་སྶཱ་དི་ཡ་ཏྟ་མཱ་ནཱི་ཡ་མཱ་ན་ཏྟཱ ཨེ་ཏེ་ས་མ་ཏྠཱི་ཏི ཋཱ་ཡཱི་ས་མྦ་ནྡྷི་ནོ. ས་ཧ ཨ་ནུ་བྷཱ་ཝེ་ཧི ཝ་ཀྑ་མཱ་ན་ལ་ཀྑ་ཎེ་ཧཱི་ཏི སཱ་ནུ་བྷཱ་ཝ་ཀཱ, བྷཱ་ཝོ ཝི་བྷཱ་ཝོ ཙ, ཝ་ཀྑ་མཱ་ནོ བྷཱ་ཝེ་ན བྷཱ་ཝཱ་བྷཱ་སོ་པི ཨི་མི་ནཱ་ཝ ས་ངྒ་ཧི་ཏོ, ར་ས་སྶཱ་དཱ་ཡ ས་མྤ་ཛྫ་ནྟཱི་ཏི ས་མྦ་ནྡྷོ.
༣༣༩. ‘‘ཋཱ་ཡི’’ཙྩཱ་དི. ཋཱ་ཡཱི་ས་མྦ་ནྡྷི་ནོ ཋཱ་ཡཱི་པ་དེ་ན, ཏེ་ན ཝཱ་ཙྩ་ར་ཏི་ཧཱ་སཱ་དི་ཨ་ཏྠེ་ན ཝཱ ས་མྦ་ནྡྷུ་པ་ག་ཏཱ སཱ་ནུ་བྷཱ་ཝ་ཀཱ ཝ་ཀྑ་མཱ་ནཱ་ནུ་བྷཱ་ཝེ་ཧི ས་ཧ པ་ཝ་ཏྟཱ བྷཱ་ཝ་ཝི་བྷཱ་ཝཱ ཝ་ཀྑ་མཱ་ན་བྷཱ་ཝ་ཝི་བྷཱ་ཝཱ ནི་བ་ནྡྷཱ ཝུ་ཏྟ་གུ་ཎོ་པེ་ཏ་ཀ་ཝི་ནཱ བ་ནྡྷི་ཏཱ ཨེ་ཀ་ཏྠ ཨཱ་ཧ་རི་ཏྭཱ ད་སྶི་ཏཱ སཱ་དྷུ་ནཾ ཨི་སྶཱ་དི་དོ་ས་ར་ཧི་ཏཱ་ནཾ ས་ཛྫ་ནཱ་ནཾ ར་ས་སྶཱ་དཱ་ཡ སི་ངྒཱ་རཱ་དི་ཝ་ཀྑ་མཱ་ན་ར་ས་སྶ ཨ་སྶཱ་ད་ན་ཏྠཾ ས་མྤ་ཛྫ་ནྟི པ་ཝ་ཏྟ་ནྟཱི་ཏི. ཨི་མཱ་ཡ གཱ་ཐཱ་ཡ ཋཱ་ཡཱི་བྷཱ་ཝོ བྱ་བྷི་ཙཱ་རཱི་བྷཱ་ཝོ ཀེ་ཝ་ལ་བྷཱ་ཝོ ཝི་བྷཱ་ཝོ ཨ་ནུ་བྷཱ་ཝོ ར་སོ ཙེ་ཏི ཨི་མེ ཨུ་དྡི་ཊྛཱ བྷ་ཝ་ནྟི, ཀ་ཐ་ནྟི ཙེ? བྷཱ་ཝ་ཝི་བྷཱ་ཝཱ་ནཾ ‘‘ཋཱ་ཡཱི་ས་མྦ་ནྡྷི་ནོ’’ཏི ཝི་སེ་ས་ནཾ བྷ་ཝ་ཏི, ཏེ་ན བྷཱ་ཝ་སྶ ཋཱ་ཡཱི ཙ སོ བྷཱ་ཝོ ཙེ་ཏི ཙ ཋཱ་ཡཱི་པ་དེ་ན ས་མྦ་ནྡྷ་ཏྟཱ ཋཱ་ཡཱི་བྷཱ་ཝོ ཙ, པུ་ན བྱ་བྷི་ཙཱ་རཱི་བྷཱ་ཝེ ས་ཏི ‘‘ཋཱ་ཡཱི་བྷཱ་ཝོ’’ཏི ཨི་མ་སྶ སཱ་དྷ་ཀ་ཏྟཱ ཨི་མ་སྶེ་ཝ ཋཱ་ཡཱི་བྷཱ་ཝ་པ་ད་སྶ པ་ཡོ་ག་སཱ་མ་ཏྠི་ཡེ་ན ག་མྨ་མཱ་ནོ བྱ་བྷི་ཙཱ་རཱི་བྷཱ་ཝོ ཙ, པུ་ན ཋཱ་ཡཱི་པ་དེ་ན ས་མཱ་ས་མ་ཀ་ཏྭཱ ཝི་སུཾ ད་སྶི་ཏ་བྷཱ་ཝ་ས་དྡ་སུ་ཏི་ཡཱ ཋཱ་ཡཱི་བྷཱ་ཝ་བྱ་བྷི་ཙཱ་རཱི་བྷཱ་ཝེ་ཧི ཨ་ཉྙོ བྷཱ་ཝོ ཙ, ཏ་ཐཱ ཨེ་ཝ ཋཱ་ཡཱི་པ་དེ་ན ཝཱ་ཙྩ་ར་ཏི་ཧཱ་སཱ་དི་ཨ་ཏྠ་སྶ ཨུ་པྤ་ཏྟི་ཨུ་དྡཱི་པ་ན་དྭ་ཡཾ ཝི་བྷཱུ་ཏཾ ཀ་ཏྭཱ ས་ཛྫེ་ཏྭཱ ཋི་ཏ་ཏྟཱ ཏེ་ཧི ར་ཏི་ཧཱ་སཱ་དཱི་ཧི ཨ་ཏྠེ་ཧི ས་མྦ་ནྡྷི་ནོ ཨཱ་ལ་མྦ་ཎ་ཨུ་དྡཱི་པ་ན་ས་ངྑ་ཏ་ཝི་ཝི་དྷ་ཝི་བྷཱ་ཝཱ ཙ, ཨེ་ཝ་མེ་ཝ སཱ་ནུ་བྷཱ་ཝ་ཀ་པ་དེ་ན ས་མཱ་ཡོ་གེ་ན ད་སྶི་ཏཱ་ནུ་བྷཱ་ཝོ ཙ, ‘‘ར་ས་སྶཱ་དཱ་ཡཱ’’ཏི ཨི་མི་ནཱ ནི་དྡི་ཊྛ་ར་སོ ཙཱ་ཏི ཨེ་ཝ་མི་མེ ཋཱ་ཡཱི་བྷཱ་ཝཱ་ད་ཡོ ཨུ་དྡི་ཊྛཱ ཧོ་ནྟི. ཋཱ་ཡི་ནཱ ས་ཧ ས་མྦ་ནྡྷོ་ཏི ཙ, སོ ཨེ་ཏེ་ས་མ་ཏྠཱི་ཏི ཙ, བྷཱ་ཝོ ཙ ཝི་བྷཱ་ཝོ ཙེ་ཏི ཙ, ས་ཧ ཨ་ནུ་བྷཱ་ཝེ་ཧི ཝ་ཏྟ་ནྟཱི་ཏི ཙ, ར་ས་སྶ ཨ་སྶཱ་དོ་ཏི ཙ ཝཱ་ཀྱཾ.
བྷཱ་ཝ་ཨ་དྷི་པྤཱ་ཡ
༣༤༠. ཙི་ཏྟ་ཝུ་ཏྟི་ཝི་སེ་སཱ ཏུ, བྷཱ་ཝ་ཡ་ནྟི ར་སེ ཡ་ཏོ;
ར་ཏྱཱ་ད་ཡོ ཏ་ཏོ བྷཱ་ཝ-ས་དྡེ་ན པ་རི་ཀི་ཏྟི་ཏཱ.
༣༤༠. ཨི་དཱ་ནི ཡ་ཐཱ་ཨུ་དྡི་ཊྛེ་སུ ཋཱ་ཡཱ་དཱི་ཧི བྷཱ་ཝ་ཝི་བྷཱ་ཝཱ་ནུ་བྷཱ་ཝ་ར་སེ་སུ པ་ཋ་མཾ བྷཱ་ཝཾ ཝི་བྷཱ་ཝེ་ཏུཾ བྷཱ་ཝ་ས་དྡ་མ་ནྭ་ཏྠ་ཡ་ཏི ‘‘ཙི་ཏྟ’’ཨི་ཙྩཱ་དི་ནཱ. ཙི་ཏྟ་སྶ ཝུ་ཏྟི་ཡོ ར་མ་ཎ་ཧ་ས་ནཱ་དི་ཨཱ་ཀཱ་རེ་ན པ་ཝ་ཏྟི་ཡོ, ཏཱ་ཝ ཝི་སེ་སཱ ཝི་སི་ཊྛ་ས་བྷཱ་ཝ་ཏྠཱ་ཏི ཙི་ཏྟ་ཝུ་ཏྟི་ཝི་སེ་སཱ. ར་ཏྱཱ་ད་ཡོ ཋཱ་ཡཱི་བྱ་བྷི་ཙཱ་རཱི་སཱ་ཏྟི་ཀཱ. ཏུས་དྡོ ཝི་སེ་སེ. ཡ་ཏོ ར་སེ སི་ངྒཱ་རཱ་ད་ཡོ བྷཱ་ཝ་ཡ་ནྟི ནི་པྥཱ་དེ་ནྟི. ཏ་ཏོ བྷཱ་ཝ་ས་དྡེ་ན པ་རི་ཀི་ཏྟི་ཏཱ བྷ་ར་ཏཱ་དཱི་ཧི ཀ་ཐི་ཏཱ. ཨེ་ཏྠ ཧི ཎྱ་ནྟོ བྷཱུ་དྷཱ་ཏུ ཀ་ར་ཎེ ཝ་ཏྟ་ཏེ. ཡ་ཏོ ཙཱ་ཡཾ ན ཀེ་ཝ་ལཾ ཀ་ར་ཎེ་ཡེ་ཝ ཝ་ཏྟ་ཏེ, ཨ་ཐ ཁོ བྱཱ་པ་ནེ, པ་ཊི་པཱ་ད་ནེ ཙ, ཏ་སྨཱ་སྶ པ་ཊི་བྷཱ་ནཾ ཙི་ཏྟཾ བྷཱ་ཝ་ཡ་ནྟི བྱཱ་པེ་ནྟི. ཨ་ཐ ཝཱ ཀ་ཝི་ནོ ལོ་ཀ་ཊྛི་ཏི་ཉཱ་ཎ་ལ་ཀྑ་ཎཾ ཨ་དྷི་པྤཱ་ཡཾ བྷཱ་ཝ་ཡ་ནྟི པ་ཊི་པཱ་དེ་ནྟཱི་ཏི བྷཱ་ཝཱཏི ཨེ་ཝ་མེ་ཏྠ ཨ་ཏྠོ ད་ཊྛ་བྦོ.
༣༤༠. ཨི་དཱ་ནི ཨུ་དྡི་ཊྛེ་སུ ཋཱ་ཡཱི་བྷཱ་ཝཱ་དཱི་སུ ཋཱ་ཡཱི་ཨཱ་དཱི་ནཾ [ཋཱ་ཡཱི་བྷཱ་ཝཱ་དཱི་ནཾ (ཀ.)] ཏི་ཎྞཾ སཱ་དྷཱ་ར་ཎོ བྷཱ་ཝོ ནཱ་མ ཨེ་སོ་ཏི ད་སྶེ་ནྟོ ཨ་ནྭ་ཏྠ་ཝ་སེ་ན ད་སྶེ་ཏི ‘‘ཙི་ཏྟ’’ཨི་ཙྩཱ་དི. ཙི་ཏྟ་ཝུ་ཏྟི་ཝི་སེ་སཱ ཏུ ཙི་ཏྟ་སྶ ཨུ་ཏྟ་རི ཝ་ཀྑ་མཱ་ནཱ་ར་མྨ་ཎ་ཧ་ས་ན་སོ་ཙ་ནཱ་དཱི་ཧི, ནི་བྦེ་དཱ་དཱི་ཧི, ཐ་མྦྷཱ་དཱི་ཧི ཙ ཨཱ་ཀཱ་རེ་ཧི པ་ཝ་ཏྟི་ས་ངྑཱ་ཏཱ ཨ་ཉྙ་མ་ཉྙཾ ཨ་ས་ངྐ་རཱ་ཀཱ་ར་ས་ངྑཱ་ཏཱ ཝི་སེ་སཱ པ་ན ཋཱ་ཡཱི་བྱ་བྷི་ཙཱ་རཱི་སཱ་ཏྟི་ཀཱ ཡ་ཏོ ཡ་སྨཱ ར་སེ སི་ངྒཱ་རཱ་དི་ར་སེ བྷཱ་ཝ་ཡ་ནྟི ནི་པྥཱ་དེ་ནྟི ཀ་རོ་ནྟི. ནོ ཙེ, ར་སེ སི་ངྒཱ་རཱ་དི་ར་ས་ཝི་ས་ཡེ པ་ཎྜི་ཏཱ་ནཾ ཙི་ཏྟཾ བྷཱ་ཝ་ཡ་ནྟི བྱཱ་པ་ནཾ ཀ་རོ་ནྟི. ནོ ཙེ, ཏ་སྨིཾ་ཡེ་ཝ ར་ས་ཝི་ས་ཡེ ཀ་ཝི་ནོ ལོ་ཀ་ས་བྷཱ་ཝཾ ཝི་ས་ཡཾ ཀ་ཏྭཱ པ་ཝ་ཏྟ་ཉཱ་ཎ་ལ་ཀྑ་ཎཾ ཨ་དྷི་པྤཱ་ཡཾ བྷཱ་ཝ་ཡ་ནྟི པ་ཊི་པཱ་ད་ནཾ ཀ་རོ་ནྟི. ཏ་ཏོ བྷཱ་ཝ་ས་དྡེ་ན ཧེ་ཏུ་ཀ་ཏྟ་རི ནི་པྥ་ནྣེ་ན ར་ཏྱཱ་ད་ཡོ ར་ཏི་ཧཱ་སཱ་ད་ཡོ པ་རི་ཀི་ཏྟི་ཏཱ བྷ་ར་ཏཱ་དཱི་ཧི ཝུ་ཏྟཱ ཧོ་ནྟཱི་ཏི. ‘‘ར་ཏྱཱ་ད་ཡོ’’ཏི ཨེ་ཏྠ ཨཱ་དིས་དྡེ་ན ཧཱ་སཱ་ད་ཡོ ཋཱ་ཡཱི་བྷཱ་ཝཱ ཙ, ནི་བྦེ་དཱ་ད་ཡོ བྱ་བྷི་ཙཱ་རཱི་བྷཱ་ཝཱ ཙ, ཐ་མྦྷ་པ་ལ་ཡཱ་ད་ཡོ སཱ་ཏྟི་ཀ་བྷཱ་ཝཱ ཙ ས་ངྒ་ཧི་ཏཱ་ཏི ད་ཊྛ་བྦཱ. ཙི་ཏྟ་སྶ ཝུ་ཏྟི་ཡོ་ཏི ཙ, ཏཱ ཨེ་ཝ ཝི་སེ་སཱ་ཏི ཙ, བྷཱ་ཝོ ཨི་ཏི ས་དྡོ་ཏི ཙ ཝཱ་ཀྱཾ.
ཋཱ་ཡཱི་བྷཱ་ཝ་ཨ་དྷི་པྤཱ་ཡ
༣༤༡. ཝི་རོ་དྷི་ནཱ’ཉྙ་བྷཱ་ཝེ་ན,
ཡོ བྷཱ་ཝོ ན ཏི་རོ་ཧི་ཏོ;
སཱི་ལེ་ན ཏི་ཊྛ་ཏི’ཙྩེ’སོ,
ཋཱ་ཡཱི་བྷཱ་ཝོ་ཏི ས་དྡི་ཏོ.
༣༤༡. ཋཱ་ཡཱ་དི་ཀེ ཏི་ཝི་དྷེ བྷཱ་ཝེ ཀ་མེ་ནཱ་ཧ ‘‘ཝི་རོ་དྷི་ནཱ’’ཨི་ཙྩཱ་དི་ནཱ. ཝི་རོ་དྷི་ནཱ ཨ་ཉྙེ་ན ཛི་གུ་ཙྪཱ་དི་ནཱ བྷཱ་ཝེ་ན ཡོ བྷཱ་ཝོ ར་ཏྱཱ་དི་ཀོ ན ཏི་རོ་ཧི་ཏོ ན་ཙྪཱ་དི་ཏོ, ཨེ་སོ བྷཱ་ཝོ ཨ་ནུ་ཙྪི་ཛྫ་མཱ་ན་ཏྟཱ ཨེ་ཝ ཏི་ཊྛ་ཏི སཱི་ལེ་ནཱ་ཏི, ཋཱ་ཡཱི ཨེ་ཝ བྷཱ་ཝོ་ཏི ཋཱ་ཡཱི་བྷཱ་ཝོ་ཏི ས་དྡི་ཏོ ཀ་ཐི་ཏོ. ཡོ བྷཱ་ཝཱ་དཱི་ཧི ཨཱ་ལོ་ཀི་ཏ་སྶཱ་དཾ ནཱི་ཏོ ས་མཱ་ནཱི་ཏོ, སོ སཱ་མཱ་ཛི་ཀེ་ཧི ཨ་སྶཱ་དི་ཡ་མཱ་ན་ཏྟཱ ར་སོ་ཏི ཝུ་ཙྩ་ཏི. ཝ་ཀྑ་ཏི ཧི ‘‘ས་ཝི་བྷཱ་ཝ’’ཨི་ཙྩཱ་དི.
༣༤༡. ཨི་དཱ་ནི ཋཱ་ཡཱི་ཨཱ་དི་ཀེ ཏི་ཝི་དྷ་བྷཱ་ཝེ ཀ་མེ་ན ནི་དྡི་ས་ཏི ‘‘ཝི་རོ་དྷི’’ཨི་ཙྩཱ་དི་ནཱ. ཝི་རོ་དྷི་ནཱ ཨ་ཉྙ་བྷཱ་ཝེ་ན ར་ཏི་ཧཱ་སཱ་དཱི་ནཾ ཝི་རུ་དྡྷེ་ན ཛི་གུ་ཙྪཱ་དི་ནཱ ཨ་ཉྙ་བྷཱ་ཝེ་ན ཡོ བྷཱ་ཝོ ར་ཏི་ཧཱ་སཱ་དི་ཀོ ཏི་རོ་ཧི་ཏོ ན བྱ་ཝ་ཧི་ཏོ ན ཧོ་ཏི, ཨེ་སོ ཝི་རུ་དྡྷ་བྷཱ་ཝེ་ན ཨ་བྱ་ཝ་ཧི་ཏོ བྷཱ་ཝོ ཏི་ཊྛ་ཏི སཱི་ལེ་ནཱ་ཏི ཨི་མི་ནཱ ཨ་ཏྠེ་ན ཋཱ་ཡཱི ནཱ་མ ཧོ་ཏཱི་ཏི ཀ་ཏྭཱ ཋཱ་ཡཱི་བྷཱ་ཝོ་ཏི ས་དྡི་ཏོ ཀ་ཐི་ཏོ་ཏི. ཡོ ཝི་བྷཱ་ཝཱ་ནུ་བྷཱ་ཝཱ་དཱི་ཧི ཨ་སྶཱ་ད་ནཱི་ཡ་ཏྟཾ པཱ་པི་ཏོ ས་བྦྷེ་ཧི ཨ་སྶཱ་ད་ནཱི་ཡ་ཏྟཱ ར་སོ་ཏི ཝུ་ཙྩ་ཏི, སོ ཋཱ་ཡཱི ནཱ་མཱ་ཏི ཝུ་ཙྩ་ཏི. ཨ་ཉྙོ ཙ སོ བྷཱ་ཝོ ཙེ་ཏི ཙ, ཏི་རོ ཀ་ཡི་རི་ཏྠཱ་ཏི ཙ, ཋཱ་ཡཱི ཙ སོ བྷཱ་ཝོ ཙེ་ཏི ཙ ཝི་གྒ་ཧོ.
ཋཱ་ཡཱི་བྷཱ་ཝ་པྤ་བྷེ་ད་ཨུ་དྡེ་ས
༣༤༢. ར་ཏི་ཧཱ་སཱ ཙ སོ་ཀོ ཙ,
ཀོ་དྷུ་སྶཱ་ཧ་བྷ་ཡ’མྤི ཙ;
ཛི་གུ་ཙྪཱ་ཝི་མྷ་ཡཱ ཙེ་ཝ,
ས་མོ ཙ ན་ཝ ཋཱ་ཡི་ནོ.
༣༤༢. ར་ཏྱཱ་དཱི་ནཾ ན་ཝ་ནྣ་མེ་ཝ ཋཱ་ཡི་ཏྭཾ ས་མྦྷ་ཝ་ཏཱི་ཏྱཱ་ཧ ‘‘ར་ཏི’’ཙྩཱ་དི. ས་མོ ཙེ་ཏི ཨེ་ཝཾ ཋཱ་ཡི་ནོ ན་ཝཱ་ཏི ཡོ་ཛ་ནཱ. ན་ཝེ་ཝེ་ཏེ ས་ཀ་ས་ཀ་ཝི་བྷཱ་ཝཱ་ནུ་བྷཱ་ཝེ་ཧི ས་མུ་ལླཱ་སི་ཏཱ ཝི་སུ་མྤི བ་ནྡྷི་ཏ་བྦཱ ཀ་ཝི་ནཱ, ཨ་བྷི་ནེ་ཏ་བྦཱ ཙ ན་ཊེ་ན, ཏ་ཐཱ སེ་ས་བྷཱ་ཝཱ་པི. ཏ་ཏྠ ཡ་དི པ་ནཱ་ཡཾ ར་ཏི ཨ་སེ་ས་ཨི་ཏྠི་པུ་རི་ས་གུ་ཎ་ཡུ་ཏྟཱ་ནཾ ཨི་ཏྠི་པུ་རི་སཱ་ནཾ ཨ་ཉྙ་མ་ཉྙཾ ཛ་ནི་ཏཱ, ཙ་ནྡཱ་དཱི་ཧི ཨུ་དྡཱི་པ་ན་ཝི་བྷཱ་ཝེ་ཧི ཨུ་དྡཱི་པི་ཏཱ, ཨུ་སྶུ་ཀྐ་ཏཱ་དི་བཱ་དྷ་ཀེ་ཧི ཨ་ནུ་བྷཱ་ཝེ་ཧི པ་རི་པོ་སི་ཏཱ, ས་ཀ་ས་ཀཱ་ནུ་བྷཱ་ཝ་སཱ་མ་ཏྠི་ཡཱ པ་ཏཱི་ཡ་མཱ་ནེ་ཧི ཨ་ནེ་ཀ་རཱུ་པེ་ཧི བྱ་བྷི་ཙཱ་རཱི་ཧི ཙི་ཏྟ་ཏཱ སི་ཡཱ, ཏ་དཱ ཏུ ཋཱ་ཡཱི ར་ཏི ན་ཊཱ་བྷི་ན་ཡེ་ན, སུ་བ་ནྡྷ་ས་ཝ་ནེ་ན ཝཱ ས་བྦྷེ་ཧི ཨ་སྶཱ་དི་ཡ་མཱ་ནཱ སི་ངྒཱ་ར་ར་ས་ཏྟ་མཱ་པ་ཛྫ་ཏེ. ཨེ་ཝཾ ཡ་ཐཱ་ཡོ་གཾ ཧཱ་སཱ་དི་ཋཱ་ཡཱི་བྷཱ་ཝཱ་ནཾ ཧ་སྶ་ར་སཱ་དི་བྷཱ་ཝཱ་པ་ཛྫ་ནེ ཡུ་ཏྟིཾ ས་མ་ནྣེ་ཡྻ.
༣༤༢. ཋཱ་ཡཱི་བྷཱ་ཝོ ནཱ་མ ར་ཏྱཱ་ད་ཡོ ན་ཝེ་ཝེ་ཏི ད་སྶེ་ཏུཾ ‘‘ར་ཏི་ཧཱ་སཱ’’ཏི་ཨཱ་དི་མཱ་ཧ. ར་ཏི་ཧཱ་སཱ ཙ སོ་ཀོ ཙ ཀོ་དྷུ་སྶཱ་ཧ་བྷ་ཡ་མྤི ཙ ཛི་གུ་ཙྪཱ་ཝི་མྷ་ཡཱ ཙེ་ཝ ས་མོ ས་ནྟ་གུ་ཎོ ཙཱ་ཏི ཨེ་ཝཾ ཋཱ་ཡི་ནོ ན་ཝ ཧོ་ནྟི. ཨི་མེ་སཾ ར་ཏྱཱ་དཱི་ནཾ ན་ཝ་ནྣཾ ས་རཱུ་པ་ཀ་ཐ་ནཾ ‘‘སི་ངྒཱ་ར་ཧ་སྶ་ཀ་རུ་ཎཱ’’ཏི་ཨཱ་དི་ཀཱ་ཡ ཨུ་དྡེ་ས་གཱ་ཐཱ་ཡ ཨ་ན་ནྟ་རེ ནི་དྡེ་སེ པཱ་ཀ་ཊོ ཧོ་ཏི. ར་ཏི ཙ ཧཱ་སོ ཙཱ་ཏི ཙ, ཀོ་དྷོ ཙ ཨུ་སྶཱ་ཧོ ཙ བྷ་ཡ་ཉྩེ་ཏི ཙ, ཛི་གུ་ཙྪཱ ཙ ཝི་མྷ་ཡཱ ཙེ་ཏི ཙ ཝཱ་ཀྱཾ. ཨི་མེ ན་ཝ ཙ ཨེ་ཝཾ བྱ་བྷི་ཙཱ་རཱི་བྷཱ་ཝ་སཱ་ཏྟི་ཀཱ་བྷཱ་ཝོ ཙེ་ཏི ཨི་མེ ཡ་ཐཱ་ས་ཀ་མ་ནུ་རཱུ་པ་ཝི་བྷཱ་ཝཱ་ནུ་བྷཱ་ཝེ་ཧི དི་ཏྟཾ ཀ་ཏྭཱ པ་ཙྩེ་ཀཾ ཀ་ཝི་ནཱ བ་ནྡྷི་ཏ་བྦཱ, ན་ཊེ་ན ག་ཧེ་ཏྭཱ ད་སྶི་ཏ་བྦཱ ཙ. ཨི་མེ་སུ ཏི་ཝི་དྷ་བྷཱ་ཝེ་སུ ཨ་ཡཾ ར་ཏི ཨ་སེ་ས་པུ་མི་ཏྠི་གུ་ཎེ་ཧི ཡུ་ཏྟེ་ཧི ན་ར་ནཱ་རཱི་ཧི ཨ་ཉྙ་མ་ཉྙཾ ཨུ་པྤཱ་དི་ཏཱ, ཙ་ནྡཱ་དཱི་ཧི ཨུ་དྡཱི་པ་ན་ཝི་བྷཱ་ཝེ་ཧི ཨུ་དྡཱི་པི་ཏཱ, ཨུ་སྶཱ་ཧཱ་དི་པ་ཀཱ་ས་ཀ་ཀཱ་ཡི་ཀ་ཝཱ་ཙ་སི་ཀ་པ་ཡོ་ག་ས་ངྑཱ་ཏཱ་ནུ་བྷཱ་ཝེ་ན པོ་སི་ཏཱ, ས་ཀ་ས་ཀཱ་ནུ་བྷཱ་ཝ་སཱ་མ་ཏྠི་ཡེ་ཧི ག་མྨ་མཱ་ནཱ་ནེ་ཀ་པྤ་ཀཱ་ར་བྱ་བྷི་ཙཱ་རཱི་བྷཱ་ཝེ་ཧི ཝི་ཙི་ཏྟ་ཀ་ཏཱ ཧོ་ཏི. ཨཱི་དི་སཱ’ཡཾ ར་ཏི ན་ཊ་སྶ ཨ་བྷི་ན་ཡེ་ན ཙ པ་ས་ཏྠ་བ་ནྡྷ་ས་ཝ་ནེ་ན ཙ ས་བྦྷེ་ཧི ཨ་སྶཱ་དི་ཡ་མཱ་ན་སི་ངྒཱ་རཱ་དི་ར་ས་ཏྟཾ པཱ་པུ་ཎཱ་ཏཱི་ཏི ཝི་ཉྙཱ་ཏ་བྦཱ. ཧཱ་སཱ་དཱི་ནཾ སེ་ས་ཋཱ་ཡཱི་བྷཱ་ཝཱ་ནཾ ཧ་སྶ་ར་སཱ་དི་བྷཱ་ཝཱ་པ་ཏྟི་ཡཾ ཡུ་ཏྟི ཨེ་ཝཾ ཡ་ཐཱ་ར་ཧཾ ཝེ་དི་ཏ་བྦཱ་ཏི.
བྱ་བྷི་ཙཱ་རཱི་བྷཱ་ཝ་ཨ་དྷི་པྤཱ་ཡ
༣༤༣. ཏི་རོ་བྷཱ་ཝཱ་ཝི་བྷཱ་ཝཱ་དི-
ཝི་སེ་སེ་ནཱ’བྷི་མུ་ཁྱ་ཏོ;
ཡེ་ཏེ ཙ་ར་ནྟི སཱི་ལེ་ན,
ཏེ ཧོ་ནྟི བྱ་བྷི་ཙཱ་རི་ནོ.
༣༤༣. བྱ་བྷི་ཙཱ་རི་ནོ ཨཱ་ཧ ‘‘ཏི་རོ་བྷཱ་ཝ’’ཨི་ཙྩཱ་དི་ནཱ. ཏི་རོ་བྷཱ་ཝོ ཋཱ་ཡཱི་ནཾ ཨེ་ཀ་སྶཱ་པི བྷཱ་ཝ་སྶ ནི་བྦེ་དཱ་དི་ནོ ཨ་ཙི་ར་ཊྛཱ་ཡི་ཏཱ ཙ ཨཱ་ཝི་བྷཱ་ཝོ པཱ་ཀ་ཊ་ཏཱ ཙ ནཱ་ནཱ་ར་ས་ནི་སྶ་ཡ་ཏྟཱ ཏེ ཨཱ་ད་ཡོ ཡ་སྶ. ཨཱ་དིས་དྡེ་ན ཋཱ་ཡཱི་དྷ་མྨ་སྶ སུ་ཁ་དུ་ཀྑཱ་དི་རཱུ་པ་སྶ ག་ཧ་ཎཾ, སོ་ཝ ཝི་སེ་སོ, ཏེ་ན. ཋཱ་ཡཱི་དྷ་མྨ་སྶ སུ་ཁ་དུ་ཀྑ་རཱུ་པ་སྶ ག་ཧ་ཎཾ, ཨ་ཏྟ་ནོ དྷ་མྨ་སྶ སུ་ཁ་དུ་ཀྑ་རཱུ་པ་སྶ ཋཱ་ཡི་ནི ས་མཱ་རོ་པ་ན་ཉྩཱབྷི་མུ་ཁྱཾ. ཏ་ཐཱ ཧི ར་ཏི་ཡཾ པ་རི་ས་མོ སུ་ཁཱ་ནུ་ཝི་དྡྷོ བྷ་ཝ་ཏི, སོ་ཀེ དུ་ཀྑཱ་ནུ་ཝི་དྡྷོ. ར་ཏི་ཡཾ སུ་ཁ་ས་བྷཱ་ཝཱ་པི གི་ལཱ་ནི་པྤ་བྷུ་ཏ་ཡོ བྱ་བྷི་ཙཱ་རི་ནོ ས་ཀ་མྨཾ དུ་ཀྑ་མི་མཾ ས་མཱ་རོ་པ་ཡ་ནྟེ་ཝ. ཏ་ཏོ ཏེ་ན ཨ་བྷི་མུ་ཁ་བྷཱ་ཝེ་ན ཡེ ཨེ་ཏེ བྷཱ་ཝཱ སཱི་ལེ་ན ཙ་ར་ནྟི པ་ཝ་ཏྟ་ནྟི, ཏེ བྱ་བྷི་ཙཱ་རི་ནོ ཧོ་ནྟཱི་ཏི.
༣༤༣. ཨི་དཱ་ནི ཨུ་དྡེ་ས་ཀྐ་མེ་ན བྱ་བྷི་ཙཱ་རཱི་བྷཱ་ཝེ ལ་ཀྑ་ཎ་ཏོ ད་སྶེ་ཏི ‘‘ཏི་རོ་བྷཱ་ཝཱ’’ཨི་ཙྩཱ་དི་ནཱ. ཏི་རོ་བྷཱ་ཝཱ་ཝི་བྷཱ་ཝཱ་དི་ཝི་སེ་སེ་ན བྱ་བྷི་ཙཱ་རཱི་བྷཱ་ཝཱ་ནཾ ཨ་ཏྟ་ནོ ཨ་ནེ་ཀ་ར་སཾ ནི་སྶཱ་ཡ པ་ཝ་ཏྟ་ཏྟཱ, ལོ་ཀ་སྶ བྷི་ནྣ་རུ་ཙི་ཀ་ཏྟཱ ཙ ཀི་སྨི་ཉྩི ཋཱ་ཡཱི་བྷཱ་ཝེ བྱ་བྷི་ཙཱ་རཱི་བྷཱ་ཝཱ་ན་མ་ཏྟ་ནོ གུ་ཎ་སྶ ལཱི་ན་ཏྟ་ཉྩ ཀི་སྨི་ཉྩི ཏ་སྶེ་ཝ གུ་ཎ་སྶ པཱ་ཀ་ཊ་ཏྟ་ཉྩཱ་ཏི་ཨཱ་དི་ཀེ་ན ཝི་སེ་སེ་ན ཨ་བྷི་མུ་ཁྱ་ཏོ ཋཱ་ཡཱི་བྷཱ་ཝཱ་ནཾ སུ་ཁ་དུ་ཀྑ་རཱུ་པཾ ཨ་ཏྟ་ནི ཙ ཨ་ཏྟ་ནོ སུ་ཁ་དུ་ཀྑ་རཱུ་པཾ ཋཱ་ཡཱི་བྷཱ་ཝེ་སུ ཙ ཨཱ་རོ་པ་ན་ས་ངྑཱ་ཏེ་ན ཨ་བྷི་མུ་ཁ་བྷཱ་ཝེ་ན ཡེ་ཏེ བྷཱ་ཝཱ སཱི་ལེ་ན ཙ་ར་ནྟི པ་ཀ་ཏི་ཡཱ པ་ཝ་ཏྟ་ནྟི, ཏེ བྷཱ་ཝཱ བྱ་བྷི་ཙཱ་རི་ནོ ནཱ་མ ཧོ་ནྟཱི་ཏི. ཨེ་ཝ་མེ་ཝ [ཨེ་ཝ་རཱུ་པཱ (ཀ.)] པཱི་ལཱ༹ ས་རཱུ་པེ་ན ཨེ་ཀོ པ་རི་ས་མ་ས་ངྑ་ཏ་བྱ་བྷི་ཙཱ་རཱི་བྷཱ་ཝོ ར་ཏི་ཡཾ ས་གུ་ཎེ་ན ལཱི་ནོ སུ་ཁཱ་ནུ་ཝི་དྡྷོ ཧུ་ཏྭཱ, སོ་ཀེ ས་གུ་ཎེ་ན པཱ་ཀ་ཊོ དུ་ཀྑཱ་ནུ་ཝི་དྡྷོ ཙ ཧུ་ཏྭཱ པ་ཝ་ཏྟ་ཏེ. ཨེ་ཝ་མེ་ཝ སུ་ཁ་ས་བྷཱ་ཝ་ར་ཏི་ཡཾ གི་ལཱ་ནཱ་ད་ཡོ བྱ་བྷི་ཙཱ་རི་ནོ ས་ཀི་ཡཾ དུ་ཀྑ་ས་རཱུ་པཾ ཨཱ་རོ་པེ་ནྟཱི་ཏི ཀ་ཏྭཱ ཏི་རོ་བྷཱ་ཝ་ཝི་བྷཱ་ཝཱ་དི་ཝི་སེ་སེ་ན ཨ་བྷི་མུ་ཁཾ པ་ཝ་ཏྟ་ནྟི. ཏི་རོ་བྷ་ཝ་ན་མི་ཏི ཙ, ཨཱ་ཝི་བྷ་ཝ་ན་མི་ཏི ཙ, ཏི་རོ་བྷཱ་ཝོ ཙ ཨཱ་ཝི་བྷཱ་ཝོ ཙེ་ཏི ཙ, ཏེ ཨཱ་ད་ཡོ ཡ་སྶ ཋཱ་ཡཱི་བྷཱ་ཝེ་སུ ཝི་ཛྫ་མཱ་ནཱ་ནཾ སུ་ཁ་དུ་ཀྑ་ས་བྷཱ་ཝཱ་ནཾ ཨ་ཏྟ་ནི ཨཱ་རོ་པ་ན་སྶེ་ཏི ཙ, སོ་ཡེ་ཝ ཝི་སེ་སོ་ཏི ཙ, ཨ་བྷི་མུ་ཁཱ་ནཾ བྷཱ་ཝོ་ཏི ཙ ཝི་གྒ་ཧོ. བྱ་བྷི་ཙཱ་རཱི་པ་དེ ཝིས་དྡོ ཝི་སེ་ས་ཏྠེ ཨ་བྷིས་དྡོ ཨ་བྷི་མུ་ཁ་བྷཱ་ཝེ ཝ་ཏྟ་ཏི.
བྱ་བྷི་ཙཱ་རཱི་བྷཱ་ཝ་པྤ་བྷེ་ད
༣༤༤. ནི་བྦེ་དོ ཏ་ཀྐ་ས་ངྐཱ ས་མ-
དྷི་ཏི་ཛ་ལ༹་ཏཱ དཱི་ན་ཏུ་གྒཱ་ལ་ས་ཏྟཾ,
སུ་ཏྟཾ ཏཱ་སོ གི་ལཱ་ནུ’སྶུ་ཀ་ཧ་རི་ས-
ས་ཏི་སྶཱ་ཝི་སཱ་དཱ་བ་ཧི་ཏྠཱ.
ཙི་ནྟཱ ག་བྦཱ’པ་མཱ་རོ’མ་རི་ས་མ་ད-
མ་ཏུ་མྨཱ་ད་མོ་ཧཱ ཝི་བོ་དྷོ,
ནི་དྡཱ་ཝེ་གཱ ས་བི་ལ༹ཾ མ་ར་ཎ-
ས་ཙ་པ་ལཱ་བྱཱ་དྷི ཏེ་ཏྟིཾ་ས་མེ’ཏེ.
༣༤༤. ཏེ ད་སྶེ་ཏི ‘‘ནི་བྦེ་དོ’’ཨི་ཙྩཱ་དི་ནཱ. དཱི་ན་ཏུ་གྒཱ་ལ་ས་ཏྟནྟི དཱི་ན་ཏཱ ཙ ཨུ་གྒ་ཏ་ཉྩ ཨཱ་ལ་ས་ཏྟ་ཉྩ, གི་ལཱ་ནི ཨུ་སྶུ་ཀཨི་ཏི ཨུ་སྶུ་ཀྐཾ. ཙ་པ་ལ་ཨི་ཏི ཙཱ་པ་ལླཾ, ས་ཧ ཙ་པ་ལེ་ན ས་ཙ་པ་ལོ, སོ ཙཱ་ཡཾ བྱཱ་དྷི ཙ, མ་ར་ཎ་ཉྩ ས་ཙ་པ་ལ་བྱཱ་དྷི ཙ ས་མཱ་ཧཱ་རེ. ཏ་ཉྩ ས་ཧ བི་ལཱ༹་ཡ ཝ་ཏྟ་ཏཱི་ཏི ས་བི་ལ༹ནྟི ཨེ་ཏེ ཡ་ཐཱ་ཝུ་ཏྟ་བྱ་བྷི་ཙཱ་རཱི་བྷཱ་ཝཱ ཏེ་ཏྟིཾ་ས ཧོ་ནྟཱི་ཏི. ཨུ་སྶཱ་ཧ་ཝ་ཏཱ ཝཱི་ར་ར་སོ ཏཾ་ཝ་སེ་ནེ་ཝ ཨ་སྶཱ་དཱི་ཡ་ཏི. བྷཱི་རུ་ནཱ ཏུ སོ་ཝ བྷ་ཡཱ་ན་ཀ་ར་ས་ཝ་སེ་ནེ་ཏི ལོ་ཀ་ས་བྷཱ་ཝ་སྶ ཨ་ནེ་ཀ་ཏྟཱ ཏ་ད་ཏྠ་མེ་ཏེ བྱ་བྷི་ཙཱ་རི་ནོ ཨེ་ཀེ་ཀ་སྶ་ར་ས་སྶ བ་ཧ་ཝོ ཝ་ཎྞ་ནཱི་ཡཱ, ཡ་ཏོ ཏཾ་ཝ་ཎྞ་ནཱ་དྭཱ་རེ་ན ས་བྦོ་པི ཏེ་སུ ཀི་ཉྩི ཨ་སྶཱ་དེ་ཏཱི་ཏི. ཏ་ཏྠ ཡ་སྨཱ པ་ན མཱ་ར་ཎོ་པ་ག་ཏ་ཝེ་རི་ད་སྶ་ན་མེ་ཀ་མེ་ཝ ཏ་ངྑ་ཎེ་ཡེ་ཝ བྷི་ནྣཾ པ་ཀ་ཏི་ཝ་སེ་ན བྷཱི་རུ་ནོ བྷ་ཡ་སྶ ཧེ་ཏུ, ས་ངྒཱ་མ་ལོ་ལ་སྶ ཏུ ཨུ་སྶཱ་ཧ་ནི་མི་ཏྟཾ སི་ཡཱ. ཏ་ཐཱ ན་ཊེ་ན ཀ་ཏཾ ཝི་ཀ་ཏ་མཱ་བྷ་ར་ཎཾ ཀྲི་ཡཱ་ཝཱ ནཱི་ཙ་པ་ཀ་ཏཱི་ནཾ ཋཱ་ཡི་ནོ ཧཱ་ས་སྶ ཧེ་ཏུ, ག་མྦྷཱི་ར་པ་ཀ་ཏཱི་ནཾ བྱ་བྷི་ཙཱ་རི་ནོ ཧཱ་ས་སྶ, ཏ་སྨཱ བྷཱ་ཝེ ཝ་ཎྞ་ཡ་ཏཱ ཀ་ཝི་ནཱ བྷཱ་ཝཱ ཏ་ཐཱ ཝ་ཎྞ་ནཱི་ཡཱ, ཡ་ཐོ་ཙི་ཏྱ་པ་རི་པོ་སོ སི་ཡཱ. ཨོ་ཙི་ཏྱ་བྷ་ངྒོ ཏུ མ་ཧ་ཏཱ ཝཱ་ཡཱ་མེ་ན པ་རི་ཧ་རི་ཏ་བྦོ.
ཏེ་སུ ནི་བྦེ་དོ ཨ་ཏྟཱ་ཝ་མཱ་ན་ནཾ. ཏ་སྶ ཙ ཨི་ཏྠཱི་ན་ཉྩ ནཱི་ཙཱ་ན་ཉྩ དཱ་ལི་དྡི་ཡཾ ཝི་བྷཱ་ཝོ, ཡོ་གཱི་ནཾ ཏུ ཏ་ཏྭ་སཾ་ཝེ་ད་ནཾ ཝི་བྷཱ་ཝོ, ཨ་སྶུ་པ་ཏ་ན་ཙི་ནྟཱ་ད་ཡོ ཨེ་ཏྠ ཨ་ནུ་བྷཱ་ཝཱ.
ཏ་ཀྐོ ཝི་ཏ་ཀྐ་ནཾ. ཏ་སྶ ས་ནྡེ་ཧོ ཝི་བྷཱ་ཝོ, སི་རོ་ཀ་མྤཱ་དི ཨ་ནུ་བྷཱ་ཝོ.
ས་ངྐཱ་ཡ ཝི་རུ་དྡྷ་ཙ་ར་ཎཾ ཝི་བྷཱ་ཝོ, ཀ་མྤཱ་ད་ཡོ ཨ་ནུ་བྷཱ་ཝོ.
ས་མོ ཁེ་དོ. ཏ་ཏྠ ག་ཏྱཱ་དི ཝི་བྷཱ་ཝོ, སེ་དཱ་དི ཨ་ནུ་བྷཱ་ཝོ.
དྷི་ཏི ས་ནྟོ་སོ. ཉཱ་ཎཱ་དི ཝི་བྷཱ་ཝོ, ཨ་ནུ་བྷཱ་ཝོ བྷོ་གཱ་ལོ་ལ་ཏཱ་དི.
ཛ་ལ༹་ཏཱ ཨ་པྤ་ཊི་པ་ཏྟི. ཏ་སྶཱ ཨི་ཊྛཱ་ནི་ཊྛ་ད་སྶ་ནཱ་དི ཝི་བྷཱ་ཝོ, ཨ་ནི་མི་ས་ན་ཡ་ནཱ་ལོ་ཙ་ནཱ་དི ཨ་ནུ་བྷཱ་ཝོ.
དཱི་ན་ཏཱ ཙེ་ཏ་སོ ཨ་ནོ་ཛ་ཏཱ. ཏ་སྶཱ ཝི་བྷཱ་ཝོ དུ་གྒ་ཏ་ཏཱ་དི, ཨ་ནུ་བྷཱ་ཝོ མ་ལི་ན་ཝ་ཏྠ་ཏཱ་དི.
ཨུ་གྒ་ཏཱ དཱ་རུ་ཎ་ཏྟཾ. ཏ་སྶཱ ཝི་བྷཱ་ཝོ བ་ལ་ཝཱ་པ་རཱ་དྷཱ་དི, ཏ་སྶ ཨ་ནུ་བྷཱ་ཝོ ཏ་ཛྫ་ནཱ་དི.
ཨཱ་ལ་ས་ཏྟསྶ པ་རི་ས་མཱ་དི ཝི་བྷཱ་ཝོ, ཛི་མྷ་ཏཱ་དི ཨ་ནུ་བྷཱ་ཝོ.
སུ་ཏྟསྶ ནི་དྡཱ ཝི་བྷཱ་ཝོ, ཏ་སྶཱ་དཱ་ད་ཡོ ཨ་ནུ་བྷཱ་ཝོ.
ཏཱ་སོ ཙི་ཏྟ་ཀྑོ་བྷོ. ཝི་བྷཱ་ཝོ ཨ་སྶ ག་ཛྫི་ཏཱ་དི, ཀ་མྤ་ནཱ་དི ཨ་ནུ་བྷཱ་ཝོ.
ཨཱ་ཡཱ་ས་པི་པཱ་སཱ་དི ཝི་བྷཱ་ཝོ གི་ལཱ་ནི་ཡཱ, ཝི་ཝ་ཎྞ་ཏཱ་ད་ཡོ ཨ་ནུ་བྷཱ་ཝོ.
ཀཱ་ལ་ཀྑ་མ་ཏཱ ཨུ་སྶུ་ཀཾ. ཝི་བྷཱ་ཝོ ཏ་སྶ ར་མ་ཎཱི་ཡ་ད་སྶ་ནི་ཙྪཱ་དི, ཨ་ནུ་བྷཱ་ཝོ ཏུ་རི་ཏ་ཏཱ་དི.
ཙེ་ཏོ་པ་སཱ་དོ ཧ་རི་ཏོ. ཏ་ཏྲ ཨུ་སྶ་ཝཱ་དི ཝི་བྷཱ་ཝོ, ཨ་སྶུ་སེ་དཱ་ད་ཡོ ཨ་ནུ་བྷཱ་ཝོ.
ས་དི་ས་ད་སྶ་ནཱ་དི ཝི་བྷཱ་ཝོ ས་ཏིཡཱ, ཨ་ནུ་བྷཱ་ཝོ བྷ་མུ་ས་མུ་ནྣ་མ་ནཱ་དི.
པ་རེ་ས་མུ་ཀྐཾ་སཱ་ས་ཧ་ན་ཏཱ ཨི་སྶཱ. ཏ་སྶཱ དུ་ཛྫ་ན་ཏྟ་ག་བྦཱ་ད་ཡོ ཝི་བྷཱ་ཝོ, དོ་ས་ཀ་ཐ་ནཱ་ཝ་ཛཱ་ན་ནཱ་ད་ཡོ ཨ་ནུ་བྷཱ་ཝོ.
ཝི་སཱ་དོ ཁེ་དོ. ཝི་བྷཱ་ཝོ ཏ་སྶ ཨཱ་ར་དྡྷ་ཀཱ་རི་ཡཱ་སི་དྡྷཱ་དི, བཱ་དྷ་ཡ་ཏཱ་པཱ་དི ཨ་ནུ་བྷཱ་ཝོ.
ཨ་བ་ཧི་ཏྠཱ ཀཱ་ཡ་སཾ་ཝ་ར་ཎཾ. ཏ་སྶཱ ཝི་བྷཱ་ཝོ ལ་ཛྫཱ་དི, ཨ་ནུ་བྷཱ་ཝོ’ཉྙ་ཝི་ཀྲི་ཡཱ.
ཙི་ནྟཱ ཨི་ཊྛཱ་ལཱ་བྷཱ་དཱི་ཧི, ཨ་ནུ་བྷཱ་ཝོ མུ་ཀུ་ལི་ཏ་ན་ཡ་ནཱ་དི.
ག་བྦོ ཨ་བྷི་མཱ་ནོ. ཝི་བྷཱ་ཝོ་སྶ ཨི་སྶ་རི་ཡཱ་དི, ཨ་ནུ་བྷཱ་ཝོ ཨ་ཝ་ཛཱ་ན་ནཱ་དི.
ཨ་པ་མཱ་རོ གཱ་ཧ་རུ་ཀྑཱ་དཱི་ཧི [གཱ་ཧ་རུ་ཀྑ་པ་ཏ་ནཱ་དཱི་ཧི (?)], བྷཱུ་པཱ་ཏཱ་ད་ཡོ ཨེ་ཏྠ ཨ་ནུ་བྷཱ་ཝོ.
ཨ་མ་རི་སོ ཨ་ཀྑ་མ་ཏཱ. ཝི་བྷཱ་ཝོ ཨ་སྶཱ་ཝ་མཱ་ན་ནཱ་དི, སི་རོ་ཀ་མྤ་ན་ཏ་ཛྫ་ནཱ་ད་ཡོ ཨ་ནུ་བྷཱ་ཝོ.
མ་དོ པ་མཱ་དུ་ཀྐཾ་སོ. ཏ་སྶ ཝི་བྷཱ་ཝོ པཱ་ནཾ, ཙ་ལ་མཱ་ན་ངྒ་ཝ་ཙོ་ག་ཏི་ཧཱ་སཱ་ད་ཡོ ཨ་ནུ་བྷཱ་ཝོ.
མ་ཏི ཀ་ངྑ་ཙྪེ་དོ. ཨུ་པ་དེ་སཱ་དི ཝི་བྷཱ་ཝོ, མུ་ཁ་ཝི་ཀཱ་སཱ་དི ཨེ་ཏྠ ཨ་ནུ་བྷཱ་ཝོ.
ཨ་ས་མེ་ཀྑི་ཏ་ཀཱ་རི་ཏཱ ཨུ་མྨཱ་དོ. ཏ་སྶ ཝི་བྷཱ་ཝོ ས་ནྣི་པཱ་ཏ་ག་ཧ་ཎཱ་དི, ཨ་ཊྛཱ་ན་རུ་དི་ཏ་གཱི་ཏ་ཧཱ་སཱ་ད་ཡོ ཨ་ནུ་བྷཱ་ཝོ.
མོ་ཧོ བྷ་ཡཱ་དཱི་ཧི, ཨ་ནུ་བྷཱ་ཝོ ཐ་མྦྷ་ཀ་མྤཱ་དི.
དུ་རཱ་ཙཱ་རཱ་དཱི་ཧི བི་ལ༹ཾ, ཨ་དྷོ་མུ་ཁ་ཏཱ་དི ཨ་ནུ་བྷཱ་ཝོ.
མ་ར་ཎཾ ཝི་བྷཱ་ཝ་ཨ་ནུ་བྷཱ་ཝེ་ཧི སུ་པ་སི་དྡྷཾ.
ཙ་པ་ལ་ཏཱ རཱ་ག་དོ་སཱ་དཱི་ཧི, ས་ཙྪ་ནྡ་ཙ་ར་ཎཱ་དི ཨ་ནུ་བྷཱ་ཝོ. བྱཱ་དྷི པཱ་ཀ་ཊོ.
ཡེ ཝཱ པ་ན་ཉྙེ ཨི་དྷ ནི་དྡི་ཊྛཱ ཙི་ཏྟ་ཝུ་ཏྟི་ཝི་སེ་སཱ་པི སཾ་ཝི་ཛྫ་ནྟི སུ་ཁུ་མ་བྷེ་དཱ, ཏེ་སུ ཀེ་ཙི ཝུ་ཏྟེ་སྭ་ནྟོ་ག་དྷཱ ཧོ་ནྟི. ཡ་ཐཱ ཧི ཨི་ཙྪཱ་ས་བྷཱ་ཝཱ ས་བྦེ ཀཱ་མཱ ར་ཏི་ཡཾ ཨ་ནྟོ་ག་དྷཱ, ཏ་ཐཱ དོ་ས་པྤ་ཀཱ་རཱ ཀོ་དྷཱ མ་རི་ས་ཨི་སྶཱ་དཱི་སྭ་ནྟོ་ག་དྷཱ, དུ་ཀྑ་ས་བྷཱ་ཝཱ སོ་ཀ་ས་མ་བྱཱ་དྷི་གི་ལཱ་ནི ཝི་སཱ་དཱ་དཱི་སྭ་ནྟོ་ག་དྷཱ. པཱི་ཏྱཱ་ད་ཡོ སུ་ཁ་ས་བྷཱ་ཝཱ ཧ་རི་སེ་ཏི ད་ཊྛ་བྦཾ. ཏེ་སུ བྷ་ཡཱ ཏཱ་སོ ཨ་ཉྙོ, ས་ངྐཱ ཏ་ཐཱ ཨ་མ་རི་སོ. ཏ་སྨཱ ཨི་སྶཱ, ཏ་ཐཱ གི་ལཱ་ནི་ཏོ ས་མོ, ནི་དྡཱ་ཡ སུ་ཏྟཾ, ཨུ་སྶུ་ཀཱ ཙ་པ་ལ་ཏཱ, ཏ་ཐཱ མོ་ཧཱ པ་ལ་ཡོ ཝ་ཀྑ་མཱ་ནོ ཨ་ཉྙོ་ཏི མ་ནྟ་བྦཾ.
༣༤༤. ཨི་དཱ་ནི ཏེ བྱ་བྷི་ཙཱ་རཱི་བྷཱ་ཝེ ས་རཱུ་པེ་ན ད་སྶེ་ཏི ‘‘ནི་བྦེ་དོ’’ཨི་ཙྩཱ་དི་ནཱ. ནི་བྦེ་དོ ཨ་ཏྟ་ནི་ནྡཱ་ས་ངྑ་ཏོ ཙ, ཏ་ཀྐ་ས་ངྐཱ ཙ, ས་མ་དྷི་ཏི་ཛ་ལ༹་ཏཱ པ་རི་ས་མོ ས་ནྟོ་ས་ལ་ཀྑ་ཎཱ དྷི་ཏི ཛ་ལ༹་ཏཱ ཙ, དཱི་ན་ཏུ་གྒཱ་ལ་ས་ཏྟཾ དཱི་ན་བྷཱ་ཝ་དཱ་རུ་ཎ་བྷཱ་ཝ་ཨ་ལ་ས་བྷཱ་ཝཱ ཙ, སུ་ཏྟཾ ས་ཡ་ན་ཉྩ, ཏཱ་སོ ཙི་ཏྟ་ཀྑོ་བྷོ ཙ, གི་ལཱ་ན་པ་རི་མ་དྡི་ཏ་བྷཱ་ཝོ ཙ, ཨུ་སྶུ་ཀ་ཧ་རི་ས་ས་ཏི་སྶཱ་ཝི་སཱ་དཱ་བ་ཧི་ཏྠཱ ཨུ་སྶཱ་ཧ་པི་ཏི་ས་ཏི་ཨི་སྶཱ་ཁེ་ད་ཨཱ་ཀཱ་ར་སཾ་ཝ་རཱ ཙ, ཙི་ནྟཱ ཙ, ག་བྦོ ཨ་བྷི་མཱ་ནོ ཙ, ཨ་པ་མཱ་རོ ཙ, ཨ་མ་རི་ས་མ་ད་མ་ཏུ་མྨཱ་ད་མོ་ཧཱ ཨ་ཀྑ་ནྟི་པ་མཱ་དཱ་དྷི་ཀྐཱ ཀ་ངྑ་ཙྪེ་ད་ཨུ་མྨཱ་ད་མོ་ཧཱ ཙ, ཝི་བོ་དྷོ པ་བོ་དྷོ ཙ, ནི་དྡཱ་ཝེ་གཱ ནི་དྡཱ ཙ, ཨཱ་ཝེ་ག་ས་ངྑཱ་ཏོ ས་མྦྷ་མོ ཙ, ས་བི་ལ༹ཾ ལ་ཛྫཱ་ས་ཧི་ཏཾ མ་ར་ཎ་ས་ཙ་པ་ལཱ་བྱཱ་དྷི མ་ར་ཎ་ཉྩ ཙཱ་པ་ལྱ་ས་ཧི་ཏཱ བྱཱ་དྷི ཙེ་ཏི. ཨེ་ཏེ ཏེ་ཏྟིཾ་ས བྱ་བྷི་ཙཱ་རཱི་བྷཱ་ཝཱ ནཱ་མ ཧོ་ནྟི. ཏ་ཀྐོ ཙ ས་ངྐཱ ཙེ་ཏི ཙ, ས་མོ ཙ དྷི་ཏི ཙ ཛ་ལ༹་ཏཱ ཙེ་ཏི ཙ, དཱི་ན་ཏཱ ཙ ཨུ་གྒོ ཙ ཨ་ལ་ས་ཏྟ་ཉྩཱ་ཏི ཙ, ཨུ་སྶུ་ཀ་ཉྩ་ཧ་རི་སོ ཙ ས་ཏི ཙ ཨི་སྶཱ ཙ ཝི་སཱ་དོ ཙ ཨ་བ་ཧི་ཏྠཱ ཙེ་ཏི ཙ, ཨ་མ་རི་སོ ཙ མ་དོ ཙ མ་ཏི ཙ ཨུ་མྨཱ་དོ ཙ མོ་ཧོ ཙེ་ཏི ཙ, ནི་དྡཱ ཙ ཨཱ་ཝེ་གོ ཙེ་ཏི ཙ, ས་ཧ བི་ལཱ༹་ཡ ཝ་ཏྟ་ཏཱི་ཏི ཙ, ས་ཧ ཙ་པ་ལེ་ན ཙཱ་པ་ལྱེ་ན ཝ་ཏྟ་ཏཱི་ཏི ཙ, ས་ཙ་པ་ལོ ཙ སོ བྱཱ་དྷི་ཙེ་ཏི ཙ, མ་ར་ཎ་ཉྩ ས་ཙ་པ་ལ་བྱཱ་དྷི ཙེ་ཏི ཙ ཝཱ་ཀྱཾ. མ་ར་ཎ་ས་ཙ་པ་ལཱ་བྱཱ་དྷཱི་ཏི ས་མཱ་ཧཱ་ར་དྭ་ནྡོ. ཏ་སྨཱ ‘‘ས་བི་ལ༹’’ནྟི པ་དཾ ཨེ་ཏ་སྶ ཝི་སེ་ས་ནཾ ཧོ་ཏི.
ལོ་ཀ་ས་བྷཱ་ཝ་སྶ ཨ་ནེ་ཀ་ཝི་དྷ་ཏྟཱ ཨེ་ཀོ་ཡེ་ཝ ཝཱི་ར་ར་སོ ཨུ་སྶཱ་ཧ་ཝ་ཏཱ ཝཱི་ར་ར་སཱ་ཀཱ་རེ་ན ཨ་སྶཱ་ད་ནཱི་ཡོ ཧོ་ཏི, སོ་ཡེ་ཝ བྷཱི་རུ་ནཱ བྷ་ཡཱ་ཀཱ་རེ་ན ཨ་སྶཱ་ད་ནཱི་ཡོ ཧོ་ཏི. ཏ་སྨཱ ཨེ་ཀེ་ཀ་སྶ ར་ས་སྶ ཨི་མེ བ་ཧཱུ བྱ་བྷི་ཙཱ་རི་ནོ ཝ་ཎྞེ་ཏ་བྦཱ ཧོ་ནྟི. ཨེ་ཝཾ ས་ཏི ཨ་ནེ་ཀཱ་དྷི་པྤཱ་ཡ་ཀོ ལོ་ཀོ ཏེ་སུ ཀི་ཉྩི ཨ་སྶཱ་དེ་ཏི. ཨེ་ཝཾ ས་ཏི བ་ནྡྷོ ས་བྦ་ཛ་ན་སྶ ཀ་ནྟོ ཧོ་ཏི. ཏ་སྶཾ བྷཱ་ཝ་ཝ་ཎྞ་ནཱ་ཡཾ ཡ་སྨཱ མཱ་རེ་ཏུ་མཱ་ག་ཙྪ་ནྟཱ་ནཾ ས་ཏྟཱུ་ནཾ ད་སྶ་ན་མེ་ཀ་མེ་ཝ ཏ་ངྑ་ཎེ ཛ་ནཱ་དྷི་པྤཱ་ཡ་ཏོ བྷི་ཛྫི་ཏྭཱ པ་ཀ་ཏི་བྷཱི་རཱུ་ནཾ པུ་རི་སཱ་ནཾ བྷ་ཡ་སྶ ཙ ཡུ་དྡྷ་ལོ་ལ་སྶ ཨུ་སྶཱ་ཧ་ན་སྶ ཙ ཀཱ་ར་ཎཾ ཧོ་ཏི. ཨེ་ཝཾ ན་ཊེ་ན ཧ་ས་ན་ཏྠཾ ཀ་ཏ་ཝི་ཀ་ཏ་མཱ་བྷ་ར་ཎ་ཉྩ ཏཱ་དི་ས་ཀི་རི་ཡཱ ཙ ཨུ་ཏྟཱ་ན་པ་ཀ་ཏི་ཀཱ་ནཾ པུ་རི་སཱ་ནཾ ཋཱ་ཡཱི་ཧཱ་ས་སྶ ཙ ག་མྦྷཱི་ར་པ་ཀ་ཏི་ཀཱ་ནཾ བྱ་བྷི་ཙཱ་རཱི་ཧཱ་ས་སྶ ཙ ཧེ་ཏུ བྷ་ཝེ་ཡྻ. ཏ་སྨཱ བྷཱ་ཝེ ཝ་ཎྞེ་ནྟེ་ན ཀ་ཝི་ནཱ ཨོ་ཙི་ཏྱ་བྷ་ངྒ་མ་ཀ་ཏྭཱ ས་ཀྐ་ཙྩ་མོ་ཙི་ཏྱཾ ས་ཛྫེ་ཏྭཱ བྷཱ་ཝ་པྤ་ཀཱ་ས་ཀཱ་ནི ས་ཝི་བྷཱ་ཝཱ་ནུ་བྷཱ་ཝ་ཀ་ཝི་ཝ་ཙ་ནཱ་ནི ཝ་ཎྞེ་ཏ་བྦཱ་ནི. ཨེ་ཏྠ བྷཱ་ཝཱ་ཝ་བོ་དྷ་ཀ་ཝི་བྷཱ་ཝཱ་དཱི་ནཾ ཛཱ་ནི་ཏ་བྦ་ཏྟཱ ཏེ་ཧི ཏེ་ཧི བྷཱ་ཝེ་ཧི ས་དྡྷིཾ ཨེ་ཝཾ ཝེ་དི་ཏ་བྦཱ.
ཏེ་སུ བྷཱ་ཝེ་སུ ཨ་ཏྟཱ་ཝ་མཱ་ན་ན་ལ་ཀྑ་ཎོ ནི་བྦེ་དོ. ཨི་ཏྠཱི་ནཾ, ཧཱི་ནཱ་ནཾ [ཧཱི་ནཱ་ཙཱ་རཱ་ནཾ (ཀ.)] ཝཱ ཨུ་པྤ་ཛྫ་ཏི ཙེ, དཱ་ལི་དྡི་ཡཾ ཨཱ་ལ་མྦ་ཎ་ཝི་བྷཱ་ཝོ ནཱ་མ, ཡོ་གཱི་ནཾ ཙེ, ཏ་ཐཱ་ཝ་བོ་དྷོ ཨཱ་ལ་མྦ་ཎ་ཝི་བྷཱ་ཝོ, ཨེ་ཏྠ ཨ་སྶུ་པ་ཏ་ན་ཙི་ནྟཱ་དི་ཀཾ ཨ་ནུ་བྷཱ་ཝོ ནཱ་མ.
ཝི་ཏ་ཀྐ་སྶ ས་ནྡེ་ཧོ ཨུ་དྡཱི་པ་ན་ཝི་བྷཱ་ཝོ ནཱ་མ, སི་རོ་ཀ་མྤཱ་དི་ཀཾ ཨ་ནུ་བྷཱ་ཝོ ནཱ་མ.
ས་ངྐཱཡ ཝི་རུ་དྡྷ་པྤ་ཝ་ཏྟི ཨུ་དྡཱི་པ་ན་ཝི་བྷཱ་ཝོ, ཀ་མྤཱ་དི་ཀོ ཨ་ནུ་བྷཱ་ཝོ. ཨུ་པ་རི ‘‘ཝི་བྷཱ་ཝོ’’ཏི ཝུ་ཏྟེ ཨཱ་ལ་མྦ་ཎུ་དྡཱི་པ་ནེ་སུ དྭཱི་སུ ཡཾ ཡུ་ཛྫ་ཏི, ཏཾ ག་ཧེ་ཏ་བྦཾ.
ཁེ་ད་ལ་ཀྑ་ཎ་སྶ ས་མ་སྶ ག་མ་ནཱ་དི་ཀཾ ཝི་བྷཱ་ཝོ, སེ་དཱ་དི ཨ་ནུ་བྷཱ་ཝོ.
ས་ནྟོ་ས་ལ་ཀྑ་ཎཱ་ཡ དྷི་ཏིཡཱ ཉཱ་ཎཱ་དི ཝི་བྷཱ་ཝོ, བྷོ་གེ་སུ ཨ་ལོ་ལ་བྷཱ་ཝཱ་དི ཨ་ནུ་བྷཱ་ཝོ.
ཨ་ཡོ་གྒ་ཏཱ་ལ་ཀྑ་ཎཱ་ཡ ཛ་ལ༹་ཏཱཡ ཨི་ཊྛཱ་ནི་ཊྛཱ་ནཾ ཨ་ཛཱ་ན་ནཱ་དི ཝི་བྷཱ་ཝོ, ཝི་ཝ་ཊ་ན་ཡ་ནེ་ཧི ཨ་བྷི་མུ་ཁ་ཝི་ལོ་ཀ་ན་ཏཱ་དི ཨ་ནུ་བྷཱ་ཝོ.
ཙི་ཏྟ་སྶ་ནི་ཏྟེ་ཛ་ལ་ཀྑ་ཎཱ་ཡ དཱི་ན་ཏཱཡ དུ་གྒ་ཏ་ཏཱ་དི ཝི་བྷཱ་ཝོ, མ་ལི་ན་ཝ་ཏྠ་ཏཱ་དི ཨ་ནུ་བྷཱ་ཝོ.
དཱ་རུ་ཎ་ཏཱ་ལ་ཀྑ་ཎ་སྶ ཨུ་གྒབྷཱ་ཝ་སྶཱ་ཏི་ས་ཡཱ་པ་རཱ་དྷཱ་དི ཝི་བྷཱ་ཝོ, ཏ་ཛྫ་ནཱ་དི ཨ་ནུ་བྷཱ་ཝོ.
ཨ་ལ་ས་ཏྟསྶ ཨ་ཊྛཱ་ན་པ་རི་ས་མཱ་དི ཝི་བྷཱ་ཝོ, ཝ་ངྐི་ཀ་བྷཱ་ཝོ ཨ་ནུ་བྷཱ་ཝོ.
ས་ཡ་ན་ས་ངྑཱ་ཏ་སྶ སུ་ཏྟསྶ ནི་དྡཱ་དི ཝི་བྷཱ་ཝོ, ཨ་སྶཱ་དཱ་དི ཨ་ནུ་བྷཱ་ཝོ. ཨེ་ཏྠ ཨ་སྶཱ་ད་ནཾ ནཱ་མ སེ་ཡྻ་སུ་ཁ་པ་སྶ་སུ་ཁཱ་དི་ཀཾ.
ཙི་ཏྟ་ཀྑོ་བྷ་ས་ངྑཱ་ཏ་སྶ ཏཱ་ས་སྶ ག་ཛྫི་ཏཱ་དི ཝི་བྷཱ་ཝོ, ག་ཛྫི་ཏཾ ནཱ་མ བྷ་ཡ་ཛ་ན་ཀ་ཝ་ཙ་ནཾ. ཀོ་པེ་ན ཀ་མྤ་ནཱ ཨ་ནུ་བྷཱ་ཝོ.
པཱི་ལཱ༹་ས་ངྑཱ་ཏ་སྶ གི་ལཱ་ནསྶ ཨཱ་ཡཱ་ས་པི་པཱ་སཱ་དི ཝི་བྷཱ་ཝོ, དུ་བྦ་ཎྞ་ཏཱ་དི ཨ་ནུ་བྷཱ་ཝོ.
ཨ་ནུ་རཱུ་པ་ཀཱ་ལ་སྶ ཨ་ནོ་ལོ་ཀ་ན་སྶ ཨུ་སྶུ་ཀྐ་སྶ ར་མྨ་ཝ་ཏྠུ་ད་སྶ་ནི་ཙྪཱ་དི ཝི་བྷཱ་ཝོ, ཏུ་རི་ཏ་ཏཱ་དི ཨ་ནུ་བྷཱ་ཝོ.
ཙེ་ཏོ་པ་སཱ་ད་ལ་ཀྑ་ཎ་སྶ ཧ་རི་སསྶ མ་ངྒ་ལ་ཀཱི་ལཱ༹་དི ཝི་བྷཱ་ཝོ, ས་ནྟོ་ས་ཝ་ཙ་ནཱ་དི ཨ་ནུ་བྷཱ་ཝོ.
ས་ར་ཎ་ལ་ཀྑ་ཎཱ་ཡ ས་ཏིཡཱ ས་ཉྙཱ་ཎ་ད་སྶ་ནཱ་དི ཝི་བྷཱ་ཝོ, བྷ་མུ་ཀྑེ་པཱ་དི ཨ་ནུ་བྷཱ་ཝོ.
པ་ར་ས་མྤ་ཏྟི་ཨ་ས་ཧ་ན་ལ་ཀྑ་ཎཱ་ཡ ཨི་སྶཱཡ དུ་ཛྫ་ན་བྷཱ་ཝ་ག་བྦཱ་དི ཝི་བྷཱ་ཝོ, དོ་ས་ཀ་ཐ་ནཱ་ཝ་ཛཱ་ན་ནཱ་དི ཨ་ནུ་བྷ་ཝོ.
ཁེ་ད་ལ་ཀྑ་ཎ་སྶ ཝི་སཱ་དསྶ ཨཱ་ར་དྡྷ་ཀཱ་རི་ཡཱ་སི་དྡྷི་ཀཱ་རི་ཡ་བྱཱ་པ་ཏྟི་ཨཱ་དི ཝི་བྷཱ་ཝོ, མ་ནོ་ས་ནྟཱ་པཱ་དི ཨ་ནུ་བྷཱ་ཝོ.
ཨཱ་ཀཱ་ར་སཾ་ཝ་ར་ཎ་ལ་ཀྑ་ཎཱ་ཡ, ར་ས་ས་བྷཱ་ཝ་པ་ཊི་ཙྪཱ་ད་ན་ལ་ཀྑ་ཎཱ་ཡ ཝཱ ཨ་བ་ཧི་ཏྠ་ཡ་ལ་ཛྫཱ་དི ཝི་བྷཱ་ཝོ, ཏ་ད་ཉྙ་ཀྲི་ཡཱ་ཀ་ར་ཎཾ, ཨ་དྷོ་མུ་ཁ་ཀ་ར་ཎཾ, པཱ་དེ་ཧི བྷཱུ་མི་ཁ་ཎ་ན་ནྟི་ཨཱ་དི ཨ་ནུ་བྷཱ་ཝོ.
ཙི་ནྟཱཡ ཨི་ཊྛ་ཏྠཱ་ལཱ་བྷཱ་དཱི ཝི་བྷཱ་ཝོ, མ་ཀུ་ལི་ཏ་ན་ཡ་ནཱ་དི ཨ་དྷོ་ཁི་ཏྟ་ཙ་ཀྑཱ་དི ཝཱ ཨ་ནུ་བྷཱ་ཝོ.
ག་བྦསྶ ཨི་སྶ་རི་ཡཱ་དི ཝི་བྷཱ་ཝོ, ཨ་ཝ་ཛཱ་ན་ནཱ་དི ཨ་ནུ་བྷཱ་ཝོ.
ཨ་པ་མཱ་རསྶ ཡ་ཀྑ་པཱི་ལཱ༹་དི ཝི་བྷཱ་ཝོ, བྷཱུ་མི་པ་ཏ་ནཱ་ད་ཡོ ཨ་ནུ་བྷཱ་ཝོ.
ཨ་ཀྑ་མ་ལ་ཀྑ་ཎ་སྶ ཨ་མ་རི་སསྶ ཨ་ཝ་མཱ་ན་ནཱ་དི ཝི་བྷཱ་ཝོ, སི་རོ་ཀ་མྤ་ན་ཏ་ཛྫ་ནཱ་དི ཨ་ནུ་བྷཱ་ཝོ.
པ་མཱ་དཱ་དྷི་ཀྐ་ལ་ཀྑ་ཎ་སྶ མ་དསྶ ས་ནྟོ་ས་པཱ་ནཾ ཝི་བྷཱ་ཝོ, ཀ་མྤ་མཱ་ན་ཧ་ཏྠ་པཱ་ད་ཝ་ཙ་ན་ག་མ་ན་ཧཱ་སཱ་དཱི ཨ་ནུ་བྷཱ་ཝོ.
ཀ་ངྑཱ་ཙྪེ་ད་ན་ལ་ཀྑ་ཎཱ་ཡ མ་ཏིཡཱ ཨུ་པ་དེ་སཱ་དི ཝི་བྷཱ་ཝོ, མུ་ཁ་ས་ནྟོ་སཱ་དི ཨ་ནུ་བྷཱ་ཝོ.
ཨ་ནུ་པ་པ་རི་ཀྑ་ཀཱ་རི་ཏཱ་ལ་ཀྑ་ཎ་སྶ ཨུ་མྨཱ་དསྶ ས་ནྣི་པཱ་ཏ་ཛྫ་ར་ཡ་ཀྑཱ་དི ཝི་བྷཱ་ཝོ, ཨ་ཀཱ་ར་ཎ་རོ་ད་ན་ཧ་ས་ནཱ་དི ཨ་ནུ་བྷཱ་ཝོ.
མུ་ཡ྄ཧ་ན་ལ་ཀྑ་ཎ་སྶ མོ་ཧསྶ ཨ་དྷི་ཀ་བྷ་ཡཱ་དི ཝི་བྷཱ་ཝོ, ས་བྷཱ་ཝཱ་ན་ཝ་བོ་དྷ་ནཱ་དི ཨ་ནུ་བྷཱ་ཝོ.
ནི་དྡཱ་པ་ག་མ་ས་ངྑཱ་ཏ་སྶ ཝི་བོ་དྷསྶ ཀཱ་ལ་པ་རི་ཎཱ་མཱ་དི ཨཱ་ལོ་ཀ་ས་ར་ཎཱ་དི ཝཱ ཝི་བྷཱ་ཝོ, ཨ་ཀྑི་མ་དྡ་ནཱ་དི ཨ་ནུ་བྷཱ་ཝོ.
མ་ནོ་ས་མྤཱི་ལ༹་ན་ལ་ཀྑ་ཎཱ་ཡ ནི་དྡཱཡ ཀ་སྶ་ཙི ཨ་ཙི་ནྟ་ན་ཨ་ཀ་ར་ཎཱ་དི ཝི་བྷཱ་ཝོ, ཨ་ཀྑི་པི་ད་ཧ་ནཱ་དི ཨ་ནུ་བྷཱ་ཝོ.
བྷ་ཡཱ་ག་མ་ན་ལ་ཀྑ་ཎ་སྶ ཨཱ་ཝེ་གསྶ པ་ཙྩ་ཏྠི་ཀ་ད་སྶ་ནཱ་དི ཝི་བྷཱ་ཝོ, ཨུ་ཏྲཱ་ས་ཀ་མྤཱ་དི ཨ་ནུ་བྷཱ་ཝོ.
ལ་ཛྫཱ་ལ་ཀྑ་ཎཱ་ཡ བི་ལཱ༹ཡ དུ་རཱ་ཙཱ་རཱ་དི ཝི་བྷཱ་ཝོ, ཨ་དྷོ་མུ་ཁ་ཏཱ་དི ཨ་ནུ་བྷཱ་ཝོ.
མ་ར་ཎསྶ ས་ཏྠ་པ་ཧཱ་ར་རོ་གཱ་དི ཝི་བྷཱ་ཝོ, མུ་ཁ་ཝི་ཀཱ་རཱ་དི ཨ་ནུ་བྷཱ་ཝོ.
ཙཱ་པ་ལླསྶ རཱ་ག་དོ་སཱ་དི ཝི་བྷཱ་ཝོ, ཨ་ཏྟ་ནོ ས་ཙྪ་ནྡ་ཙ་ར་ཎཱ་དི ཨ་ནུ་བྷཱ་ཝོ.
བྱཱ་དྷིཡཱ ཝཱ་ཏ་པི་ཏྟཱ་དཱི་ནཾ ཨུ་སྶ་ད་བྷཱ་ཝཱ་དི ཝི་བྷཱ་ཝོ, ནི་ཏྠུ་ན་ནཱ་དི ཨ་ནུ་བྷཱ་ཝོ.
ཨི་མ་སྨིཾ སུ་བོ་དྷཱ་ལ་ངྐཱ་རེ ཨ་ད་སྶི་ཏ་སུ་ཁུ་མ་བྷེ་དཱ ཨ་ཉྙཱ་པི ཙི་ཏྟ་ཝུ་ཏྟི་ཝི་སེ་སཱ ས་ནྟི, ཏེ་སུ ཨི་ཙྪཱ་ས་བྷཱ་ཝཱ ས་བྦེ བྷེ་དཱ ཀཱ་མ་ར་ཏི་ཡ་ཉྩ, དོ་ས་པ་ཀཱ་རཱ ཀོ་དྷ་ཨ་མ་རི་ས་ཨི་སྶཱ་དཱི་སུ ཙ, དུ་ཀྑ་ས་བྷཱ་ཝཱ སོ་ཀ་ས་མ་བྱཱ་དྷི་གི་ལཱ་ན་ཝི་སཱ་དཱ་དཱི་སུ ཙ, པི་ཏི་ཨཱ་ད་ཡོ ཧ་རི་སེ ཙ ཨ་ནྟོ་ག་དྷཱ་ཏི ཝེ་དི་ཏ་བྦཱ. ཨེ་ཝཾ ས་མཱ་ནཱ་ནཾ ས་ངྒ་ཧེ ས་ཏི་པི ཏཱ་ས་ཏོ བྷ་ཡ་སྶ ཙ, ས་ངྐཱ་ཡ ཨ་མ་རི་སྶ ཙ, ཨ་མ་རི་ས་ཏོ ཨི་སྶཱ་ཡ ཙ, གི་ལཱ་ན་ཏོ ས་མ་སྶ ཙ, ནི་དྡཱ་ཡ སུ་ཏྟ་སྶ ཙ, ཨུ་སྶུ་ཀྐ་ཏོ ཙ་པ་ལ་ཏཱ་ཡ ཙ, མོ་ཧ་ཏོ ཝ་ཀྑ་མཱ་ན་པ་ལ་ཡ་སྶ ཙ པཱ་ཀ་ཊ་ཝི་སེ་སེ་ན ཨ་ཉྙ་ཐཱ ཝི་སུཾ ཝི་སུཾ ད་སྶི་ཏ་ནྟི ད་ཊྛ་བྦཾ.
སཱ་ཏྟི་ཀ་བྷཱ་ཝ་ཨ་དྷི་པྤཱ་ཡ
༣༤༥. ས་མཱ་ཧི་ཏ་ཏྟ་པྤ་བྷ་ཝཾ, ས་ཏྟཾ ཏེ་ནོ’པ་པཱ་དི་ཏཱ;
སཱ་ཏྟི་ཀཱ’པྱ’ནུ་བྷཱ་ཝ་ཏྟེ, ཝི་སུཾ བྷཱ་ཝཱ་བྷ་ཝ་ནྟི ཏེ.
༣༤༥. སཱ་ཏྟི་ཀེ ཝ་ད་ཏི ‘‘ས་མཱ་ཧི་ཏེ’’ཙྩཱ་དི་ནཱ. ས་མཱ་ཧི་ཏོ ཨེ་ཀ་གྒ་ཏཱ་བྷཱ་ཝཱ་པཱ་ད་ནེ་ན ཀ་ཏ་ས་མཱ་དྷཱ་ནོ ཨ་ཏྟཱ ཙི་ཏྟཾ ཏ་ཏོ པ་བྷ་ཝཾ ཨུ་པྤ་ནྣཾ ཡཾ, ཏཾ ས་ཏྟཾ ནཱ་མ. ཏེ་ན ས་ཏྟེ་ན ཨུ་པ་པཱ་དི་ཏཱ ནི་བྦ་ཏྟི་ཏཱ ཐ་མྦྷཱ་ད་ཡོ སཱ་ཏྟི་ཀཱ ཝུ་ཙྩ་ནྟེ. ཏེ ཙ པུ་ན ཨ་ནུ་བྷཱ་ཝཱ་པི བྷ་ཝ་ནྟི ཐ་མྦྷཱ་དི་བྷཱ་ཝ་སཾ་སཱུ་ཙ་ན་ས་བྷཱ་ཝ་ཝི་ཀཱ་ར་རཱུ་པ་ཏྟཱ. ཏ་ཉྩ ‘‘ཙི་ཏྟ་ཝུ་ཏྟི་ཝི་སེ་ས་ཏྟཱ’’ཨི་ཙྩཱ་དི་ནཱ ཝ་ཀྑ་ཏི. ཏེ་ནཱ་ཧ ‘‘ཨ་ནུ་བྷཱ་ཝ་ཏྟེ་པཱི’’ཏི. ཨེ་ཝཾ ས་ཏྱ་པི ཏེ སཱ་ཏྟི་ཀཱ ཝི་སུཾ པུ་ཐ་གེ་ཝ བྷཱ་ཝཱ བྷ་ཝ་ནྟི, ཝུ་ཏྟ་ན་ཡེ་ན ཙི་ཏྟ་བྷ་ཝ་ཏྟ་ཝི་རཱུ་པ་ཏྟཱ ཏེ་ས་ནྟི.
༣༤༥. ཨི་དཱ་ནི ཨུ་དྡེ་ས་ཀྐ་མེ་ནཱ་དྷི་ག་ཏ་ཀེ་ཝ་ལ་བྷཱ་ཝ་ས་ངྑཱ་ཏཾ སཱ་ཏྟི་ཀཱ་བྷཱ་ཝཾ ད་སྶེ་ཏི ‘‘ས་མཱ་ཧི་ཏ’’ཨི་ཙྩཱ་དི་ནཱ. ས་མཱ་ཧི་ཏ་ཏྟ་པྤ་བྷ་ཝཾ ཨེ་ཀ་གྒ་ཏཱ་བྷཱ་ཝཱ་པཱ་ད་ནེ་ན ཀ་ཏ་ས་མཱ་དྷཱ་ན་ཙི་ཏྟ་ཏོ ས་མྦྷཱུ་ཏཾ ས་ཏྟཾ ནཱ་མ ཧོ་ཏི. ཏེ་ན ལཱ་བྷཱ་ལཱ་བྷཱ་དཱི་སུ ཨེ་ཀཱ་ཀཱ་ར་སྶ ཧེ་ཏུ་ནཱ ཐི་ར་བྷཱ་ཝེ་ན ཨུ་པ་པཱ་དི་ཏཱ ནི་པྥཱ་དི་ཏཱ ཐ་མྦྷཱ་ད་ཡོ སཱ་ཏྟི་ཀཱ ནཱ་མ བྷ་ཝ་ནྟི. ཏེ སཱ་ཏྟི་ཀཱ ཨ་ནུ་བྷཱ་ཝ་ཏྟེ་པི ཙི་ཏྟཱ་ཀཱ་ར་ས་ངྑཱ་ཏ་ཐ་མྦྷཱ་དི་པ་ཀཱ་ས་ན་ས་བྷཱ་ཝ་ཝི་ཀཱ་ར་ས་རཱུ་པ་ཏྟཱ ཨ་ཏྟ་ནོ ཨ་ནུ་བྷཱ་ཝ་ཏྟེ ས་ཏི་པི ཝི་སུཾ བྷཱ་ཝཱ བྷ་ཝ་ནྟི ཡ་ཐཱ་ཝུ་ཏྟ ‘‘ཙི་ཏྟ་ཝུ་ཏྟི་ཝི་སེ་སཱ ཏུ, བྷཱ་ཝ་ཡ་ནྟི ར་སེ ཡ་ཏོ’’ཏི་ཨཱ་དི་ནཱ བྷཱ་ཝཱ ནཱ་མ ཧོ་ནྟཱི་ཏི. ཨི་མེ སཱ་ཏྟི་ཀཱ་བྷཱ་ཝཱ་ནུ་བྷཱ་ཝ་ཝ་སེ་ན དུ་ཝི་དྷཱ ཧོ་ནྟི. ས་མཱ་ཧི་ཏོ ཙ སོ ཨ་ཏྟཱ ཙེ་ཏི ཙ, ཏ་ཏོ པ་བྷ་ཝ་མི་ཏི ཙ, ས་ནྟོ ཨུ་པ་ས་ནྟོ ཙ སོ ཨ་ཏྟཱ ཙེ་ཏི ཙ, ས་ཏྟ་ཏོ བྷ་ཝ་ནྟཱི་ཏི ཙ, ས་ཏྟེ་ན ཨུ་པྤཱ་དི་ཏཱ་ཏི ཙ, ཨ་ནུ་བྷཱ་ཝཱ་ནཾ བྷཱ་ཝོ་ཏི ཙ ཝཱ་ཀྱཾ. ཨ་པཱིཏི ཨ་ནུ་གྒ་ཧ་ཏྠེ ནི་པཱ་ཏོ.
སཱ་ཏྟི་ཀ་བྷཱ་ཝ་པྤ་བྷེ་ད
༣༤༦. ཐ་མྦྷོ པ་ལ་ཡ་རོ་མ་ཉྩཱ,
ཏ་ཐཱ སེ་ད་སྶུ་ཝེ་པ་ཐུ;
ཝེ་ཝ་ཎྞི་ཡཾ ཝི་སྶ་ར་ཏཱ,
བྷཱ་ཝཱ’ཊྛེ’ཏེ ཏུ སཱ་ཏྟི་ཀཱ.
༣༤༦. ཏེ ད་སྶེ་ཏི ‘‘ཐ་མྦྷོ’’ཨི་ཙྩཱ་དི་ནཱ. ཨེ་ཏྠ ཐ་མྦྷོ ཨ་ཝི་སྶ་ར་ཀཱ་ཡ་ཙི་ཏྟ་ཏཱ. པ་ལ་ཡོ ཨ་སྶཱ་ས་པ་སྶཱ་ས་མ་ཏྟཱ་ཝ་སེ་སོ སུ་ཏྟཱ་ཝ་ཏྠཱ་ས་བྷཱ་ཝོ ནི་དྡཱ་པ་བྷ་ཝོ. སུ་བྱ་ཏྟ་ལ་ཀྑ་ཎཱ སེ་སཱ.
༣༤༦. ཨི་དཱ་ནི སཱ་ཏྟི་ཀེ ད་སྶེ་ཏི ‘‘ཐ་མྦྷོ’’ཨི་ཙྩཱ་དི་ནཱ. ཐ་མྦྷོ ཀཱ་ཡ་ཙི་ཏྟཱ་ནཾ ཨ་ཝི་ས་ར་བྷཱ་ཝ་ས་ངྑཱ་ཏོ ཙ པ་ལ་ཡ་རོ་མ་ཉྩཱ ནི་དྡཱ་ཡ ཨུ་པྤ་ཛྫ་མཱ་ན་ཨ་སྶཱ་ས་པ་སྶཱ་ས་མ་ཏྟཱ་ཏི་རི་ཏྟ་སུ་ཏྟཱ་ཝ་ཏྠཱ ཙ པ་སཱ་དཱ་དི་ས་མྦྷ་ཝོ རོ་མུ་གྒ་མོ ཙ ཏ་ཐཱ ཨེ་ཝཾ སེ་ད་སྶུ་ཝེ་པ་ཐུ ཙ བྷ་ཡཱ་དཱི་ཧི ཨུ་པྤ་ཛྫ་མཱ་ན་དཱ་ཧོ ཙ ས་ནྟོ་སཱ་དཱི་ཧི ཨུ་པྤ་ཛྫ་མཱ་ན་ཨ་སྶུ ཙ ཀ་མྤཱ ཙ ཝེ་ཝ་ཎྞི་ཡཾ ཝི་རཱུ་པ་ཏཱ ཙ ཝི་སྶ་ར་ཏཱ ཝི་རཱུ་པ་ས་དྡ་ཏཱ ཙཱ་ཏི ཨེ་ཏེ ཨ་ཊྛ སཱ་ཏྟི་ཀཱ བྷཱ་ཝཱ ནཱ་མ ཧོ་ནྟི. རོ་མཱ་ནཾ ཨ་ཉྩོ ཨུ་གྒ་མོ་ཏི ཙ, པ་ལ་ཡོ ཙ རོ་མ་ཉྩོ ཙེ་ཏི ཙ, ཝེ་པ་ནཾ ཀ་མྤ་ན་མི་ཏི ཙ, སེ་དོ ཙ ཨ་སྶུ ཙ ཝེ་པ་ཐུ ཙཱ་ཏི ཙ, ཝི་རཱུ་པོ ཝ་ཎྞོ ཨ་སྶེ་ཏི ཙ, ཏ་སྶ བྷཱ་ཝོ་ཏི ཙ, ཝི་རཱུ་པོ ས་རོ ཨ་སྶེ་ཏི ཙ, ཏ་སྶ བྷཱ་ཝོ་ཏི ཙ ཝཱ་ཀྱཾ.
༣༤༧. ཡ་དཱ ར་ཏྱཱ་ད་ཡོ བྷཱ་ཝཱ,
ཋི་ཏི་སཱི་ལཱ ན ཧོ་ནྟི ཙེ;
ཏ་དཱ ས་བྦེ་པི ཏེ བྷཱ་ཝཱ,
བྷ་ཝ་ནྟི བྱ་བྷི་ཙཱ་རི་ནོ.
༣༤༧. ན ཀེ་ཝ་ལཾ ཝུ་ཏྟཱ་ཡེ་ཝ བྱ་བྷི་ཙཱ་རི་ནོ, ར་ཏྱཱ་ད་ཡོ་པཱི་ཏི ཨཱ་ཧ ‘‘ཡ་དཱ’’ཨི་ཙྩཱ་དི. བྷ་ཝ་ནྟི བྱ་བྷི་ཙཱ་རི་ནོཏི ཡ་ཐཱ་ཡོ་གཾ ཡ་ཐཱ་ས་མྦ་ནྡྷཾ བྱ་བྷི་ཙཱ་རི་ནོ ཧོ་ནྟཱི་ཏི ཨ་ཏྠོ. སེ་སཾ སུ་བོ་དྷཾ.
༣༤༧. ཨི་དཱ་ནི ནི་བྦེ་དཱ་ད་ཡོ ཝི་ཡ ར་ཏི་ཧཱ་སཱ་ད་ཡོ་པི ཀི་སྨི་ཉྩི ཀཱ་ལེ བྱ་བྷི་ཙཱ་རི་ནོ་པི ཧོ་ནྟཱི་ཏི ད་སྶེ་ཏི ‘‘ཡ་དཱ’’ ཨི་ཙྩཱ་དི་ནཱ. ར་ཏྱཱ་ད་ཡོ ར་ཏི་ཧཱ་སཱ་ད་ཡོ བྷཱ་ཝཱ ན་ཝ ཋཱ་ཡཱི་བྷཱ་ཝཱ ཡ་དཱ ཋི་ཏི་སཱི་ལཱ ན ཧོ་ནྟི ཙེ ཝི་རོ་དྷཱི་ཧི ཏེ་ཧི ཏེ་ཧི བྷཱ་ཝ་ནྟ་རེ་ཧི བྱ་ཝ་ཧི་ཏ་ཏྟཱ ས་བྷཱ་ཝ་ཏོ ཋི་ཏི་ས་བྷཱ་ཝཱ ཡ་དི ན ཧོ་ནྟི, ཏ་དཱ ཏེ བྷཱ་ཝཱ ར་ཏྱཱ་ད་ཡོ ས་བྦེ་པི བྱ་བྷི་ཙཱ་རི་ནོ བྷ་ཝ་ནྟཱི་ཏི. ཡ་ཐཱ་ས་ཀཾ བྱ་བྷི་ཙཱ་རི་ཏཱ་ནུ་རཱུ་པ་ཝི་བྷཱ་ཝཱ་ནུ་བྷཱ་ཝཱ་ནཾ ཡོ་གཱ་ནུ་རཱུ་པེ་ན བྱ་བྷི་ཙཱ་རཱི་བྷཱ་ཝཱ ཧོ་ནྟི. ར་ཏི་ཨཱ་དི ཡེ་སཾ ཧཱ་སཱ་དཱི་ན་མི་ཏི ཙ, ཋི་ཏི སཱི་ལཾ ཡེ་སཾ ར་ཏྱཱ་དཱི་ན་མི་ཏི ཙ ཝི་གྒ་ཧོ.
༣༤༨. ཝི་བྷཱ་ཝོ ཀཱ་ར་ཎཾ ཏེ་སུ’-
པྤ་ཏྟི་ཡུ’དྡཱི་པ་ནེ ཏ་ཐཱ;
ཡོ སི་ཡཱ བོ་དྷ་ཀོ ཏེ་ས-
མ་ནུ་བྷཱ་ཝོ’ཡ’མཱི་རི་ཏོ.
༣༤༨. ཨི་དཱ་ནི ཝི་བྷཱ་ཝཱ་ནུ་བྷཱ་ཝེ ད་སྶེ་ཏི ‘‘ཝི་བྷཱ་ཝོ’’ཨི་ཙྩཱ་དི་ནཱ. ཏེ་སཾ ར་ཏྱཱ་དཱི་ནཾ བྷཱ་ཝཱ་ནཾ ཨུ་པྤ་ཏྟི་ཡཱ, ཏ་ཐཱ ཨུ་དྡཱི་པ་ནེ ཙ ཀཱ་ར་ཎཾ ཨཱ་ལ་མྦ་ཎ་ཨུ་དྡཱི་པ་ན་ཝ་སེ་ན དུ་ཝི་དྷོ ཝི་བྷཱ་ཝོ ནཱ་མ. ཏ་ཏྠ ཨཱ་ལ་མྦ་ཎ་ཝི་བྷཱ་ཝོ ཀ་ནྟཱ་དི, ཨུ་དྡཱི་པ་ན་ཝི་བྷཱ་ཝོ ཙ་ནྡཱ་དི. ཏེ་སཾ བོ་དྷ་ཀོ ཉཱ་པ་ཀོ ཀཱ་ཡི་ཀོ ཙ ཝཱ་ཙ་སི་ཀོ ཙ བྱཱ་པཱ་རོ སི་ཡཱ, ཨ་ཡཾ ཨ་ནུ་བྷཱ་ཝོ ཨཱི་རི་ཏོ.
༣༤༨. ཨི་དཱ་ནི ཝི་བྷཱ་ཝཱ་ནུ་བྷཱ་ཝེ ད་སྶེ་ཏི ‘‘ཝི་བྷཱ་ཝོ’’ཨི་ཙྩཱ་དི་ནཱ. ཏེ་སཾ ཋཱ་ཡཱི་བྷཱ་ཝཱ་དཱི་ནཾ ཏི་ཎྞཾ ཨུ་པྤ་ཏྟི་ཡཱ ཙ ཏ་ཐཱ ཨུ་དྡཱི་པ་ནེ ཙ ཨུ་པྤ་ནྣཱ་ནཾ དཱི་པ་ནེ ཙ ཀཱ་ར་ཎཾ ཨཱ་ལ་མྦ་ཎ་ཨུ་དྡཱི་པ་ན་ཝ་སེ་ན དུ་ཝི་དྷོ ཧེ་ཏུ ཝི་བྷཱ་ཝོ ནཱ་མ, ཏེ་སཾ ཋཱ་ཡཱི་བྷཱ་ཝཱ་དཱི་ནཾ བོ་དྷ་ཀོ ཀཱ་ཡི་ཀ་ཝཱ་ཙ་སི་ཀོ ཡོ སི་ཡཱ ན་ཊ་ཀ་ཝཱི་ནཾ བྱཱ་པཱ་རོ ཨ་ཏྠི, ཨ་ཡཾ ཨ་ནུ་བྷཱ་ཝོ་ཏི ཨཱི་རི་ཏོ་ཏི. ཝི་སེ་སེ་ན བྷཱ་ཝེ་ཏི ཝ་ཌྜྷེ་ཏཱི་ཏི ཝི་བྷཱ་ཝོ. ཨ་ནུ་བྷཱ་ཝེ་ཏི བོ་དྷེ་ཏཱི་ཏི ཨ་ནུ་བྷཱ་ཝོ. ཨེ་ཏྠ ཝི་བྷཱ་ཝོ ནཱ་མ ར་ཏི་ཝི་ས་ཡེ ན་ར་ནཱ་རཱི་ནཾ ཨ་ཉྙ་མ་ཉྙཾ ཨཱ་ལ་མྦ་ཎ་ཝི་བྷཱ་ཝོ, ཙ་ནྡ་ར་མྨ་དེ་སཱ་དི ཨུ་དྡཱི་པ་ན་ཝི་བྷཱ་ཝོ ཙེ་ཏི དུ་ཝི་དྷོ. ཧཱ་སཱ་དཱི་ན་མྤི དུ་ཝི་དྷ་ཝི་བྷཱ་ཝཾ ཡ་ཐཱ་ར་ཧཾ ཡོ་ཛེ་ཏ་བྦཾ. ཨ་ནུ་བྷཱ་ཝོ ནཱ་མ ཋཱ་ཡཱི་བྷཱ་ཝཱ་དཱི་ནཾ ཏེ་སཾ ཏེ་སཾ བྷཱ་ཝཱ་ནཾ པ་ཀཱ་ས་ཀ་ཝཱ་ཙ་སི་ཀ་བྱཱ་པཱ་ར་ས་ངྑཱ་ཏ་ཀ་ཝི་པ་ཡོ་གོ ཙ ཀཱ་ཡི་ཀ་པ་ཡོ་ག་བྷཱུ་ཏོ ན་ཊཱ་ནཾ ཨ་བྷི་ན་ཡ་ས་ངྑཱ་ཏོ ཏཾ་ཏཾ་བྷཱ་ཝ་ས་རཱུ་པ་ནི་རཱུ་པ་ཀོ ཙེ་ཏི དུ་ཝི་དྷོ བྱཱ་པཱ་རོ.
༣༤༩. ནེ་ཀ་ཧེ་ཏུཾ མ་ནོ་ཝུ་ཏྟི-ཝི་སེ་ས་ཉྩ ཝི་བྷཱ་ཝི་ཏུཾ;
བྷཱ་ཝཾ ཝི་བྷཱ་ཝཱ་ནུ་བྷཱ་ཝཱ, ཝ་ཎྞི་ཡཱ བ་ནྡྷ་ནེ ཕུ་ཊཾ.
༣༤༩. ཝི་བྷཱ་ཝཱ་དི་ཝ་ཎྞ་ནཱ་ཡ་མེ་ཝ བྷཱ་ཝ་ཝི་སེ་སཱ་ཝ་བོ་དྷོ སི་ཡཱ, ཨ་ཉྙ་ཐཱ ‘‘དེ་ཝ་ད་ཏྟ་སྶ སཱ་སྶུ་ལོ་ཙ་ན་ཡུ་གཾ ས་ཉྫཱ་ཏ’’མི་ཏི ཝུ་ཏྟེ སོ་ཀཱ ཨཱ་ན་ནྡཱ རོ་གཱ ཙེ་ཏི ཀོ ནཱ་མ ས་ཀྐོ་ཏི ཀཱ་ར་ཎཾ ནི་ཙྪི་ཏུཾ, ཙི་ཏྟ་ཝུ་ཏྟི་ཝི་སེ་ས་ཉྩ བྷཱ་ཝཾ ཝི་ནཱ ཝི་བྷཱ་ཝཱ་ནུ་བྷཱ་ཝཾ ཀ་ཝི ཝ་ཎྞེ་ཏུཾ ན་ཊོ་བྷི་ནེ་ཏུཾ སཱ་མ་ཛྫི་ཀོ ཝཱ ཝི་ཉྙཱ་ཏུཾ ཀོ ས་ཀྐོ་ཏཱི་ཏི ད་སྶེ་ཏུ་མཱ་ཧ ‘‘ནེ་ཀ’’ཨི་ཙྩཱ་དི. ནེ་ཀ་ཧེ་ཏུཾ བ་ཧུ་ཧེ་ཏུཾ མ་ནོ་ཝུ་ཏྟི་ཝི་སེ་ས་ཉྩ བྷཱ་ཝཾ ཝི་བྷཱ་ཝི་ཏུཾ པ་ཀཱ་སེ་ཏུཾ ཝི་བྷཱ་ཝཱ་ནུ་བྷཱ་ཝཱ ཝུ་ཏྟ་ལ་ཀྑ་ཎཱ བ་ནྡྷ་ནེ ས་བྷཱ་ཝ་ནི་རཱུ་པ་ཀ་པ་དེ ཕུ་ཊཾ ཝ་ཎྞ་ནཱི་ཡཱ, ཝི་བྷཱ་ཝཱ་དི་རཱུ་པ་ཀེ་ནེ་ཝ ཨ་ཝུ་ཏྟ་མྤི ཀི་ཉྩི པ་ཏཱི་ཡ་ཏེ.
༣༤༩. ‘‘དེ་ཝ་ད་ཏྟ་སྶ ཙ་ཀྑཱུ་ནི ཨ་སྶུ་པུ་ཎྞཱ་ནཱི’’ཏི ཝུ་ཏྟེ སོ་ཀེ་ན ས་ནྟོ་སེ་ན རོ་གེ་ན ཝཱ་ཏི ཡ་ཐཱ ཨ་སྶུ་ཀཱ་ར་ཎ་ཀ་ཐ་ནཾ ཝི་ནཱ ན ཛཱ་ནཱ་ཏི, ཨེ་ཝཾ ཙི་ཏྟ་སྶ པ་ཝ་ཏྟི་ས་ངྑཱ་ཏཱ ར་ཏི་ཧཱ་སཱ་ད་ཡོ ཏེ ཏེ བྷཱ་ཝཱ ཨ་ཏྟ་ནོ པ་ཏཱི་ཏི་ཡཱ་ནུ་རཱུ་པཾ ཝི་བྷཱ་ཝཱ་ནུ་བྷཱ་ཝ་ཀ་ཐ་ནཾ ཝི་ནཱ ཀ་ཝཱི་ཧི ཝ་ཎྞེ་ཏ་བྦཱ, ན་ཊེ་ཧི ད་སྶེ་ཏ་བྦཱ, ས་བྦྷེ་ཧི ཨ་སྶཱ་ད་ནཱི་ཡཱ ན་ཏྠཱི་ཏི ཋཱ་ཡཱི་ཨཱ་དཱི་ནཾ ཝ་ཎྞ་ན་མེ་ཝ ཀཱ་ཏ་བྦ་ནྟི ཨི་དཱ་ནི ཨ་ནུ་སཱ་སེ་ནྟོ ཨཱ་ཧ ‘‘ནེ་ཀ’’ཨི་ཙྩཱ་དི. ནེ་ཀ་ཧེ་ཏུཾ ཏེ་སཾ ཏེ་སཾ བྷཱ་ཝཱ་ནཾ ཨུ་པྤ་ཏྱཱ་དོ ཨཱ་ལ་མྦ་ཎ་ཝི་བྷཱ་ཝཱ་དི་བ་ཧུ་ཀཱ་ར་ཎ་ཝ་ནྟཾ མ་ནོ་ཝུ་ཏྟི་ཝི་སེ་སཾ བྷཱ་ཝ་ཉྩ ཙི་ཏྟ་སྶ པ་ཝ་ཏྟི་ཝི་སེ་ས་ས་ངྑཱ་ཏ་བྷཱ་ཝ་ཉྩ ཝི་བྷཱ་ཝི་ཏུཾ པ་ཀཱ་སེ་ཏུཾ ཝི་བྷཱ་ཝཱ་ནུ་བྷཱ་ཝཱ ཨ་ན་ནྟ་ར་ནི་དྡི་ཊྛཱ བ་ནྡྷ་ནེ ར་ས་བྷཱ་ཝ་པྤ་ཀཱ་ས་ནེ ཕུ་ཊཾ པ་ཀཱ་སཾ ཀ་ཏྭཱ ཝ་ཎྞི་ཡཱ ཀ་ཝི་ནཱ ཝ་ཎྞ་ནཱི་ཡཱ ཧོ་ནྟཱི་ཏི. ན ཨེ་ཀོ་ཏི ཙ, སོ ཧེ་ཏུ ཨ་སྶེ་ཏི ཙ, མ་ན་སོ ཝུ་ཏྟཱི་ཏི ཙ, ཏཱ་ཡ ཝི་སེ་སོ་ཏི ཙ, ཝི་བྷཱ་ཝོ ཙ ཨ་ནུ་བྷཱ་ཝོ ཙེ་ཏི ཙ ཝཱ་ཀྱཾ.
༣༥༠. ས་ཝི་བྷཱ་ཝཱ་ནུ་བྷཱ་ཝེ་ཧི, བྷཱ་ཝཱ ཏེ ཏེ ཡ་ཐཱ་ར་ཧཾ;
ཝ་ཎྞ་ནཱི་ཡཱ ཡ་ཐོ་ཙི་ཏྱཾ, ལོ་ཀ་རཱུ་པཱ་ནུ་གཱ་མི་ནཱ.
༣༥༠. ཨི་དཱ་ནི ཏེ བྷཱ་ཝཱ ལོ་ཀ་ས་བྷཱ་ཝཱ་ན་ཏི་ཀྐ་མེ་ན ཝི་བྷཱ་ཝཱ་དཱི་ཧི ཝ་ཎྞ་ནཱི་ཡཱ་ཏི ཨཱ་ཧ ‘‘ས་ཝི་བྷཱ་ཝེ’’ཙྩཱ་དི. ས་ཧ ཝི་བྷཱ་ཝེ་ཧི ས་ཝི་བྷཱ་ཝཱ, ཏེ ཙ ཏེ ཨ་ནུ་བྷཱ་ཝཱ ཙ, ཏེ་ཧི. ཡ་ཐཱ་ར་ཧནྟི ཨ་ཏྟ་ནོ ས་མྦ་ནྡྷཱི་ནཾ ཝ་སེ་ན ཡ་ཐཱ་ར་ཧཾ ཝ་ཎྞ་ནཱི་ཡཱ.
༣༥༠. ཨི་དཱ་ནི ཝི་བྷཱ་ཝཱ་ནུ་བྷཱ་ཝེ ནི་སྶཱ་ཡ ཝ་ཎྞ་ནཱི་ཡཱ ཏེ བྷཱ་ཝཱ ལོ་ཀ་ས་བྷཱ་ཝ་མ་ན་ཏི་ཀྐ་མྨ ཀཱ་ཏ་བྦཱ་ཏི ཨ་ནུ་སཱ་ས་ནྟོ ཨཱ་ཧ ‘‘ས་ཝི་བྷཱ་ཝཱ’’ཨི་ཙྩཱ་དི. ལོ་ཀ་རཱུ་པཱ་ནུ་གཱ་མི་ནཱ ལོ་ཀ་ཝོ་ཧཱ་ར་མ་ནུ་ཝ་ཏྟ་མཱ་ནེ་ན ཏེ ཏེ བྷཱ་ཝཱ ཋཱ་ཡཱི་བྷཱ་ཝཱ་ད་ཡོ ཏ་ཡོ ཡ་ཐོ་ཙི་ཏྱཾ ཨོ་ཙི་ཏྱཱ་ནུ་རཱུ་པཾ ས་ཝི་བྷཱ་ཝཱ་ནུ་བྷཱ་ཝེ་ཧི ཝི་བྷཱ་ཝ་ས་ཧི་ཏེ་ཧི ཨ་ནུ་བྷཱ་ཝེ་ཧི ཀ་ར་ཎ་བྷཱུ་ཏེ་ཧི ཡ་ཐཱ་ར་ཧཾ ཏེ་ཧི ཏེ་ཧི བྷཱ་ཝེ་ཧི ས་མྦ་ནྡྷཱི་ནཾ ཝི་བྷཱ་ཝཱ་དཱི་ནཾ ཝ་སེ་ན ཨ་ནུ་རཱུ་པ་ཏོ ཝ་ཎྞ་ནཱི་ཡཱ ཝ་ཎྞེ་ཏ་བྦཱ ཧོ་ནྟཱི་ཏི. ཝི་བྷཱ་ཝེ་ཧི ས་ཧ ཡེ ཝ་ཏྟ་ནྟཱི་ཏི ཙ, ཏེ ཙ ཏེ ཨ་ནུ་བྷཱ་ཝཱ ཙེ་ཏི ཙ, ཨ་ན་ཏི་ཀྐ་མྨ ཨ་ར་ཧ་ནྟི ཙ, ཨ་ན་ཏི་ཀྐ་མྨ ཨོ་ཙི་ཏྱ་མི་ཏི ཙ, ལོ་ཀ་སྶ རཱུ་པཾ ས་རཱུ་པ་མི་ཏི ཙ, ཏཾ ཨ་ནུ་ག་ཙྪ་ཏི སཱི་ལེ་ནཱ་ཏི ཙ ཝི་གྒ་ཧོ.
༣༥༡. ཙི་ཏྟ་ཝུ་ཏྟི ཝི་སེ་ས་ཏྟཱ, མཱ་ན་སཱ སཱ་ཏྟི་ཀ’ངྒ་ཏོ;
བ་ཧི་ནི་སྶ་ཊ་སེ་དཱ་དི-ཨ་ནུ་བྷཱ་ཝེ་ཧི ཝ་ཎྞི་ཡཱ.
༣༥༡. སཱ་ཏྟི་ཀཱ ཀ་ཐཾ ཝ་ཎྞ་ནཱི་ཡཱ་ཏི ཨཱ་ཧ ‘‘ཙི་ཏྟེ’’ཙྩཱ་དི. ཙི་ཏྟ་སྶ ཝུ་ཏྟི་ཝི་སེ་སོ ཡེ་སཾ, ཏེ་སཾ བྷཱ་ཝོ, ཏ་སྨཱ མཱ་ན་སཱ མ་ན་སི བྷ་ཝཱ སཱ་ཏྟི་ཀཱ ཨ་ངྒ་ཏོ ས་རཱི་ར་ཏོ བ་ཧི་ནི་སྶ་ཊེ་ཧི ནི་གྒ་ཏེ་ཧི སེ་དཱ་དཱི་ཧི ཨ་ནུ་བྷཱ་ཝེ་ཧི ཝ་ཎྞ་ནཱི་ཡཱ, ན པ་ན སེ་ད་ས་ལི་ལ་མེ་ཝ བྷཱ་ཝོ་ཏི ཨ་དྷི་པྤཱ་ཡོ.
༣༥༡. ཨེ་ཝཾ སཱ་མ་ཉྙེ་ན བྷཱ་ཝ་ཝ་ཎྞ་ན་ཀྐ་མཾ ད་སྶེ་ཏྭཱ ཨི་དཱ་ནི ཝི་སེ་སེ་ན སཱ་ཏྟི་ཀ་བྷཱ་ཝ་ཝ་ཎྞ་ནཱ ཨཱི་དི་སཱ་ཏི ད་སྶེ་ཏི ‘‘ཙི་ཏྟ’’ཨི་ཙྩཱ་དི་ནཱ. ཙི་ཏྟ་ཝུ་ཏྟི་ཝི་སེ་ས་ཏྟཱ ཙི་ཏྟ་སྶ པ་ཝ་ཏྟི་ཝི་སེ་ས་ཏྟཱ མཱ་ན་སཱ ཙི་ཏྟེ བྷ་ཝཱ སཱ་ཏྟི་ཀཱ་བྷཱ་ཝཱ ཨ་ངྒ་ཏོ ས་རཱི་ར་ཏོ བ་ཧི་ནི་སྶ་ཊ་སེ་དཱ་དི་ཨ་ནུ་བྷཱ་ཝེ་ཧི བ་ཧི་ནི་ཀྑ་ནྟ་སེ་དཱ་དཱི་ཧི ཨ་ནུ་བྷཱ་ཝེ་ཧི ཀ་ར་ཎ་བྷཱུ་ཏེ་ཧི ཝ་ཎྞི་ཡཱ ཝ་ཎྞ་ནཱི་ཡཱ ཧོ་ནྟཱི་ཏི, ཨ་ངྒ་ཏོ བ་ཧི ནི་སྶ་ཊ་ནྟི ཝི་སེ་ས་ནེ་ན ཝི་སི་ཊྛ་བྷཱུ་ཏ་སེ་དཱ་དཱི་ན་མེ་ཝ བྷཱ་ཝཱ་ནུ་བྷཱ་ཝ་ཏྟཾ ཝི་ནཱ ཀེ་ཝ་ལཾ སེ་དཱ་ད་ཡོ ཝུ་ཏྟཱ ས་མཱ་ནཱ བྷཱ་ཝཱ་ད་ཡོ ནཱ་མ ན ཧོ་ནྟཱི་ཏི ཨ་དྷི་པྤཱ་ཡོ. ཙི་ཏྟ་སྶ ཝུ་ཏྟཱི་ཏི ཙ, སཱ ཨེ་ཝ ཝི་སེ་སོ ཡེ་སཾ སཱ་ཏྟི་ཀཱ་ན་མི་ཏི ཙ, ཏེ་སཾ བྷཱ་ཝོ་ཏི ཙ, མ་ན་སི བྷ་ཝཱ་ཏི ཙ, སེ་དོ ཨཱ་དི ཡེ་སཾ ཁེ་ལཱ༹་དཱི་ན་མི་ཏི ཙ, ནི་སྶ་ཊཱ ནི་གྒ་ཏཱ ཙ ཏེ སེ་དཱ་ད་ཡོ ཙེ་ཏི ཙ, ཏེ ཨེ་ཝ ཨ་ནུ་བྷཱ་ཝཱ་ཏི ཙ ཝཱ་ཀྱཾ.
ར་ས་ཨ་དྷི་པྤཱ་ཡ
༣༥༢. སཱ་མ་ཛྫི་ཀཱ་ན’མཱ་ན་ནྡོ, ཡོ བ་ནྡྷ་ཏྠཱ་ནུ་སཱ་རི་ནཾ;
ར་སཱི་ཡ་ཏཱི་ཏི ཏ་ཉྙཱུ་ཧི, ར་སོ ནཱ་མཱ’ཡ’མཱི་རི་ཏོ.