༢. དོ་ས་པ་རི་ཧཱ་རཱ་ཝ་བོ་དྷ-དུ་ཏི་ཡ་པ་རི་ཙྪེ་ད
༦༨. ཀ་དཱ་ཙི ཀ་ཝི་ཀོ་ས་ལླཱ, ཝི་རོ་དྷོ ས་ཀ་ལོ པྱ’ཡཾ;
དོ་ས་ས་ངྑྱ མ་ཏི་ཀྐ་མྨ, གུ་ཎ་ཝཱི་ཐིཾ ཝི་གཱ་ཧ་ཏེ.
༦༩. ཏེ་ན ཝུ་ཏྟ་ཝི་རོ་དྷཱ་ན, མ་ཝི་རོ་དྷོ ཡ་ཐཱ སི་ཡཱ;
ཏ་ཐཱ དོ་ས་པ་རི་ཧཱ་རཱ, ཝ་བོ་དྷོ དཱ་ནི ནཱི་ཡ་ཏེ.
ཏ་ཏྠ ཝི་རུ་དྡྷ་ཏྠ་ནྟ་ར་སྶ པ་རི་ཧཱ་རོ ཡ་ཐཱ
༧༠. ཝི་ནྡ་ནྟཾ པཱ་ཀ་སཱ་ལཱི་ནཾ, སཱ་ལཱི་ནཾ ད་སྶ་ནཱ སུ་ཁཾ;
ཏཾ ཀ་ཐཾ ནཱ་མ མེ་གྷོ’ཡཾ, ཝི་ས་དོ སུ་ཁ་ཡེ ཛ་ནཾ?
ཡ་ཐཱ ཝཱ
༧༡. ཝི་ནཱ་ཡ་ཀོཔི ནཱ་གོ སི, གོ་ཏ་མོཔི མ་ཧཱ་མ་ཏི;
པ་ཎཱི་ཏོཔི ར་སཱ’པེ་ཏོ, ཙི་ཏྟཱ མེ སཱ་མི ཏེ ག་ཏི.
ཨ་ཛྷ’ཏྠ་སྶ ཡ་ཐཱ
༧༢. ཀ་ཐཾ ཏཱ་དི་གུ་ཎཱ་བྷཱ་ཝེ, ལོ་ཀཾ ཏོ་སེ་ཏི དུ་ཛྫ་ནོ?
ཨོ་བྷཱ་སི་ཏཱ་སེ་ས་དི་སོ, ཁ་ཛྫོ་ཏོ ནཱ་མ ཀིཾ བྷ་ཝེ?
༧༣. པ་ཧེ་ལི་ཀཱ་ཡ [པ་ཧེ་ལི༹་ཀཱ་ཡ (ཀ.)] མཱ་རུ་ལ༹ྷཱ, ན ཧི དུ་ཊྛཱ ཀི་ལི་ཊྛ་ཏཱ;
པི་ཡཱ སུ་ཁཱ’ལི་ངྒི་ཏཾ ཀ, མཱ་ལི་ངྒ་ཏི ནུ ནོ ཨི་ཏི.
༧༤. ཡ་མ་ཀེ ནོ པ་ཡོ་ཛེ་ཡྻ, ཀི་ལི་ཊྛ་པ་ད མི་ཙྪི་ཏེ;
ཏ་ཏོ ཡ་མ་ཀ མ་ཉྙཾ ཏུ, ས་བྦ མེ་ཏཾ་མ་ཡཾ ཝི་ཡ.
དེ་ས་ཝི་རོ་དྷི་ནོ ཡ་ཐཱ
༧༥. བོ་དྷི་ས་ཏྟ་པྤ་བྷཱ་ཝེ་ན, ཐ་ལེ་པི ཛ་ལ་ཛཱ་ནྱ’ཧུཾ;
ནུ་ད་ནྟཱ་ནི’ཝ སུ་ཙི་རཱ, ཝཱ་ས་ཀླེ་སཾ ཏ་ཧིཾ ཛ་ལེ.
ཀཱ་ལ་ཝི་རོ་དྷི་ནོ ཡ་ཐཱ
༧༦. མ་ཧཱ་ནུ་བྷཱ་ཝ པི་སུ་ནོ, མུ་ནི་ནོ མ་ནྡ མཱ་རུ་ཏོ;
ས་བྦོ་ཏུ་ཀ་མ་ཡཾ ཝཱ་ཡི, དྷུ་ན་ནྟོ ཀུ་སུ་མཾ ས་མཾ.
ཀ་ལཱ་ཝི་རོ་དྷི་ནོ ཡ་ཐཱ
༧༧. ནི་མུ་གྒ་མཱ་ན་སོ བུ་དྡྷ, གུ་ཎེ པ་ཉྩ་སི་ཁ་སྶ་པི;
ཏ་ནྟི་སྶ་ར ཝི་རོ་དྷོ སོ, ན ས་མྤཱི་ཎེ་ཏི ཀཾ ཛ་ནཾ?
ལོ་ཀ་ཝི་རོ་དྷི་ནོ ཡ་ཐཱ
༧༨. ག་ཎ་ཡེ ཙ་ཀྐ་ཝཱ་ལ༹ཾ སོ, ཙ་ནྡ་ནཱ་ཡ་པི སཱི་ཏ་ལཾ;
ས་མྦོ་དྷི ས་ཏྟ ཧ་ད་ཡོ, པ་དི་ཏྟ’ངྒཱ་ར་པཱུ་རི་ཏཾ.
ཉཱ་ཡ་ཝི་རོ་དྷི་ནོ ཡ་ཐཱ
༧༩. པ་རི་ཙྩ་ཏྟ་བྷ་ཝོཔི ཏྭ, མུ་པ་ནཱི་ཏ་བྷ་ཝོ ཨ་སི;
ཨ་ཙི་ནྟྱ་གུ་ཎ་སཱ་རཱ་ཡ, ན་མོ ཏེ མུ་ནི་པུ་ངྒ་ཝ.
ཨཱ་ག་མ་ཝི་རོ་དྷི་ནོ ཡ་ཐཱ
༨༠. ནེ་ཝཱ’ལ་པ་ཏི ཀེ་ནཱ’པི, ཝ་ཙཱི་ཝི་ཉྙ་ཏྟི་ཏོ ཡ་ཏི;
ས་མྤ་ཛཱ་ན་མུ་སཱ་ཝཱ་དཱ, ཕུ་སེ་ཡྻཱ’པ་ཏྟི་དུ་ཀྐ་ཊཾ.
ནེ་ཡྻ་སྶ ཡ་ཐཱ
༨༡. མ་རཱི་ཙི་ཙ་ནྡ་ནཱ’ལེ་པ, ལཱ་བྷཱ སཱི་ཏ་མ་རཱི་ཙི་ནོ;
ཨི་མཱ ས་བྦཱ་པི དྷ་ཝ་ལཱ, དི་སཱ རོ་ཙ་ནྟི ནི་བྦྷ་རཾ.
ཡ་ཐཱ ཝཱ
༨༢. མ་ནོ་ནུ་ར་ཉྫ་ནོ མཱ་ར, ངྒ་ནཱ་སི་ངྒཱ་ར་ཝི་བྦྷ་མོ;
ཛི་ནེ་ནཱ’ས་མ་ནུ་ཉྙཱ་ཏོ, མཱ་ར་སྶ ཧ་ད་ཡཱ’ན་ལོ.
ཝི་སེ་ས་ནཱ་པེ་ཀྑ་སྶ ཡ་ཐཱ
༨༣. ཨ་པ་ཡཱ་ཏཱ’པ་རཱ་དྷ་མྤི, ཨ་ཡཾ ཝེ་རཱི ཛ་ནཾ ཛ་ནོ;
ཀོ་དྷ་པཱ་ཊ་ལ་བྷཱུ་ཏེ་ན, བྷི་ཡྻོ པ་སྶ་ཏི ཙ་ཀྑུ་ནཱ.
ཧཱི་ན་ཏྠ་སྶ ཡ་ཐཱ
༨༤. ཨ་པྤ་ཀཱ་ན་མྤི པཱ་པཱ་ནཾ, པ་བྷཱ་ཝཾ ནཱ་ས་ཡེ བུ་དྷོ;
ཨ་པི ནི་པྤ་བྷཱ་ཏཱ’ནཱི་ཏ, ཁ་ཛྫོ་ཏོ ཧོ་ཏི བྷཱ་ཎུ་མཱ.
ཨ་ན་ཏྠ་སྶ ཡ་ཐཱ
༨༥. ན པཱ་ད་པཱུ་ར་ཎ་ཏྠཱ་ཡ, པ་དཾ ཡོ་ཛེ་ཡྻ ཀ་ཏྠ་ཙི,
ཡ་ཐཱ ཝ་ནྡེ མུ་ནི་ནྡ་སྶ, པཱ་ད་པ་ངྐེ་རུ་ཧཾ ཝ་རཾ.
༨༦. བྷ་ཡ་ཀོ་དྷ་པ་སཾ་སཱ་དི, ཝི་སེ་སོ ཏཱ་དི་སོ ཡ་དི;
ཝ་ཏྟུཾ ཀཱ་མཱི་ཡ་ཏེ དོ་སོ, ན ཏ་ཏྠེ’ཀ་ཏྠ་ཏཱ་ཀ་ཏོ.
ཡ་ཐཱ
༨༧. ས་པྤོ ས་པྤོ! ཨ་ཡཾ ཧ་ནྡ, ནི་ཝ་ཏྟ་ཏུ བྷ་ཝཾ ཏ་ཏོ,
ཡ་དི ཛཱི་ཝི་ཏུ་ཀཱ་མོ’སི, ཀ་ཐཾ ཏ མུ་པ་ས་པྤ་སི?
བྷ་གྒ་རཱི་ཏི་ནོ ཡ་ཐཱ
༨༨. ཡོ་ཀོ་ཙི རཱུ་པཱ’ཏི་ས་ཡོ, ཀ་ནྟི ཀཱ་པི མ་ནོ་ཧ་རཱ;
ཝི་ལཱ་སཱ’ཏི་ས་ཡོ ཀོ་པི,
ཨ་ཧོ! བུ་དྡྷ་མ་ཧོ’ད་ཡོ.
༨༩. ཨ་བྱཱ་མོ་ཧ་ཀ་རཾ བ་ནྡྷཾ, ཨ་བྱཱ་ཀི་ཎྞཾ མ་ནོ་ཧ་རཾ;
ཨ་དཱུ་ར་པ་ད ཝི་ནྱཱ་སཾ, པ་སཾ་ས་ནྟི ཀ་ཝི་སྶ་རཱ.
ཡ་ཐཱ
༩༠. ནཱི་ལུ་པྤ་ལཱ’བྷཾ ན་ཡ་ནཾ, བ་ནྡྷུ་ཀ་རུ་ཙི་རོ’དྷ་རོ;
ནཱ་སཱ ཧེ་མ’ངྐུ་སོ ཏེ་ན, ཛི་ནོ’ཡཾ པི་ཡ་ད་སྶ་ནོ.
༩༡. ས་མ་ཏི་ཀྐ་ནྟ གཱ་མྨ་ཏྟཾ, ཀ་ནྟ ཝཱ་ཙཱ’བྷི་ས་ངྑ་ཏཾ;
བ་ནྡྷ་ནཾ ར་ས་ཧེ་ཏུ་ཏྟཱ, གཱ་མྨ་ཏྟཾ ཨ་ཏི་ཝ་ཏྟ་ཏི.
ཡ་ཐཱ
༩༢. དུ་ནོ་ཏི ཀཱ་མ་ཙ་ཎྜཱ་ལོ, སོ མཾ ས་ད་ཡ ནི་དྡ་ཡོ;
ཨཱི་དི་སཾ བྱ་ས་ནཱ’པ་ནྣཾ, སུ་ཁཱི་པི ཀི མུ་པེ་ཀྑ་སེ?
༩༣. ཡ་ཏི་ཧཱི་ན་པ་རི་ཧཱ་རོ, ན པུ་ནེ’དཱ་ནི ནཱི་ཡ་ཏེ;
ཡ་ཏོ ན ས་ཝ་ནུ’བྦེ་གཾ, ཧེ་ཊྛཱ ཡེ་སཾ ཝི་ཙཱ་རི་ཏཾ.
ཀ་མ་ཙྩུ་ཏ་སྶ ཡ་ཐཱ
༩༤. ཨུ་དཱ་ར་ཙ་རི་ཏོ’སི ཏྭཾ, ཏེ་ནེ’ཝཱ’རཱ་དྷ་ནཱ ཏྭ་ཡི;
དེ་སཾ ཝཱ དེ་ཧི གཱ་མཾ ཝཱ, ཁེ་ཏྟཾ ཝཱ མ་མ སོ་བྷ་ནཾ.
ཨ་ཏི་ཝུ་ཏྟ་སྶ ཡ་ཐཱ
༩༥. མུ་ནི་ནྡ་ཙ་ནྡ་ས་མྦྷཱུ་ཏ, ཡ་སོ་རཱ་སི་མ་རཱི་ཙི་ནཾ;
ས་ཀ་ལོ་པྱ’ཡ མཱ་ཀཱ་སོ, ནཱ’ཝ་ཀཱ་སོ ཝི་ཛ་མྦྷ་ནེ.
༩༦. ཝཱ་ཀྱཾ བྱཱ་པ་ནྣ་ཙི་ཏྟཱ་ནཾ, ཨ་པེ་ཏ་ཏྠཾ ཨ་ནི་ནྡི་ཏཾ;
ཏེ་ནུ’མྨ་ཏྟཱ་དི་ཀཱ་ནཾ ཏཾ, ཝ་ཙ་ནཱ’ཉྙ་ཏྲ དུ་སྶ་ཏི.
ཡ་ཐཱ
༩༧. ས་མུ་དྡོ པཱི་ཡ་ཏེ སོ’ཡ, མ་ཧ’མ་ཛྫ ཛ་རཱ་ཏུ་རོ;
ཨི་མེ ག་ཛྫ་ནྟི ཛཱི་མཱུ་ཏཱ, ས་ཀྐ་སྶེ’རཱ་ཝ་ཎོ པི་ཡོ.
༩༨. སུ་ཁུ་མཱ་ལཱ’ཝི་རོ་དྷི་ཏྟ, དི་ཏྟ་བྷཱ་ཝ་པྤ་བྷཱ་ཝི་ཏཾ;
བ་ནྡྷ་ནཾ བ་ནྡྷ་ཕ་རུ་ས, དོ་སཾ སཾ་དཱུ་ས་ཡེ་ཡྻ ཏཾ.
ཡ་ཐཱ
༩༩. པ་སྶ་ནྟཱ རཱུ་པ་ཝི་བྷ་ཝཾ, སུ་ཎ་ནྟཱ མ་དྷུ་རཾ གི་རཾ;
ཙ་ར་ནྟི སཱ་དྷཱུ ས་མྦུ་དྡྷ, ཀཱ་ལེ ཀེ་ལི༹་པ་ར་མྨུ་ཁཱ.
ཨ་པ་ཀྐ་མ་སྶ ཡ་ཐཱ
༡༠༠. བྷཱ་ཝ་ནཱ, དཱ་ན, སཱི་ལཱ་ནི, ས་མྨཱ ས་མྤཱ་དི་ཏཱ་ནི’ཧ;
ནི་བྦཱ་ན, བྷོ་ག, ས་གྒཱ་དི, སཱ་དྷ་ནཱ་ནི ན སཾ་ས་ཡོ.
༡༠༡. ཨུ་དྡི་ཊྛ་ཝི་ས་ཡོ ཀོ་ཙི, ཝི་སེ་སོ ཏཱ་དི་སོ ཡ་དི;
ཨ་ནུ’དྡི་ཊྛེ་སུ ནེ་ཝ’ཏྠི, དོ་སོ ཀ་མ་ཝི་ལ་ངྒྷ་ནེ.
ཡ་ཐཱ
༡༠༢. ཀུ་ས་ལཱ’ཀུ་ས་ལཾ ཨ་བྱཱ, ཀ་ཏ’མི་ཙྩེ་སུ པ་ཙྪི་མཾ;
ཨ་བྱཱ་ཀ་ཏཾ པཱ་ཀ་དཾ ན, པཱ་ཀ་དཾ པ་ཋ་མ་དྭ་ཡཾ.
༡༠༣. ས་གུ་ཎཱ་ནཱ’ཝི་ཀ་ར་ཎེ, ཀཱ་ར་ཎེ ས་ཏི ཏཱ་དི་སེ;
ཨོ་ཙི་ཏྱ་ཧཱི་ན་ཏཱ’པ་ཏྟི, ན་ཏྠི བྷཱུ་ཏ་ཏྠ་སཾ་སི་ནོ.
༡༠༤. ཨོ་ཙི་ཏྱཾ ནཱ་མ ཝི་ཉྙེ་ཡྻཾ, ལོ་ཀེ ཝི་ཁྱཱ་ཏ མཱ་ད་རཱ;
ཏ་ཏྠོ’པ་དེ་ས་པ་བྷ་ཝཱ, སུ་ཛ་ནཱ ཀ་ཝི་པུ་ངྒ་ཝཱ.
༡༠༥. ཝི་ཉྙཱ་ཏོ་ཙི་ཏྱ་ཝི་བྷ་ཝོ, ཙི་ཏྱ་ཧཱི་ནཾ པ་རི་ཧ་རེ;
ཏ་ཏོ’ཙི་ཏྱ་སྶ ས་མྤོ་སེ,
ར་ས་པོ་སོ སི་ཡཱ ཀ་ཏེ.
ཡ་ཐཱ
༡༠༦. ཡོ མཱ་ར་སེ་ན མཱ་ས་ནྣ, མཱ་ས་ནྣ་ཝི་ཛ་ཡུ’སྶ་ཝོ;
ཏི་ཎཱ་ཡ་པི ན མ་ཉྙི་ཏྠ, སོ ཝོ དེ་ཏུ ཛ་ཡཾ ཛི་ནོ.
༡༠༧. ཨཱ་ར་དྡྷ་ཀ་ཏྟུ་ཀ་མྨཱ་དི, ཀ་མཱ’ཏི་ཀྐ་མ་ལ་ངྒྷ་ནེ;
བྷ་གྒ་རཱི་ཏི་ཝི་རོ་དྷོ’ཡཾ, ག་ཏིཾ ན ཀྭཱ’པི ཝི་ནྡ་ཏི.
ཡ་ཐཱ
༡༠༨. སུ་ཛ་ན’ཉྙཱ་ན མི་ཏྠཱི་ནཾ, ཝི་སྶཱ་སོ ནོ’པ་པ་ཛྫ་ཏེ;
ཝི་ས་སྶ སི་ངྒི་ནོ རོ་ག, ན་དཱི་རཱ་ཛ་ཀུ་ལ་སྶ ཙ.
ཡ་ཐཱ
༡༠༩. བྷེ་ས་ཛྫེ ཝི་ཧི་ཏེ སུ་དྡྷ, བུ་དྡྷཱ་དི་ར་ཏ་ན་ཏྟ་ཡེ;
པ་སཱ་ད མཱ་ཙ་རེ ནི་ཙྩཾ, ས་ཛྫ་ནེ ས་གུ་ཎེཔི ཙ.
ས་སཾ་ས་ཡ་སྶ ཡ་ཐཱ
༡༡༠. མུ་ནི་ནྡ་ཙ་ནྡི་མཱ’ལོ་ཀ, ར་ས ལོ་ལ ཝི་ལོ་ཙ་ནོ;
ཛ་ནོ’ཝ་ཀྐ་ནྟ་པ་ནྠོ’ཝ, རཾ་སིད་སྶ་ན་པཱི་ཎི་ཏོ.
༡༡༡. སཾ་ས་ཡཱ་ཡེ’ཝ ཡཾ་ཀི་ཉྩི, ཡ་དི ཀཱི་ལཱ༹་དི་ཧེ་ཏུ་ནཱ;
པ་ཡུ་ཛྫ་ཏེ ན དོ་སོ’ཝ, ས་སཾ་ས་ཡ་ས་མ་པྤི་ཏོ.
ཡ་ཐཱ
༡༡༢. ཡཱ་ཏེ དུ་ཏི་ཡཾ ནི་ལ་ཡཾ, ག་རུ་མྷི ས་ཀ་གེ་ཧ་ཏོ;
པཱ་པུ་ཎེ་ཡྻཱ་མ ནི་ཡ་ཏཾ, སུ་ཁ’མ་ཛ྄ཛྷ་ཡ་ནཱ’དི་ནཱ.
༡༡༣. སུ་བྷ་གཱ བྷ་གི་ནཱི སཱ’ཡཾ, ཨེ་ཏ་སྶི’ཙྩེ་ཝ་མཱ་དི་ཀཾ;
ན ‘གཱ་མྨ’མི་ཏི ནི་དྡི་ཊྛཾ, ཀ་ཝཱི་ཧི ས་ཀ་ལེ་ཧི་པི.
༡༡༤. དུ་ཊྛཱ’ལ་ངྐཱ་ར་ཝི་ག་མེ, སོ་བྷ་ནཱ’ལ་ངྐ་ཏི་ཀྐ་མོ;
ཨ་ལ་ངྐཱ་ར་པ་རི་ཙྪེ་དེ, ཨཱ་ཝི་བྷཱ་ཝཾ ག་མི་སྶ་ཏི.
༡༡༥. དོ་སེ པ་རཱི་ཧ་རི་ཏུ མེ་ས ཝ་རོ’པ་དེ་སོ,
ས་ཏྠ་ནྟ་རཱ་ནུ་ས་ར་ཎེ་ན ཀ་ཏོ མ་ཡེ་ཝཾ;
ཝི་ཉྙཱ་ཡི’མཾ ག་རུ་ཝ་རཱ་ན’དྷི་ཀ’པྤ་སཱ་དཱ,
དོ་སེ པ་རཾ པ་རི་ཧ་རེ་ཡྻ ཡ་སོ་བྷི་ལཱ་སཱི.
ཨི་ཏི ས་ངྒྷ་ར་ཀྑི་ཏ་མ་ཧཱ་སཱ་མི་ཝི་ར་ཙི་ཏེ སུ་བོ་དྷཱ་ལ་ངྐཱ་རེ
དོ་ས་པ་རི་ཧཱ་རཱ་ཝ་བོ་དྷོ ནཱ་མ
དུ་ཏི་ཡོ པ་རི་ཙྪེ་དོ.