༢༣. སྱཱ་དཱི་སུ ར་སྶོ་ཏི

ན་པུཾ་ས་ཀེ ཝ་ཏྟ་མཱ་ན་སྶ སྱཱ་དཱི་སུ ར་སྶོ. བྷོ ཚ་ཏྟུ་པཱ་ཧ་ན, ཚ་ཏྟུ་པཱ་ཧ་ནཾ, ཚ་ཏྟུ་པཱ་ཧ་ནེ་ན ཨི་ཙྩཱ་དི.

ཏེ ཙ ས་མཱ་ཧཱ་རི་ཏ་རཱི་ཏ་ར་ཡོ་གཱ བ་ཧུ་ལཾ་ཝི་དྷཱ་ནཱ ནི་ཡ་ཏ་ཝི་ས་ཡཱ་ཡེ་ཝ ཧོ་ནྟི, ཏ་ཏྲཱ+ཡཾ ཝི་ས་ཡ་ཝི་བྷཱ་གོ-ནི་རུ་ཏྟི་པི་ཊ་ཀཱ་ག་ཏོ-པཱ་ཎི+ཏཱུ་རི་ཡ+ཡོ་གྒ+སེ་ན་ངྒཱ་ནཾ, ནི་ཙྩ་ཝེ་རཱི་ནཾ, ས་ངྑྱཱ་པ་རི་མཱ་ཎ་ས་ཉྙཱ་ནཾ, ཁུ་དྡ་ཛ་ནྟུ་ཀཱ་ནཾ, པ་ཙ་ན་ཙ་ཎྜཱ་ལཱ་ནཾ, ཙ་ར་ཎ་སཱ་དྷཱ་ར་ཎཱ་ནཾ, ཨེ་ཀ་ཛ྄ཛྷཱ་ཡ་ན་པཱ་ཝ་ཙ་ནཱ་ནཾ, ལི་ངྒ་ཝི་སེ་སཱ་ནཾ, ཝི་ཝི་དྷ་ཝི་རུ་དྡྷཱ་ནཾ, དི་སཱ་ནཾ, ན་དཱི་ན་ཉྩ ནི་ཙྩ་ས་མཱ་ཧཱ་རེ་ཀ་ཏྠཾ བྷ་ཝ་ཏི.

པཱ་ཎ་ངྒཱ་ནཾ-ཙ་ཀྑུ ཙ སོ་ཏ་ཉྩ ཙ་ཀྑུ་སོ་ཏཾ, མུ་ཁ་ཉྩ ནཱ་སི་ཀཱ ཙ མུ་ཁ་ནཱ་སི་ཀཾ, ‘‘སྱཱ་དཱི་སུ ར་སྶོ’’ཏི ན་པུཾ་ས་ཀེ ཝ་ཏྟ་མཱ་ན་སྶ ར་སྶོ. ཧ་ནུ ཙ གཱི་ཝཱ ཙ ཧ་ནུ་གཱི་ཝཾ, ཀ་ཎྞཱ ཙ ནཱ་སཱ ཙ ཀ་ཎྞ་ནཱ་སཾ, པཱ་ཎི ཙ པཱ་དོ ཙ པཱ་ཎི་པཱ་དཾ, ཚ་ཝི ཙ མཾ་ས་ཉྩ ལོ་ཧི་ཏ་ཉྩ ཚ་ཝི་མཾ་ས་ལོ་ཧི་ཏཾ, ནཱ་མ་ཉྩ རཱུ་པ་ཉྩ ནཱ་མ་རཱུ་པཾ, ཛ་རཱ ཙ མ་ར་ཎ་ཉྩ ཛ་རཱ་མ་ར་ཎཾ.

ཏཱུ་རི་ཡ་ངྒཱ་ནཾ-ཨ་ལ་སོ ཙ ཏཱ་ལ་མྦ་རོ ཙ ཨ་ལ་ས་ཏཱ་ལ་མྦ་རཾ, མུ་ར་ཛོ ཙ གོ་མུ་ཁོ ཙ མུ་ར་ཛ་གོ་མུ་ཁཾ, སཾ་ཁོ ཙ པ་ཎ་ཝོ ཙ དེ་ཎྜི་མོ ཙ, སཾ་ཁཱ ཙ པ་ཎ་ཝཱ ཙ དེ་ཎྜི་མཱ ཙཱ་ཏི ཝཱ སཾ་ཁ་པ་ཎ་ཝ་དེ་ཎྜི་མཾ, པ་ཎ་ཝཱ་ད་ཡོ དྭེ་པི བྷེ་རི་ཝི་སེ་སཱ, མ་དྡ་ཝི་ཀོ ཙ པཱ་ཎ་ཝི་ཀོ ཙ མ་དྡ་ཝི་ཀ་པཱ་ཎ་ཝི་ཀཾ, གཱི་ཏ་ཉྩ ཝཱ་དི་ཏ་ཉྩ གཱི་ཏ་ཝཱ་དི་ཏཾ, ས་མྨ་ཉྩ ཏཱ་ལ༹་ཉྩ ས་མྨ་ཏཱ་ལ༹ཾ, ས་མྨཾ་ཏི ཀཾ་ས་ཏཱ་ལཾ, ཏཱ་ལ༹ཾ་ཏི ཧ་ཏྠ་ཏཱ་ལ༹ཾ.

ཡོ་གྒ་ངྒཱ་ནཾ-ཕཱ་ལོ ཙ པཱ་ཙ་ན་ཉྩ ཕཱ་ལ་པཱ་ཙ་ནཾ, ཡུ་ག་ཉྩ ན་ངྒ་ལ་ཉྩ ཡུ་ག་ན་ངྒ་ལཾ.

སེ་ན་ངྒཱ་ནཾ-ཧ་ཏྠི་ནོ ཙ ཨ་སྶཱ ཙ ཧ་ཏྠི་ཨ་སྶཾ, ར་ཐཱ ཙ པ་ཏྟི་ཀཱ ཙ ར་ཐ་པ་ཏྟི་ཀཾ, ཨ་སི ཙ ས་ཏྟི ཙ ཏོ་མ་ར་ཉྩ པི་ཎྜ་ཉྩ ཨ་སི་ས་ཏྟི་ཏོ་མ་ར་པི་ཎྜཾ, ཨ་སི ཙ ཙ་མྨ་ཉྩ ཨ་སི་ཙ་མྨཾ, ཙ་མྨ་ནྟི ས་ར་ཝཱ་ར་ཎ-ཕ་ལ་ཀཾ. དྷ་ནུ ཙ ཀ་ལཱ་པོ ཙ དྷ་ནུ་ཀ་ལཱ་པཾ, ཀ་ལཱ་པོ=ཏུ་ཎཱི་རཾ. པ་ཧ་ར་ཎ་ཉྩ ཨཱ་ཝ་ར་ཎ་ཉྩ པ་ཧ་ར་ཎཱ་ཝ་ར་ཎཾ.

ནི་ཙྩ་ཝེ་རཱི་ནཾ-ཨ་ཧི ཙ ན་ཀུ་ལོ ཙ, ཨ་ཧཱི ཙ ན་ཀུ་ལཱ ཙཱ་ཏི ཝཱ ཨ་ཧི་ན་ཀུ་ལཾ. ཨེ་ཝཾ བི་ལཱ༹་ར་མཱུ་སི་ཀཾ, ཨ་ནྟ་སྶ ར་སྶ་ཏྟཾ. ཀཱ་ཀོ་ལུ་ཀཾ, ས་པྤ་མ་ཎྜཱུ་ཀཾ, ག་རུ་ལ༹་ས་པྤཾ, ནཱ་ག་སུ་པ་ཎྞཾ.

ས་ངྑྱཱ་པ་རི་མཱ་ཎ་ས་ཉྙཱ་ནཾ-ཨེ་ཀ་ཀ་ཉྩ དུ་ཀ་ཉྩ ཨེ་ཀ་ཀ་དུ་ཀཾ. ཨེ་ཝཾ, དུ་ཀ་ཏི་ཀཾ, ཏི་ཀ་ཙ་ཏུ་ཀྐཾ, ཙ་ཏུ་ཀྐ་པ་ཉྩ་ཀཾ. ད་ས་ཀ་ཉྩ ཨེ་ཀཱ་ད་ས་ཀ་ཉྩ ད་སེ་ཀཱ་ད་ས་ཀཾ, ‘‘ཏི་ཏཱ་ལཱི་ས’’ ཨི་ཏི ཙ་ཀ-བྷཱ་ག་ལོ་པ་ནི་དྡེ་སེ་ན ཀ་ཀཱ་ར་སྶ ལོ་པོ.

ཁུ་དྡ་ཛ་ནྟུ་ཀཱ་ནཾ-ཀཱི་ཊཱ ཙ པ་ཊ་ངྒཱ ཙ ཀཱི་ཊ་པ་ཊ་ངྒཾ, ཀཱི་ཊཱ=ཀ་པཱ་ལ་པི་ཊྛི་ཀ་པཱ་ཎཱ. ཨེ་ཝཾ ཀུ་ནྠ་ཀི་པི་ལླི་ཀཾ, ཌཾ་སཱ ཙ མ་ཀ་སཱ ཙ ཌཾ་ས་མ་ཀ་སཾ, མ་ཀྑི་ཀཱ ཙ ཀི་པི་ལླི་ཀཱ ཙ མ་ཀྑི་ཀ་ཀི་པི་ལླི་ཀཾ, ཀཱི་ཊཱ ཙ ས་རིཾ་ས་པཱ ཙ ཀཱི་ཊ་ས་རིཾ་ས་པཾ. ཏ་ཏྠ ཀུ་ནྠཱ=སུ་ཁུ་མ་ཀི་པི་ལླི་ཀཱ.

ཁུ་དྡ་ཛ་ནྟུ ཨ་ན་ཊྛཱི ཝཱ, ཨ་ཐ ཁོ ཁུ་དྡ་ཀོ་པི ཝཱ;

ས་ཏཾ ཝཱ པ་ས་ཏོ ཡེ་སཾ, ཀེ་ཙི ཨཱ་ན་ཏུ་ལཱ ཨི་ཏི.

པ་ཙ་ན་ཙ་ཎྜཱ་ལཱ་ནཾ-ཨོ་ར་བྦྷི་ཀཱ ཙ སཱུ་ཀ་རི་ཀཱ ཙ ཨོ་ར་བྦྷི་ཀ་སཱུ་ཀ་རི་ཀཾ, ཨེ་ཝཾ སཱ་ཀུ་ནྟི་ཀ་མཱ་ག་ཝི་ཀཾ. ས་པཱ་ཀོ ཙ ཙ་ཎྜཱ་ལོ ཙ ས་པཱ་ཀ་ཙ་ཎྜཱ་ལཾ, པུ་ཀྐུ་ས་ཚ་ཝ་ཌཱ་ཧ་ཀཾ, ཝེ་ན་ར་ཐ་ཀཱ་རཾ, ཏ་ཏྠ ཝེ་ནཱ=ཏ་ཙྪ་ཀཱ, ར་ཐ་ཀཱ་རཱ=ཙ་མྨ་ཀཱ་རཱ.

ཙ་ར་ཎ་སཱ་དྷཱ་ར་ཎཱ་ནཾ-ཨ་ཏི་སོ ཙ བྷཱ་ར་དྭཱ་ཛོ ཙ ཨ་ཏི་ས་བྷཱ་ར་དྭཱ་ཛཾ, ཀ་ཊྛོ ཙ ཀ་པཱ་ལོ ཙ ཀ་ཊྛ་ཀ་པཱ་ལཾ, སཱི་ལ་ཉྩ པ་ཉྙཱ་ཎ་ཉྩ སཱི་ལ་པ་ཉྙཱ་ཎཾ, ས་མ་ཐོ ཙ ཝི་པ་སྶ་ནཱ ཙ ས་མ་ཐ་ཝི་པ་སྶ་ནཾ, ཝི་ཛྫཱ ཙ ཙ་ར་ཎ་ཉྩ ཝི་ཛྫཱ་ཙ་ར་ཎཾ, ཨེ་ཝཾ ནཱ་མ་རཱུ་པཾ, ཧི་རོ་ཏྟ་པྤཾ, ས་ཏི་ས་མྤ-ཛ་ཉྙཾ, ལོ་བྷ་མོ་ཧཾ, དོ་ས་མོ་ཧཾ, ཨ་ཧི་རི་ཀཱ་ནོ་ཏྟ་པྤཾ, ཐི་ན་མི་དྡྷཾ, ཨུ་དྡྷ་ཙྩ་ཀུ་ཀྐུ་ཙྩ+མི་ཙྩཱ་དི.

ཨེ་ཀ་ཛ྄ཛྷཱ་ཡ་ན་པཱ་ཝ་ཙ་ནཱ་ནཾ-དཱི་གྷོ ཙ མ་ཛ྄ཛྷི་མོ ཙ དཱི་གྷ་མ་ཛ྄ཛྷི་མཾ, ཨེ་ཝཾ ཨེ་ཀུ་ཏྟ་ར སཾ་ཡུ་ཏྟ་ཀཾ, ཁ་ནྡྷ་ཀ་ཝི་བྷ་ངྒཾ.

ལི་ངྒ་ཝི་སེ་སཱ་ནཾ-ཨི་ཏྠཱི ཙ པུ་མཱ ཙ ཨི་ཏྠི་པུ་མཾ, དཱ་སཱི ཙ དཱ་སོ ཙ དཱ་སི་དཱ་སཾ, ཙཱི་ཝ་ར་ཉྩ པི་ཎྜ་པཱ་ཏོ ཙ སེ་ནཱ་ས་ན་ཉྩ གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རོ ཙ ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཾ, ཏི་ཎ་ཉྩ ཀ་ཊྛོ ཙ སཱ་ཁཱ ཙ པ་ལཱ་ས་ཉྩ ཏི་ཎ་ཀ་ཊྛ་སཱ་ཁཱ་པ་ལཱ་སཾ. ‘‘ལཱ་བྷཱི ཧོ་ཏི ཙཱི་ཝ་ར་པི་ཎྜ་པཱ་ཏ་སེ་ནཱ་ས་ན་གི་ལཱ་ན་པ་ཙྩ་ཡ་བྷེ་ས་ཛྫ་པ་རི་ཀྑཱ་རཱ་ནཾ’’ཏི་པི དི་སྶ་ཏི.

ཝི་ཝི་དྷ་ཝི་རུ་དྡྷཱ་ནཾ-ཀུ་ས་ལ་ཉྩ ཨ་ཀུ་ས་ལ་ཉྩ ཀུ་ས་ལཱ་ཀུ་ས་ལཾ, ཨེ་ཝཾ སཱ་ཝ་ཛྫཱ་ན་ཝ་ཛྫཾ, ཧཱི་ན་པ་ཎཱི་ཏཾ, ཀ་ཎྷ་སུ་ཀྐཾ, ཚེ་ཀ་པཱ་པ་ཀཾ, སུ་ཁ་དུ་ཀྑཾ, ཨ་དྷ་མུ་ཏྟ་མཾ, པ་ཊི་གྷཱ་ནུ་ན་ཡཾ, ཚཱ་ཡཱ་ཏ་པཾ, ཨཱ་ལོ་ཀ་ནྡྷ་ཀཱ་རཾ. ར་ཏྟི་ཉྩ དི་ཝཱ ཙ ར་ཏྟི་ནྡི་ཝཾ, ‘‘ར་ཏྟི་ནྡི་ཝ་དཱ་ར་ག་ཝ་ཙ་ཏུ་ར་སྶཱ’’ཏི ཨ་པ་ཙྩ་ཡེ ཀ་ཏེ ནུ་མ་ཨཱ་ག་མོ. ཨ་ཧོ ཙ ར་ཏྟི ཙ ཨ་ཧོ་ར་ཏྟཾ, ‘‘དཱི་གྷཱ+ཧོ་ཝ་སྶེ་ཀ་དེ་སེ་ཧི ཙ ར་ཏྱཱ’’ཏི ཨ་པ་ཙྩ་ཡེ ཀ་ཏེ ‘‘མ་ནཱ་དྱཱ་པཱ་དཱི་ན+མོ མ་ཡེ ཙེ’’ཏི ཨོ་ཀཱ་རོ.

དི་སཱ་ནཾ-པུ་བྦཱ ཙ ཨ་པ་རཱ ཙ པུ་བྦཱ་པ་རཾ, ཨེ་ཝཾ པུ་ར་ཏྠི་མ་པ་ཙྪི་མཾ, ད་ཀྑི་ཎུ་ཏྟ་རཾ, པུ་བྦ་ད་ཀྑི་ཎཾ, པུ་བྦུ་ཏྟ་རཾ, ཨ་པ་ར་ད་ཀྑི་ཎཾ, ཨ་པ་རུ་ཏྟ་རཾ.

ན་དཱི་ནཾ-ག་ངྒཱ ཙ ཡ་མུ་ནཱ ཙ ག་ངྒཱ་ཡ་མུ་ནཾ, ཨེ་ཝཾ མ་ཧཱི་ས་ར་བྷཱུ.

ཏི་ཎ+རུ་ཀྑ+པ་སུ+ས་ཀུ་ཎ+དྷ་ན+ཁ་ཉྙ+བྱ་ཉྫ་ན+ཛ་ན་པ་དཱ་ནཾ ཝཱ. ཏི་ཎ་ཝི་སེ་སཱ་ནཾ-ཨུ་སཱི་རཱ་ནི ཙ བཱི་ར་ཎཱ་ནི ཙ ཨུ་སཱི་ར་བཱི་ར་ཎཾ ཨུ་སཱི་ར་བཱི་ར་ཎཱ་ནི ཝཱ. ཨེ་ཝཾ མུ་ཉྫ་པ་བྦ་ཛཾ མུ་ཉྫ་པ་བྦ་ཛཱ་ནི ཝཱ, ཀཱ་ས་ཀུ་སཾ ཀཱ་ས་ཀུ་སཱ ཝཱ.

རུ་ཀྑ་ཝི་སེ་སཱ་ནཾ-ཨ་སྶ་ཏྠཱ ཙ ཀ་པི་ཊྛཱ ཙ ཨ་སྶ་ཏྠ་ཀ་པི་ཊྛཾ ཨ་སྶ་ཏྠ་ཀ་པི་ཊྛཱ ཝཱ, ཨེ་ཝཾ ཨ་མྦ་པ་ན་སཾ ཨ་མྦ་པ་ན་སཱ, ཁ་དི་ར་པ་ལཱ་སཾ ཁ་དི་ར་པ་ལཱ་སཱ, དྷ་ཝཱ་སྶ་ཀ་ཎྞཾ དྷ་ཝཱ་སྶ་ཀ་ཎྞཱ, པི་ལ་ཀྑ་ནི་གྲོ་དྷཾ པི་ལ་ཀྑ་ནི་གྲོ་དྷཱ, སཱ་ཀ་སཱ་ལཾ སཱ་ཀ་སཱ་ལཱ.

པ་སུ་ཝི་སེ་སཱ་ནཾ-ག་ཛཱ ཙ ག་ཝ་ཛཱ ཙ ག་ཛ་ག་ཝ་ཛཾ ག་ཛ་ག་ཝ་ཛཱ ཝཱ, ཨ་ཛཱ ཙ ཨེ་ལ༹་ཀཱ ཙ ཨ་ཛེ་ལ༹་ཀཾ ཨ་ཛེ་ལ༹་ཀཱ, ཧ་ཏྠཱི ཙ གཱ་ཝོ ཙ ཨ་སྶཱ ཙ ཝ་ལ༹་ཝཱ ཙ ཧ་ཏྠཱི་ག་ཝ་སྶ་ཝ་ལ༹་ཝཾ ཧ་ཏྠཱི་ག་ཝ་སྶ་ཝ་ལ༹་ཝཱ, ར་སྶ་ཏྟཾ. ཨེ་ཝཾ གོ་མ་ཧི་སཾ གོ་མ་ཧི་སཱ, ཨེ་ཎེ་ཡྻ་ཝ་རཱ་ཧཾ ཨེ་ཎེ་ཡྻ་ཝ་རཱ་ཧཱ, སཱི་ཧ་བྱ་གྒྷ་ཏ་ར་ཙྪཾ སཱི་ཧ་བྱ་གྒྷ་ཏ་ར་ཙྪཱ, ཀུ་ཀྐུ་ཊ་སཱུ་ཀ་རཾ ཀུ་ཀྐུ་ཊ་སཱུ་ཀ་རཱ, ཨེ་ཎེ་ཡྻ་གོ་མ་ཧི་སཾ ཨེ་ཎེ་ཡྻ་གོ་མ་ཧི་སཱ.

ས་ཀུ་ཎ་ཝི་སེ་སཱ་ནཾ-ཧཾ་སཱ ཙ བ་ཀཱ ཙ ཧཾ་ས་བ་ཀཾ ཧཾ་ས་བ་ཀཱ. ཨེ་ཝཾ ཀཱ་ར་ཎྜ་ཝ་ཙ་ཀྐ་ཝཱ་ཀཾ ཀཱ་ར་ཎྜ་ཝ་ཙ་ཀྐ་ཝཱ་ཀཱ, མ་ཡཱུ་ར་ཀོ་ཉྩཾ མ་ཡཱུ་ར་ཀོ་ཉྩཱ, སུ་ཀ་སཱ་ལི་ཀཾ སུ་ཀ་སཱ་ལི་ཀཱ, བ་ཀ་བ་ལཱ་ཀཾ བ་ཀ་བ་ལཱ་ཀཱ.

དྷ་ནཱ་ནཾ-ཧི་ར་ཉྙ་ཉྩ སུ་ཝ་ཎྞ་ཉྩ ཧི་ར་ཉྙ་སུ་ཝ་ཎྞཾ ཧི་ར་ཉྙ་སུ་ཝ་ཎྞཱ་ནི. ཨེ་ཝཾ ཛཱ་ཏ་རཱུ་པ་ར་ཛ་ཏཾ ཛཱ་ཏ་རཱུ་པ་ར་ཛ་ཏཱ་ནི, མ་ཎི་ས་ངྑ་མུ་ཏྟ་ཝེ་ལུ༹་རི་ཡཾ མ་ཎི་ས་ངྑ་མུ་ཏྟ་ཝེ་ལུ༹་རི་ཡཱ.

དྷ་ཉྙཱ་ནཾ-སཱ་ལཱི ཙ ཡ་ཝཱ ཙ སཱ་ལི་ཡ་ཝཾ སཱ་ལི་ཡ་ཝཱ ཝཱ. ཨེ་ཝཾ ཏི་ལ་མུ་གྒ་མཱ་སཾ ཏི་ལ་མུ་གྒ་མཱ་སཱ་ནི, ནི་པྤཱ་ཝ་ཀུ་ལ་ཏྠཾ ནི་པྤཱ་ཝ་ཀུ་ལ་ཏྠཱ.

བྱ་ཉྫ་ནཱ་ནཾ-སཱ་ཀོ ཙ སུ་ཝཱ ཙ སཱ་ཀ་སུ་ཝཾ སཱ་ཀ་སུ་ཝཱ. ཨེ་ཝཾ ག་བྱ་མཱ་ཧི་སཾ ག་བྱ་མཱ་ཧི་སཱ, ཨེ་ཎེ་ཡྻ་ཝ་རཱ་ཧཾ ཨེ་ཎེ་ཡ, ཝ་རཱ་ཧཱ. མི་ག་མ་ཡཱུ་རཾ མི་ག་མ་ཡཱུ་རཱ.

ཛ་ན་པ་དཱ་ནཾ-ཀཱ་སི ཙ ཀོ་ས་ལཱ ཙ ཀཱ་སི་ཀོ་ས་ལཾ ཀཱ་སི་ཀོ་ས་ལཱ, ཝ་ཛྫཱི ཙ མ་ལླཱ ཙ ཝ་ཛྫི་མ་ལླཾ ཝ་ཛྫི་མ་ལླཱ, ཨ་ངྒཱ ཙ མ་ག་དྷཱ ཙ ཨ་ངྒ་མ་ག་དྷཾ ཨ་ངྒ་མ་ག་དྷཱ, ཨེ་ཝཾ ཙེ་ཏི་ཝཾ་སཾ ཙེ་ཏི་ཝཾ་སཱ, མ་ཙྪ་སཱུ་ར་སེ་ནཾ མ་ཙྪ་སཱུ་ར་སེ་ནཱ, ཀུ་རུ་པ་ཉྩཱ་ལཾ ཀུ་རུ་པ་ཉྩཱ་ལཱ. ནཱ་མ་ཉྩ རཱུ་པ་ཉྩ ནཱ་མ་རཱུ་པ་ཉྩ ནཱ་མ་རཱུ་པ་ནཱ་མ་རཱུ་པ་ནྟི ཙ་ཏུ་རེ་ཀ་པ་ཉྩ་ཝོ་ཀཱ་ར་ཝ་སེ་ན ཝ་ཏྟ་བྦེ བ་ཧུ་ལཱ་དྷི་ཀཱ་རཱ ས་རཱུ་པེ་ཀ་སེ་སཾ ཀ་ཏྭཱ ནཱ་མ་རཱུ་པ་ནྟི ཝུ་ཏྟཾ.

ཨེ་ཏ་སྨིཾ ཨེ་ཀ་ཏྠཱི་བྷཱ་ཝ་ཀ་ཎྜེ ཡཾ ཝུ་ཏྟཾ པུ་བྦཾ, ཏ་དེ་ཝ པུ་བྦཾ ནི་པ་ཏ་ཏི, ཀ་མཱ་ཏི་ཀྐ་མེ པ་ཡོ་ཛ་ན་སྶཱ+བྷཱ་ཝཱ. ཀྭ་ཙི ཝི་པ་ལླཱ་སོ་པི ཧོ་ཏི, བ་ཧུ་ལཱ་དྷི་ཀཱ་ར་ཏོ, ད་ནྟཱ་ནཾ རཱ་ཛཱ རཱ་ཛ་ད་ནྟོ. ཙ་ཏྠེ ས་མཱ་ཧཱ་རེ ‘‘ས་བྷཱ་པ་རི་སཱ་ཡཱ’’ཏི ཉཱ་པ་ཀཱ ཀྭ་ཙི ན་པུཾ་ས་ཀ་ལི་ངྒཾ ན བྷ་ཝ་ཏི, ཨཱ་དྷི་པ་ཙྩ་ཉྩ པ་རི་ཝཱ་རོ ཙ ཨཱ་དྷི་པ་ཙྩ་པ་རི་ཝཱ་རོ. ཨེ་ཝཾ ཚ་ནྡ་པཱ་རི་སུ་དྡྷི, པ་ཊི་ས་ནྡྷི་པ་ཝ་ཏྟི་ཡཾ.