༦༧. ཨི་ཏྠི་ཡཾ བྷཱ་སི་ཏ་པུ་མི+ཏྠཱི པུ་མེ་ཝེ+ཀ་ཏྠེ་ཏི
བྷཱ་སི་ཏ་པུ་མཱ ཨི་ཏྠཱི པུ་མེ་ཝ ཧོ་ཏཱི་ཏི པུ་མྦྷཱ་ཝཱ ཨི་ཏྠི་པ་ཙྩ་ཡཱ་ནཾ ནི་ཝ་ཏྟི ཧོ་ཏི. ཨེ་ཝཾ ར་ཏྟ་ལ་ཏཱ, དུ་ཏི་ཡ་བྷི་ཀྑཱ. བྲཱ་ཧྨ་ཎཱི ཙ སཱ དཱ་རི་ཀཱ ཙཱ་ཏི བྲཱ་ཧྨ་ཎ་དཱ་རི་ཀཱ, ནཱ་ག་མཱ་ཎ་ཝི་ཀཱ. ཨི་ཏྠི་ཡ་ནྟི ཀིཾ, ཀུ་མཱ་རི་ར་ཏ་ནཾ, ས་མ་ཎི་པ་དུ་མཾ. བྷཱ་སི་ཏ་པུ་མཱ་ཏི ཀིཾ, ག་ངྒཱ་ན་དཱི, ཏ་ཎྷཱ་ན་དཱི, པ་ཐ་ཝཱི་དྷཱ་ཏུ. པུ་ར་ཏྠི་མོ ཙ སོ ཀཱ་ཡོ ཙཱ་ཏི པུ་ར་ཏྠི་མ་ཀཱ་ཡོ. ཨེ་ཏྠ ཙ ཀཱ་ཡེ་ཀ་དེ་སེ ཀཱ་ཡ་ས་དྡོ. ཨེ་ཝཾ པ་ཙྪི་མ་ཀཱ་ཡོ, ཨུ་པ་རི་མ་ཀཱ་ཡོ, ཧེ་ཊྛི་མ་ཀཱ་ཡོ, ས་བྦ་ཀཱ་ཡོ, ན་ཝཱ་ཝཱ་སོ, ཀ་ཏ་ར་ནི་ཀཱ་ཡོ, ཧེ་ཏུ་པ་ཙྩ་ཡོ. ཛཱི་ཝི་ཏ་པྤ་དྷཱ་ནཾ ན་ཝ་ཀཾ ཛཱི་ཝི་ཏ་ན་ཝ་ཀ+མི་ཙྩཱ་དི.
ཝི་སེ་ས་ནུ་ཏྟ་ར་པ་དེ ཐེ་རཱ+ཙ་རི་ཡ+པ་ཎྜི་ཏཱ ཝི་སེ་ས་ནཾ པ་ར་ཉྩ བྷ་ཝ་ཏི. ཡ་ཐཱ སཱ་རི་པུ་ཏྟོ ཙ སོ ཐེ་རོ ཙཱ་ཏི སཱ་རི་པུ་ཏྟ་ཏྠེ་རོ, ཨེ་ཝཾ མ་ཧཱ་མོ་གྒ་ལླཱ་ན་ཏྠེ་རོ, མ་ཧཱ་ཀ་སྶ་པ་ཏྠེ་རོ, བུ་དྡྷ་གྷོ་སཱ་ཙ་རི་ཡོ, དྷ་མྨ་པཱ་ལཱ་ཙ་རི་ཡོ, ཨཱ་ཙ་རི་ཡ་གུ་ཏྟི་ལོ ཝཱ. མ་ཧོ་ས་དྷོ ཙ སོ པ་ཎྜི་ཏོ ཙཱ་ཏི མ་ཧོ་ས་དྷ་པ་ཎྜི་ཏོ, ཨེ་ཝཾ ཝི་དྷུ་ར་པ་ཎྜི་ཏོ.
ཝི་སེ་ས་ནོ་བྷ་ཡ་པ་དེ ཡ་ཐཱ-སཱི་ཏ་ཉྩ ཏཾ ཨུ་ཎྷ་ཉྩཱ་ཏི སཱི་ཏུ་ཎྷཾ, སི་ནི་དྡྷོ ཙ སོ ཨུ་ཎྷོ ཙཱ་ཏི སི་ནི་དྡྷུ་ཎྷོ མཱ་སོ. ཁ་ཉྫོ ཙ སོ ཁུ་ཛྫོ ཙཱ་ཏི ཁ་ཉྫ་ཁུ་ཛྫོ, ཨེ་ཝཾ ཨ་ནྡྷ་བ་དྷི་རོ, ཀ་ཏཱ་ཀ་ཏཾ, ཚི་དྡཱ་ཝ་ཚི་དྡཾ, ཨུ་ཙྩཱ་ཝ་ཙཾ, ཚི་ནྣ་བྷི་ནྣཾ, ག་ཏ་པ་ཙྩཱ་ག་ཏཾ. ཀྭ་ཙི པུ་བྦ་ཀཱ་ལ་སྶཱ་པི པ་ར་ནི་པཱ་ཏོ, ཝཱ་སི་ཏོ ཙ སོ ལི་ཏྟོ ཙཱ་ཏི ལི་ཏྟ་ཝཱ་སི་ཏོ, ཨེ་ཝཾ ན་གྒ་མཱུ་སི་ཏོ, སི་ཏྟ་ས་མྨ་ཊྛོ, བྷ་ཊྛ་ལུ་ཉྫི་ཏོ.
ཨུ་པ་མ་ནུ་ཏྟ་ར་པ་དེ ཨུ་པ་མཱ་ན་བྷཱུ་ཏཾ ཝི་སེ་ས་ནཾ པ་རཾ བྷ་ཝ་ཏི, ཡ་ཐཱ སཱི་ཧོ་ཏི ཝུ་ཏྟེ ཨུ་པ་ཙ་རི་ཏཱ+ནུ་པ་ཙ་རི་ཏ་སཱི་ཧཱ་ནཾ སཱ་མ་ཉྙ་པྤ་ཏཱི་ཏི་ཡཾ མུ་ནི་ས་དྡོ ཝི་སེ་སེ་ཏི. ཨེ་ཏྠ ཙ –
ཨུ་པ་མཱ་ནོ+པ་མེ་ཡྻཱ་ནཾ, ས་དྷ་མྨ་ཏྟཾ སི་ཡོ+པ་མཱ.
སཱ ཙ ཝ་ཏྠུ+ཝ་ཎྞ+ཨཱ་ཀཱ་རཱ་ནཾ སཱ་མྱེ་ན ཧོ་ཏི. སཱི་ཧོ་ཝ སཱི་ཧོ, མུ་ནི ཙ སོ སཱི་ཧོ ཙཱ་ཏི མུ་ནི་སཱི་ཧོ, མུ་ནི་ཝ་ས་བྷོ, མུ་ནི་པུ་ངྒ་ཝོ, བུ་དྡྷ་ནཱ་གོ, བུ་དྡྷཱ་དི་ཙྩོ. རཾ་སཱི ཝི་ཡ རཾ་སཱི, ས་དྡྷ་མྨོ ཙ སོ རཾ་སཱི ཙཱ་ཏི ས་དྡྷ་མྨ་རཾ་སཱི, ཨེ་ཝཾ ཝི་ན་ཡ་སཱ་ག་རོ. པུ་ཎྜ་རི་ཀ་མི་ཝ པུ་ཎྜ་རི་ཀོ, ས་མ་ཎོ ཙ སོ པུ་ཎྜ་རི་ཀོ ཙཱ་ཏི ས་མ་ཎ་པུ་ཎྜ་རི་ཀོ, ས་མ་ཎ་པ་དུ་མོ. ཙ་ནྡོ ཝི་ཡ ཙ་ནྡོ, མུ་ཁ་ཉྩ ཏཾ ཙ་ནྡོ ཙཱ་ཏི མུ་ཁ་ཙ་ནྡོ, མུ་ཁ་པ་དུ་མཾ ཨི་ཙྩཱ་དི.
ས་མྦྷཱ་ཝ་ནཱ་པུ་བྦ་པ་དེ ཡ་ཐཱ-དྷ་མྨོ་ཏི བུ་དྡྷི དྷ་མྨ་བུ་དྡྷི, ཨེ་ཝཾ དྷ་མྨ་ས་ཉྙཱ, དྷ་མྨ་ས་ངྑཱ་ཏོ, དྷ་མྨ་ས་མྨ་ཏོ, པཱ་ཎ་ས་ཉྙི་ཏཱ, ཨ་སུ་བྷ་ས་ཉྙཱ, ཨ་ནི་ཙྩ་ས་ཉྙཱ, དྷཱ་ཏུ་ས་ཉྙཱ, ཨ་ཏྟ་ས་ཉྙཱ, ཨ་ཏྟ་དི་ཊྛི ཨི་ཙྩཱ་དི.
ཨ་ཝ་དྷཱ་ར་ཎ་པུ་བྦ་པ་དེ ཡ་ཐཱ-གུ་ཎོ ཨེ་ཝ དྷ་ནཾ གུ་ཎ་དྷ་ནཾ, ཨེ་ཝཾ ས་དྡྷཱ་དྷ་ནཾ, སཱི་ལ་དྷ་ནཾ, པ་ཉྙཱ་ར་ཏ་ནཾ, ཙ་ཀྑུ ཨེ་ཝ ཨི་ནྡྲི་ཡཾ ཙ་ཀྑུ་ནྡྲི་ཡཾ, ཨེ་ཝཾ ཙ་ཀྑཱ་ཡ་ཏ་ནཾ, ཙ་ཀྑུ་དྷཱ་ཏུ, ཙ་ཀྑུ་དྭཱ་རཾ, རཱུ་པཱ་ར་མྨ་ཎ+མི་ཙྩཱ་དི.
ཝི་སེ་ས་ན+ཝི་སེ་སྶེ་ཧི, ཀྲི་ཡཱ་ཡ ཙ ས་ཧེ+རི་ཏོ;
ཏེ་སཾ བྷཱ་ཝཾ ཝི་ཝེ་ཙེ་ཏཱ, ནི་པཱ་ཏོ བྱ་ཝ་ཙྪི་ནྡ་ཏི.
ཨ་ཡོ་ག+མ་ཉྙ་ཡོ་ག་ཉྩ, ཨ་ཙྩ་ནྟཱ་ཡོ་ག+མེ་ཝི+ཏི;
ཝི་ཝ་ཀྑཱ་ཏོ པ་ཡུ་ཏྟོ་པི, ཨེ་ཝ་ཏྠོ ཉཱ་ཡ་ཏེ ཡ་ཏོ.
བྱ་ཝ་ཙྪེ་ད་ཕ་ལཾ ཝཱ་ཀྱཾ, ཏ་ཏོ ཙི་ཏྟོ དྷ་ནུ་དྡྷ་རོ;
པཱ་ཏྠོ དྷ་ནུ་དྡྷ་རོ ནཱི་ལུ+པྤ་ལ+མ་ཏྠཱི་ཏི ཏཾ ཡ་ཐཱ.
ཨེ་ཏྠ ནི་པཱ་ཏོ་ཏི ཨེ་ཝ-ཨི་ཏི་ནི་པཱ་ཏོ, ཨ་པྤ་ཡུ་ཏྟོ་པི ཨེ་ཝ་ས་དྡོ ཨེ་ཝཾ ཡོ་ཛེ་ཏ་བྦོ – ‘‘ཙི་ཏྟོ དྷ་ནུ་དྡྷ་རོ ཨེ་ཝཱ’’ཏི ཝི་སེ་ས་ནེ་ན ཡུ་ཏྟོ ཨ་ཡོ་ག་ཝི་ཝ་ཙྪེ་ད་ཀོ, དྷ་ནུ་ནཱ ཡོ་གེ པ་ཏི་ཊྛཱ་པ་ན་ཏོ ‘‘པཱ་ཏྠོ ཨེ་ཝ དྷ་ནུ་དྡྷ་རོ’’ཏི ཝི་སེ་སྶེ་ན ཡུ་ཏྟོ ཨ་ཉྙ་ཡོ་ག་ཝི་ཝ་ཙྪེ་ད་ཀོ, དྷ་ནུ་དྡྷ་ར་ཏྟ་སྶ པཱ་ཏྠ་སཾ་ཁཱ་ཏ་ཨ་ཛྫུ་ནེ ཨེ་ཝ པ་ཏི་ཊྛཱ་པ་ན་ཏོ. ‘‘ནཱི་ལུ་པྤ་ལ+མ་ཏྠེ་ཝཱ’’ཏི ཀྲི་ཡཱ་ཡ ཡུ་ཏྟོ ཨ་ཙྩ་ནྟཱ་ཡོ་ག་ཝི་ཝ་ཙྪེ་ད་ཀོ, ནཱི་ལུ་པྤ་ལ་སྶ ས་བྦྷཱ་ཝེ་ཡེ་ཝ པ་ཏི་ཊྛཱ་པ་ན་ཏོ.