༡༠. ཨ+མཱ་དི
ཨ+མཱ་དི་སྱཱ་དྱ་ནྟཾ སྱཱ་དྱ་ནྟེ་ན ས་ཧ བ་ཧུ་ལ+མེ་ཀ་ཏྟཾ ཧོ་ཏི.
ཨུ་ཏྟ་ར་སྶ པ་ད་སྶ+ཏྠོ, པ་དྷཱ་ནཾ ལི་ངྒ+མ་སྶ ཙ;
དུ་ཏི་ཡ་ནྟཱ་དི་པ་དེ་ཀ་ཏྠོ, བ་ཧུ་དྷཱ ཏཾ ཝི་བྷ་ཛྫ་ཏེ.
པ་རེ་ས+མི་སྶ་ཏེ ཏ་ཉྩ, བྷི་ཡྻོ ཏ་པྤུ་རི་སཱ+ཁྱ་ཡཱ;
ཏཾ ཡ་ཐཱ+ཏྲ རཱ་ཛཱ་པ་ཙྩཾ, ཀ་ཏྠ་ཙཱི་ཏི+མི་ཏཱི་དི་སཾ.
ཨ+མཱ་དྱ་ནྟཱ་ནཾ ཀཱ་ར་ཀཱ་ནཾ ཨ་ཀཱ་ར་ཀཱ་ན་ཉྩ ས་མཱ་སོ ཀ་ཏྠ་ཙི་མེ་ཝ ཝཱ ཧོ་ཏི. ཏ་ཉྩ བ་ཧུ་ལཾ་ཝི་དྷཱ་ནེ་ནཱ་ཏི ད་ཊྛ་བྦཾ.
ཏ་ཏྠ དུ་ཏི་ཡཱ་ཏ་པྤུ་རི་སོ ཨ་མཱ་དི ག་ཏ+ནི་སྶི་ཏཱ+ཏཱི་ཏཱ+ཏི་ཀྐ་ནྟ+པ་ཏྟཱ+པ་ནྣཱ་དཱི་ཧི བྷ་ཝ་ཏི. ས་ར་ཎཾ ག་ཏོ་ཏི ས་མཱ་སེ ཀ་ཏེ ‘‘ཨེ་ཀ་ཏྠ་ཏཱ་ཡཾ’’ཏི ཝི་བྷ་ཏྟི་ལོ་པཱ་དི ཨུ་པ་རི ས་བྦ་ཏྠ པུ་བྦ་ས་མཾ. ས་ར་ཎ་ག་ཏོ, ས་ར་ཎ་ག་ཏཱ. ས་ར་ཎ་ག་ཏཱ, ས་ར་ཎ་ག་ཏཱ་ཡོ. ས་ར་ཎ་ག་ཏཾ ཀུ་ལཾ, ས་ར་ཎ་ག་ཏཱ་ནི ཀུ་ལཱ་ནི ཨི་ཙྩཱ་དི. ཨ་ར་ཉྙ་ག་ཏོ, བྷཱུ་མི་ག་ཏོ. དྷ་མྨཾ ནི་སྶི་ཏོ དྷ་མྨ་ནི་སྶི་ཏོ, ཨ་ཏྠ་ནི་སྶི་ཏོ. བྷ་ཝཾ ཨ་ཏཱི་ཏོ བྷ་ཝཱ་ཏཱི་ཏོ, ཀཱ་ལཱ་ཏཱི་ཏོ. པ་མཱ་ཎཾ ཨ་ཏི་ཀྐ་ནྟཾ པ་མཱ་ཎཱ་ཏི་ཀྐ་ནྟཾ, ལོ་ཀཱ་ཏི་ཀྐ་ནྟཾ. སུ་ཁཾ པ་ཏྟོ སུ་ཁ་པྤ་ཏྟོ, དུ་ཀྑ་པྤ་ཏྟོ. སོ་ཏཾ ཨཱ་པ་ནྣོ སོ་ཏཱ་པ་ནྣོ, ནི་རོ་དྷ་ས་མཱ་པ་ནྣོ, མ་གྒ་པྤ་ཊི་པ་ནྣོ. ར་ཐཾ ཨཱ་རུ་ལ༹ྷོ ར་ཐཱ་རུ་ལ༹ྷོ. ས་བྦ་ར་ཏྟིཾ སོ་བྷ་ཎོ ས་བྦ་ར་ཏྟི་སོ་བྷ་ཎོ, མུ་ཧུ་ཏྟ་སུ་ཁཾ. ཨ་ཀཱ་ར་ཀཱ་ནཾ ས་མཱ་སོ ཨ་ཙྩ་ནྟ་སཾ་ཡོ་གེ. ཝུ་ཏྟི་ཡེ་ཝོ+པ་པ་ད་ས་མཱ་སེ, ཏ་སྶ ནི་ཙྩ་ཏྟཱ. ཡ་ཐཱ ཀ་མྨཾ ཀ་རོ་ཏཱི་ཏི ཀ་མྨ་ཀཱ་རོ, ཀུ་མྦྷ་ཀཱ་རོ, ཨ་ཏྠཾ ཀཱ་མེ་ཏཱི་ཏི ཨ་ཏྠ་ཀཱ་མོ, དྷ་མྨ་ཀཱ་མོ, དྷ་མྨཾ དྷཱ་རེ་ཏཱི་ཏི དྷ་མྨ་དྷ་རོ, ཝི་ན་ཡ་དྷ་རོ. སཱ་ནཾ པ་ཙ་ཏཱི་ཏི ས་པཱ་ཀོ, ཏ་ནྟཾ ཝཱ་ཡ་ཏཱི་ཏི ཏ་ནྟ་ཝཱ་ཡོ, ཝ་རཾ ཨཱ་ཧ་ར་ཏཱི་ཏི ཝ་རཱ་ཧ་རོ. ནྟ+མཱ་ན+ཀྟ་ཝ་ནྟེ་ཧི ཝཱ་ཀྱ་མེ་ཝ. དྷ་མྨཾ སུ་ཎ་ནྟོ, དྷ་མྨཾ སུ་ཎ་མཱ་ནོ, ཨོ་ད་ནཾ བྷུ་ཏྟ་ཝཱ.
ཏ་ཏི་ཡཱ་ཏ་པྤུ་རི་སོ ཀི་ཏ་ཀ+པུ་བྦ+ས་དི་ས+ས་མོ+ན་ཏྠ+ཀ་ལ་ཧ+ནི་པུ་ཎ+མི་སྶ+ས་ཁི་ལཱ་དཱི་ཧི. བུ་དྡྷེ་ན བྷཱ་སི་ཏོ བུ་དྡྷ་བྷཱ་སི་ཏོ དྷ་མྨོ, ཨེ་ཝཾ ཛི་ན་དེ་སི་ཏོ. ས་ཏྠཱ་རཱ ཝ་ཎྞི་ཏོ ས་ཏྠུ་ཝ་ཎྞི་ཏོ. ཝི་ཉྙཱུ་ཧི ག་ར་ཧི་ཏོ ཝི་ཉྙུ་ག་ར་ཧི་ཏོ, ཝི་ཉྙུ་པྤ་ས་ཏྠོ, ཨི་སྶ་ར་ཀ་ཏཾ, ས་ཡཾ ཀ་ཏཾ, སུ་ཀེ་ཧི ཨཱ་ཧ་ཊཾ སུ་ཀཱ་ཧ་ཊཾ, ར་ཉྙཱ ཧ་ཏོ རཱ་ཛ་ཧ་ཏོ, རཱ་ཛ་པཱི་ལི༹་ཏོ. ཨ་གྒི་ནཱ ད་ཌྜྷོ ཨ་གྒི་ད་ཌྜྷོ, ས་པྤེ་ན ད་ཊྛོ ས་པྤ་ད་ཊྛོ, ས་ལླེ་ཧི ཝི་དྡྷོ ས་ལླ་ཝི་དྡྷོ, ཨི་ཙྪཱ་ཡ པ་ཀ་ཏོ ཨི་ཙྪཱ་པ་ཀ་ཏོ, སཱི་ལ་ས་མྤ་ནྣོ. ཨེ་ཝཾ སུ་ཁ་ས་ཧ་ག་ཏཾ, ཉཱ་ཎ་ས་མྤ་ཡུ་ཏྟཾ, མི་ཏྟ་སཾ་ས་གྒོ, པི་ཡ་ཝི་པྤ་ཡོ་གོ, ཛཱ་ཏི་ཐ་དྡྷོ, གུ་ཎ་ཧཱི་ནོ, གུ་ཎ་ཝུ་དྡྷོ, ཙ་ཏུ་ཝ་གྒ་ཀ་ར་ཎཱི་ཡཾ, ཙ་ཏུ་ཝ་གྒཱ་དི་ཀ་ཏྟ་བྦཾ. ཀཱ་ཀེ་ཧི པེ་ཡྻཱ ཀཱ་ཀ་པེ་ཡྻཱ, ན་དཱི. ཀྭ་ཙི ཝུ་ཏྟི་ཡེ་ཝ, ཨུ་ར་སཱ ག་ཙྪ་ཏཱི་ཏི ཨུ་ར་གོ, པཱ་དེ་ན པི་ཝ་ཏཱི་ཏི པཱ་ད་པོ. ཀྭ་ཙི ཝཱ་ཀྱ་མེ་ཝ, ཕ་ར་སུ་ནཱ ཚི་ནྣ་ཝཱ, ཀཱ་ཀེ་ཧི པཱ་ཏ་བྦཱ, ད་སྶ་ནེ་ན པ་ཧཱ་ཏ་བྦཱ. པུ་བྦཱ་དི་ཡོ་གེ-མཱ་སེ་ན པུ་བྦོ མཱ་ས་པུ་བྦོ. ཨེ་ཝཾ མཱ་ཏུ་ས་དི་སོ, མཱ་ཏུ་ས་མོ. ཨེ་ཀཱུ་ན་ཝཱི་ས་ཏི, སཱི་ལ་ཝི་ཀ་ལོ, ཨ་སི་ཀ་ལ་ཧོ, ཝཱ་ཙཱ་ནི་པུ་ཎོ, ཡཱ་ཝ་ཀཱ་ལི་ཀ་ས་མྨི་སྶཾ, ཝཱ་ཙཱ་ས་ཁི་ལོ. ས་ཏྠཱ་རཱ ས་དི་སོ ས་ཏྠུ་ས་དི་སོ, ས་ཏྠུ་ཀ་པྤོ, པུ་ཉྙེ་ན ཨ་ཏྠི་ཀོ པུ་ཉྙ་ཏྠི་ཀོ, གུ་ཎཱ་དྷི་ཀོ. ད་དྷི་ནཱ ཨུ་པ་སི་ཏྟཾ བྷོ་ཛ་ནཾ ད་དྷི་བྷོ་ཛ་ནཾ, གུ་ལེ༹་ན སཾ་ས་ཊྛོ ཨོ་ད་ནོ གུ་ལོ༹་ད་ནོ. ཀཱ་ར་ཀ་ས་མྦ་ནྡྷོ ཀྲི་ཡཱ་ཡ ཀ་ཏོ, ཨུ་པ་སི་ཏྟཱ་དི་ཀྲི་ཡཱ་ནཾ ཨ་པ་ཉྙཱ་ཡ་ནེ་པི ཝུ་ཏྟི་ཡེ་ཝོ+པ་སི་ཏྟཱ་དི་ཀྲི་ཡཱ་ན+མཱ་ཁྱཱ་པ་ན་ཏོ ན་ཏྠཱ+ཡུ་ཏྟ་ཏྠ་ཏཱ. ཨེ་ཝཾ ཁཱི་རོ་ད་ནོ. ཨ་སྶེ་ན ཡུ་ཏྟོ ར་ཐོ ཨ་སྶ་ར་ཐོ, མ་གྒ་ཙི་ཏྟཾ, ཛ་མྦུ་ཡཱ པ་ཉྙཱ་ཏོ ལ་ཀྑི་ཏོ དཱི་པོ ཛ་མྦུ་དཱི་པོ, ཨེ་ཀེ་ན ཨ་དྷི་ཀཱ ད་ས ཨེ་ཀཱ་ད་ས, ཛཱ་ཏི་ཡཱ ཨ་ནྡྷོ ཛ་ཙྩ་ནྡྷོ, པ་ཀ་ཏི་ཡཱ མེ་དྷཱ་ཝཱི པ་ཀ་ཏི་མེ་དྷཱ་ཝཱི ཨི་ཙྩཱ་དི.
ཙ་ཏུ་ཏྠཱི་ཏ་པྤུ་རི་སོ ཏ་ད་ཏྠ+ཨ་ཏྠ+ཧི་ཏ+དེ་ཡྻཱ་དཱི་ཧི. ཏ་ད་ཏྠེ-ཀ་ཐི་ན་སྶ དུ་སྶཾ ཀ་ཐི་ན་དུ་སྶཾ, ཀ་ཐི་ན་ཙཱི་ཝ་ར་སྶཱ་ཏི ཨ་ཏྠོ. ཨེ་ཝཾ ཙཱི་ཝ་ར་དུ་སྶཾ, ཙཱི་ཝ་ར་མཱུ་ལཾ, ཡཱ་གུ་ཡཱ ཨ་ཏྠཱ་ཡ ཏ་ཎྜུ་ལཱ ཡཱ་གུ་ཏ་ཎྜུ་ལཱ, བྷ་ཏྟ་ཏ་ཎྜུ་ལཱ, ས་ངྒྷ་སྶ ཨ་ཏྠཱ་ཡ བྷ་ཏྟཾ ས་ངྒྷ་བྷ་ཏྟཾ, ཨཱ་ག་ནྟུ་ཀ་བྷ་ཏྟཾ, ཨེ་ཝཾ ག་མི་ཀ་བྷ་ཏྟཾ, པཱ་སཱ་དཱ་ཡ ད་བྦཾ པཱ་སཱ་ད་ད་བྦཾ. ཨེ་ཏྠ ཙཱ+ཡཾ ནི་ཙྩ་ས་མཱ་སོ, ཏ་སྶ ཏི་ལི་ངྒ་ཏཱ ཙ-བྷི་ཀྑུ་ས་ངྒྷ་སྶ ཨ་ཏྠོ ཝི་ཧཱ་རོ བྷི་ཀྑུ་ས་ངྒྷ་ཏྠོ ཝི་ཧཱ་རོ, བྷི་ཀྑུ་ས་ངྒྷ་ཏྠཱ ཡཱ་གུ, བྷི་ཀྑུ་ས་ངྒྷ་ཏྠཾ ཙཱི་ཝ་རཾ. ཡ་སྶ ཨ་ཏྠོ ཡ་ད་ཏྠོ, ཡ་ད་ཏྠཱ, ཡ་ད་ཏྠཾ. ཨེ་ཝཾ ཏ་ད་ཏྠོ, ཏ་ད་ཏྠཱ, ཏ་ད་ཏྠཾ. ཏ་ཐཱ ལོ་ཀ་ཧི་ཏོ. བུ་དྡྷ་སྶ དེ་ཡྻཾ བུ་དྡྷ་དེ་ཡྻཾ པུ་པྥཾ. ས་ངྒྷ་དེ་ཡྻཾ ཙཱི་ཝ་རཾ. ཨི་དྷ ན ཧོ་ཏི ‘‘ས་ངྒྷ་སྶ དཱ་ཏ་བྦཾ’’.
པ་ཉྩ་མཱི་ཏ་པྤུ་རི་སོ ཨ་པ་ག་མ་ན+བྷ་ཡ+ཝི་ར་ཏི+མོ་ཙ་ན་ཏྠཱ་དཱི་ཧི. མེ་ཐུ་ན་སྨཱ ཨ་པེ་ཏོ མེ་ཐུ་ནཱ་པེ་ཏོ, ཨེ་ཝཾ པ་ལཱ་པ་ག་ཏོ, ན་ག་ར་ནི་གྒ་ཏོ, པི་ཎྜ་པཱ་ཏ་པ་ཊི་ཀྐ་ནྟོ, ཀཱ་མ་ཏོ ནི་ཀྑ་ནྟཾ ཀཱ་མ་ནི་ཀྑ་ནྟཾ, རུ་ཀྑ་གྒཱ པ་ཏི་ཏོ རུ་ཀྑ་གྒ་པ་ཏི་ཏོ, སཱ་ས་ན་ཙྩུ་ཏོ, ཨཱ་པ་ཏྟི- ཝུ་ཊྛཱ་ནཾ, དྷ་ར་ཎཱི་ཏ་ལ་གྒ་ཏོ, ས་བྦ་བྷ་ཝེ་ཧི ནི་སྶ་ཊོ ས་བྦ་བྷ་ཝ་ནི་སྶ་ཊོ. བྷ་ཡ་ཏཱ་དི་ཡོ་གེ-རཱ་ཛ་ཏོ བྷ་ཡཾ རཱ་ཛ་བྷ་ཡཾ, ཙོ་ར་བྷ་ཡཾ, ཨ་མ་ནུ་སྶ་བྷ་ཡཾ, ཨ་གྒི་བྷ་ཡཾ, པཱ་པ་བྷཱི་ཏོ, པཱ་པ་བྷཱི་རུ་ཀོ. ཨ་ཀ་ཏྟ་བྦ་ཏོ ཝི་ར་ཏི ཨ་ཀ་ཏྟ་བྦ་ཝི་ར་ཏི, ཨེ་ཝཾ ཀཱ་ཡ་དུ་ཙྩ་རི་ཏ་ཝི་ར་ཏི, ཝ་ཙཱི་དུ་ཙྩ་རི་ཏ་ཝི་ར་ཏི. བ་ནྡྷ་ནཱ མུ་ཏྟོ བ་ནྡྷ་ན་མུ་ཏྟོ, ཝ་ན་མུ་ཏྟོ, བ་ནྡྷ་ན་མོ་ཀྑོ. ཀ་མྨ་ས་མུ་ཊྛི་ཏཾ, ཨུ་ཀྐ་ཊྛུ་ཀྐ་ཊྛཾ, ཨོ་མ་ཀོ་མ་ཀཾ. ཀྭ་ཙི ཝུ་ཏྟི་ཡེ་ཝ, ཀ་མྨ་ཏོ ཛཱ་ཏཾ ཀ་མྨ་ཛཾ, ཨེ་ཝཾ ཙི་ཏྟ་ཛཾ, ཨུ་ཏུ་ཛཾ, ཨཱ་ཧཱ་ར་ཛཾ. ཨི་དྷ ན ཧོ་ཏི ‘པཱ་སཱ་དཱ པ་ཏི་ཏོ’.
ཚ་ཊྛཱི་ཏ་པྤུ་རི་སོ ར་ཉྙོ པུ་ཏྟོ རཱ་ཛ་པུ་ཏྟོ, ཨེ་ཝཾ རཱ་ཛ་པུ་རི་སོ, ཨཱ་ཙ་རི་ཡ་པཱུ་ཛ་ཀོ, བུ་དྡྷ་སཱ་ཝ་ཀོ, བུ་དྡྷ་རཱུ་པཾ, ཛི་ན་ཝ་ཙ་ནཾ, ས་མུ་དྡ་གྷོ་སོ, དྷ་ཉྙཱ་ནཾ རཱ་སི དྷ་ཉྙ་རཱ་སི, པུ་པྥ་ག་ནྡྷོ, ཕ་ལ་ར་སོ, ཀཱ་ཡ་སྶ ལ་ཧུ་ཏཱ ཀཱ་ཡ་ལ་ཧུ་ཏཱ. མ་ར་ཎ་སྶ་ཏི, རུ་ཀྑ་མཱུ་ལཾ, ཨ་ཡ་སྶ པ་ཏྟོ ཨ་ཡོ་པ་ཏྟོ, ཨེ་ཏྠ ‘‘མ་ནཱ་དྱཱ་པཱ་དཱི་ན+མོ མ་ཡེ ཙེ’’ཏི ཨོ. ཨེ་ཝཾ སུ་ཝ་ཎྞ་ཀ་ཊཱ་ཧཾ, པཱ་ནཱི་ཡ་ཐཱ་ལ་ཀཾ, ས་པྤི་ཀུ་མྦྷོ, དེ་ཝཱ་ནཾ རཱ་ཛཱ དེ་ཝ་རཱ་ཛཱ. པུ་མ་སྶ ལི་ངྒཾ པུ་ལླི་ངྒཾ, ‘‘པུཾ པུ་མ་སྶ་ཝཱ’’ཏི པུ་མ་སྶ པུཾ, ནི་གྒ་ཧཱི་ཏ་ལོ་པོ, ལ་སྶ དྭི་བྷཱ་ཝོ ཙ. ཧ་ཏྠི་པ་དཾ, ཨི་ཏྠི་རཱུ་པཾ, བྷི་ཀྑུ་ནི་ས་ངྒྷོ, ཛ་མྦུ་སཱ་ཁཱ, ཨེ་ཏྠ ཨཱི་ཀཱ་རཱུ་ཀཱ་རཱ་ནཾ ར་སྶོ. བ་ཧུ་ལཱ་དྷི་ཀཱ་རཱ ནྟ+མཱ་ན+ནི་དྡྷཱ་རི་ཡ+པཱུ་ར་ཎ+བྷཱ་ཝ+ཏི་ཏྟ་ཏྠེ་ཧི ན ཧོ་ཏི. མ་མཱ+ནུ་ཀུ་བྦཾ, མ་མཱ+ནུ་ཀུ་རུ་མཱ་ནོ, གུ་ནྣཾ ཀ་ཎྷཱ ས་མྤ་ནྣ་ཁཱི་ར་ཏ་མཱ, སི་སྶཱ་ནཾ པ་ཉྩ་མོ, པ་ཊ་སྶ སུ་ཏྟ་ཏཱ. ཀྭ་ཙི ཧོ་ཏེ་ཝ ‘ཝ་ཏྟ་མཱ་ན་སཱ་མཱི་པྱཾ’. བྲཱ་ཧྨ་ཎ་སྶ སུ་ཀྐཱ ད་ནྟཱ་ཏི སཱ་པེ་ཀྑ་ཏཱ་ཡ ན ཧོ་ཏི. ཕ་ལཱ་ནཾ ཏི་ཏྟོ, ཕ་ལཱ་ན+མཱ་སི་ཏོ, ཕ་ལཱ་ནཾ སུ་ཧི་ཏོ. ‘‘བྲཱ་ཧྨ་ཎ་སྶ ཨུ་ཙྩཾ གེ་ཧཾ’’ཏི སཱ་པེ་ཀྑ་ཏཱ་ཡ ན ཧོ་ཏི. ‘‘ར་ཉྙོ པཱ་ཊ་ལི་པུ་ཏྟ་ཀ་སྶ དྷ་ནཾ’’ཏི དྷ་ན་ས་མྦ་ནྡྷེ ཚ་ཊྛཱི་ཏི པཱ་ཊ་ལི་པུ་ཏྟ་ཀེ་ན ས་མྦ་ནྡྷཱ་བྷཱ་ཝཱ ན ཧོ་ཏི. ‘‘ར་ཉྙོ གོ ཙ ཨ་སྶོ ཙ པུ་རི་སོ ཙཱ’’ཏི བྷི་ནྣ་ཏྠ་ཏཱ་ཡ ཝཱ་ཀྱ་མེ་ཝ. ར་ཉྙོ ག་ཝ་སྶ་པུ་རི་སཱ རཱ་ཛ་ག་ཝ་སྶ་པུ་རི་སཱ་ཏི ཝུ་ཏྟི ཧོ་ཏེ་ཝ, ཨེ་ཀ་ཏྠཱི་བྷཱ་ཝཱ. ས་མྦ་ནྡྷཱི་ས་དྡཱ་ནཾ པ་ན ནི་ཙྩ་སཱ་པེ་ཀྑ་ཏྟེ་པི ག་མ་ཀ་ཏྟཱ ས་མཱ་སོ, ག་མ་ཀ་ཏྟ་མྤི ཧི ས་མཱ་ས་སྶ ནི་བ་ནྡྷ་ནཾ, ཡ་ཐཱ དེ་ཝ་ད་ཏྟ་སྶ གུ་རུ་ཀུ་ལཾ, བྷ་ག་ཝ་ཏོ སཱ་ཝ་ཀ་ས་ངྒྷོ་ཏི་ཨཱ་དི.
ས་ཏྟ་མཱི་ཏ་པྤུ་རི་སོ རཱུ་པེ ས་ཉྙཱ རཱུ་པ་ས་ཉྙཱ, ཨེ་ཝཾ རཱུ་པ་ས་ཉྩེ་ཏ་ནཱ, སཾ་སཱ་ར་དུ་ཀྑཾ. ཙ་ཀྑུ་མྷི ས་ནྣི་སྶི་ཏཾ ཝི་ཉྙཱ་ཎཾ ཙ་ཀྑུ་ཝི་ཉྙཱ་ཎཾ. དྷ་མྨེ ར་ཏོ དྷ་མྨ་ར་ཏོ, དྷ་མྨཱ་བྷི་ར་ཏི, དྷ་མྨ་རུ་ཙི, དྷ་མྨ་གཱ་ར་ཝོ, དྷ་མྨེ་སུ ནི་རུ་ཏྟི དྷ་མྨ་ནི་རུ་ཏྟི, དཱ་ནཱ་དྷི་མུ་ཏྟི, བྷ་ཝ་ནྟ་ར་ཀ་ཏཾ. ད་སྶ་ནེ ཨ་སྶཱ་དོ ད་སྶ་ན་སྶཱ་དོ. ཨ་ར་ཉྙེ ཝཱ་སོ ཨ་ར་ཉྙ་ཝཱ་སོ, ཝི་ཀཱ་ལ་བྷོ་ཛ་ནཾ, ཀཱ་ལ་ཝ་སྶཾ, ཝ་ན་པུ་པྥཾ, ཝ་ན་མ་ཧི་སོ, གཱ་མ་སཱུ་ཀ་རོ, ས་མུ་དྡ་མ་ཙྪཱ, ཨཱ་ཝཱ་ཊ་ཀ་ཙྪ་པོ, ཨཱ་ཝཱ་ཊ་མ་ཎྜཱུ་ཀོ, ཀཱུ་པ་མ་ཎྜཱུ་ཀོ, ཏི་ཏྠ་ནཱ་ཝཱ. ཨི་ཏྠཱི་སུ དྷུ་ཏྟོ ཨི་ཏྠི་དྷུ་ཏྟོ, ཨ་ཀྑ་དྷུ་ཏྟོ. ཚཱ་ཡཱ་ཡཾ སུ་ཀྑོ ཚཱ་ཡཱ་སུ་ཀྑོ, ཨ་ངྒཱ་ར་པ་ཀྐཾ, ཙཱ་ར་ཀ་ཝ་ནོ. ཀྭ་ཙི ཝུ་ཏྟི་ཡེ་ཝ, ཝ་ནེ ཙ་ར་ཏཱི་ཏི ཝ་ན་ཙ་ར་ཀོ, ཀུ་ཙྪི་མྷི ས་ཡ་ནྟཱི་ཏི ཀུ་ཙྪི་ས་ཡཱ, ཐ་ལེ ཏི་ཊྛ་ཏཱི་ཏི ཐ་ལ་ཊྛོ, ཛ་ལ་ཊྛོ, པ་བྦ་ཏ་ཊྛོ, མ་གྒ་ཊྛོ. པ་ངྐེ ཛཱ་ཏཾ པ་ངྐ་ཛཾ, ས་རོ་རུ་ཧ+མི་ཙྩཱ་དི. ཨི་དྷ ན ཧོ་ཏི, བྷོ་ཛ་ནེ མ་ཏྟ་ཉྙུ་ཏཱ, ཨི་ནྡྲི་ཡེ་སུ གུ་ཏྟ་དྭཱ་ར་ཏཱ, ཨཱ་ས་ནེ ནི་སི་ནྣོ, ཨཱ་ས་ནེ ནི་སཱི་དི་ཏ་བྦཾ.