པ་ཙྩ་ཡ་ས་བྷཱ་གོ
པ་ཙྩ་ཡ་ས་བྷཱ་གོ ཝུ་ཙྩ་ཏེ. པ་ཉྩ་ད་ས ས་ཧ་ཛཱ་ཏ་ཛཱ་ཏི་ཀཱ ཧོ་ནྟི, ཙ་ཏྟཱ་རོ མ་ཧཱ་ས་ཧ་ཛཱ་ཏཱ ཙ་ཏྟཱ་རོ མ་ཛ྄ཛྷི་མ་ས་ཧ་ཛཱ་ཏཱ ས་ཏྟ ཁུ་དྡ་ཀ་ས་ཧ་ཛཱ་ཏཱ. ཏ་ཏྠ ཙ་ཏྟཱ་རོ མ་ཧཱ་ས་ཧ་ཛཱ་ཏཱ ནཱ་མ ས་ཧ་ཛཱ་ཏོ ས་ཧ་ཛཱ་ཏ་ནི་སྶ་ཡོ ས་ཧ་ཛཱ་ཏ་ཏྠི ས་ཧ་ཛཱ་ཏ ཨ་ཝི་ག་ཏོ. ཙ་ཏྟཱ་རོ མ་ཛ྄ཛྷི་མ་ས་ཧ་ཛཱ་ཏཱ ནཱ་མ ཨ་ཉྙ་མ་ཉྙོ ཝི་པཱ་ཀོ ས་མྤ་ཡུ་ཏྟོ ས་ཧ་ཛཱ་ཏ་ཝི་པྤ་ཡུ་ཏྟོ. ས་ཏྟ ཁུ་དྡ་ཀ་ས་ཧ ཛཱ་ཏཱ ནཱ་མ ཧེ་ཏུ ས་ཧ་ཛཱ་ཏཱ་དྷི་པ་ཏི ས་ཧ་ཛཱ་ཏ་ཀ་མྨཾ ས་ཧ ཛཱ་ཏཱ་ཧཱ་རོ ས་ཧ་ཛཱ་ཏི་ནྡྲི་ཡཾ ཛྷཱ་ནཾ མ་གྒོ.
ཏ་ཡོ རཱུ་པཱ་ཧཱ་རཱ, རཱུ་པཱ་ཧཱ་རོ རཱུ་པཱ་ཧཱ་ར་ཏྠི རཱུ་པཱ་ཧཱ་རཱ ཝི་ག་ཏོ.
ཏཱི་ཎི རཱུ་པ་ཛཱི་ཝི་ཏི་ནྡྲི་ཡཱ་ནི, རཱུ་པ་ཛཱི་ཝི་ཏི་ནྡྲི་ཡཾ རཱུ་པ་ཛཱི་ཝི་ཏི་ནྡྲི་ཡ་ཏྠི རཱུ་པ་ཛཱི་ཝི་ཏི་ནྡྲི་ཡཱ་ཝི་ག་ཏཾ.
ས་ཏྟ་ར་ས པུ་རེ་ཛཱ་ཏ་ཛཱ་ཏི་ཀཱ ཧོ་ནྟི, ཚ ཝ་ཏྠུ་པུ་རེ་ཛཱ་ཏཱ ཚ ཨཱ་ར་མྨ་ཎ་པུ་རེ་ཛཱ་ཏཱ པ་ཉྩ ཝ་ཏྠཱ་ར་མྨ་ཎ་པུ་རེ་ཛཱ་ཏཱ. ཏ་ཏྠ ཚ ཝ་ཏྠུ་པུ་རེ་ཛཱ་ཏཱ ནཱ་མ ཝ་ཏྠུ་པུ་རེ་ཛཱ་ཏོ ཝ་ཏྠུ་པུ་རེ་ཛཱ་ཏ་ནི་སྶ་ཡོ ཝ་ཏྠུ་པུ་རེ་ཛཱ་ཏི་ནྡྲི་ཡཾ ཝ་ཏྠུ་པུ་རེ་ཛཱ་ཏ་ཝི་པྤ་ཡུ་ཏྟཾ ཝ་ཏྠུ་པུ་རེ་ཛཱ་ཏ་ཏྠི ཝ་ཏྠུ པུ་རེ་ཛཱ་ཏ་ཨ་ཝི་ག་ཏོ. ཚ ཨཱ་ར་མྨ་ཎ་པུ་རེ་ཛཱ་ཏཱ ནཱ་མ ཨཱ་ར་མྨ་ཎ པུ་རེ་ཛཱ་ཏོ ཀི་ཉྩི་ཨཱ་ར་མྨ་ཎཾ ཀོ་ཙི ཨཱ་ར་མྨ་ཎཱ་དྷི་པ་ཏི ཀོ་ཙི ཨཱ་ར་མྨ་ཎཱུ་པ་ནི་སྶ་སོ ཨཱ་ར་མྨ་ཎ་པུ་རེ་ཛཱ་ཏ་ཏྠི ཨཱ་ར་མྨ་ཎ་པུ་རེ་ཛཱ་ཏ ཨ་ཝི་ག་ཏོ. ཀི་ཉྩི ཨཱ་ར་མྨ་ཎ་ནྟི་ཨཱ་དཱི་སུ ཀི་ཉྩི་ཀོ་ཙི་ཝ་ཙ་ནེ་ཧི པ་ཙྩུ་པྤ་ནྣཾ ནི་པྥ་ནྣ་རཱུ་པཾ ག་ཡ྄ཧ་ཏི. པ་ཉྩ ཝ་ཏྠཱ་ར་མྨ་ཎ་པུ་རེ་ཛཱ་ཏཱ ནཱ་མ ཝ་ཏྠཱ་ར་མྨ་ཎ པུ་རེ་ཛཱ་ཏོ ཝ་ཏྠཱ་ར་མྨ་ཎ་པུ་རེ་ཛཱ་ཏ་ནི་སྶ་ཡོ ཝ་ཏྠཱ་ར་མྨ་ཎ་པུ་རེ ཛཱ་ཏ ཝི་པྤ་ཡུ་ཏྟོ ཝ་ཏྠཱ་ར་མྨ་ཎ་པུ་རེ་ཛཱ་ཏ་ཏྠི ཝ་ཏྠཱ་ར་མྨ་ཎ་པུ་རེ་ཛཱ་ཏ ཨ་ཝི་ག་ཏོ.
ཙ་ཏྟཱ་རོ པ་ཙྪཱ་ཛཱ་ཏ་ཛཱ་ཏི་ཀཱ ཧོ་ནྟི, པ་ཙྪཱ་ཛཱ་ཏོ པ་ཙྪཱ་ཛཱ་ཏ་ཝི་པྤ་ཡུ་ཏྟོ པ་ཙྪཱ་ཛཱ་ཏ་ཏྠི པ་ཙྪཱ་ཛཱ་ཏ་ཨ་ཝི་ག་ཏོ.
ས་ཏྟ ཨ་ན་ནྟ་རཱ ཧོ་ནྟི, ཨ་ན་ནྟ་རོ ས་མ་ན་ནྟ་རོ ཨ་ན་ནྟ་རཱུ་པ ནི་སྶ་ཡོ ཨཱ་སེ་ཝ་ནཾ ཨ་ན་ནྟ་ར་ཀ་མྨཾ ན་ཏྠི ཝི་ག་ཏོ. ཨེ་ཏྠ ཙ ཨ་ན་ནྟ་ར ཀ་མྨཾ ནཱ་མ ཨ་རི་ཡ་མ་གྒ་ཙེ་ཏ་ནཱ, སཱ ཨ་ཏྟ་ནོ ཨ་ན་ནྟ་རེ ཨ་རི་ཡ་ཕ་ལཾ ཛ་ནེ་ཏི.
པ་ཉྩ ཝི་སུཾ པ་ཙྩ་ཡཱ ཧོ་ནྟི, ཨ་ཝ་སེ་སཾ ཨཱ་ར་མྨ་ཎཾ ཨ་ཝ་སེ་སོ ཨཱ་ར་མྨ་ཎཱ་དྷི་པ་ཏི ཨ་ཝ་སེ་སོ ཨཱ་ར་མྨ་ཎཱུ་པ ནི་སྶ་ཡོ ས་བྦོ པ་ཀ་ཏཱུ་པ་ནི་སྶ་ཡོ ཨ་ཝ་སེ་སཾ ནཱ་ནཱ་ཀྑ་ཎི་ཀ ཀ་མྨཾ. ཨི་ཏི ཝི་ཏྠཱ་ར་ཏོ པ་ཊྛཱ་ན་པ་ཙྩ་ཡཱ ཙ་ཏུ་པ་ཉྙཱ་ས་པྤ་བྷེ་དཱ ཧོ་ནྟཱི་ཏི.
ཏ་ཏྠ ས་བྦེ ས་ཧ་ཛཱ་ཏ་ཛཱ་ཏི་ཀཱ ཙ ས་བྦེ པུ་རེ་ཛཱ་ཏ ཛཱ་ཏི་ཀཱ ས་བྦེ པ་ཙྪཱ་ཛཱ་ཏ་ཛཱ་ཏི་ཀཱ རཱུ་པཱ་ཧཱ་རོ རཱུ་པ་ཛཱི་ཝི་ཏི་ནྡྲི་ཡ་ནྟི ཨི་མེ པ་ཙྩུ་པྤ་ནྣ་པ་ཙྩ་ཡཱ ནཱ་མ. ས་བྦེ ཨ་ན་ནྟ་ར་ཛཱ་ཏི་ཀཱ ས་བྦཾ ནཱ་ནཱ་ཀྑ་ཎི་ཀ ཀ་མྨ་ནྟི ཨི་མེ ཨ་ཏཱི་ཏ་པ་ཙྩ་ཡཱ ནཱ་མ. ཨཱ་ར་མྨ་ཎཾ པ་ཀ་ཏཱུ་པ་ནི་སྶ་ཡོ་ཏི ཨི་མེ ཏེ་ཀཱ་ལི་ཀཱ ཙ ནི་བྦཱ་ན་པ་ཉྙ་ཏྟཱི་ནཾ ཝ་སེ་ན ཀཱ་ལ་ཝི་མུ་ཏྟཱ ཙ ཧོ་ནྟི.
ནི་བྦཱ་ན་ཉྩ པ་ཉྙ་ཏྟི ཙཱ་ཏི ཨི་མེ དྭེ དྷ་མྨཱ ཨ་པྤ་ཙྩ་ཡཱ ནཱ་མ ཨ་ས་ངྑ་ཏཱ ནཱ་མ. ཀ་སྨཱ. ཨ་ཛཱ་ཏི་ཀ་ཏྟཱ. ཡེ་ས་ཉྷི ཛཱ་ཏི ནཱ་མ ཨ་ཏྠི, ཨུ་པྤཱ་དོ ནཱ་མ ཨ་ཏྠི. ཏེ ས་པྤ་ཙྩ་ཡཱ་ནཱ་མ ས་ངྑ་ཏཱ ནཱ་མ པ་ཊི་ཙྩ་ས་མུ་པྤ་ནྣཱ ནཱ་མ. ཨི་མེ དྭེ དྷ་མྨཱ ཨ་ཛཱ་ཏི་ཀ་ཏྟཱ ཨ་ནུ་པྤཱ་ད་ཏྟཱ ཨ་ཛཱ་ཏི་པ་ཙྩ་ཡ་ཏྟཱ་ཙ ཨ་པྤ་ཙྩ་ཡཱ ནཱ་མ ཨ་ས་ངྑ་ཏཱ ནཱ་མཱ་ཏི.
ས་པྤ་ཙྩ་ཡེ་སུ ཙ དྷ་མྨེ་སུ ས་ངྑ་ཏེ་སུ ཨེ་ཀོ་པི དྷ་མྨོ ནི་ཙྩོ དྷུ་ཝོ ས་སྶ་ཏོ ཨ་ཝི་པ་རཱི་ཏ་དྷ་མྨོ ནཱ་མ ན་ཏྠི. ཨ་ཐ ཁོ ས་བྦེ ཏེ ཁ་ཡ་ཊྛེ་ན ཨ་ནི་ཙྩཱ ཨེ་ཝ ཧོ་ནྟི. ཀ་སྨཱ. ས་ཡ་ཉྩ པ་ཙྩ་ཡཱ་ཡ་ཏྟ་ཝུ་ཏྟི ཀ་ཏྟཱ པ་ཙྩ་ཡཱ་ན་ཉྩ ཨ་ནི་ཙྩ་དྷ་མྨ་ཏྟཱ. ན་ནུ ནི་བྦཱ་ན་ཉྩ པ་ཉྙ་ཏྟི ཙ པ་ཙྩ་ཡཱ ཧོ་ནྟི. ཏེ ཙ ནི་ཙྩཱ དྷུ་ཝཱ་ཏི. ས་ཙྩཾ. ཀེ་ཝ་ལེ་ན པ་ན ནི་བྦཱ་ན་པ་ཙྩ་ཡེ་ན ཝཱ པ་ཉྙ་ཏྟི་པ་ཙྩ་ཡེ་ན ཝཱ ཨུ་པྤ་ནྣོ ནཱ་མ ན་ཏྠི, བ་ཧཱུ་ཧི པ་ཙྩ་ཡེ་ཧི ཨེ་ཝ ཨུ་པྤ་ནྣོ, ཏེ པ་ན པ་ཙྩ་ཡཱ ཨ་ནི་ཙྩཱ ཨེ་ཝ ཨ་དྷུ་ཝཱ་ཏི.
ཡེ ཙ དྷ་མྨཱ ཨ་ནི་ཙྩཱ ཧོ་ནྟི, ཏེ ནི་ཙྩ་ཀཱ་ལཾ ས་ཏྟེ ཏི་ཝི་དྷེ་ཧི དུ་ཀྑ་ད་ཎྜེ་ཧི པ་ཊི་པྤཱི་ལེ༹་ནྟི བཱ་དྷེ་ནྟི, ཏ་སྨཱ ཏེ དྷ་མྨཱ བྷ་ཡ་ཊྛེ་ན དུ་ཀྑཱ ཨེ་ཝ ཧོ་ནྟི. ཏ་ཏྠ ཏི་ཝི་དྷཱ དུ་ཀྑ་ད་ཎྜཱ ནཱ་མ དུ་ཀྑ་དུ་ཀྑ་ཏཱ ས་ངྑཱ་ར དུ་ཀྑ་ཏཱ ཝི་པ་རི་ཎཱ་མ་དུ་ཀྑ་ཏཱ.
ཡེ ཀེ་ཙི ཨ་ནི་ཙྩཱ ཨེ་ཝ ཧོ་ནྟི, ཨེ་ཀ་སྨིཾ ཨི་རི་ཡཱ་པ་ཐེ་པི པུ་ན་པྤུ་ནཾ བྷི་ཛྫ་ནྟི, ཏེ ཀ་ཐཾ ཡཱ་ཝ་ཛཱི་ཝཾ ནི་ཙྩ་ས་ཉྙི་ཏཱ་ནཾ ས་ཏྟ་པུ་གྒ་ལཱ་ནཾ ཨ་ཏྟཱ ནཱ་མ བྷ་ཝེ་ཡྻུཾ, སཱ་རཱ ནཱ་མ བྷ་ཝེ་ཡྻུཾ. ཡེ ཙ དུ་ཀྑཱ ཨེ་ཝ ཧོ་ནྟི, ཏེ ཀ་ཐཾ དུ་ཀྑ་པྤ་ཊི་ཀུ་ལཱ་ནཾ སུ་ཁ་ཀཱ་མཱ་ནཾ ས་ཏྟཱ་ནཾ ཨ་ཏྟཱ ནཱ་མ བྷ་ཝེ་ཡྻུཾ, སཱ་རཱ ནཱ་མ བྷ་ཝེ་ཡྻུཾ. ཏ་སྨཱ ཏེ དྷ་མྨཱ ཨ་སཱ་ར་ཀ་ཊྛེ་ན ཨ་ན་ཏྟཱ ཨེ་ཝ ཧོ་ནྟི.
ཨ་པི ཙ ཡ་སྨཱ ཨི་མཱ་ཡ ཙ་ཏུ་ཝཱི་ས་ཏི་ཡཱ པ་ཙྩ་ཡ་དེ་ས་ནཱ་ཡ ཨི་མ་མ་ཏྠཾ ད་སྶེ་ཏི. ས་བྦེ་པི ས་ངྑ་ཏ་དྷ་མྨཱ ནཱ་མ པ་ཙྩ་ཡཱ་ཡ་ཏྟ་ཝུ་ཏྟི་ཀཱ ཨེ་ཝ ཧོ་ནྟི, ས་ཏྟཱ་ནཾ ཝ་སཱ་ཡ་ཏྟ་ཝུ་ཏྟི་ཀཱ ན ཧོ་ནྟི. པ་ཙྩ་ཡཱ་ཡ་ཏྟ ཝུ་ཏྟི་ཀེ་སུ ཙ ཏེ་སུ ན ཨེ་ཀོ་པི དྷ་མྨོ ཨ་པྤ་ཀེ་ན པ་ཙྩ་ཡེ་ན ཨུ་པྤ་ཛྫ་ཏི. ཨ་ཐ ཁོ བ་ཧཱུ་ཧི ཨེ་ཝ པ་ཙྩ་ཡེ་ཧི ཨུ་པྤ་ཛྫ་ཏཱི་ཏི, ཏ་སྨཱ ཨ་ཡཾ དེ་ས་ནཱ དྷ་མྨཱ་ནཾ ཨ་ན་ཏྟ་ལ་ཀྑ་ཎ་དཱི་པ་ནེ མ་ཏྠ་ཀ་པ་ཏྟཱ ཧོ་ཏཱི་ཏི.
པ་ཙྩ་ཡ་ས་བྷཱ་ག་ས་ངྒ་ཧོ ནི་ཊྛི་ཏོ.
པ་ཙྩ་ཡ་གྷ་ཊ་ནཱ་ན་ཡོ
པ་ཉྩ་ཝི་ཉྙཱ་ཎེ་སུ པ་ཙྩ་ཡ་གྷ་ཊ་ནཱ་ན་ཡོ
པ་ཙྩ་ཡ་གྷ་ཊ་ནཱ་ན་ཡོ ཝུ་ཙྩ་ཏེ. ཨེ་ཀེ་ཀ་སྨིཾ པ་ཙྩ་ཡུ་པྤ་ནྣེ བ་ཧུ་ནྣཾ པ་ཙྩ་ཡཱ་ནཾ ས་མོ་དྷཱ་ནཾ པ་ཙྩ་ཡ་གྷ་ཊ་ནཱ ནཱ་མ. ཡེ་ན པ་ན དྷ་མྨཱ ས་པྤ་ཙྩ་ཡཱ ས་ངྑ་ཏཱ པ་ཊི་ཙྩ་ས་མུ་པྤ་ནྣཱ་ཏི ཝུ་ཙྩ་ནྟི, ས་བྦེ ཏེ དྷ་མྨཱ ཨུ་པྤཱ་དེ ཙ ཋི་ཏི་ཡ་ཉྩ ཨི་མེ་ཧི ཙ་ཏུ་ཝཱི་ས་ཏི་ཡཱ པ་ཙྩ་ཡེ་ཧི ས་ཧི་ཏ་ཏྟཱ ས་པྤ་ཙྩ་ཡཱ ནཱ་མ, ས་པྤ་ཙྩ་ཡ་ཏྟཱ ས་ངྑ་ཏཱ ནཱ་མ, ས་ངྑ་ཏ་ཏྟཱ པ་ཊི་ཙྩ་ས་མུ་པྤ་ནྣཱ ནཱ་མ. ཀ་ཏ་མེ པ་ན ཏེ དྷ་མྨཱ་ཏི. ཨེ་ཀ་ཝཱི་ས་ས་ཏ་ཙི་ཏྟཱ་ནི ཙ དྭི་པ་ཉྙཱ་ས་ཙེ་ཏ་སི་ཀཱ་ནི ཙ ཨ་ཊྛ་ཝཱི་ས་ཏི རཱུ་པཱ་ནི ཙ.
ཏ་ཏྠ ཨེ་ཀ་ཝཱི་ས་ས་ཏ་ཙི་ཏྟཱ་ནི དྷཱ་ཏུ་ཝ་སེ་ན ས་ཏྟ་ཝི་དྷཱ་ནི བྷ་ཝ་ནྟི, ཙ་ཀྑུ ཝི་ཉྙཱ་ཎ་དྷཱ་ཏུ སོ་ཏ་ཝི་ཉྙཱ་ཎ་དྷཱ་ཏུ གྷཱ་ན་ཝི་ཉྙཱ་ཎ་དྷཱ་ཏུ ཛི་ཝ྄ཧཱ ཝི་ཉྙཱ་ཎ་དྷཱ་ཏུ ཀཱ་ཡ་ཝི་ཉྙཱ་ཎ་དྷཱ་ཏུ མ་ནོ་དྷཱ་ཏུ མ་ནོ་ཝི་ཉྙཱ་ཎ དྷཱ་ཏཱུ་ཏི. ཏ་ཏྠ ཙ་ཀྑུ་ཝི་ཉྙཱ་ཎ་དྭ་ཡཾ ཙ་ཀྑུ་ཝི་ཉྙཱ་ཎ་དྷཱ་ཏུ ནཱ་མ. སོ་ཏ་ཝི་ཉྙཱ་ཎ་དྭ་ཡཾ སོ་ཏ་ཝི་ཉྙཱ་ཎ་དྷཱ་ཏུ ནཱ་མ. གྷཱ་ན་ཝི་ཉྙཱ་ཎ་དྭ་ཡཾ གྷཱ་ན་ཝི་ཉྙཱ་ཎ་དྷཱ་ཏུ ནཱ་མ. ཛི་ཝ྄ཧཱ་ཝི་ཉྙཱ་ཎ་དྭ་ཡཾ ཛི་ཝ྄ཧཱ་ཝི་ཉྙཱ་ཎ་དྷཱ་ཏུ ནཱ་མ. ཀཱ་ཡ་ཝི་ཉྙཱ་ཎ་དྭ་ཡཾ ཀཱ་ཡ་ཝི་ཉྙཱ་ཎ་དྷཱ་ཏུ ནཱ་མ. པ་ཉྩ་དྭཱ་རཱ་ཝ་ཛྫ་ན ཙི་ཏྟ་ཉྩ ས་མྤ་ཊི་ཙྪ་ན་ཙི་ཏྟ་དྭ་ཡ་ཉྩ མ་ནོ་དྷཱ་ཏུ ནཱ་མ. སེ་སཱ་ནི ཨ་ཊྛ་ས་ཏཾ ཙི་ཏྟཱ་ནི མ་ནོ་ཝི་ཉྙཱ་ཎ་དྷཱ་ཏུ ནཱ་མ.
དྭི་པ་ཉྙཱ་ས་ཙེ་ཏ་སི་ཀཱ་ནི ཙ རཱ་སི་ཝ་སེ་ན ཙ་ཏུ་བྦི་དྷཱ་ནི བྷ་ཝ་ནྟི, ས་ཏྟ ས་བྦ་ཙི་ཏྟི་ཀཱ་ནི ཙ ཚ པ་ཀི་ཎྞ་ཀཱ་ནི ཙ ཙུ་དྡ་ས པཱ་པཱ་ནི་ཙ པ་ཉྩ་ཝཱི་ས་ཏི ཀ་ལྱཱ་ཎཱ་ནི ཙ.
ཙ་ཏུ་ཝཱི་ས་ཏི་པ་ཙྩ་ཡེ་སུ ཙ པ་ནྣ་ར་ས་པ་ཙྩ་ཡཱ ས་བྦ་ཙི་ཏྟུ་པྤཱ་ད སཱ་དྷཱ་ར་ཎཱ ཧོ་ནྟི, ཨཱ་ར་མྨ་ཎ་ཉྩ ཨ་ན་ནྟ་ར་ཉྩ ས་མ་ན་ནྟ་ར་ཉྩ ས་ཧ ཛཱ་ཏོ ཙ ཨ་ཉྙ་མ་ཉྙ་ཉྩ ནི་སྶ་ཡོ ཙ ཨུ་པ་ནི་སྶ་ཡོ ཙ ཀ་མྨ་ཉྩ ཨཱ་ཧཱ་རོ ཙ ཨི་ནྡྲི་ཡ་ཉྩ ས་མྤ་ཡུ་ཏྟོ ཙ ཨ་ཏྠི ཙ ན་ཏྠི ཙ ཝི་ག་ཏོ ཙ ཨ་ཝི་ག་ཏོ ཙ. ན ཧི ཀི་ཉྩི ཙི་ཏྟཾ ཝཱ ཙེ་ཏ་སི་ཀཾ ཝཱ ཨཱ་ར་མྨ་ཎེ་ན ཝི་ནཱ ཨུ་པྤ་ནྣཾ ནཱ་མ ཨ་ཏྠི. ཏ་ཐཱ ཨ་ན་ནྟ་རཱ་དཱི་ཧི ཙ. ཨ་ཊྛ་པ་ཙྩ་ཡཱ ཀེ་ས་ཉྩི ཙི་ཏྟུ་པྤཱ་དཱ་ནཾ པ་ཙྩ་ཡཱ སཱ་དྷཱ་ར་ཎཱ ཧོ་ནྟི, ཧེ་ཏུ ཙ ཨ་དྷི་པ་ཏི ཙ པུ་རེ ཛཱ་ཏོ ཙ ཨཱ་སེ་ཝ་ན་ཉྩ ཝི་པཱ་ཀོ ཙ ཛྷཱ་ན་ཉྩ མ་གྒོ ཙ ཝི་པྤ་ཡུ་ཏྟོ ཙ. ཏ་ཏྠ ཧེ་ཏུ ས་ཧེ་ཏུ་ཀ་ཙི་ཏྟུ་པྤཱ་དཱ་ནཾ ཨེ་ཝ སཱ་དྷཱ་ར་ཎཱ, ཨ་དྷི་པ་ཏི ཙ སཱ་དྷི་པ་ཏི་ཛ་ཝ་ནཱ་ནཾ ཨེ་ཝ, པུ་རེ་ཛཱ་ཏོ ཙ ཀེ་ས་ཉྩི ཙི་ཏྟུ་པྤཱ་དཱ་ནཾ ཨེ་ཝ, ཨཱ་སེ་ཝ་ན་ཉྩ ཀུ་ས་ལཱ་ཀུ་ས་ལ་ཀི་རི་ཡ་ཛ་ཝ་ནཱ་ནཾ ཨེ་ཝ, ཝི་པཱ་ཀོ ཙ ཝི་པཱ་ཀ་ཙི་ཏྟུ་པྤཱ་དཱ་ནཾ ཨེ་ཝ, ཛྷཱ་ན་ཉྩ མ་ནོ་དྷཱ་ཏུ མ་ནོ་ཝི་ཉྙཱ་ཎ་དྷཱ་ཏུ ཙི་ཏྟུ་པྤཱ་དཱ་ནཾ ཨེ་ཝ, མ་གྒོ ཙ ས་ཧེ་ཏུ་ཀ་ཙི་ཏྟུ་པྤཱ་དཱ་ནཾ ཨེ་ཝ, ཝི་པྤ་ཡུ་ཏྟོ ཙ ཨ་རཱུ་པ་ལོ་ཀེ ཙི་ཏྟུ་པྤཱ་དཱ་ནཾ ན་ཏྠི, ཨེ་ཀོ པ་ཙྪཱ་ཛཱ་ཏོ རཱུ་པ་དྷ་མྨཱ་ནཾ ཨེ་ཝ ཝི་སུཾ་བྷཱུ་ཏོ ཧོ་ཏི.
ཏ་ཏྲཱ་ཡཾ དཱི་པ་ནཱ. ས་ཏྟ ས་བྦ་ཙི་ཏྟི་ཀཱ་ནི ཙེ་ཏ་སི་ཀཱ་ནི ནཱ་མ, ཕ་སྶོ ཝེ་ད་ནཱ ས་ཉྙཱ ཙེ་ཏ་ནཱ ཨེ་ཀ་གྒ་ཏཱ ཛཱི་ཝི་ཏཾ མ་ན་སི་ཀཱ་རོ. ཏ་ཏྠ ཙི་ཏྟཾ ཨ་དྷི་པ་ཏི་ཛཱ་ཏི་ཀ་ཉྩ ཨཱ་ཧཱ་ར་པ་ཙྩ་ཡོ ཙ ཨི་ནྡྲི་ཡ་པ་ཙྩ་ཡོ ཙ. ཕ་སྶོ ཨཱ་ཧཱ་ར་པ་ཙྩ་ཡོ. ཝེ་ད་ནཱ ཨི་ནྡྲི་ཡ་པ་ཙྩ་ཡོ ཙ ཛྷཱ་ན པ་ཙྩ་ཡོ ཙ. ཙེ་ཏ་ནཱ ཀ་མྨ་པ་ཙྩ་ཡོ ཙ ཨཱ་ཧཱ་ར་པ་ཙྩ་ཡོ ཙ. ཨེ་ཀ་གྒ་ཏཱ ཨི་ནྡྲི་ཡ་པ་ཙྩ་ཡོ ཙ ཛྷཱ་ན པ་ཙྩ་ཡོ ཙ མ་གྒ་པ་ཙྩ་ཡོ ཙ. ཛཱི་ཝི་ཏཾ ཨི་ནྡྲི་ཡ་པ་ཙྩ་ཡོ. སེ་སཱ དྭེ དྷ་མྨཱ ཝི་སེ་ས་པ་ཙྩ་ཡཱ ན ཧོ་ནྟི.
ཙ་ཀྑུ་ཝི་ཉྙཱ་ཎེ ས་ཏྟ ས་བྦ་ཙི་ཏྟི་ཀཱ་ནི ཙེ་ཏ་སི་ཀཱ་ནི ལ་བྦྷ་ནྟི, ཝི་ཉྙཱ་ཎེ་ན ས་དྡྷིཾ ཨ་ཊྛ ནཱ་མ་དྷ་མྨཱ ཧོ་ནྟི. ས་བྦེ ཏེ དྷ་མྨཱ ས་ཏྟ་ཧི པ་ཙྩ་ཡེ་ཧི ཨ་ཉྙ་མ་ཉྙ་སྶ པ་ཙྩ་ཡཱ ཧོ་ནྟི ཙ་ཏཱུ་ཧི མ་ཧཱ་ས་ཧ་ཛཱ་ཏེ་ཧི ཙ ཝི་པྤ་ཡུ་ཏྟ་ཝ་ཛྫི་ཏེ་ཧི ཏཱི་ཧི མ་ཛ྄ཛྷི་མ་ས་ཧ་ཛཱ་ཏེ་ཧི ཙ. ཏེ་སྭེ་ཝ ཨ་ཊྛ་སུ དྷ་མྨེ་སུ ཝི་ཉྙཱ་ཎཾ སེ་སཱ་ནཾ ས་ཏྟ་ནྣཾ དྷ་མྨཱ་ནཾ ཨཱ་ཧཱ་ར་པ་ཙྩ་ཡེ་ན ཙ ཨི་ནྡྲི་ཡ་པ་ཙྩ་ཡེ་ན ཙ པ་ཙྩ་ཡོ ཧོ་ཏི. ཕ་སྶོ ཨཱ་ཧཱ་ར་པ་ཙྩ་ཡེ་ན, ཝེ་ད་ནཱ ཨི་ནྡྲི་ཡ་པ་ཙྩ་ཡ་མ་ཏྟེ་ན, ཙེ་ཏ་ནཱ ཀ་མྨ་པ་ཙྩ་ཡེ་ན ཙ ཨཱ་ཧཱ་ར པ་ཙྩ་ཡེ་ན ཙ, ཨེ་ཀ་གྒ་ཏཱ ཨི་ནྡྲི་ཡ་པ་ཙྩ་ཡ་མ་ཏྟེ་ན, ཛཱི་ཝི་ཏཾ སེ་སཱ་ནཾ ས་ཏྟ་ནྣཾ དྷ་མྨཱ་ནཾ ཨི་ནྡྲི་ཡ་པ་ཙྩ་ཡེ་ན པ་ཙྩ་ཡོ ཧོ་ཏི. ཙ་ཀྑུ་ཝ་ཏྠུ་རཱུ་པཾ པ་ན ཏེ་སཾ ཨ་ཊྛ་ནྣཾ དྷ་མྨཱ་ནཾ ཚ་ཧི ཝ་ཏྠུ་པུ་རེ་ཛཱ་ཏེ་ཧི ཏ་སྨིཾ ཙ་ཀྑུ་ཝ་ཏྠུ་མྷི ཨཱ་པཱ་ཏ་མཱ་ག་ཏཱ་ནི པ་ཙྩུ་པྤ་ནྣཱ་ནི རཱུ་པཱ་ར་མྨ་ཎཱ་ནི ཏེ་སཾ ཙ་ཏཱུ་ཧི ཨཱ་ར་མྨ་ཎ པུ་རེ་ཛཱ་ཏེ་ཧི, ཨ་ན་ནྟ་ར་ནི་རུ་དྡྷཾ པ་ཉྩ་དྭཱ་རཱ་ཝ་ཛྫ་ན་ཙི་ཏྟ་ཉྩ པ་ཉྩ་ཧི ཨ་ན་ནྟ་རེ་ཧི, པུ་བྦེ ཀ་ཏཾ ཀུ་ས་ལ་ཀ་མྨཾ ཝཱ ཨ་ཀུ་ས་ལ་ཀ་མྨཾ ཝཱ ཀུ་ས་ལ་ཝི་པཱ་ཀཱ་ནཾ ཝཱ ཨ་ཀུ་ས་ལ་ཝི་པཱ་ཀཱ་ནཾ ཝཱ ཏེ་སཾ ནཱ་ནཱ་ཀྑ་ཎི་ཀ་ཀ་མྨ་པ་ཙྩ་ཡེ་ན, ཀ་མྨ ས་ཧཱ་ཡ་བྷཱུ་ཏཱ་ནི པུ་རི་མ་བྷ་ཝེ ཨ་ཝི་ཛྫཱ་ཏ་ཎྷཱུ་པཱ་དཱ་ནཱ་ནི ཙ ཨི་མ་སྨིཾ བྷ་ཝེ ཨཱ་ཝཱ་ས་པུ་གྒ་ལ་ཨུ་ཏུ་བྷོ་ཛ་ནཱ་ད་ཡོ ཙ ཏེ་སཾ ཨ་ཊྛ་ནྣཾ དྷ་མྨཱ་ནཾ པ་ཀ་ཏཱུ་པ་ནི་སྶ་ཡ་པ་ཙྩ་ཡེ་ན པ་ཙྩ་ཡཱ ཧོ་ནྟི. ཨི་མ་སྨིཾ ཙི་ཏྟེ ཧེ་ཏུ ཙ ཨ་དྷི་པ་ཏི ཙ པ་ཙྪཱ་ཛཱ་ཏོ ཙ ཨཱ་སེ་ཝ་ན་ཉྩ ཛྷཱ་ན་ཉྩ མ་གྒོ་ཙཱ་ཏི ཚ་པ་ཙྩ་ཡཱ ན ལ་བྦྷ་ནྟི, ཨ་ཊྛཱ་ར་ས་པ་ཙྩ་ཡཱ ལ་བྦྷ་ནྟི. ཡ་ཐཱ ཙ ཨི་མ་སྨིཾ ཙི་ཏྟེ, ཏ་ཐཱ སོ་ཏ་ཝི་ཉྙཱ་ཎཱ་དཱི་སུ་པི ཚ པ་ཙྩ་ཡཱ ན ལ་བྦྷ་ནྟི, ཨ་ཊྛཱ་ར་ས་པ་ཙྩ་ཡཱ ལ་བྦྷ་ནྟཱི་ཏི.
པ་ཉྩ་ཝི་ཉྙཱ་ཎེ་སུ པ་ཙྩ་ཡ་གྷ་ཊ་ནཱ་ན་ཡོ ནི་ཊྛི་ཏོ.
ཨ་ཧེ་ཏུ་ཀ ཙི་ཏྟུ་པྤཱ་དེ་སུ པ་ཙྩ་ཡ་གྷ་ཊ་ནཱ་ན་ཡོ
ཚ པ་ཀི་ཎྞ་ཀཱ་ནི ཙེ་ཏ་སི་ཀཱ་ནི ནཱ་མ, ཝི་ཏ་ཀྐོ ཝི་ཙཱ་རོ ཨ་དྷི་མོ་ཀྑོ ཝཱི་རི་ཡཾ པཱི་ཏི ཚ་ནྡོ. ཏ་ཏྠ ཝི་ཏ་ཀྐོ ཛྷཱ་ན་པ་ཙྩ་ཡོ ཙ མ་གྒ་པ་ཙྩ་ཡོ ཙ. ཝི་ཙཱ་རོ ཛྷཱ་ན་པ་ཙྩ་ཡོ. ཝཱི་རི་ཡཾ ཨ་དྷི་པ་ཏི་ཛཱ་ཏི་ཀ་ཉྩ ཨི་ནྡྲི་ཡ་པ་ཙྩ་ཡོ ཙ མ་གྒ་པ་ཙྩ་ཡོ ཙ. པཱི་ཏི ཛྷཱ་ན་པ་ཙྩ་ཡོ. ཚ་ནྡོ ཨ་དྷི་པ་ཏི་ཛཱ་ཏི་ཀོ. ཨ་དྷི་མོ་ཀྑོ པ་ན ཝི་སེ་ས་པ་ཙྩ་ཡོ ན ཧོ་ཏི.
པ་ཉྩ་དྭཱ་རཱ་ཝ་ཛྫ་ན་ཙི་ཏྟ་ཉྩ ས་མྤ་ཊི་ཙྪ་ན་ཙི་ཏྟ་དྭ་ཡ་ཉྩ ཨུ་པེ་ཀྑཱ་ས་ནྟཱི་ར་ཎ དྭ་ཡ་ཉྩཱ་ཏི པ་ཉྩ་སུ ཙི་ཏྟེ་སུ ད་ས ཙེ་ཏ་སི་ཀཱ་ནི ལ་བྦྷ་ནྟི, ས་ཏྟ ས་བྦ ཙི་ཏྟི་ཀཱ་ནི ཙ པ་ཀི་ཎྞ་ཀེ་སུ ཝི་ཏ་ཀྐོ ཙ ཝི་ཙཱ་རོ ཙ ཨ་དྷི་མོ་ཀྑོ ཙ. ཝི་ཉྙཱ་ཎེ་ན ས་དྡྷིཾ པ་ཙྩེ་ཀཾ ཨེ་ཀཱ་ད་ས ནཱ་མ་དྷ་མྨཱ ཧོ་ནྟི. ཨི་མེ་སུ ཙི་ཏྟེ་སུ ཛྷཱ་ན་ཀི་ཙྩཾ ལ་བྦྷ་ཏི. ཝེ་ད་ནཱ ཙ ཨེ་ཀ་གྒ་ཏཱ ཙ ཝི་ཏ་ཀྐོ ཙ ཝི་ཙཱ་རོ ཙ ཛྷཱ་ན་པ་ཙྩ་ཡཾ སཱ་དྷེ་ནྟི. པ་ཉྩ་དྭཱ་རཱ་ཝ་ཛྫ་ན་ཙི་ཏྟཾ པ་ན ཀི་རི་ཡ་ཙི་ཏྟཾ ཧོ་ཏི, ཝི་པཱ་ཀ་པ་ཙྩ་ཡོ ན་ཏྠི. ནཱ་ནཱ་ཀྑ་ཎི་ཀ་ཀ་མྨ་ཉྩ ཨུ་པ་ནི་སྶ་ཡ་ཊྛཱ་ནེ ཏི་ཊྛ་ཏི. ཝི་པཱ་ཀ་པ་ཙྩ་ཡེ་ན ས་དྡྷིཾ ཚ པ་ཙྩ་ཡཱ ན ལ་བྦྷ་ནྟི. ཛྷཱ་ན་པ་ཙྩ་ཡེ་ན ས་དྡྷིཾ ཨ་ཊྛཱ་ར་ས་པ་ཙྩ་ཡཱ ལ་བྦྷ་ནྟི. སེ་སེ་སུ ཙ་ཏཱུ་སུ ཝི་པཱ་ཀ་ཙི་ཏྟེ་སུ པ་ཉྩ པ་ཙྩ་ཡཱ ན ལ་བྦྷ་ནྟི. ཝི་པཱ་ཀ་པ་ཙྩ་ཡེ་ན ཙ ཛྷཱ་ན་པ་ཙྩ་ཡེ་ན ཙ ས་དྡྷིཾ ཨེ་ཀཱུ་ན་ཝཱི་ས་ཏི པ་ཙྩ་ཡཱ ལ་བྦྷ་ནྟི.
སོ་མ་ན་སྶ་ས་ནྟཱི་ར་ཎེ པཱི་ཏི་ཡཱ ས་དྡྷིཾ ཨེ་ཀཱ་ད་ས་ཙེ་ཏ་སི་ཀཱ ཡུ་ཛྫ་ནྟི, མ་ནོ་དྭཱ་རཱ་ཝ་ཛྫ་ན་ཙི་ཏྟེ ཙ ཝཱི་རི་ཡེ་ན ས་དྡྷིཾ ཨེ་ཀཱ་ད་སཱ་ཏི ཝི་ཉྙཱ་ཎེ་ན ས་དྡྷིཾ དྭཱ་ད་ས ནཱ་མ་དྷ་མྨཱ ཧོ་ནྟི. ཧ་སི་ཏུ་པྤཱ་ད་ཙི་ཏྟེ པ་ན པཱི་ཏི་ཡཱ ཙ ཝཱི་རི་ཡེ་ན ཙ ས་དྡྷིཾ དྭཱ་ད་ས ཙེ་ཏ་སི་ཀཱ་ནི ཡུ་ཛྫ་ནྟི. ཝི་ཉྙཱ་ཎེ་ན ས་དྡྷིཾ ཏེ་ར་ས ནཱ་མ་དྷ་མྨཱ ཧོ་ནྟི. ཏ་ཏྠ སོ་མ་ན་སྶ་ས་ནྟཱི་ར་ཎེ ཛྷཱ་ན་ངྒེ་སུ པཱི་ཏི་མ་ཏྟཾ ཨ་དྷི་ཀཾ ཧོ་ཏི, པུ་བྦེ ཨུ་པེ་ཀྑཱ་ས་ནྟཱི་ར་ཎ་དྭ་ཡེ ཝི་ཡ པ་ཉྩ་པ་ཙྩ་ཡཱ ན ལ་བྦྷ་ནྟི. ཨེ་ཀཱུ་ན་ཝཱི་ས་ཏི་པ་ཙྩ་ཡཱ ལ་བྦྷ་ནྟི. མ་ནོ་དྭཱ་རཱ ཝ་ཛྫ་ན་ཙི་ཏྟེ ཙ ཝཱི་རི་ཡ་མ་ཏྟཾ ཨ་དྷི་ཀཾ ཧོ་ཏི, ཏ་ཉྩ ཨི་ནྡྲི་ཡ་ཀི་ཙྩ ཛྷཱ་ན ཀི་ཙྩཱ་ནི་སཱ་དྷེ་ཏི. ཨ་དྷི་པ་ཏི་ཀི་ཙྩ་ཉྩ མ་གྒ་ཀི་ཙྩ་ཉྩ ན སཱ་དྷེ་ཏི. ཀི་རི་ཡ ཙི་ཏྟ་ཏྟཱ་ཝི་པཱ་ཀ་པ་ཙྩ་ཡོ ཙ ན་ཏྠི. པུ་བྦེ པ་ཉྩ་དྭཱ་རཱ་ཝ་ཛྫ་ན་ཙི་ཏྟེ ཝི་ཡ ཝི་པཱ་ཀ པ་ཙྩ་ཡེ་ན ས་དྡྷིཾ ཚ པ་ཙྩ་ཡཱ ན ལ་བྦྷ་ནྟི. ཛྷཱ་ན་པ་ཙྩ་ཡེ་ན ས་དྡྷིཾ ཨ་ཊྛ་ར་ས པ་ཙྩ་ཡཱ ལ་བྦྷ་ནྟི. ཧ་སི་ཏུ་པྤཱ་ད་ཙི་ཏྟེ་པི ཀི་རི་ཡ་ཙི་ཏྟ་ཏྟཱ ཝི་པཱ་ཀ་པ་ཙྩ་ཡོ ན་ཏྠི, ཛ་ཝ་ན་ཙི་ཏྟ་ཏྟཱ པ་ན ཨཱ་སེ་ཝ་ནཾ ཨ་ཏྠི, ཝི་པཱ་ཀ་པ་ཙྩ་ཡེ་ན ས་དྡྷིཾ པ་ཉྩ པ་ཙྩ་ཡཱ ན ལ་བྦྷ་ནྟི. ཨཱ་སེ་ཝ་ན་པ་ཙྩ་ཡེ་ན ས་དྡྷིཾ ཨེ་ཀཱུ་ན་ཝཱི་ས་ཏི པ་ཙྩ་ཡཱ ལ་བྦྷ་ནྟི.
ཨ་ཧེ་ཏུ་ཀ་ཙི་ཏྟུ་པྤཱ་དེ་སུ པ་ཙྩ་ཡ་གྷ་ཊ་ནཱ་ན་ཡོ ནི་ཊྛི་ཏོ.
ཨ་ཀུ་ས་ལ་ཙི་ཏྟུ་པྤཱ་དེ་སུ པ་ཙྩ་ཡ་གྷ་ཊ་ནཱ་ན་ཡོ
དྭཱ་ད་ས ཨ་ཀུ་ས་ལ་ཙི་ཏྟཱ་ནི, དྭེ མོ་ཧ་མཱུ་ལི་ཀཱ་ནི ཨ་ཊྛ ལོ་བྷ མཱུ་ལི་ཀཱ་ནི དྭེ དོ་ས་མཱུ་ལི་ཀཱ་ནི. ཙུ་དྡ་ས པཱ་པ་ཙེ་ཏ་སི་ཀཱ་ནི ནཱ་མ མོ་ཧོ ཨ་ཧི་རི་ཀཾ ཨ་ནོ་ཏྟ་པྤཾ ཨུ་དྡྷ་ཙྩ་ནྟི ཨི་དཾ མོ་ཧ་ཙ་ཏུ་ཀྐཾ ནཱ་མ. ལོ་བྷོ དི་ཊྛི མཱ་ནོ་ཏི ཨི་དཾ ལོ་བྷ་ཏི་ཀྐཾ ནཱ་མ. དོ་སོ ཨི་སྶཱ མ་ཙྪ་རི་ཡཾ ཀུ་ཀྐུ་ཙྩ་ནྟི ཨི་དཾ དོ་ས་ཙ་ཏུ་ཀྐཾ ནཱ་མ. ཐི་ནཾ མི་དྡྷཾ ཝི་ཙི་ཀི་ཙྪཱ་ཏི ཨི་དཾ ཝི་སུཾ ཏི་ཀྐཾ ནཱ་མ.
ཏ་ཏྠ ལོ་བྷོ དོ་སོ མོ་ཧོ་ཏི ཏ་ཡོ མཱུ་ལ་དྷ་མྨཱ ཧེ་ཏུ་པ་ཙྩ་ཡཱ, དི་ཊྛི མ་གྒ་པ་ཙྩ་ཡོ, སེ་སཱ ད་ས་དྷ་མྨཱ ཝི་སེ་ས་པ་ཙྩ་ཡཱ ན ཧོ་ནྟི.
ཏ་ཏྠ དྭེ མོ་ཧ་མཱུ་ལི་ཀཱ་ནི ནཱ་མ ཝི་ཙི་ཀི་ཙྪཱ་ས་མྤ་ཡུ་ཏྟ་ཙི་ཏྟཾ ཨུ་དྡྷ་ཙྩ ས་མྤ་ཡུ་ཏྟ་ཙི་ཏྟཾ. ཏ་ཏྠ ཝི་ཙི་ཀི་ཙྪཱ་ས་མྤ་ཡུ་ཏྟ་ཙི་ཏྟེ པ་ནྣ་ར་ས ཙེ་ཏ་སི་ཀཱ་ནི ཨུ་པྤ་ཛྫ་ནྟི ས་ཏྟ ས་བྦ་ཙི་ཏྟི་ཀཱ་ནི ཙ ཝི་ཏ་ཀྐོ ཝི་ཙཱ་རོ ཝཱི་རི་ཡ་ནྟི ཏཱི་ཎི པ་ཀི་ཎྞ་ཀཱ་ནི ཙ པཱ་པ་ཙེ་ཏ་སི་ཀེ་སུ མོ་ཧ་ཙ་ཏུ་ཀྐ་ཉྩ ཝི་ཙི་ཀི་ཙྪཱ ཙཱ་ཏི, ཙི་ཏྟེ་ན ས་དྡྷིཾ སོ་ལ༹་ས ནཱ་མ་དྷ་མྨཱ ཧོ་ནྟི. ཨི་མ་སྨིཾ ཙི་ཏྟེ ཧེ་ཏུ པ་ཙྩ་ཡོ་པི མ་གྒ་པ་ཙྩ་ཡོ་པི ལ་བྦྷ་ནྟི. ཏ་ཏྠ མོ་ཧོ ཧེ་ཏུ་པ་ཙྩ་ཡོ, ཝི་ཏ་ཀྐོ ཙ ཝཱི་རི་ཡ་ཉྩ མ་གྒ་པ་ཙྩ་ཡོ, ཨེ་ཀ་གྒ་ཏཱ པ་ན ཝི་ཙི་ཀི་ཙྪཱ་ཡ དུ་ཊྛ་ཏྟཱ ཨི་མ་སྨིཾ ཙི་ཏྟེ ཨི་ནྡྲི་ཡ་ཀི་ཙྩ་ཉྩ མ་གྒ་ཀི་ཙྩ་ཉྩ ན སཱ་དྷེ་ཏི, ཛྷཱ་ན་ཀི་ཙྩ་མ་ཏྟཾ སཱ་དྷེ་ཏི. ཨ་དྷི་པ་ཏི ཙ པ་ཙྪཱ་ཛཱ་ཏོ ཝི་པཱ་ཀོ ཙཱ་ཏི ཏ་ཡོ པ་ཙྩ་ཡཱ་ན ལ་བྦྷ་ནྟི, སེ་སཱ ཨེ་ཀ་ཝཱི་ས་ཏི་པ་ཙྩ་ཡཱ ལ་བྦྷ་ནྟི. ཨུ་དྡྷ་ཙྩ་ས་མྤ་ཡུ་ཏྟ་ཙི་ཏྟེ་པི ཝི་ཙི་ཀི་ཙྪཾ པ་ཧཱ་ཡ ཨ་དྷི་མོ་ཀྑེ་ན ས་དྡྷིཾ པ་ནྣ་ར་སེ་ཝ ཙེ་ཏ་སི་ཀཱ་ནི, སོ་ལ༹་སེ་ཝ ནཱ་མ་དྷ་མྨཱ ཧོ་ནྟི. ཨི་མ་སྨིཾ ཙི་ཏྟེ ཨེ་ཀ་གྒ་ཏཱ ཨི་ནྡྲི་ཡ ཀི་ཙྩ་ཉྩ ཛྷཱ་ན་ཀི་ཙྩ་ཉྩ མ་གྒ་ཀི་ཙྩ་ཉྩ སཱ་དྷེ་ཏི, ཏ་ཡོ པ་ཙྩ་ཡཱ ན ལ་བྦྷ་ནྟི, ཨེ་ཀ་ཝཱི་ས་ཏི པ་ཙྩ་ཡཱ ལ་བྦྷ་ནྟི.
ཨ་ཊྛ་སུ ལོ་བྷ་མཱུ་ལི་ཀ་ཙི་ཏྟེ་སུ པ་ན ས་ཏྟ ས་བྦ་ཙི་ཏྟི་ཀཱ་ནི ཙ ཚ པ་ཀི་ཎྞ་ཀཱ་ནི ཙ པཱ་པེ་སུ མོ་ཧ་ཙ་ཏུ་ཀྐ་ཉྩ ལོ་བྷ་ཏི་ཀྐ་ཉྩ ཐི་ན་མི་དྡྷ་ཉྩཱ་ཏི དྭཱ་ཝཱི་ས་ཏི ཙེ་ཏ་སི་ཀཱ་ནི ཨུ་པྤ་ཛྫ་ནྟི. ཏེ་སུ ལོ་བྷོ ཙ མོ་ཧོ་ཙཱ་ཏི དྭེ མཱུ་ལཱ་ནི ཧེ་ཏུ་པ་ཙྩ་ཡོ. ཚ་ནྡོ ཙ ཙི་ཏྟ་ཉྩ ཝཱི་རི་ཡ་ཉྩཱ་ཏི ཏ་ཡོ ཨ་དྷི་པ་ཏི་ཛཱ་ཏི་ཀཱ ཀ་དཱ་ཙི ཨ་དྷི་པ་ཏི་ཀི་ཙྩཾ སཱ་དྷེ་ནྟི, ཨཱ་ར་མྨ་ཎཱ་དྷི་པ་ཏི་པི ཨེ་ཏྠ ལ་བྦྷ་ཏི. ཙེ་ཏ་ནཱ ཀ་མྨ་པ་ཙྩ་ཡོ. ཏ་ཡོ ཨཱ་ཧཱ་རཱ ཨཱ་ཧཱ་ར་པ་ཙྩ་ཡོ. ཙི་ཏྟ་ཉྩ ཝེ་ད་ནཱ ཙ ཨེ་ཀ་གྒ་ཏཱ ཙ ཛཱི་ཝི་ཏ་ཉྩ ཝཱི་རི་ཡ་ཉྩཱ་ཏི པ་ཉྩ ཨི་ནྡྲི་ཡ་དྷ་མྨཱ ཨི་ནྡྲི་ཡ་པ་ཙྩ་ཡོ. ཝི་ཏ་ཀྐོ ཙ ཝི་ཙཱ་རོ ཙ པཱི་ཏི ཙ ཝེ་ད་ནཱ ཙ ཨེ་ཀ་གྒ་ཏཱ་ཙཱ་ཏི པ་ཉྩ ཛྷཱ་ན་ངྒཱ་ནི ཛྷཱ་ན་པ་ཙྩ་ཡོ. ཝི་ཏ་ཀྐོ ཙ ཨེ་ཀ་གྒ་ཏཱ ཙ དི་ཊྛི ཙ ཝཱི་རི་ཡ་ཉྩཱ་ཏི ཙ་ཏྟཱ་རི མ་གྒ་ངྒཱ་ནི མ་གྒ་པ་ཙྩ་ཡོ. པ་ཙྪཱ་ཛཱ་ཏོ ཙ ཝི་པཱ་ཀོ ཙཱ་ཏི དྭེ པ་ཙྩ་ཡཱ ན ལ་བྦྷ་ནྟི. སེ་སཱ དྭཱ་ཝཱི་ས་ཏི པ་ཙྩ་ཡཱ ལ་བྦྷ་ནྟི.
དྭཱི་སུ དོ་ས་མཱུ་ལི་ཀ་ཙི་ཏྟེ་སུ པཱི་ཏི་ཉྩ ལོ་བྷ་ཏི་ཀྐ་ཉྩ པ་ཧཱ་ཡ དོ་ས་ཙ་ཏུ་ཀྐེ་ན ས་དྡྷིཾ དྭཱ་ཝཱི་ས་ཏི ཨེ་ཝ ཙེ་ཏ་སི་ཀཱ་ནི, དོ་སོ ཙ མོ་ཧོ ཙ དྭེ མཱུ་ལཱ་ནི, ཏ་ཡོ ཨ་དྷི་པ་ཏི ཛཱ་ཏི་ཀཱ, ཏ་ཡོ ཨཱ་ཧཱ་རཱ, པ་ཉྩ ཨི་ནྡྲི་ཡཱ་ནི, ཙ་ཏྟཱ་རི ཛྷཱ་ན་ངྒཱ་ནི, ཏཱི་ཎི མ་གྒ་ངྒཱ་ནི. ཨེ་ཏྠཱ་པི དྭེ པ་ཙྩ་ཡཱ ན ལ་བྦྷ་ནྟི, དྭཱ་ཝཱི་ས་ཏི པ་ཙྩ་ཡཱ ལ་བྦྷ་ནྟི.
ཨ་ཀུ་ས་ལ་ཙི་ཏྟུ་པྤཱ་དེ་སུ པ་ཙྩ་ཡ་གྷ་ཊ་ནཱ་ན་ཡོ ནི་ཊྛི་ཏོ.
ཙི་ཏྟུ་པྤཱ་དེ་སུ པ་ཙྩ་ཡ་གྷ་ཊ་ནཱ་ན་ཡོ
ཨེ་ཀ་ན་ཝུ་ཏི སོ་བྷ་ཎ་ཙི་ཏྟཱ་ནི ནཱ་མ, ཙ་ཏུ་ཝཱི་ས་ཏི ཀཱ་མ སོ་བྷ་ཎ་ཙི་ཏྟཱ་ནི པ་ནྣ་ར་ས རཱུ་པ་ཙི་ཏྟཱ་ནི དྭཱ་ད་ས ཨ་རཱུ་པ་ཙི་ཏྟཱ་ནི ཙ་ཏྟཱ་ལཱི་ས ལོ་ཀུ་ཏྟ་ར་ཙི་ཏྟཱ་ནི. ཏ་ཏྠ ཙ་ཏུ་ཝཱི་ས་ཏི ཀཱ་མ་སོ་བྷ་ཎ ཙི་ཏྟཱ་ནི ནཱ་མ ཨ་ཊྛ ཀཱ་མ་ཀུ་ས་ལ་ཙི་ཏྟཱ་ནི ཨ་ཊྛ ཀཱ་མ་སོ་བྷ་ཎ་ཝི་པཱ་ཀ ཙི་ཏྟཱ་ནི ཨ་ཊྛ ཀཱ་མ་སོ་བྷ་ཎ་ཀི་རི་ཡ་ཙི་ཏྟཱ་ནི.
པ་ཉྩ ཝཱི་ས་ཏི ཀ་ལྱཱ་ཎ་ཙེ་ཏ་སི་ཀཱ་ནི ནཱ་མ, ཨ་ལོ་བྷོ ཨ་དོ་སོ ཨ་མོ་ཧོ་ཙེ་ཏི ཏཱི་ཎི ཀ་ལྱཱ་ཎ་མཱུ་ལི་ཀཱ་ནི ཙ ས་དྡྷཱ ཙ ས་ཏི ཙ ཧི་རཱི ཙ ཨོ་ཏྟ་པྤ་ཉྩ ཏ་ཏྲ་མ་ཛ྄ཛྷ་ཏྟ་ཏཱ ཙ ཀཱ་ཡ་པ་སྶ་དྡྷི ཙ ཙི་ཏྟ པ་སྶ་དྡྷི ཙ ཀཱ་ཡ་ལ་ཧུ་ཏཱ ཙ ཙི་ཏྟ་ལ་ཧུ་ཏཱ ཙ ཀཱ་ཡ་མུ་དུ་ཏཱ ཙ ཙི་ཏྟ མུ་དུ་ཏཱ ཙ ཀཱ་ཡ་ཀ་མྨ་ཉྙ་ཏཱ ཙ ཙི་ཏྟ ཀ་མྨ་ཉྙ་ཏཱ ཙ ཀཱ་ཡ་པཱ་གུ་ཉྙ་ཏཱ ཙ ཙི་ཏྟ་པཱ་གུ་ཉྙ་ཏཱ ཙ ཀཱ་ཡུ་ཛུ་ཀ་ཏཱ ཙ ཙི་ཏྟུ་ཛུ་ཀ་ཏཱ ཙ ས་མྨཱ་ཝཱ་ཙཱ ས་མྨཱ་ཀ་མྨ་ནྟོ ས་མྨཱ་ཨཱ་ཛཱི་ཝོ་ཏི ཏི་སྶོ ཝི་ར་ཏི་ཡོ ཙ ཀ་རུ་ཎཱ མུ་དི་ཏཱ་ཏི དྭེ ཨ་པྤ་མ་ཉྙཱ་ཡོ ཙ.
ཏ་ཏྠ ཏཱི་ཎི ཀ་ལྱཱ་ཎ་མཱུ་ལཱ་ནི ཧེ་ཏུ་པ་ཙྩ་ཡོ, ཨ་མོ་ཧོ པ་ན ཨ་དྷི་པ་ཏི་པ་ཙྩ་ཡེ ཝཱི་མཾ་སཱ་དྷི་པ་ཏི་ནཱ་མ, ཨི་ནྡྲི་ཡ་པ་ཙྩ་ཡེ པ་ཉྙི་ནྡྲི་ཡཾ ནཱ་མ, མ་གྒ་པ་ཙྩ་ཡེ ས་མྨཱ་དི་ཊྛི ནཱ་མ. ས་དྡྷཱ ཨི་ནྡྲི་ཡ་པ་ཙྩ་ཡེ ས་དྡྷི་ནྡྲི་ཡཾ ནཱ་མ. ས་ཏི ཨི་ནྡྲི་ཡ་པ་ཙྩ་ཡེ ས་ཏི་ནྡྲི་ཡཾ ནཱ་མ, མ་གྒ་པ་ཙྩ་ཡེ ས་མྨཱ་ས་ཏི ནཱ་མ. ཏི་སྶོ ཝི་ར་ཏི་ཡོ མ་གྒ་པ་ཙྩ་ཡོ, སེ་སཱ ས་ཏྟ་ར་ས དྷ་མྨཱ ཝི་སེ་ས་པ་ཙྩ་ཡཱ ན ཧོ་ནྟི.
ཨ་ཊྛ་སུ ཀཱ་མ་ཀུ་ས་ལ་ཙི་ཏྟེ་སུ ཨ་ཊྛ་ཏིཾ་ས ཙེ་ཏ་སི་ཀཱ་ནི ས་ངྒ་ཡ྄ཧ་ནྟི, ས་ཏྟ ས་བྦ་ཙི་ཏྟི་ཀཱ་ནི ཚ པ་ཀི་ཎྞ་ཀཱ་ནི པ་ཉྩ་ཝཱི་ས་ཏི ཀ་ལྱཱ་ཎཱ་ནི. ཏེ་སུ ཙ པཱི་ཏི ཙ་ཏཱུ་སུ སོ་མ་ན་སྶི་ཀེ་སུ ཨེ་ཝ, ཨ་མོ་ཧོ ཙ་ཏཱུ་སུ ཉཱ་ཎ་ས་མྤ་ཡུ་ཏྟེ་སུ ཨེ་ཝ, ཏི་སྶོ ཝི་ར་ཏི་ཡོ སི་ཀྑཱ་པ་ད་སཱི་ལ་པཱུ་ར་ཎ ཀཱ་ལེ ཨེ་ཝ, དྭེ ཨ་པྤ་མ་ཉྙཱ་ཡོ ས་ཏྟེ་སུ ཀཱ་རུ་ཉྙ་མོ་ད་ནཱ་ཀཱ་རེ་སུ ཨེ་ཝཱ་ཏི. ཨི་མེ་སུ་པི ཨ་ཊྛ་སུ ཙི་ཏྟེ་སུ དྭེ ཝཱ ཏཱི་ཎི ཝཱ ཀ་ལྱཱ་ཎ་མཱུ་ལཱ་ནི ཧེ་ཏུ་པ་ཙྩ་ཡོ, ཚ་ནྡོ ཙ ཙི་ཏྟ་ཉྩ ཝཱི་རི་ཡ་ཉྩ ཝཱི་མཾ་སཱ་ཙཱ་ཏི ཙ་ཏཱུ་སུ ཨ་དྷི་པ་ཏི་ཛཱ་ཏི་ཀེ་སུ ཨེ་ཀ་མེ་ཀོ་ཝ ཀ་དཱ་ཙི ཨ་དྷི་པ་ཏི་པ་ཙྩ་ཡོ. ཙེ་ཏ་ནཱ ཀ་མྨ་པ་ཙྩ་ཡོ. ཏ་ཡོ ཨཱ་ཧཱ་རཱ ཨཱ་ཧཱ་ར་པ་ཙྩ་ཡོ. ཙི་ཏྟ་ཉྩ ཝེ་ད་ནཱ ཙ ཨེ་ཀ་གྒ་ཏཱ ཙ ཛཱི་ཝི་ཏ་ཉྩ ས་དྡྷཱ ཙ ས་ཏི ཙ ཝཱི་རི་ཡ་ཉྩ པ་ཉྙཱ་ཙཱ་ཏི ཨ་ཊྛ ཨི་ནྡྲི་ཡཱ་ནི ཨི་ནྡྲི་ཡ་པ་ཙྩ་ཡོ. ཝི་ཏ་ཀྐོ ཙ ཝི་ཙཱ་རོ ཙ པཱི་ཏི ཙ ཝེ་ད་ནཱ ཙ ཨེ་ཀ་གྒ་ཏཱ་ཙཱ་ཏི པ་ཉྩ་ཛྷཱ་ན་ངྒཱ་ནི ཛྷཱ་ན་པ་ཙྩ་ཡོ. པ་ཉྙཱ ཙ ཝི་ཏ་ཀྐོ ཙ ཏི་སྶོ ཝི་ར་ཏི་ཡོ ཙ ས་ཏི ཙ ཝཱི་རི་ཡ་ཉྩ ཨེ་ཀ་གྒ་ཏཱ་ཙཱ་ཏི ཨ་ཊྛ མ་གྒ་ངྒཱ་ནི མ་གྒ་པ་ཙྩ་ཡོ. ཨི་མེ་སུ་པི ཨ་ཊྛ་སུ ཙི་ཏྟེ་སུ པ་ཙྪཱ་ཛཱ་ཏོ ཙ ཝི་པཱ་ཀོ་ཙཱ་ཏི དྭེ པ་ཙྩ་ཡཱ ན ལ་བྦྷ་ནྟི, སེ་སཱ དྭཱ་ཝཱི་ས་ཏི་པ་ཙྩ་ཡཱ ལ་བྦྷ་ནྟི.
ཨ་ཊྛ་སུ ཀཱ་མ་སོ་བྷ་ཎ་ཀི་རི་ཡ་ཙི་ཏྟེ་སུ ཏི་སྶོ ཝི་ར་ཏི་ཡོ ན ལ་བྦྷ་ནྟི, ཀུ་ས་ལེ་སུ ཝི་ཡ དྭེ པ་ཙྩ་ཡཱ ན ལ་བྦྷ་ནྟི, དྭཱ་ཝཱི་ས་ཏི པ་ཙྩ་ཡཱ ལ་བྦྷ་ནྟི.
ཨ་ཊྛ་སུ ཀཱ་མ་སོ་བྷ་ཎ་ཝི་པཱ་ཀེ་སུ ཏི་སྶོ ཝི་ར་ཏི་ཡོ ཙ དྭེ ཨ་པྤ་མ་ཉྙཱ་ཡོ ཙ ན ལ་བྦྷ་ནྟི. ཨ་དྷི་པ་ཏི་པ་ཙྩ་ཡོ ཙ པ་ཙྪཱ་ཛཱ་ཏོ ཙ ཨཱ་སེ་ཝ་ན་ཉྩཱ་ཏི ཏ་ཡོ པ་ཙྩ་ཡཱ ན ལ་བྦྷ་ནྟི, ཨེ་ཀ་ཝཱི་ས་ཏི པ་ཙྩ་ཡཱ ལ་བྦྷ་ནྟི.
ཨུ་པ་རི རཱུ་པཱ་རཱུ་པ་ལོ་ཀུ་ཏྟ་ར་ཙི་ཏྟེ་སུ་པི དྭཱ་ཝཱི་ས་ཏི་པ་ཙྩ་ཡ་ཏོ ཨ་ཏི་རེ་ཀཾ ན་ཏྠི. ཏ་སྨཱ ཙ་ཏཱུ་སུ ཉཱ་ཎ་ས་མྤ་ཡུ་ཏྟ་ཀཱ་མ་ཀུ་ས་ལ ཙི་ཏྟེ་སུ ཝི་ཡ ཨི་མེ་སུ པ་ཙྩ་ཡ་གྷ་ཊ་ནཱ ཝེ་དི་ཏ་བྦཱ.
ཨེ་ཝཾ ས་ནྟེ ཀ་སྨཱ ཏཱ་ནི ཙི་ཏྟཱ་ནི ཀཱ་མ་ཙི་ཏྟ་ཏོ མ་ཧ་ནྟ ཏ་རཱ་ནི ཙ པ་ཎཱི་ཏ་ཏ་རཱ་ནི ཙ ཧོ་ནྟཱི་ཏི. ཨཱ་སེ་ཝ་ན་མ་ཧ་ནྟ་ཏྟཱ. ཏཱ་ནི ཧི ཙི་ཏྟཱ་ནི བྷཱ་ཝ་ནཱ་ཀ་མྨ་ཝི་སེ་སེ་ཧི སི་དྡྷཱ་ནི ཧོ་ནྟི, ཏ་སྨཱ ཏེ་སུ ཨཱ་སེ་ཝ་ན་པ་ཙྩ་ཡོ མ་ཧ་ནྟོ ཧོ་ཏི. ཨཱ་སེ་ཝ་ན མ་ཧ་ནྟ་ཏྟཱ ཙ ཨི་ནྡྲི་ཡ་པ་ཙྩ་ཡོ་པི ཛྷཱ་ན་པ་ཙྩ་ཡོ་པི མ་གྒ་པ་ཙྩ་ཡོ་པི ཨ་ཉྙེ་པི ཝཱ ཏེ་སཾ པ་ཙྩ་ཡཱ མ་ཧ་ནྟཱ ཧོ་ནྟི. པ་ཙྩ་ཡཱ་ནཾ ཨུ་པ་རཱུ་པ་རི མ་ཧ་ནྟ་ཏྟཱ ཏཱ་ནི ཙི་ཏྟཱ་ནི ཨུ་པ་རཱུ་པ་རི ཙ ཀཱ་མ་ཙི་ཏྟ་ཏོ མ་ཧ་ནྟ་ཏ་རཱ་ནི ཙ པ་ཎཱི་ཏ་ཏ་རཱ་ནི ཙ ཧོ་ནྟཱི་ཏི.
ཙི་ཏྟུ་པྤཱ་དེ་སུ པ་ཙྩ་ཡ་གྷ་ཊ་ནཱ་ན་ཡོ ནི་ཊྛི་ཏོ.
རཱུ་པ་ཀ་ལཱ་པེ་སུ པ་ཙྩ་ཡ་གྷ་ཊ་ནཱ་ན་ཡོ
རཱུ་པ་ཀ་ལཱ་པེ་སུ པ་ཙྩ་ཡ་གྷ་ཊ་ནཱ་ན་ཡོ ཝུ་ཙྩ་ཏེ. ཨ་ཊྛ་ཝཱི་ས་ཏི རཱུ་པཱ་ནི ནཱ་མ, ཙ་ཏྟཱ་རི མ་ཧཱ་བྷཱུ་ཏཱ་ནི པ་ཐ་ཝཱི ཨཱ་པོ ཏེ་ཛོ ཝཱ་ཡོ. པ་ཉྩ པ་སཱ་ད་རཱུ་པཱ་ནི ཙ་ཀྑུ སོ་ཏཾ གྷཱ་ནཾ ཛི་ཝ྄ཧཱ ཀཱ་ཡོ. པ་ཉྩ གོ་ཙ་ར་རཱུ་པཱ་ནི རཱུ་པཾ ས་དྡོ ག་ནྡྷོ ར་སོ ཕོ་ཊྛ་བྦཾ. ཏ་ཏྠ ཕོ་ཊྛ་བྦཾ ཏི་ཝི་དྷཾ པ་ཐ་ཝཱི་ཕོ་ཊྛ་བྦཾ ཏེ་ཛོ་ཕོ་ཊྛ་བྦཾ ཝཱ་ཡོ་ཕོ་ཊྛ་བྦཾ. དྭེ བྷཱ་ཝ་རཱུ་པཱ་ནི ཨི་ཏྠི་བྷཱ་ཝ་རཱུ་པཾ པུ་མྦྷཱ་ཝ་རཱུ་པཾ. ཨེ་ཀཾ ཛཱི་ཝི་ཏ་རཱུ་པཾ, ཨེ་ཀཾ ཧ་ད་ཡ་རཱུ་པཾ. ཨེ་ཀཾ ཨཱ་ཧཱ་ར་རཱུ་པཾ. ཨེ་ཀཾ ཨཱ་ཀཱ་ས་དྷཱ་ཏུ་རཱུ་པཾ. དྭེ ཝི་ཉྙ་ཏྟི་རཱུ་པཱ་ནི ཀཱ་ཡ་ཝི་ཉྙ་ཏྟི་རཱུ་པཾ ཝ་ཙཱི་ཝི་ཉྙ་ཏྟི རཱུ་པཾ. ཏཱི་ཎི ཝི་ཀཱ་ར་རཱུ་པཱ་ནི ལ་ཧུ་ཏཱ མུ་དུ་ཏཱ ཀ་མྨ་ཉྙ་ཏཱ. ཙ་ཏྟཱ་རི ལ་ཀྑ་ཎ་རཱུ་པཱ་ནི ཨུ་པ་ཙ་ཡོ ས་ནྟ་ཏི ཛ་ར་ཏཱ ཨ་ནི་ཙྩ་ཏཱ.
ཏ་ཏྠ ཚ རཱུ་པ་དྷ་མྨཱ རཱུ་པ་དྷ་མྨཱ་ནཾ པ་ཙྩ་ཡཱ ཧོ་ནྟི ཙ་ཏྟཱ་རི མ་ཧཱ་བྷཱུ་ཏཱ་ནི ཙ ཛཱི་ཝི་ཏ་རཱུ་པ་ཉྩ ཨཱ་ཧཱ་ར་རཱུ་པ་ཉྩ. ཏ་ཏྠ ཙ་ཏྟཱ་རི མ་ཧཱ བྷཱུ་ཏཱ་ནི ཨ་ཉྙ་མ་ཉྙ་སྶ པ་ཉྩ་ཧི པ་ཙྩ་ཡེ་ཧི པ་ཙྩ་ཡཱ ཧོ་ནྟི ས་ཧ་ཛཱ་ཏེ་ན ཙ ཨ་ཉྙ་མ་ཉྙེ་ན ཙ ནི་སྶ་ཡེ་ན ཙ ཨ་ཏྠི་ཡཱ ཙ ཨ་ཝི་ག་ཏེ་ན་ཙ. ས་ཧ་ཛཱ་ཏཱ་ནཾ ཨུ་པཱ་དཱ་རཱུ་པཱ་ནཾ ཨ་ཉྙ་མ་ཉྙ་ཝ་ཛྫི་ཏེ་ཧི ཙ་ཏཱུ་ཧི པ་ཙྩ་ཡེ་ཧི པ་ཙྩ་ཡཱ ཧོ་ནྟི. ཛཱི་ཝི་ཏ་རཱུ་པཾ ས་ཧ་ཛཱ་ཏཱ་ནཾ ཀ་མྨ་ཛ་རཱུ་པཱ་ནཾ ཨི་ནྡྲི་ཡ་པ་ཙྩ་ཡེ་ན པ་ཙྩ་ཡོ. ཨཱ་ཧཱ་ར་རཱུ་པཾ ས་ཧ་ཛཱ་ཏཱ་ན་ཉྩ ཨ་ས་ཧ་ཛཱ་ཏཱ་ན་ཉྩ ས་བྦེ་སཾ ཨ་ཛ྄ཛྷ་ཏྟ་རཱུ་པ་དྷ་མྨཱ་ནཾ ཨཱ་ཧཱ་ར་པ་ཙྩ་ཡེ་ན པ་ཙྩ་ཡོ.
ཏ་ཏྠེ་ཝ ཏེ་ར་ས རཱུ་པ་དྷ་མྨཱ ནཱ་མ་དྷ་མྨཱ་ནཾ ཝི་སེ་ས་པ་ཙྩ་ཡཱ ཧོ་ནྟི, པ་ཉྩ་པ་སཱ་ད་རཱུ་པཱ་ནི ཙ ས་ཏྟ གོ་ཙ་ར་རཱུ་པཱ་ནི ཙ ཧ་ད་ཡ་ཝ་ཏྠུ་རཱུ་པ་ཉྩ. ཏ་ཏྠ པ་ཉྩ པ་སཱ་ད་རཱུ་པཱ་ནི པ་ཉྩ་ནྣཾ ཝི་ཉྙཱ་ཎ་དྷཱ་ཏཱུ་ནཾ མཱ་ཏ་རོ ཝི་ཡ པུ་ཏྟ་ཀཱ་ནཾ ཝ་ཏྠུ་པུ་རེ་ཛཱ་ཏེ་ན ཙ ཝ་ཏྠུ་པུ་རེ་ཛཱ་ཏི་ནྡྲི་ཡེ་ན ཙ ཝ་ཏྠུ པུ་རེ་ཛཱ་ཏ་ཝི་པྤ་ཡུ་ཏྟེ་ན ཙ པ་ཙྩ་ཡཱ ཧོ་ནྟི. ས་ཏྟ གོ་ཙ་ར་རཱུ་པཱ་ནི པ་ཉྩ་ནྣཾ ཝི་ཉྙཱ་ཎ་དྷཱ་ཏཱུ་ནཾ ཏི་སྶ་ནྣཾ མ་ནོ་དྷཱ་ཏཱུ་ན་ཉྩ པི་ཏ་རོ ཝི་ཡ པུ་ཏྟ་ཀཱ་ནཾ ཨཱ་ར་མྨ་ཎ་པུ་རེ་ཛཱ་ཏེ་ན པ་ཙྩ་ཡཱ ཧོ་ནྟི. ཧ་ད་ཡ་ཝ་ཏྠུ་རཱུ་པཾ དྭི་ནྣཾ མ་ནོ་དྷཱ་ཏུ མ་ནོ་ཝི་ཉྙཱ་ཎ་དྷཱ་ཏཱུ་ནཾ རུ་ཀྑོ ཝི་ཡ རུ་ཀྑ་དེ་ཝ་ཏཱ་ནཾ ཡ་ཐཱ་ར་ཧཾ པ་ཊི་ས་ནྡྷི་ཀྑ་ཎེ ས་ཧ་ཛཱ་ཏ་ནི་སྶ་ཡེ་ན པ་ཝ་ཏྟི་ཀཱ་ལེ ཝ་ཏྠུ་པུ་རེ་ཛཱ་ཏེ་ན ཙ ཝ་ཏྠུ་པུ་རེ་ཛཱ་ཏ་ཝི་པྤ་ཡུ་ཏྟེ་ན ཙ པ་ཙྩ་ཡོ ཧོ་ཏི.
ཏེ་ཝཱི་ས་ཏི རཱུ་པ་ཀ་ལཱ་པཱ. ཏ་ཏྠ ཨེ་ཀཱ་ཡ ར་ཛྫུ་ཡཱ བ་ནྡྷི་ཏཱ་ནཾ ཀེ་སཱ་ནཾ ཀེ་ས་ཀ་ལཱ་པོ ཝི་ཡ ཏི་ཎཱ་ནཾ ཏི་ཎ་ཀ་ལཱ་པོ ཝི་ཡ ཨེ་ཀེ་ན ཛཱ་ཏི་རཱུ་པེ་ན བ་ནྡྷི་ཏཱ་ནཾ རཱུ་པ་དྷ་མྨཱ་ནཾ ཀ་ལཱ་པོ པ་རི་པི་ཎྜི་རཱུ་པ ཀ་ལཱ་པོ ནཱ་མ.
ཏ་ཏྠ ཙ་ཏྟཱ་རི མ་ཧཱ་བྷཱུ་ཏཱ་ནི ཝ་ཎྞོ ག་ནྡྷོ ར་སོ ཨོ་ཛཱ་ཏི ཨི་མེ ཨ་ཊྛ དྷ་མྨཱ ཨེ་ཀོ ས་བྦ་མཱུ་ལ་ཀ་ལཱ་པོ ནཱ་མ, ས་བྦ་མཱུ་ལ་ཊྛ་ཀ་ནྟི ཙ ཝུ་ཙྩ་ཏི.
ན་ཝ ཀ་མྨ་ཛ་རཱུ་པ་ཀ་ལཱ་པཱ, – ཛཱི་ཝི་ཏ་ན་ཝ་ཀཾ ཝ་ཏྠུ་ད་ས་ཀཾ ཀཱ་ཡ ད་ས་ཀཾ ཨི་ཏྠི་བྷཱ་ཝ་ད་ས་ཀཾ པུ་མྦྷཱ་ཝ་ད་ས་ཀཾ ཙ་ཀྑུ་ད་ས་ཀཾ སོ་ཏ་ད་ས་ཀཾ གྷཱ་ན་ད་ས་ཀཾ ཛི་ཝ྄ཧཱ་ད་ས་ཀཾ. ཏ་ཏྠ ས་བྦ་མཱུ་ལ་ཊྛ་ཀ་མེ་ཝ་ཛཱི་ཝི་ཏ་རཱུ་པེ་ན ས་ཧ ཛཱི་ཝི་ཏ་ན་ཝ་ཀཾ ནཱ་མ. ཨེ་ཏ་དེ་ཝ ཀ་མྨ་ཛ་ཀ་ལཱ་པེ་སུ མཱུ་ལ་ན་ཝ་ཀཾ ཧོ་ཏི. མཱུ་ལ་ན་ཝ་ཀ་མེ་ཝ ཡ་ཐཱ་ཀྐ་མཾ ཧ་ད་ཡ་ཝ་ཏྠུ་རཱུ་པཱ་དཱི་ཧི ཨ་ཊྛ་རཱུ་པེ་ཧི ས་ཧ ཝ་ཏྠུ་ད་ས་ཀཱ་དཱི་ནི ཨ་ཊྛ་ད་ས་ཀཱ་ནི བྷ་ཝ་ཏི. ཏ་ཏྠ ཛཱི་ཝི་ཏ་ན་ཝ་ཀ་ཉྩ ཀཱ་ཡ་ད་ས་ཀ་ཉྩ བྷཱ་ཝ་ད་ས་ཀཱ་ནི་ཙཱ་ཏི ཙ་ཏྟཱ་རོ ཀ་ལཱ་པཱ ས་ཀ་ལ ཀཱ་ཡེ པ་ཝ་ཏྟ་ནྟི. ཏ་ཏྠ ཛཱི་ཝི་ཏ་ན་ཝ་ཀ་ནྟི པཱ་ཙ་ཀ་གྒི ཙ ཀཱ་ཡ་གྒི ཙ ཝུ་ཙྩ་ཏི. པཱ་ཙ་ཀ་གྒི ནཱ་མ པཱ་ཙ་ཀ་ཏེ་ཛོ ཀོ་ཊྛཱ་སོ, སོ ཨཱ་མཱ་ས་ཡེ པ་ཝ་ཏྟི་ཏྭཱ ཨ་སི་ཏ་པཱི་ཏ་ཁཱ་ཡི་ཏ་སཱ་ཡི་ཏཱ་ནི པ་རི་པཱ་ཙེ་ཏི. ཀཱ་ཡ་གྒི ནཱ་མ ས་ཀ་ལ་ཀཱ་ཡ་བྱཱ་པ་ཀོ ཨུ་སྨཱ་ཏེ་ཛོ ཀོ་ཊྛཱ་སོ, སོ ས་ཀ་ལ ཀཱ་ཡེ པ་ཝ་ཏྟི་ཏྭཱ པི་ཏྟ་སེ་མྷ་ལོ་ཧི་ཏཱ་ནི ཨ་པཱུ་ཏཱི་ནི ཝི་པྤ་ས་ནྣཱ་ནི ཀ་རོ་ཏི. ཏེ་སཾ དྭི་ནྣཾ ཝི་ས་མ་ཝུ་ཏྟི་ཡཱ ས་ཏི ས་ཏྟཱ བ་ཧྭཱ་བཱ་དྷཱ ཧོ་ནྟི, ས་མ་ཝུ་ཏྟི་ཡཱ ས་ཏི ཨ་པྤཱ་བཱ་དྷཱ. ཏ་དུ་བྷ་ཡཾ ཛཱི་ཝི་ཏ་ན་ཝ་ཀཾ ས་ཏྟཱ་ནཾ ཨཱ་ཡུཾ ས་མྤཱ་དེ་ཏི. ཝ་ཎྞཾ ས་མྤཱ་དེ་ཏི. ཀཱ་ཡ་ད་ས་ཀཾ ས་ཀ་ལ་ཀཱ་ཡེ སུ་ཁ་ས་མྥ་སྶ དུ་ཀྑ་ས་མྥ་སྶཱ་ནི ས་མྤཱ་དེ་ཏི. བྷཱ་ཝ ད་ས་ཀཱ་ནི ཨི་ཏྠཱི་ནཾ ས་བྦེ ཨི་ཏྠཱ་ཀཱ་རེ ས་མྤཱ་དེ་ཏི. པུ་རི་སཱ་ནཾ ས་བྦེ པུ་རི་སཱ་ཀཱ་རེ ས་མྤཱ་དེ་ཧི. སེ་སཱ་ནི ཝ་ཏྠུ་ད་ས་ཀཱ་དཱི་ནི པ་ཉྩ་ད་ས་ཀཱ་ནི པ་དེ་ས་ད་ས་ཀཱ་ནི ནཱ་མ. ཏ་ཏྠ ཝ་ཏྠུ་ད་ས་ཀཾ ཧ་ད་ཡ་ཀོ་ས་བྦྷ་ནྟ་རེ པ་ཝ་ཏྟི་ཏྭཱ ས་ཏྟཱ་ནཾ ནཱ་ནཱ་པ་ཀཱ་རཱ་ནི སུ་ཙི་ནྟི་ཏ་དུ་ཙི་ནྟི་ཏཱ་ནི ས་མྤཱ་དེ་ཏི. ཙ་ཀྑུ་ད་ས་ཀཱ་དཱི་ནི ཙ་ཏྟཱ་རི ད་ས་ཀཱ་ནི ཙ་ཀྑུ་གུ་ལ༹ ཀ་ཎྞ་བི་ལ ནཱ་ས་བི་ལ ཛི་ཝ྄ཧཱ་ཏ་ལེ་སུ པ་ཝ་ཏྟི་ཏྭཱ ད་སྶ་ན ས་ཝ་ན གྷཱ་ཡ་ན སཱ་ཡ་ནཱ་ནི ས་མྤཱ་དེ་ཏི.
ཨ་ཊྛ ཙི་ཏྟ་ཛ་རཱུ་པ་ཀ་ལཱ་པཱ, ས་བྦ་མཱུ་ལ་ཊྛ་ཀཾ ས་དྡ་ན་ཝ་ཀཾ ཀཱ་ཡ ཝི་ཉྙ་ཏྟི་ན་ཝ་ཀཾ ས་དྡ་ཝ་ཙཱི་ཝི་ཉྙ་ཏྟི་ད་ས་ཀ་ནྟི ཙ་ཏྟཱ་རོ མཱུ་ལ་ཀ་ལཱ་པཱ ཙ ཏེ་ཡེ་ཝ ལ་ཧུ་ཏཱ མུ་དུ་ཏཱ ཀ་མྨ་ཉྙ་ཏཱ་ས་ངྑཱ་ཏེ་ཧི ཏཱི་ཧི ཝི་ཀཱ་ར རཱུ་པེ་ཧི ས་ཧ ཙ་ཏྟཱ་རོ ས་ཝི་ཀཱ་ར་ཀ་ལཱ་པཱ ཙ.
ཏ་ཏྠ ས་རཱི་ར་དྷཱ་ཏཱུ་ནཾ ཝི་ས་མ་པྤ་ཝ་ཏྟི་ཀཱ་ལེ གི་ལཱ་ན་སྶ མཱུ་ལ ཀ་ལཱ་པཱ་ནི ཨེ་ཝ པ་ཝ་ཏྟ་ནྟི. ཏ་དཱ ཧི ཏ་སྶ ས་རཱི་ར་རཱུ་པཱ་ནི ག་རཱུ་ནི ཝཱ ཐ་དྡྷཱ་ནི ཝཱ ཨ་ཀ་མྨ་ཉྙཱ་ནི ཝཱ ཧོ་ནྟི, ཡ་ཐཱ་རུ་ཙི ཨི་རི་ཡ་པ་ཐཾ་པི པ་ཝ་ཏྟེ་ཏུཾ ཨ་ངྒ པ་ཙྩ་ངྒཱ་ནི་པི ཙཱ་ལེ་ཏུཾ ཝ་ཙ་ནཾ་པི ཀ་ཐེ་ཏུཾ དུ་ཀྑོ ཧོ་ཏི. ས་རཱི་ར་དྷཱ་ཏཱུ་ནཾ ས་མ་པྤ་ཝ་ཏྟི་ཀཱ་ལེ པ་ན ཨ་གི་ལཱ་ན་སྶ ག་རུ་ཐ་དྡྷཱ་དཱི་ནཾ ས་རཱི་ར་དོ་སཱ་ནཾ ཨ་བྷཱ་ཝ་ཏོ ས་ཝི་ཀཱ་རཱ པ་ཝ་ཏྟ་ནྟི. ཏེ་སུ ཙ ཙི་ཏྟ་ངྒ་ཝ་སེ་ན ཀཱ་ཡ་ངྒ ཙ་ལ་ནེ དྭེ ཀཱ་ཡ་ཝི་ཉྙ་ཏྟི་ཀ་ལཱ་པཱ པ་ཝ་ཏྟ་ནྟི. ཙི་ཏྟ་ཝ་སེ་ནེ་ཝ མུ་ཁ་ཏོ ཝ་ཙ་ན་ས་དྡ་པྤ་ཝ་ཏྟི་ཀཱ་ལེ དྭེ ཝ་ཙཱི་ཝི་ཉྙ་ཏྟི་ཀ་ལཱ་པཱ, ཙི་ཏྟ་ཝ་སེ་ནེ་ཝ ཨ་ཀྑ་ར་ཝ་ཎྞ་ར་ཧི་ཏཱ་ནཾ ཧ་ས་ན་རོ་ད་ནཱ་དཱི་ནཾ ཨ་ཝ་ཙ་ན་ས་དྡཱ་ནཾ མུ་ཁ་ཏོ པ་ཝ་ཏྟི་ཀཱ་ལེ དྭེ ས་དྡ་ཀ་ལཱ་པཱ, སེ་ས་ཀཱ་ལེ་སུ དྭེ ཨཱ་དི ཀ་ལཱ་པཱ པ་ཝ་ཏྟ་ནྟི.
ཙ་ཏྟཱ་རོ ཨུ་ཏུ་ཛ་རཱུ་པ་ཀ་ལཱ་པཱ, ས་བྦ་མཱུ་ལ་ཊྛ་ཀཾ ས་དྡ་ན་ཝ་ཀ་ནྟི དྭེ མཱུ་ལ་ཀ་ལཱ་པཱ ཙ དྭེ ས་ཝི་ཀཱ་ར་ཀ་ལཱ་པཱ ཙ. ཏ་ཏྠ ཨ་ཡཾ ཀཱ་ཡོ ཡཱ་ཝ་ཛཱི་ཝཾ ཨི་རི་ཡཱ་པ་ཐ་སོ་ཏཾ ཨ་ནུ་ག་ཙྪ་ནྟོ ཡཱ་པེ་ཏི, ཏ་སྨཱ ཨི་རི་ཡཱ་པ་ཐ་ནཱ་ན་ཏྟཾ པ་ཊི་ཙྩ ཨི་མ་སྨིཾ ཀཱ་ཡེ ཁ་ཎེ ཁ་ཎེ དྷཱ་ཏཱུ་ནཾ ས་མ་པྤ་ཝ་ཏྟི་ཝི་ས་མ་པྤ་ཝ་ཏྟི་ཡོ པ་ཉྙཱ་ཡ་ནྟི. ཏ་ཐཱ ཨུ་ཏུ་ནཱ་ན་ཏྟཾ པ་ཊི་ཙྩ ཨཱ་ཧཱ་ར་ནཱ་ན་ཏྟཾ པ་ཊི་ཙྩ ཝཱ་ཏཱ་ཏ་པ་ས་པྥ་སྶ་ནཱ་ན་ཏྟཾ པ་ཊི་ཙྩ ཀཱ་ཡ་ངྒ པ་རི་ཧཱ་ར་ནཱ་ན་ཏྟཾ པ་ཊི་ཙྩ ཨ་ཏྟཱུ་པ་ཀྐ་མ་པ་རཱུ་པ་ཀྐ་མ་ནཱ་ན་ཏྟཾ པ་ཊི་ཙྩ. ཏ་ཏྠ ཝི་ས་མ་པྤ་ཝ་ཏྟི་ཀཱ་ལེ དྭེ མཱུ་ལ་ཀ་ལཱ་པཱ ཨེ་ཝ པ་ཝ་ཏྟ་ནྟི, ས་མ་པྤ་ཝ་ཏྟི་ཀཱ་ལེ དྭེ ས་ཝི་ཀཱ་རཱ. ཏེ་སུ ཙ དྭེ ས་དྡ་ཀ་ལཱ་པཱ ཙི་ཏྟ་ཛ་ས་དྡ་ཏོ པ་ར་མྤ་ར་ས་དྡེ་སུ ཙ ཨ་ཉྙེ་སུ ལོ་ཀེ ནཱ་ན་པྤ་ཀཱ་ར་ས་དྡེ་སུ ཙ པ་ཝ་ཏྟ་ནྟི.
དྭེ ཨཱ་ཧཱ་ར་ཛ་རཱུ་པ་ཀ་ལཱ་པཱ, – ས་བྦ་མཱུ་ལ་ཊྛ་ཀཾ ས་ཝི་ཀཱ་ར་ནྟི. ཨི་མེ དྭེ ཀ་ལཱ་པཱ ས་པྤཱ་ཡེ་ན ཝཱ ཨ་ས་པྤཱ་ཡེ་ན ཝཱ ཨཱ་ཧཱ་རེ་ན ཛཱ་ཏཱ་ནཾ ས་མ་རཱུ་པ་ཝི་ས་མ་རཱུ་པཱ་ནཾ ཝ་སེ་ན ཝེ་དི་ཏ་བྦཱ.
ཨཱ་ཀཱ་ས་དྷཱ་ཏུ ཙ ལ་ཀྑ་ཎ་རཱུ་པཱ་ནི་ཙཱ་ཏི པ་ཉྩ་རཱུ་པཱ་ནི ཀ་ལཱ་པ མུ་ཏྟཱ་ནི ཧོ་ནྟི. ཏེ་སུ ཨཱ་ཀཱ་ས་དྷཱ་ཏུ ཀ་ལཱ་པཱ་ནཾ ཨ་ནྟ་རཱ པ་རི་ཙྪེ་ད མ་ཏྟ་ཏྟཱ ཀ་ལཱ་པ་མུ་ཏྟཱ ཧོ་ཏི. ལ་ཀྑ་ཎ་རཱུ་པཱ་ནི ས་ངྑ་ཏ་བྷཱུ་ཏཱ་ནཾ རཱུ་པ ཀ་ལཱ་པཱ་ནཾ ས་ངྑ་ཏ་བྷཱ་ཝ་ཛཱ་ན་ན་ཏྠཱ་ཡ ལ་ཀྑ་ཎ་མ་ཏྟ་ཏྟཱ ཀ་ལཱ་པ མུ་ཏྟཱ་ནི.
ཨི་མེ ཏེ་ཝཱི་ས་ཏི ཀ་ལཱ་པཱ ཨ་ཛ྄ཛྷ་ཏྟ་ས་ནྟཱ་ནེ ལ་བྦྷ་ནྟི. བ་ཧི་དྡྷཱ ས་ནྟཱ་ནེ པ་ན དྭེ ཨུ་ཏུ་ཛ་མཱུ་ལ་ཀ་ལཱ་པཱ ཨེ་ཝ ལ་བྦྷ་ནྟི. ཏ་ཏྠ དྭེ རཱུ་པ ས་ནྟཱ་ནཱ་ནི ཨ་ཛ྄ཛྷ་ཏྟ་ས་ནྟཱ་ན་ཉྩ བ་ཧི་དྡྷཱ་ས་ནྟཱ་ན་ཉྩ. ཏ་ཏྠ ཨ་ཛ྄ཛྷ་ཏྟ་ས་ནྟཱ་ནཾ ནཱ་མ ས་ཏྟ་ས་ནྟཱ་ནཾ ཝུ་ཙྩ་ཏི. བ་ཧི་དྡྷཱ་ས་ནྟཱ་ནཾ ནཱ་མ པ་ཐ་ཝཱི་པ་བྦ་ཏ་ན་དཱི་ས་མུ་དྡ རུ་ཀྑ་ཏི་ཎཱ་དཱི་ནི ཝུ་ཙྩ་ཏི. ཏ་ཏྠ ཨ་ཛ྄ཛྷ་ཏྟ་ས་ནྟཱ་ནེ ཨ་ཊྛ་ཝཱི་ས་ཏི རཱུ་པཱ་ནི ཏེ་ཝཱི་ས་ཏི རཱུ་པ་ཀ་ལཱ་པཱ་ནི ལ་བྦྷ་ནྟི.
ཏ་ཏྠ པ་ཊི་ས་ནྡྷི་ནཱ་མ་དྷ་མྨཱ པ་ཊི་ས་ནྡྷི་ཀྑ་ཎེ ཀ་མྨ་ཛ་རཱུ་པ་ཀ་ལཱ་པཱ་ནཾ ཚ་དྷཱ པ་ཙྩ་ཡཱ ཧོ་ནྟི ཙ་ཏཱུ་ཧི མ་ཧཱ་ས་ཧ་ཛཱ་ཏེ་ཧི ཙ ཝི་པཱ་ཀེ་ན ཙ ཝི་པྤ་ཡུ་ཏྟེ་ན ཙ. ཧ་ད་ཡ་ཝ་ཏྠུ་རཱུ་པ་སྶ པ་ན ཨ་ཉྙ་མ་ཉྙེ་ན ས་ཧ ས་ཏྟ་དྷཱ པ་ཙྩ་ཡཱ ཧོ་ནྟི. ཏེ་སྭེ་ཝ ནཱ་མ་དྷ་མྨེ་སུ ཧེ་ཏུ་དྷ་མྨཱ ཧེ་ཏུ་བྷཱ་ཝེ་ན, ཙེ་ཏ་ནཱ ཀ་མྨ་བྷཱ་ཝེ་ན, ཨཱ་ཧཱ་ར་དྷ་མྨཱ ཨཱ་ཧཱ་ར་བྷཱ་ཝེ་ན, ཨི་ནྡྲི་ཡ དྷ་མྨཱ ཨི་ནྡྲི་ཡ་བྷཱ་ཝེ་ན, ཛྷཱ་ན་དྷ་མྨཱ ཛྷཱ་ན བྷཱ་ཝེ་ན, མ་གྒ་དྷ་མྨཱ མ་གྒ བྷཱ་ཝེ་ནཱ་ཏི ཡ་ཐཱ་ར་ཧཾ ཚ་དྷཱ པ་ཙྩ་ཡཱ ཧོ་ནྟི. ཨ་ཏཱི་ཏཱ་ནི པ་ན ཀུ་ས་ལཱ་ཀུ་ས་ལ་ཀ་མྨཱ་ནི ཨེ་ཀ་དྷཱ་ཝ པ་ཙྩ་ཡཱ ཧོ་ནྟི ཀ་མྨ་པ་ཙྩ་ཡེ་ན, པ་ཋ་མ་བྷ་ཝ་ངྒཱ་དི་ཀཱ པ་ཙྪཱ་ཛཱ་ཏཱ པ་ཝ་ཏྟ་ནཱ་མ་དྷ་མྨཱ པུ་རེ་ཛཱ་ཏཱ་ནཾ ཀ་མྨ་ཛ་རཱུ་པ ཀ་ལཱ་པཱ་ནཾ ཨེ་ཀ་དྷཱ པ་ཙྩ་ཡཱ ཧོ་ནྟི པ་ཙྪཱ་ཛཱ་ཏེ་ན. ཨེ་ཏྠ ཙ པ་ཙྪཱ་ཛཱ་ཏ ཝ་ཙ་ནེ་ན ཙ་ཏྟཱ་རོ པ་ཙྪཱ་ཛཱ་ཏ་ཛཱ་ཏི་ཀཱ པ་ཙྩ་ཡཱ ག་ཧི་ཏཱ ཧོ་ནྟི. ཨ་ཏཱི་ཏཱ་ནི ཙ ཀ་མྨཱ་ནི ཨེ་ཀ་དྷཱ་ཝ པ་ཙྩ་ཡཱ ཧོ་ནྟི. ཨེ་ཝཾ ནཱ་མ་དྷ་མྨཱ ཀ་མྨ་ཛ་རཱུ་པ་ཀ་ལཱ་པཱ་ནཾ ཡ་ཐཱ་ར་ཧཾ ཙུ་དྡ་ས་ཧི པ་ཙྩ་ཡེ་ཧི པ་ཙྩ་ཡཱ ཧོ་ནྟི. ཨི་དྷ ད་ས་པ་ཙྩ་ཡཱ ན ལ་བྦྷ་ནྟི ཨཱ་ར་མྨ་ཎ་ཉྩ ཨ་དྷི་པ་ཏི ཙ ཨ་ན་ནྟ་ར་ཉྩ ས་མ་ན་ནྟ་ར་ཉྩ ཨུ་པ་ནི་སྶ་ཡོ ཙ པུ་རེ་ཛཱ་ཏོ ཙ ཨཱ་སེ་ཝ་ན་ཉྩ ས་མྤ་ཡུ་ཏྟོ ཙ ན་ཏྠི ཙ ཝི་ག་ཏོ ཙ.
པ་ཝ་ཏྟི་ཀཱ་ལེ རཱུ་པ་ཛ་ན་ཀཱ ནཱ་མ་དྷ་མྨཱ ཨ་ཏྟ་ནཱ ས་ཧ་ཛཱ་ཏཱ་ནཾ ཙི་ཏྟ་ཛ་རཱུ་པ་ཀ་ལཱ་པཱ་ནཾ པ་ཉྩ་དྷཱ པ་ཙྩ་ཡཱ ཧོ་ནྟི ཙ་ཏཱུ་ཧི མ་ཧཱ་ས་ཧ ཛཱ་ཏེ་ཧི ཙ ཝི་པྤ་ཡུ་ཏྟེ་ན ཙ. ཏེ་སྭེ་ཝ ནཱ་མ་དྷ་མྨེ་སུ ཧེ་ཏུ་དྷ་མྨཱ ཧེ་ཏུ་བྷཱ་ཝེ་ན, ཨ་དྷི་པ་ཏི་དྷ་མྨཱ ཨ་དྷི་པ་ཏི་བྷཱ་ཝེ་ན, ཙེ་ཏ་ནཱ ཀ་མྨ་བྷཱ་ཝེ་ན, ཝི་པཱ་ཀ་དྷ་མྨཱ ཝི་པཱ་ཀ་བྷཱ་ཝེ་ན, ཨཱ་ཧཱ་ར་དྷ་མྨཱ ཨཱ་ཧཱ་ར བྷཱ་ཝེ་ན, ཨི་ནྡྲི་ཡ་དྷ་མྨཱ ཨི་ནྡྲི་ཡ་བྷཱ་ཝེ་ན, ཛྷཱ་ན་དྷ་མྨཱ ཛྷཱ་ན་བྷཱ་ཝེ་ན, མ་གྒ་དྷ་མྨཱ མ་གྒ་བྷཱ་ཝེ་ནཱ་ཏི ཡ་ཐཱ་ར་ཧཾ ཨ་ཊྛ་དྷཱ པ་ཙྩ་ཡཱ ཧོ་ནྟི. པ་ཙྪཱ་ཛཱ་ཏཱ ས་བྦེ ནཱ་མ་དྷ་མྨཱ པུ་རེ་ཛཱ་ཏཱ་ནཾ ཙི་ཏྟ་ཛ་རཱུ་པ་ཀ་ལཱ་པཱ་ནཾ ཨེ་ཀ་དྷཱ པ་ཙྩ་ཡཱ ཧོ་ནྟི པ་ཙྪཱ་ཛཱ་ཏེ་ན. ཨེ་ཝཾ ནཱ་མ་དྷ་མྨཱ ཙི་ཏྟ་ཛ་རཱུ་པ ཀ་ལཱ་པཱ་ནཾ ཡ་ཐཱ་ར་ཧཾ ཙུ་དྡ་ས་ཧི པ་ཙྩ་ཡེ་ཧི པ་ཙྩ་ཡཱ ཧོ་ནྟི. ཨི་དྷ་པི ད་ས པ་ཙྩ་ཡཱ ན ལ་བྦྷ་ནྟི ཨཱ་ར་མྨ་ཎ་ཉྩ ཨ་ན་ནྟ་ར་ཉྩ ས་མ་ན་ནྟ་ར་ཉྩ ཨ་ཉྙ་མ་ཉྙ་ཉྩ ཨུ་པ་ནི་སྶ་ཡོ ཙ པུ་རེ་ཛཱ་ཏོ ཙ ཨཱ་སེ་ཝ་ན་ཉྩ ས་མྤ་ཡུ་ཏྟོ ཙ ན་ཏྠི ཙ ཝི་ག་ཏོ ཙ.
པ་ཊི་ས་ནྡྷི་ཙི་ཏྟ་སྶ ཋི་ཏི་ཀཱ་ལ་ཏོ པ་ཊྛཱ་ཡ པ་ཝ་ཏྟི་ཀཱ་ལེ ས་བྦེ་པི ནཱ་མ་དྷ་མྨཱ ས་བྦེ་སཾ ཨུ་ཏུ་ཛ་རཱུ་པ་ཀ་ལཱ་པཱ་ན་ཉྩ ཨཱ་ཧཱ་ར་ཛ་རཱུ་པ ཀ་ལཱ་པཱ་ན་ཉྩ ཨེ་ཀ་དྷཱ པ་ཙྩ་ཡཱ ཧོ་ནྟི པ་ཙྪཱ་ཛཱ་ཏ་ཝ་སེ་ན. ཨེ་ཏྠ་པི པ་ཙྪཱ་ཛཱ་ཏ་ཝ་ཙ་ནེ་ན ཙ་ཏྟཱ་རོ པ་ཙྪཱ་ཛཱ་ཏ་ཛཱ་ཏི་ཀཱ ག་ཧི་ཏཱ ཧོ་ནྟི, སེ་སཱ ཝཱི་ས་ཏི པ་ཙྩ་ཡཱ ན ལ་བྦྷ་ནྟི.
ས་བྦེ་སུ པ་ན ཏེ་ཝཱི་ས་ཏི་ཡཱ རཱུ་པ་ཀ་ལཱ་པེ་སུ་ཙ་ཏྟཱ་རོ་མ་ཧཱ བྷཱུ་ཏཱ ཨ་ཉྙ་མ་ཉྙ་སྶ པ་ཉྩ་དྷཱ པ་ཙྩ་ཡཱ ཧོ་ནྟི ཙ་ཏཱུ་ཧི མ་ཧཱ་ས་ཧ ཛཱ་ཏེ་ཧི ཙ ཨ་ཉྙ་མ་ཉྙེ་ན ཙ, ས་ཧ་ཛཱ་ཏཱ་ནཾ ཨུ་པཱ་དཱ་རཱུ་པཱ་ནཾ ཙ་ཏུ་དྷཱ པ་ཙྩ་ཡཱ ཧོ་ནྟི ཙ་ཏཱུ་ཧི མ་ཧཱ་ས་ཧ་ཛཱ་ཏེ་ཧི. ཨཱ་ཧཱ་ར་རཱུ་པཾ ས་ཧ་ཛཱ་ཏཱ་ན་ཉྩ ཨ་ས་ཧ་ཛཱ་ཏཱ་ན་ཉྩ ས་བྦེ་སཾ ཨ་ཛ྄ཛྷ་ཏྟ་རཱུ་པ་ཀ་ལཱ་པཱ་ནཾ ཨཱ་ཧཱ་ར པ་ཙྩ་ཡེ་ན པ་ཙྩ་ཡོ ཧོ་ཏི. ན་ཝ་སུ ཀ་མྨ་ཛ་རཱུ་པ་ཀ་ལཱ་པེ་སུ ཛཱི་ཝི་ཏ་རཱུ་པཾ ས་ཧ་ཛཱ་ཏཱ་ན་མེ་ཝ རཱུ་པཱ་ནཾ ཨི་ནྡྲི་ཡ་པ་ཙྩ་ཡེ་ན པ་ཙྩ་ཡོ ཧོ་ཏི. ཨེ་ཝཾ ཨ་ཛ྄ཛྷ་ཏྟ་རཱུ་པ་དྷ་མྨཱ ཨ་ཛ྄ཛྷ་ཏྟ་རཱུ་པ་དྷ་མྨཱ་ནཾ ས་ཏྟ་དྷཱ པ་ཙྩ་ཡཱ ཧོ་ནྟི. བ་ཧི་དྡྷཱ རཱུ་པ་དྷ་མྨཱ པ་ན བ་ཧི་དྡྷཱ་བྷཱུ་ཏཱ་ནཾ དྭི་ནྣཾ ཨུ་ཏུ་ཛ་རཱུ་པ་ཀ་ལཱ་པཱ་ནཾ པ་ཉྩ་དྷཱ པ་ཙྩ་ཡཱ ཧོ་ནྟཱི་ཏི.
རཱུ་པ་ཀ་ལཱ་པེ་སུ པ་ཙྩ་ཡ་གྷ་ཊ་ནཱ་ན་ཡོ ནི་ཊྛི་ཏོ.
ཨེ་ཏྠ ཙ པ་ཊྛཱ་ན་ས་དྡ་སྶ ཨ་ཏྠོ ཝ་ཏྟ་བྦོ. པ་དྷཱ་ནཾ ཋཱ་ན་ནྟི པ་ཊྛཱ་ནཾ. ཏ་ཏྠ པ་དྷཱ་ན་ནྟི པ་མུ་ཁཾ, ཋཱ་ན་ནྟི པ་ཙྩ་ཡོ, པ་མུ་ཁ་པ་ཙྩ་ཡོ མུ་ཁྱ་པ་ཙྩ་ཡོ ཨེ་ཀ་ནྟ་པ་ཙྩ་ཡོ་ཏི ཝུ་ཏྟཾ ཧོ་ཏི. སོ ཙ ཨེ་ཀ་ནྟ པ་ཙྩ་ཡོ ཨེ་ཀ་ནྟ་པ་ཙྩ་ཡུ་པྤ་ནྣཾ པ་ཊི་ཙྩ ཝ་ཏྟ་བྦོ.
དུ་ཝི་དྷ་ཉྷི པ་ཙྩ་ཡུ་པྤ་ནྣཾ མུ་ཁྱ་པ་ཙྩ་ཡུ་པྤ་ནྣཾ ནི་སྶ་ནྡ་པ་ཙྩ་ཡུ་པྤ་ནྣ་ནྟི. ཏ་ཏྠ མུ་ཁྱ་པ་ཙྩ་ཡུ་པྤ་ནྣཾ ནཱ་མ མཱུ་ལ་པ་ཙྩ་ཡུ་པྤ་ནྣཾ, ནི་སྶ་ནྡ་པ་ཙྩ་ཡུ་པྤ་ནྣཾ ནཱ་མ པ་ར་མྤ་ར པ་ཙྩ་ཡུ་པྤ་ནྣཾ. ཏ་ཏྠ མཱུ་ལ་པ་ཙྩ་ཡུ་པྤ་ནྣ་མེ་ཝ ཨེ་ཀ་ནྟ་པ་ཙྩ་ཡུ་པྤ་ནྣཾ ནཱ་མ. ཏ་ཉྷི ཨ་ཏྟ་ནོ པ་ཙྩ་ཡེ ས་ཏི ཨེ་ཀ་ནྟེ་ན ཨུ་པྤ་ཛྫ་ཏི་ཡེ་ཝ, ནོ ནུ་པྤ་ཛྫ་ཏི. པ་ར་མྤ་ར་པ་ཙྩ་ཡུ་པྤ་ནྣཾ པ་ན ཨ་ནེ་ཀ་ནྟ་པ་ཙྩ་ཡུ་པྤ་ནྣཾ་ནཱ་མ, ཏ་ཉྷི ཏ་སྨིཾ པ་ཙྩ་ཡེ ས་ཏི་པི ཨུ་པྤ་ཛྫ་ཏི ཝཱ, ན ཝཱ ཨུ་པྤ་ཛྫ་ཏི. ཏ་ཏྠ ཨེ་ཀ་ནྟ་པ་ཙྩ་ཡུ་པྤ་ནྣཾ པ་ཊི་ཙྩ སོ པ་ཙྩ་ཡོ ཨེ་ཀ་ནྟ་པ་ཙྩ་ཡོ ནཱ་མ. སོ ཨེ་ཝ ཨི་མ་སྨིཾ མ་ཧཱ་པ་ཀ་ར་ཎེ ཝུ་ཏྟོ. ཏ་ཏོ ཨེ་ཝ ཨ་ཡཾ ཙ་ཏུ་ཝཱི་ས་ཏི་པ་ཙྩ་ཡ་ག་ཎོ ཙ ཨི་མཾ མ་ཧཱ པ་ཀ་ར་ཎ་ཉྩ པ་ཊྛཱ་ན་ནྟི ཝུ་ཙྩ་ཏི.
ཏ་ཏྠ ཨེ་ཀ་སྶ པུ་རི་ས་སྶ དྷ་ན་དྷ་ཉྙ་ཏྠཱ་ཡ ལོ་བྷོ ཨུ་པྤ་ཛྫ་ཏི. སོ ལོ་བྷ་ཝ་སེ་ན ཨུ་ཊྛཱ་ཡ ཨ་ར་ཉྙཾ ག་ནྟྭཱ ཨེ་ཀ་སྨིཾ པ་དེ་སེ ཁེ་ཏྟཱ་ནི ཀ་རོ་ཏི, ཝ་ཏྠཱུ་ནི ཀ་རོ་ཏི, ཨུ་ཡྻཱ་ནཱ་ནི ཀ་རོ་ཏི. ཏེ་སུ ས་མྤ་ཛྫ་མཱ་ནེ་སུ སོ པུ་རི་སོ བ་ཧཱུ་ནི དྷ་ན་དྷ་ཉྙཱ་ནི ལ་བྷི་ཏྭཱ ཨ་ཏྟ་ནཱ ཙ པ་རི་བྷུ་ཉྫ་ཏི, པུ་ཏྟ་དཱ་རེ ཙ པོ་སེ་ཏི, པུ་ཉྙཱ་ནི ཙ ཀ་རོ་ཏི, པུ་ཉྙ་ཕ་ལཱ་ནི ཙ ཨཱ་ཡ་ཏིཾ པ་ཙྩ་ནུ་བྷ་ཝི་སྶ་ཏི. ཏ་ཏྠ ལོ་བྷ་ས་ཧ ཛཱ་ཏཱ་ནི ནཱ་མ་རཱུ་པཱ་ནི མུ་ཁྱ་པ་ཙྩ་ཡུ་པྤ་ནྣཱ་ནི ནཱ་མ. ཏ་ཏོ པ་རཾ ཡཱ་ཝ ཨཱ་ཡ་ཏིཾ བྷ་ཝེ་སུ པུ་ཉྙ་ཕ་ལཱ་ནི པ་ཙྩ་ནུ་བྷོ་ཏི, ཏཱ་ཝ ཨུ་པྤ་ནྣཱ་ནི པ་ར་མྤ་ར་ཕ་ལཱ་ནི ཏ་སྶ ལོ་བྷ་སྶ ནི་སྶ་ནྡ་པ་ཙྩ་ཡུ་པྤ་ནྣཱ་ནི ནཱ་མ. ཏེ་སུ དྭཱི་སུ པ་ཙྩ་ཡུ་པྤ་ནྣེ་སུ མུ་ཁྱ་པ་ཙྩ་ཡུ་པྤ་ནྣ་མེ་ཝ པ་ཊྛཱ་ནེ ཝུ་ཏྟཾ. ནི་སྶ་ནྡ་པ་ཙྩ་ཡུ་པྤ་ནྣཾ པ་ན སུ་ཏྟ་ནྟ་ན་ཡེ་ན ཀ་ཐེ་ཏ་བྦཾ. ཏ་ཏྠ སུ་ཏྟ་ནྟ་ན་ཡོ ནཱ་མ ཨི་མ་སྨིཾ ས་ཏི ཨི་དཾ ཧོ་ཏི, ཨི་མ་སྶ ཨུ་པྤཱ་དཱ ཨི་དཾ ཨུ་པྤ་ཛྫ་ཏཱི་ཏི ཨེ་ཝ་རཱུ་པོ པ་ཙྩ་ཡ་ན་ཡོ. ཨ་པི ཙ ལོ་བྷོ དོ་སོ མོ་ཧོ་ཏི ཏ་ཡོ དྷ་མྨཱ ས་ཀ་ལ་སྶ ས་ཏྟ་ལོ་ཀ་སྶ་པི ས་ངྑཱ་ར་ལོ་ཀ་སྶ་པི ཨོ་ཀཱ་ས ལོ་ཀ་སྶ་པི ཝི་པ་ཏྟི་ཡཱ མཱུ་ལ་ཊྛེ་ན ཧེ་ཏཱུ ནཱ་མ. ཨ་ལོ་བྷོ ཨ་དོ་སོ ཨ་མོ་ཧོ་ཏི ཏ་ཡོ དྷ་མྨཱ ས་མྤ་ཏྟི་ཡཱ མཱུ་ལ་ཊྛེ་ན ཧེ་ཏཱུ་ནཱ་མཱ་ཏི ཀ་ཐེ་ཏ་བྦཾ. ཨེ་ས ན་ཡོ ས་བྦེ་སུ པ་ཊྛཱ་ན་པ་ཙྩ་ཡེ་སུ ཡ་ཐཱ་ར་ཧཾ ཝེ་དི་ཏ་བྦོ. ཨེ་ཝ་ཉྩ ས་ཏི ལོ་ཀེ ས་བྦཱ ལོ་ཀ་པྤ་ཝ་ཏྟི་ཡོ ཨི་མེ་སཾ ཙ་ཏུ་ཝཱི་ས་ཏི་ཡཱ པ་ཙྩ་ཡཱ་ནཾ མུ་ཁྱ པ་ཙྩ་ཡུ་པྤ་ནྣེ་ན ས་དྡྷིཾ ནི་སྶ་ནྡ་པ་ཙྩ་ཡུ་པྤ་ནྣཱ ཨེ་ཝ ཧོ་ནྟཱི་ཏི ཝེ་དི་ཏ་བྦོ་ཏི.
ཨེ་ཏྟཱ་ཝ་ཏཱ པ་ཙྩ་ཡཱ་ནཾ ཨ་ཏྠ་དཱི་པ་ནཱ པ་ཙྩ་ཡཱ་ནཾ ས་བྷཱ་ག་ས་ངྒ་ཧོ པ་ཙྩ་ཡཱ་ནཾ གྷ་ཊ་ནཱ་ན་ཡོ་ཏི ཏཱི་ཧི ཀ་ཎྜེ་ཧི པ་རི་ཙྪི་ནྣཱ པ་ཊྛཱ་ནུ་དྡེ་ས དཱི་པ་ནཱི ནི་ཊྛི་ཏཱ ཧོ་ཏི.
མྲ་མྨ་ར་ཊྛེ མ྄ौཾ་ཛྭཱ་ན་ག་རེ ལེ་ཌཱི་ཏཱི་ཨ་ར་ཉྙ་ཝི་ཧཱ་ར་ཝཱ་སི་ནཱ མ་ཧཱ ཐེ་རེ་ན ཀ་ཏཱ་ཡཾ པ་ཙྩ་ཡུ་དྡེ་ས་དཱི་པ་ནཱི.