ས་ཊྛི་མ པ་རི་ཙྪེ་ད
ཀུ་མཱ་རོ་ད་ཡོ
༡. རོ་ཧ་ཎེ ནི་ཝ་སི་ཏྠཱ’ཝ, ཛ་ཡ་བཱ་ཧུ་མ་ཧཱི་པ་ཏི;
མི་ཏྟཱ་ཝ྄ཧཱ རཱ་ཛི་ནཱི ཙེ་ཝ, ཏ་དཱ ཀཱ་ལ་མ་ཀཾ་སུ ཏེ.
༢. སི་རཱི་ཝ་ལླ་བྷ་ཛཱ་ཡཱ’ཐ, ཛ་ནེ་སི སུ་ག་ལཱ དུ་ཝེ;
མཱ་ཎ་བྷ་ར་ཎ་ཀཾ པུ་ཏྟཾ, པུ་ཏྟིཾ ལཱི་ལཱ་ཝ་ཏི་མྤི ཙ.
༣. མཱ་ཎཱ་བྷ་ར་ཎ་བྷཱུ་པཱ་ལ-དེ་ཝཱི’པི ར་ཏ་ནཱ་ཝ་ལཱི;
མི་ཏྟཾ པ་བྷཱ་ཝ་ཏི་ཉྩཱ་པི, ཨ་ལ་བྷཱི དྷཱི་ཏ་རོ དུ་ཝེ.
༤. པ་སྶ་ནྟ་སྶ ཨུ་བྷོ ཏཱ་ཡོ, དྷཱི་ཏ་རོ ཝཱི་ར་བཱ་ཧུ་ནོ;
ཏ་དཱ མ་ཧཱ་དི་པཱ་ད་སྶ, ཨེ་ཝཾ ཨཱ་སི ཝི་ཏ་ཀྐི་ཏཾ.
༥. ལོ་ཀཱ་བྷི་ས་མྨ་ཏེ ས་བྦ-བྷཱུ་པཱ་ལ་ནྭ་ཡ་མུ་དྡྷ་ནི;
ཝི་སུ་དྡྷེ སོ་མ་ཝཾ་ས་མྷི, ཨ་བྷི་ཛཱ་ཏཱ མ་ཡཾ པ་ན.
༦. པི་ཧ་ནཱི་ཡ་ཏ་རཱ་ཀཱ་རཱ, ས་བྦ་ས་ཏྟི་ས་མུ་ནྣ་ཏཱ;
ནཱ་ནཱ་ཝི་ཛྫཱ་སུ ནི་པུ་ཎཱ, ཧ་ཏྠི་ཨ་སྶཱ་དི་སུ་ཀྑ་མཱ.
༧. ཏ་ཐཱ པེ་ཀཱ་ཀི་ནཱ ཝེ’ཏེ, ཏ་ཡོ ཝི་ཀྐ་མ་བཱ་ཧུ་ནཱ;
པ་རཱ་ཛ་ཡཾ པ་རི་བྷ་ཝཾ, པཱ་པི་ཏཱ བ་ཧུ་སོ ར་ཎེ.
༨. སཱུ་ནུ་ནོ སུ་ས་མ་ཏྠ་སྶ, ཝི་སོ་དྷེ་ཏུ མི་མཾ མ་ལཾ;
ན དི་སྶ་ཏེ པཱ་ཏུ་བྷཱ་ཝོ, ཨ་ཧོ ནོ ཨ་པྤ་པུ་ཉྙ་ཏཱ.
༩. ཛ་ན་ཝཱ་ད་ཀི་ལི་ཊྛེ་ན, རཱ་ཛ་ཏྟེ་ནཱ་པི ཀིཾ མ་མ;
ཨི་དཱ་ནི ཝི་ས་ཡཱ་ས་ངྒཾ, ཧི་ཏྭཱ ཀ་ལྱཱ་ཎ་ཀ་མྨ་སུ.
༡༠. ཨ་པྤ་མ་ཏྟ་སྶ ས་ཏ་ཏཾ, ནེ་ཏ་བྦཱ ཝཱ་ས་རཱ’ཨི་ཏི;
ནི་ཡྻཱ་ཏེ་ཏྭཱ ཨ་མ་ཙྩཱ་ནཾ, ས་བྦཾ ར་ཛྫ་ཝི་ཙཱ་ར་ཎཾ.
༡༡. ཏ་ཧིཾ ས་ཏྟ’ཊྛ་མཱ་ས་ཉྷི, ཝ་སཾ ར་ཏྟི་ཡ་མེ་ཀ་དཱ;
དེ་ཝ་རཱ་ཛ་གྷ་རེ་སེ་ཡྻཾ, ཀ་པྤེ་སི སཱི་ལ་སཾ་ཡ་ཏོ.
༡༢. ཏ་ཏོ པ་ཙྩཱུ་ས་ཀཱ་ལ་མྷི, དེ་ཝ་པུ་ཏྟཾ མ་ཧི་དྡྷི་ཀཾ;
ཝི་ཙི་ཏྟ་ཝ་ཏྠཱ་བྷ་ར་ཎཾ, ག་ནྡྷ་མཱ་ལཱ་ཝི་བྷཱུ་སི་ཏཾ.
༡༣. ཨུ་ལཱ༹་ར་ཏ་ར་རཱུ་པེ་ན, དེ་ཧོ་བྷཱ་སེ་ན ཨ་ཏྟ་ནོ;
ཨོ་བྷཱ་སེ་ནྟཾ ཨ་སེ་སཱ’སཱ, སཱུ་རི་ཡ་ཉྩ ན བྷུ་གྒ་ཏཾ.
༡༤. ཝ་ད་ནྟཾ སུ་པི་ནེ ཨེ་ཝཾ, ཨ་ད་ཀྑི ད་ར་ཎཱི་པ་ཏི;
པ་སཱི་ད་སྶུ མ་ཧཱ་བྷཱ་ག, པི་ཏོ་བྷ་ཝ མ་ཧི་པ་ཏི.
༡༥. དྷ་ཉྙ་ལ་ཀྑ་ཎ་ས་མྤ་ནྣོ, ཨི་ཙྪི་ཏ་ཏྠ་སྶ་སཱ་དྷ་ཀོ;
ཝི་ནཱི་ཏོ ལོ་ཀ་ཀུ་ཧ་ར-བྱཱ་པི་ཏེ་ཛོ པ་ར་ཀྐ་མོ.
༡༦. ཨཱ་ཎ་བ་ལ་ཡ་སོ་ཀི་ཏྟི-བྷཱ་སུ་རོ ས་གྒུ་ཎཱ་ཀ་རོ;
ལོ་ཀ་སཱ་ས་ན་སཾ་ཝུ་དྡྷི-ཀ་རོ པུ་ཏྟ་ཝ་རོ ཏ་ཝ.
༡༧. ལ་བྦྷཱི་སྶ་ཏེ མ་ཧཱ་རཱ་ཛ, ན ཙི་ར་སྶེ་ཝ ས་མྤ་ཏི;
པུ་ཏྟ་དཱ་རཱ་དྷི་ཝུ་ཏྠཾ ཏཾ, པུ་རཾ ཁི་པྤཾ པ་ཡཱ་ཧཱི་ཏི.
༡༨. པ་བུ་ཛ྄ཛྷི་ཏྭཱ་ན ས་ཉྫཱ་ཏ-པཱི་ཏི་ཝེ་གོ་ཐ ར་ཏྟི་ཡཱ;
ཝི་བྷཱ་ཏཱ་ཡ ཏ་ཏོ་པོ་ངྑ-གཱ་མཾ ག་ཉྪི་ན་རུ་ཏྟ་མོ.
༡༩. ཡ་ཐཱ དི་ཊྛ་པྤ་ཀཱ་ར་ནྟཾ, ཀ་ཐེ་སི སུ་པི་ནཾ སུ་བྷཾ;
མ་ཧེ་སཱི པ་མུ་ཁཱ་ནཾ སོ, ཨ་མ་ཙྩཱ་ནཾ མ་ཧཱི་པ་ཏི.
༢༠. ས་དྡྷིཾ མ་ཧེ་སི་ཡཱ ཏ་ཏྠ, པ་ཏྠེ་ནྟོ པུ་ཏྟ་མུ་ཏྟ་མཾ;
ཙི་ནྟོ་ནྟོ དཱ་ན་སཱི་ལཱ་དིཾ, སུ་བྷཾ ནཱ་ན་པྤ་ཀཱ་ར་ཀཾ.
༢༡. ཨ་ཐེ་ཀ་དི་ཝ་སཾ་ཀཱ་ལེ, པ་ཙྩཱུ་སེ སུ་པི་ནེ པ་ན;
ས་བྦ་ལ་ཀྑ་ཎ་ས་མྤ་ནྣཾ, ས་བྦ་སེ་ཏཾ མ་ནོ་ཧ་རཾ.
༢༢. ད་ནྟཱི་པོ་ཏ་ཝ་རཾ ད་ནྟཾ, ཀ་ཎྞེ ག་ཎི་ཡ་པེ་མ་ཏོ;
པ་ཝི་ས་ནྟ་མི་ཝ་ཏྟཱ་ནཾ, སེ་ཡྻཱ་ག་བྦྷཾ མ་ཧེ་སི་ཡཱ.
༢༣. ས་མྤ་སྶི་ཡ པ་བུ་ཛ྄ཛྷི་ཏྭཱ, ཨུ་ཊྛཱ་ཡ ས་ཡ་ནཱ་ཝ་རཱ;
ས་ཉྫཱ་ཏ་པཱི་ཏི་པཱ་མོ་ཛྫ-ཝེ་ག་པཱི་ཎི་ཏ་མཱ་ན་སོ.
༢༤. ཏཱ་ཡཾ ཝེ་ལཱ་ཡ་མེ་དཱ་སུ-སེ་ཡྻཱ་ག་བྦྷཾ མ་ཧེ་སི་ཡཱ;
པ་ཝི་སྶ་སུ་པི་ནཾ ཏ་སྶཱ, ཡ་ཐཱ་དི་ཊྛཾ པ་ཀཱ་ས་ཡཱི.
༢༥. ཨ་ཧ་མྤི ཏཱ་དི་སཾ ཧ་ཏྠི-པོ་ཏ་ཀཾ ས་ཡ་ནཾ མ་མ;
པ་ད་ཀྑི་ཎཾ ཀ་རི་ཏྭཱ་ན, ཋི་ཏཾ སོ་ཎྜེ ས་མཱ་དི་ཡ.
༢༦. ཨཱ་ཀ་ཌྜྷི་ཏྭཱ་ན ས་ཡ་ནཾ, ས་མཱ་རོ་པི་ཡ པེ་མ་ཏོ;
ཨཱ་ལི་ངྒིཾ སུ་པི་ན་མྷཱི་ཏི, དེ་ཝཱི ཙཱ་པི ཏ་མ་བྲ་ཝཱི.
༢༧. ཨུ་བྷོ ཏེ ཨ་ཉྙ་མ་ཉྙ་སྶ, དི་ཊྛ་མེ་ཝཾ པ་ཀཱ་སི་ཡ;
ཨུ་ཊྛཱ་པེ་སུཾ པ་ཧ་ཊྛཱ་ཝ, ཝཱི་ཏ་ནི་དྡཱ་རུ་ཎཾ ཏ་དཱ.
༢༨. ཏ་ཏོ པཱ་ཏོ ཨུ་པ་ཊྛཱ་ཏུ, མུ་པ་ཡཱ་ཏཾ པུ་རོ་ཧི་ཏཾ;
ནེ་མི་ཏྟ་ཀེ ཙ པུ་ཙྪིཾ་སུ, སུ་ནི་ཏྭཱ ཏེ པ་མོ་དི་ཏཱ.
༢༩. ན ཙི་ར་སྶེ་ཝ པུ་ཏྟ་སྶ, དྷ་ཉྙ་ལ་ཀྑ་ཎ་སཱ་ལི་ནོ;
ཨུ་པྤ་ཏྟི་ཡཱ ཨ་ཝ་སྶཾ’ཝ, བྷ་ཝཾ་ཏ་བྦ་ནྟི ཀི་ཏྟ་ཡུཾ.
༣༠. ཏཾ སུ་ཎི་ཏྭཱ ཨ་མ་ཙྩཱ ཙ, ཏ་ཐཱ ན་ག་ར་ཝཱ་སི་ནོ;
ཨ་ཝི་ནྡིཾ་སུ ཛ་ནི་ནྡོ ཙ, ས་བྦེ་པཱི་ཏི མ་ཧུ་སྶ་ཝཾ.
༣༡. ཏ་ཏོ པ་ཊྛཱ་ཡ སོ་ཏྠཱ་ནཾ, པ་ཏྠ་ཡཾ པ་ཏྠི་ཝོ་བྷུ་སཾ;
བྷི་ཀྑུ་ས་ངྒྷེ་ན བ་ཧུ་སོ, བྷ་ཎཱ་པེ་སི པ་རི་ཏྟ་ཀཾ.
༣༢. མ་ཎི་མུ་ཏྟཱ་དི་ཀཾ ཙི་ཏྟཾ, མ་ཧ་གྒྷ་མ་ནུ་ཝཱ་ས་རཾ;
པ་རི་ཙྩ་ཛི དཱ་ན་མུ་ཁེ, ཡཱ་ཙ་ཀཱ་ན་མ་ནེ་ཀ་སོ.
༣༣. པུ་རོ་ཧི་ཏཱ་དི་ཝི་པྤེ་ཧི, ཝེ་ད་ཝེ་ད་ངྒ་ཝི་ཉྙཱུ་ཧི;
ཝ་ཏྟཱ་པེ་སི ཙ ཧོ་མཱ་དི-ཝི་དྷཱ་ནཾ སོ་ཏྠི ས་མྨ་ཏཾ.
༣༤. སུ་ཝི་ན་ཊྛེ ཝི་ཧཱ་རེ ཙ, དྷཱ་ཏུ་ག་བྦྷེ ཙ ཝཱ་པི་ཡོ;
ཛི་ཎྞཱ ཙ པ་ཊི་ས་ངྑ་ཏྟུཾ, ཡོ་ཛ་ཡཱི རཱ་ཛ་ཀ་པྤི་ཀེ.
༣༥. དི་ནཾ ན་ཡ་ནྟེ ཀ་ལྱཱ་ཎ-ཀ་མྨེ་ནེ’ཝཾ ན་རི་སྶ་རེ;
ན ཙི་རཾ ས་ཎྛ་ཧི ག་བྦྷ-ཝ་རོ ཀུ་ཙྪི་མྷི དེ་ཝི་ཡཱ.
༣༦. ཏ་ཏོ་ཝ་ག་མྨ ཏཾ ཧ་ཊྛ-པ་ཧ་ཊྛོ སོ ན་རི་སྶ་རོ;
མ་ཧ་ནྟཾ དེ་ཝི་ཡཱ ག་བྦྷ-པ་རི་ཧཱ་ར་མ་དཱ་པ་ཡི.
༣༧. པ་རི་པ་ཀྐ་ག་བྦྷཱ དེ་ཝཱི, ཀ་མེ་ན ཛ་ན་ཡཱི་སུ་ཀཾ;
ས་མ་ཡེ བྷ་དྡ་ན་ཀྑ་ཏྟ-མུ་ཧུ་ཏྟེ་ན་བྷི་ལ་ཀྑི་ཏེ.
༣༨. སུ་པྤ་ས་ནྣཱ ཨ་སེ་སཱ ཙ, དི་སཱ་ཡོ ཏཾ་ཁ་ཎེ ཨ་ཧུ;
ས་མཱི་ར་ཎེ ཙ ཝཱ་སིཾ་སུ, སུ་ག་ནྡྷི་མུ་དུ་སཱི་ཏ་ལཱ.
༣༩. ད་ནྟཱི་ནཾ ཀོ་ཉྩ་ནཱ་དེ་ན, ཧ་ཡཱ་ནཾ ཧེ་སི་ཏེ་ན ཙ;
རཱ་ཛ་ངྒ་ཎཾ ཏ་དཱ་ཛཱ་ཏཾ, མ་ཧཱ་ཀོ་ལཱ་ཧ་ལཱ ཀཱུ་ལཾ.
༤༠. ཨ་ཙྪེ་རཱ་ཏི་ས་ཡེ ཨེ་ཝཾ, པཱ་ཏུ་བྷཱུ་ཏེ ཨ་ནེ་ཀ་དྷཱ;
དི་སྭཱ ཏཾ ཝི་མྷ་ཡ་པྤ་ཏྟོ, མཱ་ཎ་བྷ་ར་ཎ་བྷཱུ་པ་ཏི.
༤༡. སུ་ཏྭཱ ནི་ཛ་སྶ པུ་ཏྟ་སྶ, ཏ་དཱ ས་ཉྫཱ་ཏ་སཱ་ས་ནཾ;
ཨ་མ་ཏེ་ནཱ་བྷི་སི་ཏྟོ་ཝ, པཱི་ཏི་པུ་ཎྞ་མ་ནོ་ར་ཐོ.
༤༢. མོ་ཙཱ་པེ་ཏྭཱ ཏ་དཱ ཀཱ་རཱ-གྷ་རེ བ་དྡྷེ བ་ཧཱུ་ཛ་ནེ;
དཱ་ནཾ ཨུ་ལཱ༹་རཾ ས་མ་ཎ-བྲཱ་ཧྨ་ཎཱ་ནཾ པ་དཱ་པ་ཡི.
༤༣. ཨ་མ་ཙྩ་པ་མུ་ཁཱ ཙཱ་པི, ཛ་ནཱ་པུ་ར་ནི་ཝཱ་སི་ནོ;
ཀ་ད་ལཱི་ཏོ་ར་ཎཱ་དཱི་ཧི, རཱ་ཛ་དྷཱ་ནཱི མ་ནེ་ཀ་དྷཱ.
༤༤. ཨ་ལ་ངྐ་རི་ཏྭཱ ས་ཀ་ལཾ, སུ་མ་ཎྜི་ཏ་པ་སཱ་དྷི་ཏཱ;
ཚ་ཎཾ མ་ཧ་ནྟཾ ཝ་ཏྟེ་སུཾ, ཀ་ཏི་པཱ་ཧཾ མ་ནོ་ར་མཾ.
༤༥. ཝེ་དེ ཝུ་ཏྟ་ཝི་དྷཱ་ནེ་ན, ཛཱ་ཏ་ཀ་མྨཱ་དི་ཀཾ ཝི་དྷིཾ;
ས་བྦཾ ས་མཱ་པ་ཡི་ཏྭཱ་ན, ཀུ་མཱ་ར་སྶཱ’ཝ་ནཱི་པ་ཏི.
༤༦. པུ་རོ་ཧི་ཏཱ་ད་ཡོ ཝི་པྤེ, ཏ་ཏོ ལ་ཀྑ་ཎ་པཱ་ཋ་ཀེ;
ཨཱ་ཎཱ་པེ་ཏྭཱ་ན ས་ཀྐཱ་ར-ས་མྨཱ་ན་ཝི་དྷི་པུ་བྦ་ཀཾ.
༤༧. ནི་ཡོ་ཛེ་སི ཀུ་མཱ་ར་སྶ, ལ་ཀྑ་ཎཱ་ནཾ པ་ཊི་གྒ་ཧེ;
སཱ་དྷ་ཀཾ ས་ཀ་ལཾ ཏ་སྶ, ཡ་ཏྠ་པཱ་དཱ་དི་ལ་ཀྑ་ཎཾ.
༤༨. ཨུ་པ་དྷཱ་རི་ཡ མ་ཧཱ་མ་ཙྩ-ག་ཎ་མ་ཛ྄ཛྷ་ག་ཏ་སྶ ཏེ;
རཱ་ཛི་ནོ དེ་ཝི་ཡཱ ཙཱ་པི, པ་ཀཱ་སེ་སུཾ པ་མོ་དི་ཏཱ.
༤༩. ལ་ངྐཱ་དཱི་པཾ ཋ་པེ་ཏྭཱ་ན, ཛ་མྦུ་དཱི་པ་ཏ་ལ་མྤི ཙ;
ཨེ་ཀ་ཙྪ་ཏྟ་ངྐི་ཏཾ ཀ་ཏྭཱ-ནུ་བྷོ་ཏྟུཾ ནི་པུ་ཎོ ཨི་ཏི.
༥༠. ཏེ ས་ནྟ་པྤི་ཡ བྷོ་གེ་ཧི, བྷི་ཡྻོ པུ་ཙྪི་ཏྠ སཱ་ད་རཾ;
ས་ནྡི་སྶ་མཱ་ནཾ ཡཾ་ཀི་ཉྩི, ཨ་རི་ཊྛཾ ཨ་ཏྠི ན་ཏྠཱི’ཏི.
༥༡. དཱི་གྷཱ་ཡུ་ཀོ ཀུ་མཱ་རོ’ཡཾ, ཀི་ཉྩི པ་ཉྙཱ་ཡ་ཏེ ཝ་ཏ;
ཛ་ན་ཀཱ་རི་ཊྛ་ཡོ་གོ’ཏི, ཏེ མ་ཧཱི་པ་ཏི་ནོ’བྲ་ཝུཾ.
༥༢. ཏ་སྶཱ་རི་ཛ་ན་ས་མྨ་དྡི-པ་ཏཱ་པ་བྷུ་ཛ་ཡོ ག་ཏོ;
སོ པ་ར་ཀྐ་མ་བཱ་ཧཱུ’ཏི, ཨ་ནྭ་ཏྠ་ནཱ་མ་མ་གྒ་ཧཱི.
༥༣. ཀ་ཎྞ་ཝེ དྷ་མ་ཧ་ཉྩེ་ཝ, ཨ་ནྣུ་པཱ་ས་ན་མ་ངྒ་ལཾ;
ཀཱ་རཱ་པི་ཡ ཝི་དྷཱ་ན་ཉྙཱུ, ཡ་ཐཱ་ཝི་དྷི་མ་སེ་ས་ཏོ.
༥༤. ར་ཉྙོ ཝི་ཀྐ་མ་བཱ་ཧུ་སྶ, ས་པུ་ཏྟུ་པྤ་ཏྟི་སཱ་ས་ནཾ;
ཝ་ཏྟུཾ ས་དཱུ་ཏེ པེ་སེ་སི, པུ་ལ་ཏྠི་ན་ག་རཾ ཏ་དཱ.
༥༥. ཏེ་ཧི་སོ བྷཱ་གི་ནེ་ཡྻ་སྶ, མ་ཧཱ་བྷཱ་ག་ཏྟ་ན་མྤི ཙ;
ཛ་ན་ཀཱ་རི་ཊྛ་ཡོ་ག་ཉྩ, སུ་ཏྭཱ ཝི་ཀྐ་མ་བཱ་ཧུ་སོ.
༥༦. དྷ་ཉྙཾ ཝི་ཛ་ཡ་རཱ་ཛཱ་དི-རཱ་ཛ་མཱ་ལཱ་ཡ ནཱ་ཡ་ཀཾ;
མ་ཎིཾ་ཝ བྷཱ་སུ་རཾ མ་ཡ྄ཧཾ, བྷཱ་གི་ནེ་ཡྻཾ ཛ་ནེ་སི་སོ.
༥༧. ཧཱ་ནི ཡཱ་ཀཱ་ཙི་ས་ཏ་ཏཾ, ཡ་ཐཱ ཏ་སྶ ན ཧེ་སྶ་ཏི;
ཏ་ཐཱ མ་མ་ནྟི་ཀེ་ཡེ་ཝ, ཀུ་མཱ་རོ ཨེ་ཏྠ ཝ་ཌྜྷ་ཏཾ.
༥༨. ཨ་ལ་དྡྷཾ ལ་བྷི་ཏུཾ ལཱ་བྷཾ, ལ་དྡྷ་ཉྩ པ་རི་ར་ཀྑི་ཏུཾ;
ས་བྦ་ཐཱ ན ས་མ་ཏྠོ་ཡཾ, པུ་ཏྟོ ག་ཛ་བཱ་ཧུ མ་མ.
༥༩. སཱུ་ར་བྷཱ་ཝཱ་དི་ཡུ་ཏྟོ’པི, མ་ཧི་ནྡ་ཝ྄ཧ་པ་རོ་སུ་ཏོ;
ནི་ཧཱི་ནོ མཱ་ཏུ་གོ་ཏྟེ་ན, ན ར་ཛྫ་སྶ ར་ཧོ མ་མ.
༦༠. ཋི་ཏ་སྶ ཝི་ཀྐ་ཛཱ་ཏེ་ན, ནེ་ཀ་སོ ས་ཉྩི་ཏེ་ན མེ;
ར་ཛྫ་སྶ བྷཱ་གི་ནེ་ཡྻོ’ཝ, ཀཱ་མཾ བྷཱ་གཱི བྷ་ཝི་སྶ་ཏི.
༦༡. ཨི་ཏི་པེ་སེ་སི དཱུ་ཏེ སོ, ཨཱ་ནེ་ཏུཾ ཏཾ ཀུ་མཱ་ར་ཀཾ;
ཀུ་མཱ་རཱ བྷ་ར་ཎཾ ད་ཏྭཱ, སེ་སཾ སཱ་ར་ཉྩུ་པཱ་ཡ་ནཾ.
༦༢. ས་བྦཾ དཱུ་ཏ་མུ་ཁཱ སུ་ཏྭཱ, ཝཱི་ར་བཱ་ཧུ མ་ཧཱི་པ་ཏི;
ཏ་སྶེ་ཏཾ ཝ་ཙ་ནཾ ཡུ་ཏྟཾ, ཝུ་ཏྟཾ མེ་ཧི་ཏ བུ་དྡྷི་ཡཱ.
༦༣. ཏ་ཐཱ་པི ཙ ནི་ཛཱ་རི་ཊྛ-པ་ཊི་ཀཱ་ར་ཏྠ་མཱི་དི་སཾ;
ཨོ་ར་སཾ པུ་ཏྟ་ར་ཏ་ནཾ, པེ་སེ་ཏུཾ ནཱ’ནུ་རཱུ་པ་ཀཾ.
༦༤. ཀི་ཉྩ ཏ་ཏྠ ཀུ་མཱ་ར་མྷི, ནཱི་ཏེ ཝི་ཀྐ་མ བཱ་ཧུ་ནོ;
པ་ཀྑོ ལ་དྡྷ་མ་ཧཱ་ཝཱ་ཧ-བ་ལོ ཝི་ཡ ཧུ་ཏཱ་ས་ནོ.
༦༥. ཨ་ཙྩུ་ནྣ་ཏེ་ན མ་ཧ་ཏཱ, ཏེ་ཛ་སཱ ས་ཉྫ་ལི་སྶ་ཏི;
ཧཱ་ནི་རེ་ཝ ཝ་ཏ་མྷཱ་ཀཾ, མ་ཧ་ཏཱི ཧེ་སྶ་ཏེ བྷུ་སཾ.
༦༦. ཨི་ཏི ཧ་ཏྠེ ག་ཏཱ་ནཾ སོ, དཱུ་ཏཱ་ནཾ ཐ་ན་ཡཾ ས་ཀཾ;
ཨ་པེ་སེ་ཏྭཱ ཝི་ས་ཛྫེ་སི, པ་སཱ་དི་ཡ མ་ནེ་ན སོ.
༦༧. ས་པུ་ཏྟ་དཱ་རེ་ཧི ས་མ་གྒ་ཝཱ་སཾ,
ན་རཱ་དི་ནཱ་ཐོ ནི་ཝ་སཾ ཏ་ཧིཾ་སོ;
ཏི་བྦེ་ན ཕུ་ཊྛོ མ་ཧ་ཏཱ་ག་དེ་ན,
ར་ཛྫེ་ན ས་དྡྷིཾ ཝི་ཛ་ཧི་ཏྠ དེ་སཾ.
སུ་ཛ་ན་པྤ་སཱ་ད་སཾ་ཝེ ག་ཏྠཱ་ཡ ཀ་ཏེ མ་ཧཱ་ཝཾ་སེ
ཀུ་མཱ་རོ་ད་ཡོ ནཱ་མ
ས་ཊྛི་མོ པ་རི་ཙྪེ་དོ.