ཚ་པ་ཉྙཱ་ས་ཏི་མ པ་རི་ཙྪེ་ད
ཨ་ནུ་རཱ་དྷ་པུ་རཱ་བྷི་ག་མ་ནོ
༡. ཡུ་ཝ་རཱ་ཛ་པ་དེ ཏ་སྶ, ཋི་ཏ་སྶཱ’ཐ ན་ཡ་ཉྙུ་ནོ;
ཨ་ཧཱུ ཝི་ཛ་ཡ་བཱ་ཧཱུ་ཏི, ནཱ་མཾ ས་བྦ་ཏྠ པཱ་ཀ་ཊཾ.
༢. མ་ཧཱ་ཉྙ་ཎོ ནི་ཛཱ་ཎཱ་ཡ, ཏ་ཏྠ བྷེ་རིཾ ཙ་རཱ་ཝི་ཡ;
ཋ་པེ་ནྟོ ས་ཙི་ཝེ’ནེ་ཀེ, པ་ཏི་རཱུ་པེ པ་ད་ནྟ་རེ.
༣. ཙོ་ལཱ༹་ནཾ མ་དྡ་ན་ཏྠཱ་ཡ, རཱ་ཛ་ར་ཊྛཱ་དྷི་ཝཱ་སི་ནཾ;
ཙ་ཏུ་རོ ཙ་ཏུ་རོ་པཱ་ཡེ, ཡོ ཛ་ཡཾ ཏ་ཏྠ སོ ཝ་སཱི.
༤. ཙོ་ལ༹་རཱ་ཛཱ སུ་ཎི་ཏྭཱ ཏཾ, པུ་ལ༹་ཏྠི་ན་ག་རེ ཋི་ཏཾ;
སེ་ནཱ་པ་ཏི་མ པེ་སེ་སི, ད་ཏྭཱ་ན བ་ལ་ཝཱ་ཧ་ནཾ.
༥. སེ་ནི་ནྡཾ ཀཱ་ཛ་ར་གྒཱ་མ-ས་མཱི་པཾ ས་མུ་པཱ་ག་ཏཾ;
དུ་པྤ་ས་ཡ྄ཧཾ ཝི་དི་ཏྭཱ་ན, གི་རི་དུ་གྒ་མ་གཱ ཏ་ཏོ.
༦. སེ་ནི་ནྡོ ཀཱ་ཛ་ར་གྒཱ་མཾ, ཝི་ལུ་མྤི་ཏྭཱ་ན ཝེ་ག་སཱ;
ཏ་ཏྠ ཝ་ཏྠུ་མ་ས་ཀྐོ་ནྟོ, ས་དེ་སཾ པུ་ན རཱ་ག་མི.
༧. ཏ་ཏོ མ་ཧཱ་དི་པཱ་དོ’པི, ཨཱ་ག་མྨ མ་ལ་ཡཱ ལ་ཧུཾ;
མ་ཧ་ཏཱ བ་ལ་ཀཱ་ཡེ་ན, སི་པྤ་ཏྠ་ལ་ཀ་མཱ་ཝ་སི.
༨. རཱ་ཛཱ རཱ་མ་ཉྙ་ཝི་ས་ཡེ, རཱ་ཛི་ནོ ས་ནྟི་ཀཾ ཛ་ནེ;
པེ་སེ་སི བ་ཧུ་ཀེ་སཱ་རཾ, དྷ་ན་ཛཱ་ཏ་ཉྩ’ན་པྤ་ཀཾ.
༩. ཝི་ཙི་ཏྟ་ཝ་ཏྠ་ཀ་པྤཱུ་ར-ཙ་ནྡ་ནཱ་དཱི་ཧི ཝ་ཏྠཱུ་ཧི;
པ་རི་པུ་ཎྞཱ ཙ ནཱ་ཝཱ་ཡོ, ནེ་ཀཱ་ཏི་ཏྠེ ས་མོ་ས་ཊཱ.
༡༠. དྷ་ན་ཛཱ ཏེ་ཧི ནེ་ཀེ་ཧི, ཀ་རོ་ནྟོ བྷ་ཊ་ས་ངྒ་ཧཾ;
ཏ་ཏོ ཏ་མྦ་ལ་གཱ་མ་མྷི, ནི་ཝ་སི་ཏྠ མ་ཧ་བྦ་ལོ.
༡༡. ཨ་ཉྙ་མ་ཉྙ་ཝི་རུ་དྡྷ་ཏྟཱ, རཱ་ཛཱ་ར་ཊྛཱ་དྷི་ཝཱ་སི་ནོ;
ཨུ་པ་གྒ་མྨ ཛ་ནཱ ས་བྦེ, ཀ་རཾ ནོ དེ་ནྟི ས་བྦ་སོ.
༡༢. ཝི་པ་ཀྑཱ་ཙོ་ལ༹་རཱ་ཛ་སྶ, བྷི་ནྡ་ནྟཱ’ཎཾ མ་དུ་དྡྷ་ཏཱ;
ཨཱ་ཡུ་ཏྟ་ཀེ ཝི་ཧིཾ་སེ་ནྟོ, ཡ་ཐཱ་ཀཱ་མཾ ཙ་ར་ནྟི ཙ.
༡༣. ཏཾ སུ་ཏྭཱ ཙོ་ལ༹་བྷཱུ་པཱ་ལོ, ས་མྤ་ཀོ་པ་ཝ་སཱི་ཀ་ཏོ;
སེ་ནཾ མ་ཧ་ནྟིཾ ད་ཏྭཱ་ན, པེ་སེ་སི ས་ཙི་ཝཾ ནི་ཛཾ.
༡༤. མ་ཧཱ་ཏི་ཏྠེ’ཝ་ཧི་ཎྞོ སོ, ཏ་ཏྠ ཏ་ཏྠ བ་ཧཱུ་ཛ་ནེ;
གྷཱ་ཏེ་ནྟོ ས་ཝ་སེ ཀ་ཏྭཱ, རཱ་ཛཱ་ར་ཊྛཱ་དྷི་ཝཱ་སི་ནོ.
༡༥. ཨ་ནུ་ཀྐ་མེ་ན ག་ནྟྭཱ་ན, ཁ་རཱ་ཎོ རོ་ཧ་ཎཾ ཏ་དཱ;
ཨ་ཛ྄ཛྷོ་ཏྠ་རི ས་སེ་ནོ ས, བྷི་ནྣོ ཝེ་ལོ་ཝ་སཱ་ག་རོ.
༡༦. ར་ཉྙོ པ་ཙྩ་ཏྠི་ཀཱ ཧུ་ཏྭཱ, ར་ཝི་དེ་ཝ་ཙ་ལ་ཝ྄ཧ་ཡཱ;
ཨུ་བྷོ ད་མི་ལ༹་སེ་ནི་ནྡ-ཝ་སཾ ཡཱ་ཏཱ མ་ཧ་བྦ་ལཱ.
༡༧. མ་ཧཱ་པ་ཀྑ་བ་ལོ་པེ་ཏེ, ཏེ པ་སྶི་ཡ ཙ་མཱུ་པ་ཏི;
རོ་ཧ་ཎཾ ས་ཀ་ལཾ ཁི་པྤཾ, མ་ཉྙི་ཏྠ ས་ཀ་ཧ་ཏྠ་གཾ.
༡༨. ཨེ་ཀཱ་ད་ས་མྷི སོ ཝ་སྶེ, རཱ་ཛཱ ཙོ་ལཱ༹་བྷི་བྷཱུ་ཏི་ཡཱ;
པ་ལུ་ཊྛ་པ་བྦ་ཏེ དུ་གྒཾ, པ་ཝི་དྷཱ་ཡ ཏ་ཧིཾ ཝ་སཱི.
༡༩. ཙོ་ལ༹་སེ་ནཱ ཏ་དཱ་སེ་ལཾ, ས་མ་ནྟཱ ས་མྤ་རི་ཀྑི་པི;
ཏ་ཏྠོ’བྷ་ཡེ་སཾ སེ་ནཱ་ན-མ་ཧཱུ བྷིཾ་ས་ན་ཀཾ ར་ཎཾ.
༢༠. ར་ཉྙོ བྷ་ཊཱ ཝི་ནཱ་སེ་ཏྭཱ, ས་བྦཾ ཏཾ ད་མི་ལ༹ཾ བ་ལཾ;
པ་ལཱ་ཡ་ནྟཾ མ་ཧཱ་ཙོ་ལ༹-སཱ་མ་ནྟ་ཉྩཱ་ནུ་བ་ནྡྷི་ཡ.
༢༡. ག་ཧེ་ཏྭཱ་ན སི་རཾ ཏ་སྶ, གཱ་མ་སྨིཾ ཏ་མྦ་ཝི་ཊྛི་ཀེ
ས་དྡྷིཾ ཝཱ་ཧ་ན་ཡཱ་ནེ་ཧི, སཱ་ར་བྷཱུ་ཏ་དྷ་ནེ་ཧི ཙ.
༢༢. ཏ་ཧིཾ ཏཾ ས་ཀ་ལཾ བྷ་ཎྜཾ, ནེ་ཏྭཱ ར་ཉྙོ པ་ད་སྶི་ཡ;
པུ་ལ༹་ཏྠི་ན་ག་རཾ ག་ནྟུཾ, ཀཱ་ལོ ཨི་ཏི ས་མ་བྲ་ཝུཾ.
༢༣. མ་ཧཱི་པཱ་ལོ་པི ཏཾ སུ་ཏྭཱ, ས་ཙི་ཝཱ་ནཾ ཝ་ཙོ ཏ་དཱ;
མ་ཧ་ཏཱ བ་ལ་ཀཱ་ཡེ་ན, པུ་ལ་ཏྠི་ན་ག་རཾ ག་ཏོ.
༢༤. པ་ཝ་ཏྟི་མེ་ཏཾ ས་ཀ་ལཾ, སུ་ཏྭཱ ཙོ་ལ༹་ན་རི་སྶ་རོ;
ཏི་བྦ་ཀོ་པ་ཝ་སཾ་ཡཱ་ཏོ, བྷཱུ་པཱ་ལ་ག་ཧ་ཎ་ཏྠི་ཀོ.
༢༥. སཱ་མཾ ཁི་པྤཾ ས་མཱ་ག་མྨ, ཝཱི་རོ སཱ་ག་ར་པ་ཊྚ་ནཾ;
བྷི་ཡྻོ་པི མ་ཧ་ཏིཾ སེ་ནཾ, ལཾ་ཀཱ་དཱི་པ་མ་པེ་ས་ཡཱི.
༢༦. ཏཾ ཝི་ཛཱ་ནི་ཡ བྷཱུ་མི་ནྡོ, སེ་ནི་ནྡཾ པེ་ས་ཡཱི ས་ཀཾ;
བ་ལཾ མ་ཧ་ནྟཾ ད་ཏྭཱ་ན, ཙོ་ལ༹་སེ་ནཱ་ཡ ཡུ་ཛ྄ཛྷི་ཏུཾ.
༢༧. ག་ཙྪ་མཱ་ནོ ཙ་མཱུ་ནཱ་ཐོ, སོ’ནུ་རཱ་དྷ་པུ་ར་ནྟི་ཀེ;
ས་དྡྷིཾ ད་མི་ལ༹་སེ་ནཱ་ཡ, ཝ་ཏྟེ་སི ཏུ་མུ་ལཾ ར་ཎཾ.
༢༨. པ་ཏིཾ་སུ ཏ་སྨིཾ ས་ངྒཱ་མེ, བྷཱུ་པཱ་ལ་སྶ ན་རཱ བ་ཧཱུ;
བྷི་ཡྻོ་པི ད་མི་ལཱ༹་ཡ་ཏྟཱ, ཛཱ་ཏཱ ཏཾ ར་ཊྛ་ཝཱ་སི་ནོ.
༢༩. ཝི་ཧཱ་ཡ དྷ་ར་ཎཱི་པཱ་ལོ, པུ་ལ་ཏྠི་ན་ག་རཾ ཏ་དཱ;
ཝི་ལླི་ཀཱ་བཱ་ཎ་ཀཾ ར་ཊྛཾ, ས་མྤཱ་པུ་ཎི་ཡ ཝེ་ག་སཱ.
༣༠. ནི་ཧ་ཙྩཱ་མ་ཙྩ་ཡུ་ག་ལཾ, ཏཾ ར་ཊྛཱ་དྷི་ཊྛི་ཏཾ ཏ་དཱ;
ཏ་ཧིཾ ཝཱ་ས་མ་ཀ་པྤེ་སི, ས་བྷ་ཊེ ས་ནྣི་པཱ་ཏ་ཡཾ.
༣༡. ཨ་ཏྟཱ་ན་མ་ནུ་བ་ནྡྷ་ནྟཾ, སུ་ཏྭཱ ཙོ་ལ༹་ཙ་མཱུ་པ་ཏིཾ;
ག་ནྟྭཱ ཝཱ་ཏ་གི་རིཾ ནཱ་མ, ས་མ་ཡ་ཉྙཱུ སི་ལུ་ཙྩ་ཡཾ.
༣༢. ཨུ་པ་ཙྩ་ཀཱ་ཡ སེ་ལ་སྶ, ཏ་ཏྠ དུ་གྒཾ ནི་ཝེ་སི་ཡ;
ར་ཎཾ ཀ་རོ་ནྟོ ཏེ་མཱ་སཾ, ད་མི་ལེ༹ པ་ཊི་བཱ་ཧ་ཡི.
༣༣. ཀེ་ས་དྷཱ་ཏུ་ཀ་ནཱ་ཐ་སྶ, མཱ་རི་ཏ་སྶ པུ་རཱ་ར་ཎེ;
བྷཱ་ཏཱ ཀ་ཎི་ཊྛོ ས་མྤ་ཏྟ, མ་ཧཱ་པ་ཀྑ་བ་ལོ ཏ་དཱ.
༣༤. མཱ་ར་ཎཾ ས་ཀ་བྷཱ་ཏུ་སྶ, ས་ར་ནྟོ རུ་ཊྛ་མཱ་ན་སོ;
ས་ཀ་ལཾ པ་རི་ཝ་ཏྟེ་སི, གུ་ཏྟ་ཧཱ་ལ་ཀ་མ་ཎྜ་ལཾ.
༣༥. ཨ་ཐོ ལཾ་ཀི་སྶ་རོ ཏ་ཏྠ, ཁི་པྤཾ ག་ནྟྭཱ མ་ཧ་བྦ་ལོ;
ཋཱ་ནེ མ་ཙྩུ་ཏྠ་ལེ ནཱ་མ, ཁ་ནྡྷཱ་ཝཱ་རཾ ནི་བ་ནྡྷི་ཡ.
༣༦. ཁ་དི་ར་ངྒ་ཎི་དུ་གྒ་མྷཱ, པ་ལཱ་པེ་ཏྭཱ་ན ཏཾ ར་ཎེ;
ཋཱ་ནཱ ཀུ་བུ་ལ་ག་ལླཱ ཙ, ཡུ་ཛ྄ཛྷ་ནྟོ ཏཾ པ་ལཱ་པ་ཡི.
༣༧. ཝི་ཧཱ་ཡ པུ་ཏྟ་དཱ་རཱ་དི-ས་བྦཾ ནེ་ཀ་དྷ་ནཾ བ་ལཾ;
པ་ལཱ་ཡ་མཱ་ནོ སོ ར་ཊྛཾ, ཙོ་ལཱ༹་ཡ་ཏྟ མ་གཱ་ལ་ཧུཾ.
༣༨. ཏ་དཱ ན་རི་སྶ་རོ ཏ་ཏ, ཏ་སྶ ས་བྦཾ ས་མཱ་དི་ཡ;
ག་ནྟྭཱ ཏ་མྦ་ལ་གཱ་མ་མྷི, ན་ཝཾ དུ་གྒཾ ནི་ཝེ་སི་ཡ.
༣༩. ཨ་ནུ་ཀྐ་མེ་ན ག་ནྟྭཱ་ན, མ་ཧཱ་ནཱ་ག་ཧུ་ལ་ཝ྄ཧ་ཡེ;
པུ་རེ་ཝ་སཱི སུ་ས་ཛྫེ་ནྟོ, བ་ལཾ ཙོ་ལེ༹་ཧི ཡུ་ཛ྄ཛྷི་ཏུཾ.
༤༠. ཏ་ཏོ རཱ་ཛཱ ས་མ་ཝ྄ཧཱ་ཡ, ས་ཙཱི་ཝེ དྭེ མ་ཧ་བྦ་ལེ;
པེ་སེ་སི དི་ཀྑི་ཎཾ པ་སྶཾ, ཝ་སཾ ནེ་ཏུཾ ཏ་ཧིཾ ཛ་ནེ.
༤༡. ས་མྤེ་སེ་སི མ་ཧཱ་མ་ཙྩ-ཡུ་ག་ལཾ ཀ་ཀྑ་ལཾ ཝི་བྷཱུ;
ཙོ་ལ༹་ད་པྤ་ཝི་ནཱ་སཱ་ཡ, ཏ་ཏོ ཝེ་ལཱ མ་ཧཱ་པ་ཐེ.
༤༢. པེ་སི་ཏཱ ད་ཀྑི་ཎཾ པ་སྶཾ, ཨ་མ་ཙྩཱ’མེ མ་ཧ་བྦ་ལཱ;
མུ་ཧུ་ནྣ་རུ་གྒ་མ་དུ་གྒཾ, བ་ད་ལ༹་ཏྠ་ལ་མེ་ཝ ཙ.
༤༣. ཝཱ་པཱི་ན་ག་ར་དུ་གྒ་ཉྩ, བུ་དྡྷ་གཱ་མ་ཀ་མེ་ཝ ཙ;
ཏི་ལ་གུ་ལླཾ མ་ཧཱ་ག་ལླཾ, མ་ཎྜ་ག་ལླ་ཀ་མེ་ཝ ཙ.
༤༤. ཨ་ནུ་རཱ་དྷ་པུ་ར་ཉྩཱ་ཏི, ག་ཧེ་ཏྭཱ་ན ཀ་མེ་ན ཏེ;
ཝ་ཏྟེ་ནྟཱ ས་ཝ་སེ ར་ཊྛཾ, མ་ཧཱ་ཏི་ཏྠ་མུ་པཱ་ག་ཏཱ.
༤༥. པེ་སི་ཏཱ ས་ཙི་ཝཱ་དྭེ་ཏུ, ཏ་ཏོ ཝེ་ལཱ མ་ཧཱ་པ་ཐེ;
ཝི་ལུ་མྤ་ནྟཱ ཚ་གཱ་མཱ་དི-ཁ་ནྡྷཱ་ཝཱ་རེ ཏ་ཧིཾ ཏ་ཧིཾ.
༤༦. པུ་ལ་ཏྠི་ན་ག་རཱ་ས་ནྣཾ, ཀ་མེ་ནཱ’ག་མྨ པེ་ས་ཡུཾ;
དཱུ་ཏེ རཱ་ཛ་ནྟི་ཀ་ཁི་པྤ-མཱ་ག་ནྟུཾ ཝ་ཊྚ་ཏཱི་ཏི་ཧ.
༤༧. དི་སཱ་སཱ དྭཱི་སུ ཡཱ་ནེ་ཧི, ས་ཙི་ཝེ་ཧི པ་ཝ་ཏྟི་ཏཾ;
ཝི་ཀྐ་མཱ་ཏི ས་ཡཾ སུ་ཏྭཱ, ཀཱ་ལ་ཉྙཱུ སོ མ་ཧཱི་པ་ཧི.
༤༨. སཱི་གྷཾ ས་ནྣ་ཡ྄ཧ སེ་ན་ངྒཾ, ས་མ་གྒཾ ཝི་དི་ཀོ་ཝི་དོ;
ཨུ་མྨཱུ་ལ་ནཱ་ཡ་ཙོ་ལཱ༹་ནཾ, པུ་རཱ་ཏ་མྷཱ’བྷི་ནི་ཀྑ་མི.
༤༩. ག་ཙྪཾ ག་ངྒཱ་ཡ མ་ཧི་ཡ-ངྒ་ཎ་ཐཱུ་པ་ནྟི་ཀེ ཝི་བྷཱུ;
སེ་ནཱ་ནི་ཝེ་སཾ ཀཱ་རེ་ཏྭཱ ཀ་ཉྩི་ཀཱ་ལཾ ཏ་ཧིཾ ཝ་སཱི.
༥༠. ཀ་མེ་ནཱ་ག་མྨ ཋཱ་ན་ཉྙཱུ, པུ་ལ༹་ཏྠི་ན་ག་ར་ནྟི་ཀེ;
བ་ནྡྷཱ་པེ་སི མ་ཧཱ་ཝཱི་རོ, ཁ་ནྡྷཱ་ཝཱ་རཾ ཐི་རཾ ཝ་རཾ.
༥༡. ཏ་ཏྠ ཏ་ཏྠ ཋི་ཏཱ སཱུ་རཱ, ཙོ་ལཱ༹ ཡེ ཀ་ཀྑ་ལཱ’ཁི་ལཱ;
པུ་ལ་ཏྠི་ན་ག་རེ ཡུ་དྡྷཾ, ཀཱ་ཏུཾ ས་ནྣི་པ་ཏིཾ་སུ ཏེ.
༥༢. ནི་ཀྑ་མྨ ན་ག་རཱ ག་ནྟྭཱ, ཙོ་ལཱ༹ བ་ཧི མ་ཧཱ་ར་ཎཾ;
ཀ་ཏྭཱ པ་རཱ་ཛི་ཏཱ བྷཱི་ཏཱ, པ་ཝི་སྶ ན་ག་རཾ ས་ཀཾ.
༥༣. གུ་ཏྟཱ སེ་ས་པུ་ར་དྭཱ་རཱ, གོ་པུ་ར་ཊྚཱ་ལ་ནི་སྶི་ཏཱ;
མ་ཧཱ་ཧ་ཝཾ བ་ཧུ་སྶཱ་ཧཱ, པ་ཝ་ཏྟེ་སུཾ བྷ་ཡཱ་ཝ་ཧཾ.
༥༤. དི་ཡ་ཌྜྷ་མཱ་སཾ ཡུ་ཛ྄ཛྷ་ནྟི, ན་ག་རཾ ཏ་མུ་པ་རུ་ནྡྷི་ཡ;
སཱ་དྷེ་ཏུཾ ནེ་ཝ་སཱ’ས་ཀྑི, བྷཱུ་པཱ་ལ་སྶ མ་ཧཱ་ཙ་མཱུ.
༥༥. མ་ཧཱ་ར་ཉྙོ མ་ཧཱ་ཝཱི་རཱ, མ་ཧཱ་སཱུ་རཱ མ་ཧ་བྦ་ལཱ;
མ་ཧཱ་བྷ་ཊཱ མ་ཧཱ་མཱ་ནཱ, ར་ཝི་དེ་ཝ་ཙ་ལཱ་ད་ཡོ.
༥༦. ཨུ་ལླ་ངྒྷི་ཏྭཱ་ན པཱ་ཀཱ་རཾ, པ་ཝི་སྶ ས་ཧ་སཱ པུ་རཾ;
ཁ་ཎེ་ན ད་མི་ལེ༹ ས་བྦེ, མཱུ་ལ་གྷ་ཙྩ་མ་གྷཱ་ཏ་ཡུཾ.
༥༧. ཨེ་ཝཾ ལ་དྡྷ་ཛ་ཡོ རཱ་ཛཱ, ཏ་དཱ ཝི་ཛ་ཡ་བཱ་ཧུ་སོ;
ཙ་རཱ་པེ་སི ནི་ཛཱ་ཎཱ་ཡ, བྷེ་རིཾ བྷཱུ་རི་མ་ཏི་པུ་རེ.
༥༨. ཏཾ སུ་ཏྭཱ ས་ཀ་སེ་ནཱ་ཡ, ཝི་ནཱ་སཾ ཙོ་ལ༹་བྷཱུ་པ་ཏི;
སཱི་ཧ་ལཱ༹ བ་ལ་ཝ་ནྟོ་ཏི, བྷི་ཡྻོ སེ་ནཾ ན པཱ་ཧི་ཎི.
༥༩. ཝཱི་རོ ཨ་སེ་ས་ནི་ཧ་ཏུ་དྡྷ་ཊ ཙོ་ལ༹་སེ་ཊྛོ;
ཝི་ཉྙཱུ སུ་སཱ་དྷུ་ཊྛ་པི་ཏཱ་ཁི་ལ་རཱ་ཛ་ར་ཊྛོ;
ཨི་ཊྛ་ནྣུ་རཱ་དྷ་པུ་ར་སེ་ཊྛ་མ་ཏཱི་ཝ ཧ་ཊྛོ;
ཝ་སྶ་མྷི པ་ཉྩ་ད་ས་མེ ག་མི རཱ་ཛ་སེ་ཊྛོ.
སུ་ཛ་ན་པྤ་སཱ་ད་སཾ་ཝེ་ག་ཏྠཱ་ཡ ཀ་ཏེ མ་ཧཱ་ཝཾ་སེ
ཨ་ནུ་རཱ་དྷ་པུ་རཱ་བྷི་ག་མ་ནོ ནཱ་མ
ཚ་པྤ་ཉྙཱ་ས་ཏི་མོ པ་རི་ཙྪེ་དོ