པ་ཉྩ་པ་ཉྙཱ་ས་ཏི་མ པ་རི་ཙྪེ་ད
རོ་ཧ་ཎཱ་རཱ་ཏི ཝི་ཛ་ཡོ་ནཱ་མ
༡. ལོ་ཀ་ནཱ་མོ ཙ་མཱུ་ནཱ་ཐོ, མ་ཀྑ་ཀུ་དྲཱུ་ས་ཝཱ་སི་ཀོ;
ས་ཙྩ་པ་ཊི་ཉྙོ དྷཱི་ཏི་མཱ, ཙོ་ལ༹་ད་པྤ་ཝི་གྷཱ་ཏ་ནོ.
༢. ཨ་བྷི་བྷཱུ་ཡ ཛ་ནེ པ་ཏྭཱ, ར་ཛྫཾ རོ་ཧ་ཎ་མ་ཎྜ་ལེ;
ཝ་སཱི ཀཱ་ཛ་ར་གཱ་མ་མྷི, ཙཱ་རི་ཏྟ་ཝི་དྷི་ཀོ་ཝི་དོ.
༣. ཨ་ཧུ ཏ་དཱ ཀི་ཏྟི་ནཱ་མོ, རཱ་ཛ་པུ་ཏྟོ མ་ཧ་བྦ་ལོ;
ཏ་སྶ ཝཾ་སཱ་དི་ས་མྤ་ཏྟཱི, ནུ་པུ་བྦེ་ན པ་ཝུ་ཙྩ་ཏེ.
༤. སུ་ཏོ ཀ་སྶ་པ་བྷཱུ་པ་སྶ, མཱ་ཎ་ནཱ་མེ་ན ཝི་སྶུ་ཏོ;
ཨཱ་དི་པཱ་དོ ཨ་ཧུ དྷཱི་རོ, ས་དཱ་ཙཱ་ར་ཝི་བྷཱུ་སི་ཏོ.
༥. ཏ་སྶཱ’ཐ ཛེ་ཊྛ་ཀོ བྷཱ་ཏཱ, མཱ་ཎ་ཝ་མྨོ མ་ཧཱ་མ་ཏི;
གོ་ཀ་ཎྞ་ཀ་ས་མཱི་པ་ཊྛ-ན་དཱི་ཏཱི་རེ ནི་སཱི་དི་ཡ.
༦. ཀ་ཏ་མ་ནྟུ་པ་ཙཱ་རོ སོ, ཡ་ཐཱ་ཝི་དྷི་མ་སེ་ས་ཏོ;
ཨ་ཀྑ་མཱ་ལཾ ག་ཧེ་ཏྭཱ་ན, མ་ནྟཾ ཛ་པྤི་ཏུ་མཱ་ར་བྷི.
༧. ཀུ་མཱ་རོ ཀི་ར བྷ་ཏྟ་གྒེ, པཱ་ཏུ་རཱ་སི ས་ཝཱ་ཧ་ནོ;
སི་ཁ་ཎྜི མུ་ཁ་ཏུ་ཎྜེ་ན, བ་ལི་པ་ཊྚཾ ཝི་ཁ་ཎྜི་ཡ.
༨. ས་ཙྪི་དྡ་ཀེ ནཱ་ལི༹་ཀེ་ར-ཀ་པཱ་ལེ ཝི་ཙྩུ་ནོ་ད་ཀེ;
ལཱུ་ཁེ ཛ་ལ་མ་པ་སྶ་ནྟོ, ཛ་པ་ནྟ་སྶ མུ་ཁཾ་ག་ཏོ.
༩. ཏ་ཏོ བྷཱ་ཝི་ནིཾ སི་དྡྷི, མ་པེ་ཀྑཾ ན་ཡ་ནཾ ས་ཀཾ;
ཏ་སྶོ་པ་ནེ་སི, ནི་བྦྷི་ཛྫ, སོ་པི ཏཾ ས་ཧ་སཱ་པི་ཙི.
༡༠. ཀུ་མཱ་རོ ཏ་སྶ ས་ནྟུ་ཊྛོ, ཀུ་མཱ་ར་སྶཱ་བྷི་པ་ཏྠི་ཏཾ;
ཝ་རཾ པ་དཱ་ཡ ན་བྷ་སཱ, རཱ་ཛ་མཱ་ནོ ག་ཏོ ཏ་ཏོ.
༡༡. བྷི་ནྣེ་ཀ་ན་ཡ་ནཾ དི་སྭཱ, ས་ཙི་ཝཱ་ཏཾ པ་རོ དི་སུཾ;
ཝ་ར་ལཱ་བྷཾ པ་ཀཱ་སེ་ཏྭཱ, ས་མ་སྶཱ་སེ་སི སོ ཛ་ནེ.
༡༢. ཏ་ཏོ སོ ས་ཙི་ཝཱ་ཏ་སྶ, ས་ནྟུ་ཊྛཱ་རཱ་དྷ་ཡིཾ་སུ ཏཾ;
ཨ་ནུ་རཱ་དྷ་པུ་རཾ པ་ཏྭཱ, བྷི་སེ་ཀོ ཀཱ་རི་ཡོ ཨི་ཏི.
༡༣. ཨ་ཏྠོ ཀོ མ་མ་ར་ཛྫེ་ན, ཝི་ཀ་ལ་ངྒ་སྶ ས་མྤ་ཏི;
ཏ་པོ་ཀ་མྨཾ ཀ་རི་སྶཱ་མི, པ་བྦ་ཛྫ་མུ་པ་ག་མྨ་ཧཾ.
༡༤. ཀ་ཎི་ཊྛོ མཱ་ཎ་ནཱ་མོ ཙ, ལ་ངྐཱ་ར་ཛྫཾ ཀ་མཱ་ག་ཏཾ;
པཱ་ལེ་ཏུ ཨི་ཏི སོ ར་ཛྫཾ, ས་མྤ་ཏྟཾ ས་མྤ་ཊི་ཀྑི་པི.
༡༥. ཝི་ཉྙཱ་ཏ་ཙི་ཏྟ་ས་ཉྩཱ་རཱ, ས་ཙི་ཝཱ ཏ་སྶ ས་བྦ་ཐཱ;
ཝ་ཏྟུ་མེ་ཏཾ ཀ་ཎི་ཊྛ་སྶ, པེ་སེ་སུཾ པུ་རི་སེ ཏ་དཱ.
༡༦. སུ་ཏྭཱ ཏཾ སཱི་གྷ་མཱ་ག་མྨ, པ་སྶི་ཏྭཱ ས་ཀ་བྷཱ་ཏ་རཾ;
པ་ཏི་ཏྭཱ པཱ་ད་མཱུ་ལ་མྷི, བ་ཧུཾ ཀ་ནྡི་ཡ རོ་དི་ཡ.
༡༧. ཛེ་ཊྛེ་ན བྷཱ་ཏ་རཱ ས་དྡྷི-མ་ནུ་རཱ་དྷ་པུ་རཾ ག་ཏོ;
མ་ཀུ་ཊཾ ཏ་ཏྠ དྷཱ་རེ་སི, ཛེ་ཊྛ་ཙི་ཏྟཱ་ནུ་ཝ་ཏྟ་ཀོ.
༡༨. ཏ་ཏོ’བྷ་ཡ་གི་རིཾ ག་ནྟྭཱ, པ་བྦ་ཛྫཾ ས་ཀ་བྷཱ་ཏུ་ནོ;
ཡ་ཏ ཡོ ཏ་ཏྠ ཡཱ་ཙི་ཏྠ, བ་ཧུ་མཱ་ན་པུ་ར་སྶ་རཾ.
༡༩. ཏ་ཏོ ཏེ ཡ་ཏ་ཡོ ཏ་སྶ, པ་བྦ་ཛྫ་མུ་པ་ས་མྤ་དཾ;
ཨ་ཀཾ་སུ ཝི་ཀ་ལ་ངྒ་སྶ, སི་ཀྑཱ་པ་ད་ནི་རཱ་ད་རཱ.
༢༠. པ་རི་ཝེ་ཎ་མུ་ཏྟ་རོ་ལ༹-མུ་ལཱ༹་རཾ ཏ་སྶ ཀཱ་རི་ཡ;
ཀ་ཏྭཱ ཏཾ པ་རི་ཝེ་ཎ་སྶ, སཱ་མི་ཀཾ དྷ་ར་ཎཱི པ་ཏི.
༢༡. བྷི་ཀྑཱུ་ནཾ ཚ་ས་ཏཾ ཏ་ཏྠ, ཝི་དྷཱ་ཡ ཏ་ད་དྷཱི་ན་ཀཾ;
པ་རི་ཧཱ་རེ ཨ་དཱ ཏ་སྶ, པེ་སྶ་ཝ་གྒེ ཙ པ་ཉྩ སོ.
༢༢. ས་མ་པྤེ་སི ཙ སོ ནཱ་ནཱ-སི་པྤ་ཀ་མྨ་ཝི་ཙ་ཀྑ་ཎེ;
ཛ་ནེ ཙཱ་ཀཱ ཏ་དཱ་ཡ་ཏྟེ, སོ དཱ་ཋཱ་དྷཱ་ཏུ་ར་ཀྑི་ཡེ.
༢༣. ཏ་སྶེ་ཝཱ་ད་ཀ་རཱ’ཧེ་སུཾ, བྷི་ཀྑཱུ’བྷ་ཡ་གི་རི་མྷི ཏེ;
རཱ་ཛཱ ཙ ལོ་ཀཾ པཱ་ལེ་སི, ས་མྨཱ ཏ་སྶཱ་ནུ་སི་ཊྛི་ཡཱ.
༢༤. ཛ་ནཱ ཏ་བྦཾ་ས་ཛཱ ཀེ་ཙི, ཏཾ ར་ཛྫ་ནི་ར་པེ་ཀྑ་ཀཱ;
ནི་ཝ་སིཾ་སུ ཡ་ཐཱ་ཀཱ་མཾ, མ་ཧཱ་སཱ་མི པ་དཾ་སི་ཏཱ.
༢༥. ཨེ་ཏ་སྶ མཱ་ཎ་ཝ་མྨ་སྶ, ར་ཉྙོ དྷ་མྨ་ན་ཡ་ཉྙུ་ནོ;
ཨ་གྒ་བོ་དྷི་ཀུ་མཱ་རཱ་དི-པུ་ཏྟ་ན་ཏྟུ་ཀྐ་མཱ་ག་ཏེ.
༢༦. ཝཾ་སེ ཝི་སུ་དྡྷེ ཛཱ་ཏ་སྶ, བྷཱུ་པཱ་ལ་ནྭ་ཡ་མུ་དྡྷ་ནི;
ས་མཱ་སོ་ལ༹་ས་ཀ་ངྐཱ་ཡཾ, ས་མྨཱ ར་ཛྫཱ་ནུ་སཱ་སི་ནོ.
༢༧. མ་ཧཱི་པ་སྶ མ་ཧི་ནྡ་སྶ, དུ་ཝེ མཱ་ཀུ་ལ་དྷཱི་ཏ་རོ;
དེ་ཝ་ལཱ ལོ་ཀི་ཀཱ ཙཱ་ཏི, ནཱ་མ་ཏོ ཝི་སྶུ་ཏཱ སུ་བྷཱ.
༢༨. ཨེ་ཏཱ་སུ དྭཱི་སུ དྷཱི་ཏཱ་སུ, ལོ་ཀི་ཀཱ མཱ་ཏུ་ལ་ཏྟ་ཛཾ;
པ་ཊི་ཙྩ རཱ་ཛ་ཏ་ན་ཡཾ, སུ་བྷཾ ཀ་སྶ་པ་ནཱ་མ་ཀཾ.
༢༩. སཱ མོ་གྒ་ལླཱ་ན ལོ་ཀ་ཝ྄ཧེ, པུ་ཏྟེ དྭེ ལ་བྷི སོ་བྷ་ནེ;
ཏེ་སུ ཛེ་ཊྛ་སུ་ཏོ ལོ་ཀ-སཱ་ས་ནཱ་དྷཱ་ར་ཀོ་ཝི་དོ.
༣༠. མ་ཧཱ་སཱ་མཱི་ཏི པ་ཉྙཱ་ཏོ, ས་ངྒྷུ་པཱ་ས་ན་པཱ་ལ་ཡོ;
ནེ་ཀ་སཱ་ར་གུ་ཎཱ་ཝཱ་སོ, ཝཱ་སཾ ཀ་པྤེ་སི རོ་ཧ་ཎེ.
༣༡. དཱ་ཋོ་པ་ཏི་སྶ རཱ་ཛ་སྶ, ན་ཏྟཱ སུ་ག་ཏ་སཱ་ས་ནེ;
པ་བྦ་ཛྫཱུ་པ་ག་ཏོ ས་དྡྷོ, དྷུ་ཏ་ཝཱ སཱི་ལ་སཾ་ཝུ་ཏོ.
༣༢. པ་ཧི་ཏ་ཏྟོ ཝི་ཙི་ཏྟོ་སོ, པ་ནྟ་སེ་ནཱ་ས་ནེ ཝ་སཱི;
གུ་ཎཾ ས་བྦ་ཏྠ ཝ་ཎྞེ་སུཾ, ཏ་སྨིཾ དེ་ཝཱ པ་སཱི་དི་ཡ.
༣༣. གུ་ཎཾ སུ་ཎི་ཏྭཱ ལཾ་ཀི་ནྡོ, ཏ་དཱ ས་བྦ་ཏྠ པ་ཏྠ་ཊཾ;
ཨུ་པ་ས་ངྐ་མྨ ཏཾ ན་ཏྭཱ, ཀཱ་ཏུ་མ་ཏྟཱ་ནུ་སཱ་ས་ནཾ.
༣༤. ཨཱ་རཱ་དྷ་ཡ་མ་ནི་ཙྪ་ནྟཾ, ཡཱ་ཙི་ཏྭཱ་ན པུ་ན་པྤུ་ནཾ;
ཨཱ་ནཱི་ཡ ཝཱ་ས་ཡི་ཏྭཱ ཏཾ, པཱ་སཱ་དེ སཱ་དྷུ་ཀཱ་རི་ཏེ.
༣༥. ཡ་ཏི་སྶ་ར་སྶ ཝ་ས་ཏོ, ཀ་ཏྠ རཱ་ཛཱ་གུ་ཎ་པྤི་ཡོ;
ཏ་སྶཱ་ནུ་སི་ཊྛི་མ་གྒ་ཊྛོ, ལོ་ཀཾ དྷ་མྨེ་ན པཱ་ལ་ཡི.
༣༦. ཨུ་དྡི་སྶཱ་རཱ་དྷ་ནཾ ས་མྨཱ, ལཾ་ཀི་ནྡེ་ན ཀ་ཏཾ ཏ་དཱ;
སེ་ལ་ནྟ་རཱ་བྷི་ནི་ཀྑ་མྨ, ཡ་ཏི་ནྡོ སོ ད་ཡཱ་ནུ་གོ.
༣༧. ཡ་ཏོ བྷི་ཀྑཱུ ས་མཱུ་ཧེ་ཏྭཱ, ཝཱ་སཾ ཀ་པྤེ་སི ཡ་ཏྠ སོ;
སེ་ལ་ནྟ་ར་ས་མཱུ་ཧོ’ཏི, ཝི་ཀྑྱཱ་ཏིཾ སོ ཏ་ཏོ ག་ཏོ.
༣༨. ཏ་ཏོ པ་ཊྛཱ་ཡ ཝཱ་སེ་ཏྭཱ, ར་ཏྟི་ཡཾ དེ་ཝ་པ་ལླི་ཡཾ;
དེ་ཝ་ཏཱ་ནུ་མ་ཏཾ བྷི་ཀྑུཾ, མཱུ་ལ་ཋཱ་ནེ ཋ་པེ་ནྟི ཧི.
༣༩. མཱུ་ལ་ཏྟ་མཱ་ཝ་ས་ནྟཱ་ནཾ, ཡ་ཏཱི་ན་མ་ནུ་སཱ་ས་ནཱ;
ལཾ་ཀི་སྶ་རཱ པ་ཝ་ཏྟ་ནྟི, པཱ་ལེ་ནྟཱ ལོ་ཀ་སཱ་ས་ནཾ.
༤༠. ཏ་སྶ དཱ་ཋོ་པ་ཏི་སྶ་སྶ, ཝཾ་ས་ཛཾ རཱ་ཛ་པུ་ཏྟ་ཀཾ;
བོ་དྷིཾ པ་ཊི་ཙྩ ཏ་བྦཾ་སཱ, བུ་དྡྷ་ནཱ་མཱ ཀུ་མཱ་རི་ཀཱ.
༤༡. ཨ་ལ་ཏྠ ལོ་ཀི་ཏཾ ནཱ་མ, དྷཱི་ཏ་རཾ ཝ་ར་ལ་ཀྑ་ཎཾ;
ཀཱ་ལེ་ན སཱ པ་དི་ནྣཱ’སི, མོ་གྒ་ལླཱ་ན་སྶ དྷཱི་མ་ཏོ.
༤༢. སཱ ཏཾ པ་ཊི་ཙྩ ཀི་ཏྟི་ཉྩ, མི་ཏྟཾ ནཱ་མ ཀུ་མཱ་རི་ཀཾ;
མ་ཧི་ནྡཾ ར་ཀྑི་ཏཾ ཙཱ་པི, ལ་ཏི་ཏྠ ཙ་ཏུ་རོ པ་ཛཱ.
༤༣. ཨ་ཧུ ཛེ་ཊྛ་སུ་ཏོ དྷཱི་རོ, ཝཱི་རོ ཏེ་ར་ས་ཝ་སྶི་ཀོ;
ཀ་ཏ་ཧ་ཏྠོ ཝི་སེ་སེ་ན, དྷ་ནུ་སི་པྤ་མྷི སོ ཏ་ཏོ.
༤༤. ཀ་ཐཾ ལ་ངྐཾ ག་ཧེ་སྶཱ་མི, དཱུ་རེ་ཏྭཱ’རཱ་ཏི ཀ་ཎྚ་ཀཾ;
ཨི་ཏི ཙི་ནྟཱ་པ་རོ་གཱ་མེ, མཱུ་ལ་སཱ་ལ་ཝ྄ཧ་ཡེ ཝ་སཱི.
༤༥. ཨེ་ཀོ མ་ཧཱ་བ་ལོ ཝཱི་རོ, བུ་དྡྷ་རཱ་ཛོ་ཏི ཝི་སྶུ་ཏོ;
ཝི་ལོ་མ་ཝ་ཏྟཱི ཧུ་ཏྭཱ་ན, ལོ་ཀ་སེ་ནཱ་ནི་ནོ ཏ་དཱ.
༤༦. པ་ལཱ་ཏོ ཙུ་ཎྞ་སཱ་ལ་ཝ྄ཧཾ, ཁི་པྤཾ ཛ་ན་པ་དཾ ཏ་ཧིཾ;
ཀི་ཏྟཱ་དི་ཀེ ཛ་ནེ ནེ་ཀེ, ཝ་སེ ཝ་ཏྟི་ཡ ས་བྦ་ཐཱ.
༤༧. ས་དྡྷིཾ བ་ནྡྷཱུ་ཧི ས་ངྒཱ་མ-སཱུ་རེ་ཧི བ་ཧུ་ཀེ་ཧི སོ;
མ་ལ་ཡཱ་ཙ་ལ་པཱ་དེ་སུ, ཝ་སཱི དུ་པྤ་ས་ཧོ ཏ་དཱ.
༤༨. ཏ་སྶ’ནྟི་ཀ་མུ་པཱ་ག་མྨ, སཾ་ཝ་ཙྪ་རི་ཀ་ནཱ་ཡ་ཀོ;
ས་ངྒྷོ ནཱ་མ ཀུ་མཱ་ར་སྶ, ས་རཱུ་པཾ སཱ་དྷུ་ཝཾ བྲ་ཝི.
༤༩. མ་ཧཱ་སཱ་མི་སྶ ཏ་ན་ཡོ, ཛེ་ཊྛོ ཀི་ཏྟི ས་ནཱ་མ་ཀོ;
དྷ་ཉྙ་ལ་ཀྑ་ཎ་ས་མྤ་ནྣོ, ས་མྤ་ནྣ་མ་ཏི་ཝི་ཀྐ་མོ.
༥༠. ཛ་མྦུ་དཱི་པེ་པི ཏཾ ར་ཛྫཾ, ཀ་ཏྟུ་མེ་ཀཱ་ཏ་པ་ཏྟ་ཀཾ;
ས་མ་ཏྠོ་ཏི ཝི་ཙི་ནྟེ་པི, ལ་ངྐཱ་དཱི་པ་མྷི ཀཱ ཀ་ཐཱ.
༥༡. ཏ་སྶ སོ ཝ་ཙ་ནཾ སུ་ཏྭཱ, སེ་ཝི་ཏ་བྦོ ཀུ་མཱ་ར་ཀོ;
ཨི་ཏི ནི་ཙྪི་ཡ པེ་སེ་སི, ཀུ་མཱ་ར་སྶ’ནྟི་ཀཾ ཛ་ནེ.
༥༢. སུ་ཎི་ཏྭཱ སོ ཝ་ཙོ ཏེ་སཾ, ནི་ཝ་ཏྟ་ན་བྷ་ཡཱ ཝི་བྷཱུ;
ཨ་ཛཱ་ན་ཧཾ པི་ཏུ་ནྣཾ སོ, ཝཱི་རོ དྷ་ནུ་ས་ཧཱ་ཡ་ཀོ.
༥༣. གེ་ཧཱ ནི་ཀྑ་མྨ པ་སྶ་ནྟོ, སུ་ནི་མི་ཏྟཱ་ནི་ནེ་ཀ་དྷཱ;
ཨ་གཱ་ལ་ཧུཾ ས་རཱི་ཝ་གྒ-པི་ཊྛི་གཱ་མཾ མ་ཧཱ་མ་ཏི.
༥༤. ཏ་ཧིཾ སོ ནི་ཝ་སཾ ཝཱི་རོ, པེ་ས་ཡི་ཏྭཱ ས་སེ་ཝ་ཀེ;
ཝི་པ་ཀྑཱ་དྷི་ཊྛི་ཏཾ ཛེ་སི, བོ་དྷི་ཝཱ་ལ་ཝ྄ཧ་གཱ་མ་ཀཾ.
༥༥. ཏ་ཏོ’བྷི་མཱ་ནཱི སེ་ནཱ་ནཱི, སེ་ནཾ སོ ཏ་ཏྠ པེ་ས་ཡི;
སཱ པ་རི་ཀྑི་པ་ཏཾ གཱ་མཾ, ས་ངྒཱ་མཱ་ཡ ས་མཱ་ར་བྷཱི.
༥༦. ཀུ་མཱ་རོ ཏེ་ཧི ཡུ་ཛ྄ཛྷ་ནྟོ, སུ་བྷ་ཊོ པ་ཊུ་ཝི་ཀྐ་མོ;
དི་སཱ་སུ ཝི་ཀི་རཱི་ས་བྦེ, ཏུ་ལཾ ཙ་ཎྜོ་ཝ མཱ་ལུ༹་ཏོ.
༥༧. ཙུ་ཎྞ་སཱ་ལཾ ཛ་ན་པ་དཾ, ག་ནྟྭཱ ཋཱ་ན་ཝི་དཱུ ཏ་དཱ;
ཏ་ཧིཾ ཝ་སཾ ཝ་སེ་ཀཱ་སི, ས་བྦཾ མ་ལ་ཡ་མ་ཎྜ་ལཾ.
༥༨. ཏ་དཱ་པི སེ་ནཾ སེ་ནི་ནྡོ, པེ་སེ་ཏྭཱ ཨ་ས་ཀིཾ ས་ཀཾ;
ཨ་བྷི་བྷཱུ་ཏི་མ་ས་ཀྐོ་ནྟོ, ཀཱ་ཏུཾ དུ་མྨ་ན་ཏཾ ག་ཏོ.
༥༩. མ་ཀྑ་ཀུ་དྲུ་ས་ཝཱ་སི་སྶ, ས་ཙི་པ་སྶཱ་ཐ ཀི་ཏྟི་ནོ;
སུ་ཏོ མ་ཧ་བྦ་ལོ དེ་ཝ-མ་ལློ་ཏི ཝི་དི་ཏོ ཏ་དཱ.
༦༠. ས་ཧི་ཏོ བ་ནྡྷུ་མི་ཏྟེ་ཧི, བ་ཧཱུ རོ་ཧ་ཎ་ཝཱ་སི་ནོ;
ས་མཱ་དཱ་ཡཱ’བྷི་ག་ནྟྭཱ་ན, ཀུ་མཱ་རཾ པ་སྶི སཱ་ད་རོ.
༦༡. བ་ནྡྷི་ཡ ཚུ་རི་ཀཾ ཚེ་ཀོ, སོ པ་ནྣ་ར་ས་ཝ་སྶི་ཀོ;
ཨཱ་དི་པཱ་ད་པ་དཾ ཏ་ཏྠ, ས་མྤཱ་པུ་ཎི མ་ཧཱ་ཡ་སོ.
༦༢. ཏ་ཏོ ཧི་ར་ཉྙ་མ་ལ་ཡ, མུ་པཱ་ག་མྨ མ་ཧ་བྦ་ལོ;
ཏ་ཧིཾ རེ་མུ་ཎ་སེ་ལ་མྷི, ཁ་ནྡྷཱ་ཝཱ་རཾ ནི་བ་ནྡྷ་ཡི.
༦༣. ཏ་ཏྠཱ་པི སེ་ནཾ པེ་སེ་ཏྭཱ, ས་ངྒཱ་མེ་ནྟོ ཙ་མཱུ་པ་ཏི;
ཨ་ལ་དྡྷ་ཝི་ཛ་ཡོ ཚ་ནྡཾ, པུ་ན་ཡུ་དྡྷེ ཛ་ཧི་ཏ་ཏོ.
༦༤. ལོ་ཀ་ནཱ་མོ ཙ་མཱུ་ནཱ་ཐོ, ལོ་ཀཾ ཧི་ཏྭཱ ས་ཀཾ ཏ་དཱ;
ཨ་ཧུ ཝ་སྶ་མྷི ཚ་ཊྛེ་སོ, པ་ར་ལོ་ཀ་པ་རཱ་ཡ་ནོ.
༦༥. ཏ་དཱ ཀ་སྶ་པ་ནཱ་མེ་ཀོ, ཀེ་ས་དྷཱ་ཏུ་ཀ་ནཱ་ཡ་ཀོ;
ཛ་ནེ’བྷི་བྷཱུ་ཡ་ཝ་ཏྟེ་སི, ནཱི་ཛཱ་ཎཾ རོ་ཧ་ཎེ ཏ་དཱ.
༦༦. སུ་ཏྭཱ ཏཾ ཙོ་ལ༹་སཱ་མ་ནྟོ, པུ་ལ༹་ཏྠི་ན་ག་རཱ ཏ་དཱ;
ནི་ཀྑ་མྨ ཡུ་དྡྷ་ས་ན་དྡྷོ, ག་ནྟྭཱ ཀཱ་ཛ་ར་གཱ་མ་ཀཾ.
༦༧. ཀེ་སཱ་དྷཱ་ཏུ ཏ་ཏོ ཡུ་དྡྷེ, བྷི་ནྡི་ཏྭཱ ད་མི་ལ༹ཾ བ་ལཾ;
ར་ཀྑ་པཱ་སཱ་ཎ་སཱི་མཱ་ཡཾ, ཋ་པེ་ཏྭཱ ར་ཀྑི་ཡེ ཛ་ནེ.
༦༨. པ་ཊི་ལ་དྡྷ་ཛ་ཡུ་དྡཱ་མོ, མ་ཧཱ་སེ་ནཱ པུ་ར་ཀྑ་ཏོ;
པུ་ན་རཱ་ག་མྨ པཱ་ཝེ་ཀྑི, ཝཱི་རོ ཀཱ་ཛ་ར་གཱ་མ་ཀཾ.
༦༩. ཏ་དཱ་དི་པཱ་དོ སུ་ཏྭཱ་ན, ས་བྦཾ སུ་ཏྠཱི་ར་དྷཱ་ཏུ་ཀོ;
ཀེ་ས་དྷཱ་ཏུཾ ནི་གྷཱ་ཏེ་ཏུཾ, བ་ལཾ ས་ནྣ་ཡ྄ཧི ཝེ་ག་སཱ.
༧༠. པ་ཝ་ཏྟིཾ ཏཾ སུ་ཎི་ཏྭཱ སོ, སཱ་བྷི་མཱ་ནོ བྷུ་སཾ་ཏ་ཏོ;
ས་མ་ཏྟཾ བ་ལ་མཱ་དཱ་ཡ, སི་པྤ་ཏྠ་ལ་ཀ་མཱ་ག་མཱ.
༧༡. པ་ཉྩ་ཡོ་ཛ་ན་ར་ཊྛཱ་དི-ཝཱ་སི་ཀེ་སུ བ་ཧཱུ་ཛ་ནེ;
ས་མཱ་དཱ་ཡ ས་མཱ་ས་ནྣེ, རཱ་ཛ་པུ་ཏྟེ སུ་དུ་ཛྫ་ཡེ.
༧༢. ཝི་ར་ཏྟ་ཏ་ཉྩ སོ ཉ་ཏྭཱ, བ་ཧུ་ནྣཾ ར་ཊྛ་ཝཱ་སི་ནཾ;
དུ་ཀྐ་རཾ ཨེ་ཏྠ ཡུ་དྡྷ་ནྟི, ག་ཏོ སོ ཁ་དི་ར་ངྒ་ཎིཾ.
༧༣. མ་ཧཱ་སེ་ནཱ་ཡ བྷཱུ་པཱ་ལ སུ་ཏོ སོ་ལ༹་ས་ཝ་སྶཱི་ཀོ;
ཁི་པྤཾ ཝཱ་པེ་ཀྑི སོ ཝཱི་ཏ-ད་རོ ཀཱ་ཛ་ར་གཱ་མ་ཀཾ.
༧༤. ཚ་མྨཱ་ས་མ་ནུ་བྷོ་ཏྭཱ་ན, རོ་ཧ་ཎཾ རུ་ཊྛ་མཱ་ན་སོ;
ཀེ་ས་དྷཱ་ཏུ་ཀ་ནཱ་ཐོ་པི, ས་ངྒཱ་མ་ཏྠཱ་ཡ ཏ་ཏྠ་གཱ.