ཙ་ཏུ་པ་ཉྙཱ་ས་ཏི་མ པ་རི་ཙྪེ་ད

ཚ རཱ་ཛ་ཀོ་ནཱ་མ

༡. ཀ་ཏྭཱ ཝི་ཀྐ་མྨ བཱ་ཧཱུ’ཏི, ནཱ་མ བྷཱུ་པཱ་ལ་སཱུ་ནུ་ཏོ;

ཏ་སྶཱ་ཎཱ་ཡ པ་ཝ་ཏྟིཾ་སུ, སཱ་ད་རཾ སཱི་ཧ་ལཱ༹ ཁི་ལཱ.

༢. སོ རཱ་ཛཱ ད་མི་ལེ༹ ཧ་ནྟུཾ, དྷ་ནཾ ས་ཉྩི་ཡ’ནེ་ཀཱ་དྷཱ;

ས་ངྒ་ཧཾ སེ་ཝ་ཀཱ་ན་ཉྩ, ཀུ་རུ་མཱ་ནོ ཡ་ཐོ་ཙི་ཏཾ.

༣. ཨ་ལ་ངྐཱ་ར་ཀི་རཱི་ཊཱ་ནི, ཚ་ཏྟ་སཱི་ཧཱ་ས་ནཱ་ནི ཙ;

ཀཱ་ར་ཡི་ཏྭཱ’བྷི་སེ་ཀ་ཏྠཾ, ས་ཙི་ཝེ་ཧཱ’བྷི་ཡཱ་ཙི་ཏོ.

༤. ན ཡཱ་ཝ རཱ་ཛ་ར་ཊྛ་སྶ, ག་ཧ་ཎཾ ཧོ་ཏི ཏཱ་ཝ མེ;

ཚ་ཏྟུ་སྶཱ་པ་ན་ཀ་མྨེ་ན, ཀིཾ ཏེ་ནཱ’ཏི ཝི་ཝཱ་རི་ཡ.

༥. ས་ཏཾ ན་ར་ས་ཧ་སྶཱ་ནཾ, ས་ངྐ་ལེ་ཏྭཱ མ་ཧ་བྦ་ལོ;

ས་ངྒཱ་མཱ་ར་བྦྷ ཀཱ་ལ་མྷི, ཝཱ་ཏ་རོ་གཱ་བྷི་པཱི་ལི༹་ཏོ.

༦. ཡུ་ཛ྄ཛྷི་ཏུཾ ས་མ་ཡོ ནེ་ཏི, དྭཱ་ད་སེ ཝ་ཙྪ་རེ ལ་ཧུཾ;

ཨུ་པེ་ཙྩ དེ་ཝ་ན་ག་རཾ, ག་ཉྪི་དེ་ཝ་ས་ཧ་བྱ་ཏཾ.

༧. ཀི་ཏྟི་ནཱ་མོ ཙ ས་ཙི་ཝོ, སེ་ནཱ་པ་ཙྩ་མ་དྷི་ཊྛི་ཏོ;

ར་ཛྫ་ཏྠི་ཀོ དི་ནཱ་ན་ཊྛ, ནི་ཛཱ་ཎཾ ས་མྤ་ཝ་ཏྟ་ཡི.

༨. གྷཱ་ཏེ་ཏྭཱ ཏཾ མ་ཧཱ་ལཱ་ན-ཀི་ཏྟི་ནཱ་མོ མ་ཧ་བྦ་ལོ;

པ་ཏྭཱ’བྷི་སེ་ཀཾ བྷུ་ཉྫ་ནྟོ, དེ་སཾ ཏཾ རོ་ཧ་ཎ་ཝ྄ཧ་ཡཾ.

༩. སཾ་ཝ་ཙྪ་ར་མྷི ཏ་ཏི་ཡེ, ཙོ་ལ༹་ཡུ་དྡྷེ པ་རཱ་ཛི་ཏོ;

ས་ཧ་ཏྠེ་ན ས་ཀཾ སཱི་སཾ, ཚི་ནྡི་ཏྭཱ ས་ཧ་སཱ མ་རི.

༡༠. ཏ་དཱ་པི་ཏེ ཀི་རཱི་ཊཱ་དི-དྷ་ན་སཱ་རཾ ས་མཱ་དི་ཡ;

པེ་སེ་སུཾ ད་མི་ལཱ༹ ཙོ་ལ༹-མ་ཧཱི་པཱ་ལ་སྶ ས་ནྟི་ཀཾ.

༡༡. བྷ་ཡཱ ས་ར་ཊྛཾ ཧི་ཏྭཱ’ཐ, དུ་ཊྛ་དེ་སེ ཝ་སཾ ཏ་དཱ;

ཨེ་ཀོ ཝི་ཀྐ་མ་པ་ཎྜཱུ་ཏི, ཝི་སྶུ་ཏོ པ་ཏྠི་ཝ་ཏྟ་ཛོ.

༡༢. ཝི་ཉྙཱ་ཏ་ལ་ངྐཱ་ཝུ་ཏྟ་ནྟོ, དེ་ས་མཱ་ག་མྨ རོ་ཧ་ཎཾ;

ཀཱ་ལ༹་ཏི་ཏྠེ ཝ་སཾ ཝ་སྶ-མེ་ཀཾ ར་ཛྫ་མ་ཀཱ་ར་ཡི.

༡༣. རཱ་མ་ནྭ་ཡ་ས་མུ་བྦྷཱུ་ཏོ, ཏ་དཱ་ཡུ་ཛ྄ཛྷ པུ་རཱ་ག་ཏོ;

ཛ་ག་ཏཱི པཱ་ལ་ནཱ་མེ་ན, ཝི་སྶུ་ཏོ བྷཱུ་བྷུ་ཛ་ཏྟ་ཛོ.

༡༤. ར་ཎེ ཝི་ཀྐ་མ་པ་ཎྜུ་ཏཾ, གྷཱ་ཏཱ་པེ་ཏྭཱ མ་ཧ་བྦ་ལོ;

ཏ་ཏོ ཙ་ཏྟཱ་རི ཝ་སྶཱ་ནི, ར་ཛྫཾ ཀཱ་རེ་སི རོ་ཧ་ཎེ.

༡༥. ཏ་མྤི ཙོ་ལཱ༹་ར་ཎེ ཧ་ནྟྭཱ, མ་ཧེ་སིཾ དྷཱི་ཏ་རཱ ས་ཧ;

ཝི་ཏྟ་སཱ་ར་ཉྩ སཱ་ཀ་ལཾ, ཙོ་ལ༹་ར་ཊྛ་མ་པེ་ས་ཡུཾ.

༡༦. རཱ་ཛཱ པ་ར་ཀྐ་མོ ནཱ་མ, པ་ཎྜུ་རཱ་ཛ་སུ་ཏོ ཏ་ཏོ;

ཨ་ཀཱ ཝ་སྶ་དྭ་ཡཾ ཙོ་ལཱ༹, གྷཱ་ཏེ་སུཾ ཏ་མྤི ཡུ་ཛ྄ཛྷི་ཡ.

༡༧. ཨི་མེ བྷུ་སཾ ལོ་བྷ་བ་ལཱ་བྷི་བྷཱུ་ཏཱ,

ག་ཏཱ ཨ་སེ་སཱ ཝི་ཝ་སཱ ཝི་ནཱ་སཾ;

ཨི་ཙྩེ་ཝ་མ་ཉྙཱ་ཡ ས་དཱ ས་པ་ཉྙོ,

ཏ་ཎྷ་ཀྑ་ཡེ་ཡེ་ཝ ར་ཏིཾ ཀ་རེ་ཡྻ.

སུ་ཛ་ན་པྤ་སཱ་ད་སཾ་ཝེ་ག་ཏྠཱ་ཡ ཀ་ཏེ མ་ཧཱ་ཝཾ་སེ

ཚ རཱ་ཛ་ཀོ ནཱ་མ

ཙ་ཏུ་པ་ཉྙཱ་ས་ཏི་མོ པ་རི་ཙྪེ་དོ.