པ་ཉྙཱ་ས་ཏི་མ པ་རི་ཙྪེ་ད
དྭི་རཱ་ཛ་ཀོ་ནཱ་མ
༡. ཏ་ཏོ ར་ཛྫེ པ་ཏི་ཊྛཱ་ཡ, ཀ་སྶ་པོ ད་ཀྑི་ཎཾ དི་སཾ;
ཨ་དཱ ཀ་སྶ་པ་ནཱ་མ་སྶ, ཡུ་ཝ་རཱ་ཛ་སྶ དྷཱི་མ་ཏོ.
༢. ཨ་གྒཱ་བྷི་སེ་ཀཾ དཱ་པེ་སི, ཡུ་ཝ་རཱ་ཛ་སྶ དྷཱི་ཏུ་ཡཱ;
རཱ་ཛ་ཀ་ཉྙཱ་ཡ ཏི་སྶཱ་ཡ, བྷ་རི་ཡཱ་ཡེ’ཝ ཨ་ཏྟ་ནོ.
༣. ཡཱ་ཙ་ཀཱ་ན་ཉྩ སི་པྤཱི་ནཾ, ཨཱ་ག་ཏཱ་ནཾ ཏ་ཏོ ཏ་ཏོ;
དཱ་ནཾ ད་ཎྜི་སྶ་རཾ ནཱ་མ, ས་དཱ དཱ་པེ་སི བྷཱུ་པ་ཏི.
༤. ཨཱ་དི་པཱ་དོ མ་ཧི་ནྡོ སོ,
ཝ་ས་ནྟོ རོ་ཧ་ཎེ ཏ་དཱ;
ག་ཧེ་ཏུཾ རཱ་ཛི་ནོ་ར་ཊྛ-
མཱ་དཱ་ཡ བ་ལ་མཱ་ག་ཏོ.
༥. ཏཾ སུ་ཏྭཱ ཀུ་པི་ཏོ རཱ་ཛཱ, བ་ལཾ པེ་སེ་སི ཨ་ཏྟ་ནོ;
ཡུ་ཛ྄ཛྷི་ཏྭཱ ཏཾ པ་རཱ་ཛེ་སི, མ་ཧི་ནྡོ སོ མ་ཧཱ་བྷ་ཊོ.
༦. ཏ་ཏོ རཱ་ཛཱ ནི་ཝ་ཏྟེ་ཏུཾ, པི་ཏ་རཾ ཏ་སྶ པེ་ས་ཡི;
ཀ་སྶ་པཾ ཡུ་ཝ་རཱ་ཛཾ ཏཾ, སོ ག་ནྟྭཱ པུ་ཏྟ་ས་ནྟི་ཀཾ.
༧. ནཱ་ནཱ་དྷ་མྨ་ཀ་ཐོ་པེ་ཏཾ, ཝ་ཏྭཱ ཡུ་ཏྟི་མ་ནེ་ཀ་དྷཱ;
ས་ངྒྷཱ་མ་ཏོ ནི་ཝ་ཏྟེ་ཏྭཱ, པུ་ཏྟཾ སོ པུ་ན་རཱ་ག་མི.
༨. ཨཱ་དི་པཱ་དོ ཏུ སོ པ་ཙྪཱ, གྷཱ་ཏེ་ཏྭཱ མ་ཎྜ་ལཱ་དྷི་པེ;
ཀུ་དྡྷེ་ཛ་ན་པ་དེ དི་སྭཱ, ཨ་ག་མཱ་སི པུ་ར་ནྟི་ཀཾ.
༩. བྷི་ཀྑུ་ས་ངྒྷོ ཏ་མཱ་ནེ་ཏྭཱ, ད་སྶེ་སི ཝ་སུ་དྷཱ་དྷི་པཾ;
ད་ཏྭཱ སོ དྷཱི་ཏ་རཾ ཏ་སྶཱ, པེ་སེ་སི པུ་ན རོ་ཧ་ཎཾ.
༡༠. ནཱི་ཧ་རི་ཏྭཱ་ན དུ་སྶཱི་ལེ, ནི་ཀཱ་ཡ་ཏྟ་ཡ་ཝཱ་སཱི་སུ;
གཱ་ཧཱ་པེ་སི ན་ཝེ བྷི་ཀྑཱུ, ཨཱ་ཝཱ་སེ ཏ་ཏྠ ཏ་ཏྠ སོ.
༡༡. དྭ་ཡཱ་བྷི་སེ་ཀ་ཛཱ་ཏེ་ན, ཨཱ་དི་པཱ་དེ་ན སུ་ནུ་ནཱ;
མ་ཧཱ་ཝི་ཧཱ་རེ བོ་དྷི་མྷི, པཾ་སུཾ ཝ་ཌྜྷེ་སི པཱུ་ཛ་ཡཾ.
༡༢. ཨ་ཀཱ་སི ཙ ནི་ཀཱ་ཡེ་སུ, ཏཱི་སུ བི་མྦེ སི་ལཱ་མ་ཡེ;
སོ་ཝ་ཎྞ་ཡེ རཾ་སི་ཛཱ་ལེ, ཚ་ཏྟཾ ཙཱུ་ལཱ༹་མ་ཎིཾ ཏ་ཐཱ.
༡༣. ཨ་བྷ་ཡ་གི་རི་ཝི་ཧཱ་ར་མྷི, པཱ་སཱ་དཾ ས་ཀ་ནཱ་མ་ཀཾ;
ཀ་ཏྭཱ ཏ་ཏྠ ནི་ཝཱ་སེ་ཏྭཱ, བྷི་ཀྑུ གཱ་མ་མ་དཱ་པ་ཡི.
༡༤. མ་ཧི་ཡ་ངྒ་ཎ་ཝི་ཧཱ་ར་སྨིཾ, གཱ་མཾ སོ ཙེ་ཏི་ཡ་སྶ’དཱ;
ས་ཝ་ཏྠཾ པ་ཊི་མཱ་བྷ་ཏྟཾ, ས་བྦ་བྷི་ཀྑཱུ་ན དཱ་པ་ཡི.
༡༥. ཐ་ལེ ཛ་ལེ ཙ ས་ཏྟཱ་ནཾ, ཨ་དཱ་སི ཨ་བྷ་ཡཾ ཏ་དཱ;
ཙཱ་རི་ཏྟ་པུ་བྦ་རཱ་ཛཱུ་ནཾ, པ་རི་པཱ་ལེ་སི ས་བྦ་དཱ.
༡༦. ཏ་སྶ སེ་ནཱ་པ་ཏི སེ་ནོ, ཨི་ལ་ངྒོ་རཱ་ཛ་ཝཾ་ས་ཛོ;
ཐེ་རི་ཡཱ་ནཾ ཨ་ཀཱ’ཝཱ་སཾ; ཐཱུ་པཱ་རཱ་མ་སྶ པ་ཙྪ་ཏོ.
༡༧. དྷ་མྨཱ་རུ་ཙི་ཀ་བྷི་ཀྑཱུ་ནཾ, དྷ་མྨཱ་རཱ་མ་མ་ཀཱ་ར་ཡི;
ཏ་ཐཱ སཱ་ག་ལི་ཀཱ་ན་ཉྩ, ཀ་སྶ་པ་སེ་ན་ནཱ་མ་ཀཾ.
༡༨. ཧ་ད་ཡུ་ཎྷཱ་བྷི་དྷཱ་ནཾ སོ, ཀ་ཏྭཱ ཙེ་ཏི་ཡ་པ་བྦ་ཏེ;
པ་རི་ཝེ་ཎཾ ཨ་དཱ་དྷ་མྨ-རུ་ཙི་ཀཱ་ན་ཉྩ བྷི་ཀྑཱུ་ནཾ.
༡༩. ཨཱ་རཱ་མི་ཀཱ་ནཾ བྷི་ཀྑཱུ་ནཾ, ཨཱ་རཱ་མེ་སུ ཏ་ཧིཾ ཏ་ཧིཾ;
ཨེ་ཀ་མེ་ཀཾ ཀུ་ཊིཾ ཀ་ཏྭཱ, དཱ་པེ་སི ཙ ཙ་མཱུ་པ་ཏི.
༢༠. ར་ཏྟ་མཱ་ལ་གི་རི་སྨིཾ སོ, ཀ་ཏྭཱ ར་མྨཾ ཏ་རཾ སུ་བྷཾ;
ཀུ་ཙིཾ ཨ་དཱ སཱ་ས་ན་སྶ, སཱ་མི་ཀཱ་ནཾ ཏ་པ་སྶི་ནཾ.
༢༡. མ་ཧཱ་ཝི་ཧཱ་རེ ཀཱ་རེ་ཏྭཱ, པ་ཝི་ཝེ་ཎཾ ཝ་རཾ ཨ་དཱ;
པཾ་སུ་ཀཱུ་ལི་ཀ་བྷི་ཀྑཱུ་ནཾ, ས་མུ་དྡ་གི་རི་ནཱ་མ་ཀཾ.
༢༢. ཝཱ་སཾ ཨ་ར་ཉྙེ ཀཱ་རེ་ཏྭཱ, ཨ་ཏྟ་ནོ ཝཾ་ས་ནཱ་མ་ཀཾ;
མ་ཧཱ་ཝི་ཧཱ་རེ བྷི་ཀྑཱུ་ནཾ, ཝ་ནེ ནི་ཝཱ་ས་ཏཾ ཨ་དཱ.
༢༣. ཝི་ཧཱ་རེ་སཱུ ཙ ཛི་ཎྞེ་སུ, ན་ཝ་ཀ་མྨ་མ་ཀཱ་ར་ཡི;
དཱ་པེ་སི ཨ་གྒ་ལཾ ས་བྦ-བྷི་ཀྑཱུ་ནཾ ཛི་ཎྞ་ཙཱི་ཝ་རེ.
༢༤. ཏི་སྶཱ་རཱ་མཾ ཀ་རི་ཏྭཱ་ན, བྷི་ཀྑཱུ་ནཱི་ན་མུ་པ་སྶ་ཡཾ;
མ་རི་ཙ་ཝ་ཊྚི་མ་ཧཱ་བོ་དྷི, པ་རི་ཧཱ་རེ ནི་ཝེ་ས་ཡི.
༢༥. ཨ་ནུ་རཱ་དྷ་པུ་རེ ཙེ་ཝ, པུ་ལ་ཏྠི་ན་ག་རེ་པི ཙ;
ཨུ་པ་ས་གྒ་རོ་ག་ནཱ་སཱ་ཡ, ཝེ་ཛྫ་སཱ་ལཱ་པི ཀཱ་ར་ཡི.
༢༦. ཨ་ཏྟ་ནཱ ཀ་ཏ་ཝཱ་ས་ནཾ, བྷོ་ག་གཱ་མེ ཙ དཱ་པ་ཡི;
ཏ་ཐཱ་རཱ་མི་ཀ་གཱ་མེ ཙ, པ་ཊི་མཱ་བྷ་ར་ཎ་ཉྩ སོ.
༢༧. བྷེ་ས་ཛྫ་གེ་ཧཾ ཀཱ་རེ་སི, ན་ག་རེ ཏ་ཏྠ ཏ་ཏྠ སོ;
པཾ་སུ་ཀཱུ་ལི་ཀ་བྷི་ཀྑཱུ་ནཾ, བྷ་ཏྟཾ ཝ་ཏྠ་ཉྩ དཱ་པ་ཡི.
༢༨. ཁ་ནྡྷཱི་ཀ་ཏེ ཨ་མོ་ཙེ་སི, ཏི་ར་ཙྪཱ་ན་ག་ཏེ བ་ཧཱུ;
ཀ་པ་ཎཱ་ན་ཉྩ དཱ་པེ་སི, མ་ཧཱ་དཱ་ནཾ ཙ་མཱུ་པ་ཏི.
༢༩. ཝི་ཙི་ཏྟཾ བྱ་ཉྫ་ནཾ བྷ་ཏྟཾ, ཡཱ་གུཾ ཝི་ཝི་དྷ་ཁ་ཛྫ་ཀཾ;
ཀ་ཏྭཱ སཱུ་ཀ་ར་རཱུ་པ་ཉྩ, གུ་ལ༹ཾ བྷི་ཀྑཱུ་ནཾ དཱ་པ་ཡི.
༣༠. ཨེ་ཝཱ་མཱ་དཱི་ནི པུ་ཉྙཱ་ནི, ཀ་ཏྭཱ སེ་ནཱ་ཡ ནཱ་ཡ་ཀོ;
སེ་ནོ ཀི་ཏྟི་ནྡུ་པཱ་དེ་ཧི, ས་བྦཱ ཨོ་བྷཱ་ས་ཡཱི དི་སཱ.
༣༡. ཏ་སྶེ་ཝ ཉཱ་ཏ་ཀོ ཀ་ཏྭཱ, ནཱ་ཡ་ཀོ ར་ཀྑ་ས་ཝ྄ཧ་ཡོ;
ས་ཝཱ་ར་ཀ་མྷི གཱ་མ་མྷི, ཝི་ཧཱ་རཾ སུ་མ་ནོ་ཧ་རཾ.
༣༢. མ་ཧཱ་ཝི་ཧཱ་ར་ཝཱ་སཱི་ནཾ, སཱ་རཱ་ནཾ པ་ཊི་པ་ཏྟི་ཡཱ;
བྷི་ཀྑཱུ་ནཾ སོ ཨ་དཱ སཱ་དྷུ, ཋ་པེ་ཏྭཱ ཝ་ཏྟ་མུ་ཏྟ་མཾ.
༣༣. སེ་ནོ ནཱ་མ མ་ཧཱ་ལེ་ཁོ, མ་ཧཱ་ལེ་ཁ་ཀ་པ་བྦ་ཏཾ;
མ་ཧཱ་ཝི་ཧཱ་རེ ཀཱ་རེ་སི, བྷི་ཀྑཱུ་ནཾ ཝཱ་ས་མུ་ཏྟ་མཾ.
༣༤. ཙོ་ལ༹་རཱ་ཛཱ་བྷི་དྷཱ་ནོ, ཙ, ཨ་མ་ཙྩོ ཏ་སྶ རཱ་ཛི་ནོ;
པ་རི་ཝེ་ཎཾ ཨ་ཀཱ་ར་མྨཾ, ན་ཊྛཾ ཏཾ སུ་པྤ་ཏི་ཊྛི་ཏཾ.
༣༥. རཱ་ཛཱ ཏཱི་སུ ནི་ཀཱ་ཡེ་སུ, རཱུ་པ་ཀ་མྨ་མ་ནོ་ར་མཾ;
མ་ཎྜ་པཱ་ནི ཝི་ཙི་ཏྟཱ་ནི, ཝེ་ཛ་ཡ་ནྟོ པ་མཱ་ནི ཙ.
༣༦. ཀཱ་རེ་ཏྭཱ དྷཱ་ཏུ་པཱུ་ཛཱ་ཡོ, ཀ་ཏྭཱ ཛ་ན་མ་ནོ་ཧ་རཱ;
ཡ་ཐཱ ཀ་མྨཾ ག་ཏོ ཋ་ཏྭཱ, ཝ་སྶཱ་ནི ད་ས་ས་ཏྟ ཙ.
༣༧. དྭ་ཡཱ་བྷི་སེ་ཀ་ས་ཉྫཱ་ཏོ, ཡུ་ཝ་རཱ་ཛཱ་ཐ ཀ་སྶ་པོ;
ཨཱ་སི ལ་དྡྷཱ་བྷི་སེ་ཀོ སོ, ལཾ་ཀཱ་ར་ཛྫེ་ཀ་མཱ་ག་ཏེ.
༣༨. ས་དྡྷོ ཨཱ་ག་ཏ་མ་གྒོ་ཝ, སཱ་བྷི་ཉྙོ ཝི་ཡ པ་ཉྙ་ཝཱ;
ཝ་ཏྟཱ སོ མ་ར་མ་ནྟི་ཝ, ཙཱ་ག་ཝཱ དྷ་ན་དོ ཝི་ཡ.
༣༩. བ་ཧུ་སྶུ་ཏོ དྷ་མྨ་ཀ་ཐཱི, ས་བྦ་སི་པྤ་ཝི་སཱ་ར་དོ;
ཡུ་ཏྟཱ་ཡུ་ཏྟ་ཝི་ཙཱ་རཱ་ཡ, ནི་པུ་ཎོ ན་ཡ་ཀོ་ཝི་དོ.
༤༠. ཨ་ཙ་ལོ ཨི་ནྡ་ལཱི་ལོ’ཝ, ཋི་ཏོ སུ་ག་ཏ་སཱ་ས་ནེ;
པ་ར་པྤ་ཝཱ་དི་ཝཱ་ཏེ་ཧི, ས་བྦེ་ཧི’པི ཨ་ཀ་མྤི་ཡོ.
༤༡. མཱ་ཡཱ་སཱ་ཋེ་ཡྻ་མཱ་ནཱ་དི, པཱ་པཱ་ན་ཉྩ ཨ་གོ་ཙ་རོ;
གུ་ཎཱ་ནཾ ཨཱ་ཀ་རོ ས་བྦ-ར་ཏ་ནཱ་ནཾ ཝ་སཱ་ག་རོ.
༤༢. བྷཱུ་མི་ཙ་ནྡོ ན་རི་ནྡོ སོ, ཝཾ་སེ ཛཱ་ཏ་སྶ ཨ་ཏྟ་ནོ;
ད་པྤུ་ལ༹་སྶཱ་དཱི་པཱ་ད་སྶ, ཡུ་ཝ་རཱ་ཛ་པ་དཾ ཨ་དཱ.
༤༣. ར་ཛྫཾ ད་ས་ཧི དྷ་མྨེ་ཧི, ཙ་ཏུ་ས་ངྒ་ཧ་ཝ་ཏྠཱུ་ཧི;
ཀ་རོ་ནྟོ པ་རི་པཱ་ལེ་སི, ལོ་ཀཾ ནེ་ཏྟཾ་ཝ ཨ་ཏྟ་ནོ.
༤༤. སོ དྷེ་ཏྭཱ སཱ་ས་ནཾ ས་བྦཾ, དྷ་མྨ་ཀ་མྨེ་ན ས་ཏྠུ་ནོ;
ག་ཧེ་ཏྭཱ ན་ཝ་ཀེ བྷི་ཀྑཱུ, ཨ་ཀཱ་སཱ’ཝཱ་ས་པཱུ་ར་ཎཾ.
༤༥. དུ་ཊྛ་གཱ་མ་ཎི་རཱ་ཛེ་ན, ཀ་ཏཾ མ་རི་ཙ་ཝ་ཊྚི་ཀཾ;
ན་ཊྛཾ ཝི་ཧཱ་རཾ ཀཱ་རེ་ཏྭཱ, ནཱ་ནཱ་ཨཱ་ཝཱ་ས བྷཱུ་སི་ཏཾ.
༤༦. ཐེ་ར་ཝཾ་ས་ཛ་བྷི་ཀྑཱུ་ནཾ, ཨ་དཱ ཀ་ཏྭཱ མ་ཧཱ་མ་ཧཾ;
ཏེ་སཾ པ་ཉྩ་ས་ཏཱ་ན་ཉྩ, བྷོ་ག་གཱ་མེ ཙ དཱ་པ་ཡི.
༤༧. ཏ་ཏྠ སོ ཏུ་སི་ཏེ ར་མྨེ, དེ་ཝ་ས་ངྒྷ་པུ་ར་ཀྑ་ཏཾ;
མེ་ཏྟེ་ཡྻཾ ལོ་ཀ་ནཱ་ཐཾ ཏཾ, དེ་སེ་ནྟཾ དྷ་མྨ་མུ་ཏྟ་མཾ.
༤༨. ད་སྶེ་ནྟོ ཝི་ཡ ལོ་ཀ་སྶ, ཝི་ཧཱ་རེ ས་བྦ་ས་ཛྫི་ཏེ;
ནི་སི་ནྣོ མ་ཎྜ་པེ ར་མྨེ, ནཱ་ནཱ་ར་ཏ་ན་བྷཱུ་སི་ཏེ.
༤༩. ན་ག་རེ་ཧི ཙ ས་བྦེ་ཧི, བྷི་ཀྑཱུ་ཧི པ་རི་ཝཱ་རི་ཏོ;
བུ་དྡྷ་ལི་ལཱ་ཡ ལཾ་ཀི་ནྡོ, ཨ་བྷི་དྷ་མྨ མ་བྷཱ་ས་ཡི.
༥༠. སོ་ཎྞ་པ་ཊྚེ ལི་ཁཱ་པེ་ཏྭཱ-བྷི་དྷ་མྨ་པི་ཊ་ཀཾ ཏ་དཱ;
དྷ་མྨ་ས་ངྒ་ཎི་ཀཾ པོ་ཏྠཾ, ནཱ་ནཱ་ར་ཏ་ན བྷཱུ་སི་ཏཾ.
༥༡. ཀ་ཏྭཱ ན་ག་ར་མ་ཛ྄ཛྷ་མྷི, ཀཱ་རེ་ཏྭཱ ཧེ་མ་མུ་ཏྟ་མཾ;
ཏཾ ཏ་ཏྠ ཋ་པ་ཡི་ཏྭཱ་ན, པ་རི་ཧཱ་ར་མ་དཱ་པ་ཡི.
༥༢. ས་ཀྐ་སེ་ནཱ་པ་ཏི་ཊྛཱ་ནཾ, ད་ཏྭཱ པུ་ཏྟ་སྶ ཨ་ཏྟ་ནོ;
པ་རི་ཧཱ་རེ ནི་ཡོ་ཛེ་སི, ཏ་ཏྠ ཏཾ དྷ་མྨ་པོ་ཏྠ་ཀེ.
༥༣. ཨ་ནུ་སཾ་ཝ་ཙྪ་རཾ རཱ་ཛཱ, པུ་རཾ དེ་ཝ་པུ་རཱི ཝི་ཡ;
ཝི་བྷཱུ་སི་ཏཱ་ཡ སེ་ནཱ་ཡ, ས་ཛྫེ་ཏྭཱ པ་རི་ཝཱ་རི་ཏོ.
༥༤. དེ་ཝ་རཱ་ཛཱ་ཝ སོ་བྷ་ནྟོ, ས་བྦཱ་བྷ་ར་ཎ་བྷཱུ་སི་ཏོ;
ཧ་ཏྠི་ཁ་ཎྜེ ནི་སཱི་དི་ཏྭཱ, ཙ་ར་ནྟོ པུ་ར་ཝཱི་ཐི་ཡཾ.
༥༥. མ་ཧ་ཏཱ པ་རི་ཧཱ་རེ་ན, ནེ་ཏྭཱ ཏཾ དྷ་མྨ་ས་ངྒ་ཧཾ;
ཨ་ཏྟ་ནཱ ཀཱ་རི་ཏཾ ར་མྨཾ, ཝི་ཧཱ་རཾ ས་བྦ་ས་ཛྫི་ཏཾ.
༥༦. ཏ་ཏྠ དྷཱ་ཏུ་ག་ཏེ ར་མྨེ, ནཱ་ནཱ་ར་ཏ་ན་བྷཱུ་སི་ཏེ;
མ་ཎྜ་པེ དྷཱ་ཏུ་པི་ཋ་སྨིཾ, པ་ཏི་ཊྛཱ་པི་ཡ པཱུ་ཛ་ཡི.
༥༧. ག་ནྠཱ་ཀ་ར་པ་རི་ཝེ་ཎཾ, མ་ཧཱ་མེ་གྷ་ཝ་ནེ ཨ་ཀཱ;
ན་ག་རེ ཝ་ཛྫ་སཱ་ལཱ ཙ, ཏེ་སཾ གཱ་མེ ཙ དཱ་པ་ཡི.
༥༨. བྷ་ཎྜི་ཀ་པ་རི་ཝེ་ཎ་ཉྩ, སི་ལཱ་མེ་གྷ་ཉྩ པ་བྦ་ཏཾ;
ཀ་ཏྭཱ’བྷ་ཡ་གི་རི་སྨིཾ སོ, ཏེ་སཾ གཱ་མ་མ་དཱ་པ་ཡི.
༥༩. ཛོ་ཏི་ཝ་ན་ཝི་ཧཱ་ར་སྨིཾ, རཱ་ཛཱ ལ་ངྐཱ་ཡ ནཱ་ཡ་ཀོ;
བྷ་ཏྟ་གྒ་སྶ ཨ་དཱ གཱ་མཾ, ཏ་ཐཱ’བྷ་ཡ་གི་རི་མྷི ཙ.
༦༠. ད་ཀྑི་ཎ་གི་རི་ནཱ་མ་སྶ, ཝི་ཧཱ་ར་སྶ ཙ དཱ་པ་ཡི;
གཱ་མཾ ཀ་ཏ་ཉྙུ་བྷཱ་ཝེ་ན, རཱ་ཛཱ པ་ར་མ་དྷ་མྨི་ཀོ.
༦༡. ས་ཀྐ་སེ་ནཱ་པ་ཏི ར་མྨཾ, པ་རི་ཝེ་ཎཾ སུ་མཱ་པི་ཡ;
ཨ་དཱ་སི ས་ཧ་གཱ་མེ་ཧི, ཐེ་རི་ཡཱ་ནཾ ས་ནཱ་མི་ཀཾ.
༦༢. བྷ་རི་ཡཱ ཝ་ཛི་རཱ ཏ་སྶ, ཏེ་སཾ་ཡེ་ཝ ཨ་དཱ་པ་ཡི;
པ་རི་ཝེ་ཎཾ ཀ་རི་ཏྭཱ་ན, ས་གཱ་མཾ ས་ཀ་ནཱ་མ་ཀཾ.
༦༣. ཨུ་པ་སྶ་ཡཾ ཀ་རི་ཏྭཱ་ན, སཱ ཨེ་ཝ པ་ད་ལ་ཉྪ་ནེ;
བྷི་ཀྑཱུ་ནཱི་ནཾ ཨ་དཱ ཐེ་ར-ཝཾ་སེ ས་བྦ་ཏྠ པཱུ་ཛི་ཏེ.
༦༤. ས་ཀྐ་སེ་ནཱ་པ་ཏི མཱ་ཏཱ, དེ་ཝཱ’ར་ཉྙ་ཀ བྷི་ཀྑཱུ་ནཾ;
ཐེ་ར་ཝཾ་ས་པྤ་དཱི་པཱ་ནཾ, ཨ་ཀཱ’ཝཱ་སཾ ས་ནཱ་མ་ཀཾ.
༦༥. སཱ ཨེ་ཝ པ་ཊི་བི་མྦ་སྶ, ས་ཏྠུ མ་རི་ཙ་ཝ་ཊྚི་ཡཾ;
ཙཱུ་ལཱ༹་མ་ཎིཾ པཱ་ད་ཛ་ལཾ, ཨ་ཀཱ ཚ་ཏྟ་ཉྩ ཙཱི་ཝ་རཾ.
༦༦. རཱ་ཛཱ རཱ་ཛཱ་ལ་ཡེ་ཡེ་ཝ, རཱ་ཛ་ཝཾ་སཾ ས་ནཱ་མ་ཀཾ;
ཨ་ཀཱ་སི པཱ་ལི༹་ཀཾ ནཱ་མ, པཱ་སཱ་དཾ སུ་མ་ནོ ཧ་རཾ.
༦༧. པཱུ་ཛེ་སི རཱ་ཛི་ནཱི ནཱ་མ, རཱ་ཛི་ནོ བྷ་རི་ཡཱ’པ་རཱ;
པ་ཊྚ་ཀ་ཉྩུ་ཀ་པཱུ་ཛཱ་ཡ, ཧེ་མ་མཱ་ལི་ཀ ཙེ་ཏི་ཡཾ.
༦༨. ཏ་སྶཱ པུ་ཏྟོ་སི སི་དྡྷ་ཏྠོ, ནཱ་མ ཨི་སྶ་རི་ཡེ ཋི་ཏོ;
སུ་ཏོ མ་ལ་ཡ་རཱ་ཛཱ་ཏི, རཱུ་པེ་ན མ་ཀ་ར་དྡྷ་ཛོ.
༦༩. རཱ་ཛཱ ཏ་སྨིཾ མ་ཏེ ཀ་ཏྭཱ, སཱ་ལཾ བྷི་ཀྑུ་ན་མུ་ཏྟ་མཾ;
དཱ་ན་ཝ་ཊྚཾ པ་ཊྛ་པེ་ཏྭཱ, ཏ་སྶ པ་ཏྟི་མ་དཱ ཏ་དཱ.
༧༠. ཨེ་ཝཾ དྷ་མྨེ་ན ཀཱ་རེ་ནྟེ, ར་ཛྫཾ ལ་ངྐཱ་དཱི་པེ ཏ་དཱ;
ཙོ་ལ༹་རཱ་ཛེ་ན ཡུ་ཛ྄ཛྷི་ཏྭཱ, པ་ཎྜུ་རཱ་ཛཱ པ་རཱ་ཛི་ཏོ.
༧༡. པ་ཎྞཱ་ཀཱ་རཱ་ནི ནེ་ཀཱ་ནི, བ་ལཾ ས་ནྡྷཱ་ཡ པེ་ས་ཡི;
རཱ་ཛཱ་ལཾ་ཀི་སྶ་རོ ས་དྡྷིཾ, མ་ནྟེ་ཏྭཱ ས་ཙི་ཝེ་ཧི སོ.
༧༢. ས་ནྣ་ཡ྄ཧ བ་ལ་ཀཱ་ཡཾ སོ, ས་ཀྐ་སེ་ནཱ་པ་ཏིཾ ས་ཀཾ;
བ་ལ་སྶ ནཱ་ཡ་ཀཾ ཀ་ཏྭཱ, མ་ཧཱ་ཡི་ཏྠ་མུ་པཱ་ག་མི.
༧༣. ཝི་ཛ་ཡཾ པུ་བྦ་རཱ་ཛཱུ་ནཾ, ཝ་ཏྭཱ ཝེ་ལཱ་ཏ་ཊེ ཋི་ཏོ;
ཨུ་སྶཱ་ཧཾ ཛ་ན་ཡི་ཏྭཱ་ན, ནཱ་ཝཾ ཨཱ་རོ་པ་ཡཱི བ་ལཾ.