པ་ཉྩ་ཙ་ཏྟཱ་ལཱི་ས་ཏི་མ པ་རི་ཙྪེ་ད
༡. ར་ཉྙོ ཏ་སྶ་ཙྩ་ཡེ རཱ་ཛཱ, མཱ་ཎ་ཝ་མྨོ ཨ་ཧོ་སི སོ;
ཀིཾ གོ་ཏྟོ ཀ་སྶ པུ་ཏྟོ ཙ, ཀ་ཐཾ ར་ཛྫ་མ་པཱ་པུ་ཎི.
༢. མ་ཧཱ་ས་མྨ་ཏ་ཝཾ་ས་མྷི, ཛཱ་ཏོ ཛཱ་ཏི་གུ་ཎཱ་ཝ་ཧོ;
པུ་ཏྟོ ཀ་སྶ་པ་ནཱ་མ་སྶ, ཐཱུ་པཱ་རཱ་མ་སྶ བྷེ་དི་ནོ.
༣. དྷཱི་ཏཱ མ་ལ་ཡ་རཱ་ཛ་སྶ, ས་ངྒྷ་ནཱ་མ་སྶ རཱ་ཛི་ནོ;
ཏཾ ལ་བྷི་ཏྭཱ ཝ་སཾ དེ་སེ, ཨུ་ཏྟ་རེ ལཱི་ན་ཝུ་ཏྟི་ཀོ.
༤. ཧ་ཏྠ་དཱ་ཋ་ན་རི་ནྡེ་ན, ཏ་སྨིཾ ཨ་ཏྠེ་ཝ དྷཱ་རི་ཏེ;
ཛ་མྦུ་དཱི་པ་མུ་པཱ་ག་མྨ, ན་ར་སཱི་ཧཾ མ་ཧཱི་པ་ཏི.
༥. ག་ནྟྭཱ ཝ་ཏྭཱ ས་ཀཾ ནཱ་མཾ, སེ་ཝི་ཏུཾ ཏ་མུ་པ་ཀྐ་མི;
ཨཱ་རཱ་དྷེ་སི ཙ ས་བྦེ་ཧི, པ་ཡོ་གེ་ཧི ན་རཱ་དྷཱི་པཾ.
༦. ཝི་དི་ཏྭཱ ཏ་སྶ སོ་ཧ་ཛྫཾ, ནེ་ཏྭཱ བྷ་རི་ཡ་མ་ཏྟ་ནོ;
ཝཱ་སཾ ཏ་ཏྠེ་ཝ ཀ་པྤེ་སི, སེ་ཝ་མཱ་ནོ དི་ཝཱ་ནི་སཾ.
༧. སོ་པི ཨཱ་རཱ་དྷི་ཏོ ཏེ་ན, ཀ་ཎྜུ་ཝེ་ཊྛི ན་རུ་ཏྟ་མོ;
ས་བྦཾ ནེ་ནྟོ་ཝ ཏཾ ར་ཛྫཾ, མ་ཧཱ་བྷོ་ག་མ་དཱ་པ་ཡི.
༨. ཏེ་ན སཾ་ཝཱ་ས་མ་ནྭཱ་ཡ, བྷ་རི་ཡཱ ས་ངྒྷ་ནཱ་མི་ཀཱ;
ཙ་ཏ་སྶོ དྷཱི་ཏ་རོ པུ་ཏྟེ, ཙ་ཏྟཱ་རོ་པི ཝི་ཛཱ་ཡ་ཐ.
༩. ཨ་ཐེ་ཀ་དི་ཝ་སཾ རཱ་ཛཱ, ཧ་ཏྠི་ཀྑ་ནྡྷ་ཝ་རཾ ག་ཏོ;
ས་ཉྩ་ར་ནྟོ ཡ་ཐཱ་ཀཱ་མཾ, མཱ་ཎ་ཝ་མྨེ་ན ཨེ་ཀ་ཏོ.
༡༠. ནཱ་ལི༹་ཀེ་རཾ པི་ཝི་ཏྭཱ་ན, ཏ་ཏྲ་ཊྛོ་ཝ པི་པཱ་སི་ཏོ;
མཱ་ཎ་ཝ་མྨ་སྶ པཱ་དཱ་སི, མ་ཉྙ་ནྟོ ཨ་ཉྙ་མེ་ཝ ཏཾ.
༡༡. སོ ཏཾ ག་ཧེ་ཏྭཱ ཙི་ནྟེ་སི, ས་ཁཾ པེ་ས ན་རཱ་དྷི་པོ;
ཨུ་ཙྪི་ཊྛཾ ནཱ་མ ཀིཾ ཧོ་ཏི, ས་ཏྟཱ་ནཾ པ་ར་མ་ཏྠ་ཏོ.
༡༢. ཏ་སྨཱ ཡུ་ཏྟཾ མ་ཡཱ་པཱ་ཏུ-མཱི་ཏི ཙི་ནྟི་ཡ ཏཾ པི་ཝི;
ཨེ་ཝཾ ཧོ་ནྟི མ་ཧུ་སྶཱ་ཧཱ, དེ་ཏུ་ཀཱ་མཱ་ཧི བུ་དྡྷི་ནོ.
༡༣. རཱ་ཛཱ་པི དི་སྭཱ ཏཾ བྷཱི་ཏོ, ཏ་སྶ་པཱི ཏཱ་ཝ སེ་ས་ཀཾ;
ས་ཡཾ པི་ཝི ཏ་ཐཱ་ཧོ་ཏི, ཀ་མྨཾ པུ་ཉྙ་ཝ་ཏཾ ས་དཱ.
༡༤. ཋ་པེ་སི ས་ཀ་ཝེ་སེ་ཝ, ཏ་ཏོ པ་ཊྛཱ་ཡ ཨ་ཏྟ་ནོ;
བྷོ་ཛ་ནེ ས་ཡ་ནེ ཙེ་ཝ, པ་རི་ཧཱ་རེ ཙ ཝཱ་ཧ་ནེ.
༡༥. ཨེ་ཝཾ ཏེ་སུ ཝ་ས་ནྟེ་སུ, ཡུ་དྡྷ་ཏྠཱ་ཡ་མུ་པ་ཀྐ་མི;
ཝ་ལླ་བྷོ ན་ར་སཱི་ཧེ་ན, ན་ར་སཱི་ཧོ ཝི་ཙི་ནྟ་ཡི.
༡༦. ཨ་ཡཾ ཁོ མ་མ སེ་ཝཱ་ཡ, ར་ཛྫཾ ཝཾ་ས ག་ཏཾ ས་ཀཾ;
ལ་བྷི་སྶཱ་མཱི་ཏི སེ་ཝེ་ཏི, ར་ཏྟིཾ དི་ཝ མ་ཏ་ནྡི་ཏོ.
༡༧. ས་ཙེ སོ་པི མ་ཡཱ ག་ནྟྭཱ, ཡུ་ཛ྄ཛྷ་ནྟོ མ་ར་ཎཾ ག་ཏོ;
ཏ་ཀྐི་ཏཾ ཏ་སྶ མ་ཡ྄ཧ་ཉྩ, ས་བྦཾ ཏ་མ་ཕ་ལཾ བྷ་ཝེ.
༡༨. ཨེ་ཝཾ ཙི་ནྟི་ཡ་ཏཾ རཱ་ཛཱ, ནི་ཝ་ཏྟེ་ཏྭཱ ས་ཀེ པུ་རེ;
ས་ཡཾ ཝ་ལླ་བྷ་རཱ་ཛེ་ན, ཀཱ་ཏུཾ ས་ངྒཱ་མ་མཱ་ར་སི.
༡༩. མཱ་ཎ་ཝ་མྨོ་པི ཙི་ནྟེ་སི, ས་ཙེ’ཡཾ མ་ཡི ཛཱི་ཝི་ཏི;
རཱ་ཛཱ མཱི་ཡ་ཏི ཡུ་དྡྷ་མྷི, ཀིཾ ཕ་ལཾ མ་མ ཛཱི་ཝི་ཏེ.
༢༠. ཝི་སྶཱ་སོ དུ་ཀྐ་ཏོ ཏེ་ན, བྷ་ཝི་སྶ་ཏི ཏ་ཐཱ་ས་ཏི;
ས་ངྒ་ཧེ་སི ཀི་མ་ཏྠཾ མཾ, ས་མཱ་ན་ཏྟེ་ན ཨ་ཏྟ་ནོ.
༢༡. ཏ་སྨཱ ཡུ་ཏྟཾ མ་ཡཱ ག་ནྟུཾ, ས་ཧ་ས་ངྒཱ་མ མ་ཎྜ་ལཾ;
སུ་ཁ་ཉྷི ས་དྡྷིཾ ཏེ་ནེ་ཏྠ, ཛཱི་ཝི་ཏཾ མ་ར་ཎཾ་པི ཝཱ.
༢༢. ཨེ་ཝཾ ཙི་ནྟི་ཡ ས་ནྣ་དྡྷ-བ་ལོ ཧ་ཏྠི་ཝ་རཾ ག་ཏོ;
ག་ནྟྭཱ ད་སྶེ་སི ཨ་ཏྟཱ་ནཾ, སོ ཏཾ ས་ངྒཱ་མ མ་ཎྜ་ལེ.
༢༣. ན་ར་སཱི་ཧོ་ཝ ཏཾ དི་སྭཱ, ཧ་ཊྛ་ཏུ་ཊྛོ ས་མུ་གྒི་རི;
ས་ཧོ ས་ནྠ་ཝ་མེ་ཏ་སྨིཾ, ཀ་ཏྟ་བྦཾ མེ ཀ་ཏཾ ཨི་ཏི.
༢༤. ཏ་ཏོ མཱ་ན་སྶ སེ་ནཱ ཙ, སེ་ནཱ ཙེ་ཝ་སྶ་རཱ་ཛི་ནོ;
སེ་ནཾ ཝ་ལླ་བྷ་རཱ་ཛ་སྶ, ཝི་དྡྷཾ་སེ་སི ས་མཱ་ག་ཏཱ.
༢༥. མཱ་ཎ་ཝ་མྨོ་པི ད་སྶེ་སི, ཏ་ཧིཾ སུ་ར་ཏྟ་མ་ཏྟ་ནོ;
པ་ར་ཀྐ་མ་ནྟོ དེ་ཝཱ་ནཾ, ར་ཎེ ནཱ་རཱ་ཡ་ཎོ ཝི་ཡ.
༢༦. ན་ར་སཱི་ཏོ་པི ས་ནྟུ་ཊྛོ, མཱ་ཎ་ཝ་མྨ་སྶ ཝི་ཀྐ་མེ;
ཨཱ་ལི་ངྒ་ཏྭཱ སི་ནེ་ཧེ་ན, ཏྭཾ ཁོ མེ ཛ་ཡ་དོ ཨི་ཏི.
༢༧. ཨ་ཏྟ་ནོ པུ་ར་མཱ་ག་མྨ, ཀ་ཏྭཱ ཝི་ཛ་ཡ་མ་ངྒ་ལཾ;
མཱ་ཎ་ཝ་མྨ་སྶ སེ་ནཱ་ཡ, ཀ་ཏྟ་བྦཾ ས་བྦ་མཱ་ཙ་རི.
༢༨. ཨ་ཐེ་ཝཾ ཙི་ནྟ་ཡི རཱ་ཛཱ, ཀ་ཏྟ་བྦཾ མེ ས་ཧཱ་ཡ་ཀོ;
ཨ་ཏྟ་ནཱ’ཀཱ་སི ས་བྦ་ཉྩ, ཨ་ན་ཎོ སོ མ་མ་ཛྫ་ཏོ.
༢༩. ཨི་ཎཾ མ་མཱ་པི སོ་དྷེ་མི, ཀ་ཏྭཱ ཀ་ཏྟ་བྦ་མ་ཏྟ་ནཱ;
ཀ་ཏྟ་ཉྙཱུ ཀ་ཏ་ཝེ་དཱི་ཧི, པུ་རི་སཱ’ཏཱི་ཝ་དུ་ལླ་བྷཱ.
༣༠. ཨ་མ་ཙྩེ ས་ནྣི་པཱ་ཏེ་ཏྭཱ, ཨི་དཾ ཝ་ཙ་ན་མ་བྲ་ཝི;
ས་ཧཱ་ཡ་སྶ མ་མེ་ཏ་སྶ, ཀ་མྨེ ཏུ་མྷེ་པི ས་ཀྑི་ནོ.
༣༡. མ་ཡཱ་པི ཏ་སྶ ཀ་ཏྟ་བྦཾ, ཀ་མྨཾ སཱ་དྷུ སུ་ཁཱ་ཝ་ཧཾ;
ཨུ་པ་ཀཱ་རོ ཧི སཱ་དྷཱུ་ནཾ, དྷ་མྨོ པུ་བྦོ་པ་ཀཱ་རི་ནོ.
༣༢. ཨེ་ཝཾ ཝུ་ཏྟེ ཨ་མ་ཙྩཱ ཏེ, པ་ཙྩཱ་ཧཾ་སུ མ་ཧཱི་པ་ཏི;
ཡཾ ཡ་མི་ཙྪ་ཏི དེ་ཝོ་ཧི, ཏཾ ཏཾ རུ་ཙྩ་ཏི ནོ ཨི་ཏི.
༣༣. ཨ་ཐ སོ མཱ་ཎ་ཝ་མྨ་སྶ, སེ་ནཾ ད་ཏྭཱ ས་ཝཱ་ཧ་ནཾ;
ས་བྦོ་པ་ཀ་ར་ཎ་ཉྩེ་ཝ, ས་བྦ་ཀ་མྨ་ཀ་རེ་པི ཙ.
༣༤. ག་ཙྪཱ་ཏི ཝ་ཏྭཱ ཏཾ ཡ་ནྟཾ, ས་ཧ་སེ་ནཱ་ཡ་པེ་ཀྑི་ཡ;
པ་རི་དེ་ཝི་ཏྠ བྷཱུ་མི་ནྡོ, ཝི་པྤ་ཝུ་ཏྠཾ’ཝ པུ་ཏྟ་ཀཾ.
༣༥. མཱ་ཎ་ཝ་མྨོ་པི ཨཱ་རུ་ཡ྄ཧ, ནཱ་ཝཱ་ཡོ ཛ་ལ་དྷཱི་ཏ་ཊེ;
ན ཙི་རེ་ནེ་ཝ ཨཱ་ག་མྨ, ས་མ་ཏྟི་ཀྐ་མྨ ཝེ་ག་སཱ.
༣༦. ས་ཧ སེ་ནཱ་ཡ མ་དྡ་ནྠོ, ལ་ངྐཱ་དཱི་པ་མུ་པ་ཝི་སཱི;
ཏཾ སུ་ཏྭཱ་ན པ་ལཱ་ཡི་ཏྠ, རཱ་ཛཱ དཱ་ཋོ་པ་ཏི་སྶ་ཀོ.
༣༧. མཱ་ཎ་ཝ་མྨོ པུ་རཾ ག་ནྟྭཱ, ཨ་ཧུ་ཏྭཱ་ཝ ན་རཱ་དྷི་པོ;
པ་ལཱ་ཏ་མ་ནུ་བ་ནྡྷི་ཏྠ, པ་དཱ་ནུ་པ་ད་མུ་ག་ཏོ.
༣༨. ཏ་དཱ སཱ ད་མི་ལི༹ སེ་ནཱ, ཨ་སྶོ་སི ཀི་ར སཱ་མི་ཀོ;
མ་ཧཱ་རོ་གཱ’བྷི་བྷཱུ་ཏོ་ཏི, སུ་ཏྭཱ ཏཾ སཱ ཨ་པ་ཀྐ་མི.
༣༩. སུ་ཏྭཱ དཱ་ཋོ་པ་ཏི་སྶོ ཏཾ, ས་མཱ་དཱ་ཡ མ་ཧཱ་བ་ལཾ;
མཱ་ཎ་ཝ་མྨཾ ཨུ་པཱ་ག་མྨ, ཀཱ་ཏུ་མཱ་ར་བྷི སཾ་ཡུ་དྷཾ.
༤༠. མཱ་ཎ་ཝ་མྨོ ཙ ཙི་ནྟེ་སི, ས་བྦཱ སེ་ནཱ ག་ཏཱ མ་མ;
མ་ཏེ མ་ཡི ས་མི་ཛ྄ཛྷེ་ཡྻ, ཝེ་རི་ནོ མེ མ་ནོ་ར་ཐཾ.
༤༡. ཛ་མྦུ་དཱི་པཾ་ཝ ཏ་སྨཱ’ཧཾ, ག་ནྟྭཱ’དཱ་ས བ་ལཾ ཏ་ཏོ;
པུ་ན ར་ཛྫཾ ག་ཧེ་སྶཾ་ཏི, ཏ་སྨཱ ཨེ་ཝ་མ་ཀཱ་སི སོ.
༤༢. ག་ནྟྭཱ པུ་ན’པི དི་སྭཱ་ན, ས་ཧཱ་ཡཾ ན་ར་སཱི་ཧ་ཀཾ;
ཨཱ་རཱ་དྷ་ཧ་ནྟོ ནི་པུ་ཎཾ, ས་ཀྐ་ཙྩཾ ཏ་མུ་པ་ཊྛ་ཧི.
༤༣. ཡཱ་ཝ རཱ་ཛ་ཙ་ཏུ་ཀྐཾ་སོ, མཱ་ཎཱ་མྨོ ཏ་ཧིཾ ཝ་སི;
ན་ར་སཱི་ཧོ’ཐ ཙི་ནྟེ་སི, མཱ་ན་ཏྠ་དྡྷོ ཡ་སོ་དྷ་ནོ.
༤༤. ར་ཛྫ་ཏྠཾ མེ ས་ཧཱ ཡོ མཾ, སེ་ཝ་ནྟོ་ཡེ་ཝ ཨ་དྡྷ་གོ;
ཝུ་དྡྷོ ཧེ་སྶ་ཏི ཏཾ པ་སྶཾ, ཀ་ཐཾ ར་ཛྫཾ ཀ་རོ་མ་ཧཾ.
༤༥. ཨི་མ་སྨིཾ པ་ན ཝཱ་ར་སྨིཾ, པེ་ས་ཡི་ཏྭཱ བ་ལཾ མ་མ;
ར་ཛྫཾ ཏཾ ན ག་ཧེ་སྶཱ་མི, ཀོ ཨ་ཏྠོ ཛཱི་ཝི་ཏེ་ན མེ.
༤༦. ཨེ་ཝཾ ཙི་ནྟི་ཡ སོ སེ་ནཾ, ས་ནྣི་པཱ་ཏི་ཡ ཨ་ཏྟ་ནོ;
ས་ནྣཱ་ཧེ་ཏྭཱ ཡ་ཐཱ ཡོ་གཾ, དཱ་པེ་ཏྭཱ་ན ཡ་ཐཱ་རུ་ཙིཾ.
༤༧. ས་ཡ་མེ་ཝ ཏ་མཱ་དཱ་ཡ, ས་མུ་དྡ་ཏ་ཊ་མཱ་ག་ཏོ;
ནཱ་ཝཱ་ཡོ ཙི་ཏྟ་རཱུ་པཱ་ཡོ, ཀཱ་ར་ཡི་ཏྭཱ ཐི་རཱ བ་ཧཱུ.
༤༨. ཨ་མ་ཙྩེ ཨཱ་ཧ ‘‘ཨེ་ཏེ་ན, ས་དྡྷིཾ ག་ཙྪ་ཐ བྷོ’’ཨི་ཏི;
ནཱ་ཝཾ ཨཱ་རོ་ཧི་ཏུཾ ས་བྦེ, ན ཨི་ཙྪིཾ་སུ ཏ་དཱ ཛ་ནཱ.
༤༩. ཏ་དཱ སཱི་ཧོ ཝི་ཙི་ནྟེ་ཏྭཱ, ས་ཡཾ ཧུ་ཏྭཱ ཏི་རོ་ཧི་ཏོ;
ཨ་ཏྟ་ནོ པ་རི་ཧཱ་རཾ སོ, རཱ་ཛ་ལ་ཀྑ་ཎ་ས་མྨ་ཏཾ.
༥༠. ས་བྦཾ ཏ་སྶེ་ཝ ད་ཏྭཱ་ན, ཨ་ལ་ངྐཱ་ར་མྤི ཨ་ཏྟ་ནོ;
ཨཱ་རོ་པེ་ཏྭཱ་ན ཏཾ ནཱ་ཝཾ, ག་ཙྪ ཋ་ཏྭཱ་ན སཱ་ག་རེ.
༥༡. ཨི་མཾ བྷེ་རིཾ་ཙ ཝཱ་དེ་ཧི, ཀོ་ཊྛ་ནཱ་མ་ནྟི ཡོ་ཛ་ཡཱི;
སོ’པི ས་བྦཾ ཏ་ཐཱ་ཀཱ་སི, རཱ་ཛཱ་ནོ ཨ་ག་མཱ ཨི་ཏི.
༥༢. ཨཱ་རུ་ཧིཾ་སུ ཛ་ནཱ ནཱ་ཝཾ, ཨེ་ཀཾ ཀ་ཏྭཱ ན་རཱ་དྷི་པཾ;
སོ ཏཾ སེ་ན་ངྒ་མཱ་དཱ་ཡ, མཱ་ཎོ ག་ནྟུཾ ས་མཱ་ར་བྷི.
༥༣. ཀེ་ཝ་ལོ’པི ས་མུ་དྡོ སོ, ཨ་ཧོ་བྷི ན་ག་རཱུ་པ་མོ;
ཨ་ཐ སོ པ་ཊྚ་ནཾ པ་ཏྭཱ, ཨོ་ཏ་རི་ཏྭཱ ས་ཝཱ་ཧ་ནོ.
༥༤. ཝི་སྶཱ་མེ་ཏྭཱ བ་ལཾ ཏ་ཏྠ, ཝ་སཾ ཀ་ཏི་པ་ཡེ དི་ནེ;
ཨུ་ཏྟ་རཾ དེ་ས་མཱ་དཱ་ཡ, ཀ་ཏྭཱ ཧ་ཏྠ་ག་ཏཾ ཛ་ནཾ.
༥༥. ཨ་ཀྑོ་བྦྷི་ཡ མ་ཧཱ་སེ་ནོ, ན་ག་རཾ ག་ནྟུ་མཱ་ར་བྷི;
པོ་ཏྠ་ཀུ་ཊྛོ་པི ཏཾ སུ་ཏྭཱ, པ་ཙྩུ་གྒ་ཉྪི མ་ཧཱ་བ་ལོ.
༥༦. སཾ་ག་ཙྪིཾ་སུ ཨུ་བྷོ སེ་ནཱ, བྷི་ནྣ་ཝེ་ལཱ’ཝ སཱ་ག་རཱ;
མཱ་ཎ་ཝ་མྨོ ཏ་ཏོ ཧ་ཏྠི-མཱ་རུ་ཡ྄ཧ ག་ཧི་ཏཱ་ཡུ་དྷོ.
༥༧. པོ་ཏྠ་ཀུ་ཊྛ་ཉྩ རཱ་ཛཱ་ནཾ, དྭེ་དྷཱ ཀ་ཏྭཱ པ་ལཱ་པ་ཡི;
ཧ་ཏྠ་དཱ་ཋཾ པ་ལཱ་ཡ་ནྟཾ, དི་སྭཱ ཛ་ན་པ་དཱ ན་རཱ.
༥༨. སཱི་ས་མ་སྶ ག་ཧེ་ཏྭཱ་ན, མཱ་ཎ་ཝ་མྨ་སྶ ད་སྶ་ཡུཾ;
པོ་ཏྠ་ཀུ་ཊྛོ་པ་ལཱ་ཡི་ཏྭཱ, མེ་རུ་ཀ་ནྡ་ར་མཱ་ག་མི.
༥༩. ཏ་ཏོ ཏཾ སཱ་མི་ཀོ དི་སྭཱ, ས་ཧཱ་ཡོ མེ ཨ་ཡཾ་ཙི་རཾ;
ཏ་སྨཱ ན ས་ཀྐཱ ཙ་ཌྜེ་ཏུཾ, ཨཱ་པ་དེ ས་ར་ཎཱ་ག་ཏཾ.
༦༠. སཱ་མི་ནོ ཙ ས་ཧཱ་ཡ་སྶ, ནི་དྡོ་སོ་ཧཾ ཀ་ཐཾ བྷ་ཝེ;
ཨི་ཏི ཙི་ནྟི་ཡ པཱུ་ཝཾ སོ, ས་ཝི་སཾ ཁཱ་དི་ཡཱ’མ་རི.
༦༡. ཀུ་ཊྛ་ཀོ་པི ཙ ཏེ་ནེ་ཝ, ཁཱ་དི་ཏྭཱ པཱུ་ཝ་ཀཾ མ་ཏོ;
མཱ་ཎ་ཝ་མྨ་སྶ ཏ་སྶེ་ཝཾ, དཱི་པོ ཨཱ་སི ཨ་ཀ་ཎྚ་ཀོ.
༦༢. མཱ་ཎ་ཝ་མྨོ ཏ་ཏོ དཱི་པེ, ཚ་ཏྟཾ ཨུ་སྶཱ་པ་ཡི ཏ་དཱ;
ཝཱ་རེ་ནྟོ ཝི་ཡ ཏེ་ནེ་ཝ, དུ་ཀྑཾ དཱི་པེ ཛ་ན་སྶ སོ.
༦༣. པུ་ཉྙ་ཀ་མྨཱ་ནི སོ’ཀཱ་སི, ཨ་ན་གྒྷཱ་ནི བ་ཧཱུ་ནི ཙ;
ས་མ་ཏྠོ ཀོ་ཧི ཏཾ ས་བྦཾ, ཝ་ཏྟུཾ པ་ཊི་པ་དཾ ན་རོ.
༦༤. ཀ་པྤ་གཱ་མ་ཝ྄ཧ་ཡ་ཉྩེ་ཝ, ཏ་ཐཱ སེ་པ་ཎྞི་ནཱ་མ་ཀཾ;
པ་དྷཱ་ན་ར་ཀྑེ ཙ སི་རིཾ, སི་རཱི་ས་ངྒྷཱ་དི བོ་དྷི་ཀེ.
༦༥. པཱ་སཱ་དཾ སོ་ཝ ཀཱ་རེ་སི, པ་སཱ་དཱ་ཝ་ཧ་མུ་ཏྟ་མོ;
ཚཱ་དེ་སི ལོ་ཧ་པཱ་སཱ་དཾ, ཐཱུ་པཱ་རཱ་མ་གྷ་རཾ ཏ་ཐཱ.
༦༦. ཐཱུ་པཱ་རཱ་མེ ཙ པཱ་སཱ་དཾ ཀ་ཏྭཱ’དཱ པཾ་སུ་ཀཱུ་ལི་ནཾ;
ཛི་ཎྞ་ཀཾ པ་ཊི་ས་ངྑཱ་སི ཚ་ཏྟཾ ཙེ་ཏི་ཡ་མུ་དྡྷ་ནི;
བ་ཧ་ཝོ ཛི་ཎྞ་ཀཱ་ཝཱ་སེ ཏ་ཏྠེ་ཝ པ་ཊི་ས་ངྑ་རི.
[ཨེ་ཏྠ མཱ་ཎ་ཝ་མྨ་སྶ ར་ཛྫ་ཀ་ཐཱ་ཡ ཨཱུ་ན་ཏཱ དི་སྶ་ཏི. ཨི་ཏོ པ་ཊྛཱ་ཡ ཨ་གྒ་བོ་དྷི་སྶ ར་ཛྫ་པ་ཊི་བ་དྡྷཱ ཀ་ཐཱ ཝི་ར ཁཱ་ཡ་ཏི.]