ཙ་ཏུ་ཙ་ཏྟཱ་ལཱི་ས་ཏི་མ པ་རི་ཙྪེ་ད
ཏི་རཱ་ཛ་ཀོ
༡. ཨ་ཙྩ་ཡེ ཧ་ཏྠ་དཱ་ཋ་སྶ, ཨ་གྒ་བོ་དྷི་ཀུ་མཱ་ར་ཀོ;
ཀ་ཎི་ཊྛོ རཱ་ཛི་ནོ ཨཱ་སི, སི་རི་ས་ངྒྷཱ་དི བོ་དྷི་ཀོ.
༢. དྷ་མྨ་རཱ་ཛཱ ཨ་ཡཾ ཨཱ་སི, ས་མྨཱ ད་སྶ་ན་ས་ཉྙུ་ཏོ;
ཏ་སྨཱ སོ པུ་ཉྙ་ཀ་མྨཱ་ནི, ཨ་པྤ་མེ་ཡྻཱ་ནི ཝ་ཏྟ་ཡི.
༣. ནི་ཀཱ་ཡ་ཏྟ་ཡ་ཝཱ་སཱི་ནཾ, བྷ་ཏྟ་གྒ་མ་ཝ་ལོ་ཀ་ཡི;
མ་ཧཱ་པཱ་ལི༹་ཉྩ ཝ་ཌྜྷེ་སི, མཱ་གྷཱ་ཏ་ཉྩེ་ཝ ཀཱ་ར་ཡི.
༤. ཋཱ་ན་ནྟ་ར་ཉྩ དཱ་པེ་སི, ཡ་ཐཱ་ར་ཧ མ་ནཱ་ལ་ཡོ;
སི་པ་གོ་ཏྟཱ་དི་ཡོ་གྒེ་ཧི, སཾ་ག་ཏེ་ཧི ཙ སཾ་ག་ཧི.
༥. ཡ་ཏྠ ཀ་ཏྠ་ཙི དི་སྭཱ་པི, བྷི་ཀྑ་ཝོ སོ མ་ཧཱ་མ་ཏི;
ས་ཀྐ་ཏྭཱ སོ་བྷ་ཎཱ་པེ་སི, པ་རི་ཏྟཾ སཱ་ས་ནོ་ག་དྷཾ.
༦. ཐེ་རཾ སོ ཨུ་པ་ས་ངྐ་མྨ, ནཱ་ག་སཱ་ལ་ནི་ཝཱ་སི་ནཾ;
དཱ་ཋཱ་སི་ཝཾ མ་ཧཱ་པ་ཉྙཾ, སཱི་ལ་ཝ་ནྟཾ བ་ཧུ་སྶུ་ཏཾ.
༧. ས་ཀྐ་ཙྩ ནཾ ཏ་ཏོ སུ་ཏྭཱ, ས་མྨཱ་ས་མྦུ་དྡྷ་སཱ་ས་ནཾ;
དྷ་མྨེ’ཏཱི་ཝ་པ་སཱི་དི་ཏྭཱ, ས་བྦ་ས་ནྟི་ཀ་རོ ཨི་ཏི.
༨. སུ་ཏྭཱ ཐེ་རི་ཡ་ཝཱ་དཱ་ནཾ, པུ་བྦ་ཉཱ་ཏཱི་ན་མ་ཏྟ་ནོ;
པཱ་པཱ་ནཾ དུ་ཊྛ་ཙི་ཏྟཱ་ནཾ, ཨ་པ་ཀཱ་རེ ཀ་ཏེ བ་ཧཱུ.
༩. ཝི་ཧཱ་རེ པ་རི་ཝེ་ཎེ ཙ, ཛི་ཎྞེ་པཱ་ཀ་ཏི་ཀེ ཨ་ཀཱ;
བྷོ་ག་གཱ་མེ ཙ དཱ་པེ་སི, ཏ་ཏྠ ཏ་ཏྠ བ་ཧཱུ་ད་ཡེ.
༡༠. ཝི་ཙྪི་ནྣ་པ་ཙྩ་ཡེ ཙཱ་ཀཱ, ཏ་དཱ་ཏྱཾ ཀུ་རི་ཏེ ཝི་ཡ;
དཱ་ས་ཀེ་པི ཙ ས་ངྒྷ་སྶ, ཡ་ཐཱ་ཋཱ་ནེ ཋ་པཱ་པ་ཡི.
༡༡. པ་དྷཱ་ན་གྷ་ར མེ་ཏ་སྶ, ཐེ་ར་སྶ’ཀཱ་ས་ནཱ་མ་ཀཾ;
པ་ཊི་གྒ་ཧེ་ཏྭཱ ཏཾ སོ’པི, ས་ངྒྷ་སྶཱ’དཱ མ་ཧཱ་མ་ཏཱི.
༡༢. བྷོ་ག་གཱ་མེ ཙ ཏ་སྶཱ’དཱ, བྷ་ར་ཏྟཱ་ལཾ ཀི་ཧི་མྦི་ལཾ;
ཀ་ཏ་ཀ་ཉྩ ཏུ་ལཱ་དྷཱ་རཾ, ཨ་ནྡྷ་ཀཱ་ར་ཀ་མེ་ཝ ཙ.
༡༣. ཨ་ནྡྷ་ཀཱ་རཾ ཨ་ནྟུ་རེ་ལི༹ཾ, བཱ་ལ་ཝཾ དྭཱ་ར་ནཱ་ཡ་ཀཾ;
མ་ཧཱ་ནི་ཀ་ཌྜྷི་ཀ་ཉྩེ་ཝ, པེ་ལ༹་ཧཱ་ལ༹ཾ ཏ་ཐཱ་པ་རཾ.
༡༤. ཨེ་ཏེ ཨ་ཉྙེ ཙ སོ ད་ཏྭཱ, བྷོ་ག་གཱ་མེ ན་རི་སྶ་རོ;
དཱ་སི ཨཱ་རཱ་མི་ཀེ ཙེ་ཝ, ཨ་ཏྟ་ནོ ཀི་ར ཉཱ་ཏ་ཀེ.
༡༥. ཏ་ཐཱ དྭི་ནྣཾ ནི་ཀཱ་ཡཱ་ནཾ, ཝི་ཧཱ་རེ མ་ནྡ་པ་ཙྩ་ཡེ;
དི་སྭཱ་པི ཙ སུ་ཏྭཱ ཝཱ, བྷོ་ག་གཱ་མེ བ་ཧཱུ ཨ་དཱ.
༡༦. བ་ཧུ་ནཱ ཀི་ནྟུ་ཝུ་ཏྟེ་ན, ནི་ཀཱ་ཡེ་སུ’པི ཏཱི་སུ’པི;
ཨ་དཱ གཱ་མ་ས་ཧ་སྶཾ སོ, བ་ཧུ་པྤཱ་དཾ ནི་རཱ་ཀུ་ལཾ.
༡༧. ཨ་ནུ་སྶ་ར་ནྟོ སོ ཏི་ཎྞཾ, ར་ཏ་ནཱ་ནཾ གུ་ཎེ ཝ་རེ;
ཨེ་ཀཱ་ཝ་ལིཾ ག་ཧེ་ཏྭཱ་ན, ཨ་ཀྑ་མཱ་ལ མ་ཀཱ ཀི་ར.
༡༨. ཨེ་ཝཾ ས་བྦ་པྤ་ཡོ་གེ་ཧི, སོ’ཧུ དྷ་མྨ་པ་རཱ་ཡ་ནོ;
ས་བྦེ ཏ་མ་ནུ་སི་ཀྑ་ནྟཱ, ཧེ་སུ དྷ་མྨ་ཀ་རཱ ན་རཱ.
༡༩. ད་མི་ལོ༹ པོ་ཏྠ་ཀུ་ཊྛ་ཝོ, ཏ་སྶ ཀ་མྨ་ཀ་རོ ཏ་དཱ;
མཱ་ཊ་མྦི་ཡ་ཝ྄ཧཾ ཀཱ་རེ་སི, པ་དྷཱ་ན་གྷ་ར་མ་བྦྷུ་ཏཾ.
༢༠. བཱུ་ཀ་ཀ་ལླེ ཨ་མྦ་ཝཱ་པིཾ, ཏ་ནྟ་ཝཱ་ཡི་ཀ་ཙཱ་ཊི་ཀཾ;
གཱ་མཾ ནི་ཊྛི་ལ་ཝེ་ཊྛི་ཉྩ, ཏ་སྶཱ’དཱ སོ ས་དཱ ས་ཀཾ.
༢༡. ཀ་པྤཱུ་ར་པ་རི་ཝེ་ཎེ ཙ, ཀུ་རུ་ནྡ་པི་ལླ་ཀེ ཏ་ཐཱ;
མ་ཧཱ་རཱ་ཛ་གྷ་རེ ཙེ་ཝ, པཱ་སཱ་དེ སོ’ཝ ཀཱ་ར་ཡི.
༢༢. ཨ་ཉྙ་ཏྠཱ’དཱ ཏ་ཡོ གཱ་མེ, ཝི་ཧཱ་རེ་སུ མ་ཧཱ་དྷ་ནོ;
པོ་ཏྠ་སཱ་ཏ་ཝ྄ཧ་ཡོ པ་ཉྙོ, ཝི་ཧཱ་རེ ཛེ་ཏ་ནཱ་མ་ཀེ.
༢༣. སེ་ནཱ་པ་ཏི་རཱ་ཛ་ནཱ་མཾ, པ་རི་ཝེ་ཎཾ ས་མཱ་པ་ཡི;
མ་ཧཱ་ཀ་ནྡོ ཙ ད་མི་ལོ༹, པ་རི་ཝེ་ཎཾ ས་ནཱ་མ་ཀཾ.
༢༤. ཙུ་ལླ་པ་ནྠཾ ཏ་ཐཱ ཨེ་ཀོ, སེ་ཧཱ་ལ་ཨུ་པ་རཱ་ཛ་ཀཾ;
ཨུ་པ་རཱ་ཛཱ ས་ཀཱ་རེ་སི, ས་ངྒྷ་ཏི་སྶོ’པི རཱ་ཛི་ནོ.
༢༥. ཨ་ཉྙེ་སུ བ་ཧ་ཝོ ཨཱ་སུཾ, ཝི་ཧཱ་རེ ཨེ་ཝ་མཱ་དི་ཀེ;
བྷ་སྶ ར་ཉྙོ’ ནུ་ཝ་ཏྟ་ནྟཱ, ཨེ་ཝཾ དྷ་མྨཱི་ཧི པཱ་ཎི་ནོ.
༢༦. པཱ་པཾ ཝཱ་པི ཧི པུ་ཉྙཾ ཝཱ,
པ་དྷཱ་ནོ་ཡཾ ཀ་རོ་ཏི ཡོ;
ལོ ཀོ ཏཾ ཏཾ ཀ་རོ་ཏེ་ཝ,
ཏཾ ཝི་ཛ་ནེ་ཡྻ པ་ཎྜི་ཏོ.
༢༧. ཛེ་ཊྛ་ནཱ་མཱ མ་ཧཱ་པུ་ཉྙཱ, མ་ཧེ་སཱི ཏ་སྶ རཱ་ཛི་ནོ;
ཛེ་ཊྛཱ་རཱ་མ་ཉྩ ཀཱ་རེ་སི, བྷི་ཀྑཱུ་ནཱི་ན་མུ་པ་སྶ་ཡཾ.
༢༨. ཏ་སྶཱ’དཱ་སི ཙ དྭེ གཱ་མེ, པ་ཀྐ་པཱ་སཱ་ཎ་བྷཱུ་མི་ཡཾ;
ཏ་མྦུ་དྡྷཾ བྷེ་ལ་གཱ་མ་ཉྩ, ཨཱ་རཱ་མི་ཀ་ས་ཏཾ ཏ་ཐཱ.
༢༩. ཨ་ཀཱ མ་ལ་ཡ་རཱ་ཛཱ་པི, དྷཱ་ཏུ་གེ་ཧཾ མ་ཧཱ་ར་ཧཾ;
མ་ཎྜ་ལ་གི་རི་ཝི་ཧཱ་ར་མྷི, ཙེ་ཏི་ཡ་སྶ མ་ཧཱ་དྷ་ནོ.
༣༠. ལོ་ཧ་པཱ་སཱ་ད་ཀེ སོ’ཝ, ཚཱ་དེ་སི མ་ཛ྄ཛྷ་ཀཱུ་ཊ་ཀཾ;
བོ་དྷི་ཏི་སྶ་ཝི་ཧཱ་ར་ཉྩ, བོ་དྷི་ཏ་སྶོ མ་ཧཱ་ཡ་སོ.
༣༡. དཱི་པེ མ་ཎྜ་ལི་ཀཱ ས་བྦེ, ཏ་ཏྠ ཏ་ཏྠ ཡ་ཐཱ་བ་ལཾ;
ཝི་ཧཱ་རེ པ་རི་ཝེ་ཎེ ཙ, ཀཱ་ར་ཡིཾ་སུ ཨ་ན་པྤ་ཀེ.
༣༢. ཏ་སྶ ཀཱ་ལོ ན་རི་ནྡ་སྶ, པུ་ཉྙ་ཀ་མྨ་མ་ཡོ ཨི་དྷ;
ཨ་ཏི་ཝི་ཏྠཱ་ར་བྷཱི་ཏེ་ན, ས་བྦ་སོ ན ཝི་ཙཱ་རི་ཏཾ.
༣༣. པུ་བྦ་ཀོ་པི ཀ་ཐཱ་མ་གྒོ, ཨཱ་ཀུ་ལོ ཝི་ཡ བྷཱ་ཏི་མེ;
ཡ་ཐཱ་པ་དྷཱ་ནཾ ཀ་ཐི་ཏཾ, ཧེ་ཏཱུ་ནཾ ཨུ་པ་ལ་ཀྑ་ཎཾ.
༣༤. ཨ་ཐཱ་པ་རེ་ན ཀཱ་ལེ་ན, པུ་ལ་ཏྠི་ན་ག་རཾ ག་ཏོ;
ཝཱ་སཾ ཏ་ཏྠེ་ཝ ཀ་པྤེ་སི, ཀ་རོ་ནྟོ པུ་ཉྙ་ས་ཉྩ་ཡཾ.
༣༥. ཨ་ཏེ་ཀི་ཙྪི་ཡ་རོ་གེ་ན, ས་མྥུ་ཊྛོ ཀཱ་ལ་མ་ཏྟ་ནོ;
མ་ར་ཎ་སྶ ཝི་དི་ཏྭཱ་ན, ཏ་མཱ་ཧུ་ཡ་མ་ཧཱ་ཛ་ནཾ.
༣༦. ཨོ་ཝ་དི་ཏྭཱ་ན དྷ་མྨེ་ན, མ་ར་ཎཾ སོ ཨུ་པཱ་ག་མི;
མ་ཧཱ་ཛ་ནོ མ་ཏེ ཏ་སྨིཾ, བཱ་ལ༹ྷ་སོ་ཀོ པ་རོ་དི་ཡ.
༣༧. ཀ་ཏྭཱ ཨཱ་ལ༹་ཧ་ཎེ ཏ་སྶ, ཀི་ཙྩཾ ས་བྦ་མ་སེ་ས་ཏོ;
ཏ་སྶཱ་ལཱ༹་ཧ་ཎ་བྷ་སྨ་མྤི, ཀ་ཏྭཱ བྷེ་ས་ཛྫ་མ་ཏྟ་ནོ.
༣༨. རཱ་ཛཱ བྷ་ཎྜ་ཉྩ ཏཾ ས་བྦཾ, ས་བྦ་ཉྩ བ་ལ་ཝཱ་ཧ་ནཾ;
ས་མྨཱ ཨཱ་དཱ་ཡ གོ་པེ་ཏྭཱ, ན་ག་རཾ ས་མུ་པཱ་ག་མི.
༣༩. ཨེ་ཝཾ སོ་ལ༹་ས་མེ ཝ་སྶེ, རཱ་ཛཱ ཨཱ་སི དི་ཝ་ངྒ་ཏོ;
པོ་ཏྠ་ཀུ་ཊྛོ་པི ད་མི་ལོ༹, ར་ཛྫཾ ཏ་སྶ ཝི་ཙཱ་ར་ཡི.
༤༠. ཨུ་པ་རཱ་ཛཾ ག་ཧེ་ཏྭཱ་ན, དཱ་ཋཱ་སི་ཝཾ ཁི་པཱ་པ་ཡི;
ཙཱ་ར་ཀོ ཝི་ཧི་ཏུཾ ས་མྨཱ, ར་ཀྑཱ་ཝ་ར་ཎ མཱ་དི་སི.
༤༡. ཝི་ནཱ ར་ཉྙཱ ན ས་ཀྐཱ་ཏི, མེ་དི་ནིཾ པ་རི་བྷུ་ཉྫི་ཏུཾ;
ཨཱ་ནེ་ཏྭཱ ད་ཏྟ་ནཱ་མ་ཀཾ, དྷ་ན་པི་ཊྛ་པྤ་དྷཱ་ན་ཀཾ.
༤༢. ཨུ་པྤ་ནྣཾ རཱ་ཛ་ཝཾ་ས་མྷི, ར་ཛྫེ ཏཾ ཨ་བྷི་སི་ཉྩི་ཡ;
ཏ་སྶ ནཱ་མཾ ཋ་པེ་ཏྭཱ་ན, ས་ཡཾ ས་བྦཾ ཝི་ཙཱ་ར་ཡི.
༤༣. ད་ནྟོ སོ དྷ་ན་པི་ཊྛི་མྷི, ཝི་ཧཱ་རཾ ས་ཀ་ནཱ་མ་ཀཾ;
ཀཱ་ར་ཡི་ཏྭཱ་ན པུ་ཉྙཱ་ནི, ཨ་ཉྙཱ་ནི་པི ས་མཱ་ཙི་ནི.
༤༤. ས་མ་ཀ་ནྟུ སོ ཋ་ཏྭཱ’ཝ, ཝ་སྶ་དྭ་ཡ མ་ཧུ་མ་ཏོ;
པོ་ཏྠ་ཀུ་ཊྛོ མ་ཏེ་ཏ་སྨིཾ, པུ་ན ཨ་ཉྙ་མྤི མཱ་ཎ་ཝཾ.
༤༥. ཧ་ཏྠ་དཱ་ཋཾ ས་མཱ་ཧཱུ་ཡ, ཨུ་ཎྷཱ ན་ག་ར་ས་མྦྷ་ཝཾ;
ཏ་མྤི ར་ཛྫེ བྷི་སི་ཉྩི་ཏྭཱ, ཡ་ཐཱ པུ་བྦཾ ས་ཡཾ་ཝ་སཱི.
༤༦. ཀཱ་ལ༹་དཱི་གྷཱ་ཝི་ཀཾ ཀ་ཏྭཱ, པ་དྷཱ་ན་གྷ་ར་ཀཾ ཏ་ཐཱ;
པུ་ཉྙ་མ་ཉྙཾ ཚ་མཱ་སེ་ཧི, སོ’པི མ་ཙྩུ་ཝ་སཾ ག་ཏོ.
༤༧. ཨེ་ཝཾ ཝི་དི་ཏྭཱ བ་ཧུ་པ་དྡ་ཝཱ་ནི;
དྷ་ནཱ་ནི དྷ་ཉྙཱ་ནི ཙ ཝཱ་ཧ་ནཱ་ནི;
ཝི་ཧཱ་ཡ ར་ཛྫེ་སུ ར་ཏིཾ་ས་པྤ་ཉྙཱ;
མ་ནུ་ཉྙ་པུ་ཉྙཱ་བྷི་ར་ཏཱ བྷ་ཝེ་ཡྻུཾ.
སུ་ཛ་ན་པྤ་སཱ་ད་སཾ་ཝེ་ག་ཏྠཱ་ཡ ཀ་ཏེ མ་ཧཱ་ཝཾ་སེ
ཏི་རཱ་ཛ་ཀོ ནཱ་མ
ཙ་ཏུ་ཙ་ཏྟཱ་ལཱི་ས་ཏི་མོ པ་རི་ཙྪེ་དོ.