ཨེ་ཀ་ཙ་ཏྟཱ་ལཱི་ས་ཏི་མ པ་རི་ཙྪེ་ད
དྭི་རཱ་ཛ་ཀོ
༡. མ་ཧཱ་ནཱ་ག་ན་རི་ནྡ་སྶ, བྷཱ་གི་ནེ་ཡྻོ སུ་བྷཱ་གི་ཡོ;
སོ ཨ་གྒ་བོ་དྷི་རཱ་ཛཱ་སི, ཨ་གྒ་བོ་དྷི་ག་ཏཱ་ས་ཡོ.
༢. ཏེ་ཛེ་ན བཱ་ཧུཾ སོ་མྨེ་ན, ཙ་ནྡཾ ས་མྤུ་ཎྞ་མ་ཎྜ་ལཾ;
སུ་མེ་རུ་མ་ཙ་ལ་ནྟེ་ན, ག་མྦྷི་རེ་ན མ་ཧོ་ད་དྷིཾ.
༣. ཝ་སུ་ནྡྷ་རཱ པ་ཀ་མྤེ་ན, མཱ་རུ་ཏཾ ས་མྤ་ཝུ་ཏྟི་ཡཱ;
བུ་དྡྷི་ཡཱ་མ་ར་མ་ནྟཱ་རཾ, སུ་དྡྷི་ཡཱ ས་ར་ད་མྦ་རཾ.
༤. ཀཱ་མ་བྷོ་གེ་ན དེ་ཝི་ནྡ, མ་ཏྠེ་ན ཙ ན་རི་སྶ་རཾ;
དྷ་མྨེ་ན སུ་དྡྷ་ཝཱ་སེ་ཊྛཾ, ཝི་ཀྐ་མེ་ན མི་གཱ་དྷི་པཾ.
༥. རཱ་ཛ་དྷ་མྨེ་ཧི ར་ཛྫེ་ཧི, ཙ་ཀྐ་ཝ་ཏྟི་ན་རི་སྶ་རཾ;
ཝེ་སྶ་ནྟ་ར་ཉྩ དཱ་ནེ་ན, ཨ་ནུ་ག་ནྟྭཱ ཛ་ནེ སུ་ཏོ.
༦. མཱ་ཏུ་ལཾ ཨུ་པ་རཱ་ཛ་ཝ྄ཧེ, བྷཱ་ཏ་རཾ ཡུ་ཝ་རཱ་ཛ་ཀེ;
བྷཱ་གི་ནེ་ཡྻ་ཉྩ མ་ལ་ཡ-རཱ་ཛ་ཋཱ་ནེ ཋ་པེ་སི སོ.
༧. ཋཱ་ན་ནྟ་རེ ཡ་ཐཱ་ཡོ་གཾ-སེ་ཊྛཱ་མ་ཙྩེ ཋ་པེ་སི ཙ;
ཛ་ནཾ ས་ངྒ་ཧ་ཝ་ཏྠཱུ་ཧཱི, རཱ་ཛ་དྷ་མྨེ་ཧི ཙ་གྒ་ཧི.
༨. དེ་སཾ ས་ཡོ་གྒཾ པཱ་དཱ་སི, ཡུ་ཝ་རཱ་ཛ་སྶ ད་ཀྑི་ཎཾ;
ཝ་སཾ ཏ་ཏྠ སི་རཱི་ཝ་ཌྜྷ-མཱ་ན་ཝཱ་པིཾ ས་གཱ་ཧ་ཡི.
༩. ཀ་ཏྭཱ གི་རི་ཝི་ཧཱ་ར་ཉྩ, ས་ངྒྷི་ཀཾ ཏ་སྶ དཱ་པ་ཡི;
ཁེ་ཏྟཱ་ནཾ དྭི་ས་ཏཾ ས་ངྒྷ-བྷོ་ག་ཏྠཱ་ཡ མ་ཧཱ་མ་ཏི.
༡༠. ཨ་དཱ མ་ལ་ཡ་རཱ་ཛ་སྶ, དཱ་ཋཱ་ནཱ་མཾ ས་དྷཱི་ཏ་རཾ;
པ་རི་ཝེ་ཎཾ སཱི་རི་ས་ངྒྷ-བོ་དྷི་ནཱ་མ་ཉྩ ཀཱ་ར་ཡི.
༡༡. མ་ཧཱ་སི་ཝ་སྶ ཀཱ་རེ་སི, པ་རི་ཝེ་ཎཾ ས་ནཱ་མ་ཀཾ;
པ་རི་ཝཱ་རོ’པི ཏ་སྶཱ་སི, ཨེ་ཝཾ པུ་ཉྙ་པ་རཱ་ཡ་ནོ.
༡༢. ཀ་ཏྭཱ སཱ་དྷུ་པ་ཙཱ་རེ་ན, པོ་རཱ་ཎཾ ས་ངྒ་ཧཾ ཝི་དྷིཾ;
ཨ་ནྟ་རཱ་ཡཾ ཝི་སོ་དྷེ་ཏུཾ, ཛི་ཎྞ་ཉྩ པ་ཊི་ས་ངྑ་རི.
༡༣. ཀ་ཝ་ཡོ ཏ་སྶ ར་ཛྫ་མྷི, སཱི་ཧ་ལཱ༹་ཡ ནི་རུ་ཏྟི་ཡཱ;
ཀཱ་ཝེ་ཡྻེ བ་ཧུ་ཀེ’ཀཱ་སུཾ, ཝི་ཙི་ཏྲ་ན་ཡཱ་སཱ་ལི་ནོ.
༡༤. ཝི་ཧཱ་རེ ད་ཀྑི་ཎེ ཀཱ་སི, པཱ་སཱ་དཾ སུ་མ་ནོ་ཧ་རཾ;
ཨ་ཀཱ ན་ཝ་ཧི ཝ་སྶེ་ཧི, དི་པེ ཀ་ཎྚ་ཀ་སོ་དྷ་ནཾ.
༡༥. ཀུ་རུ་ནྡ་ནཱ་མཾ ཀཱ་རེ་ཏྭཱ, ཝི་ཧཱ་རཾ ས་བྦ་ས་ངྒྷི་ཀཾ;
ཝཱ་པིཾ ཏ་ནྣཱ་མ་ཀཾ ནཱ་ལི༹-ཀེ་རཱ་རཱ་མཾ ཏི་ཡོ་ཛ་ནཾ.
༡༦. མ་ཧཱ་སི་ཝ་ཝ྄ཧ་ཡེ ཙེ་ཝ, ས་སྶཾ ཀཱ་ར་ཡི་ཏུཾ ཨ་དཱ;
ལཱ་བྷ་ས་ཀྐཱ་ར་ས་མྨཱ་ན-མཱ་རཱ་མི་ཀ་ས་ཏཾ ཏ་དཱ.
༡༧. ཝི་ཧཱ་རཾ ཏཾ ས་མཱི་པ་མྷི, ཀ་ཏྭཱ ཨ་མྦི་ལ་པ་སྶ་ཝཾ;
གཱ་མཾ ཏ་ནྣཱ་མ་ཀཾ ཙཱ་དཱ, ཐེ་རི་ཡཱ་ནཾ ཏ་པ་སྶཱི་ནཾ.
༡༨. ཨུ་ཏྟ་ར་ཝ་ལླི་ཝི་ཧཱ་ར་སྶ, ར་ཏ་ནཾ དཱི་གྷ་ཝ་ཎྞི་ཏཾ;
ད་ཏྭཱ གཱ་མཾ པ་ཏི་ཊྛེ་སི, ས་ཏྠུ་བི་མྦཾ སི་ལཱ་མ་ཡཾ.
༡༩. ཀེ་ལི༹་ཝཱ་ཏེ ཙ ཀཱ་རེ་སི, སུ་མ་ནཾ ནཱ་མ པ་བྦ་ཏཾ;
མ་ཧཱ་ཏེ་ལ་ཝ་ཊཾ་བོ་དྷི-གྷ་རེ པཱ་སཱ་ཎ་ཝེ་དི་ཀཾ.
༢༠. ཀཱ་རེ་ཏྭཱ ལོ་ཧ་པཱ་སཱ་དཾ, པཱ་སཱ་ད་མ་ཧ་ནེ ཨ་དཱ;
ཚ་ཏྟིཾ་སཱ་ནཾ ས་ཧ་སྶཱ་ནཾ, བྷི་ཀྑཱུ་ནཾ སོ ཏི་ཙཱི་ཝ་རཾ.
༢༡. གཱ་མཾ ད་ཏྭཱ ནི་ཡོ་ཛེ་སི, ཨཱ་ར་ཀྑཾ དྷཱི་ཏུ ནཱ་མ་ཀཾ;
ཧ་ཏྠི་ཀུ་ཙྪི་ཝི་ཧཱ་རེ་པི, པཱ་སཱ་དཾ ཀཱ་སི བུ་དྡྷི་མཱ.
༢༢. དཱ་ཋཱ སི་ཝ་སྶ ཋ་ཏྭཱ་ན, ཨོ་ཝཱ་དེ སཱ་དྷུ བྷི་ཀྑུ་ནོ;
ས་མཱ་ཙ་ར་ནྟོ དྷ་མྨེ་ན, ས་ཀྐ་ཙྩཾ ཏ་མུ་པ་ཊྛ་ཧི.
༢༣. མཱུ་ག་སེ་ནཱ་པ་ཏིཾ ཙཱ་ཀཱ, ཝི་ཧཱ་རཾ སོ ཝི་སཱ་ལ་ཀཾ;
གཱ་མཾ ལ་ཛྫི་ཀ་མེ་ཏ་སྶ, དཱ་ས བྷོ་གཱ་ཡ’དཱ་སི ཙ.
༢༤. མ་ཧཱ་ནཱ་ག་སྶ པུ་ཉྙ་ཏྠཾ, ར་ཉྙོ ཏཾ་ནཱ་མ་ཀཾ ཨ་ཀཱ;
མ་ཧཱ་ཐེ་ར་སྶ ཏ་ཉྩཱ’དཱ, རཱ་ཛཱ ཏེ་པི་ཊ་ཀ་སྶ སོ.
༢༥. ཨ་ཏྟ་ནོ ས་དི་སཱ་ན་ཉྩ, ཡོ་གཱི་ནཾ ཝི་ག་ཏཱ་ལ་ཡོ;
བྷི་ཀྑཱུ་ནཾ ཙ་ཏུ་ས་ཊྛཱི་ནཾ, ཝི་ཧཱ་རཾ ཏཾ ཏ་དཱ ཨ་དཱ.
༢༦. ཀ་ཏྭཱ ཏ་སྶེ་ཝ མ་ཧཱ-པ་རི་ཝེ་ཎ་ནི་ཝཱ་སི་ནོ;
བྷི་ནྣོ་རུ་དཱི་པཾ ད་ཏྭཱ་ན, ཝ་ཊྚ་ཀཱ་ཀཱ་ར་པི་ཊྛི་ཏོ.
༢༧. ད་ཀྑི་ཎ་གཱི་རི་ད་ལ༹ྷ་ཝ྄ཧེ, མ་ཧཱ་ནཱ་གེ ཙ པ་བྦ་ཏེ;
ཀཱ་ལ༹་ཝཱ་པཱ་དི་ཀེ ཙཱ’ཀཱ, ཝི་ཧཱ་རེ པོ་ས་ཐཱ་ལ་ཡེ.
༢༨. ཝི་ཧཱ་རེ ཨ་བྷ་ཡེ’ཀཱ་སི, མ་ཧཱ་པོ་ཀྑ་ར་ཎིཾ ཏ་ཐཱ;
ཙེ་ཏི་ཡ་པ་བྦ་ཏེ ཙཱ་ཀཱ, ནཱ་ག་སོ་ཎྜིཾ ཐི་རོ་དི་ཀཾ.
༢༩. མ་ཧི་ནྡ་ཏ་ཊ་ཝཱ་ཝི་ཉྩ, ཀཱ་རཱ་པེ་ཏྭཱ་ན སཱ་དྷུ་ཀཾ;
ཨེ་ཏི་སྶཱ མ་རི་ཡཱ་དཱ་ཡ, ཐེ་རཾ ནེ་ཏུཾ ནི་ཡོ་ཛ་ཡི.
༣༠. མ་ཧཱ་མ་ཧི་ནྡ ཐེ་ར་མྷི, ཏཾ་ཋཱ་ན་ས་མུ་པཱ་ག་ཏོ;
ཏ་ར་ཙྪཱ ཨེ་ཝ ནེ་ཏུ་ནྟི, ཀ་ཏི་ཀ་ཉྩེ་ཝ ཀཱ་ར་ཡི.
༣༡. ཚ་ཏྟཾ སོ་ཎྞ་ཉྩ ཀཱ་རེ་སི, ནི་ཀཱ་ཡེ་སུ་པི ཏཱི་སུ སོ;
ས་ཏྟཱ་ཊྛ་ན་ཝ ཝཱ་རེ་སུ, མ་ཧ་གྒྷ་ར་ཏ་ནེ་ཧི ཙ.
༣༢. མ་ཧཱ་ཏཱུ་པེ ཙ་ཏུ་བྦཱི་ས-བྷཱ་རཾ ཚ་ཏྟཾ སུ་ཝ་ཎྞ་ཡཾ;
ཏ་ཏྠ ཏ་ཏྠ ཙ པཱུ་ཛེ་སི, མ་ཧ་གྒྷཾ ར་ཏ་ནུ་ཏྟ་མཾ.
༣༣. དཱ་ཋཱ་དྷཱ་ཏུ་གྷ་རཾ ཀ་ཏྭཱ, ཝི་ཙི་ཏྲ་ར་ཏ་ནུ་ཛྫ་ལཾ;
ཀཱ་སི ཧེ་མ་ཀ་ར་ཎྜ་ཉྩ, ལོ་ཧ་ནཱ་ཝ་ཉྩ པཱ་ལི༹་ཡཾ.
༣༤. མ་ཎི་མེ་ཁ་ལ་ནཱ་མ་ཉྩ, བ་ནྡྷཱ་པེ་སི ས་བ་ནྡྷ་ནཾ;
མ་ཧཱ་མཱ་ཏི་ཉྩ ག་ཎྷེ་སི, མ་ཎི་ཧཱི་ར་ཀ་ཝཱ་པི་ཡཾ.
༣༥. ཏ་དཱ ཨེ་ཀོ མ་ཧཱ་ཐེ་རོ, ཛོ་ཏི་པཱ་ལ་ཀ་ནཱ་མ་ཀོ;
པ་རཱ་ཛེ་སི ཝི་ཝཱ་དེ་ན, དཱི་པེ ཝེ་ཏུ་ལླ་ཝཱ་དི་ནོ.
༣༦. དཱ་ཋཱ་པ་བྷུ་ཏི་ནཱ་མོ’ཐ, ཨཱ་དི་པཱ་དོ’ཏི་ལ་ཛྫི་ཏོ;
ཧ་ཏྠ་མུ་ཀྑི་པྤི ཏཾ ཧ་ནྟུཾ, ག་ཎྜོ ས་ཉྫཱ་ཡི ཏཾ་ཁ་ཎེ.
༣༧. རཱ་ཛཱ ཏ་སྨིཾ པ་སཱི་དི་ཏྭཱ, ཝི་ཧཱ་རེ་ཡེ་ཝ ཝཱ་ས་ཡི;
མཱ་ནེ་ན ཏཾ ཨ་ནཱ་ག་མྨ, དཱ་ཋཱ་པ་བྷཱུ་མ་ཏོ ཀི་ར.
༣༨. ད་ཏྭཱ མ་ཧཱ་དི་པཱ་ད་ཏྟཾ, བྷཱ་གི་ནེ་ཡྻ་གྒ་བོ་དྷི་ནོ;
ར་ཀྑི་ཏུཾ ཏཾ ནི་ཡོ་ཛེ་སི, ཐེ་རཾ སོ་པི ཏ་མཱ་ཙ་རི.
༣༩. ནཱི་ལ་གེ་ཧ་པ་རི་ཙྪེ་དཾ, ཀ་ཏྭཱ ཏ་སྶེ་ཝ སོ ཨ་དཱ;
ཀ་ཏྭེ་ཝཾ བ་ཧུ་དྷཱ པུ་ཉྙཾ, ཙ་ཏུ་ཏྟིཾ་སེ ས་མེ མ་ཏོ.
༤༠. ཨ་གྒ་བོ་དྷི ཏ་ཏོ ཨཱ་སི, རཱ་ཛཱ པུ་བྦ་སྶ རཱ་ཛི་ནོ;
མ་ཧ་ལླ་ཀ་ཏྟཱ་ནཾ ཁུ་དྡ-ནཱ་མེ་ན པ་རི་དཱི་པ་ཡུཾ.
༤༡. སོ དཱི་པཾ པ་རི་པཱ་ལེ་སི, པུ་བྦ་ཙཱ་རི་ཏྟ་ཀོ་ཝི་དོ;
ཨ་ཀཱ་སི ཙ མ་ཧེ་སིཾ སོ, མཱ་ཏུ་ལ་དྷཱི་ཏུ་མ་ཏྟ་ནོ.
༤༢. ས་ངྒྷ་བྷ་དྡཾ ཨ་སི་གྒཱ་ཧཾ, ཀཱ་སི བ་ནྡྷུཾ མ་ཧེ་སི་ཡཱ;
ཡ་ཐཱ་ར་ཧ་མ་དཱ ཙེ་ཝ, ཋཱ་ན་ནྟ་ར་མ་ནཱ་ལ་ཡོ.
༤༣. ཀ་ཏྭཱ ཝེ་ལུ༹་ཝ་ནཾ རཱ་ཛཱ, སཱ་ག་ལཱི་ནཾ ནི་ཡོ་ཛ་ཡཱི;
ཛ་མྦུ་ར་ནྟ་ར་ག་ལླ་ཉྩ, ཀཱ་སི མཱ་ཏི་ཀ་པི་ཊྛི་ཀཾ.
༤༤. ར་ཉྙོ ཏ་སྶེ’ཝ ར་ཛྫ་མྷི, ཀཱ་ལི་ངྒེ་སུ མ་ཧཱི་པ་ཏི;
ས་ཏྟཱ་ནཾ མ་ར་ཎཾ ཡུ་དྡྷེ, དི་སྭཱ སཾ་ཝི་གྒ་མཱ་ན་སོ.
༤༥. ཨི་མཾ དཱི་པ་མུ་པཱ་ག་མྨ, པ་བྦ་ཛྫཱ ཀ་ཏ་ནི་ཙྪ་ཡོ;
ཛོ་ཏི་པཱ་ལ་མྷི པ་བྦ་ཛི, རཱ་ཛཱ ས་ཀྐཱ་སི ཏཾ ཙི་རཾ.
༤༦. པ་དྷཱ་ན་ཋཱ་ནཾ ཏ་སྶ’ཀཱ, ཝི་ཧཱ་རེ མ་ཏྟ་པ་བྦ་ཏེ;
ཏ་སྶཱ་མ་ཙྩོ མ་ཧེ་སཱི ཙ, ཏ་ཐེ་ཝཱ’ག་མྨ པ་བྦ་ཛུཾ.
༤༧. ར་ཉྙོ མ་ཧེ་སཱི སུ་ཏྭཱ་ན, ཏ་སྶ པ་བྦ་ཛྫ་མུ་ཏྟ་མཾ;
ས་ཀྐ་ཙྩཾ ཏ་མུ་པ་ཊྛཱ་སི, ར་ཏ་ན་ཝ྄ཧ་ཉྩ ཀཱ་ར་ཡི.
༤༨. ཨ་དཱ རཱ་ཛཱ ཨ་མ་ཙྩ་སྶ, པཱ་ཙཱི་ན་ཀ་ཎྜ་རཱ་ཛི་ཡཾ;
ཝེ་ཏྟ་ཝཱ་ས་ཝི་ཧཱ་ར་ཉྩ, སོ’དཱ ས་ངྒྷ་སྶ ཏཾ ཡ་ཏི.
༤༩. རཱ་ཛ་ཏྠེ་རེ་མ་ཏེ རཱ་ཛཱ, སོ་ཙི་ཏྭཱ པ་རི་དེ་ཝི་ཡ;
པ་དྷཱ་ན་ཋཱ་ནཾ ཀཱ་རེ་སི, ཙཱུ་ལ༹་ག་ལླ་ཝི་ཧཱ་ར་ཀེ.
༥༠. པ་ལཾ་ན་ག་ར་ག་ཉྩེ་ཝ, ཏ་སྶ ཋཱ་ན་ཉྷི ཀཱ་ར་ཡི;
ཨེ་ཝཾ ཏ་ད་ཏྠཾ པུ་ཉྙཱ་ནི, བ་ཧཱུ་ནི’པི མ་ཧཱི་པ་ཏི.
༥༡. ཛོ་ཏི་པཱ་ལི་ཏ ཐེ་ར་མྷི, ཏཱུ་པཱ་རཱ་མ་མྷི ཙེ་ཏི་ཡཾ;
ཝ་ནྡ་མཱ་ནེ པ་བྷི་ཛྫི་ཏྭཱ, བྷཱ་གོ ཏཾ པུ་ར་ཏོ པ་ཏི.
༥༢. པ་ཀྐོ་སི་ཏྭཱ་ན རཱ་ཛཱ་ནཾ, ཐེ་རོ ད་སྶེ་སི དུ་ཀྑི་ཏོ;
རཱ་ཛཱ དི་སྭཱ་ཝ སཾ་ཝི་གྒོ, ཀ་མྨཾ པ་ཊྛ་པི ཏཾ་ཁ་ཎེ.
༥༣. ད་ཀྑི་ཎ་ཀྑ་ཀ་དྷཱ་ཏུཾ སོ, ལོ་ཧ་པཱ་སཱ་ད་ཀུ་ཙྪི་ཡཾ;
སཱ་ར་ཀྑཾ ཋ་པ་ཡི་ཏྭཱ་ན, ར་ཏྟི་ནྡི་ཝ་མ་པཱུ་ཛ་ཡི.
༥༤. ན་ཝ་ཀ་མྨེ ཙི་རཱ་ཡ་ནྟེ, ཐཱུ་པཱ་རཱ་མ་མྷི དེ་ཝ་ཏཱ;
སུ་པི་ནཾ ཏ་སྶ ད་སྶེ་སུཾ, ར་ཏྟི་མཱ་རཱ་མི་ཀཱ ཝི་ཡ.
༥༥. ས་ཙེ རཱ་ཛཱ པ་པ་ཉྩེ་ཏི, ཀཱ་ཏུཾ དྷཱ་ཏུ་གྷ་རཾ མ་ཡཾ;
དྷཱ་ཏུཾ ག་ཧེ་ཏྭཱ ག་ཙྪཱ་མ, ཡ་ཏྠ་ཏ་ཏྠཱ’ཏི ཏཾ་ཁ་ཎེ.
༥༦. རཱ་ཛཱ པ་བུ་དྡྷོ སཾ་ཝི་གྒོ, ན ཙི་རེ་ནེ་ཝ ཀཱ་ར་ཡི;
ཀ་མྨཾ དྷཱ་ཏུ་གྷ་རེ་ས་བྦཾ, ཙི་ཏྟ་ཀ་མྨཱ་དི་ས་ཉྙུ་ཏྟཾ.
༥༧. ཙ་ཏ་སྶོ པ་ཊི་མཱ་ཡོ ཙ, པ་ལླ་ངྐེ ཙ སི་ལཱ་མ་ཡེ;
ཧེ་མ་ཙྪ་ཏྟཾ སི་ལཱ་ད་ནྟ-ཀ་མྨཾ གེ་ཧ་མྷི ས་བྦ་སོ.
༥༨. མ་ཧཱ་མ་ཙྩཱ་ད་ཡོ’ཀཾ་སུ, ཀ་ར་ཎྜཱ་ནཾ ས་ཏཾ ན་ཝ;
དེ་ཝཱ་ནཾ་པི་ཡ་ཏི་སྶ་སྶ, ཀ་མྨ་ཉྩ ནི་ཁི་ལཾ ན་ཝཾ.
༥༩. ས་བྦུ་སྶཱ་ཧེ་ན ཀཱ་རེ་ཏྭཱ, མ་ཧཱ་པཱུ་ཛཾ ཡ་ཐཱ་ར་ཧཾ;
ཨཱ་ནེ་ཏྭཱ ལོ་ཧ་པཱ་སཱ་དཱ, དྷཱ་ཏུཾ ས་བྦཱ་ད་རེ་ན སོ.
༦༠. ཛོ་ཏི་པཱ་ལཾ མ་ཧཱ་ཐེ་རཾ, ས་ས་ངྒྷཾ པ་རི་ཝཱ་རི་ཡ;
པ་རི་ཧཱ་རེ་ན ཝ་ཌྜྷེ་སི, དྷཱ་ཏུཾ དྷཱ་ཏུ་ཀ་ར་ཎྜ་ཀེ.
༦༡. དྷཱ་ཏུ་གེ་ཧ་སྶ པཱ་དཱ་སི, ལ་ངྐཱ་དཱི་པཾ ས་ཧ་ཏྟ་ནཱ;
ལཱ་བྷ་གྒཱ་མ-མ་དཱ ཏ་སྶཱ, ར་ཀྑ་ཀཱ་ནཾ མ་ཧེ་སི་ཡཱ.
༦༢. ནཱ་ག་དཱི་པ་མྷི གེ་ཧ་ཉྩ, རཱ་ཛཱ་ཡ་ཏ་ན་དྷཱ་ཏུ་ཡཱ;
ཨུ་ཎྞ་ལོ་མ་གྷ་ར་ཉྩེ་ཝ, ཚ་ཏྟ་མཱ་མ་ལ་ཙེ་ཏི་ཡེ.
༦༣. ཏ་ཏྠ གཱ་མཾ ཝི་ཧཱ་ར་སྶ, ཡཱ་གུ་དཱ་ནཱ་ཡ’དཱ་སི ཙ;
ཝི་ཧཱ་ར་སྶ’བྷ་ཡ་སྶཱ’དཱ, གཱ་མ་མ་ངྒ་ཎ་སཱ་ལ་ཀཾ.
༦༤. ནཱ་མཾ ཀ་ཏྭཱ་ན སོ’ཀཱ་སི, ཨ་ཏྟ་ནོ ཙ མ་ཧེ་སི་ཡཱ;
དཱ་ཋ་གྒ་བོ་དྷི་མཱ་ཝཱ་སཾ, ཝི་ཧཱ་རེ ཨ་ཏ་ཡུ་ཏྟ་རེ.
༦༥. དེ་ཝཱི ཀ་པཱ་ལ་ནཱ་གཾ སཱ, ཝི་ཧཱ་རཾ སཱ་དྷུ་ཀཱ་རི་ཡ;
ཏ་སྶེ’ཝཱ་དཱ ཝི་ཧཱ་ར་སྶ, ས་མྤ་ནྣ་ཙ་ཏུ་པ་ཙྩ་ཡཾ.
༦༦. གེ་ཧཾ ཛེ་ཏ་ཝ་ནེ ཀཱ་སི, རཱ་ཛཱ རཱ་ཛ་ཏ་ཙུ་མྦ་ཊཾ;
ཨུ་ད་པཱ་ནཾ མ་ཎཱ་པེ་སི, སོ་ཝ བོ་དྷི་གྷ་ར་ནྟི་ཀེ.
༦༧. ག་ངྒཱ་ཏ་ཊཾ ཝ་ལཱ་ཧ་སྶཾ, ཝཱ་པིཾ གི་རི་ཏ་ཊ་ཉྩ་ཀཱ;
མ་ཧཱ་པཱ་ལི༹ཾ་པི ཝ་ཌྜྷེ་སི, བྷ་ཏ་ནཱ་ཝ་ཉྩ ཀཱ་ར་ཡི.
༦༨. བྷི་ཀྑཱུ་ནཱི་ནཾ མ་ཧེ་སཱི ཙ, བྷ་ཏྟ་ཝཾ་སཾ ས་མཱ་དི་སི;
ཨེ་ཝཾ པུ་ཉྙཱ་ནི ཀ་ཏྭཱ སོ, དི་ཝཾ’གཱ ད་ས་མེ ས་མེ.
༦༩. ཨེ་ཝཾ པུ་ཉྙ་ར་ཏཱ ན་རཱ་དྷི་པ་ཏ་ཡོ ས་མྤ་ནྣ་བྷོ་གཱ ག་མུཾ;
མ་ཙྩུ་སྶེ་ཝ ཝ་སཾ ཏ་ཏོ་ཧི མ་ཏི་མཱ ས་མྨཱ བྷ་ཝ་སྶཱི་དི་སཾ;
པ་སྶ་ནྟོ ནི་ཡ་མཾ ཝི་ཧཱ་ཡ ཝི་དྷི་ནཱ ས་བྦཾ བྷ་ཝེ ས་ངྒ་ཏིཾ;
ནི་བྦཱ་ནཱ་བྷི་མུ་ཁོ ཙ་རེ་ཡྻ དྷི་ཏི་མཱ པ་བྦ་ཛྫ་མ་ཛ྄ཛྷཱུ་པ་གོ.
སུ་ཛ་ན་པྤ་སཱ་ད་སཾ་ཝེ་ག་ཏྠཱ་ཡ ཀ་ཏེ མ་ཧཱ་ཝཾ་སེ
དྭི་རཱ་ཛ་ཀོ ནཱ་མ
ཨེ་ཀ་ཙ་ཏྟཱ་ལཱི་ས་ཏི་མོ པ་རི་ཙྪེ་དོ.