ཙ་ཏྟཱ་ལཱི་ས་ཏི་མ པ་རི་ཙྪེ་ད
ཨ་ཊྛ་རཱ་ཛ་ཀོ
༡. ཏ་སྶ་ཙྩ་ཡེ ཀུ་མཱ་རཱ་དི-དྷཱ་ཏུ་སེ་ནོ་ཏི ཝི་སྶུ་ཏོ;
ཨ་ཧུ ཏ་སྶ སུ་ཏོ རཱ་ཛཱ, དེ་ཝ་རཱུ་པོ མ་ཧཱ་བ་ལོ.
༢. ཀཱ་རི་ཏེ པི་ཏ་རཱ’ཀཱ་སི, ཝི་ཧཱ་རེ ན་ཝ་ཀ་མྨ་ཀཾ;
ཀཱ་རེ་ཏྭཱ དྷ་མྨ་ས་ངྒཱི་ཏིཾ པ་རི་སོ་དྷེ་ཏི སཱ་ས་ནཾ.
༣. ས་ནྟ་པྤེ་སི མ་ཧཱ་ས་ངྒྷཾ, པ་ཙྩ་ཡེ་ཧི ཙ་ཏཱུ་ཧི་པི;
ཀ་ཏྭཱ པུ་ཉྙཱ་ནི’ནེ་ཀཱ་ནི, ན་ཝ་མེ ཧཱ་ཡ་ནེ’ཏི་གཱ.
༤. ཏི་ཏྟི་སེ་ནོ སུ་ཏོ ཏ་སྶ, རཱ་ཛཱ ཧུ་ཏྭཱ ཨ་ནེ་ཀ་དྷཱ;
ཀ་ཏྭཱ པུ་ཉྙཱ་ནི ར་ཛྫཾ ཏཾ, མཱ་ས་མྤི ན་ཝ་མེ ཛ་ཧི.
༥. སི་ཝོ ཏཾ མཱ་ཏུ་ལོ ཧ་ནྟྭཱ, ཧུ་ཏྭཱ རཱ་ཛཱ ཨ་ན་པྤ་ཀཾ;
པུ་ཉྙཾ ཀ་ཏྭོ’པ་ཏི་སྶེ་ན, པ་ཉྩ་ཝཱི་ས དི་ནེ ཧ་ཏོ.
༦. ཨུ་པ་ཏི་སྶོ ཏ་ཏོ ཨཱ་སི, རཱ་ཛཱ ཧ་ནྟྭཱ་ན སཱི་ཝ་ཀཾ;
མོ་གྒ་ལླཱ་ན་སྶ བྷ་གི་ནཱི, སཱ་མི་ཀོ དྷ་ཛི་ནཱི་པ་ཏི.
༧. རཱ་ཛཱ ཋཱ་ན་ནྟ་རཱ་དཱི་ཧི, ཀ་ཏྭཱ་ན ཛ་ན་ས་ངྒ་ཧཾ;
སཱི་ལཱ་ཀཱ་ལ༹་སྶ པཱ་དཱ་སི, ས་ཧ བྷོ ཀ་ན་དྷཱི་ཝ་རཾ.
༨. ཨེ་ཀོ པུ་ཏྟོ ཨ་ཧུ ར་ཉྙོ, ཨུ་པ་ཏི་སྶ་སྶ ཀ་སྶ་པོ;
ས་སོ་ལ༹་ས ས་ཧཱ་ཡེ་ཧི, སཱུ་རོ སཱུ་པེ་ཧི ས་ཉྙུ་ཏོ.
༩. ཨེ་ཀ ཝུ་ཏྟི་ས་ཧཱ་ཡེ་ཧི, དཱ་ན་མཱ་ན མ་ཧཱ་དྷ་ནོ;
དྷ་མྨ་ཊྛོ ཝཱི་རི་ཡཱ་ཛཱི་ཝི, སཱ་དྷུ ཛེ་ཊྛ་པ་ཙཱ་ཡ་ཀོ.
༡༠. སི་ལཱ ཀཱ་ལོ༹་ཏ་ཏོ ར་ཛྫ-ལོ་བྷ་ཝ་ཉྩི་ཏ མཱ་ན་སོ;
ད་ཀྑི་ཎཾ མ་ལ་ཡཾ ག་ནྟྭཱ, ས་ངྒ་ཎྷི་ཏྭཱ མ་ཧཱ བ་ལཾ.
༡༡. ཝི་ལུ་མྤ་མཱ་ནོ པ་ཙྩ་ནྟི, ས་མྤ་ཏྟོ ན་ག་ར་ནྟི་ཀཾ;
ཏཾ སུ་ཏྭཱ ཀ་སྶ་པོ ཛེ་ཊྛོ, ཝ་ར་མཱ་རུ་ཡ྄ཧ ཀུ་ཉྫ་རཾ.
༡༢. ཨ་སྶཱ སེ་ཏྭཱ་ན པི་ཏ་རཾ, ས་མཱ་དཱ་ཡ ས་ཧཱ་ཡ་ཀེ;
ནི་ཀྑ་མྨ ན་ག་རཱ ག་ཙྪི, སི་ལཱ་ཀཱ་ལ་སྶ ད་སྶ་ནཾ.
༡༣. ཨེ་ཝཾ ས་ཏྟ’ཊྛ ཝཱ་རེ་སུ, པ་ལཱ་ཏོ ལཱི་ན་ཝུ་ཏྟི་ཀོ;
ཧ་ཏྠེ ཀ་ཏྭཱ ཨུ་པཱ་ཡེ་ན, དེ་སེ པཱ་ཙི་ན པ་ཙྪི་མེ.
༡༤. ཡུ་ཛ྄ཛྷི་ཏུཾ པུ་ན པཱ་ཙི་ན-ཏི་སྶ པ་བྦ་ཏ་མཱ་ག་མི;
ཀ་སྶ་པོ་པི ས་ཧཱ་ཡེ་ཧི, ས་དྡྷི་མཱ་རུ་ཡ྄ཧ ད་ནྟི་ནཾ.
༡༥. ཏ་ཏྠ ག་ནྟྭཱ པ་ལཱ་པེ་ཏྭཱ, ཙོ་རཾ པ་བྦ་ཏ་མ་ཏྠ་ཀཾ;
ཨཱ་རོ་པེ་སི མ་ཧཱ་ནཱ་གཾ, ཏེ་ནཱ’སི གི་རི་ཀ་སྶ་པོ.
༡༦. མཱ་ན་ཏྠ་དྡྷོ སི་ལཱ་ཀཱ་ལོ༹, བྷི་ཡྻོ ར་ཊྛཾ པ་བྷི་ནྡི་ཡ;
ས་བྦཾ ཧ་ཏྠ་ག་ཏཾ ཀ་ཏྭཱ, ཨ་ཛེ་ཡྻ བ་ལ་ཝཱ་ཧ་ནོ.
༡༧. ཨཱ་ག་མྨ ན་ག་རཾ རུ་ནྡྷི, ས་ཏྠཱ་ཧཾ རཱ་ཛ་སེ་ཝ་ཀཱ;
ཡུ་ཛ྄ཛྷི་ཏྭཱ ཝི་ར་ལཱ ཨཱ་སུཾ, ཏ་ཏོ ཙི་ནྟེ་སི ཀ་སྶ་པོ.
༡༨. ཨེ་ཏེ ན་ག་ར་རོ་དྷེ་ན, ས་བྦེ བྷི་ཛྫ་ནྟི པཱ་ཎི་ནོ;
པ་རི་ཧཱི་ནཾ བ་ལཾ རཱ་ཛཱ, ཨ་ནྡྷ་ཀོ ཙ མ་ཧ་ལླ་ཀོ.
༡༩. མེ་རུ་ཀ་ནྡ་ར་ཀེ ཀ་ཏྭཱ, མཱ་ཏ་རཾ པི་ཏ་ར་ཉྩ མེ;
ཨ་ངྒ་ཧེ་ཏྭཱ བ་ལཾ པ་ཙྪཱ, ཙོ་རོ ནི་གྒ་ཎྷི ཡོ ཨི་ཏི.
༢༠. ར་ཏྟི་ཡཾ སོ ས་ཧཱ་ཡེ ཙ, རཱ་ཛ་སཱ་དྷ་ན་མེ་ཝ་ཙ;
ཨཱ་དཱ་ཡ པི་ཏ་རོ ཙེ་ཝ, མ་ལ་ཡཾ ག་ནྟུ་མཱ་ར་བྷི.
༢༡. ཏ་དཱ མ་གྒ་མ་ཛཱ་ན་ནྟཱ, ས་མྨཱུ་ལཱ༹ མ་གྒ་དེ་ས་ཀཱ;
ན་ག་ར་སྶ ས་མཱི་པེ་ཝ, ས་མྦྷ་མིཾ་སུ ཨི་ཏོ ཏ་ཏོ.
༢༢. སི་ལཱ་ཀཱ་ལོ༹ པ་ཝ་ཏྟིཾ ཏཾ, སུ་ཏྭཱ ས་ངྒ་མྨ ཝེ་ག་སཱ;
པ་རི་ཝཱ་རེ་སི ས་ངྒཱ་མོ, ཏ་ཏྠ བྷིཾ་ས་ན་ཀོ ཨ་ཧུ.
༢༣. དེ་ཝཱ་སུ་ར་ར་ཎཱ་ཀཱ་རེ, ཝ་ཏྟ་མཱ་ནེ མ་ཧཱ་ཧ་ཝེ;
པ་ཏི་ཏེ་སུ ས་ཧཱ་ཡེ་སུ, སཱི་ད་མཱ་ནེ མ་ཧཱ་ག་ཛེ.
༢༤. ཧ་ཏྠཱ་རོ་ཧ་སྶ ད་ཏྭཱ, ཚི་ནྡི་ཏྭཱ སཱི་ས་མ་ཏྟ་ནོ;
པུ་ཉྪི་ཏྭཱ ལོ་ཧི་ཏཾ ཀ་ཏྭཱ, ཀོ་སི་ཡཾ ཨ་སི པུ་ཏྟི་ཀཾ.
༢༥. ཧ་ཏྠི་ཀུ་མྦྷེ ཨུ་བྷོ ཧ་ཏྠེ, ཋ་པེ་ཏྭཱ་ན ཨ་ཝ་ཏྠ་རི;
ཨུ་པ་ཏི་སྶོ་པི ཏཾ སུ་ཏྭཱ, སོ་ཀ་ས་ལླཱ་ཧ་ཏོ མ་རི.
༢༦. ཨེ་ཝཾ དི་ཡ་ཌྜྷ་ཝ་སྶེ་ན, ཨུ་པ་ཏི་སྶེ དི་ཝཾ་ག་ཏེ;
རཱ་ཛཱ’ཧོ་སི སི་ལཱ་ཀཱ་ལོ༹, པུ་བྦ་ནཱ་མེ་ན ཨེ་ཀ་ཏོ.
༢༧. ཏཾ ཨ་མྦ་སཱ་མ་ཎེ་རཱ་དི-སི་ལཱ་ཀཱ་ལོ༹་ཏི ཝོ་ཧ་རུཾ;
ཏི་ཏྠཾ ཏེ་ར་ས་ཝ་སྶཱ་ནི, དི་པཾ དྷ་མྨེ་ན པཱ་ལ་ཡི.
༢༨. མ་ཧཱ་པཱ་ལི༹་མྷི དཱ་པེ་སི, པ་ཙྩ་གྒྷཾ རཱ་ཛ་བྷོ་ཛ་ནཾ;
ཝེ་ཛྫ་སཱ་ལཱ་སུ བྷོ་གེ ཙ, ཝ་ཌྜྷེ་སི ཛ་ན་ཏཱ་ཧི་ཏོ.
༢༩. ཨ་ནྭ་ཧཾ པཱུ་ཛ་ཡི བོ་དྷིཾ, པ་ཊི་མཱ་ཡོ ཙ ཀཱ་ར་ཡི;
ས་བྦེ་སཾ དཱི་པ་ཝཱ་སཱི་ནཾ, བྷི་ཀྑཱུ་ནཾ’དཱ ཏི་ཙཱི་ཝ་རཾ.
༣༠. མཱ་གྷཱ་ཏཾ ཀཱ་ར་ཡི་དཱི་པེ, ས་བྦེ་སཾ་ཡེ་ཝ པཱ་ཎི་ནཾ;
ཨཱ་ནི་ཏཾ ཨ་ཏྟ་ནཱ ཀེ་ས-དྷཱ་ཏུཾ ས་མྨཱ ཨ་པཱུ་ཛ་ཡི.
༣༡. ར་ཧེ་ར་ད་ཀ་ཝཱ་ར་ཉྩ, ཨ་དཱ་སི ཨ་བྷ་ཡུ་ཏྟ་རེ;
པུ་ར་ཏྠི་མཱ ཐེ་རཱི་ཡཱ་ནཾ, ཝི་ཧཱ་ར་ཀུ་ནྠ་ནཱ་མ སོ.
༣༢. ཨཱ་ནེ་ཏྭཱ ཨཱ་ས་ནཾ ཏ་ཏྠ, ཋ་པེ་སི དུ་མ་རཱ་ཛ་ཀེ;
ཡཱ་ཝ་ཛཱི་ཝཾ པ་ཝ་ཏྟེ་སི, པུ་ཉྙ་ཀ་མྨ་མ་ས་ངྑི་ཡཾ.
༣༣. མོ་གྒ་ལླཱ་ནོ ཏ་ཐཱ དཱ་ཋཱ, པ་བྷུ་ཏི ཙོ’པ་ཏི་སྶ་ཀོ;
པུ་ཏྟོ ཏ་སྶཱ’སུ་མ་གྒ་སྶ, དེ་སཾ ད་ཏྭཱ པུ་ར་ཏྠི་མཾ.
༣༤. ད་ཏྭཱ ཋཱ་ན་ནྟ་ར་ཉྩཱ་དི-པཱ་ད་ས་ཉྙཾ ཝི་ས་ཛྫ་ཡི;
ག་ནྟྭཱ ཏ་ཏྠ ཝ་སཱ་ཧཱི་ཏི, སོ་པི ག་ནྟྭཱ ཏ་ཧིཾ ཝ་སི.
༣༥. ཋཱ་ནཾ མ་ལ་ཡ་རཱ་ཛ་གྒཾ, དེ་སཾ ད་ཏྭཱ་ན ད་ཀྑི་ཎཾ;
ར་ཀྑ་ཎ་ཏྠཾ ས་མུ་དྡ་སྶ, མ་ཛ྄ཛྷི་མཾ ཏུ ནི་ཡོ་ཛ་ཡི.
༣༦. ཨུ་པ་ཏི་སྶཾ ཏུ ཝཱ་སེ་སི, ས་ནྟི་ཀེ་ཡེ་ཝ ཨ་ཏྟ་ནོ;
ཝི་སེ་སེ་ན མ་མཱ་ཡ་ནྟོ, ཡཱུ་ནཾ ཀ་ལྱཱ་ན་ད་སྶ་ནཾ.
༣༧. ཏ་སྶ དྭཱ་ད་ས་མེ ཝ་སྶེ, ཨི་ཏོ ཀཱ་སི པུ་རཾ ག་ཏོ;
དྷ་མྨཱ་ཏུ མི་དྷཱ’ནེ་སི, ཏ་ཏོ ཝཱ་ཎི་ཛ མཱ་ཎ་ཝོ.
༣༨. རཱ་ཛཱ དི་སྭཱ’ས་མ་ཏྠོ སོ, དྷ་མྨཱ་དྷ་མྨ་ཝི་ཙཱ་ར་ཎེ;
ཧེ་མ་ས་ཉྙཱ་ཡ དཱི་པ་མྷི, པ་ཏ་ནྟོ ས་ལ་བྷོ ཝི་ཡ.
༣༩. བུ་དྡྷ་དྷ་མྨོ་ཏི ས་ཉྙཱ་ཡ, ཏཾ ག་ཧེ་ཏྭཱ་ན སཱ་དྷུ་ཀཾ;
ཀ་ཏྭཱ ས་ཀྐཱ་ར་ས་མྨཱ་ནཾ, གེ་ཧེ རཱ་ཛ་གྷ་ར་ནྟི་ཀེ.
༤༠. ཋ་པེ་ཏྭཱ ཨ་ནུ་ཝ་སྶཾ ཏུ, ནེ་ཏྭཱ ཛེ་ཏ་ཝ་ནཾ མ་ཧཾ;
ཀཱ་ཏུཾ ཀཱ་རེ་སི ཙཱ་རི་ཏྟཾ, ཧི་ཏཾ མ་ནྟྭཱ་ན པཱ་ཎི་ནཾ.
༤༡. ཨེ་ཝཾ ཀ་ཏྭཱ སི་ལཱ་ཀཱ་ལོ༹, པུ་ཉྙ་ཀ་མྨ་མ་ན་པྤ་ཀཾ;
པ་ཏྟེ ཏེ་ར་ས་མེ ཝ་སྶེ, ཡ་ཐཱ་ཀ་མྨ་མུ་པཱ་ག་མི.
༤༢. དཱ་ཋ་པྤ་བྷུ་ཏི་ཀོ ར་ཛྫཾ, ག་ཧེ་ཏྭཱ བྷཱ་ཏ་རཾ་ས་ཀཾ;
ཨ་ཀྐ་མོ་ཏི ནི་ཝཱ་རེ་ནྟཾ, མཱ་རཱ་པེ་སི ཝི་བུ་དྡྷི་ཀོ.
༤༣. མོ་གྒ་ལླཱ་ནོ’ཐ ཏཾ སུ་ཏྭཱ, ཨ་པྤ་ཏྟཾ ར་ཛྫ་མ་གྒ་ཧི;
ཨ་ཀཱ་ར་ཎེ མེ མཱ་རེ་སི, ཀ་ཎི་ཊྛཾ དྷ་མྨ་ཝཱ་དཱི་ནཾ.
༤༤. ཀཱ་རཱ་པེ་སྶཱ་མ་ཧ་མྤ་ཛྫ, ར་ཛྫ་ནྟི པ་རི་ཀུ་པྤི་ཡ;
ས་མཱ་དཱ་ཡ མ་ཧཱ་སེ་ནཾ, ཨ་གཱ་རཱ་ཧེ་ར པ་བྦ་ཏཾ.
༤༥. རཱ་ཛཱ་པི སུ་ཏྭཱ ས་ནྣ་དྡྷ-བ་ལ་ཀཱ་ཡོ ཀ་རི་ནྡ་ཀེ;
པ་བྦ་ཏེ སི་ཝི་རཾ བ་ནྡྷི, མོ་གྒ་ལླཱ་ནོ ནི་ས་མྨ་ཏཾ.
༤༦. སཱ་པ་རཱ་དྷཱ་ན ཏེ མེ ཝཱ, མ་ནུ་སྶཱ དཱི་པ་ཝཱ་སི་ནོ;
ཨེ་ཀ་སྨི་ཉྩ མ་ཏེ ར་ཛྫ-མུ་བྷི་ནྣཾ་ཡེ་ཝ ནོ་སི་ཡཱ.
༤༧. ཏ་སྨཱ ཨ་ཉྙེ་ན ཡུ་ཛ྄ཛྷ་ནྟུ, ཨུ་བྷོ་ཡེ་ཝ མ་ཡཾ ཨི་དྷ;
ཧ་ཏྠི་ཡུ་དྡྷཾ ཀ་རོ་མཱ་ཏི, ར་ཉྙོ པེ་སེ་སི སཱ་ས་ནཾ.
༤༨. སོ་པི སཱ་དྷཱུ་ཏི ཝ་ཏྭཱ་ན, བ་དྡྷ་པ་ཉྩཱ་ཡུ་དྷོ ག་ཛཾ;
ཨཱ་རུ་ཡ྄ཧ མུ་ནི་ནོ མཱ་རོ ཝི་ཡ ཨོ་ཏྠ་རི ཏཱ་ཝ་དེ.
༤༩. མོ་གྒ་ལླཱ་ནོ་པི ས་ནྣ་དྡྷོ, ཨཱ་རུ་ཡ྄ཧ ཀ་རཱི་ནཾ ཝ་རཾ;
ཏ་ཏྠཱ’གོ ཨ་ཉྙ་མ་ཉྙཾ ཏེ, པཱ་པུ་ཎིཾ་སུ མ་ཧཱ་ག་ཛཱ.
༥༠. ས་དྡོ སཱུ་ཡི་ཏྠ ས་ངྒྷ་ཊྚེ, ཨ་ས་ནི་རཱ་ཝ ས་ནྣི་བྷོ;
ད་ནྟ་གྷཱ་ཏེ་ན ཨུ་ཊྛཱ་སི, ཛཱ་ལཱ ཝི་ཛྫུ་ལླ་ཏཱ ཝི་ཡ.
༥༡. ས་ཉྫྷཱ་གྷ་ན་ས་བྷཱ་གཱ’སུཾ, ག་ཛཱ ལོ་ཧི་ཏ་མ་ཀྑི་ཏཱ;
མོ་གྒ་ལླཱ་ན་ག་ཛཱ་ཝི་དྡྷོ, ར་ཉྙོ་ཨོ་ས་ཀྐི ཀུ་ཉྫ་རོ.
༥༢. རཱ་ཛཱ ཨཱ་ར་བྷི ཏཾ དི་སྭཱ, ཚི་ནྡི་ཏུཾ སཱི་ས་མ་ཏྟ་ནོ;
མོ་གྒ་ལླཱ་ནོ’ཐ ཝ་ནྡ་ནྟོ, ཡཱ་ཙི’མེ’ཝཾ ཀི་རཱི་ཨི་ཏི.
༥༣. ཡཱ་ཙ་མཱ་ནེ་པི སོ་མཱ་ནཾ, མཱ་ནེ་ནྟོ ཚི་ནྡི་ཀ་ནྡྷ་རཾ;
ཚ་ཌྜེ་སི ཚ་ཧི སོ ར་ཛྫཾ, མཱ་སེ་ཧི དི་ཝ་སེ་ཧི ཙ.
༥༤. མོ་གྒ་ལླཱ་ནོ ཏ་ཏོ རཱ་ཛཱ, ཨཱ་སི དཱི་པེ མ་ཧཱ་བ་ལོ;
མཱ་ཏུ་ལ་ཉྩ པ་ཊི་ཙྩེ་མཾ, ཙཱུ་ལ་ནཱ་མེ་ན ཝོ་ཧ་རུཾ.
༥༥. ཨཱ་སཱ་དྷཱ་ར་ཎ་ཀཱ་ཝེ་ཡྻོ, ཝ་ཏྠུ་ཏྟ་ཡ པ་རཱ་ཡ་ཎོ;
དཱ་ན་སཾ་ཡ་མ སོ་ཙེ་ཡྻོ, སོ་ར་ཙྩཱ་དི་གུ་ཎཱ་ལ་ཡོ.
༥༦. དཱ་ནེ་ན པི་ཡ་ཝཱ་ཙཱ་ཡ, ཨ་ཏྠ་སྶ ཙ་རི་ཡཱ་ཡ ཙ;
ས་མཱ་ན་ཏྟ་སྶ་བྷཱ་ཝེ་ན, ས་ངྒ་ཧེ་སི མ་ཧཱ་ཛ་ནཾ.
༥༧. པི་ཎྜ་པཱ་ཏ་ཝི་ཧཱ་རེ་ཧི, བྷེ་ས་ཛྫ་ཙྪཱ་ད་ནེ་ཧི ཙ;
བྷི་ཀྑུ་ས་ངྒྷ་ཉྷི ས་ངྒ་ཎྷི, དྷ་མྨི་ཀཱ་ཡ ཙ གུ་ཏྟི་ཡཱ.
༥༨. ཨ་ཏི་རེ་ཀཱ་ཡ པཱུ་ཛཱ་ཡ, པཱུ་ཛེ་ཏྭཱ དྷ་མྨ་བྷཱ་ཎ་ཀེ;
པི་ཊ་ཀེ ཏཱི་ཎི ཝཱ་ཙེ་སི, ས་དྡྷི་མ་ཊྛ་ཀ་ཐཱ་ཡ སོ.
༥༩. ཀུ་མཱ་རེ ཨུ་པ་ལཱ་ལེ་ཏྭཱ, ནི་ཝཱ་པེ་ན ཡ་ཐཱ་རུ་ཙིཾ;
ས་ཛ྄ཛྷཱ་པེ་སི ས་དཱ དྷ་མྨཾ, དྷ་མྨ་དཱི་པོ མ་ཧཱ་མ་ཏི.
༦༠. དྷ་མྨ་དཱི་པ་ཉྩ སོ ཀ་ཏྭཱ, ཀུ་ཉྫ་ར་སེ་ཁ་རེ་ནི སཱ;
དྷ་མྨཱ་ཝཱ་སཱ་ནེ ཝཱ་ཙེ་སི, པུ་ར་མྷི པུ་རི་སུ་ཏྟ་མོ.
༦༡. བ་ནྡྷཱ་པེ་སི ཀ་ད་མྦ་ཉྩ, ན་དིཾ་པ་བྦ་ཏ་མ་ཛ྄ཛྷ་ཏོ;
པ་ཏྟ་པ་སཱ་ཎ་ཝཱ་པི་ཉྩ, དྷ་ན་ཝཱ་པིཾ ག་རི་ཏ་རཾ.
༦༢. ག་ཎྷཱ་པེ་སི ས་དཱི་གྷཱ་ཡུ-ཧེ་ཏུ ཀ་མྨ་ནྟི སཱ་ད་རོ;
ལི་ཁཱ་པེ་སི ཙ ས་དྡྷ་མྨཾ, ཝ་ཏྠུ་པཱུ་ཛ་ཉྩ ཀཱ་ར་ཡི.
༦༣. ལོ་ཀཾ སོ ཨ་ནུ་ཀ་མྤི་ཏྭཱ, མཱ་ཏཱ་པུ་ཏྟཾ་ཝ ཨོ་ར་སཾ;
ད་ཏྭཱ བྷུ་ཏྭཱ ཡ་ཐཱ་ཀཱ་མཾ, ཝ་སྶེ ཝཱི་ས་ཏི་མེ མ་རི.
༦༤. མ་ཧེ་སཱི ཏ་སྶ གྷཱ་ཏེ་ཏྭཱ, ཝི་ས་ཡོ་གེ་ན ཉཱ་ཏ་ཀེ;
པུ་ཏྟཾ ར་ཛྫེ’བྷི་སི་ཉྩི་ཏྭཱ, ས་ཡཾ ར་ཛྫཾ ཝི་ཙཱ་ར་ཡི.
༦༥. ཏ་ཐཱ་བྷི་སི་ཏྟོ སོ ཀི་ཏྟི-སི་རི་མེ་གྷོ ན་རཱ་དྷི་པོ;
ཏི་པུ་པ་ཏྟེ་ཧི ཚཱ་དེ་སི, དུ་མི་ནྡ་དྷ་ར་མཱ་དི་ཏོ.
༦༦. ཀ་པ་ཎ་དྡྷི་ཝ་ཎི་བྦཱ་ནཾ, མ་ཧཱ་དཱ་ནཾ པ་ཝ་ཏྟ་ཡི;
མ་གྒ་པཱ་ལོ ཏ་ཐཱ་ཀཱ་རོ, ཨ་ཧུ ས་བྦོ་པ་བྷོ་གི་ཡོ.
༦༧. མ་ཧེ་སཱི སཱ ས་དཱ ཨཱ་སི, པ་དྷཱ་ནཱ ས་བྦ་ཀ་མྨ་སུ;
ར་ཛྫཾ ཏ་སྶཱ’སི ཏེ་ནེ་ཝ, ཧེ་ཊྛུ་པ་རི་ཡ་ཝ་ཏྟི་ཀཾ.
༦༨. རཱ་ཛཱ་པཱ་དཱ མ་ཧཱ་མ་ཙྩཱ’-ཧེ་སུཾ ལ་ཉྩ་པ་རཱ་ཡ་ནཱ;
དུ་བྦ་ལེ ཙ ཝི་ཧེ་ཋེ་སུཾ, བ་ལཱི ཛཱ་ན་པ་དཱ ན་རཱ.
༦༩. སི་ལཱ་ཀཱ་ལ༹་སྶ ཀཱ་ལ་མྷི, གཱ་མེ ས་ངྒི་ལླ་ནཱ་མ་ཀེ;
བྷ་ཡ་ཝ་སཱི་ཝ྄ཧ་ཡོ པོ་སོ, ཨ་ཧུ མོ་རི་ཡ་ཝཾ་ས་ཛོ.
༧༠. ཨ་ཧོ་སི པུ་ཏྟོ སཱི་ཝ་སྶ, ཨ་གྒ་བོ་དྷི ས་ནཱ་མ་ཀོ;
བྷཱ་གི་ནེ་ཡྻོ་པི ཏ་སྶཱ་སི, མ་ཧཱ་ནཱ་གོ་ཏི ཝི་སྶུ་ཏོ.
༧༡. བྷཱ་གི་ནེ་ཡོ མ་ཧཱ་ནཱ་གོ, ཨ་གྒ་བོ་དྷི ཙ སུ་ནྡ་རོ;
ཨུ་ལཱ༹་ར་ཛ྄ཛྷཱ་ས་ཡ་ཏྟཱ སོ, མ་ཧཱ་ནཱ་གོ མ་ཧ་བྦ་ལོ.
༧༢. ཧི་ཏྭཱ ཀ་སྶ་ཀ་ཀ་མྨཱ་ནི, ཙོ་ར་ཀ་མྨ་མ་ཀཱ ཝ་ནེ;
གོ་དྷཾ ལ་དྡྷཱ་ན པེ་སེ་སི, མཱ་ཏུ་ལཱ་ནི་ཡ ས་ནྟི་ཀཾ.
༧༣. གོ་དྷཾ དི་སྭཱ’ཝ་སཱ ཉ་ཏྭཱ, དྷ་ཉྙ་པ་ཙྪི་མ་པེ་ས་ཡི;
ཀ་མྨཱ་ར་སྶཱ’པི པེ་སེ་སི, ས་སཾ སོ་པི ཏ་ཐེ་ཝ་ཀཱ.
༧༤. བཱི་ཛཾ བྷ་གི་ནཱི མཱ་ཡཱ་ཙི, བཱི་ཛ་གཱ་ཧ་ཉྩ ཏ་སྶ སཱ;
དཱ་ས་ཉྩ ཉ་ཏྭཱ པེ་སེ་སི, ཨ་ནྣ་པཱ་ནཱ་དི་ནཱ ར་ཧོ.