ཨེ་ཀཱུ་ན་ཙ་ཏྟཱ་ལཱི་ས་ཏི་མ པ་རི་ཙྪེ་ད
རཱ་ཛ་དྭ་ཡ་དཱི་པ་ནོ
༡. ཏ་ཏོ ཀ་སྶ་པ་ནཱ་མོ སོ, པཱ་པ་ཀོ ན་ར་པཱ་ལ་ཀོ;
ཨ་སྶ གོ པ་ཉྩ་སཱུ་ད་ཉྩ, པེ་ས་ཡི་ཏྭཱ་ན བྷཱ་ཏི་ཀཾ.
༢. མཱ་རཱ་པེ་ཏུཾ ཨ་ས་ཀྐོ་ནྟོ, བྷཱི་ཏོ སཱི་ཧ་གི་རིཾ ག་ཏོ;
དུ་རཱ་རོ་ཧཾ མ་ནུ་སྶེ་ཧི, སོ་དྷཱ་པེ་ཏྭཱ ས་མ་ནྟ་ཏོ.
༣. པཱ་ཀཱ་རེ་ན པ་རི་ཀྑི་པྤ, སཱི་ཧཱ་ཀཱ་རེ་ན ཀཱ་ར་ཡི;
ཏ་ཏྠ ནི་སྶེ་ཎི གེ་ཧཱ་ནི, ཏེ་ན ཏཾ ནཱ་མ་ཀོ ཨ་ཧཱུ.
༤. སཾ་ཧ་རི་ཏྭཱ དྷ་ནཾ ཏ་ཏྠ, ནི་ད་ཧི་ཏྭཱ སུ་གོ་པི་ཏཾ;
ཨ་ཏྟ་ནོ ནི་ཧི་ཏཱ་ནཾ སོ, ར་ཀྑཾ ད་ཏྭཱ ཏ་ཧིཾ ཏ་ཧིཾ.
༥. ཀ་ཏྭཱ རཱ་ཛ་གྷ་རཾ ཏ་ཏྠ, ད་སྶ་ནེ་ཡྻཾ མ་ནོ་ར་མཾ;
དུ་ཏི་ཡཱ་ལ་ཀ་མ་ནྡཾ་ཝ, ཀུ་ཝེ་རོ་ཝ ཏ་ཧིཾ ཝ་སི.
༦. མི་གཱ་རོ ནཱ་མ ཀཱ་རེ་སི, སེ་ནཱ་པ་ཏི ས་ནཱ་མ་ཀཾ;
པ་རི་ཝེ་ཎཾ ཏ་ཐཱ་གེ་ཧ-མ་བྷི་སེ་ཀ་ཛི་ནི་སྶ ཙ.
༧. ཏ་སྶཱ་བྷི་སེ་ཀཾ ཡཱ་ཙི་ཏྭཱ, སི་ལཱ་ས་མྦུ་དྡྷ་ཏོ’དྷི་རཾ;
ཨ་ལ་དྡྷཱ་སཱ་མི ནོ ར་ཛྫེ, ཛཱ་ནི་སྶཱ་མཱི་ཏི ས་ཎྛ་ཧི.
༨. ཧུ་ཏྭཱ ཝི་པྤ་ཊི་སཱ་རཱི སོ, ཨ་ཏྟ་ནཱ ཀ་ཏ་ཀ་མྨ་ནཱ;
མུ་ཙྩི་སྶཱ་མི ཀ་ཏཾ ནུ’ཏི, པུ་ཉྙཾ ཀཱ་སི ཨ་ན་པྤ་ཀཾ.
༩. མ་ཧཱ ཝ་ཏྠུ་ནི ཀཱ་རེ་སི, དྭཱ་རེ་སུ ན་ག་ར་སྶ སོ;
ཨ་མྦུ་ཡྻཱ་ནེ ཙ ཀཱ་རེ་སི, དཱི་པེ ཡོ་ཛ་ན ཡོ་ཛ་ནེ.
༡༠. ཨི་སྶ་ར་ས་མ་ཎཱ་རཱ་མཾ, ཀཱ་རེ་ཏྭཱ པུ་བྦ་ཝ་ཏྠུ་ཏོ;
ཨ་དྷི་ཀཾ བྷོ་ག་གཱ་མེ ཙ, ཨ་དྷི་ཀཾ ཏ་སྶ དཱ་པ་ཡི.
༡༡. བོ་དྷི ཨུ་པྤ་ལ་ཝ་ཎྞཱ ཙ, ཏ་སྶཱ་སུཾ དྷཱི་ཏ་རོ དུ་ཝེ;
ཝི་ཧཱ་ར་སྶ’སྶ ཀཱ་རེ་སི, ནཱ་མཾ ཏཱ་ས་ཉྩ ཨ་ཏྟ་ནོ.
༡༢. དེ་ནྟེ ཏ་སྨིཾ ན ཨི་ཙྪིཾ་སུ, ས་མ་ཎཱ ཐེ་ར་ཝཱ་དི་ནོ;
‘‘པི་ཏུ་གྷཱ་ཏི་སྶ ཀ་མྨ’’ནྟི, ལོ་ཀ་གཱ་ར་ཡ྄ཧ བྷཱི་རུ་ནོ.
༡༣. དཱ་ཏུ་ཀཱ་མོ་ས ཏེ་སཾ’ཝ, ས་མྦུ་དྡྷ པ་ཊི་མཱ་ཡ’དཱ;
བྷི་ཀྑ་ཝེ ཨ་དྷི་ཝཱ་སེ་སུཾ, བྷོ་གོ ནོ ས་ཏྠུ་ནོ ཨི་ཏི.
༡༤. ཀ་ཐཱ ནི་ཡྻ་ནྟི ཨུ་ཡྻཱ་ནེ, ས་མཱི་པེ པ་བྦ་ཏ་སྶ སོ;
ཀཱ་རཱ་པེ་སི ཝི་ཧཱ་རཾ སོ, ཏེ་སཾ ནཱ་མོ ཏ་ཏོ ཨ་ཧུ.
༡༥. ཨ་དཱ དྷ་མྨ་རུ་ཙི་ནཾ ཏཾ, ས་མྤ་ཏྟ ཙ་ཏུ་པ་ཙྩ་ཡཾ;
ཝི་ཧཱ་ར་ཉྩེ་ཝ ཨུ་ཡྻཱ་ནཾ, དི་སཱ་བྷཱ་ག་མྷི ཨུ་ཏྟ་རེ.
༡༦. བྷ་ཏྟཾ ས་ནཱི་ར་པ་ཀྐཾ སོ, བྷུ་ཉྫི་ཏྭཱ དི་ནྣ་མི་ཏྠི་ཡཱ;
ས་པྤི་ཡུ་ཏྟཾ མ་ནུ་ཉྙེ་ཧི, སཱུ་པེ་ཧི ཨ་བྷི་ས་ངྑ་ཏཾ.
༡༧. མ་ནུ་ཉྙ་མི་ད་མ་ཡྻཱ་ནཾ, ད་སྶ་མེ་ཝ་ནྟི ཏཱ་དི་སཾ;
བྷ་ཏྟཾ པཱ་དཱ་སི བྷི་ཀྑཱུ་ནཾ, ས་བྦེ་ས་ཉྩ ས་ཙཱི་ཝ་རཾ.
༡༨. ཨུ་པོ་ས་ཐ་མ་དྷི་ཊྛཱ་སི, ཨ་པྤ་མ་ཉྙ་ཉྩ བྷཱ་ཝ་ཡི,
ས་མཱ་དི་ཡི དྷུ་ཏ་ངྒེ ཙ, ལི་ཁཱ་པེ་སི ཙ པོ་ཏྠ་ཀེ.
༡༩. པ་ཊི་མཱ་དཱ་ན སཱ་ལཱ་དིཾ, ཀཱ་རཱ་པེ་སི ཨ་ན་པྤ་ཀཾ;
བྷི་ཏོ སོ པ་ར་ལོ་ཀ་མྷཱ, མོ་གྒ་ལླཱ་ནཱ ཙ ཝ་ཏྟ་ཏི.
༢༠. ཏ་ཏོ ཨ་ཊྛཱ་ར་སེ ཝ་སྶེ, མོ་གྒ་ལླཱ་ནོ མ་ཧཱ་བྷ་ཊོ;
ཨཱ་དེ་སེ་ན ནི་ག་ཎྛཱ་ནཾ, དྭཱ་ད་ས་གྒ་ས་ཧཱ་ཡ ཝཱ.
༢༡. ཛ་མྦུ་དཱི་པཱ ཨི་དྷཱ་ག་མྨ, དེ་སེ ཨ་མྦ་ཊྛ་ཀོ་ལ་ཀེ;
ཀུ་ལཱ༹་རཱི ནཱ་མེ བ་ནྡྷི་ཏྠ, ཝི་ཧཱ་རེ བ་ལ་ས་ཉྩ་ཡཾ.
༢༢. རཱ་ཛཱ སུ་ཏྭཱ ག་ཧེ་ཏྭཱ ཏཾ, བྷ་ཉྫི་སྶཱ་མི་ཏི ནི་ཀྑ་མི;
ནེ་མི་ཏྟེ་ཧི ན ས་ཀྐཱ་ཏི, ཝ་ད་ནྟེ་པི མ་ཧཱ་བ་ལོ.
༢༣. མོ་གྒ་ལླཱ་ནོ་པི ས་ནྣ་དྡྷ བ་ལོ སཱུ་ར་ས་ཧཱ་ཡ ཝཱ;
ག་ཙྪ་ནྟོ སུ་ར་ས་ངྒཱ་མཾ, དེ་ཝོ ཝི་ཡ སུ་ཛ་མྤ་ཏི.
༢༤. ཨ་ཉྙ་མ་ཉྙཾ ཨུ་པཱ་ག་མྨ, བྷི་ནྣ་ཝེ་ལཱ་ཝ སཱ་ག་རཱ;
ཨཱ་ར་བྷིཾ་སུ མ་ཧཱ་ཡུ་དྡྷཾ, བ་ལ་ཀཱ་ཡཱ ཨུ་བྷོ་པི ཏེ.
༢༥. ཀ་སྶ་པོ པུ་ར་ཏོ དི་སྭཱ, མ་ཧ་ནྟཾ ཀ་དྡ་མཱ་ས་ཡཾ;
ག་ནྟུ་མ་ཉྙེ་ན མ་གྒེ་ན, པ་རི་ཝ་ཏྟེ་སི ད་ནྟི་ནཾ.
༢༦. དི་སྭཱ ཏཾ སཱ་མི་ཀོ་ནོ’ཡཾ, པ་ལཱ་ཡ་ཏི བྷ་ཎེ ཨི་ཏི;
བ་ལ་ཀཱ་ཡོ པ་བྷི་ཛྫི་ཏྠ, ‘‘དི་ཊྛཾ པི་ཋ’’ནྟི གྷོ་ས་ཡུཾ.
༢༧. མོ་གྒ་ལཱ་ན བ་ལཱ་རཱ་ཛཱ, ཚེ་ཏྭཱ ནི་ཀ་ར་ཎེ་ན སོ;
སཱི་སཾ ཨུ་ཀྑི་པི་ཡཱ’ཀཱ་སཾ, ཚུ་རི་ཀཾ ཀོ་སི་ཡཾ ཁི་པི.
༢༨. ཀ་ཏྭཱ’ལཱ༹་ཧ་ན ཀི་ཙྩཾ སོ, ཏ་སྶ ཀ་མྨེ པ་སཱི་དི་ཡ;
ས་བྦཾ་སོ དྷ་ན་མཱ་དཱ་ཡ, ཨཱ་ག་ཉྪི ན་ག་རཾ ཝ་རཾ.
༢༩. བྷི་ཀྑཱུ སུ་ཏྭཱ པ་ཝ་ཏྟིཾ ཏཾ, སུ་ནི་ཝ་ཏྠཱ སུ་པཱ་རུ་ཏཱ;
ས་མྨ་ཛྫི་ཏྭཱ ཝི་ཧཱ་ར་ཉྩ, ཨ་ཊྛཾ་སུ པ་ཊི་པཱ་ཊི་ཡཱ.
༣༠. མ་ཧཱ་མེ་གྷ་ཝ་ནཾ པ་ཏྭཱ, དེ་ཝ་རཱ་ཛཱ་ཝ ན་ནྡ་ནཾ;
མ་ཧཱ་སེ་ན ནི་ཝ་ཏྟེ་ཏྭཱ, ཧ་ཏྠི་པཱ་ཀཱ་ར་ཏོ བ་ཧི.
༣༡. ཨུ་པ་ས་ངྐ་མྨ ཝ་ནྡི་ཏྭཱ, ས་ངྒྷེ ཏ་སྨིཾ པ་སཱི་དི་ཡ;
ཚ་ཏྟ་ཏྟེ་ན ས་ངྒྷཾ པཱུ་ཛེ་སི, ས་ངྒྷོ ཏ་སྶེ་ཝ ཏཾ ཨ་དཱ.
༣༢. ཏཾ ཋཱ་ནཾ ཚ་ཏྟ་ཝ་ཌྜྷཱི་ཏི, ཝོ་ཧ་རིཾ་སུ ཏ་ཧིཾ ཀ་ཏཾ;
པ་རི་ཝེ་ཎ་མྤི ཏཾ ནཱ་མཾ, ཨ་ཧོ་སི པུ་ར་མཱ་ག་ཏོ.
༣༣. ཝི་ཧཱ་རེ དྭེ་པི ག་ནྟྭཱ་ན, ས་ངྒྷཾ ཏ་ཏྠཱ’བྷི་ཝ་ནྡི་ཡ;
པཱ་པུ་ཎི་ཏྭཱ མ་ཧཱ་ར་ཛྫཾ, ལོ་ཀཾ དྷ་མྨེ་ན པཱ་ལ་ཡི.
༣༤. ཀུ་དྡྷོ ནཱི་ཧ་རི དཱ་ཋཾ་སོ, གྷཱ་ཏ་ཀཾ པི་ཏུ་ནོ མ་མ;
ཨ་ནུ་ཝ་ཏྟི་ཏྭཱ མ་ཙྩཱ་ཏི, ཏེ་ན ར་ཀྑ་ས ནཱ་མ ཝཱ.
༣༥. ཨ་ཏི་རེ་ཀ་ས་ཧ་སྶཾ སོ, ཨ་མ་ཙྩཱ་ནཾ ཝི་ནཱ་ས་ཡི;
ཀ་ཎྞ་ནཱ་སཱ་དི ཚེ་དེ་སི, པ་བྦཱ་ཛེ་སི ཏ་ཐཱ བ་ཧཱུ.
༣༦. ཏ་ཏོ སུ་ཏྭཱ་ན ས་དྡྷ་མྨ-མུ་པ་ས་ནྣོ སུ་མཱ་ན་སོ;
མ་ཧཱ་དཱ་ནཾ པ་ཝ་ཏྟེ་སི, མེ་གྷོ ཝི་ཡ མ་ཧཱི་ཏ་ལེ.
༣༧. ཕུ་སྶ་པུ་ཎྞ་མཱི་ཡཾ དཱ་ན-མ་ནུ་ཝ་སྶཾ པ་ཝ་ཏྟ་ཡི;
ཏ་ཏོ པ་ཊྛཱ་ཡ ཏཾ དཱ་ནཾ, དཱི་པེ ཨ་ཛྫཱ་པི ཝ་ཏྟ་ཏི.
༣༨. སོ་པི སཱ་ར་ཐི་ཀོ ལཱ་ཛ-དཱ་ཡ་ཀོ པི་ཏུ་རཱ་ཛི་ནོ;
ཨཱ་ནེ་ཏྭཱ པི་ཏུ་ས་ནྡེ སཾ, མོ་གྒ་ལླཱ་ན་སྶ ད་སྶ་ཡི.
༣༩. ཏཾ དི་སྭཱ པ་རི་དེ་ཝི་ཏྭཱ, པི་ཏུ་ནོ པེ་མ མ་ཏྟ་ནཱི;
ཝ་ཎྞེ་ཏྭཱ ཏ་སྶ པཱ་དཱ་སི, དྭཱ་ར་ནཱ་ཡ་ཀ་ཏཾ ཝི་བྷཱུ.
༤༠. སེ་ནཱ་པ་ཏི མི་གཱ་རོ་ཧི, ནི་ཝེ་དེ་ཏྭཱ ཡ་ཐཱ ཝི་དྷིཾ;
ཨ་བྷི་སེ་ཀ ཛི་ན་སྶཱ’ཀཱ, ཨ་བྷི་སེ་ཀཾ ཡ་ཐཱ་རུ་ཙིཾ.
༤༡. སཱི་ཧཱ’ཙ་ལེ ད་ལ༹ྷ་ནཱ་མཾ, དཱ་ཋཱ ཀོ་ཎྜ་ཉྙ་ཀ་མྤི ཙ;
ཝི་ཧཱ་རཾ དྷ་མྨ་རུ་ཙི་ནཾ, སཱ་ག་ལི་ན་ཉྩ དཱ་པ་ཡི.
༤༢. པ་བྦ་ཏ་ནྟུ ཝི་ཧཱ་རཾ་སོ, ཀ་ཏྭཱ ཐེ་ར་སྶ དཱ་པ་ཡི;
མ་ཧཱ་ནཱ་མ་ས་ནཱ་མ་སྶ, དཱི་གྷ་ས་ཎྜ ཝི་ཧཱ་ར་ཀེ.
༤༣. རཱ་ཛི་ནི་ནཱ་མ་ཀ་ཉྩེ་ཝ, ཀ་ཏྭཱ བྷི་ཀྑུ་ནུ་པ་སྶ་ཡཾ;
ཨ་དཱ སཱ་ག་ལི་ཀཱ་ནཾ སོ, བྷི་ཀྑུ་ནཱི་ནཾ མ་ཧཱ་མ་ཏི.
༤༤. ལ་མྦ་ཀ་ཎྞ་ཀ་གོ་ཏྟོ་པི, དཱ་ཋཱ པ་བྷུ་ཏི ནཱ་མ་ཀོ;
ཀ་སྶ་པ་སྶ ཨུ་པ་ཋཱ་ནེ, ཀོ་ཙི ནི་བྦི་ནྣ མཱ་ན་སོ.
༤༥. ག་ནྟཱ མེ རེ་ལི་ཡཾ ཝ་གྒཾ,
ཝཱ་སཾ ཏ་ཏྠེ་ཝ ཀ་པྤ་ཡི;
ཨ་ཧོ་སི པུ་ཏྟོ ཏ་སྶེ་ཀོ,
སི་ལཱ་ཀཱ ལོ་ཏི པི་སྶུ་ཏོ.
༤༦. སོ་པི ཀ་སྶ་པ་ཏོ བྷཱི་ཏོ, ཉཱ་ཏ་ཀེ་ན ས་ཧ’ཏྟ་ནོ;
མོ་གྒ་ལླཱ་ནེ་ན ག་ནྟྭཱ་ན, ཛ་མྦུ་དཱི་པ་ཏ་ལཾ ཨི་ཏོ.
༤༧. བོ་དྷི་པ་ཎྜ་ཝི་ཧཱ་ར་མྤི, པ་བྦ་ཛྫཾ ས་མུ་པཱ་ག་ཏོ;
ཀ་རོ་ནྟོ ས་ངྒྷ་ཀི་ཙྩཱ་ནི, སཱ་ད་རོ སོ སུ་པེ་ས་ལོ.
༤༨. ཨ་མྨཾ ས་ངྒྷ་སྶ པཱ་དཱ་སི, ས་ངྒྷོ ཏ་སྨིཾ པ་སཱི་དི་ཡ;
ཨཱ་ཧ’མྦ སཱ་མ་ཎེ་རོ’ཏི, ཏེ་ན ཏཾ ནཱ་མ་ཀོ ཨ་ཧུ.
༤༩. སོ ཀེ་ས་དྷཱ་ཏུ་ཝཾ་ས་མྷི, ཝུ་ཏྟེ་ན ཝི་དྷི་ནཱ ཏ་ཏོ;
ཀེ་ས་དྷཱ་ཏུཾ ལ་བྷི་ཏྭཱ་ན, ཏ་སྶ ར་ཛྫེ ཨི་དྷཱ’ན་ཡི.
༥༠. ཏ་སྶ ཀ་ཏྭཱ་ན ས་ཀྐཱ་རཾ, ག་ཧེ་ཏྭཱ ཀེ་ས དྷཱ་ཏུ་ཡོ;
མ་ཧ་གྒྷེ ནི་ད་ཧི་ཏྭཱ་ན, ཀ་ར་ཎྜེ ཕ་ལི་ཀུ་མྦྷ་ཝ྄ཧེ.
༥༡. དཱི་པ་ངྐ་ར་སྶ ནཱ་ཐ་སྶ, པ་ཊི་མཱ་ཡ གྷ་རེ ཝ་རེ;
ཝ་ཌྜྷེ་ཏྭཱ པ་རི་ཧཱ་རེ་ན, མ་ཧཱ་པཱུ་ཛཾ པ་ཝ་ཏྟ་ཡི.
༥༢. མཱ་ཏུ་ལཾ བྷ་རི་ཡ་ཉྩ’སྶ, ཀ་ཏྭཱ སོ་ཝ་ཎྞ་ཡཾ ཏ་ཧིཾ;
ཋ་པེ་སི པ་ཊི་མཱ་ཡོ ཙ, ཨ་སྶ བི་མྦ་ཉྩ ཙཱ་རུ་ཀཾ.
༥༣. ཀེ་ས་དྷཱ་ཏུ་ཀ་ར་ཎྜ་ཉྩ, ཚ་ཏྟཾ ར་ཏ་ན་མ་ཎྜ་པཾ;
སཱ་ཝ་ཀ་གྒ་ཡུཾ་གཾ ཝཱ་ལ༹-བཱི་ཛ་ནི་ཉྩ ས་ཀཱ་ར་ཡི.
༥༤. པ་རི་ཧཱ་ར་ཉྩ ཏ་སྶ’དཱ, རཱ་ཛཱ ཨ་དྷི་ཀ་མ་ཏྟ་ནོ;
སི་ལཱ་ཀཱ་ལ༹ མ་སི་གྒཱ་ཧཾ, ཀ་ཏྭཱ ར་ཀྑཱ་ཡ ཡོ་ཛ་ཡི.
༥༥. ཨ་སི་གྒཱ་ཧ་སི་ལཱ་ཀཱ་ལོ༹, ཨི་ཏི ཏེ་ནཱ’སི ཝི་སྶུ་ཏོ;
བྷ་གི་ནི་ཉྩ’སྶ པཱ་དཱ་སི, ས་དྡྷིཾ བྷོ་གེ་ན བྷཱུ་མི་པོ.
༥༦. ཝུ་ཏྟོ’ཡ་མ་ཏི ས་ངྑེ་པོ, ཝི་ཏྠཱ་རོ པ་ན ས་བྦ་སོ;
ཀེ་ས་དྷཱ་ཏུ་ཀ་ཝཾ་ས་མྷཱ, ག་ཧེ་ཏ་བྦོ ཝི་བྷཱ་ཝི་ནཱ.
༥༧. བ་ནྡྷི་ཏྭཱ སཱ་ག་རཱ ར་ཀྑཾ, དཱི་པ་ཉྩ ཀཱ་སི་ནི་བྦྷ་ཡཾ;
དྷ་མྨ་ཀ་མྨ་ན སོ་དྷེ་སི, ས་དྷ་མྨཾ ཛི་ན་སཱ་ས་ནཾ.
༥༨. སེ་ནཱ་པ་ཏི་ས ནཱ་མཾ’ཀཱ, པ་དྷཱ་ན་གྷ་ར མུ་ཏྟ་རོ;
ཀ་ཏྭཱ’ཊྛཱ་ར་ས་མེ ཝ་སྶེ, སོ པུ་ཉྙཱ་ནི ཁ་ཡཾ ག་ཏོ.
༥༩. ཀ་སྶ་པ་ཏོ ཛི་ཏོ ཨ་ཏི་བ་ལི པུ་ཉྙ་ཀྑ་ཡེ ས་ངྑ་ཏེ;
ཛེ་ཏུཾ ནོ ཝི་ས་ཧི་ཏྠ མ་ཙྩུ་མུ་པ་གཾ སོ ཡེ་ཝ་དཱ་སོ་ཝི་ཡ;
ཏ་སྨཱ མ་ཙྩུ་བ་ལཾ ནི་ཧ་ཙྩ སུ་ཁི་ནོ ཧེ་སྶ་ནྟི མེ་དྷཱ་ཝི་ནོ;
ནི་བྦཱ་ནཾ པ་ར་མ་ཙྩུ་ཏཾ སི་ཝ་པ་དཾ པ་ཏྟ་བྦ་མ་ཏྟ་ཉྙུ་ནཱ.
སུ་ཛ་ན་པྤ་སཱ་ད སཾ་ཝེ་ག་ཏྠཱ་ཡ ཀ་ཏེ མ་ཧཱ་ཝཾ་སེ
རཱ་ཛ་དྭ་ཡ་དཱི་པ་ནོ ནཱ་མ
ཨེ་ཀཱུ་ན་ཙ་ཏྟཱ་ལཱི་ས་ཏི་མོ པ་རི་ཙྪེ་དོ.