༤. ས་མཱ་ས་ཀ་པྤ
ས་ཏྟ་མ་ཀ་ཎྜ
༣༡༦. , ༣༣༡. ནཱ་མཱ་ནཾ ས་མཱ་སོ ཡུ་ཏྟ་ཏྠོ.
ཏེ་སཾ ནཱ་མཱ་ནཾ པ་ཡུ་ཛྫ་མཱ་ན་པ་ད་ཏྠཱ་ནཾ ཡོ ཡུ་ཏྟ་ཏྠོ, སོ ས་མཱ་ས་ས་ཉྙོ ཧོ་ཏི.
ཀ་ཐི་ན་དུ་སྶཾ, ཨཱ་ག་ནྟུ་ཀ་བྷ་ཏྟཾ, ཛཱི་ཝི་ཏི་ནྡྲི་ཡཾ, ས་མ་ཎ་བྲཱ་ཧྨ་ཎཱ, སཱ་རི་པུ་ཏྟ་མོ་གྒ་ལླཱ་ནཱ, བྲཱ་ཧྨ་ཎ ག་ཧ་པ་ཏི་ཀཱ.
ནཱ་མཱ་ནམི་ཏི ཀི་མ་ཏྠཾ? དེ་ཝ་ད་ཏྟོ པ་ཙ་ཏི, ཡ་ཉྙ་ད་ཏྟོ པ་ཙ་ཏི.
ཡུ་ཏྟ་ཏྠོཏི ཀི་མ་ཏྠཾ? བྷ་ཏོ ར་ཉྙོ པུ་ཏྟོ དེ་ཝ་ད་ཏྟ་སྶ.
ས་མཱ་སཨི་ཙྩ་ནེ་ན ཀྭ་ཏྠོ? ཀྭ་ཙི ས་མཱ་ས་ནྟ་ག་ཏཱ་ན་མ་ཀཱ་ར་ནྟོ.
༣༡༧. , ༣༣༢. ཏེ་སཾ ཝི་བྷ་ཏྟི་ཡོ ལོ་པཱ ཙ.
ཏེ་སཾ ཡུ་ཏྟ་ཏྠཱ་ནཾ ས་མཱ་སཱ་ནཾ ཝི་བྷ་ཏྟི་ཡོ ལོ་པཱ ཙ ཧོ་ནྟི.
ཀ་ཐི་ན་དུ་སྶཾ, ཨཱ་ག་ནྟུ་ཀ་བྷ་ཏྟཾ.
ཏེ་སཾ་ག་ཧ་ཎེ་ན ས་མཱ་ས་ཏ་དྡྷི་ཏཱ་ཁྱཱ་ཏ་ཀི་ཏ་ཀཱ་ནཾ ཝི་བྷ་ཏྟི་པ་ཙྩ་ཡ་པ་ད་ཀྑ་རཱ་ག་མཱ ཙ ལོ་པཱ ཧོ་ནྟི. ཝཱ་སི་ཊྛོ, ཝེ་ན་ཏེ་ཡྻོ.
ཙ་གྒ་ཧ་ཎ མ་ཝ་དྷཱ་ར་ཎ་ཏྠཾ, པ་བྷ་ངྐ་རོ, ཨ་མ་ཏ་དྡ་དོ, མེ་དྷ་ངྐ་རོ, དཱི་པ་ངྐ་རོ.
༣༡༨. , ༣༣༣. པ་ཀ་ཏི ཙ་སྶ ས་ར་ནྟ་སྶ.
ལུ་ཏྟཱ་སུ ཝི་བྷ་ཏྟཱི་སུ ཨ་སྶ ས་ར་ནྟ་སྶ ལི་ངྒ་སྶ པ་ཀ་ཏི་རཱུ་པཱ་ནི ཧོ་ནྟི.
ཙ་ཀྑུ་སོ་ཏཾ, མུ་ཁ་ནཱ་སི་ཀཾ, རཱ་ཛ་པུ་ཏྟོ, རཱ་ཛ་པུ་རི་སོ.
༣༡༩. , ༣༣༠. ཨུ་པ་ས་གྒ་ནི་པཱ་ཏ་པུ་བྦ་ཀོ ཨ་བྱ་ཡཱི་བྷཱ་ཝོ.
ཨུ་པ་ས་གྒ་ནི་པཱ་ཏཔུ་བྦ་ཀོ ས་མཱ་སོ ཨ་བྱ་ཡཱི་བྷཱ་ཝས་ཉྙོ ཧོ་ཏི.
ན་ག་ར་སྶ ས་མཱི་པེ པ་ཝ་ཏྟ་ཏི ཀ་ཐཱ ཨི་ཏི ཨུ་པ་ན་ག་རཾ, ད་ར་ཐཱ་ནཾ ཨ་བྷཱ་ཝོ ནི་དྡ་ར་ཐཾ, མ་ཀ་སཱ་ནཾ ཨ་བྷཱ་ཝོ ནི་མྨ་ཀ་སཾ, ཝུ་ཌྜྷཱ་ནཾ པ་ཊི་པཱ་ཊི ཡ་ཐཱ་ཝུ་ཌྜྷཾ, ཡེ ཡེ ཝུ་ཌྜྷཱ ཝཱ ཡ་ཐཱ་ཝུ་ཌྜྷཾ, ཛཱི་ཝ་སྶ ཡ་ཏྟ་ཀོ པ་རི་ཙྪེ་དོ ཡཱ་ཝ་ཛཱི་ཝཾ, ཙི་ཏྟ་མ་དྷི་ཀི་ཙྩ པ་ཝ་ཏྟ་ནྟི ཏེ དྷ་མྨཱ་ཏི ཨ་དྷི་ཙི་ཏྟཾ, པ་བྦ་ཏ་སྶ ཏི་རོ ཏི་རོ་པ་བྦ་ཏཾ, སོ་ཏ་སྶ པ་ཏི པ་ཝ་ཏྟ་ཏི ནཱ་ཝཱ ཨི་ཏི པ་ཏི་སོ་ཏཾ, པཱ་སཱ་ད་སྶ ཨ་ནྟོ ཨ་ནྟོ་པཱ་སཱ་དཾ.
ཨ་བྱ་ཡཱི་བྷཱཝ་མི་ཙྩ་ནེ་ན ཀྭ་ཏྠོ? ཨཾ་ཝི་བྷ་ཏྟཱི་ན མ་ཀཱ་ར་ནྟཱ ཨ་བྱ་ཡཱི་བྷཱ་ཝཱ.
༣༢༠. , ༣༣༥. སོ ན་པུཾ་ས་ཀ་ལི་ངྒོ.
སོ ཨ་བྱ་ཡཱི་བྷཱ་ཝ་ས་མཱ་སོ ན་པུཾ་ས་ཀ་ལི་ངྒོ་ཝ ད་ཊྛ་བྦོ.
ཀུ་མཱ་རཱི་སུ ཨ་དྷི་ཀི་ཙྩ པ་ཝ་ཏྟ་ཏི ཀ་ཐཱ ཨི་ཏི ཨ་དྷི་ཀུ་མཱ་རི, ཝ་དྷུ་ཡཱ ས་མཱི་པེ པ་ཝ་ཏྟ་ཏི ཀ་ཐཱ ཨི་ཏི ཨུ་པ་ཝ་དྷུ, ག་ངྒཱ་ཡ ས་མཱི་པེ པ་ཝ་ཏྟ་ཏི ཀ་ཐཱ ཨི་ཏི ཨུ་པ་ག་ངྒཾ, མ་ཎི་ཀཱ་ཡ ས་མཱི་པེ པ་ཝ་ཏྟ་ཏི ཀ་ཐཱ ཨི་ཏི ཨུ་པ་མ་ཎི་ཀཾ.
༣༢༡. , ༣༤༩. དི་གུ་སྶེ་ཀ་ཏྟཾ.
དི་གུ་སྶ ས་མཱ་ས་སྶ ཨེ་ཀ་ཏྟཾ ཧོ་ཏི, ན་པུཾ་ས་ཀ་ལི་ངྒ་ཏྟ་ཉྩ.
ཏ་ཡོ ལོ་ཀཱ ཏི་ལོ་ཀཾ, ཏ་ཡོ ད་ཎྜཱ ཏི་ད་ཎྜཾ, ཏཱི་ཎི ན་ཡ་ནཱ་ནི ཏི་ན་ཡ་ནཾ, ཏ་ཡོ སི་ངྒཱ ཏི་སི་ངྒཾ. ཙ་ཏ་སྶོ དི་སཱ ཙ་ཏུ་དྡི་སཾ, པ་ཉྩ ཨི་ནྡྲི་ཡཱ་ནི པ་ཉྩི་ནྡྲི་ཡཾ.
༣༢༢. , ༣༥༩. ཏ་ཐཱ དྭ་ནྡེ པཱ་ཎི ཏཱུ་རི་ཡ ཡོ་གྒ་སེ་ན་ངྒ་ཁུ་དྡ་ཛ་ནྟུ་ཀ ཝི་ཝི་དྷ་ཝི་རུ་དྡྷ ཝི་ས་བྷཱ་ག་ཏྠཱ་དཱི་ན་ཉྩ.
ཏ་ཐཱ དྭ་ནྡེ ས་མཱ་སེ པཱ་ཎི ཏཱུ་རི་ཡ ཡོ་གྒ སེ་ན་ངྒ་ཁུ་དྡ་ཛ་ནྟུ་ཀ ཝི་ཝི་དྷ་ཝི་རུ་དྡྷ ཝི་ས་བྷཱ་ག་ཏྠཨི་ཙྩེ་ཝ་མཱ་དཱི་ནཾ ཨེ་ཀ་ཏྟཾ ཧོ་ཏི, ན་པུཾ་ས་ཀ་ལི་ངྒ་ཏྟ་ཉྩ.
ཏཾ ཡ་ཐཱ? ཙ་ཀྑུ ཙ སོ་ཏ་ཉྩ ཙ་ཀྑུ་སོ་ཏཾ, མུ་ཁ་ཉྩ ནཱ་སི་ཀཱ ཙ མུ་ཁ་ནཱ་སི་ཀཾ, ཚ་ཝི ཙ མཾ་ས་ཉྩ ལོ་ཧི་ཏ་ཉྩ ཚ་ཝི་མཾ་ས་ལོ་ཧི་ཏཾ. ཨེ་ཝཾ པཱ་ཎྱ་ངྒ་ཏྠེ.
ས་ངྑོ ཙ པ་ཎ་ཝོ ཙ ས་ངྑ་པ་ཎ་ཝཾ, གཱི་ཏ་ཉྩ ཝཱ་དི་ཏ་ཉྩ གཱི་ཏ་ཝཱ་དི་ཏཾ, ད་དྡ་རི ཙ ཌི་ཎྜི་མོ ཙ ད་དྡ་རི་ཌི་ཎྜི་མཾ. ཨེ་ཝཾ ཏཱུ་རི་ཡ་ངྒ་ཏྠེ.
ཕཱ་ལོ ཙ པཱ་ཙ་ན་ཉྩ ཕཱ་ལ་པཱ་ཙ་ནཾ, ཡུ་ག་ཉྩ ན་ངྒ་ལ་ཉྩ ཡུ་ག་ན་ངྒ་ལཾ. ཨེ་ཝཾ ཡོ་གྒ་ངྒ་ཏྠེ.
ཨ་སི ཙ ཙ་མྨ་ཉྩ ཨ་སི་ཙ་མྨཾ, དྷ་ནུ ཙ ཀ་ལཱ་པོ ཙ དྷ་ནུ་ཀ་ལཱ་པཾ, ཧ་ཏྠཱི ཙ ཨ་སྶོ ཙ ཧ་ཏྠི་ཨ་སྶཾ, ར་ཐོ ཙ པ་ཏྟི་ཀོ ཙ ར་ཐ་པ་ཏྟི་ཀཾ. ཨེ་ཝཾ སེ་ན་ངྒ་ཏྠེ.
ཌཾ་སཱ ཙ མ་ཀ་སཱ ཙ ཌཾ་ས་མ་ཀ་སཾ, ཀུ་ནྠོ ཙ ཀི་པི་ལླི་ཀོ ཙ ཀུ་ནྠ་ཀི་པི་ལླི་ཀཾ, ཀཱི་ཊོ ཙ ས་རཱི་ས་པོ ཙ ཀཱི་ཊ་ས་རཱི་ས་པཾ. ཨེ་ཝཾ ཁུ་དྡ་ཛ་ནྟུ་ཀ་ཏྠེ.
ཨ་ཧི ཙ ན་ཀུ་ལོ ཙ ཨ་ཧི་ན་ཀུ་ལཾ, བི་ལཱ༹་རོ ཙ མཱུ་སི་ཀོ ཙ བི་ལཱ༹་ར་མཱུ་སི་ཀཾ, ཀཱ་ཀོ ཙ ཨུ་ལཱུ་ཀོ ཙ ཀཱ་ཀོ་ལཱུ་ཀཾ. ཨེ་ཝཾ ཝི་ཝི་དྷ་ཝི་རུ་དྡྷ་ཏྠེ.
སཱི་ལ་ཉྩ པ་ཉྙཱ་ཎ་ཉྩ སཱི་ལ་པ་ཉྙཱ་ཎཾ, ས་མ་ཐོ ཙ ཝི་པ་སྶ་ནཱ ཙ ས་མ་ཐ་ཝི་པ་སྶ་ནཾ, ཝི་ཛྫཱ ཙ ཙ་ར་ཎ་ཉྩ ཝི་ཛྫཱ་ཙ་ར་ཎཾ. ཨེ་ཝཾ ཝི་ས་བྷཱ་ག་ཏྠེ.
ཨཱ་དི་གྒ་ཧ་ཎཾ ཀི་མ་ཏྠཾ? དཱ་སཱི ཙ དཱ་སོ ཙ དཱ་སི་དཱ་སཾ, ཨི་ཏྠཱི ཙ པུ་མཱ ཙ ཨི་ཏྠི་པུ་མཾ, པ་ཏྟོ ཙ ཙཱི་ཝ་ར་ཉྩ པ་ཏྟ་ཙཱི་ཝ་རཾ, ཚ་ཏྟ་ཉྩ ཨུ་པཱ་ཧ་ནཱ ཙ ཚ་ཏྟུ་པཱ་ཧ་ནཾ, ཏི་ཀ་ཉྩ ཙ་ཏུ་ཀྐ་ཉྩ ཏི་ཀ་ཙ་ཏུ་ཀྐཾ, ཝེ་ནོ ཙ ར་ཐ་ཀཱ་རོ ཙ ཝེ་ན་ར་ཐ་ཀཱ་རཾ, སཱ་ཀུ་ཎི་ཀོ ཙ མཱ་ག་ཝི་ཀོ ཙ ས་ཝ་ཀུ་ཎི་ཀ་མཱ་ག་ཝི་ཀཾ, དཱི་གྷོ ཙ མ་ཛ྄ཛྷི་མོ ཙ དཱི་གྷ་མ་ཛ྄ཛྷི་མཾ ཨི་ཙྩེ་ཝ་མཱ་དི.
༣༢༣. , ༣༦༠. ཝི་བྷཱ་སཱ རུ་ཀྑ ཏི་ཎ པ་སུ་ཁ ན དྷ་ཉྙ ཛ་ན་པ་དཱ་དཱི་ན་ཉྩ.
རུ་ཀྑ་ཏི་ཎ པ་སུ དྷ་ན དྷ་ཉྙ ཛ་ན་པ་དཨི་ཙྩེ་ཝ་མཱ་དཱི་ནཾ ཝི་བྷཱ་སཱ ཨེ་ཀ་ཏྟཾ ཧོ་ཏི, ན་པུཾ་ས་ཀ་ལི་ངྒ་ཏྟ་ཉྩ དྭ་ནྡེ ས་མཱ་སེ. ཨ་སྶ་ཏྠོ ཙ ཀ་པཱི་ཏ་ནོ ཙ ཨ་སྶ་ཏྠ་ཀ་པཱི་ཏ་ནཾ, ཨ་སྶ་ཏྠ་ཀ་པཱི་ཏ་ནཱ ཝཱ. ཨུ་སཱི་ར་ཉྩ བཱི་ར་ཎ་ཉྩ ཨུ་སཱི་ར་བཱི་ར་ཎཾ, ཨུ་སཱི་ར་བཱི་ར་ཎཱ ཝཱ. ཨ་ཛོ ཙ ཨེ་ལ༹་ཀོ ཙ ཨ་ཛེ་ལ༹་ཀཾ, ཨ་ཛེ་ལ༹་ཀཱ ཝཱ. ཧི་ར་ཉྙ་ཉྩ སུ་ཝ་ཎྞ་ཉྩ ཧི་ར་ཉྙ་སུ་ཝ་ཎྞཾ, ཧི་ར་ཉྙ་སུ་ཝ་ཎྞཱ ཝཱ. སཱ་ལི ཙ ཡ་ཝོ ཙ སཱ་ལི་ཡ་ཝཾ, སཱ་ལི་ཡ་ཝཱ ཝཱ. ཀཱ་སཱི ཙ ཀོ་ས་ལཱ ཙ ཀཱ་སི་ཀོ་ས་ལཾ, ཀཱ་སི་ཀོ་ས་ལཱ ཝཱ.
ཨཱ་དི་གྒ་ཧ་ཎཾ ཀི་མ་ཏྠཾ? སཱ་ཝ་ཛྫ་ཉྩ ཨ་ན་ཝ་ཛྫ་ཉྩ སཱ་ཝ་ཛྫཱ་ན་ཝ་ཛྫཾ, སཱ་ཝ་ཛྫཱ ན་ཝ་ཛྫཱ ཝཱ. ཧཱི་ན་ཉྩ པ་ཎཱི་ཏ་ཉྩ ཧཱི་ན་པ་ཎཱི་ཏཾ. ཧཱི་ན་པ་ཎཱི་ཏཱ ཝཱ. ཀ་ཎྷོ ཙ སུ་ཀྐོ ཙ ཀ་ཎྷ་སུ་ཀྐཾ, ཀ་ཎྷ་སུ་ཀྐཱ ཝཱ.
༣༢༤. , ༣༣༩. དྭི་པ་དེ ཏུ་ལྱཱ་དྷི་ཀ་ར་ཎེ ཀ་མྨ་དྷཱ་ར་ཡོ.
དྭེ པ་དཱ་ནི ཏུ་ལྱཱ་དྷི་ཀ་ར་ཎཱ་ནི ཡ་དཱ ས་མ་སྱ་ནྟེ, ཏ་དཱ སོ ས་མཱ་སོ ཀ་མྨ་དྷཱ་ར་ཡས་ཉྙོ ཧོ་ཏི.
མ་ཧ་ནྟོ ཙ སོ པུ་རི་སོ ཙཱ་ཏི མ་ཧཱ་པུ་རི་སོ, ཀ་ཎྷོ ཙ སོ ས་པྤོ ཙཱ་ཏི ཀ་ཎྷ་ས་པྤོ, ནཱི་ལ་ཉྩ ཏཾ ཨུ་པྤ་ལ་ཉྩཱ་ཏི ནཱི་ལུ་པྤ་ལཾ, ལོ་ཧི་ཏ་ཉྩ ཏཾ ཙ་ནྡ་ན་ཉྩཱ་ཏི ལོ་ཧི་ཏ་ཙ་ནྡ་ནཾ, བྲཱ་ཧྨ་ཎཱི ཙ སཱ དཱ་རི་ཀཱ ཙཱ་ཏི བྲཱ་ཧྨ་ཎ་དཱ་རི་ཀཱ, ཁ་ཏྟི་ཡཱ ཙ སཱ ཀ་ཉྙཱ ཙཱ་ཏི ཁ་ཏྟི་ཡ་ཀ་ཉྙཱ.
ཀ་མྨ་དྷཱ་ར་ཡཨི་ཙྩ་ནེ་ན ཀྭ་ཏྠོ? ཀ་མྨ་དྷཱ་ར་ཡ་ས་ཉྙེ ཙ.
༣༢༥. , ༣༤༨. ས་ངྑྱཱ་པུ་བྦོ དི་གུ.
ས་ངྑྱཱ་པུ་བྦོ ཀ་མྨ་དྷཱ་ར་ཡ་ས་མཱ་སོ དི་གུས་ཉྙོ ཧོ་ཏི.
ཏཱི་ཎི མ་ལཱ་ནི ཏི་མ་ལཾ, ཏཱི་ཎི ཕ་ལཱ་ནི ཏི་ཕ་ལཾ, ཏ་ཡོ ལོ་ཀཱ ཏི་ལོ་ཀཾ, ཏ་ཡོ ད་ཎྜཱ ཏི་ད་ཎྜཾ, ཙ་ཏ་སྶོ དི་སཱ ཙ་ཏུ་དྡི་སཾ, པ་ཉྩ ཨི་ནྡྲི་ཡཱ་ནི པ་ཉྩི་ནྡྲི་ཡཾ, ས་ཏྟ གོ་དཱ་ཝ་རི་ཡོ ས་ཏྟ་གོ་དཱ་ཝ་རཾ.
དི་གུཨི་ཙྩ་ནེ་ན ཀྭ་ཏྠོ? དི་གུ་སྶེ ཀ་ཏྟཾ.
༣༢༦. , ༣༤༡. ཨུ་བྷེ ཏ་པྤུ་རི་སཱ.
ཨུ་བྷེ དི་གུ་ཀ་མྨ་དྷཱ་ར་ཡ་ས་མཱ་སཱ ཏ་པྤུ་རི་སས་ཉྙཱ ཧོ་ནྟི.
ན བྲཱ་ཧྨ་ཎོ ཨ་བྲཱ་ཧྨ་ཎོ, ན ཝ་ས་ལོ ཨ་ཝ་ས་ལོ, ན བྷི་ཀྑུ ཨ་བྷི་ཀྑུ, ན པ་ཉྩ་ཝ་སྶཾ ཨ་པ་ཉྩ་ཝ་སྶཾ, ན པ་ཉྩ་པཱུ་ལཱི ཨ་པ་ཉྩ་པཱུ་ལཱི, ན ས་ཏྟ་གོ་དཱ་ཝ་རཾ་ཨ་ས་ཏྟ་གོ་དཱ་ཝ་རཾ, ན ད་ས་ག་ཝཾ ཨ་ད་ས་ག་ཝཾ, ན པ་ཉྩ་ག་ཝཾ ཨ་པ་ཉྩ་ག་ཝཾ.
ཏ་པྤུ་རི་སཨི་ཙྩ་ནེ་ན ཀྭ་ཏྠོ? ཨ་ཏྟཾ ན་སྶ ཏ་པྤུ་རི་སེ.
༣༢༧. , ༣༥༡. ཨ་མཱ་ད་ཡོ པ་ར་པ་དེ་བྷི.
ཏཱ ཨ་མཱ་ད་ཡོ ནཱ་མེ་ཧི པ་ར་པ་དེ་བྷི ཡ་དཱ ས་མ་སྱ་ནྟེ, ཏ་དཱ སོ ས་མཱ་སོ ཏ་པྤུ་རི་སས་ཉྙོ ཧོ་ཏི.
བྷཱུ་མིཾ ག་ཏོ བྷཱུ་མི་ག་ཏོ, ས་བྦ་ར་ཏྟིཾ སོ་བྷ་ཎོ ས་བྦ་ར་ཏྟི་སོ་བྷ་ཎོ. ཨ་པཱ་ཡཾ ག་ཏོ ཨ་པཱ་ཡ་ག་ཏོ, ཨི་སྶ་རེ་ན ཀ་ཏཾ ཨི་སྶ་ར་ཀ་ཏཾ, ས་ལླེ་ན ཝི་དྡྷོ ས་ལླ་ཝི་དྡྷོ, ཀ་ཐི་ན་སྶ དུ་སྶཾ ཀ་ཐི་ན་དུ་སྶཾ, ཨཱ་ག་ནྟུ་ཀ་སྶ བྷ་ཏྟཾ ཨཱ་ག་ནྟུ་ཀ་བྷ་ཏྟཾ, མེ་ཐུ་ནཱ ཨ་པེ་ཏོ མེ་ཐུ་ནཱ་པེ་ཏོ, ཙོ་རཱ བྷ་ཡཾ ཙོ་ར་བྷ་ཡཾ, ར་ཉྙོ པུ་ཏྟོ རཱ་ཛ་པུ་ཏྟོ, དྷ་ཉྙཱ་ནཾ རཱ་སི དྷ་ཉྙ་རཱ་སི, རཱུ་པེ ས་ཉྙཱ རཱུ་པ་ས་ཉྙཱ, སཾ་སཱ་རེ དུ་ཀྑཾ སཾ་སཱ་ར་དུ་ཀྑཾ.
༣༢༨. , ༣༥༢. ཨ་ཉྙ་པ་ད་ཏྠེ་སུ བ་ཧུ་བྦཱི་ཧི.
ཨ་ཉྙེ་སཾ པ་དཱ་ནཾ ཨ་ཏྠེ་སུ དྭེ ནཱ་མཱ་ནི བ་ཧཱུ་ནི ནཱ་མཱ་ནི ཡ་དཱ ས་མ་སྱ་ནྟེ, ཏ་དཱ སོ ས་མཱ་སོ བ་ཧུ་བྦཱི་ཧི ས་ཉྙོ ཧོ་ཏི.
ཨཱ་ག་ཏཱ ས་མ་ཎཱ ཨི་མཾ ས་ངྒྷཱ་རཱ་མཾ སོ་ཡཾ ཨཱ་ག་ཏ་ས་མ་ཎོ, ས་ངྒྷཱ་རཱ་མོ. ཛི་ཏཱ་ནི ཨི་ནྡྲི་ཡཱ་ནི ཨ་ནེ་ན ས་མ་ཎེ་ན སོ་ཡཾ ཛི་ཏི་ནྡྲི་ཡོ, ས་མ་ཎོ. དི་ནྣོ སུ་ངྐོ ཡ་སྶ ར་ཉྙོ སོ་ཡཾ དི་ནྣ་སུ་ངྐོ, རཱ་ཛཱ. ནི་གྒ་ཏཱ ཛ་ནཱ ཨ་སྨཱ གཱ་མཱ སོ་ཡཾ ནི་གྒ་ཏ་ཛ་ནོ, གཱ་མོ. ཚི་ནྣོ ཧ་ཏྟོ ཡ་སྶ པུ་རི་ས་སྶ སོ་ཡཾ ཚི་ནྣ་ཧ་ཏྠོ, པུ་རི་སོ. ས་མྤ་ནྣཱ་ནི ས་སྶཱ་ནི ཡ་སྨིཾ ཛ་ན་པ་དེ སོ་ཡཾ ས་མྤ་ནྣ་ས་སྶོ, ཛ་ན་པ་དོ.
ནི་གྲོ་དྷ་སྶ པ་རི་མ་ཎྜ་ལོ ནི་གྲོ་དྷ་པ་རི་མ་ཎྜ་ལོ, ནི་གྲོ་དྷ་པ་རི་མ་ཎྜ་ལོ ཨི་ཝ པ་རི་མ་ཎྜ་ལོ ཡོ རཱ་ཛ་ཀུ་མཱ་རོ སོ་ཡཾ ནི་གྲོ་དྷ་པ་རི་མ་ཎྜ་ལོ. ཨ་ཐ ཝཱ ནི་གྲོ་དྷ་པ་རི་མ་ཎྜ་ལོ ཨི་ཝ པ་རི་མ་ཎྜ་ལོ ཡ་སྶ རཱ་ཛ་ཀུ་མཱ་ར་སྶ སོ་ཡཾ ནི་གྲོ་དྷ་པ་རི་མ་ཎྜ་ལོ, རཱ་ཛ་ཀུ་མཱ་རོ.
ཙ་ཀྑུ་ནོ བྷཱུ་ཏོ ཙ་ཀྑུ་བྷཱུ་ཏོ, ཙ་ཀྑུ་བྷཱུ་ཏོ ཨི་ཝ བྷཱུ་ཏོ ཡོ བྷ་ག་ཝཱ སོ་ཡཾ ཙ་ཀྑུ་བྷཱུ་ཏོ, བྷ་ག་ཝཱ.
སུ་ཝ་ཎྞ་སྶ ཝ་ཎྞོ སུ་ཝ་ཎྞ་ཝ་ཎྞོ, སུ་ཝ་ཎྞ་ཝ་ཎྞོ ཝི་ཡ ཝ་ཎྞོ ཡ་སྶ བྷ་ག་ཝ་ཏོ སོ་ཡཾ སུ་ཝ་ཎྞ་ཝ་ཎྞོ, བྷ་ག་ཝཱ.
བྲ་ཧྨུ་ནོ ས་རོ བྲ་ཧྨ་སྶ་རོ, བྲ་ཧྨ་སྶ་རོ ཝི་ཡ ས་རོ ཡ་སྶ བྷ་ག་ཝ་ཏོ སོ་ཡཾ བྲ་ཧྨ་སྶ་རོ, བྷ་ག་ཝཱ.
ས་ཡཾ པ་ཏི་ཏ པ་ཎྞ པུ་པྥ་ཕ་ལ་ཝཱ་ཡུ་ཏོ་ཡཱ་ཧཱ་རཱཏི པ་ཎྞ་ཉྩ པུ་པྥ་ཉྩ ཕ་ལ་ཉྩ པ་ཎྞ་པུ་པྥ་ཕ་ལཱ་ནི, ས་ཡ་མེ་ཝ པ་ཏི་ཏཱ་ནི ས་ཡཾ་པ་ཏི་ཏཱ་ནི, ས་ཡཾ་པ་ཏི་ཏཱ་ནི ཙ ཏཱ་ནི པ་ཎྞ་པུ་པྥ་ཕ་ལཱ་ནི ཙེ་ཏི ས་ཡཾ་པ་ཏི་ཏ་པ་ཎྞ་པུ་པྥ་ཕ་ལཱ་ནི ཝཱ་ཡུ ཙ ཏོ་ཡ་ཉྩ ཝཱ་ཡུ་ཏོ་ཡཱ་ནི, ས་ཡཾ་པ་ཏི་ཏ་པ་ཎྞ་པུ་པྥ་ཕ་ལཱ་ནི ཙ ཝཱ་ཡུ་ཏོ་ཡཱ་ནི ཙ ས་ཡཾ་པ་ཏི་ཏ་པ་ཎྞ་པུ་པྥ་ཕ་ལ་ཝཱ་ཡུ་ཏོ་ཡཱ་ནི. ས་ཡཾ་པ་ཏི་ཏ་པ་ཎྞ་པུ་པྥ་ཕ་ལ་ཝཱ་ཡུ་ཏོ་ཡཱ་ནི ཨཱ་ཧཱ་རཱ ཡེ་སཾ ཏེ ས་ཡཾ་པ་ཏི་ཏ་པ་ཎྞ་པུ་པྥ་ཕ་ལ་ཝཱ་ཡུ་ཏོ་ཡཱ་ཧཱ་རཱ, ཨི་ས་ཡོ. ཡ་མེ་ཏྠ ཝ་ཏྟ་བྦཾ, ཏཾ ཧེ་ཊྛཱ ཝུ་ཏྟ་མེ་ཝ. ཨ་ཡཾ པ་ན དྭ་ནྡ་ཀ་མྨ་དྷཱ་ར་ཡ་ག་བྦྷོ ཏུ་ལྱཱ་དྷི་ཀ་ར་ཎ་པ་ཧུ་བྦཱི་ཧི.
ཨ་ཐ ཝཱ – ས་ཡཾ་པ་ཏི་ཏ་པ་ཎྞ་པུ་པྥ་ཕ་ལ་ཝཱ་ཡུ་ཏོ་ཡེ་ཧི ཨཱ་ཧཱ་རཱ ཡེ་སཾ ཏེ ས་ཡཾ་པ་ཏི་ཏ་པ་ཎྞ་པུ་པྥ་ཕ་ལ་ཝཱ་ཡུ་ཏོ་ཡཱ་ཧཱ་རཱ. ཨ་ཡཾ པ་ན བྷི་ནྣཱ་དྷི་ཀ་ར་ཎ་བ་ཧུ་བྦཱི་ཧི.
ནཱ་ནཱ དུ་མ་པ་ཏི་ཏ པུ་པྥ་ཝཱ་སི་ཏ སཱ་ནཱུཏི ནཱ་ནཱ་པ་ཀཱ་རཱ དུ་མཱ ནཱ་ནཱ་དུ་མཱ, ནཱ་ནཱ་དུ་མེ་ཧི པ་ཏི་ཏཱ་ནི ནཱ་ནཱ་དུ་མ་པ་ཏི ཏཱ་ནི, ནཱ་ནཱ་དུ་མ་པ་ཏི་ཏཱ་ནི ཙ ཏཱ་ནི པུ་པྥཱ་ནི ཙེ་ཏི ནཱ་ནཱ་དུ་མ་པ་ཏི་ཏ་པུ་པྥཱ་ནི, ནཱ་ནཱ་དུ་མ་པ་ཏི་ཏ་པུ་པྥེ་ཧི ཝཱ་སི་ཏཱ ནཱ་ནཱ་དུ་མ་པ་ཏི་ཏ་པུ་པྥ་ཝཱ་སི་ཏཱ, ནཱ་ནཱ་དུ་མ་པ་ཏི་ཏ་པུ་པྥ་ཝཱ་སི་ཏཱ སཱ་ནཱུ ཡ་སྶ པ་བྦ་ཏ་རཱ་ཛ་སྶ སོ་ཡཾ ནཱ་ནཱ་དུ་མ་པ་ཏི་ཏ་པུ་པྥ་ཝཱ་སི་ཏ་སཱ་ནུ, པ་བྦ་ཏ་རཱ་ཛཱ. ཨ་ཡཾ པ་ན ཀ་མྨ་དྷཱ་ར་ཡ་ཏ་པྤུ་རི་ས་ག་བྦྷོ ཏུ་ལྱཱ་དྷི་ཀ་ར་ཎ་བ་ཧུ་བྦཱི་ཧི.
ཨ་ཐ ཝཱ – ཝཱ་སི་ཏཱ སཱ་ནཱུ ཝཱ་སི་ཏ་སཱ་ནུ, སཱ་པེ་ཀྑ་ཏྟེ ས་ཏི་པི ག་མ་ཀ་ཏྟཱ ས་མཱ་སོ. ནཱ་ནཱ་དུ་མ་པ་ཏི་ཏ་པུ་པྥེ་ཧི ཝཱ་སི་ཏ་སཱ་ནཱུ ཡ་སྶ པ་བྦ་ཏ་རཱ་ཛ་སྶ སོ་ཡཾ ནཱ་ནཱ་དུ་མ་པ་ཏི་ཏ་པུ་པྥ་ཝཱ་སི་ཏ་སཱ་ནུ, པ་བྦ་ཏ་རཱ་ཛཱ. ཨ་ཡཾ པ་ན བྷི་ནྣཱ་དྷི་ཀ་ར་ཎ་བ་ཧུ་བྦཱི་ཧི.
བྱཱ་ལ་མྦ་མྦུ་དྷ་ར་བི་ནྡུ་ཙུ་མྦི་ཏ་ཀཱུ་ཊོཏི ཨ་མྦུཾ དྷཱ་རེ་ཏཱི་ཏི ཨ་མྦུ་དྷ་རོ, ཀོ སོ? པ་ཛྫུ་ནྣོ. ཝི་ཝི་དྷཱ ཨཱ་ལ་མྦོ བྱཱ་ལ་མྦོ, བྱཱ་ལ་མྦོ ཙ སོ ཨ་མྦུ་དྷ་རོ ཙཱ་ཏི བྱཱ་ལ་མྦ་མྦུ་དྷ་རོ, བྱཱ་ལ་མྦ་མྦུ་དྷ་ར་སྶ བི་ནྡཱུ བྱཱ་ལ་མྦ་མྦུ་དྷ་ར་བི་ནྡཱུ, བྱཱ་ལ་མྦ་མྦུ་དྷ་ར་བི་ནྡཱུ་ཧི ཙུ་མྦི་ཏོ བྱཱ་ལ་མྦ་མྦུ་དྷ་ར་བི་ནྡུ་ཙུ་མྦི་ཏོ, བྱཱ་ལ་མྦ་མྦུ་རེ་བི་ནྡུ་ཙུ་མྦི་ཏོ ཀཱུ་ཊོ ཡ་སྶ པ་བྦ་ཏ་རཱ་ཛ་སྶ སོ་ཡཾ བྱཱ་ལ་མྦ་མྦུ་དྷ་ར་བི་ནྡུ་ཙུ་མྦི་ཏ་ཀཱུ་ཊོ. ཨ་ཡཾ པ་ན ཀ་མྨ་དྷཱ་ར་ཡ་ཏ་པྤུ་རི་ས་ག་བྦྷོ ཏུ་ལྱཱ་དྷི་ཀ་ར་ཎ་བ་ཧུ་བྦཱི་ཧི.
ཨ་ཐ ཝཱ – ཙུ་མྦི་ཏོ ཀཱུ་ཊོ ཙུ་མྦི་ཏ་ཀཱུ་ཊོ, སཱ་པེ་ཀྑ་ཏྟེ ས་ཏི་པི ག་མ་ཀ་ཏྟཱ ས་མཱ་སོ. བྱཱ་ལ་མྦ་མྦུ་དྷ་ར་བི་ནྡཱུ་ཧི ཙུ་མྦི་ཏ་ཀཱུ་ཊོ ཡ་སྶ པ་བྦ་ཏ་རཱ་ཛ་སྶ སོ་ཡཾ བྱཱ་ལ་མྦ་མྦུ་དྷ་ར་བི་ནྡུ་ཙུ་མྦི་ཏ་ཀཱུ་ཊོ. ཨ་ཡཾ པ་ན བྷི་ནྣཱ་དྷི་ཀ་ར་ཎ་བ་ཧུ་བྦཱི་ཧི.
ཨ་མི་ཏ བ་ལ པ་ར་ཀྐ་མ་ཛུ་ཏཱིཏི ན མི་ཏཱ ཨ་མི་ཏཱ, བ་ལ་ཉྩ པ་ར་ཀྐ་མོ ཙ ཛུ་ཏི ཙ བ་ལ་པ་ར་ཀྐ་མ་ཛུ་ཏི་ཡོ, ཨ་མི་ཏཱ བ་ལ་པ་ར་ཀྐ་མ་ཛུ་ཏི་ཡོ ཡ་སྶ སོ་ཡཾ ཨ་མི་ཏ་བ་ལ་པ་ར་ཀྐ་མ་ཛུ་ཏི, ཨ་ཡཾ པ་ན ཀ་མྨ་དྷཱ་ར་ཡ་དྭ་ནྡ་ག་བྦྷོ ཏུ་ལྱཱ་དྷི་ཀ་ར་ཎ་བ་ཧུ་བྦཱི་ཧི.
པཱི་ཎོ་ར་ཀྑཾ་ས བཱ་ཧཱུཏི ཨུ་རོ ཙ ཨ་ཀྑ་ཉྩ ཨཾ་སོ ཙ བཱ་ཧུ ཙ ཨུ་ར་ཀྑཾ་ས་བཱ་ཧ་ཝོ, པཱི་ཎཱ ཨུ་ར་ཀྑཾ་ས་བཱ་ཧ་ཝོ ཡ་སྶ བྷ་ག་ཝ་ཏོ སོ་ཡཾ པཱི་ཎོ་ར་ཀྑཾ་ས་བཱ་ཧུ. ཨ་ཡཾ པ་ན དྭ་ནྡ་ཝ་བྦྷོ ཏུ་ལྱཱ་དྷི་ཀ་ར་ཎ་བ་ཧུ་བྦཱི་ཧི.
པཱི་ཎ ག་ཎྜ ཝ་ད་ན ཐ་ནཱུ་རུ་ཛ་གྷ་ནཱཏི ག་ཎྜོ ཙ ཝ་ད་ན་ཉྩ ཐ་ནོ ཙ ཨཱུ་རུ ཙ ཛ་གྷ་ན་ཉྩ ག་ཎྜ་ཝ་ད་ན་ཐ་ནཱུ་རུ་ཛ་གྷ་ནཱ, པཱི་ཎཱ ག་ཎྜ་ཝ་ད་ན་ཐ་ནཱུ་རུ་ཛ་གྷ་ནཱ ཡ་སྶཱ སཱ་ཡཾ པཱི་ཎ་ག་ཎྜ་ཝ་ད་ན་ཐ་ནཱུ་རུ་ཛ་གྷ་ནཱ. ཨ་ཡ་མྤི དྭ་ནྡ་ག་བྦྷོ ཏུ་ལྱཱ་དྷི་ཀ་ར་ཎ་བ་ཧུ་བྦཱི་ཧི.
ཝ་ཝ་ར སུ་རཱ་སུ་ར ག་རུ་ཌ མ་ནུ་ཛ བྷུ་ཛ་ག ག་ནྡྷ་བྦ མ་ཀུ་ཊ ཀཱུ་ཊ ཙུ་མྦི་ཏ སེ་ལ་ས་ངྒྷ་ཊྚི་ཏ ཙ་ར་ཎོཏི སུ་རཱ ཙ ཨ་སུ་རཱ ཙ ག་རུ་ཌཱ ཙ མ་ནུ་ཛཱ ཙ བྷུ་ཛ་གཱ ཙ ག་ནྡྷ་བྦཱ ཙ སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦཱ, པ་ཝ་རཱ ཙ ཏེ སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག ག་ནྡྷ་བྦཱ ཙེ་ཏི པ་ཝ་ར་སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦཱ, པ་ཝ་ར་སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦཱ་ནཾ མ་ཀུ་ཊཱ་ནི པ་ཝ་ར་སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦ་མ་ཀུ་ཊཱ་ནི, པ་ཝ་ར་སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦ་མ་ཀུ་ཊཱ་ནཾ ཀཱུ་ཊཱ་ནི པ་ཝ་ར་སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦ་མ་ཀུ་ཊ་ཀཱུ་ཊཱ་ནི, པ་ཝ་ར་སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦ་མ་ཀུ་ཊ་ཀཱུ་ཊེ་སུ ཙུ་མྦི་ཏཱ པ་ཝ་ར་སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦ་མ་ཀུ་ཊ་ཀཱུ་ཊ་ཙུ་མྦི་ཏཱ, པ་ཝ་ར་སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦ་མ་ཀུ་ཊ་ཀཱུ་ཊ་ཙུ་མྦི་ཏཱ ཙ ཏེ སེ་ལཱ ཙཱ་ཏི པ་ཝ་ར་སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦ་མ་ཀུ་ཊ་ཀཱུ་ཊ་ཙུ་མྦི་ཏ་སེ་ལཱ, པ་ཝ་ར་སུ་རཱ་སུ་ར ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦ་མ་ཀུ་ཊ་ཀཱུ་ཊ་ཙུ་མྦི་ཏ་སེ་ལེ་ཧི ས་ངྒྷ་ཊྚི་ཏཱ པ་ཝ་ར་སུ་རཱ་སུ་ར ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦ་མ་ཀུ་ཊ་ཀཱུ་ཊ་ཙུ་མྦི་ཏ་སེ་ལ་ས་ངྒྷ་ཊྚི་ཏཱ, པ་ཝ་ར་སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦ་མ་ཀུ་ཊ་ཀཱུ་ཊ་ཙུ་མྦི་ཏ་སེ་ལ་ས་ངྒྷ་ཊྚི་ཏཱ ཙ་ར་ཎཱ ཡ་སྶ ཏ་ཐཱ་ག་ཏ་སྶ སོ་ཡཾ པ་ཝ་ར་སུ་རཱ་སུ་ར་ག་རུ་ཌ་མ་ནུ་ཛ་བྷུ་ཛ་ག་ག་ནྡྷ་བྦ་མ་ཀུ་ཊ་ཀཱུ་ཊ་ཙུ་མྦི་ཏ་སེ་ལ་ས་ངྒྷ་ཊྚི་ཏ་ཙ་ར་ཎོ, ཏ་ཐཱ་ག་ཏོ, ཨ་ཡཾ པ་ན དྭ་ནྡ་ཀ་མྨ་དྷཱ་ར་ཡ་ཏ་པྤུ་རི་ས་ག་བྦྷོ ཏུ་ལྱཱ་དྷི་ཀ་ར་ཎ་བ་ཧུ་བྦཱི་ཧི.
ཨ་ཐ ཝཱ–ས་ངྒྷ་ཊྚི་ཏཱ ཙ་ར་ཎཱ ས་ངྒྷ་ཊྚི་ཏ་ཙ་ར་ཎཱ, སཱ་པེ་ཀྑ་ཏྟེ ས་ཏི་པི ག་མ་ཀ་ཏྟཱ ས་མཱ་སོ. པ་ཝ་ར་སུ་རཱ་སུ་ར ག་རུ་ཌ་མ་ནུ་ཛ་བྷུ་ཛ་ག ག་ནྡྷ་བྦ་མ་ཀུ་ཊ་ཀཱུ་ཊ་ཙུ་མྦི་ཏ་སེ་ལེ་ཧི ས་ངྒྷ་ཊྚི་ཏ་ཙ་ར་ཎཱ ཡ་སྶ ཏ་ཐཱ་ག་ཏ་སྶ སོ་ཡཾ པ་ཝ་ར་སུ་རཱ་སུ་ར་ག་རུ་ཌ མ་ནུ་ཛ་བྷུ་ཛ་ག ག་ནྡྷ་བྦ་མ་ཀུ་ཊ་ཀཱུ་ཊ་ཙུ་མྦི་ཏ་སེ་ལ་ས་ངྒྷ་ཊྚི་ཏ ཙ་ར་ཎོ. ཨ་ཡཾ པ་ན བྷི་ནྣཱ་དྷི་ཀ་ར་ཎ་བ་ཧུ་བྦཱི་ཧི.
ཙ་ཏུ་དྡི་སོཏི ཙ་ཏ་སྶོ དི་སཱ ཡ་སྶ སོ་ཡཾ ཙ་ཏུ་དྡི་སོ, བྷ་ག་ཝཱ.
པ་ཉྩ་ཙ་ཀྑཱུཏི པ་ཉྩ ཙ་ཀྑཱུ་ནི ཡ་སྶ ཏ་ཐཱ་ག་ཏ་སྶ སོ་ཡཾ པ་ཉྩ་ཙ་ཀྑུ, ཏ་ཐཱ་ག་ཏོ.
ད་ས་བ་ལོཏི ད་ས བ་ལཱ་ནི ཡ་སྶ སོ་ཡཾ ད་ས་བ་ལོ, བྷ་ག་ཝཱ.
ཨ་ན་ནྟ་ཉཱ་ཎོཏི ན་སྶ ཨ་ནྟོ ཨ་ན་ནྟཾ, ཨ་ན་ནྟཾ ཉཱ་ཎཾ ཡ་སྶ ཏ་ཐཱ་ག་ཏ་སྶ སོ་ཡཾ ཨ་ན་ནྟ་ཉཱ་ཎོ, ཏ་ཐཱ་ག་ཏོ.
ཨ་མི་ཏ གྷ་ན ས་རཱི་རོཏི ན མི་ཏཾ ཨ་མི་ཏཾ, གྷ་ནཾ ཨེ་ཝ ས་རཱི་རཾ གྷ་ན་ས་རཱི་རཾ, ཨ་མི་ཏཾ གྷ་ན་ས་རཱི་རཾ ཡ་སྶ ཏ་ཐཱ་ག་ཏ་སྶ སོ་ཡཾ ཨ་མི་ཏ་གྷ་ན་ས་རཱི་རོ, ཏ་ཐཱ་ག་ཏོ.
ཨ་མི་ཏ བ་ལ པ་ར་ཀྐ་མ པ་ཏྟོཏི ན མི་ཏཱ ཨ་མི་ཏཱ, བ་ལ་ཉྩ པ་ར་ཀྐ་མོ ཙ བ་ལ་པ་ར་ཀྐ་མཱ, ཨ་མི་ཏཱ ཨེ་ཝ བ་ལ་པ་ར་ཀྐ་མཱ ཨ་མི་ཏ་བ་ལ་པ་ར་ཀྐ་མཱ, ཨ་མི་ཏ་བ་ལ་པ་ར་ཀྐ་མཱ པ་ཏྟཱ ཡེ་ན སོ་ཡཾ ཨ་མི་ཏ་བ་ལ་པ་ར་ཀྐ་མ་པ་ཏྟོ, བྷ་ག་ཝཱ. ཨ་ཡཾ པ་ན ཀ་མྨ་དྷཱ་ར་ཡ་དྭ་ནྡ་ག་བྦྷོ ཏུ་ལྱཱ་དྷི་ཀ་ར་ཎ་བ་ཧུ་བྦཱི་ཧི.
མ་ཏྟ བྷ་མ་ར ག་ཎ ཙུ་མྦི་ཏ ཝི་ཀ་སི་ཏ་པུ་པྥ་ཝ་ལླི་ནཱ་ག་རུ་ཀྑོ པ་སོ་བྷི་ཏ ཀ་ནྡ་རོཏི མ་ཏྟཱ ཨེ་ཝ བྷ་མ་རཱ མ་ཏྟ་བྷ་མ་རཱ, མ་ཏྟ་བྷ་མ་རཱ་ནཾ ག་ཎཱ མ་ཏྟ་བྷ་མ་ར་ག་ཎཱ, མ་ཏྟ་བྷ་མ་ར་ག་ཎེ་ཧི ཙུ་མྦི་ཏཱ་ནི མ་ཏྟ་བྷ་མ་ར་ཎ་ཙུ་མྦི་ཏཱ་ནི, ཝི་ཀ་སི་ཏཱ་ནི ཨེ་ཝ པུ་པྥཱ་ནི ཝི་ཀ་སི་ཏ་པུ་པྥཱ་ནི, མ་ཏྟ་བྷ་མ་ར་ག་ཎ་ཙུ་མྦི་ཏཱ་ནི ཝི་ཀ་སི་ཏ་པུ་པྥཱ་ནི ཡེ་སཾ ཏེ་ཧི མ་ཏྟ་བྷ་མ་ར་ག་ཎ་ཙུ་མྦི་ཏ་ཝི་ཀ་སི་ཏ་པུ་པྥཱ, ཝ་ལླི ཙ ནཱ་ག་རུ་ཀྑོ ཙ མ་ལླི་ནཱ་ག་རུ་ཀྑཱ, མ་ཏྟ་བྷ་མ་ར་ག་ཎ་ཙུ་མྦི་ཏ་ཝི་ཀ་སི་ཏ་པུ་པྥཱ ཙ ཏེ ཝ་ལླི་ནཱ་ག་རུ་ཀྑཱ ཙེ་ཏི མ་ཏྟ་བྷ་མ་ར་ག་ཎ་ཙུ་མྦི་ཏ་ཝི་ཀ་སི་ཏ་པུ་པྥ་ཝ་ལླི་ནཱ་ག་རུ་ཀྑཱ, མ་ཏྟ་བྷ་མ་ར་ག་ཎ་ཙུ་མྦི་ཏ་ཝི་ཀ་སི་ཏ་པུ་པྥ་ཝ་ལླི་ནཱ་ག་རུ་ཀྑེ་ཧི ཨུ་པ་སོ་བྷི་ཏཱ་ནི མ་ཏྟ་བྷ་མ་ར་ག་ཎ་ཙུ་མྦི་ཏ་ཝི་ཀ་སི་ཏ་པུ་པྥ་ཝ་ལླི་ནཱ་ག་རུ་ཀྑོ པ་སོ་བྷི་ཏཱ་ནི, མ་ཏྟ་བྷ་མ་ར་ག་ཎ་ཙུ་མྦི་ཏ་ཝི་ཀ་སི་ཏ་པུ་པྥ་ཝ་ལླི་ནཱ་ག་རུ་ཀྑོ པ་སོ་བྷི་ཏཱ་ནི ཀ་ནྡ་རཱ་ནི ཡ་སྶ པ་བྦ་ཏ་རཱ་ཛ་སྶ སོ་ཡཾ མ་ཏྟ་བྷ་མ་ར་ག་ཎ་ཙུ་མྦི་ཏ་ཝི་ཀ་སི་ཏ་པུ་པྥ ཝ་ལླི་ནཱ་ག་རུ་ཀྑོ པ་སོ བྷི་ཏ་ཀ་ནྡ་རོ, པ་བྦ་ཏ་རཱ་ཛཱ. ཨ་ཡཾ པ་ན དྭ་ནྡ་ཀ་མྨ་དྷཱ་ར་ཡ་ཏ་པྤུ་རི་ས་ག་བྦྷོ ཏུ་ལྱཱ་དྷི་ཀ་ར་ཎ་བ་ཧུ་བྦཱི་ཧི.
ཨ་ཐ ཝཱ–ཨུ་པ་སོ་བྷི་ཏཱ་ནི ཀ་ནྡ་རཱ་ནི ཨུ་པ་སོ་བྷི་ཏ་ཀ་ནྡ་རཱ་ནི, སཱ་པེ་ཀྑ་ཏྟེ ས་ཏི་པི ག་མ་ཀ་ཏྟཱ ས་མཱ་སོ. མ་ཏྟ་བྷ་མ་ར་ག་ཎ་ཙུ་མྦི་ཏ་ཝི་ཀ་སི་ཏ་པུ་པྥ་ཝ་ལླི་ནཱ་ག་རུ་ཀྑེ་ཧི ཨུ་པ་སོ་བྷི་ཏ་ཀ་ནྡ་རཱ་ནི ཡ་སྶ པ་བྦ་ཏ་རཱ་ཛ་སྶ སོ་ཡཾ མ་ཏྟ་བྷ་མ་ར་ག་ཎ་ཙུ་མྦི་ཏ་ཝི་ཀ་སི་ཏ་པུ་པྥ་ཝ་ལླི་ནཱ་ག་རུ་ཀྑོ པ་སོ་བྷི་ཏ་ཀ་ནྡ་རོ, པ་བྦ་ཏ་རཱ་ཛཱ. ཨ་ཡཾ པ་ན བྷི་ནྣཱ་དྷི་ཀ་ར་ཎ་བ་ཧུ་བྦཱི་ཧི.
ནཱ་ནཱ རུ་ཀྑ ཏི་ཎ པ་ཏི་ཏ པུ་པྥོ་པ་སོ་བྷི་ཏ ཀ་ནྡ་རོཏི རུ་ཀྑོ ཙ ཏི་ཎ་ཉྩ རུ་ཀྑ་ཏི་ཎཱ་ནི, ནཱ་ནཱ པ་ཀཱ་རཱ་ནི ཨེ་ཝ རུ་ཀྑ་ཏི་ཎཱ་ནི ནཱ་ནཱ་རུ་ཀྑ་ཏི་ཎཱ་ནི, ནཱ་ནཱ་རུ་ཀྑ་ཏི་ཎེ་ཧི པ་ཏི་ཏཱ་ནི ནཱ་ནཱ་རུ་ཀྑ་ཏི་ཎ་པ་ཏི་ཏཱ་ནི, ནཱ་ནཱ་རུ་ཀྑ་ཏི་ཎ་པ་ཏི་ཏཱ་ནི ཙ ཏཱ་ནི པུ་པྥཱ་ནི ཙེ་ཏི ནཱ་ནཱ་རུ་ཀྑ་ཏི་ཎ་པ་ཏི་ཏ་པུ་པྥཱ་ནི, ནཱ་ནཱ་རུ་ཀྑ་ཏི་ཎ་པ་ཏི་ཏ་པུ་པྥེ་ཧི ཨུ་པ་སོ་བྷི་ཏཱ་ནི ནཱ་ནཱ་རུ་ཀྑ་ཏི་ཎ་པ་ཏི་ཏ པུ་པྥོ་པ་སོ་བྷི་ཏཱ་ནི, ནཱ་ནཱ་རུ་ཀྑ་ཏི་ཎ་པ་ཏི་ཏ་པུ་པྥོ་པ་སོ་བྷི་ཏཱ་ནི ཀ་ནྡ་རཱ་ནི ཡ་སྶ པ་བྦ་ཏ་རཱ་ཛ་སྶ སོ་ཡཾ ནཱ་ནཱ་རུ་ཀྑ་ཏི་ཎ་པ་ཏི་ཏ་པུ་པྥོ་པ་སོ་བྷི་ཏ་ཀ་ནྡ་རོ, པ་བྦ་ཏ་རཱ་ཛཱ. ཨ་ཡཾ པ་ན དྭ་ནྡ་ཀ་མྨ་དྷཱ་ར་ཡ་ཏ་པྤུ་རི་ས་ག་བྦྷོ ཏུ་ལྱཱ་དྷི་ཀ་ར་ཎ་བ་ཧུ་བྦཱི་ཧི.
ཨ་ཐ ཝཱ–ཨུ་པ་སོ་བྷི་ཏཱ་ནི ཨེ་ཝ ཀ་ནྡ་རཱ་ནི ཨུ་པ་སོ་བྷི་ཏ་ཀ་ནྡ་རཱ་ནི, (སཱ་པེ་ཀྑ་ཏྟེ ས་ཏི་པི ག་མ་ཀ་ཏྟཱ ས་མཱ་སོ.) ནཱ་ནཱ་རུ་ཀྑ་ཏི་ཎ་པ་ཏི་ཏ་པུ་པྥེ་ཧི ཨུ་པ་སོ་བྷི་ཏ་ཀ་ནྡ་རཱ་ནི ཡ་སྶ པ་བྦ་ཏ་རཱ་ཛ་སྶ སོ་ཡཾ ནཱ་ནཱ་རུ་ཀྑ་ཏི་ཎ་པ་ཏི་ཏ་པུ་པྥོ་པ་སོ་བྷི་ཏ་ཀ་ནྡ་རོ, པ་བྦ་ཏ་རཱ་ཛཱ. ཨ་ཡཾ པ་ན བྷི་ནྣཱ་དྷི་ཀ་ར་ཎ་བ་ཧུ་བྦཱི་ཧི.
ནཱ་ནཱ མུ་ས་ལ ཕཱ་ལ པ་བྦ་ཏ ཏ་རུ ཀ་ལི་ངྒ་ར ས་ར དྷ་ནུ་ག་དཱ་སི ཏོ་མ་ར་ཧ་ཏྠཱཏི མུ་ས་ལོ ཙ ཕཱ་ལོ ཙ པ་བྦ་ཏོ ཙ ཏ་རུ ཙ ཀ་ལི་ངྒ་རོ ཙ ས་རོ ཙ དྷ་ནུ ཙ ག་དཱ ཙ་ཨ་སི ཙ ཏོ་མ་རོ, ཙ མུ་ས་ལ་ཕཱ་ལ་པ་བྦ་ཏ་ཏ་རུ་ཀ་ལི་ངྒ་ར་ས་ར་དྷ་ནུ་ག་དཱ་སི་ཏོ་མ་རཱ, ནཱ་ནཱ པ་ཀཱ་རཱ ཨེ་ཝ མུ་ས་ལ་ཕཱ་ལ་པ་བྦ་ཏ་ཏ་རུ་ཀ་ལི་ངྒ་ར་ས་ར་དྷ་ནུ་ག་དཱ་སི་ཏོ་མ་རཱ ནཱ་ནཱ་མུ་ས་ལ་ཕཱ་ལ་པ་བྦ་ཏ་ཏ་རུ་ཀ་ལི་ངྒ་ར་ས་ར་དྷ་ནུ་ག་དཱ་སི་ཏོ་མ་རཱ, ནཱ་ནཱ་མུ་ས་ལ་ཕཱ་ལ་པ་བྦ་ཏ་ཏ་རུ་ཀ་ལི་ངྒ་ར་ས་ར་དྷ་ནུ་ག་དཱ་སི་ཏོ་མ་རཱ ཧ་ཏྠེ་སུ ཡེ་སཾ ཏེ ནཱ་ནཱ་མུ་ས་ལ་ཕཱ་ལ་པ་བྦ་ཏ་ཏ་རུ་ཀ་ལི་ངྒ་ར ས་ར་དྷ་ནུ་ག་དཱ་སི་ཏོ་མ་ར་ཧ་ཏྠཱ. ཨ་ཡཾ པ་ན དྭ་ནྡ་ཀ་མྨ་དྷཱ་ར་ཡ་ག་བྦྷོ བྷི་ནྣཱ་དྷི་ཀ་ར་ཎ་བ་ཧུ་བྦཱི་ཧི.
བ་ཧུ་བྦཱི་ཧི ཨི་ཙྩ་ནེ་ན ཀྭ་ཏྠོ? བ་ཧུ་བྦཱི་ཧི་མྷི ཙ.
༣༢༩. , ༣༥༧. ནཱ་མཱ་ནཾ ས་མུ་ཙྩ་ཡོ དྭ་ནྡོ.
ནཱ་མཱ་ནཾ ཨེ་ཀ་ཝི་བྷ་ཏྟི་ཀཱ་ནཾ ཡོ ས་མུ་ཙྩ་ཡོ, སོ དྭ་ནྡ་ས་ཉྙོ ཧོ་ཏི.
ཙ་ནྡི་མཱ ཙ སཱུ་རི་ཡོ ཙ ཙ་ནྡི་མ་སཱུ་རི་ཡཱ, ས་མ་ཎོ ཙ བྲཱ་ཧྨ་ཎོ ཙ ས་མ་ཎ་བྲཱ་ཧྨ་ཎཱ, སཱ་རི་པུ་ཏྟོ ཙ མོ་གྒ་ལླཱ་ནོ ཙ སཱ་རི་པུ་ཏྟ་མོ་གྒ་ལླཱ་ནཱ, བྲཱ་ཧྨ་ཎོ ཙ ག་ཧ་པ་ཏི་ཀོ ཙ བྲཱ་ཧྨ་ཎ་ག་ཧ་པ་ཏི་ཀཱ, ཡ་མོ ཙ ཝ་རུ་ཎོ ཙ ཡ་མ་ཝ་རུ་ཎཱ, ཀུ་ཝེ་རོ ཙ ཝཱ་ས་ཝོ ཙ ཀུ་ཝེ་ར་ཝཱ་ས་ཝཱ.
དྭ་ནྡཨི་ཙྩ་ནེ་ན ཀྭ་ཏྠོ? དྭ་ནྡ་ཊྛཱ ཝཱ.
༣༣༠. , ༣༤༠. མ་ཧ་ཏཾ མ་ཧཱ ཏུ་ལྱཱ་དྷི་ཀ་ར་ཎེ པ་དེ.
ཏེ་སཾ མ་ཧ་ནྟས་དྡཱ་ནཾ མ་ཧཱཨཱ་དེ་སོ ཧོ་ཏི ཏུ་ལྱཱ་དྷི་ཀ་ར་ཎེ པ་དེ.
མ་ཧ་ནྟོ ཙ སོ པུ་རི་སོ ཙཱ་ཏི མ་ཧཱ་པུ་རི་སོ, མ་ཧ་ནྟཱི ཙ སཱ དེ་ཝཱི ཙཱ་ཏི མ་ཧཱ་དེ་ཝཱི, མ་ཧ་ནྟ་ཉྩ ཏཾ བ་ལ་ཉྩཱ་ཏི མ་ཧཱ་བ་ལཾ, མ་ཧ་ནྟོ ཙ སོ ནཱ་གོ ཙཱ་ཏི མ་ཧཱ་ནཱ་གོ, མ་ཧ་ནྟོ ཙ སོ ཡ་སོ ཙཱ་ཏི མ་ཧཱ་ཡ་སོ, མ་ཧ་ནྟ་ཉྩ ཏཾ པ་དུ་མ་ཝ་ན་ཉྩཱ་ཏི མ་ཧཱ་པ་དུ་མ་ཝ་ནཾ, མ་ཧ་ནྟཱི ཙ སཱ ན་དཱི ཙཱ་ཏི མ་ཧཱ་ན་དཱི, མ་ཧ་ནྟོ ཙ སོ མ་ཎི ཙཱ་ཏི མ་ཧཱ་མ་ཎི, མ་ཧ་ནྟོ ཙ སོ ག་ཧ་པ་ཏི་ཀོ ཙཱ་ཏི མ་ཧཱ་ག་ཧ་པ་ཏི་ཀོ, མ་ཧ་ནྟ་ཉྩ ཏཾ དྷ་ན་ཉྩཱ་ཏི མ་ཧཱ་དྷ་ནཾ, མ་ཧ་ནྟོ ཙ སོ པུ་ཉྙོ ཙཱ་ཏི མ་ཧཱ་པུ་ཉྙོ.
བ་ཧུ་ཝ་ཙ་ན་གྒ་ཧ་ཎེ་ན ཀྭ་ཙི མ་ཧ་ནྟ ས་དྡ་སྶ མ་ཧཱདེ་སོ ཧོ་ཏི. མ་ཧ་ནྟ་ཉྩ ཏཾ ཕ་ལ་ཉྩཱ་ཏི མ་ཧ་པྥ་ལཾ, མ་ཧ་བྦ་ལཾ, ཨེ་ཝཾ མ་ཧ་དྡྷ་ནཾ, མ་ཧ་བྦྷ་ཡཾ.
༣༣༡. , ༣༥༣. ཨི་ཏྠི་ཡཾ བྷཱ་སི་ཏ་པུ་མི་ཏྠཱི པུ་མཱ་ཝ ཙེ.
ཨི་ཏྠི་ཡཾ ཏུ་ལྱཱ་དྷི་ཀ་ར་ཎེ པ་དེ ཙེ བྷཱ་སི་ཏ་པུ་མི་ཏྠཱི པུ་མཱ་ཝ ད་ཊྛ་བྦཱ.
དཱི་གྷཱ ཛ་ངྒྷཱ ཡ་སྶ སོ་ཡཾ དཱི་གྷ་ཛ་ངྒྷོ, ཀ་ལྱཱ་ཎ་བྷ་རི་ཡོ, པ་ཧཱུ་ཏ་པ་ཉྙོ.
བྷཱ་སི་ཏ་པུ་པེཏི ཀི་མ་ཏྠཾ? བྲཱ་ཧྨ་ཎ་བ་ནྡྷུ ཙ སཱ བྷ་རི་ཡཱ ཙཱ་ཏི་བྲཱ་ཧྨ་ཎ་བ་ནྡྷུ་བྷ་རི་ཡཱ.
༣༣༢. , ༣༤༣. ཀ་མྨ་དྷཱ་ར་ཡ་ས་ཉྙེ ཙ.
ཀ་མྨ་དྷཱ་ར་ཡ་ས་ཉྙེ ཙ ས་མཱ་སེ ཨི་ཏྠི་ཡཾ ཏུ་ལྱཱ་དྷི་ཀ་ར་ཎེ པ་དེ པུ་བྦེ བྷཱ་སི་ཏ་པུ་མི་ཏྠཱི ཙེ, པུ་མཱ་ཝ ད་ཊྛ་བྦཱ. བྲཱ་ཧྨ་ཎ་དཱ་རི་ཀཱ, ཁ་ཏྟི་ཡ་ཀ་ཉྙཱ, ཁ་ཏྟི་ཡ་ཀུ་མཱ་རི་ཀཱ.
བྷཱ་སི་ཏ་པུ་མེཏི ཀི་མ་ཏྠཾ? ཁ་ཏྟི་ཡ་བ་ནྡྷུ་དཱ་རི་ཀཱ, བྲཱ་ཧྨ་ཎ་བ་ནྡྷུ་དཱ་རི་ཀཱ.
༣༣༣. , ༣༤༤. ཨ་ཏྟཾ ན་སྶ ཏ་པྤུ་རི་སེ.
ན་སྶ པ་ད་སྶ ཏ་པྤུ་རི་སེ ཨུ་ཏྟ་ར་པ་དེ ཨ་ཏྟཾ ཧོ་ཏི.
ན་བྲཱ་ཧྨ་ཎོ ཨ་བྲཱ་ཧྨ་ཎོ, ཨ་ཝ་ས་ལོ, ཨ་བྷི་ཀྑུ, ཨ་པ་ཉྩ་ཝ་སྶཾ, ཨ་པ་ཉྩ་ག་ཝཾ.
༣༣༤. , ༣༤༥. ས་རེ ཨ་ན.
ན་སྶ པ་ད་སྶ ཏ་པྤུ་རི་སེ ཨ་ན ཨཱ་དེ་སོ ཧོ་ཏི ས་རེ པ་རེ.
ན ཨ་སྶོ ཨ་ན་སྶོ, ཨ་ནི་སྶ་རོ, ཨ་ན་རི་ཡོ.
༣༣༥. , ༣༤༦. ཀ་ད ཀུ་སྶ.
ཀུཨི་ཙྩེ་ཏ་སྶ ཀ་ད ཧོ་ཏི ས་རེ པ་རེ.
ཀུ་ཙྪི་ཏཾ ཨ་ནྣཾ ཀ་ད་ནྣཾ, ཀུ་ཙྪི་ཏཾ ཨ་ས་ནཾ ཀ་ད་སྶ་ནཾ.
ས་རེཏི ཀི་མ་ཏྠཾ? ཀུ་ཙྪི་ཏཱ དཱ་རཱ ཡེ་སཾ (ཨ་པུ་ཉྙ་ཀཱ་རཱ་ནཾ) ཏེ ཧོ་ནྟཱི་ཏི ཀུ་དཱ་རཱ, ཀུ་ཛ་ནཱ. ཨེ་ཝཾ ཀུ་པུ་ཏྟཱ, ཀུ་གེ་ཧཱ, ཀུ་ཝ་ཏྠཱ, ཀུ་དཱ་སཱ.
༣༣༦. , ༣༤༧. ཀཱ’པྤ་ཏྠེ་སུ ཙ.
ཀུཨི་ཙྩེ་ཏ་སྶ ཀཱ ཧོ་ཏི ཨ་པྤ་ཏྠེ་སུ ཙ.
ཀཱ་ལ་ཝ་ཎཾ, ཀཱ་པུ་པྥཾ.
བ་ཧུ་ཝ་ཙ་ནགྒ་ཧ་ཎཾ ཀི་མ་ཏྠཾ? ཀུཨི་ཙྩེ་ཏ་སྶ ཨ་ན་པྤ་ཏ་ཏྠེ་སུ་པི ཀྭ་ཙི ཀཱ ཧོ་ཏི, ཀཱ་པུ་རི་སཱ.
༣༣༧. , ༣༥༠. ཀྭ་ཙི ས་མཱ་ས་ནྟ་ག་ཏཱ་ན་མ་ཀཱ་ར་ནྟོ.
ས་མཱ་ས་ནྟ་ག་ཏཱ་ནཾ ནཱ་མཱ་ན་མ་ནྟོ ས་རོ ཀྭ་ཙི ཨཀཱ་རོ ཧོ་ཏི.
དེ་ཝཱ་ནཾ རཱ་ཛཱ དེ་ཝ་རཱ་ཛོ, དེ་ཝ་རཱ་ཛཱ, དེ་ཝཱ་ནཾ ས་ཁཱ དེ་ཝ་ས་ཁོ, དེ་ཝ་ས་ཁཱ, པ་ཉྩ ཨ་ཧཱ་ནི པ་ཉྩཱ་ཧཾ, ས་ཏྟཱ་ཧཾ, པ་ཉྩ་ག་ཝཾ, ཚ་ཏྟུ་པཱ་ཧ་ནཾ, ཨུ་པ་ས་ར་དཾ, ཝི་སཱ་ལ་ཀྑོ, ཝི་མུ་ཁོ.
ཀཱ་རགྒ་ཧ་ཎཾ ཀི་མ་ཏྠཾ? ཨཱཀཱ་ར་ནྟ ཨི་ཀཱ་ར་ནྟཱ ཙ ཧོ་ནྟི, པ་ཙྩ་ཀྑཱ དྷ་མྨཱ ཡ་སྶ སོ་ཡ་ནྟི པ་ཙྩ་ཀྑ་དྷ་མྨཱ, སུ་ར་བྷི་ནོ ག་ནྡྷོ སུ་ར་བྷི་ག་ནྡྷི, སུ་ནྡ་རོ ག་ནྡྷོ སུ་ག་ནྡྷི, པཱུ་ཏི་ནོ ག་ནྡྷོ པཱུ་ཏི་ག་ནྡྷི, ཀུ་ཙྪི་ཏོ ག་ནྡྷོ ཀུ་ག་ནྡྷི, དུ་ཊྛུ ག་ནྡྷོ ཡ་སྶ སོ་ཡ་ནྟི དུ་ག་ནྡྷི, པཱུ་ཏི ཨེ་ཝ ག་ནྡྷོ པཱུ་ཏི་ག་ནྡྷི.
ན་དཱིཨ་ནྟཱ ཙ ཀ་ཏྟུཨ་ནྟཱ ཙ ཀཔ་ཙྩ་ཡོ ཧོ་ཏི ས་མཱ་ས་ནྟེ.
བ་ཧཱུ ན་དི་ཡོ ཡ་སྨིཾ སོ་ཡཾ བ་ཧུ་ན་དི་ཀོ, ཛ་ན་པ་དོ. བ་ཧ་ཝོ ཀ་ཏྟཱ་རོ ཡ་སྶ སོ་ཡཾ བ་ཧུ་ཀ་ཏྟུ་ཀོ, པུ་རི་སོ.
༣༣༨. , ༣༥༦. ན་དི་མྷཱ ཙ.
ན་དིམྷཱ ཙ ཀཔ་ཙྩ་ཡོ ཧོ་ཏི ས་མཱ་ས་ནྟེ.
བ་ཧཱུ ན་དི་ཡོ ཡ་སྨིཾ སོ་ཡ་ནྟི བ་ཧུ་ན་དི་ཀོ. བ་ཧཱུ ཀ་ནྟི་ཡོ ཡ་སྶ སོ་ཡ་ནྟི བ་ཧུ་ཀ་ནྟི་ཀོ. བ་ཧུ་ནཱ་རི་ཀོ.
༣༣༩. , ༣༥༨. ཛཱ་ཡཱ་ཡ ཏུ་དཾ ཛཱ་ནི པ་ཏི་མྷི.
ཛཱ་ཡཱཨི་ཙྩེ་ཏཱ་ཡ ཏུ་དཾ ཛཱ་ནིཨི་ཙྩེ་ཏེ ཨཱ་དེ་སཱ ཧོ་ནྟི པ་ཏིམྷི པ་རེ.
ཏུ་དཾ་པ་ཏཱི, ཛཱ་ནི་པ་ཏཱི.
༣༤༠. , ༣༥༥. དྷ་ནུ་མྷཱ ཙ.
དྷ་ནུམྷཱ ཙ ཨཱཔ་ཙྩ་ཡོ ཧོ་ཏི ས་མཱ་ས་ནྟེ.
གཱ་ཎྜཱི་ཝོ དྷ་ནུ ཡ་སྶ སོ་ཡཾ གཱ་ཎྜཱི་ཝ་དྷ་ནྭཱ.
༣༤༡. , ༣༣༦. ཨཾ ཝི་བྷ་ཏྟཱི་ན་མ་ཀཱ་ར་ནྟཱ ཨ་བྱ་ཡཱི་བྷཱ་ཝཱ.
ཏ་སྨཱ ཨཀཱ་ར་ནྟཱ ཨ་བྱ་ཡཱི་བྷཱ་ཝ་ས་མཱ་སཱ པ་རཱ་སཾ ཝི་བྷ་ཏྟཱི་ནཾ ཀྭ་ཙི ཨཾ ཧོ་ཏི.
ཨ་དྷི་ཙི་ཏྟཾ, ཡ་ཐཱ་ཝུ་ཌྜྷཾ, ཨུ་པ་ཀུ་མྦྷཾ, ཡཱ་ཝ་ཛཱི་ཝཾ, ཏི་རོ་པ་བྦ་ཏཾ, ཏི་རོ་པཱ་ཀཱ་རཾ, ཏི་རོ་ཀུ་ཊྚཾ, ཨ་ནྟོ་པཱ་སཱ་དཾ.
ཀྭ་ཙཱིཏི ཀི་མ་ཏྠཾ? ཨ་དྷི་ཙི་ཏྟ་སྶ བྷི་ཀྑུ་ནོ.
༣༤༢. , ༣༣༧. ས་རོ ར་སྶོ ན་པུཾ་ས་ཀེ.
ན་པུཾ་ས་ཀེ ཝ་ཏྟ་མཱ་ན་སྶ ཨ་བྱ་ཡཱི་བྷཱ་ཝ་ས་མཱ་ས་སྶ ལི་ངྒ་སྶ ས་རོ ར་སྶོ ཧོ་ཏི.
ཀུ་མཱ་རཱི་སུ ཨ་དྷི་ཀི་ཙྩ པ་ཝ་ཏྟ་ཏི ཀ་ཐཱ ཨི་ཏི ཨ་དྷི་ཀུ་མཱ་རི. ཨུ་པ་ཝ་དྷུ, ཨུ་པ་ག་ངྒཾ, ཨུ་པ་མ་ཎི་ཀཾ.
༣༤༣. , ༣༣༨. ཨ་ཉྙ་སྨཱ ལོ་པོ ཙ.
ཨ་ཉྙ་སྨཱ ཨ་བྱ་ཡཱི་བྷཱ་ཝ་ས་མཱ་སཱ ཨ་ན་ཀཱ་ར་ནྟཱ པ་རཱ་སཾ ཝི་བྷ་ཏྟཱི་ནཾ ལོ་པོ ཙ ཧོ་ཏི.
ཨ་དྷི་ཏྠི, ཨ་དྷི་ཀུ་མཱ་རི, ཨུ་པ་ཝ་དྷུ.
ཨི་ཏི ནཱ་མ་ཀ་པྤེ ས་མཱ་ས་ཀ་པྤོ ས་ཏྟ་མོ ཀ་ཎྜོ.
ས་མཱ་ས་ཀ་པྤོ ནི་ཊྛི་ཏོ.