(༧) ༢. ས་ཏི་པ་ཊྛཱ་ན་ཝ་གྒོ
༡. སི་ཀྑཱ་དུ་བྦ་ལྱ་སུ་ཏྟཾ
༦༣. ‘‘པ་ཉྩི་མཱ་ནི, བྷི་ཀྑ་ཝེ, སི་ཀྑཱ་དུ་བྦ་ལྱཱ་ནི. ཀ་ཏ་མཱ་ནི པ་ཉྩ? པཱ་ཎཱ་ཏི་པཱ་ཏོ, ཨ་དི་ནྣཱ་དཱ་ནཾ, ཀཱ་མེ་སུ་མི་ཙྪཱ་ཙཱ་རོ, མུ་སཱ་ཝཱ་དོ, སུ་རཱ་མེ་ར་ཡ་མ་ཛྫ་པ་མཱ་ད་ཊྛཱ་ནཾ – ཨི་མཱ་ནི ཁོ, བྷི་ཀྑ་ཝེ, པ་ཉྩ སི་ཀྑཱ་དུ་བྦ་ལྱཱ་ནི.
‘‘ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ སི་ཀྑཱ་དུ་བྦ་ལྱཱ་ནཾ པ་ཧཱ་ནཱ་ཡ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ. ཀ་ཏ་མེ ཙ་ཏྟཱ་རོ? ཨི་དྷ, བྷི་ཀྑ་ཝེ, བྷི་ཀྑུ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ; ཝེ་ད་ནཱ་སུ…པེ… ཙི་ཏྟེ…པེ… དྷ་མྨེ་སུ དྷ་མྨཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ སི་ཀྑཱ་དུ་བྦ་ལྱཱ་ནཾ པ་ཧཱ་ནཱ་ཡ ཨི་མེ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ’’ཏི. པ་ཋ་མཾ.
༢. ནཱི་ཝ་ར་ཎ་སུ་ཏྟཾ
༦༤. ‘‘པ་ཉྩི་མཱ་ནི, བྷི་ཀྑ་ཝེ, ནཱི་ཝ་ར་ཎཱ་ནི. ཀ་ཏ་མཱ་ནི པ་ཉྩ? ཀཱ་མ་ཙྪ་ནྡ་ནཱི་ཝ་ར་ཎཾ, བྱཱ་པཱ་ད་ནཱི་ཝ་ར་ཎཾ, ཐི་ན་མི་དྡྷ་ནཱི་ཝ་ར་ཎཾ, ཨུ་དྡྷ་ཙྩ་ཀུ་ཀྐུ་ཙྩ་ནཱི་ཝ་ར་ཎཾ, ཝི་ཙི་ཀི་ཙྪཱ་ནཱི་ཝ་ར་ཎཾ – ཨི་མཱ་ནི ཁོ, བྷི་ཀྑ་ཝེ, པ་ཉྩ ནཱི་ཝ་ར་ཎཱ་ནི.
‘‘ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ ནཱི་ཝ་ར་ཎཱ་ནཾ པ་ཧཱ་ནཱ་ཡ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ. ཀ་ཏ་མེ ཙ་ཏྟཱ་རོ? ཨི་དྷ, བྷི་ཀྑ་ཝེ, བྷི་ཀྑུ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ; ཝེ་ད་ནཱ་སུ…པེ… ཙི་ཏྟེ…པེ… དྷ་མྨེ་སུ དྷ་མྨཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ ནཱི་ཝ་ར་ཎཱ་ནཾ པ་ཧཱ་ནཱ་ཡ ཨི་མེ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ’’ཏི. དུ་ཏི་ཡཾ.
༣. ཀཱ་མ་གུ་ཎ་སུ་ཏྟཾ
༦༥. ‘‘པ་ཉྩི་མེ, བྷི་ཀྑ་ཝེ, ཀཱ་མ་གུ་ཎཱ. ཀ་ཏ་མེ པ་ཉྩ? ཙ་ཀྑུ་ཝི་ཉྙེ་ཡྻཱ རཱུ་པཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ, སོ་ཏ་ཝི་ཉྙེ་ཡྻཱ ས་དྡཱ…པེ… གྷཱ་ན་ཝི་ཉྙེ་ཡྻཱ ག་ནྡྷཱ… ཛི་ཝ྄ཧཱ་ཝི་ཉྙེ་ཡྻཱ ར་སཱ… ཀཱ་ཡ་ཝི་ཉྙེ་ཡྻཱ ཕོ་ཊྛ་བྦཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཨི་མེ ཁོ, བྷི་ཀྑ་ཝེ, པ་ཉྩ ཀཱ་མ་གུ་ཎཱ.
‘‘ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ ཀཱ་མ་གུ་ཎཱ་ནཾ པ་ཧཱ་ནཱ་ཡ…པེ… ཨི་མེ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ’’ཏི. ཏ་ཏི་ཡཾ.
༤. ཨུ་པཱ་དཱ་ན་ཀྑ་ནྡྷ་སུ་ཏྟཾ
༦༦. ‘‘པ་ཉྩི་མེ, བྷི་ཀྑ་ཝེ, ཨུ་པཱ་དཱ་ན་ཀྑ་ནྡྷཱ. ཀ་ཏ་མེ པ་ཉྩ? རཱུ་པུ་པཱ་དཱ་ན་ཀྑ་ནྡྷོ, ཝེ་ད་ནུ་པཱ་དཱ་ན་ཀྑ་ནྡྷོ, ས་ཉྙུ་པཱ་དཱ་ན་ཀྑ་ནྡྷོ, ས་ངྑཱ་རུ་པཱ་དཱ་ན་ཀྑ་ནྡྷོ, ཝི་ཉྙཱ་ཎུ་པཱ་དཱ་ན་ཀྑ་ནྡྷོ – ཨི་མེ ཁོ, བྷི་ཀྑ་ཝེ, པ་ཉྩུ་པཱ་དཱ་ན་ཀྑ་ནྡྷཱ.
‘‘ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ ཨུ་པཱ་དཱ་ན་ཀྑ་ནྡྷཱ་ནཾ པ་ཧཱ་ནཱ་ཡ…པེ… ཨི་མེ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ’’ཏི. ཙ་ཏུ་ཏྠཾ.
༥. ཨོ་ར་མྦྷཱ་གི་ཡ་སུ་ཏྟཾ
༦༧. ‘‘པ་ཉྩི་མཱ་ནི, བྷི་ཀྑ་ཝེ, ཨོ་ར་མྦྷཱ་གི་ཡཱ་ནི སཾ་ཡོ་ཛ་ནཱ་ནི. ཀ་ཏ་མཱ་ནི པ་ཉྩ? ས་ཀྐཱ་ཡ་དི་ཊྛི, ཝི་ཙི་ཀི་ཙྪཱ, སཱི་ལ་བྦ་ཏ་པ་རཱ་མཱ་སོ, ཀཱ་མ་ཙྪ་ནྡོ, བྱཱ་པཱ་དོ – ཨི་མཱ་ནི ཁོ, བྷི་ཀྑ་ཝེ, པ་ཉྩོ་ར་མྦྷཱ་གི་ཡཱ་ནི སཾ་ཡོ་ཛ་ནཱ་ནི.
‘‘ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་ཧཱ་ནཱ་ཡ…པེ… ཨི་མེ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ’’ཏི. པ་ཉྩ་མཾ.
༦. ག་ཏི་སུ་ཏྟཾ
༦༨. ‘‘པ་ཉྩི་མཱ, བྷི་ཀྑ་ཝེ, ག་ཏི་ཡོ. ཀ་ཏ་མཱ པ་ཉྩ? ནི་ར་ཡོ, ཏི་ར་ཙྪཱ་ན་ཡོ་ནི, པེ་ཏྟི་ཝི་ས་ཡོ, མ་ནུ་སྶཱ, དེ་ཝཱ – ཨི་མཱ ཁོ, བྷི་ཀྑ་ཝེ, པ་ཉྩ ག་ཏི་ཡོ.
‘‘ཨི་མཱ་སཾ ཁོ, བྷི་ཀྑ་ཝེ, པ་ཉྩ་ནྣཾ ག་ཏཱི་ནཾ པ་ཧཱ་ནཱ་ཡ…པེ… ཨི་མེ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ’’ཏི. ཚ་ཊྛཾ.
༧. མ་ཙྪ་རི་ཡ་སུ་ཏྟཾ
༦༩. ‘‘པ་ཉྩི་མཱ་ནི, བྷི་ཀྑ་ཝེ, མ་ཙྪ་རི་ཡཱ་ནི. ཀ་ཏ་མཱ་ནི པ་ཉྩ? ཨཱ་ཝཱ་ས་མ་ཙྪ་རི་ཡཾ, ཀུ་ལ་མ་ཙྪ་རི་ཡཾ, ལཱ་བྷ་མ་ཙྪ་རི་ཡཾ, ཝ་ཎྞ་མ་ཙྪ་རི་ཡཾ, དྷ་མྨ་མ་ཙྪ་རི་ཡཾ – ཨི་མཱ་ནི ཁོ, བྷི་ཀྑ་ཝེ, པ་ཉྩ མ་ཙྪ་རི་ཡཱ་ནི.
‘‘ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ མ་ཙྪ་རི་ཡཱ་ནཾ པ་ཧཱ་ནཱ་ཡ…པེ… ཨི་མེ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ’’ཏི. ས་ཏྟ་མཾ.
༨. ཨུ་དྡྷ་མྦྷཱ་གི་ཡ་སུ་ཏྟཾ
༧༠. ‘‘པ་ཉྩི་མཱ་ནི, བྷི་ཀྑ་ཝེ, ཨུ་དྡྷ་མྦྷཱ་གི་ཡཱ་ནི སཾ་ཡོ་ཛ་ནཱ་ནི. ཀ་ཏ་མཱ་ནི པ་ཉྩ? རཱུ་པ་རཱ་གོ, ཨ་རཱུ་པ་རཱ་གོ, མཱ་ནོ, ཨུ་དྡྷ་ཙྩཾ, ཨ་ཝི་ཛྫཱ – ཨི་མཱ་ནི ཁོ, བྷི་ཀྑ་ཝེ, པ་ཉྩུ་དྡྷ་མྦྷཱ་གི་ཡཱ་ནི སཾ་ཡོ་ཛ་ནཱ་ནི.
‘‘ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ ཨུ་དྡྷ་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་ཧཱ་ནཱ་ཡ…པེ… ཨི་མེ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ’’ཏི. ཨ་ཊྛ་མཾ.
༩. ཙེ་ཏོ་ཁི་ལ་སུ་ཏྟཾ
༧༡. [ཨ. ནི. ༥.༢༠༥; དཱི. ནི. ༣.༣༡༩; མ. ནི. ༡.༡༨༥] ‘‘པ་ཉྩི་མེ, བྷི་ཀྑ་ཝེ, ཙེ་ཏོ་ཁི་ལཱ [ཙེ་ཏོ་ཁཱི་ལཱ (ཀ.)]. ཀ་ཏ་མེ པ་ཉྩ? ཨི་དྷ བྷི་ཀྑ་ཝེ, བྷི་ཀྑུ ས་ཏྠ་རི ཀ་ངྑ་ཏི ཝི་ཙི་ཀི་ཙྪ་ཏི ནཱ་དྷི་མུ་ཙྩ་ཏི ན ས་མྤ་སཱི་ད་ཏི. ཡོ སོ, བྷི་ཀྑ་ཝེ, བྷི་ཀྑུ ས་ཏྠ་རི ཀ་ངྑ་ཏི ཝི་ཙི་ཀི་ཙྪ་ཏི ནཱ་དྷི་མུ་ཙྩ་ཏི ན ས་མྤ་སཱི་ད་ཏི, ཏ་སྶ ཙི་ཏྟཾ ན ན་མ་ཏི ཨཱ་ཏ་པྤཱ་ཡ ཨ་ནུ་ཡོ་གཱ་ཡ སཱ་ཏ་ཙྩཱ་ཡ པ་དྷཱ་ནཱ་ཡ. ཡ་སྶ ཙི་ཏྟཾ ན ན་མ་ཏི ཨཱ་ཏ་པྤཱ་ཡ ཨ་ནུ་ཡོ་གཱ་ཡ སཱ་ཏ་ཙྩཱ་ཡ པ་དྷཱ་ནཱ་ཡ, ཨ་ཡཾ པ་ཋ་མོ ཙེ་ཏོ་ཁི་ལོ.
‘‘པུ་ན ཙ་པ་རཾ, བྷི་ཀྑ་ཝེ, བྷི་ཀྑུ དྷ་མྨེ ཀ་ངྑ་ཏི…པེ… ས་ངྒྷེ ཀ་ངྑ་ཏི… སི་ཀྑཱ་ཡ ཀ་ངྑ་ཏི… ས་བྲ་ཧྨ་ཙཱ་རཱི་སུ ཀུ་པི་ཏོ ཧོ་ཏི ཨ་ན་ཏྟ་མ་ནོ ཨཱ་ཧ་ཏ་ཙི་ཏྟོ ཁི་ལ་ཛཱ་ཏོ. ཡོ སོ, བྷི་ཀྑ་ཝེ, བྷི་ཀྑུ ས་བྲ་ཧྨ་ཙཱ་རཱི་སུ ཀུ་པི་ཏོ ཧོ་ཏི ཨ་ན་ཏྟ་མ་ནོ ཨཱ་ཧ་ཏ་ཙི་ཏྟོ ཁི་ལ་ཛཱ་ཏོ, ཏ་སྶ ཙི་ཏྟཾ ན ན་མ་ཏི ཨཱ་ཏ་པྤཱ་ཡ ཨ་ནུ་ཡོ་གཱ་ཡ སཱ་ཏ་ཙྩཱ་ཡ པ་དྷཱ་ནཱ་ཡ. ཡ་སྶ ཙི་ཏྟཾ ན ན་མ་ཏི ཨཱ་ཏ་པྤཱ་ཡ ཨ་ནུ་ཡོ་གཱ་ཡ སཱ་ཏ་ཙྩཱ་ཡ པ་དྷཱ་ནཱ་ཡ, ཨ་ཡཾ པ་ཉྩ་མོ ཙེ་ཏོ་ཁི་ལོ.
‘‘ཨི་མེ་སཾ, ཁོ, བྷི་ཀྑ་ཝེ, པ་ཉྩ་ནྣཾ ཙེ་ཏོ་ཁི་ལཱ་ནཾ པ་ཧཱ་ནཱ་ཡ…པེ… ཨི་མེ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ’’ཏི. ན་ཝ་མཾ.
༡༠. ཙེ་ཏ་སོ་ཝི་ནི་བ་ནྡྷ་སུ་ཏྟཾ
༧༢. ‘‘པ་ཉྩི་མེ, བྷི་ཀྑ་ཝེ, ཙེ་ཏ་སོ་ཝི་ནི་བ་ནྡྷཱ [ཙེ་ཏོ་ཝི་ནི་བ་དྡྷཱ (སཱ་ར་ཏྠ་དཱི་པ་ནཱི་ཊཱི་ཀཱ) ཨ. ནི. ༥.༢༠༦; དཱི. ནི. ༣.༣༢༠]. ཀ་ཏ་མེ པ་ཉྩ? ཨི་དྷ, བྷི་ཀྑ་ཝེ, བྷི་ཀྑུ ཀཱ་མེ་སུ ཨ་ཝཱི་ཏ་རཱ་གོ ཧོ་ཏི ཨ་ཝི་ག་ཏ་ཙྪ་ནྡོ ཨ་ཝི་ག་ཏ་པེ་མོ ཨ་ཝི་ག་ཏ་པི་པཱ་སོ ཨ་ཝི་ག་ཏ་པ་རི་ལཱ༹་ཧོ ཨ་ཝི་ག་ཏ་ཏ་ཎྷོ. ཡོ སོ, བྷི་ཀྑ་ཝེ, བྷི་ཀྑུ ཀཱ་མེ་སུ ཨ་ཝཱི་ཏ་རཱ་གོ ཧོ་ཏི ཨ་ཝི་ག་ཏ་ཙྪ་ནྡོ ཨ་ཝི་ག་ཏ་པེ་མོ ཨ་ཝི་ག་ཏ་པི་པཱ་སོ ཨ་ཝི་ག་ཏ་པ་རི་ལཱ༹་ཧོ ཨ་ཝི་ག་ཏ་ཏ་ཎྷོ, ཏ་སྶ ཙི་ཏྟཾ ན ན་མ་ཏི ཨཱ་ཏ་པྤཱ་ཡ ཨ་ནུ་ཡོ་གཱ་ཡ སཱ་ཏ་ཙྩཱ་ཡ པ་དྷཱ་ནཱ་ཡ. ཡ་སྶ ཙི་ཏྟཾ ན ན་མ་ཏི ཨཱ་ཏ་པྤཱ་ཡ ཨ་ནུ་ཡོ་གཱ་ཡ སཱ་ཏ་ཙྩཱ་ཡ པ་དྷཱ་ནཱ་ཡ, ཨ་ཡཾ པ་ཋ་མོ ཙེ་ཏ་སོ་ཝི་ནི་བ་ནྡྷོ.
‘‘པུ་ན ཙ་པ་རཾ, བྷི་ཀྑ་ཝེ, བྷི་ཀྑུ ཀཱ་ཡེ ཨ་ཝཱི་ཏ་རཱ་གོ ཧོ་ཏི…པེ… རཱུ་པེ ཨ་ཝཱི་ཏ་རཱ་གོ ཧོ་ཏི… ཡཱ་ཝ་ད་ཏྠཾ ཨུ་ད་རཱ་ཝ་དེ་ཧ་ཀཾ བྷུ་ཉྫི་ཏྭཱ སེ་ཡྻ་སུ་ཁཾ པ་སྶ་སུ་ཁཾ མི་དྡྷ་སུ་ཁཾ ཨ་ནུ་ཡུ་ཏྟོ ཝི་ཧ་ར་ཏི … ཨ་ཉྙ་ཏ་རཾ དེ་ཝ་ནི་ཀཱ་ཡཾ པ་ཎི་དྷཱ་ཡ བྲ་ཧྨ་ཙ་རི་ཡཾ ཙ་ར་ཏི – ‘ཨི་མི་ནཱ་ཧཾ སཱི་ལེ་ན ཝཱ ཝ་ཏེ་ན ཝཱ ཏ་པེ་ན ཝཱ བྲ་ཧྨ་ཙ་རི་ཡེ་ན ཝཱ དེ་ཝོ ཝཱ བྷ་ཝི་སྶཱ་མི དེ་ཝ་ཉྙ་ཏ་རོ ཝཱ’ཏི. ཡོ སོ, བྷི་ཀྑ་ཝེ, བྷི་ཀྑུ ཨ་ཉྙ་ཏ་རཾ དེ་ཝ་ནི་ཀཱ་ཡཾ པ་ཎི་དྷཱ་ཡ བྲ་ཧྨ་ཙ་རི་ཡཾ ཙ་ར་ཏི – ‘ཨི་མི་ནཱ་ཧཾ སཱི་ལེ་ན ཝཱ ཝ་ཏེ་ན ཝཱ ཏ་པེ་ན ཝཱ བྲ་ཧྨ་ཙ་རི་ཡེ་ན ཝཱ དེ་ཝོ ཝཱ བྷ་ཝི་སྶཱ་མི དེ་ཝ་ཉྙ་ཏ་རོ ཝཱ’ཏི, ཏ་སྶ ཙི་ཏྟཾ ན ན་མ་ཏི ཨཱ་ཏ་པྤཱ་ཡ ཨ་ནུ་ཡོ་གཱ་ཡ སཱ་ཏ་ཙྩཱ་ཡ པ་དྷཱ་ནཱ་ཡ. ཡ་སྶ ཙི་ཏྟཾ ན ན་མ་ཏི ཨཱ་ཏ་པྤཱ་ཡ ཨ་ནུ་ཡོ་གཱ་ཡ སཱ་ཏ་ཙྩཱ་ཡ པ་དྷཱ་ནཱ་ཡ, ཨ་ཡཾ པ་ཉྩ་མོ ཙེ་ཏ་སོ་ཝི་ནི་བ་ནྡྷོ. ཨི་མེ ཁོ, བྷི་ཀྑ་ཝེ, པ་ཉྩ ཙེ་ཏ་སོ་ཝི་ནི་བ་ནྡྷཱ.
‘‘ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ ཙེ་ཏ་སོ་ཝི་ནི་བ་ནྡྷཱ་ནཾ པ་ཧཱ་ནཱ་ཡ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ. ཀ་ཏ་མེ ཙ་ཏྟཱ་རོ? ཨི་དྷ, བྷི་ཀྑ་ཝེ, བྷི་ཀྑུ ཀཱ་ཡེ ཀཱ་ཡཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ; ཝེ་ད་ནཱ་སུ…པེ… ཙི་ཏྟེ…པེ… དྷ་མྨེ་སུ དྷ་མྨཱ་ནུ་པ་སྶཱི ཝི་ཧ་ར་ཏི ཨཱ་ཏཱ་པཱི ས་མྤ་ཛཱ་ནོ ས་ཏི་མཱ ཝི་ནེ་ཡྻ ལོ་ཀེ ཨ་བྷི་ཛ྄ཛྷཱ་དོ་མ་ན་སྶཾ. ཨི་མེ་སཾ ཁོ, བྷི་ཀྑ་ཝེ, པ་ཉྩ་ནྣཾ ཙེ་ཏ་སོ་ཝི་ནི་བ་ནྡྷཱ་ནཾ པ་ཧཱ་ནཱ་ཡ ཨི་མེ ཙ་ཏྟཱ་རོ ས་ཏི་པ་ཊྛཱ་ནཱ བྷཱ་ཝེ་ཏ་བྦཱ’’ཏི. ད་ས་མཾ.
ས་ཏི་པ་ཊྛཱ་ན་ཝ་གྒོ དུ་ཏི་ཡོ.