༡. ས་མྦཱ་དྷ་སུ་ཏྟཾ

༤༢. ཨེ་ཀཾ ས་མ་ཡཾ ཨཱ་ཡ་སྨཱ ཨཱ་ན་ནྡོ ཀོ་ས་མྦི་ཡཾ ཝི་ཧ་ར་ཏི གྷོ་སི་ཏཱ་རཱ་མེ. ཨ་ཐ ཁོ ཨཱ་ཡ་སྨཱ ཨུ་དཱ་ཡཱི ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏཱ ཨཱ་ན་ནྡེ་ན ས་དྡྷིཾ ས་མྨོ་དི. ས་མྨོ་ད་ནཱི་ཡཾ ཀ་ཐཾ སཱ་ར་ཎཱི་ཡཾ ཝཱི་ཏི་སཱ་རེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨུ་དཱ་ཡཱི ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་ད་ཝོ་ཙ – ‘‘ཝུ་ཏྟ་མི་དཾ, ཨཱ་ཝུ་སོ, པ་ཉྩཱ་ལ་ཙ་ཎྜེ་ན དེ་ཝ་པུ་ཏྟེ་ན –

‘‘ས་མྦཱ་དྷེ ག་ཏཾ [ས་མྦཱ་དྷེ ཝ་ཏ (སཱི.)] ཨོ་ཀཱ་སཾ, ཨ་ཝི་དྭཱ བྷཱུ་རི་མེ་དྷ་སོ;

ཡོ ཛྷཱ་ན་མ་བུ་ཛ྄ཛྷི བུ་དྡྷོ, པ་ཊི་ལཱི་ན་ནི་ས་བྷོ མུ་ནཱི’’ཏི.

‘‘ཀ་ཏ་མོ, ཨཱ་ཝུ་སོ, ས་མྦཱ་དྷོ, ཀ་ཏ་མོ ས་མྦཱ་དྷེ ཨོ་ཀཱ་སཱ་དྷི་ག་མོ ཝུ་ཏྟོ བྷ་ག་ཝ་ཏཱ’’ཏི? ‘‘པ་ཉྩི་མེ, ཨཱ་ཝུ་སོ, ཀཱ་མ་གུ་ཎཱ ས་མྦཱ་དྷོ ཝུ་ཏྟོ བྷ་ག་ཝ་ཏཱ. ཀ་ཏ་མེ པ་ཉྩ? ཙ་ཀྑུ་ཝི་ཉྙེ་ཡྻཱ རཱུ་པཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ, སོ་ཏ་ཝི་ཉྙེ་ཡྻཱ ས་དྡཱ…པེ… གྷཱ་ན་ཝི་ཉྙེ་ཡྻཱ ག་ནྡྷཱ… ཛི་ཝ྄ཧཱ་ཝི་ཉྙེ་ཡྻཱ ར་སཱ… ཀཱ་ཡ་ཝི་ཉྙེ་ཡྻཱ ཕོ་ཊྛ་བྦཱ ཨི་ཊྛཱ ཀ་ནྟཱ མ་ནཱ་པཱ པི་ཡ་རཱུ་པཱ ཀཱ་མཱུ་པ་སཾ་ཧི་ཏཱ ར་ཛ་ནཱི་ཡཱ. ཨི་མེ ཁོ, ཨཱ་ཝུ་སོ, པ་ཉྩ ཀཱ་མ་གུ་ཎཱ ས་མྦཱ་དྷོ ཝུ་ཏྟོ བྷ་ག་ཝ་ཏཱ.

‘‘ཨི་དྷཱ་ཝུ་སོ, བྷི་ཀྑུ ཝི་ཝི་ཙྩེ་ཝ ཀཱ་མེ་ཧི…པེ… པ་ཋ་མཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཏྟཱ་ཝ་ཏཱ་པི ཁོ, ཨཱ་ཝུ་སོ, ས་མྦཱ་དྷེ ཨོ་ཀཱ་སཱ་དྷི་ག་མོ ཝུ་ཏྟོ བྷ་ག་ཝ་ཏཱ པ་རི་ཡཱ་ཡེ་ན. ཏ་ཏྲཱ་པ་ཏྠི ས་མྦཱ་དྷོ. ཀི་ཉྩ ཏ་ཏྠ ས་མྦཱ་དྷོ? ཡ་དེ་ཝ ཏ་ཏྠ ཝི་ཏ་ཀྐ་ཝི་ཙཱ་རཱ ཨ་ནི་རུ་དྡྷཱ ཧོ་ནྟི, ཨ་ཡ་མེ་ཏྠ ས་མྦཱ་དྷོ.

‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ཝི་ཏ་ཀྐ་ཝི་ཙཱ་རཱ་ནཾ ཝཱུ་པ་ས་མཱ…པེ… དུ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཏྟཱ་ཝ་ཏཱ་པི ཁོ, ཨཱ་ཝུ་སོ, ས་མྦཱ་དྷེ ཨོ་ཀཱ་སཱ་དྷི་ག་མོ ཝུ་ཏྟོ བྷ་ག་ཝ་ཏཱ པ་རི་ཡཱ་ཡེ་ན. ཏ་ཏྲཱ་པ་ཏྠི ས་མྦཱ་དྷོ. ཀི་ཉྩ ཏ་ཏྠ ས་མྦཱ་དྷོ? ཡ་དེ་ཝ ཏ་ཏྠ པཱི་ཏི ཨ་ནི་རུ་དྡྷཱ ཧོ་ཏི, ཨ་ཡ་མེ་ཏྠ ས་མྦཱ་དྷོ.

‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ པཱི་ཏི་ཡཱ ཙ ཝི་རཱ་གཱ…པེ… ཏ་ཏི་ཡཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཏྟཱ་ཝ་ཏཱ་པི ཁོ, ཨཱ་ཝུ་སོ, ས་མྦཱ་དྷེ ཨོ་ཀཱ་སཱ་དྷི་ག་མོ ཝུ་ཏྟོ བྷ་ག་ཝ་ཏཱ པ་རི་ཡཱ་ཡེ་ན. ཏ་ཏྲཱ་པ་ཏྠི ས་མྦཱ་དྷོ. ཀི་ཉྩ ཏ་ཏྠ ས་མྦཱ་དྷོ? ཡ་དེ་ཝ ཏ་ཏྠ ཨུ་པེ་ཀྑཱ་སུ་ཁཾ ཨ་ནི་རུ་དྡྷཾ ཧོ་ཏི, ཨ་ཡ་མེ་ཏྠ ས་མྦཱ་དྷོ.

‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ སུ་ཁ་སྶ ཙ པ་ཧཱ་ནཱ…པེ… ཙ་ཏུ་ཏྠཾ ཛྷཱ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཏྟཱ་ཝ་ཏཱ་པི ཁོ, ཨཱ་ཝུ་སོ, ས་མྦཱ་དྷེ ཨོ་ཀཱ་སཱ་དྷི་ག་མོ ཝུ་ཏྟོ བྷ་ག་ཝ་ཏཱ པ་རི་ཡཱ་ཡེ་ན. ཏ་ཏྲཱ་པ་ཏྠི ས་མྦཱ་དྷོ. ཀི་ཉྩ ཏ་ཏྠ ས་མྦཱ་དྷོ? ཡ་དེ་ཝ ཏ་ཏྠ རཱུ་པ་ས་ཉྙཱ ཨ་ནི་རུ་དྡྷཱ ཧོ་ཏི, ཨ་ཡ་མེ་ཏྠ ས་མྦཱ་དྷོ.

‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ས་བྦ་སོ རཱུ་པ་ས་ཉྙཱ་ནཾ ས་མ་ཏི་ཀྐ་མཱ པ་ཊི་གྷ་ས་ཉྙཱ་ནཾ ཨ་ཏྠ་ངྒ་མཱ ནཱ་ན་ཏྟ་ས་ཉྙཱ་ནཾ ཨ་མ་ན་སི་ཀཱ་རཱ ‘ཨ་ན་ནྟོ ཨཱ་ཀཱ་སོ’ཏི ཨཱ་ཀཱ་སཱ་ན་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཏྟཱ་ཝ་ཏཱ་པི ཁོ, ཨཱ་ཝུ་སོ, ས་མྦཱ་དྷེ ཨོ་ཀཱ་སཱ་དྷི་ག་མོ ཝུ་ཏྟོ བྷ་ག་ཝ་ཏཱ པ་རི་ཡཱ་ཡེ་ན. ཏ་ཏྲཱ་པ་ཏྠི ས་མྦཱ་དྷོ. ཀི་ཉྩ ཏ་ཏྠ ས་མྦཱ་དྷོ? ཡ་དེ་ཝ ཏ་ཏྠ ཨཱ་ཀཱ་སཱ་ན་ཉྩཱ་ཡ་ཏ་ན་ས་ཉྙཱ ཨ་ནི་རུ་དྡྷཱ ཧོ་ཏི, ཨ་ཡ་མེ་ཏྠ ས་མྦཱ་དྷོ.

‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ས་བྦ་སོ ཨཱ་ཀཱ་སཱ་ན་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘ཨ་ན་ནྟཾ ཝི་ཉྙཱ་ཎ’ནྟི ཝི་ཉྙཱ་ཎ་ཉྩཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཏྟཱ་ཝ་ཏཱ་པི ཁོ, ཨཱ་ཝུ་སོ, ས་མྦཱ་དྷེ ཨོ་ཀཱ་སཱ་དྷི་ག་མོ ཝུ་ཏྟོ བྷ་ག་ཝ་ཏཱ པ་རི་ཡཱ་ཡེ་ན. ཏ་ཏྲཱ་པ་ཏྠི ས་མྦཱ་དྷོ. ཀི་ཉྩ ཏ་ཏྠ ས་མྦཱ་དྷོ? ཡ་དེ་ཝ ཏ་ཏྠ ཝི་ཉྙཱ་ཎ་ཉྩཱ་ཡ་ཏ་ན་ས་ཉྙཱ ཨ་ནི་རུ་དྡྷཱ ཧོ་ཏི, ཨ་ཡ་མེ་ཏྠ ས་མྦཱ་དྷོ.

‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ས་བྦ་སོ ཝི་ཉྙཱ་ཎ་ཉྩཱ་ཡ་ཏ་ནཾ ས་མ་ཏི་ཀྐ་མྨ ‘ན་ཏྠི ཀི་ཉྩཱི’ཏི ཨཱ་ཀི་ཉྩ་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཏྟཱ་ཝ་ཏཱ་པི ཁོ, ཨཱ་ཝུ་སོ, ས་མྦཱ་དྷེ ཨོ་ཀཱ་སཱ་དྷི་ག་མོ ཝུ་ཏྟོ བྷ་ག་ཝ་ཏཱ པ་རི་ཡཱ་ཡེ་ན. ཏ་ཏྲཱ་པ་ཏྠི ས་མྦཱ་དྷོ. ཀི་ཉྩ ཏ་ཏྠ ས་མྦཱ་དྷོ? ཡ་དེ་ཝ ཏ་ཏྠ ཨཱ་ཀི་ཉྩ་ཉྙཱ་ཡ་ཏ་ན་ས་ཉྙཱ ཨ་ནི་རུ་དྡྷཱ ཧོ་ཏི, ཨ་ཡ་མེ་ཏྠ ས་མྦཱ་དྷོ.

‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ས་བྦ་སོ ཨཱ་ཀི་ཉྩ་ཉྙཱ་ཡ་ཏ་ནཾ ས་མ་ཏི་ཀྐ་མྨ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ཨུ་པ་ས་མྤ་ཛྫ ཝི་ཧ་ར་ཏི. ཨེ་ཏྟཱ་ཝ་ཏཱ་པི ཁོ, ཨཱ་ཝུ་སོ, ས་མྦཱ་དྷེ ཨོ་ཀཱ་སཱ་དྷི་ག་མོ ཝུ་ཏྟོ བྷ་ག་ཝ་ཏཱ པ་རི་ཡཱ་ཡེ་ན. ཏ་ཏྲཱ་པ་ཏྠི ས་མྦཱ་དྷོ. ཀི་ཉྩ ཏ་ཏྠ ས་མྦཱ་དྷོ? ཡ་དེ་ཝ ཏ་ཏྠ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ན་ས་ཉྙཱ ཨ་ནི་རུ་དྡྷཱ ཧོ་ཏི, ཨ་ཡ་མེ་ཏྠ ས་མྦཱ་དྷོ.

‘‘པུ་ན ཙ་པ་རཾ, ཨཱ་ཝུ་སོ, བྷི་ཀྑུ ས་བྦ་སོ ནེ་ཝ་ས་ཉྙཱ་ནཱ་ས་ཉྙཱ་ཡ་ཏ་ནཾ ས་མ་ཏི་ཀྐ་མྨ ས་ཉྙཱ་ཝེ་ད་ཡི་ཏ་ནི་རོ་དྷཾ ཨུ་པ་ས་མྤ་ཛྫ ཝི་ཧ་ར་ཏི, པ་ཉྙཱ་ཡ ཙ་སྶ དི་སྭཱ ཨཱ་ས་ཝཱ པ་རི་ཀྑཱི་ཎཱ ཧོ་ནྟི. ཨེ་ཏྟཱ་ཝ་ཏཱ་པི ཁོ, ཨཱ་ཝུ་སོ, ས་མྦཱ་དྷེ ཨོ་ཀཱ་སཱ་དྷི་ག་མོ ཝུ་ཏྟོ བྷ་ག་ཝ་ཏཱ ནི་པྤ་རི་ཡཱ་ཡེ་ནཱ’’ཏི. པ་ཋ་མཾ.