༢. པུ་རི་ས་ག་ཏི་སུ་ཏྟཾ

༥༥. ‘‘ས་ཏྟ ཙ [ས་ཏྟ (སཱི.), ས་ཏྟ ཙ ཁོ (ཀ.)], བྷི་ཀྑ་ཝེ, པུ་རི་ས་ག་ཏི་ཡོ དེ་སེ་སྶཱ་མི ཨ་ནུ་པཱ་དཱ ཙ པ་རི་ནི་བྦཱ་ནཾ [པ་རི་ནི་བྦཱ་ཎཾ (སཱི.)]. ཏཾ སུ་ཎཱ་ཐ, སཱ་དྷུ་ཀཾ མ་ན་སི ཀ་རོ་ཐ; བྷཱ་སི་སྶཱ་མཱི’’ཏི. ‘‘ཨེ་ཝཾ, བྷ་ནྟེ’’ཏི ཁོ ཏེ བྷི་ཀྑཱུ བྷ་ག་ཝ་ཏོ པ་ཙྩ་སྶོ་སུཾ. བྷ་ག་ཝཱ ཨེ་ཏ་ད་ཝོ་ཙ – ‘‘ཀ་ཏ་མཱ ཙ, བྷི་ཀྑ་ཝེ, ས་ཏྟ པུ་རི་ས་ག་ཏི་ཡོ?

‘‘ཨི་དྷ, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ‘ནོ ཙ་སྶ ནོ ཙ མེ སི་ཡཱ, ན བྷ་ཝི་སྶ་ཏི ན མེ བྷ་ཝི་སྶ་ཏི, ཡ་ད་ཏྠི ཡཾ བྷཱུ་ཏཾ ཏཾ པ་ཛ་ཧཱ་མཱི’ཏི ཨུ་པེ་ཀྑཾ པ་ཊི་ལ་བྷ་ཏི. སོ བྷ་ཝེ ན ར་ཛྫ་ཏི, ས་མྦྷ་ཝེ ན ར་ཛྫ་ཏི, ཨ་ཏྠུ་ཏྟ་རི པ་དཾ ས་ནྟཾ ས་མྨ་པྤ་ཉྙཱ་ཡ པ་སྶ་ཏི. ཏ་ཉྩ ཁྭ་སྶ པ་དཾ ན ས་བྦེ་ན ས་བྦཾ ས་ཙྪི་ཀ་ཏཾ ཧོ་ཏི, ཏ་སྶ ན ས་བྦེ་ན ས་བྦཾ མཱ་ནཱ་ནུ་ས་ཡོ པ་ཧཱི་ནོ ཧོ་ཏི, ན ས་བྦེ་ན ས་བྦཾ བྷ་ཝ་རཱ་གཱ་ནུ་ས་ཡོ པ་ཧཱི་ནོ ཧོ་ཏི, ན ས་བྦེ་ན ས་བྦཾ ཨ་ཝི་ཛྫཱ་ནུ་ས་ཡོ པ་ཧཱི་ནོ ཧོ་ཏི. སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨ་ནྟ་རཱ་པ་རི་ནི་བྦཱ་ཡཱི ཧོ་ཏི. སེ་ཡྻ་ཐཱ་པི, བྷི་ཀྑ་ཝེ, དི་ཝ་སཾ་ས་ནྟ་ཏྟེ [དི་ཝ་ས་ས་ནྟ་ཏྟེ (སཱི. སྱཱ.) མ. ནི. ༢.༡༥༤] ཨ་ཡོ་ཀ་པཱ་ལེ ཧ་ཉྙ་མཱ་ནེ པ་པ་ཊི་ཀཱ ནི་བྦ་ཏྟི་ཏྭཱ ནི་བྦཱ་ཡེ་ཡྻ. ཨེ་ཝ་མེ་ཝཾ ཁོ, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ‘ནོ ཙ་སྶ ནོ ཙ མེ སི་ཡཱ, ན བྷ་ཝི་སྶ་ཏི ན མེ བྷ་ཝི་སྶ་ཏི, ཡ་ད་ཏྠི ཡཾ བྷཱུ་ཏཾ ཏཾ པ་ཛ་ཧཱ་མཱི’ཏི ཨུ་པེ་ཀྑཾ པ་ཊི་ལ་བྷ་ཏི. སོ བྷ་ཝེ ན ར་ཛྫ་ཏི, ས་མྦྷ་ཝེ ན ར་ཛྫ་ཏི, ཨ་ཏྠུ་ཏྟ་རི པ་དཾ ས་ནྟཾ ས་མྨ་པྤ་ཉྙཱ་ཡ པ་སྶ་ཏི. ཏ་ཉྩ ཁྭ་སྶ པ་དཾ ན ས་བྦེ་ན ས་བྦཾ ས་ཙྪི་ཀ་ཏཾ ཧོ་ཏི, ཏ་སྶ ན ས་བྦེ་ན ས་བྦཾ མཱ་ནཱ་ནུ་ས་ཡོ པ་ཧཱི་ནོ ཧོ་ཏི, ན ས་བྦེ་ན ས་བྦཾ བྷ་ཝ་རཱ་གཱ་ནུ་ས་ཡོ པ་ཧཱི་ནོ ཧོ་ཏི, ན ས་བྦེ་ན ས་བྦཾ ཨ་ཝི་ཛྫཱ་ནུ་ས་ཡོ པ་ཧཱི་ནོ ཧོ་ཏི. སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨ་ནྟ་རཱ་པ་རི་ནི་བྦཱ་ཡཱི ཧོ་ཏི.

‘‘ཨི་དྷ པ་ན, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ནོ ཙ་སྶ ནོ ཙ མེ སི་ཡཱ…པེ… སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨ་ནྟ་རཱ་པ་རི་ནི་བྦཱ་ཡཱི ཧོ་ཏི. སེ་ཡྻ་ཐཱ་པི, བྷི་ཀྑ་ཝེ, དི་ཝ་སཾ་ས་ནྟ་ཏྟེ ཨ་ཡོ་ཀ་པཱ་ལེ ཧ་ཉྙ་མཱ་ནེ པ་པ་ཊི་ཀཱ ནི་བྦ་ཏྟི་ཏྭཱ ཨུ་པྤ་ཏི་ཏྭཱ ཨ་ནུ་པ་ཧ་ཙྩ ཏ་ལཾ ནི་བྦཱ་ཡེ་ཡྻ. ཨེ་ཝ་མེ་ཝཾ ཁོ, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ནོ ཙ་སྶ ནོ ཙ མེ སི་ཡཱ…པེ… སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨ་ནྟ་རཱ་པ་རི་ནི་བྦཱ་ཡཱི ཧོ་ཏི.

‘‘ཨི་དྷ པ་ན, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ནོ ཙ་སྶ ནོ ཙ མེ སི་ཡཱ…པེ… སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨུ་པ་ཧ་ཙྩ་པ་རི་ནི་བྦཱ་ཡཱི ཧོ་ཏི. སེ་ཡྻ་ཐཱ་པི, བྷི་ཀྑ་ཝེ, དི་ཝ་སཾ་ས་ནྟ་ཏྟེ ཨ་ཡོ་ཀ་པཱ་ལེ ཧ་ཉྙ་མཱ་ནེ པ་པ་ཊི་ཀཱ ནི་བྦ་ཏྟི་ཏྭཱ ཨུ་པྤ་ཏི་ཏྭཱ ཨུ་པ་ཧ་ཙྩ ཏ་ལཾ ནི་བྦཱ་ཡེ་ཡྻ. ཨེ་ཝ་མེ་ཝཾ ཁོ, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ནོ ཙ་སྶ ནོ ཙ མེ སི་ཡཱ…པེ… སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨུ་པ་ཧ་ཙྩ་པ་རི་ནི་བྦཱ་ཡཱི ཧོ་ཏི.

‘‘ཨི་དྷ པ་ན, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ནོ ཙ་སྶ ནོ ཙ མེ སི་ཡཱ…པེ… སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨ་ས་ངྑཱ་ར་པ་རི་ནི་བྦཱ་ཡཱི ཧོ་ཏི. སེ་ཡྻ་ཐཱ་པི, བྷི་ཀྑ་ཝེ, དི་ཝ་སཾ་ས་ནྟ་ཏྟེ ཨ་ཡོ་ཀ་པཱ་ལེ ཧ་ཉྙ་མཱ་ནེ པ་པ་ཊི་ཀཱ ནི་བྦ་ཏྟི་ཏྭཱ ཨུ་པྤ་ཏི་ཏྭཱ པ་རི་ཏྟེ ཏི་ཎ་པུ་ཉྫེ ཝཱ ཀ་ཊྛ་པུ་ཉྫེ ཝཱ ནི་པ་ཏེ་ཡྻ. སཱ ཏ་ཏྠ ཨ་གྒི་མྤི ཛ་ནེ་ཡྻ, དྷཱུ་མ་མྤི ཛ་ནེ་ཡྻ, ཨ་གྒི་མྤི ཛ་ནེ་ཏྭཱ དྷཱུ་མ་མྤི ཛ་ནེ་ཏྭཱ ཏ་མེ་ཝ པ་རི་ཏྟཾ ཏི་ཎ་པུ་ཉྫཾ ཝཱ ཀ་ཊྛ་པུ་ཉྫཾ ཝཱ པ་རི་ཡཱ་དི་ཡི་ཏྭཱ ཨ་ནཱ་ཧཱ་རཱ ནི་བྦཱ་ཡེ་ཡྻ. ཨེ་ཝ་མེ་ཝཾ ཁོ, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ནོ ཙ་སྶ ནོ ཙ མེ སི་ཡཱ…པེ… སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨ་ས་ངྑཱ་ར་པ་རི་ནི་བྦཱ་ཡཱི ཧོ་ཏི.

‘‘ཨི་དྷ པ་ན, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ནོ ཙ་སྶ ནོ ཙ མེ སི་ཡཱ…པེ… སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ས་ས་ངྑཱ་ར་པ་རི་ནི་བྦཱ་ཡཱི ཧོ་ཏི. སེ་ཡྻ་ཐཱ་པི, བྷི་ཀྑ་ཝེ, དི་ཝ་སཾ་ས་ནྟ་ཏྟེ ཨ་ཡོ་ཀ་པཱ་ལེ ཧ་ཉྙ་མཱ་ནེ པ་པ་ཊི་ཀཱ ནི་བྦ་ཏྟི་ཏྭཱ ཨུ་པྤ་ཏི་ཏྭཱ ཝི་པུ་ལེ ཏི་ཎ་པུ་ཉྫེ ཝཱ ཀ་ཊྛ་པུ་ཉྫེ ཝཱ ནི་པ་ཏེ་ཡྻ. སཱ ཏ་ཏྠ ཨ་གྒི་མྤི ཛ་ནེ་ཡྻ, དྷཱུ་མ་མྤི ཛ་ནེ་ཡྻ, ཨ་གྒི་མྤི ཛ་ནེ་ཏྭཱ དྷཱུ་མ་མྤི ཛ་ནེ་ཏྭཱ ཏ་མེ་ཝ ཝི་པུ་ལཾ ཏི་ཎ་པུ་ཉྫཾ ཝཱ ཀ་ཊྛ་པུ་ཉྫཾ ཝཱ པ་རི་ཡཱ་དི་ཡི་ཏྭཱ ཨ་ནཱ་ཧཱ་རཱ ནི་བྦཱ་ཡེ་ཡྻ. ཨེ་ཝ་མེ་ཝཾ ཁོ, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ནོ ཙ་སྶ ནོ ཙ མེ སི་ཡཱ…པེ… སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ས་ས་ངྑཱ་ར་པ་རི་ནི་བྦཱ་ཡཱི ཧོ་ཏི.

‘‘ཨི་དྷ པ་ན, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ‘ནོ ཙ་སྶ ནོ ཙ མེ སི་ཡཱ, ན བྷ་ཝི་སྶ་ཏི ན མེ བྷ་ཝི་སྶ་ཏི, ཡ་ད་ཏྠི ཡཾ བྷཱུ་ཏཾ ཏཾ པ་ཛ་ཧཱ་མཱི’ཏི ཨུ་པེ་ཀྑཾ པ་ཊི་ལ་བྷ་ཏི. སོ བྷ་ཝེ ན ར་ཛྫ་ཏི, ས་མྦྷ་ཝེ ན ར་ཛྫ་ཏི, ཨ་ཏྠུ་ཏྟ་རི པ་དཾ ས་ནྟཾ ས་མྨ་པ་ཉྙཱ་ཡ པ་སྶ་ཏི. ཏ་ཉྩ ཁྭ་སྶ པ་དཾ ན ས་བྦེ་ན ས་བྦཾ ས་ཙྪི་ཀ་ཏཾ ཧོ་ཏི, ཏ་སྶ ན ས་བྦེ་ན ས་བྦཾ མཱ་ནཱ་ནུ་ས་ཡོ པ་ཧཱི་ནོ ཧོ་ཏི, ན ས་བྦེ་ན ས་བྦཾ བྷ་ཝ་རཱ་གཱ་ནུ་ས་ཡོ པ་ཧཱི་ནོ ཧོ་ཏི, ན ས་བྦེ་ན ས་བྦཾ ཨ་ཝི་ཛྫཱ་ནུ་ས་ཡོ པ་ཧཱི་ནོ ཧོ་ཏི. སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨུ་དྡྷཾ་སོ་ཏོ ཧོ་ཏི ཨ་ཀ་ནི་ཊྛ་གཱ་མཱི. སེ་ཡྻ་ཐཱ་པི, བྷི་ཀྑ་ཝེ, དི་ཝ་སཾ་ས་ནྟ་ཏྟེ ཨ་ཡོ་ཀ་པཱ་ལེ ཧ་ཉྙ་མཱ་ནེ པ་པ་ཊི་ཀཱ ནི་བྦ་ཏྟི་ཏྭཱ ཨུ་པྤ་ཏི་ཏྭཱ མ་ཧ་ནྟེ ཏི་ཎ་པུ་ཉྫེ ཝཱ ཀ་ཊྛ་པུ་ཉྫེ ཝཱ ནི་པ་ཏེ་ཡྻ. སཱ ཏ་ཏྠ ཨ་གྒི་མྤི ཛ་ནེ་ཡྻ, དྷཱུ་མ་མྤི ཛ་ནེ་ཡྻ, ཨ་གྒི་མྤི ཛ་ནེ་ཏྭཱ དྷཱུ་མ་མྤི ཛ་ནེ་ཏྭཱ ཏ་མེ་ཝ མ་ཧ་ནྟཾ ཏི་ཎ་པུ་ཉྫཾ ཝཱ ཀ་ཊྛ་པུ་ཉྫཾ ཝཱ པ་རི་ཡཱ་དི་ཡི་ཏྭཱ ག་ཙྪ་མྤི ད་ཧེ་ཡྻ [ཌ་ཧེ་ཡྻ (ཨ་ཉྙ་ཏྠ)], དཱ་ཡ་མྤི ད་ཧེ་ཡྻ, ག་ཙྪ་མྤི ད་ཧི་ཏྭཱ དཱ་ཡ་མྤི ད་ཧི་ཏྭཱ ཧ་རི་ཏ་ནྟཾ ཝཱ པ་ཐ་ནྟཾ ཝཱ [པ་ནྠ་ནྟཾ ཝཱ (སཱི.) སྱཱ་མ་པོ་ཏྠ་ཀེ ཨི་དཾ ན དི་སྶ་ཏི] སེ་ལ་ནྟཾ ཝཱ ཨུ་ད་ཀ་ནྟཾ ཝཱ ར་མ་ཎཱི་ཡཾ ཝཱ བྷཱུ་མི་བྷཱ་གཾ ཨཱ་ག་མྨ ཨ་ནཱ་ཧཱ་རཱ ནི་བྦཱ་ཡེ་ཡྻ. ཨེ་ཝ་མེ་ཝཾ ཁོ, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ནོ ཙ་སྶ ནོ ཙ མེ སི་ཡཱ…པེ… སོ པ་ཉྩ་ནྣཾ ཨོ་ར་མྦྷཱ་གི་ཡཱ་ནཾ སཾ་ཡོ་ཛ་ནཱ་ནཾ པ་རི་ཀྑ་ཡཱ ཨུ་དྡྷཾ་སོ་ཏོ ཧོ་ཏི ཨ་ཀ་ནི་ཊྛ་གཱ་མཱི. ཨི་མཱ ཁོ, བྷི་ཀྑ་ཝེ, ས་ཏྟ པུ་རི་ས་ག་ཏི་ཡོ.

‘‘ཀ་ཏ་མ་ཉྩ, བྷི་ཀྑ་ཝེ, ཨ་ནུ་པཱ་དཱ་པ་རི་ནི་བྦཱ་ནཾ? ཨི་དྷ, བྷི་ཀྑ་ཝེ, བྷི་ཀྑུ ཨེ་ཝཾ པ་ཊི་པ་ནྣོ ཧོ་ཏི – ‘ནོ ཙ་སྶ ནོ ཙ མེ སི་ཡཱ, ན བྷ་ཝི་སྶ་ཏི ན མེ བྷ་ཝི་སྶ་ཏི, ཡ་ད་ཏྠི ཡཾ བྷཱུ་ཏཾ ཏཾ པ་ཛ་ཧཱ་མཱི’ཏི ཨུ་པེ་ཀྑཾ པ་ཊི་ལ་བྷ་ཏི. སོ བྷ་ཝེ ན ར་ཛྫ་ཏི, ས་མྦྷ་ཝེ ན ར་ཛྫ་ཏི, ཨ་ཏྠུ་ཏྟ་རི པ་དཾ ས་ནྟཾ ས་མྨ་པྤ་ཉྙཱ་ཡ པ་སྶ་ཏི. ཏ་ཉྩ ཁྭ་སྶ པ་དཾ ས་བྦེ་ན ས་བྦཾ ས་ཙྪི་ཀ་ཏཾ ཧོ་ཏི, ཏ་སྶ ས་བྦེ་ན ས་བྦཾ མཱ་ནཱ་ནུ་ས་ཡོ པ་ཧཱི་ནོ ཧོ་ཏི, ས་བྦེ་ན ས་བྦཾ བྷ་ཝ་རཱ་གཱ་ནུ་ས་ཡོ པ་ཧཱི་ནོ ཧོ་ཏི, ས་བྦེ་ན ས་བྦཾ ཨ་ཝི་ཛྫཱ་ནུ་ས་ཡོ པ་ཧཱི་ནོ ཧོ་ཏི. སོ ཨཱ་ས་ཝཱ་ནཾ ཁ་ཡཱ…པེ… ས་ཙྪི་ཀ་ཏྭཱ ཨུ་པ་ས་མྤ་ཛྫ ཝི་ཧ་ར་ཏི. ཨི་དཾ ཝུ་ཙྩ་ཏི, བྷི་ཀྑ་ཝེ, ཨ་ནུ་པཱ་དཱ་པ་རི་ནི་བྦཱ་ནཾ. ཨི་མཱ ཁོ, བྷི་ཀྑ་ཝེ, ས་ཏྟ པུ་རི་ས་ག་ཏི་ཡོ ཨ་ནུ་པཱ་དཱ ཙ པ་རི་ནི་བྦཱ་ན’’ནྟི. དུ་ཏི་ཡཾ.