༥. དུ་ཏི་ཡ་སི་ཀྑཱ་པ་ད་སུ་ཏྟཾ

༢༣༦. ‘‘ཙ་ཏྟཱ་རི་མཱ་ནི, བྷི་ཀྑ་ཝེ, ཀ་མྨཱ་ནི མ་ཡཱ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ པ་ཝེ་དི་ཏཱ་ནི. ཀ་ཏ་མཱ་ནི ཙ་ཏྟཱ་རི? ཨ་ཏྠི, བྷི་ཀྑ་ཝེ, ཀ་མྨཾ ཀ་ཎྷཾ ཀ་ཎྷ་ཝི་པཱ་ཀཾ; ཨ་ཏྠི, བྷི་ཀྑ་ཝེ, ཀ་མྨཾ སུ་ཀྐཾ སུ་ཀྐ་ཝི་པཱ་ཀཾ; ཨ་ཏྠི, བྷི་ཀྑ་ཝེ, ཀ་མྨཾ ཀ་ཎྷ་སུ་ཀྐཾ ཀ་ཎྷ་སུ་ཀྐ་ཝི་པཱ་ཀཾ; ཨ་ཏྠི, བྷི་ཀྑ་ཝེ, ཀ་མྨཾ ཨ་ཀ་ཎྷ་ཨ་སུ་ཀྐཾ ཨ་ཀ་ཎྷ་ཨ་སུ་ཀྐ་ཝི་པཱ་ཀཾ ཀ་མྨ་ཀྑ་ཡཱ་ཡ སཾ་ཝ་ཏྟ་ཏི.

‘‘ཀ་ཏ་མ་ཉྩ, བྷི་ཀྑ་ཝེ, ཀ་མྨཾ ཀ་ཎྷཾ ཀ་ཎྷ་ཝི་པཱ་ཀཾ? ཨི་དྷ, བྷི་ཀྑ་ཝེ, ཨེ་ཀ་ཙྩེ་ན མཱ་ཏཱ [ཨེ་ཀ་ཙྩོ མཱ་ཏ་རཾ (ཀ.)] ཛཱི་ཝི་ཏཱ ཝོ་རོ་པི་ཏཱ ཧོ་ཏི, པི་ཏཱ [པི་ཏ་རཾ (ཀ.)] ཛཱི་ཝི་ཏཱ ཝོ་རོ་པི་ཏོ [ཝོ་རོ་པི་ཏཱ (ཀ.)] ཧོ་ཏི, ཨ་ར་ཧཾ [ཨ་ར་ཧ་ནྟཾ (ཀ.)] ཛཱི་ཝི་ཏཱ ཝོ་རོ་པི་ཏོ [ཝོ་རོ་པི་ཏཱ (ཀ.)] ཧོ་ཏི, ཏ་ཐཱ་ག་ཏ་སྶ དུ་ཊྛེ་ན ཙི་ཏྟེ་ན ལོ་ཧི་ཏཾ ཨུ་པྤཱ་དི་ཏཾ [ཨུ་པྤཱ་དི་ཏཱ (ཀ.)] ཧོ་ཏི, ས་ངྒྷོ བྷི་ནྣོ ཧོ་ཏི. ཨི་དཾ ཝུ་ཙྩ་ཏི, བྷི་ཀྑ་ཝེ, ཀ་མྨཾ ཀ་ཎྷཾ ཀ་ཎྷ་ཝི་པཱ་ཀཾ.

‘‘ཀ་ཏ་མ་ཉྩ, བྷི་ཀྑ་ཝེ, ཀ་མྨཾ སུ་ཀྐཾ སུ་ཀྐ་ཝི་པཱ་ཀཾ? ཨི་དྷ, བྷི་ཀྑ་ཝེ, ཨེ་ཀ་ཙྩོ པཱ་ཎཱ་ཏི་པཱ་ཏཱ པ་ཊི་ཝི་ར་ཏོ ཧོ་ཏི, ཨ་དི་ནྣཱ་དཱ་ནཱ པ་ཊི་ཝི་ར་ཏོ ཧོ་ཏི, ཀཱ་མེ་སུ་མི་ཙྪཱ་ཙཱ་རཱ པ་ཊི་ཝི་ར་ཏོ ཧོ་ཏི, མུ་སཱ་ཝཱ་དཱ པ་ཊི་ཝི་ར་ཏོ ཧོ་ཏི, པི་སུ་ཎཱ་ཡ ཝཱ་ཙཱ་ཡ པ་ཊི་ཝི་ར་ཏོ ཧོ་ཏི, ཕ་རུ་སཱ་ཡ ཝཱ་ཙཱ་ཡ པ་ཊི་ཝི་ར་ཏོ ཧོ་ཏི, ས་མྥ་པྤ་ལཱ་པཱ པ་ཊི་ཝི་ར་ཏོ ཧོ་ཏི, ཨ་ན་བྷི་ཛ྄ཛྷཱ་ལུ ཧོ་ཏི, ཨ་བྱཱ་པ་ནྣ་ཙི་ཏྟོ ཧོ་ཏི, ས་མྨཱ་དི་ཊྛི [ས་མྨཱ་དི་ཊྛི་ཀོ (སཱི. སྱཱ. ཀཾ.)] ཧོ་ཏི. ཨི་དཾ ཝུ་ཙྩ་ཏི, བྷི་ཀྑ་ཝེ, ཀ་མྨཾ སུ་ཀྐཾ སུ་ཀྐ་ཝི་པཱ་ཀཾ.

‘‘ཀ་ཏ་མ་ཉྩ, བྷི་ཀྑ་ཝེ, ཀ་མྨཾ ཀ་ཎྷ་སུ་ཀྐཾ ཀ་ཎྷ་སུ་ཀྐ་ཝི་པཱ་ཀཾ? ཨི་དྷ, བྷི་ཀྑ་ཝེ, ཨེ་ཀ་ཙྩོ ས་བྱཱ་བ་ཛ྄ཛྷ་མྤི ཨ་བྱཱ་བ་ཛ྄ཛྷ་མྤི ཀཱ་ཡ་ས་ངྑཱ་རཾ ཨ་བྷི་ས་ངྑ་རོ་ཏི…པེ… ཨི་དཾ ཝུ་ཙྩ་ཏི, བྷི་ཀྑ་ཝེ, ཀ་མྨཾ ཀ་ཎྷ་སུ་ཀྐཾ ཀ་ཎྷ་སུ་ཀྐ་ཝི་པཱ་ཀཾ.

‘‘ཀ་ཏ་མ་ཉྩ, བྷི་ཀྑ་ཝེ, ཀ་མྨཾ ཨ་ཀ་ཎྷ་ཨ་སུ་ཀྐཾ ཨ་ཀ་ཎྷ་ཨ་སུ་ཀྐ་ཝི་པཱ་ཀཾ ཀ་མྨ་ཀྑ་ཡཱ་ཡ སཾ་ཝ་ཏྟ་ཏི? ཏ་ཏྲ, བྷི་ཀྑ་ཝེ, ཡ་མི་དཾ ཀ་མྨཾ ཀ་ཎྷཾ ཀ་ཎྷ་ཝི་པཱ་ཀཾ…པེ… ཨི་དཾ ཝུ་ཙྩ་ཏི, བྷི་ཀྑ་ཝེ, ཀ་མྨཾ ཨ་ཀ་ཎྷ་ཨ་སུ་ཀྐཾ ཨ་ཀ་ཎྷ་ཨ་སུ་ཀྐ་ཝི་པཱ་ཀཾ ཀ་མྨ་ཀྑ་ཡཱ་ཡ སཾ་ཝ་ཏྟ་ཏི. ཨི་མཱ་ནི ཁོ, བྷི་ཀྑ་ཝེ, ཙ་ཏྟཱ་རི ཀ་མྨཱ་ནི མ་ཡཱ ས་ཡཾ ཨ་བྷི་ཉྙཱ ས་ཙྪི་ཀ་ཏྭཱ པ་ཝེ་དི་ཏཱ་ནཱི’’ཏི. པ་ཉྩ་མཾ.