༧. སུ་པྤ་ཝཱ་སཱ་སུ་ཏྟཾ

༥༧. ཨེ་ཀཾ ས་མ་ཡཾ བྷ་ག་ཝཱ ཀོ་ལི་ཡེ་སུ ཝི་ཧ་ར་ཏི པ་ཛྫ་ནི་ཀཾ [ས་ཛྫ་ནེ་ལཾ (སཱི. པཱི.), པ་ཛྫ་ནེ་ལཾ (སྱཱ. ཀཾ.)] ནཱ་མ ཀོ་ལི་ཡཱ་ནཾ ནི་ག་མོ. ཨ་ཐ ཁོ བྷ་ག་ཝཱ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན སུ་པྤ་ཝཱ་སཱ་ཡ ཀོ་ལི་ཡ་དྷཱི་ཏུ་ཡཱ ནི་ཝེ་ས་ནཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ཨ་ཐ ཁོ སུ་པྤ་ཝཱ་སཱ ཀོ་ལི་ཡ་དྷཱི་ཏཱ བྷ་ག་ཝ་ནྟཾ པ་ཎཱི་ཏེ་ན ཁཱ་ད་ནཱི་ཡེ་ན བྷོ་ཛ་ནཱི་ཡེ་ན ས་ཧ་ཏྠཱ ས་ནྟ་པྤེ་སི ས་མྤ་ཝཱ་རེ་སི. ཨ་ཐ ཁོ སུ་པྤ་ཝཱ་སཱ ཀོ་ལི་ཡ་དྷཱི་ཏཱ བྷ་ག་ཝ་ནྟཾ བྷུ་ཏྟཱ་ཝིཾ ཨོ་ནཱི་ཏ་པ་ཏྟ་པཱ་ཎིཾ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཾ ཁོ སུ་པྤ་ཝཱ་སཾ ཀོ་ལི་ཡ་དྷཱི་ཏ་རཾ བྷ་ག་ཝཱ ཨེ་ཏ་ད་ཝོ་ཙ –

‘‘བྷོ་ཛ་ནཾ, སུ་པྤ་ཝཱ་སེ, དེ་ནྟཱི ཨ་རི་ཡ་སཱ་ཝི་ཀཱ པ་ཊི་གྒཱ་ཧ་ཀཱ་ནཾ ཙ་ཏྟཱ་རི ཋཱ་ནཱ་ནི དེ་ཏི. ཀ་ཏ་མཱ་ནི ཙ་ཏྟཱ་རི? ཨཱ་ཡུཾ དེ་ཏི, ཝ་ཎྞཾ དེ་ཏི, སུ་ཁཾ དེ་ཏི, བ་ལཾ དེ་ཏི. ཨཱ་ཡུཾ ཁོ པ་ན ད་ཏྭཱ ཨཱ་ཡུ་སྶ བྷཱ་གི་ནཱི ཧོ་ཏི དི་བྦ་སྶ ཝཱ མཱ་ནུ་ས་སྶ ཝཱ. ཝ་ཎྞཾ ད་ཏྭཱ ཝ་ཎྞ་སྶ བྷཱ་གི་ནཱི ཧོ་ཏི དི་བྦ་སྶ ཝཱ མཱ་ནུ་ས་སྶ ཝཱ. སུ་ཁཾ ད་ཏྭཱ སུ་ཁ་སྶ བྷཱ་གི་ནཱི ཧོ་ཏི དི་བྦ་སྶ ཝཱ མཱ་ནུ་ས་སྶ ཝཱ. བ་ལཾ ད་ཏྭཱ བ་ལ་སྶ བྷཱ་གི་ནཱི ཧོ་ཏི དི་བྦ་སྶ ཝཱ མཱ་ནུ་ས་སྶ ཝཱ. བྷོ་ཛ་ནཾ, སུ་པྤ་ཝཱ་སེ, དེ་ནྟཱི ཨ་རི་ཡ་སཱ་ཝི་ཀཱ པ་ཊི་གྒཱ་ཧ་ཀཱ་ནཾ ཨི་མཱ་ནི ཙ་ཏྟཱ་རི ཋཱ་ནཱ་ནི དེ་ཏཱི’’ཏི.

‘‘སུ་ས་ངྑ་ཏཾ བྷོ་ཛ་ནཾ ཡཱ ད་དཱ་ཏི,

སུ་ཙིཾ པ་ཎཱི་ཏཾ [སུ་པ་ཎཱི་ཏཾ (ཀ.)] ར་ས་སཱ ཨུ་པེ་ཏཾ;

སཱ ད་ཀྑི་ཎཱ ཨུ་ཛྫུ་ག་ཏེ་སུ དི་ནྣཱ,

ཙ་ར་ཎཱུ་པ་པ་ནྣེ་སུ མ་ཧ་གྒ་ཏེ་སུ;

པུ་ཉྙེ་ན པུ་ཉྙཾ སཾ་ས་ནྡ་མཱ་ནཱ,

མ་ཧ་པྥ་ལཱ ལོ་ཀ་ཝི་དཱུ་ན ཝ་ཎྞི་ཏཱ.

‘‘ཨེ་ཏཱ་དི་སཾ ཡ་ཉྙ་མ་ནུ་སྶ་ར་ནྟཱ,

ཡེ ཝེ་ད་ཛཱ་ཏཱ ཝི་ཙ་ར་ནྟི ལོ་ཀེ;

ཝི་ནེ་ཡྻ མ་ཙྪེ་ར་མ་ལཾ ས་མཱུ་ལཾ,

ཨ་ནི་ནྡི་ཏཱ ས་གྒ་མུ་པེ་ནྟི ཋཱ་ན’’ནྟི. ས་ཏྟ་མཾ;