༥. པ་ཋ་མ་ས་མ་ཛཱི་ཝཱི་སུ་ཏྟཾ

༥༥. ཨེ་ཝཾ མེ སུ་ཏཾ – ཨེ་ཀཾ ས་མ་ཡཾ བྷ་ག་ཝཱ བྷ་གྒེ་སུ ཝི་ཧ་ར་ཏི སུ་སུ་མཱ་ར་གི་རེ [སུཾ་སུ་མཱ་ར་གི་རེ (སཱི. སྱཱ. ཀཾ. པཱི.)] བྷེ་ས་ཀ་ལཱ༹་ཝ་ནེ [བྷེ་ས་ཀ་ལཱ་ཝ་ནེ (སཱི. པཱི. ཀ.)] མི་ག་དཱ་ཡེ. ཨ་ཐ ཁོ བྷ་ག་ཝཱ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན ན་ཀུ་ལ་པི་ཏུ་ནོ ག་ཧ་པ་ཏི་སྶ ནི་ཝེ་ས་ནཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ཨ་ཐ ཁོ ན་ཀུ་ལ་པི་ཏཱ ཙ ག་ཧ་པ་ཏི ན་ཀུ་ལ་མཱ་ཏཱ ཙ ག་ཧ་པ་ཏཱ་ནཱི ཡེ་ན བྷ་ག་ཝཱ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དིཾ་སུ. ཨེ་ཀ་མ་ནྟཾ ནི་སི་ནྣོ ཁོ ན་ཀུ་ལ་པི་ཏཱ ག་ཧ་པ་ཏི བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘ཡ་ཏོ མེ, བྷ་ནྟེ, ན་ཀུ་ལ་མཱ་ཏཱ ག་ཧ་པ་ཏཱ་ནཱི ད་ཧ་ར་སྶེ་ཝ ད་ཧ་རཱ ཨཱ་ནཱི་ཏཱ, ནཱ་བྷི་ཛཱ་ནཱ་མི ན་ཀུ་ལ་མཱ་ཏ་རཾ ག་ཧ་པ་ཏཱ་ནིཾ མ་ན་སཱ་པི ཨ་ཏི་ཙ་རི་ཏཱ, ཀུ་ཏོ པ་ན ཀཱ་ཡེ་ན! ཨི་ཙྪེ་ཡྻཱ་མ མ་ཡཾ, བྷ་ནྟེ, དི་ཊྛེ ཙེ་ཝ དྷ་མྨེ ཨ་ཉྙ་མ་ཉྙཾ པ་སྶི་ཏུཾ ཨ་བྷི་ས་མྤ་རཱ་ཡ་ཉྩ ཨ་ཉྙ་མ་ཉྙཾ པ་སྶི་ཏུ’’ནྟི. ན་ཀུ་ལ་མཱ་ཏཱ་པི ཁོ ག་ཧ་པ་ཏཱ་ནཱི བྷ་ག་ཝ་ནྟཾ ཨེ་ཏ་ད་ཝོ་ཙ – ‘‘ཡ་ཏོ་ཧཾ, བྷ་ནྟེ, ན་ཀུ་ལ་པི་ཏུ་ནོ ག་ཧ་པ་ཏི་སྶ ད་ཧ་ར་སྶེ་ཝ ད་ཧ་རཱ ཨཱ་ནཱི་ཏཱ, ནཱ་བྷི་ཛཱ་ནཱ་མི ན་ཀུ་ལ་པི་ཏ་རཾ ག་ཧ་པ་ཏིཾ མ་ན་སཱ་པི ཨ་ཏི་ཙ་རི་ཏཱ, ཀུ་ཏོ པ་ན ཀཱ་ཡེ་ན! ཨི་ཙྪེ་ཡྻཱ་མ མ་ཡཾ, བྷ་ནྟེ, དི་ཊྛེ ཙེ་ཝ དྷ་མྨེ ཨ་ཉྙ་མ་ཉྙཾ པ་སྶི་ཏུཾ ཨ་བྷི་ས་མྤ་རཱ་ཡ་ཉྩ ཨ་ཉྙ་མ་ཉྙཾ པ་སྶི་ཏུ’’ནྟི.

‘‘ཨཱ་ཀ་ངྑེ་ཡྻུཾ ཙེ, ག་ཧ་པ་ཏ་ཡོ, ཨུ་བྷོ ཛཱ་ནི་པ་ཏ་ཡོ དི་ཊྛེ ཙེ་ཝ དྷ་མྨེ ཨ་ཉྙ་མ་ཉྙཾ པ་སྶི་ཏུཾ ཨ་བྷི་ས་མྤ་རཱ་ཡ་ཉྩ ཨ་ཉྙ་མ་ཉྙཾ པ་སྶི་ཏུཾ ཨུ་བྷོ་ཝ [ཨུ་བྷོ ཙ (སཱི. པཱི.)] ཨ་སྶུ ས་མ་ས་དྡྷཱ ས་མ་སཱི་ལཱ ས་མ་ཙཱ་གཱ ས་མ་པ་ཉྙཱ, ཏེ དི་ཊྛེ ཙེ་ཝ དྷ་མྨེ ཨ་ཉྙ་མ་ཉྙཾ པ་སྶ་ནྟི ཨ་བྷི་ས་མྤ་རཱ་ཡ་ཉྩ ཨ་ཉྙ་མ་ཉྙཾ པ་སྶ་ནྟཱི’’ཏི [པ་སྶི་སྶ་ནྟཱི་ཏི (ཀ.)].

‘‘ཨུ་བྷོ ས་དྡྷཱ ཝ་ད་ཉྙཱུ ཙ, ས་ཉྙ་ཏཱ དྷ་མྨ་ཛཱི་ཝི་ནོ;

ཏེ ཧོ་ནྟི ཛཱ་ནི་པ་ཏ་ཡོ, ཨ་ཉྙ་མ་ཉྙཾ པི་ཡཾ་ཝ་དཱ.

‘‘ཨ་ཏྠཱ་སཾ པ་ཙུ་རཱ ཧོ་ནྟི, ཕཱ་སུ་ཀཾ ཨུ་པ་ཛཱ་ཡ་ཏི;

ཨ་མི་ཏྟཱ དུ་མྨ་ནཱ ཧོ་ནྟི, ཨུ་བྷི་ནྣཾ ས་མ་སཱི་ལི་ནཾ.

‘‘ཨི་དྷ དྷ་མྨཾ ཙ་རི་ཏྭཱ་ན, ས་མ་སཱི་ལ་བྦ་ཏཱ ཨུ་བྷོ;

ན་ནྡི་ནོ དེ་ཝ་ལོ་ཀ་སྨིཾ, མོ་ད་ནྟི ཀཱ་མ་ཀཱ་མི་ནོ’’ཏི. པ་ཉྩ་མཾ;