༥. མི་ག་སཱ་ལཱ་སུ་ཏྟཾ

༧༥. ཨེ་ཀཾ ས་མ་ཡཾ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཨ་ཐ ཁོ ཨཱ་ཡ་སྨཱ ཨཱ་ན་ནྡོ པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན མི་ག་སཱ་ལཱ་ཡ ཨུ་པཱ་སི་ཀཱ་ཡ ནི་ཝེ་ས་ནཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དི. ཨ་ཐ ཁོ མི་ག་སཱ་ལཱ ཨུ་པཱ་སི་ཀཱ ཡེ་ནཱ་ཡ་སྨཱ ཨཱ་ན་ནྡོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཨཱ་ཡ་སྨ་ནྟཾ ཨཱ་ན་ནྡཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཱ ཁོ མི་ག་སཱ་ལཱ ཨུ་པཱ་སི་ཀཱ ཨཱ་ཡ་སྨ་ནྟཾ ཨཱ་ན་ནྡཾ ཨེ་ཏ་ད་ཝོ་ཙ –

‘‘ཀ་ཐཾ ཀ་ཐཾ ནཱ་མཱ་ཡཾ, བྷ་ནྟེ ཨཱ་ན་ནྡ, བྷ་ག་ཝ་ཏཱ དྷ་མྨོ དེ་སི་ཏོ ཨ་ཉྙེ་ཡྻོ, ཡ་ཏྲ ཧི ནཱ་མ བྲ་ཧྨ་ཙཱ་རཱི ཙ ཨ་བྲ་ཧྨ་ཙཱ་རཱི ཙ ཨུ་བྷོ ས་མ་ས་མ་ག་ཏི་ཀཱ བྷ་ཝི་སྶ་ནྟི ཨ་བྷི་ས་མྤ་རཱ་ཡཾ. པི་ཏཱ མེ, བྷ་ནྟེ, པུ་རཱ་ཎོ བྲ་ཧྨ་ཙཱ་རཱི ཧོ་ཏི ཨཱ་རཱ་ཙཱ་རཱི [ཨ་ནཱ་ཙཱ་རཱི (ཀ.)] ཝི་ར་ཏོ མེ་ཐུ་ནཱ གཱ་མ་དྷ་མྨཱ. སོ ཀཱ་ལ་ངྐ་ཏོ བྷ་ག་ཝ་ཏཱ བྱཱ་ཀ་ཏོ – ‘ས་ཀ་དཱ་གཱ་མཱི ས་ཏྟོ [ས་ཀ་དཱ་གཱ་མི་ས་ཏྟོ (སཱི. སྱཱ. པཱི.)] ཏུ་སི་ཏཾ ཀཱ་ཡཾ ཨུ་པ་པ་ནྣོ’ཏི. པི་ཏཱ་མ་ཧོ མེ [པེ་ཏྟཱ་པི ཡོ མེ (སཱི.), པི་ཏ པི་ཡོ མེ (སྱཱ.) ཨ. ནི. ༦.༤༤], བྷ་ནྟེ, ཨི་སི་ད་ཏྟོ ཨ་བྲ་ཧྨ་ཙཱ་རཱི ཨ་ཧོ་སི ས་དཱ་ར་ས་ནྟུ་ཊྛོ. སོ་པི ཀཱ་ལ་ངྐ་ཏོ བྷ་ག་ཝ་ཏཱ བྱཱ་ཀ་ཏོ – ‘ས་ཀ་དཱ་གཱ་མཱི ས་ཏྟོ ཏུ་སི་ཏཾ ཀཱ་ཡཾ ཨུ་པ་པ་ནྣོ’ཏི.

‘‘ཀ་ཐཾ ཀ་ཐཾ ནཱ་མཱ་ཡཾ, བྷ་ནྟེ ཨཱ་ན་ནྡ, བྷ་ག་ཝ་ཏཱ དྷ་མྨོ དེ་སི་ཏོ ཨ་ཉྙེ་ཡྻོ, ཡ་ཏྲ ཧི ནཱ་མ བྲ་ཧྨ་ཙཱ་རཱི ཙ ཨ་བྲ་ཧྨ་ཙཱ་རཱི ཙ ཨུ་བྷོ ས་མ་ས་མ་ག་ཏི་ཀཱ བྷ་ཝི་སྶ་ནྟི ཨ་བྷི་ས་མྤ་རཱ་ཡ’’ནྟི? ‘‘ཨེ་ཝཾ ཁོ པ་ནེ་ཏཾ, བྷ་གི་ནི, བྷ་ག་ཝ་ཏཱ བྱཱ་ཀ་ཏ’’ནྟི.

ཨ་ཐ ཁོ ཨཱ་ཡ་སྨཱ ཨཱ་ན་ནྡོ མི་ག་སཱ་ལཱ་ཡ ཨུ་པཱ་སི་ཀཱ་ཡ ནི་ཝེ་ས་ནེ པི་ཎྜ་པཱ་ཏཾ ག་ཧེ་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི. ཨ་ཐ ཁོ ཨཱ་ཡ་སྨཱ ཨཱ་ན་ནྡོ པ་ཙྪཱ་བྷ་ཏྟཾ པི་ཎྜ་པཱ་ཏ་པ་ཊི་ཀྐ་ནྟོ ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣོ ཁོ ཨཱ་ཡ་སྨཱ ཨཱ་ན་ནྡོ བྷ་ག་ཝ་ནྟཾ ཨེ་ཏ་ད་ཝོ་ཙ –

‘‘ཨི་དྷཱ་ཧཾ, བྷ་ནྟེ, པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཡེ་ན མི་ག་སཱ་ལཱ་ཡ ཨུ་པཱ་སི་ཀཱ་ཡ ནི་ཝེ་ས་ནཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ པ་ཉྙ་ཏྟེ ཨཱ་ས་ནེ ནི་སཱི་དིཾ. ཨ་ཐ ཁོ, བྷ་ནྟེ, མི་ག་སཱ་ལཱ ཨུ་པཱ་སི་ཀཱ ཡེ་ནཱ་ཧཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ མཾ ཨ་བྷི་ཝཱ་དེ་ཏྭཱ ཨེ་ཀ་མ་ནྟཾ ནི་སཱི་དི. ཨེ་ཀ་མ་ནྟཾ ནི་སི་ནྣཱ ཁོ, བྷ་ནྟེ, མི་ག་སཱ་ལཱ ཨུ་པཱ་སི་ཀཱ མཾ ཨེ་ཏ་ད་ཝོ་ཙ –

‘ཀ་ཐཾ ཀ་ཐཾ ནཱ་མཱ་ཡཾ, བྷ་ནྟེ ཨཱ་ན་ནྡ, བྷ་ག་ཝ་ཏཱ དྷ་མྨོ དེ་སི་ཏོ ཨ་ཉྙེ་ཡྻོ, ཡ་ཏྲ ཧི ནཱ་མ བྲ་ཧྨ་ཙཱ་རཱི ཙ ཨ་བྲ་ཧྨ་ཙཱ་རཱི ཙ ཨུ་བྷོ ས་མ་ས་མ་ག་ཏི་ཀཱ བྷ་ཝི་སྶ་ནྟི ཨ་བྷི་ས་མྤ་རཱ་ཡཾ. པི་ཏཱ མེ, བྷ་ནྟེ, པུ་རཱ་ཎོ བྲ་ཧྨ་ཙཱ་རཱི ཨ་ཧོ་སི ཨཱ་རཱ་ཙཱ་རཱི ཝི་ར་ཏོ མེ་ཐུ་ནཱ གཱ་མ་དྷ་མྨཱ. སོ ཀཱ་ལ་ངྐ་ཏོ བྷ་ག་ཝ་ཏཱ བྱཱ་ཀ་ཏོ ས་ཀ་དཱ་གཱ་མཱི ས་ཏྟོ ཏུ་སི་ཏཾ ཀཱ་ཡཾ ཨུ་པ་པ་ནྣོ་ཏི. པི་ཏཱ་མ་ཧོ མེ, བྷ་ནྟེ, ཨི་སི་ད་ཏྟོ ཨ་བྲ་ཧྨ་ཙཱ་རཱི ཨ་ཧོ་སི ས་དཱ་ར་ས་ནྟུ་ཊྛོ. སོ་པི ཀཱ་ལ་ངྐ་ཏོ བྷ་ག་ཝ་ཏཱ བྱཱ་ཀ་ཏོ – ས་ཀ་དཱ་གཱ་མཱི ས་ཏྟོ ཏུ་སི་ཏཾ ཀཱ་ཡཾ ཨུ་པ་པ་ནྣོ་ཏི.

ཀ་ཐཾ ཀ་ཐཾ ནཱ་མཱ་ཡཾ, བྷ་ནྟེ ཨཱ་ན་ནྡ, བྷ་ག་ཝ་ཏཱ དྷ་མྨོ དེ་སི་ཏོ ཨ་ཉྙེ་ཡྻོ, ཡ་ཏྲ ཧི ནཱ་མ བྲ་ཧྨ་ཙཱ་རཱི ཙ ཨ་བྲ་ཧྨ་ཙཱ་རཱི ཙ ཨུ་བྷོ ས་མ་ས་མ་ག་ཏི་ཀཱ བྷ་ཝི་སྶ་ནྟི ཨ་བྷི་ས་མྤ་རཱ་ཡ’ནྟི? ཨེ་ཝཾ ཝུ་ཏྟེ ཨ་ཧཾ, བྷ་ནྟེ, མི་ག་སཱ་ལཾ ཨུ་པཱ་སི་ཀཾ ཨེ་ཏ་ད་ཝོ་ཙཾ – ‘ཨེ་ཝཾ ཁོ པ་ནེ་ཏཾ, བྷ་གི་ནི, བྷ་ག་ཝ་ཏཱ བྱཱ་ཀ་ཏ’’’ནྟི.

‘‘ཀཱ ཙཱ་ན་ནྡ, མི་ག་སཱ་ལཱ ཨུ་པཱ་སི་ཀཱ བཱ་ལཱ ཨ་བྱ་ཏྟཱ ཨ་མྨ་ཀཱ ཨ་མྨ་ཀ་པ་ཉྙཱ [ཨ་མྦ་ཀཱ ཨ་མྦ་ཀ་པ་ཉྙཱ (སཱི. པཱི.), ཨ་ནྡྷ་ཀཱ ཨ་ནྡྷ་ཀ་པ་ཉྙཱ (སྱཱ.)], ཀེ ཙ པུ་རི་ས་པུ་གྒ་ལ་པ་རོ་པ་རི་ཡེ ཉཱ་ཎེ?

‘‘ད་ས་ཡི་མེ, ཨཱ་ན་ནྡ, པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨིཾ. ཀ་ཏ་མེ ད་ས? ཨི་དྷཱ་ན་ནྡ, ཨེ་ཀ་ཙྩོ པུ་གྒ་ལོ དུ་སྶཱི་ལོ ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི, ཡ་ཏྠ་སྶ ཏཾ དུ་སྶཱི་ལྱཾ ཨ་པ་རི་སེ་སཾ ནི་རུ་ཛ྄ཛྷ་ཏི. ཏ་སྶ ས་ཝ་ནེ་ན་པི ཨ་ཀ་ཏཾ ཧོ་ཏི, བཱ་ཧུ་ས་ཙྩེ་ན་པི ཨ་ཀ་ཏཾ ཧོ་ཏི, དི་ཊྛི་ཡཱ་པི ཨ་པྤ་ཊི་ཝི་དྡྷཾ ཧོ་ཏི, སཱ་མཱ་ཡི་ཀ་མྤི ཝི་མུ་ཏྟིཾ ན ལ་བྷ་ཏི. སོ ཀཱ་ཡ་སྶ བྷེ་དཱ པ་རཾ མ་ར་ཎཱ ཧཱ་ནཱ་ཡ པ་རེ་ཏི, ནོ ཝི་སེ་སཱ་ཡ; ཧཱ་ན་གཱ་མཱི་ཡེ་ཝ ཧོ་ཏི, ནོ ཝི་སེ་ས་གཱ་མཱི.

‘‘ཨི་དྷ པ་ནཱ་ན་ནྡ, ཨེ་ཀ་ཙྩོ པུ་གྒ་ལོ དུ་སྶཱི་ལོ ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ ཡ་ཐཱ་བྷཱུ་ཏཾ པ་ཛཱ་ནཱ་ཏི ཡ་ཏྠ་སྶ ཏཾ དུ་སྶཱི་ལྱཾ ཨ་པ་རི་སེ་སཾ ནི་རུ་ཛ྄ཛྷ་ཏི. ཏ་སྶ ས་ཝ་ནེ་ན་པི ཀ་ཏཾ ཧོ་ཏི, བཱ་ཧུ་ས་ཙྩེ་ན་པི ཀ་ཏཾ ཧོ་ཏི, དི་ཊྛི་ཡཱ་པི པ་ཊི་ཝི་དྡྷཾ [སུ་པྤ་ཊི་ཝི་དྡྷཾ (སྱཱ.)] ཧོ་ཏི, སཱ་མཱ་ཡི་ཀ་མྤི ཝི་མུ་ཏྟིཾ ལ་བྷ་ཏི. སོ ཀཱ་ཡ་སྶ བྷེ་དཱ པ་རཾ མ་ར་ཎཱ ཝི་སེ་སཱ་ཡ པ་རེ་ཏི, ནོ ཧཱ་ནཱ་ཡ; ཝི་སེ་ས་གཱ་མཱི་ཡེ་ཝ ཧོ་ཏི, ནོ ཧཱ་ན་གཱ་མཱི.

‘‘ཏ་ཏྲཱ་ན་ནྡ, པ་མཱ་ཎི་ཀཱ པ་མི་ཎ་ནྟི – ‘ཨི་མ་སྶ་པི ཏེ་ཝ དྷ་མྨཱ, ཨ་པ་ར་སྶ་པི ཏེ་ཝ དྷ་མྨཱ. ཀ་སྨཱ ནེ་སཾ ཨེ་ཀོ ཧཱི་ནོ ཨེ་ཀོ པ་ཎཱི་ཏོ’ཏི? ཏ་ཉྷི ཏེ་སཾ, ཨཱ་ན་ནྡ, ཧོ་ཏི དཱི་གྷ་ར་ཏྟཾ ཨ་ཧི་ཏཱ་ཡ དུ་ཀྑཱ་ཡ.

‘‘ཏ་ཏྲཱ་ན་ནྡ, ཡྭཱ་ཡཾ པུ་གྒ་ལོ དུ་སྶཱི་ལོ ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ ཡ་ཐཱ་བྷཱུ་ཏཾ པ་ཛཱ་ནཱ་ཏི ཡ་ཏྠ་སྶ ཏཾ དུ་སྶཱི་ལྱཾ ཨ་པ་རི་སེ་སཾ ནི་རུ་ཛ྄ཛྷ་ཏི. ཏ་སྶ ས་ཝ་ནེ་ན་པི ཀ་ཏཾ ཧོ་ཏི, བཱ་ཧུ་ས་ཙྩེ་ན་པི ཀ་ཏཾ ཧོ་ཏི, དི་ཊྛི་ཡཱ་པི པ་ཊི་ཝི་དྡྷཾ ཧོ་ཏི, སཱ་མཱ་ཡི་ཀ་མྤི ཝི་མུ་ཏྟིཾ ལ་བྷ་ཏི. ཨ་ཡཾ, ཨཱ་ན་ནྡ, པུ་གྒ་ལོ ཨ་མུ་ནཱ པུ་རི་མེ་ན པུ་གྒ་ལེ་ན ཨ་བྷི་ཀྐ་ནྟ་ཏ་རོ ཙ པ་ཎཱི་ཏ་ཏ་རོ ཙ. ཏཾ ཀི་སྶ ཧེ་ཏུ? ཨི་མཾ ཧཱ་ན་ནྡ, པུ་གྒ་ལཾ དྷ་མྨ་སོ་ཏོ ནི་བྦ་ཧ་ཏི. ཏ་ད་ནྟ་རཾ ཀོ ཛཱ་ནེ་ཡྻ, ཨ་ཉྙ་ཏྲ ཏ་ཐཱ་ག་ཏེ་ན! ཏ་སྨཱ་ཏི་ཧཱ་ན་ནྡ, མཱ པུ་གྒ་ལེ་སུ པ་མཱ་ཎི་ཀཱ ཨ་ཧུ་ཝ་ཏྠ, མཱ པུ་གྒ་ལེ་སུ པ་མཱ་ཎཾ ག་ཎྷི་ཏྠ. ཁ་ཉྙ་ཏི ཧཱ་ན་ནྡ, པུ་གྒ་ལེ་སུ པ་མཱ་ཎཾ ག་ཎྷ་ནྟོ. ཨ་ཧཾ ཝཱ, ཨཱ་ན་ནྡ [ཨ་ཧ་ཉྩཱ་ན་ནྡ (སཱི. སྱཱ. ཀ.) ཨ. ནི. ༦.༤༤ པ་སྶི་ཏ་བྦཾ], པུ་གྒ་ལེ་སུ པ་མཱ་ཎཾ ག་ཎྷེ་ཡྻཾ ཡོ ཝཱ པ་ན་སྶ མཱ་དི་སོ.

‘‘ཨི་དྷ པ་ནཱ་ན་ནྡ, ཨེ་ཀ་ཙྩོ པུ་གྒ་ལོ སཱི་ལ་ཝཱ ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི ཡ་ཏྠ་སྶ ཏཾ སཱི་ལཾ ཨ་པ་རི་སེ་སཾ ནི་རུ་ཛ྄ཛྷ་ཏི. ཏ་སྶ ས་ཝ་ནེ་ན་པི ཨ་ཀ་ཏཾ ཧོ་ཏི, བཱ་ཧུ་ས་ཙྩེ་ན་པི ཨ་ཀ་ཏཾ ཧོ་ཏི, དི་ཊྛི་ཡཱ་པི ཨ་པྤ་ཊི་ཝི་དྡྷཾ ཧོ་ཏི, སཱ་མཱ་ཡི་ཀ་མྤི ཝི་མུ་ཏྟིཾ ན ལ་བྷ་ཏི. སོ ཀཱ་ཡ་སྶ བྷེ་དཱ པ་རཾ མ་ར་ཎཱ ཧཱ་ནཱ་ཡ པ་རེ་ཏི, ནོ ཝི་སེ་སཱ་ཡ; ཧཱ་ན་གཱ་མཱི་ཡེ་ཝ ཧོ་ཏི, ནོ ཝི་སེ་ས་གཱ་མཱི.

‘‘ཨི་དྷ པ་ནཱ་ན་ནྡ, ཨེ་ཀ་ཙྩོ པུ་གྒ་ལོ སཱི་ལ་ཝཱ ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ ཡ་ཐཱ་བྷཱུ་ཏཾ པ་ཛཱ་ནཱ་ཏི ཡ་ཏྠ་སྶ ཏཾ སཱི་ལཾ ཨ་པ་རི་སེ་སཾ ནི་རུ་ཛ྄ཛྷ་ཏི. ཏ་སྶ ས་ཝ་ནེ་ན་པི ཀ་ཏཾ ཧོ་ཏི, བཱ་ཧུ་ས་ཙྩེ་ན་པི ཀ་ཏཾ ཧོ་ཏི, དི་ཊྛི་ཡཱ་པི པ་ཊི་ཝི་དྡྷཾ ཧོ་ཏི, སཱ་མཱ་ཡི་ཀ་མྤི ཝི་མུ་ཏྟིཾ ལ་བྷ་ཏི. སོ ཀཱ་ཡ་སྶ བྷེ་དཱ པ་རཾ མ་ར་ཎཱ ཝི་སེ་སཱ་ཡ པ་རེ་ཏི, ནོ ཧཱ་ནཱ་ཡ; ཝི་སེ་ས་གཱ་མཱི་ཡེ་ཝ ཧོ་ཏི, ནོ ཧཱ་ན་གཱ་མཱི.

‘‘ཏ་ཏྲཱ་ན་ནྡ, པ་མཱ་ཎི་ཀཱ པ་མི་ཎ་ནྟི…པེ… ཨ་ཧཾ ཝཱ, ཨཱ་ན་ནྡ, པུ་གྒ་ལེ་སུ པ་མཱ་ཎཾ ག་ཎྷེ་ཡྻཾ ཡོ ཝཱ པ་ན་སྶ མཱ་དི་སོ.

‘‘ཨི་དྷ པ་ནཱ་ན་ནྡ, ཨེ་ཀ་ཙྩོ པུ་གྒ་ལོ ཏི་བྦ་རཱ་གོ ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི ཡ་ཏྠ་སྶ སོ རཱ་གོ ཨ་པ་རི་སེ་སོ ནི་རུ་ཛ྄ཛྷ་ཏི. ཏ་སྶ ས་ཝ་ནེ་ན་པི ཨ་ཀ་ཏཾ ཧོ་ཏི, བཱ་ཧུ་ས་ཙྩེ་ན་པི ཨ་ཀ་ཏཾ ཧོ་ཏི, དི་ཊྛི་ཡཱ་པི ཨ་པྤ་ཊི་ཝི་དྡྷཾ ཧོ་ཏི, སཱ་མཱ་ཡི་ཀ་མྤི ཝི་མུ་ཏྟིཾ ན ལ་བྷ་ཏི. སོ ཀཱ་ཡ་སྶ བྷེ་དཱ པ་རཾ མ་ར་ཎཱ ཧཱ་ནཱ་ཡ པ་རེ་ཏི, ནོ ཝི་སེ་སཱ་ཡ; ཧཱ་ན་གཱ་མཱི་ཡེ་ཝ ཧོ་ཏི, ནོ ཝི་སེ་ས་གཱ་མཱི.

‘‘ཨི་དྷ པ་ནཱ་ན་ནྡ, ཨེ་ཀ་ཙྩོ པུ་གྒ་ལོ ཏི་བྦ་རཱ་གོ ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ ཡ་ཐཱ་བྷཱུ་ཏཾ པ་ཛཱ་ནཱ་ཏི ཡ་ཏྠ་སྶ སོ རཱ་གོ ཨ་པ་རི་སེ་སོ ནི་རུ་ཛ྄ཛྷ་ཏི. ཏ་སྶ ས་ཝ་ནེ་ན་པི ཀ་ཏཾ ཧོ་ཏི, བཱ་ཧུ་ས་ཙྩེ་ན་པི ཀ་ཏཾ ཧོ་ཏི, དི་ཊྛི་ཡཱ་པི པ་ཊི་ཝི་དྡྷཾ ཧོ་ཏི, སཱ་མཱ་ཡི་ཀ་མྤི ཝི་མུ་ཏྟིཾ ལ་བྷ་ཏི. སོ ཀཱ་ཡ་སྶ བྷེ་དཱ པ་རཾ མ་ར་ཎཱ ཝི་སེ་སཱ་ཡ པ་རེ་ཏི, ནོ ཧཱ་ནཱ་ཡ; ཝི་སེ་ས་གཱ་མཱི་ཡེ་ཝ ཧོ་ཏི, ནོ ཧཱ་ན་གཱ་མཱི.

‘‘ཨི་དྷ པ་ནཱ་ན་ནྡ, ཨེ་ཀ་ཙྩོ པུ་གྒ་ལོ ཀོ་དྷ་ནོ ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི ཡ་ཏྠ་སྶ སོ ཀོ་དྷོ ཨ་པ་རི་སེ་སོ ནི་རུ་ཛ྄ཛྷ་ཏི. ཏ་སྶ ས་ཝ་ནེ་ན་པི ཨ་ཀ་ཏཾ ཧོ་ཏི, བཱ་ཧུ་ས་ཙྩེ་ན་པི ཨ་ཀ་ཏཾ ཧོ་ཏི, དི་ཊྛི་ཡཱ་པི ཨ་པྤ་ཊི་ཝི་དྡྷཾ ཧོ་ཏི, སཱ་མཱ་ཡི་ཀ་མྤི ཝི་མུ་ཏྟིཾ ན ལ་བྷ་ཏི. སོ ཀཱ་ཡ་སྶ བྷེ་དཱ པ་རཾ མ་ར་ཎཱ ཧཱ་ནཱ་ཡ པ་རེ་ཏི, ནོ ཝི་སེ་སཱ་ཡ; ཧཱ་ན་གཱ་མཱི་ཡེ་ཝ ཧོ་ཏི, ནོ ཝི་སེ་ས་གཱ་མཱི.

‘‘ཨི་དྷ པ་ནཱ་ན་ནྡ, ཨེ་ཀ་ཙྩོ པུ་གྒ་ལོ ཀོ་དྷ་ནོ ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ ཡ་ཐཱ་བྷཱུ་ཏཾ པ་ཛཱ་ནཱ་ཏི ཡ་ཏྠ་སྶ སོ ཀོ་དྷོ ཨ་པ་རི་སེ་སོ ནི་རུ་ཛ྄ཛྷ་ཏི. ཏ་སྶ ས་ཝ་ནེ་ན་པི ཀ་ཏཾ ཧོ་ཏི, བཱ་ཧུ་ས་ཙྩེ་ན་པི ཀ་ཏཾ ཧོ་ཏི, དི་ཊྛི་ཡཱ་པི པ་ཊི་ཝི་དྡྷཾ ཧོ་ཏི, སཱ་མཱ་ཡི་ཀ་མྤི ཝི་མུ་ཏྟིཾ ལ་བྷ་ཏི. སོ ཀཱ་ཡ་སྶ བྷེ་དཱ པ་རཾ མ་ར་ཎཱ ཝི་སེ་སཱ་ཡ པ་རེ་ཏི, ནོ ཧཱ་ནཱ་ཡ; ཝི་སེ་ས་གཱ་མཱི་ཡེ་ཝ ཧོ་ཏི, ནོ ཧཱ་ན་གཱ་མཱི.

‘‘ཨི་དྷ པ་ནཱ་ན་ནྡ, ཨེ་ཀ་ཙྩོ པུ་གྒ་ལོ ཨུ་དྡྷ་ཏོ ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ ཡ་ཐཱ་བྷཱུ་ཏཾ ན་པྤ་ཛཱ་ནཱ་ཏི ཡ་ཏྠ་སྶ ཏཾ ཨུ་དྡྷ་ཙྩཾ ཨ་པ་རི་སེ་སཾ ནི་རུ་ཛ྄ཛྷ་ཏི. ཏ་སྶ ས་ཝ་ནེ་ན་པི ཨ་ཀ་ཏཾ ཧོ་ཏི, བཱ་ཧུ་ས་ཙྩེ་ན་པི ཨ་ཀ་ཏཾ ཧོ་ཏི, དི་ཊྛི་ཡཱ་པི ཨ་པྤ་ཊི་ཝི་དྡྷཾ ཧོ་ཏི, སཱ་མཱ་ཡི་ཀ་མྤི ཝི་མུ་ཏྟིཾ ན ལ་བྷ་ཏི. སོ ཀཱ་ཡ་སྶ བྷེ་དཱ པ་རཾ མ་ར་ཎཱ ཧཱ་ནཱ་ཡ པ་རེ་ཏི, ནོ ཝི་སེ་སཱ་ཡ; ཧཱ་ན་གཱ་མཱི་ཡེ་ཝ ཧོ་ཏི, ནོ ཝི་སེ་ས་གཱ་མཱི.

‘‘ཨི་དྷ པ་ནཱ་ན་ནྡ, ཨེ་ཀ་ཙྩོ པུ་གྒ་ལོ ཨུ་དྡྷ་ཏོ ཧོ་ཏི. ཏ་ཉྩ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ ཡ་ཐཱ་བྷཱུ་ཏཾ པ་ཛཱ་ནཱ་ཏི ཡ་ཏྠ་སྶ ཏཾ ཨུ་དྡྷ་ཙྩཾ ཨ་པ་རི་སེ་སཾ ནི་རུ་ཛ྄ཛྷ་ཏི. ཏ་སྶ ས་ཝ་ནེ་ན་པི ཀ་ཏཾ ཧོ་ཏི, བཱ་ཧུ་ས་ཙྩེ་ན་པི ཀ་ཏཾ ཧོ་ཏི, དི་ཊྛི་ཡཱ་པི པ་ཊི་ཝི་དྡྷཾ ཧོ་ཏི, སཱ་མཱ་ཡི་ཀ་མྤི ཝི་མུ་ཏྟིཾ ལ་བྷ་ཏི. སོ ཀཱ་ཡ་སྶ བྷེ་དཱ པ་རཾ མ་ར་ཎཱ ཝི་སེ་སཱ་ཡ པ་རེ་ཏི, ནོ ཧཱ་ནཱ་ཡ; ཝི་སེ་ས་གཱ་མཱི་ཡེ་ཝ ཧོ་ཏི, ནོ ཧཱ་ན་གཱ་མཱི.

‘‘ཏ་ཏྲཱ་ན་ནྡ, ཡྭཱ་ཡཾ པུ་གྒ་ལོ ཨུ་དྡྷ་ཏོ ཧོ་ཏི ཏ་ཉྩ ཙེ་ཏོ་ཝི་མུ་ཏྟིཾ པ་ཉྙཱ་ཝི་མུ་ཏྟིཾ ཡ་ཐཱ་བྷཱུ་ཏཾ པ་ཛཱ་ནཱ་ཏི ཡ་ཏྠ་སྶ ཏཾ ཨུ་དྡྷ་ཙྩཾ ཨ་པ་རི་སེ་སཾ ནི་རུ་ཛ྄ཛྷ་ཏི, ཏ་སྶ ས་ཝ་ནེ་ན་པི ཀ་ཏཾ ཧོ་ཏི, བཱ་ཧུ་ས་ཙྩེ་ན་པི ཀ་ཏཾ ཧོ་ཏི, དི་ཊྛི་ཡཱ་པི པ་ཊི་ཝི་དྡྷཾ ཧོ་ཏི, སཱ་མཱ་ཡི་ཀ་མྤི ཝི་མུ་ཏྟིཾ ལ་བྷ་ཏི. ཨ་ཡཾ, ཨཱ་ན་ནྡ, པུ་གྒ་ལོ ཨ་མུ་ནཱ པུ་རི་མེ་ན པུ་གྒ་ལེ་ན ཨ་བྷི་ཀྐ་ནྟ་ཏ་རོ ཙ པ་ཎཱི་ཏ་ཏ་རོ ཙ. ཏཾ ཀི་སྶ ཧེ་ཏུ? ཨི་མཾ ཧཱ་ན་ནྡ, པུ་གྒ་ལཾ དྷ་མྨ་སོ་ཏོ ནི་བྦ་ཧ་ཏི. ཏ་ད་ནྟ་རཾ ཀོ ཛཱ་ནེ་ཡྻ ཨ་ཉྙ་ཏྲ ཏ་ཐཱ་ག་ཏེ་ན! ཏ་སྨཱ་ཏི་ཧཱ་ན་ནྡ, མཱ པུ་གྒ་ལེ་སུ པ་མཱ་ཎི་ཀཱ ཨ་ཧུ་ཝ་ཏྠ; མཱ པུ་གྒ་ལེ་སུ པ་མཱ་ཎཾ ག་ཎྷི་ཏྠ. ཁ་ཉྙ་ཏི ཧཱ་ན་ནྡ, པུ་གྒ་ལེ་སུ པ་མཱ་ཎཾ ག་ཎྷ་ནྟོ. ཨ་ཧཾ ཝཱ, ཨཱ་ན་ནྡ, པུ་གྒ་ལེ་སུ པ་མཱ་ཎཾ ག་ཎྷེ་ཡྻཾ ཡོ ཝཱ པ་ན་སྶ མཱ་དི་སོ.

‘‘ཀཱ ཙཱ་ན་ནྡ, མི་ག་སཱ་ལཱ ཨུ་པཱ་སི་ཀཱ བཱ་ལཱ ཨ་བྱ་ཏྟཱ ཨ་མྨ་ཀཱ ཨ་མྨ་ཀ་པ་ཉྙཱ, ཀེ ཙ པུ་རི་ས་པུ་གྒ་ལ་པ་རོ་པ་རི་ཡེ ཉཱ་ཎེ! ཨི་མེ ཁོ, ཨཱ་ན་ནྡ, ད་ས པུ་གྒ་ལཱ ས་ནྟོ སཾ་ཝི་ཛྫ་མཱ་ནཱ ལོ་ཀ་སྨིཾ.

‘‘ཡ་ཐཱ་རཱུ་པེ་ན, ཨཱ་ན་ནྡ, སཱི་ལེ་ན པུ་རཱ་ཎོ ས་མ་ནྣཱ་ག་ཏོ ཨ་ཧོ་སི ཏ་ཐཱ་རཱུ་པེ་ན སཱི་ལེ་ན ཨི་སི་ད་ཏྟོ ས་མ་ནྣཱ་ག་ཏོ ཨ་བྷ་ཝི་སྶ, ན་ཡི་དྷ པུ་རཱ་ཎོ ཨི་སི་ད་ཏྟ་སྶ ག་ཏི་མྤི ཨ་ཉྙ་སྶ. ཡ་ཐཱ་རཱུ་པཱ་ཡ ཙཱ་ན་ནྡ, པ་ཉྙཱ་ཡ ཨི་སི་ད་ཏྟོ ས་མ་ནྣཱ་ག་ཏོ ཨ་ཧོ་སི ཏ་ཐཱ་རཱུ་པཱ་ཡ པ་ཉྙཱ་ཡ པུ་རཱ་ཎོ ས་མ་ནྣཱ་ག་ཏོ ཨ་བྷ་ཝི་སྶ, ན་ཡི་དྷ ཨི་སི་ད་ཏྟོ པུ་རཱ་ཎ་སྶ ག་ཏི་མྤི ཨ་ཉྙ་སྶ. ཨི་ཏི ཁོ, ཨཱ་ན་ནྡ, ཨི་མེ པུ་གྒ་ལཱ ཨུ་བྷོ ཨེ་ཀ་ངྒ་ཧཱི་ནཱ’’ཏི. པ་ཉྩ་མཾ.