༥. པ་ཎི་ཧི་ཏ་ཨ་ཙྪ་ཝ་གྒོ
༤༡. ‘‘སེ་ཡྻ་ཐཱ་པི, བྷི་ཀྑ་ཝེ, སཱ་ལི་སཱུ་ཀཾ ཝཱ ཡ་ཝ་སཱུ་ཀཾ ཝཱ མི་ཙྪཱ་པ་ཎི་ཧི་ཏཾ ཧ་ཏྠེ་ན ཝཱ པཱ་དེ་ན ཝཱ ཨ་ཀྐ་ནྟཾ ཧ་ཏྠཾ ཝཱ པཱ་དཾ ཝཱ བྷེ་ཙྪ་ཏི [བྷི་ཛྫི་སྶ་ཏི (སྱཱ. ཀཾ. ཀ.), བྷེ་ཛྫ་ཏི (སཱི.) མོ་གྒ་ལླཱ་ན་བྱཱ་ཀ་ར་ཎཾ པ་སྶི་ཏ་བྦཾ] ལོ་ཧི་ཏཾ ཝཱ ཨུ་པྤཱ་དེ་སྶ་ཏཱི་ཏི ནེ་ཏཾ ཋཱ་ནཾ ཝི་ཛྫ་ཏི. ཏཾ ཀི་སྶ ཧེ་ཏུ? མི་ཙྪཱ་པ་ཎི་ཧི་ཏ་ཏྟཱ, བྷི་ཀྑ་ཝེ, སཱུ་ཀ་སྶ. ཨེ་ཝ་མེ་ཝཾ ཁོ, བྷི་ཀྑ་ཝེ, སོ ཝ་ཏ བྷི་ཀྑུ མི་ཙྪཱ་པ་ཎི་ཧི་ཏེ་ན ཙི་ཏྟེ་ན ཨ་ཝི་ཛྫཾ བྷེ་ཙྪ་ཏི, ཝི་ཛྫཾ ཨུ་པྤཱ་དེ་སྶ་ཏི, ནི་བྦཱ་ནཾ ས་ཙྪི་ཀ་རི་སྶ་ཏཱི་ཏི ནེ་ཏཾ ཋཱ་ནཾ ཝི་ཛྫ་ཏི. ཏཾ ཀི་སྶ ཧེ་ཏུ? མི་ཙྪཱ་པ་ཎི་ཧི་ཏ་ཏྟཱ, བྷི་ཀྑ་ཝེ, ཙི་ཏྟ་སྶཱ’’ཏི. པ་ཋ་མཾ.
༤༢. ‘‘སེ་ཡྻ་ཐཱ་པི, བྷི་ཀྑ་ཝེ, སཱ་ལི་སཱུ་ཀཾ ཝཱ ཡ་ཝ་སཱུ་ཀཾ ཝཱ ས་མྨཱ་པ་ཎི་ཧི་ཏཾ ཧ་ཏྠེ་ན ཝཱ པཱ་དེ་ན ཝཱ ཨ་ཀྐ་ནྟཾ ཧ་ཏྠཾ ཝཱ པཱ་དཾ ཝཱ བྷེ་ཙྪ་ཏི ལོ་ཧི་ཏཾ ཝཱ ཨུ་པྤཱ་དེ་སྶ་ཏཱི་ཏི ཋཱ་ན་མེ་ཏཾ ཝི་ཛྫ་ཏི. ཏཾ ཀི་སྶ ཧེ་ཏུ? ས་མྨཱ་པ་ཎི་ཧི་ཏ་ཏྟཱ, བྷི་ཀྑ་ཝེ, སཱུ་ཀ་སྶ. ཨེ་ཝ་མེ་ཝཾ ཁོ, བྷི་ཀྑ་ཝེ, སོ ཝ་ཏ བྷི་ཀྑུ ས་མྨཱ་པ་ཎི་ཧི་ཏེ་ན ཙི་ཏྟེ་ན ཨ་ཝི་ཛྫཾ བྷེ་ཙྪ་ཏི, ཝི་ཛྫཾ ཨུ་པྤཱ་དེ་སྶ་ཏི, ནི་བྦཱ་ནཾ ས་ཙྪི་ཀ་རི་སྶ་ཏཱི་ཏི ཋཱ་ན་མེ་ཏཾ ཝི་ཛྫ་ཏི. ཏཾ ཀི་སྶ ཧེ་ཏུ? ས་མྨཱ་པ་ཎི་ཧི་ཏ་ཏྟཱ, བྷི་ཀྑ་ཝེ, ཙི་ཏྟ་སྶཱ’’ཏི. དུ་ཏི་ཡཾ.
༤༣. ‘‘ཨི་དྷཱ་ཧཾ [ཨི་དཱ་ཧཾ (སཱི.)], བྷི་ཀྑ་ཝེ, ཨེ་ཀ་ཙྩཾ པུ་གྒ་ལཾ པ་དུ་ཊྛ་ཙི་ཏྟཾ ཨེ་ཝཾ ཙེ་ཏ་སཱ ཙེ་ཏོ པ་རི་ཙྩ པ་ཛཱ་ནཱ་མི – ‘ཨི་མ་མྷི ཙེ ཨ་ཡཾ ས་མ་ཡེ པུ་གྒ་ལོ ཀཱ་ལཾ ཀ་རེ་ཡྻ, ཡ་ཐཱ་བྷ་ཏཾ ནི་ཀྑི་ཏྟོ ཨེ་ཝཾ ནི་ར་ཡེ’. ཏཾ ཀི་སྶ ཧེ་ཏུ? ཙི་ཏྟཾ ཧི་སྶ, བྷི་ཀྑ་ཝེ, པ་དུ་ཊྛཾ. ‘‘ཙེ་ཏོ་པ་དོ་ས་ཧེ་ཏུ པ་ན, བྷི་ཀྑ་ཝེ, ཨེ་ཝ་མི་དྷེ་ཀ་ཙྩེ ས་ཏྟཱ ཀཱ་ཡ་སྶ བྷེ་དཱ པ་རཾ མ་ར་ཎཱ ཨ་པཱ་ཡཾ དུ་གྒ་ཏིཾ ཝི་ནི་པཱ་ཏཾ ནི་ར་ཡཾ ཨུ་པ་པ་ཛྫ་ནྟཱི’’ཏི. ཏ་ཏི་ཡཾ.
༤༤. ‘‘ཨི་དྷཱ་ཧཾ, བྷི་ཀྑ་ཝེ, ཨེ་ཀ་ཙྩཾ པུ་གྒ་ལཾ པ་ས་ནྣ་ཙི་ཏྟཾ ཨེ་ཝཾ ཙེ་ཏ་སཱ ཙེ་ཏོ པ་རི་ཙྩ པ་ཛཱ་ནཱ་མི – ‘ཨི་མ་མྷི ཙེ ཨ་ཡཾ ས་མ་ཡེ པུ་གྒ་ལོ ཀཱ་ལཾ ཀ་རེ་ཡྻ, ཡ་ཐཱ་བྷ་ཏཾ ནི་ཀྑི་ཏྟོ ཨེ་ཝཾ ས་གྒེ’. ཏཾ ཀི་སྶ ཧེ་ཏུ? ཙི་ཏྟཾ ཧི་སྶ, བྷི་ཀྑ་ཝེ, པ་ས་ནྣཾ. ‘‘ཙེ་ཏོ་པ་སཱ་ད་ཧེ་ཏུ པ་ན, བྷི་ཀྑ་ཝེ, ཨེ་ཝ་མི་དྷེ་ཀ་ཙྩེ ས་ཏྟཱ ཀཱ་ཡ་སྶ བྷེ་དཱ པ་རཾ མ་ར་ཎཱ སུ་ག་ཏིཾ ས་གྒཾ ལོ་ཀཾ ཨུ་པ་པ་ཛྫ་ནྟཱི’’ཏི. ཙ་ཏུ་ཏྠཾ.
༤༥. ‘‘སེ་ཡྻ་ཐཱ་པི, བྷི་ཀྑ་ཝེ, ཨུ་ད་ཀ་ར་ཧ་དོ ཨཱ་ཝི་ལོ ལུ་ལི༹་ཏོ ཀ་ལ་ལཱི་བྷཱུ་ཏོ ཏ་ཏྠ ཙ་ཀྑུ་མཱ པུ་རི་སོ ཏཱི་རེ ཋི་ཏོ ན པ་སྶེ་ཡྻ སི་པྤི་ས་མྦུ་ཀ་མྤི [སི་པྤི་ཀ་ས་མྦུ་ཀ་མྤི (ཀ.)] ས་ཀྑ་ར་ཀ་ཋ་ལ་མྤི མ་ཙྪ་གུ་མྦ་མྤི ཙ་ར་ནྟ་མྤི ཏི་ཊྛ་ནྟ་མྤི. ཏཾ ཀི་སྶ ཧེ་ཏུ? ཨཱ་ཝི་ལ་ཏྟཱ, བྷི་ཀྑ་ཝེ, ཨུ་ད་ཀ་སྶ. ཨེ་ཝ་མེ་ཝཾ ཁོ, བྷི་ཀྑ་ཝེ, སོ ཝ་ཏ བྷི་ཀྑུ ཨཱ་ཝི་ལེ་ན ཙི་ཏྟེ་ན ཨ་ཏྟ་ཏྠཾ ཝཱ ཉ་སྶ་ཏི པ་ར་ཏྠཾ ཝཱ ཉ་སྶ་ཏི ཨུ་བྷ་ཡ་ཏྠཾ ཝཱ ཉ་སྶ་ཏི ཨུ་ཏྟ་རིཾ ཝཱ མ་ནུ་སྶ་དྷ་མྨཱ ཨ་ལ་མ་རི་ཡ་ཉཱ་ཎ་ད་སྶ་ན་ཝི་སེ་སཾ ས་ཙྪི་ཀ་རི་སྶ་ཏཱི་ཏི ནེ་ཏཾ ཋཱ་ནཾ ཝི་ཛྫ་ཏི. ཏཾ ཀི་སྶ ཧེ་ཏུ? ཨཱ་ཝི་ལ་ཏྟཱ, བྷི་ཀྑ་ཝེ, ཙི་ཏྟ་སྶཱ’’ཏི. པ་ཉྩ་མཾ.
༤༦. ‘‘སེ་ཡྻ་ཐཱ་པི, བྷི་ཀྑ་ཝེ, ཨུ་ད་ཀ་ར་ཧ་དོ ཨ་ཙྪོ ཝི་པྤ་ས་ནྣོ ཨ་ནཱ་ཝི་ལོ ཏ་ཏྠ ཙ་ཀྑུ་མཱ པུ་རི་སོ ཏཱི་རེ ཋི་ཏོ པ་སྶེ་ཡྻ སི་པྤི་ས་མྦུ་ཀ་མྤི ས་ཀྑ་ར་ཀ་ཋ་ལ་མྤི མ་ཙྪ་གུ་མྦ་མྤི ཙ་ར་ནྟ་མྤི ཏི་ཊྛ་ནྟ་མྤི. ཏཾ ཀི་སྶ ཧེ་ཏུ? ཨ་ནཱ་ཝི་ལ་ཏྟཱ, བྷི་ཀྑ་ཝེ, ཨུ་ད་ཀ་སྶ. ཨེ་ཝ་མེ་ཝཾ ཁོ, བྷི་ཀྑ་ཝེ, སོ ཝ་ཏ བྷི་ཀྑུ ཨ་ནཱ་ཝི་ལེ་ན ཙི་ཏྟེ་ན ཨ་ཏྟ་ཏྠཾ ཝཱ ཉ་སྶ་ཏི པ་ར་ཏྠཾ ཝཱ ཉ་སྶ་ཏི ཨུ་བྷ་ཡ་ཏྠཾ ཝཱ ཉ་སྶ་ཏི ཨུ་ཏྟ་རིཾ ཝཱ མ་ནུ་སྶ་དྷ་མྨཱ ཨ་ལ་མ་རི་ཡ་ཉཱ་ཎ་ད་སྶ་ན་ཝི་སེ་སཾ ས་ཙྪི་ཀ་རི་སྶ་ཏཱི་ཏི ཋཱ་ན་མེ་ཏཾ ཝི་ཛྫ་ཏི. ཏཾ ཀི་སྶ ཧེ་ཏུ? ཨ་ནཱ་ཝི་ལ་ཏྟཱ, བྷི་ཀྑ་ཝེ, ཙི་ཏྟ་སྶཱ’’ཏི. ཚ་ཊྛཾ.
༤༧. ‘‘སེ་ཡྻ་ཐཱ་པི, བྷི་ཀྑ་ཝེ, ཡཱ་ནི ཀཱ་ནི་ཙི རུ་ཀྑ་ཛཱ་ཏཱ་ནཾ ཕ་ནྡ་ནོ ཏེ་སཾ ཨ་གྒ་མ་ཀྑཱ་ཡ་ཏི ཡ་དི་དཾ མུ་དུ་ཏཱ་ཡ ཙེ་ཝ ཀ་མྨ་ཉྙ་ཏཱ་ཡ ཙ. ཨེ་ཝ་མེ་ཝཾ ཁོ ཨ་ཧཾ, བྷི་ཀྑ་ཝེ, ནཱ་ཉྙཾ ཨེ་ཀ་དྷ་མྨ་མྤི ས་མ་ནུ་པ་སྶཱ་མི ཡཾ ཨེ་ཝཾ བྷཱ་ཝི་ཏཾ བ་ཧུ་ལཱི་ཀ་ཏཾ མུ་དུ ཙ ཧོ་ཏི ཀ་མྨ་ཉྙ་ཉྩ ཡ་ཐ་ཡི་དཾ ཙི་ཏྟཾ. ཙི་ཏྟཾ, བྷི་ཀྑ་ཝེ, བྷཱ་ཝི་ཏཾ བ་ཧུ་ལཱི་ཀ་ཏཾ མུ་དུ ཙ ཧོ་ཏི ཀ་མྨ་ཉྙ་ཉྩ ཧོ་ཏཱི’’ཏི. ས་ཏྟ་མཾ.
༤༨. ‘‘ནཱ་ཧཾ, བྷི་ཀྑ་ཝེ, ཨ་ཉྙཾ ཨེ་ཀ་དྷ་མྨ་མྤི ས་མ་ནུ་པ་སྶཱ་མི ཡཾ ཨེ་ཝཾ ལ་ཧུ་པ་རི་ཝ་ཏྟཾ ཡ་ཐ་ཡི་དཾ ཙི་ཏྟཾ. ཡཱ་ཝ་ཉྩི་དཾ, བྷི་ཀྑ་ཝེ, ཨུ་པ་མཱ་པི ན སུ་ཀ་རཱ ཡཱ་ཝ ལ་ཧུ་པ་རི་ཝ་ཏྟཾ ཙི་ཏྟ’’ནྟི. ཨ་ཊྛ་མཾ.
༤༩. ‘‘པ་བྷ་སྶ་ར་མི་དཾ, བྷི་ཀྑ་ཝེ, ཙི་ཏྟཾ. ཏ་ཉྩ ཁོ ཨཱ་ག་ནྟུ་ཀེ་ཧི ཨུ་པ་ཀྐི་ལེ་སེ་ཧི ཨུ་པ་ཀྐི་ལི་ཊྛ’’ནྟི. ན་ཝ་མཾ.
༥༠. ‘‘པ་བྷ་སྶ་ར་མི་དཾ, བྷི་ཀྑ་ཝེ, ཙི་ཏྟཾ. ཏ་ཉྩ ཁོ ཨཱ་ག་ནྟུ་ཀེ་ཧི ཨུ་པ་ཀྐི་ལེ་སེ་ཧི ཝི་པྤ་མུ་ཏྟ’’ནྟི. ད་ས་མཾ.
པ་ཎི་ཧི་ཏ་ཨ་ཙྪ་ཝ་གྒོ པ་ཉྩ་མོ.