๔. อสาธารณาทิ

๓๓๘. วีสํ เทฺว สตานิ ภิกฺขูนํ สิกฺขาปทานิ;

อุทฺเทสํ อาคจฺฉนฺติ อุโปสเถสุ;

ตีณิ สตานิ จตฺตาริ ภิกฺขุนีนํ สิกฺขาปทานิ;

อุทฺเทสํ อาคจฺฉนฺติ อุโปสเถสุ.

ฉจตฺตารีสา ภิกฺขูนํ, ภิกฺขุนีหิ อสาธารณา;

สตํ ตึสา จ ภิกฺขุนีนํ, ภิกฺขูหิ อสาธารณา.

สตํ สตฺตติ ฉจฺเจว, อุภินฺนํ อสาธารณา;

สตํ สตฺตติ จตฺตาริ, อุภินฺนํ สมสิกฺขตา.

วีสํ เทฺว สตานิ ภิกฺขูนํ สิกฺขาปทานิ;

อุทฺเทสํ อาคจฺฉนฺติ อุโปสเถสุ;

เต สุโณหิ ยถาตถํ.

ปาราชิกานิ จตฺตาริ, สงฺฆาทิเสสานิ ภวนฺติ เตรส;

อนิยตา เทฺว โหนฺติ.

นิสฺสคฺคิยานิ ตึเสว, เทฺวนวุติ จ ขุทฺทกา;

จตฺตาโร ปาฏิเทสนียา, ปญฺจสตฺตติ เสขิยา.

วีสํ เทฺว สตานิ จิเม โหนฺติ ภิกฺขูนํ สิกฺขาปทานิ;

อุทฺเทสํ อาคจฺฉนฺติ อุโปสเถสุ.

ตีณิ สตานิ จตฺตาริ, ภิกฺขุนีนํ สิกฺขาปทานิ;

อุทฺเทสํ อาคจฺฉนฺติ อุโปสเถสุ, เต สุโณหิ ยถาตถํ.

ปาราชิกานิ อฏฺฐ, สงฺฆาทิเสสานิ ภวนฺติ สตฺตรส;

นิสฺสคฺคิยานิ ตึเสว, สตํ สฏฺฐิ ฉ เจว ขุทฺทกานิ ปวุจฺจนฺติ.

อฏฺฐ ปาฏิเทสนียา, ปญฺจสตฺตติ เสขิยา;

ตีณิ สตานิ จตฺตาริ จิเม โหนฺติ ภิกฺขุนีนํ สิกฺขาปทานิ;

อุทฺเทสํ อาคจฺฉนฺติ อุโปสเถสุ.

ฉจตฺตารีสา ภิกฺขูนํ, ภิกฺขุนีหิ อสาธารณา;

เต สุโณหิ ยถาตถํ.

สงฺฆาทิเสสา, เทฺว อนิยเตหิ อฏฺฐ;

นิสฺสคฺคิยานิ ทฺวาทส, เตหิ เต โหนฺติ วีสติ.

เทฺววีสติ ขุทฺทกา, จตุโร ปาฏิเทสนียา;

ฉจตฺตารีสา จิเม โหนฺติ, ภิกฺขูนํ ภิกฺขุนีหิ อสาธารณา.

สตํ ตึสา จ ภิกฺขุนีนํ, ภิกฺขูหิ อสาธารณา;

เต สุโณหิ ยถาตถํ.

ปาราชิกานิ จตฺตาริ, สงฺฆมฺหา ทส นิสฺสเร;

นิสฺสคฺคิยานิ ทฺวาทส, ฉนฺนวุติ จ ขุทฺทกา;

อฏฺฐ ปาฏิเทสนียา.

สตํ ตึสา จิเม โหนฺติ ภิกฺขุนีนํ, ภิกฺขูหิ อสาธารณา;

สตํ สตฺตติ ฉจฺเจว, อุภินฺนํ อสาธารณา;

เต สุโณหิ ยถาตถํ.

ปาราชิกานิ จตฺตาริ, สงฺฆาทิเสสานิ ภวนฺติ โสฬส;

อนิยตา เทฺว โหนฺติ, นิสฺสคฺคิยานิ จตุวีสติ;

สตํ อฏฺฐารสา เจว, ขุทฺทกานิ ปวุจฺจนฺติ;

ทฺวาทส ปาฏิเทสนียา.

สตํ สตฺตติ ฉจฺเจวิเม โหนฺติ, อุภินฺนํ อสาธารณา;

สตํ สตฺตติ จตฺตาริ, อุภินฺนํ สมสิกฺขตา;

เต สุโณหิ ยถาตถํ.

ปาราชิกานิ จตฺตาริ, สงฺฆาทิเสสานิ ภวนฺติ สตฺต;

นิสฺสคฺคิยานิ อฏฺฐารส, สมสตฺตติ ขุทฺทกา;

ปญฺจสตฺตติ เสขิยานิ.

สตํ สตฺตติ จตฺตาริ จิเม โหนฺติ, อุภินฺนํ สมสิกฺขตา;

อฏฺเฐ ปาราชิกา เย ทุราสทา, ตาลวตฺถุสมูปมา.

ปณฺฑุปลาโส ปุถุสิลา, สีสจฺฉินฺโนว โส นโร;

ตาโลว มตฺถกจฺฉินฺโน, อวิรุฬฺหี ภวนฺติ เต.

เตวีสติ สงฺฆาทิเสสา, เทฺว อนิยตา;

เทฺว จตฺตารีส นิสฺสคฺคิยา;

อฏฺฐาสีติสตํ ปาจิตฺติยา, ทฺวาทส ปาฏิเทสนียา.

ปญฺจสตฺตติ เสขิยา, ตีหิ สมเถหิ สมฺมนฺติ;

สมฺมุขา จ ปฏิญฺญาย, ติณวตฺถารเกน จ.

เทฺว อุโปสถา เทฺว ปวารณา;

จตฺตาริ กมฺมานิ ชิเนน เทสิตา;

ปญฺเจว อุทฺเทสา จตุโร ภวนฺติ;

อนญฺญถา อาปตฺติกฺขนฺธา จ ภวนฺติ สตฺต.

อธิกรณานิ จตฺตาริ สตฺตหิ สมเถหิ สมฺมนฺติ;

ทฺวีหิ จตูหิ ตีหิ กิจฺจํ เอเกน สมฺมติ.