๑๑. เอกาทสกวาโร

๓๓๑. เอกาท ปุคฺคลา อนุปสมฺปนฺนา น อุปสมฺปาเทตพฺพา, อุปสมฺปนฺนา นาเสตพฺพา. เอกาทส ปาทุกา อกปฺปิยา. เอกาทส ปตฺตา อกปฺปิยา. เอกาทส จีวรานิ อกปฺปิยานิ. เอกาทส ยาวตติยกา. ภิกฺขุนีนํ เอกาทส อนฺตรายิกา ธมฺมา ปุจฺฉิตพฺพา. เอกาทส จีวรานิ อธิฏฺฐาตพฺพานิ. เอกาทส จีวรานิ น วิกปฺเปตพฺพานิ. เอกาทเส อรุณุคฺคมเน นิสฺสคฺคิยํ โหติ. เอกาทส คณฺฐิกา กปฺปิยา. เอกาทส วิธา [วีถา (สฺยา.)] กปฺปิยา. เอกาทส ปถวี อกปฺปิยา. เอกาทส ปถวี กปฺปิยา. เอกาทส นิสฺสยปฏิปฺปสฺสทฺธิโย. เอกาทส ปุคฺคลา อวนฺทิยา. เอกาทส ปรมานิ. เอกาทส วรานิ ยาจึสุ. เอกาทส สีมาโทสา. อกฺโกสกปริภาสเก ปุคฺคเล เอกาทสาทีนวา ปาฏิกงฺขา. [อ. นิ. ๑๑.๑๕; มิ. ป. ๔.๔.๖] เมตฺตาย เจโตวิมุตฺติยา อาเสวิตาย ภาวิตาย พหุลีกตาย ยานีกตาย วตฺถุกตาย อนุฏฺฐิตาย ปริจิตาย สุสมารทฺธาย เอกาทสานิสํสา ปาฏิกงฺขา. สุขํ สุปติ, สุขํ ปฏิพุชฺฌติ, น ปาปกํ สุปินํ ปสฺสติ, มนุสฺสานํ ปิโย โหติ, อมนุสฺสานํ ปิโย โหติ, เทวตา รกฺขนฺติ, นาสฺส อคฺคิ วา วิสํ วา สตฺถํ วา กมติ, ตุวฏฺฏํ จิตฺตํ สมาธิยติ, มุขวณฺโณ วิปฺปสีทติ, อสมฺมูโฬฺห กาลงฺกโรติ, อุตฺตริ อปฺปฏิวิชฺฌนฺโต พฺรหฺมโลกูปโค โหติ – เมตฺตาย เจโตวิมุตฺติยา อาเสวิตาย ภาวิตาย พหุลีกตาย ยานีกตาย วตฺถุกตาย อนุฏฺฐิตาย ปริจิตาย สุสมารทฺธาย อิเม เอกาทสานิสํสา ปาฏิกงฺขาติ.

เอกาทสกํ นิฏฺฐิตํ.

ตสฺสุทฺทานํ –

นาเสตพฺพา ปาทุกา จ, ปตฺตา จ จีวรานิ จ;

ตติยา ปุจฺฉิตพฺพา จ, อธิฏฺฐานวิกปฺปนา.

อรุณา คณฺฐิกา วิธา, อกปฺปิยา จ กปฺปิยํ;

นิสฺสยาวนฺทิยา เจว, ปรมานิ วรานิ จ;

สีมาโทสา จ อกฺโกสา, เมตฺตาเยกาทสา กตาติ.

เอกุตฺตริกนโย.

ตสฺสุทฺทานํ –

เอกกา จ ทุกา เจว, ติกา จ จตุปญฺจกา;

ฉสตฺตฏฺฐนวกา จ, ทส เอกาทสานิ จ.

หิตาย สพฺพสตฺตานํ, ญาตธมฺเมน ตาทินา;

เอกุตฺตริกา วิมลา, มหาวีเรน เทสิตาติ.

เอกุตฺตริกนโย นิฏฺฐิโต.