๒๓๓. ตสฺสุทฺทานํ

ราชคหโก เนคโม, ทิสฺวา เวสาลิยํ คณึ;

ปุน ราชคหํ คนฺตฺวา, รญฺโญ ตํ ปฏิเวทยิ.

ปุตฺโต สาลวติกาย, อภยสฺส หิ อตฺรโช;

ชีวตีติ กุมาเรน, สงฺขาโต ชีวโก อิติ.

โส หิ ตกฺกสีลํ คนฺตฺวา, อุคฺคเหตฺวา มหาภิโส;

สตฺตวสฺสิกอาพาธํ, นตฺถุกมฺเมน นาสยิ.

รญฺโญ ภคนฺทลาพาธํ, อาเลเปน อปากฑฺฒิ;

มมญฺจ อิตฺถาคารญฺจ, พุทฺธสงฺฆํ จุปฏฺฐหิ.

ราชคหโก จ เสฏฺฐิ, อนฺตคณฺฐิ ติกิจฺฉิตํ;

ปชฺโชตสฺส มหาโรคํ, ฆตปาเนน นาสยิ.

อธิการญฺจ สิเวยฺยํ, อภิสนฺนํ สิเนหติ;

ตีหิ อุปฺปลหตฺเถหิ, สมตฺตึสวิเรจนํ.

ปกตตฺตํ วรํ ยาจิ, สิเวยฺยญฺจ ปฏิคฺคหิ;

จีวรญฺจ คิหิทานํ, อนุญฺญาสิ ตถาคโต.

ราชคเห ชนปเท พหุํ, อุปฺปชฺชิ จีวรํ;

ปาวาโร โกสิยญฺเจว, โกชโว อฑฺฒกาสิกํ.

อุจฺจาวจา จ สนฺตุฏฺฐิ, นาคเมสาคเมสุํ จ;

ปฐมํ ปจฺฉา สทิสา, กติกา จ ปฏิหรุํ.

ภณฺฑาคารํ อคุตฺตญฺจ, วุฏฺฐาเปนฺติ ตเถว จ;

อุสฺสนฺนํ โกลาหลญฺจ, กถํ ภาเช กถํ ทเท.

สกาติเรกภาเคน, ปฏิวีโส กถํ ทเท;

ฉกเณน สีตุทกา [สีตุนฺที จ (สี.), สีตุณฺหิ จ (กตฺถจิ)], อุตฺตริตุ น ชานเร.

อาโรเปนฺตา ภาชนญฺจ, ปาติยา จ ฉมาย จ;

อุปจิกามชฺเฌ ชีรนฺติ, เอกโต ปตฺถินฺเนน จ.

ผรุสาจฺฉินฺนจฺฉิพนฺธา, อทฺทสาสิ อุพฺภณฺฑิเต;

วีมํสิตฺวา สกฺยมุนิ, อนุญฺญาสิ ติจีวรํ.

อญฺเญน อติเรเกน, อุปฺปชฺชิ ฉิทฺทเมว จ;

จาตุทฺทีโป วรํ ยาจิ, ทาตุํ วสฺสิกสาฏิกํ.

อาคนฺตุคมิคิลานํ, อุปฏฺฐากญฺจ เภสชฺชํ;

ธุวํ อุทกสาฏิญฺจ, ปณีตํ อติขุทฺทกํ.

ถุลฺลกจฺฉุมุขํ โขมํ, ปริปุณฺณํ อธิฏฺฐานํ;

ปจฺฉิมํ กโต ครุโก, วิกณฺโณ สุตฺตโมกิริ.

ลุชฺชนฺติ นปฺปโหนฺติ, จ อนฺวาธิกํ พหูนิ จ;

อนฺธวเน อสฺสติยา, เอโก วสฺสํ อุตุมฺหิ จ.

เทฺว ภาตุกา ราชคเห, อุปนนฺโท ปุน ทฺวิสุ;

กุจฺฉิวิกาโร คิลาโน, อุโภ เจว คิลานกา [คิลายนา (ก.)].

นคฺคา กุสา วากจีรํ, ผลโก เกสกมฺพลํ;

วาฬอุลูกปกฺขญฺจ, อชินํ อกฺกนาฬกํ.

โปตฺถกํ นีลปีตญฺจ, โลหิตํ มญฺชิฏฺเฐน จ;

กณฺหา มหารงฺคนาม, อจฺฉินฺนทสิกา ตถา.

ทีฆปุปฺผผณทสา, กญฺจุติรีฏเวฐนํ;

อนุปฺปนฺเน ปกฺกมติ, สงฺโฆ ภิชฺชติ ตาวเท.

ปกฺเข ททนฺติ สงฺฆสฺส, อายสฺมา เรวโต ปหิ;

วิสฺสาสคาหาธิฏฺฐาติ, อฏฺฐ จีวรมาติกาติ.

อิมมฺหิ ขนฺธเก วตฺถู ฉนฺนวุติ.

จีวรกฺขนฺธโก นิฏฺฐิโต.