อธิฏฺฐานหารวณฺณนา

‘‘อวณฺณ’’นฺติ สามญฺญโต อธิฏฺฐานํ. ตมวิกปฺเปตฺวา วิเสสวจนํ ‘‘มมํ วา’’ติ. ธมฺมสฺส วา สงฺฆสฺส วาติ ปกฺเขปิ เอส นโย. ตถา ‘‘สีล’’นฺติ สามญฺญโต อธิฏฺฐานํ. ตมวิกปฺเปตฺวา วิเสสวจนํ ‘‘ปาณาติปาตา ปฏิวิรโต’’ติอาทิ. ‘‘อญฺเญว ธมฺมา’’ติอาทิ สามญฺญโต อธิฏฺฐานํ, ตมวิกปฺเปตฺวา วิเสสวจนํ ‘‘ตยิทํ ภิกฺขเว, ตถาคโต ปชานาตี’’ติอาทิ, ตถา ‘‘ปุพฺพนฺตกปฺปิกา’’ติอาทิ สามญฺญโต อธิฏฺฐานํ. ตมวิกปฺเปตฺวา วิเสสวจนํ ‘‘สสฺสตวาทา’’ติอาทิ. อิมินา นเยน สพฺพตฺถ ยถาเทสิตเมว สามญฺญวิเสสา นิทฺธาเรตพฺพา. อยํ สุตฺตาคตานํ ธมฺมานํ อวิกปฺปนาวเสน ยถาเทสิตเมว สามญฺญวิเสสนิทฺธารณลกฺขโณ อธิฏฺฐานหาโร นาม, ยถาห ‘‘เอกตฺตตาย ธมฺมา, เยปิ จ เวมตฺตตาย นิทฺทิฏฺฐา’’ติอาทิ (เนตฺติ. ๔.๑๔).