๓. นิสฺสคฺคิยกณฺฑํ (ภิกฺขุนีวิภงฺควณฺณนา)

๗๓๓. นิสฺสคฺคิเยสุ ปฐมํ อุตฺตานเมว.

๗๔๐. ทุติเย ‘‘อยฺยาย ทมฺมีติ เอวํ ปฏิลทฺธนฺติ นิสฺสฏฺฐปฏิลทฺธํ. เตเนว มาติกาฏฺฐกถายมฺปิ ‘‘นิสฺสฏฺฐํ ปฏิลภิตฺวาปิ ยถาทาเนเยว อุปเนตพฺพ’’นฺติ วุตฺตํ. ยถาทาเนเยว อุปเนตพฺพนฺติ ยถา ทายเกน ทินฺนํ, ตถา อุปเนตพฺพํ, อกาลจีวรปกฺเขเยว ฐเปตพฺพนฺติ วุตฺตํ โหติ. เอตฺถ จ ภาชาปิตาย ลทฺธจีวรเมว นิสฺสคฺคิยํ โหติ, ตํ วินยกมฺมํ กตฺวาปิ อตฺตนา น ลภติ. เสสเมตฺถ อุตฺตานเมว. อกาลจีวรตา, ตถาสญฺญิตา, กาลจีวรนฺติ อธิฏฺฐาย เลเสน ภาชาปนํ, ปฏิลาโภติ อิมานิ ปเนตฺถ จตฺตาริ องฺคานิ.

๗๔๓. ตติเย เมตนฺติ เม เอตํ. สกสญฺญาย คหิตตฺตา ปาจิตฺติยํ ทุกฺกฏญฺจ วุตฺตํ. อิตรถา ภณฺฑคฺเฆน กาเรตพฺพํ. อุปสมฺปนฺนตา, ปริวตฺติตจีวรสฺส วิกปฺปนุปคตา, สกสญฺญาย อจฺฉินฺทนํ วา อจฺฉินฺทาปนํ วาติ อิมานิ ปเนตฺถ ตีณิ องฺคานิ.

๗๔๘-๗๕๒. จตุตฺเถ อาหฏสปฺปึ ทตฺวาติ อตฺตโน ทตฺวา. ยมกํ ปจิตพฺพนฺติ สปฺปิญฺจ เตลญฺจ เอกโต กตฺวา ปจิตพฺพํ. เลเสน คเหตุกามตา, อญฺญสฺส วิญฺญาปนํ, ปฏิลาโภติ อิมานิ ปเนตฺถ ตีณิ องฺคานิ.

๗๕๓. ปญฺจเม สาติ ถุลฺลนนฺทา. อยนฺติ อยํ สิกฺขมานา. เจตาเปตฺวาติ ชานาเปตฺวา อิจฺเจว อตฺโถติ อิธ วุตฺตํ, มาติกาฏฺฐกถายํ (กงฺขา. อฏฺฐ. อญฺญเจตาปนสิกฺขาปทวณฺณนา) ปน ‘‘อญฺญํ เจตาเปตฺวาติ อตฺตโน กปฺปิยภณฺเฑน อิทํ นาม อาหราติ อญฺญํ ปริวตฺตาเปตฺวา’’ติ วุตฺตํ, ตสฺมา ‘‘เจตาเปตฺวา’’ติ อิมสฺส ปริวตฺตาเปตฺวาติปิ อตฺโถ ทฏฺฐพฺโพ. อญฺญํ เจตาเปยฺยาติ ‘‘เอวํ เม อิทํ ทตฺวา อญฺญมฺปิ อาหริสฺสตี’’ติ มญฺญมานา ‘‘น เม อิมินา อตฺโถ, อิทํ นาม เม อาหรา’’ติ ตโต อญฺญํ เจตาเปยฺย.

๗๕๘. ฉฏฺเฐ ธมฺมกิจฺจนฺติ ปุญฺญกมฺมํ. ปาวาริกสฺสาติ ทุสฺสวาณิชกสฺส. ยาย เจตาปิตํ, ตสฺสาเยว นิสฺสคฺคิยํ นิสฺสฏฺฐปฏิลาโภ จ, ตสฺมา ตาย ภิกฺขุนิยา นิสฺสฏฺฐํ ปฏิลภิตฺวา ยถาทาเน อุปเนตพฺพํ, น อตฺตนา คเหตพฺพํ. อญฺญสฺสตฺถายาติ จีวราทีสุ อญฺญตรสฺสตฺถาย. อญฺญุทฺทิสิเกนาติ ปุริมสฺเสวตฺถทีปนํ. ปริกฺขาเรนาติ กปฺปิยภณฺเฑน.

๗๖๔. สตฺตเม สยํ ยาจิตเกนาติ สยํ ยาจิตเกนาปีติ อตฺโถ. เตเนว ปาฬิยํ ‘‘เตน จ ปริกฺขาเรน สยมฺปิ ยาจิตฺวา’’ติ วุตฺตํ, ตโตเยว มาติกาฏฺฐกถายํ ‘‘สญฺญาจิเกนาติ สยํ ยาจิตเกนาปี’’ติ อตฺโถ วุตฺโต.

๗๖๘-๗๗๓. อฏฺฐมนวมทสมานิ อุตฺตานตฺถาเนว.

๗๘๔. เอกาทสเม ยสฺมา ปวาริตฏฺฐาเน วิญฺญตฺติ นาม น ปฏิเสเธตพฺพา, ตสฺมา ภควา ธมฺมนิมนฺตนวเสน ปวาริตฏฺฐาเน ‘‘วเทยฺยาสิ เยนตฺโถ’’ติ วุตฺตาย ‘‘จตุกฺกํสปรมํ วิญฺญาเปตพฺพ’’นฺติ ปริจฺเฉทํ ทสฺเสตีติ เวทิตพฺพํ. เตเนว มาติกาฏฺฐกถายํ (กงฺขา. อฏฺฐ. ครุปาวุรณสิกฺขาปทวณฺณนา) ‘‘เจตาเปตพฺพนฺติ ฐเปตฺวา สหธมฺมิเก จ ญาตกปวาริเต จ อญฺเญน กิสฺมิญฺจิเทว คุเณ ปริตุฏฺเฐน วเทยฺยาสิ เยนตฺโถติ วุตฺตาย วิญฺญาเปตพฺพ’’นฺติ วุตฺตํ.

๗๘๘. ทฺวาทสมํ อุตฺตานตฺถเมว.

ภิกฺขุนีวิภงฺเค นิสฺสคฺคิยปาจิตฺติยสิกฺขาปทวณฺณนา นิฏฺฐิตา.

นิสฺสคฺคิยกณฺฑํ นิฏฺฐิตํ.