อุปาลิปญฺจกวณฺณนา

๔๒๐-๔๒๑. โอมทฺทการโกติ โอมทฺทิตฺวา อภิภวิตฺวา การโก. อุปตฺถมฺโภ น ทาตพฺโพติ สามคฺคิวินาสาย อนุพลํ น ทาตพฺพํ. ทิฏฺฐาวิกมฺมมฺปิ กตฺวาติ ‘‘น เมตํ ขมตี’’ติ ทิฏฺฐึ อาวิ กตฺวาปิ.

โวหารวคฺควณฺณนา

๔๒๔. กายปฺปโยเคน อาปชฺชิตพฺพา กายปฺปโยคา. วจีปโยเคน อาปชฺชิตพฺพา วจีปโยคา. นวสุ ฐาเนสูติ โอสารณาทีสุ นวสุ ฐาเนสุ. ทฺวีสุ ฐาเนสูติ ญตฺติทุติยญตฺติจตุตฺถกมฺเมสุ. ตสฺมาติ ยสฺมา มหาอฏฺฐกถายํ วุตฺตนเยน อุภโตวิภงฺคา อสงฺคหิตา, ตสฺมา. ยํ กุรุนฺทิยํ วุตฺตํ, ตํ คเหตพฺพนฺติ สมฺพนฺโธ.

ทิฏฺฐาวิกมฺมวคฺควณฺณนา

๔๒๕. ‘‘จตูหิ ปญฺจหี’’ติ วจนโต ทฺวีหิ วา ตีหิ วา เอกโต เทเสตุํ วฏฺฏติ, ตโต ปรํ น วฏฺฏติ. มาฬกสีมายาติ ขณฺฑสีมาย. อวิปฺปวาสสีมายาติ มหาสีมาย.

มุสาวาทวคฺควณฺณนา

๔๔๔. ปริยาเยน ชานนฺตสฺส วุตฺตมุสาวาโทติ ยสฺส กสฺสจิ ชานนฺตสฺส ปริยาเยน วุตฺตมุสาวาโทติ อตฺโถ.

๔๔๖. อนุโยโค น ทาตพฺโพติ เตน วุตฺตํ อนาทิยิตฺวา ตุณฺหี ภวิตพฺพนฺติ อตฺโถ.

ภิกฺขุโนวาทวคฺควณฺณนา

๔๕๔. เอกูนวีสติเภทายาติ มคฺคปจฺจเวกฺขณาทิวเสน เอกูนวีสติเภทาย.

อธิกรณวูปสมวคฺควณฺณนา

๔๕๘. ปญฺจหิ การเณหีติ อิทํ อตฺถนิปฺผาทนกานิ เตสํ ปุพฺพภาคานิ จ การณภาวสามญฺเญน เอกชฺฌํ คเหตฺวา วุตฺตํ, น ปน สพฺเพสํ ปญฺจนฺนํ สมานโยคกฺเขมตฺตา. อนุสฺสาวเนนาติ เภทสฺส อนุรูปสาวเนน. ยถา เภโท โหติ, เอวํ ภินฺทิตพฺพานํ ภิกฺขูนํ อตฺตโน วจนสฺส สาวเนน วิญฺญาปเนนาติ อตฺโถ. เตนาห ‘‘นนุ ตุเมฺห’’ติอาทิ. กณฺณมูเล วจีเภทํ กตฺวาติ เอเตน ปากฏํ กตฺวา เภทกรวตฺถุทีปนํ โวหรณํ. ตตฺถ อตฺตนา วินิจฺฉิตมตฺตํ รหสฺสวเสน วิญฺญาปนํ อนุสฺสาวนนฺติ ทสฺเสติ. กมฺมเมว อุทฺเทโส วา ปมาณนฺติ เตหิ สงฺฆเภทสิทฺธิโต ปมาณํ, อิตเร ปน เตสํ สมฺภารภูตา. เตนาห ‘‘โวหารา’’ติอาทิ. ตตฺถาติ โวหรเณ.

กถินตฺถารวคฺควณฺณนา

๔๖๗. อนฺตรา วุตฺตการเณนาติ ‘‘ตญฺหิ วนฺทนฺตสฺส มญฺจปาทาทีสุปิ นลาฏํ ปฏิหญฺเญยฺยา’’ติอาทินา วุตฺตการเณน.