วินยวินิจฺฉโย

คนฺถารมฺภกถา

๑. วนฺทิตฺวา สิรสา เสฏฺฐํ, พุทฺธมปฺปฏิปุคฺคลํ;

ภวาภาวกรํ ธมฺมํ, คณญฺเจว นิรงฺคณํ.

๒. ภิกฺขูนํ ภิกฺขุนีนญฺจ, หิตตฺถาย สมาหิโต;

ปวกฺขามิ สมาเสน, วินยสฺสวินิจฺฉยํ.

๓. อนากุลมสํกิณฺณํ, มธุรตฺถปทกฺกมํ;

ปฏุภาวกรํ เอตํ, ปรมํ วินยกฺกเม.

๔. อปารํ โอตรนฺตานํ, สารํ วินยสาครํ;

ภิกฺขูนํ ภิกฺขุนีนญฺจ, นาวาภูตํ มโนรมํ.

๕. ตสฺมา วินยนูปายํ, วินยสฺสวินิจฺฉยํ;

อวิกฺขิตฺเตน จิตฺเตน, วทโต เม นิโพธถ.