๗. คพฺภินิวคฺควณฺณนา

๑. ปฐมาทิสิกฺขาปทวณฺณนา

๑๐๖๗. ‘‘คพฺภินิ’’นฺติ ทสฺสนาทีหิปิ คพฺภสมฺภวโต วุตฺตํ. ปทภาชเนปิ ปวาริตภาโว น ทิสฺสติ.

๑๐๗๔. ธาติ วาติ เอตฺถ ทารกํ สามิกานํ ทตฺวา อาหเฏ วฑฺเฒติ, ตถา มาตาปีติ เกจิ.

๑๐๘๐. ‘‘สิกฺขมาน’’นฺติ ปาฐํ ทีปวาสิโน โรเจนฺติ กิริยากิริยตฺตา, ชมฺพุทีปวาสิโน ‘‘สิกฺขมานา’’ติ. ตสฺสตฺโถ สิกฺขาธมฺมมานนโต สิกฺขมานาติ. อิธ กิริยา น โหติ, สญฺญาว อธิปฺเปตา. น เอตาสุ อสิกฺขิตา อุปสมฺปาเทตพฺพา อุปชฺฌายินีอาทีนํ อาปตฺติภาวา. ‘‘ตสฺสา อุปสมฺปทา โหติ เอวา’’ติ วทนฺติ.

๑๐๘๒. ธมฺมกมฺเมติ อุปสมฺปทกมฺมํ อธิปฺเปตํ.

๑๑๑๒. วุฏฺฐาปิตนฺติ สามเณริภูมิโต ยาย เถริยา อุปสมฺปทาเปกฺขา วุฏฺฐปิตา, สา เถรี วุฏฺฐาปิตา นาม, เตเนว ปุน วิเสสนตฺถํ ‘‘ปวตฺตินิ’’นฺติ อาห.

ปฐมาทิสิกฺขาปทวณฺณนา นิฏฺฐิตา.

คพฺภินิวคฺควณฺณนา นิฏฺฐิตา.