๒-๕๐. ปณีตตรสุตฺตาทิวณฺณนา

๓๔๓-๓๙๑. วิสฺสฏฺฐกายาติ ‘‘เย จมฺเมน วา รุธิเรน วา อฏฺฐินา วา อตฺถิกา, เต สพฺพํ คณฺหนฺตู’’ติ ตตฺถ นิรเปกฺขจิตฺตตาย อธิฏฺฐิตสีลตาย ปริจฺจตฺตสรีรา. ทุวิธการิโนติ ‘‘กาเลน กุสลํ, กาเลน อกุสล’’นฺติ เอวํ กุสลากุสลการิโน. สห พฺยยติ ปวตฺตตีติ สหโพฺย, สหจาโร. ตสฺส ภาโว สหพฺยตา, ตํ สหพฺยตํ. อทนียโต อนฺนํ. ขาทนียโต ขชฺชํ. ปาตพฺพโต ปานํ. นิวสนียโต วตฺถํ. นิวสิตพฺพํ นิวาสนํ. ปริวริตพฺพํ ปาวุรณํ. ยานฺติ เตนาติ ยานํ, อุปาหนาทิยานานิ. อาทิสทฺเทน วยฺหสิวิกาทีนํ สงฺคโห. ฉตฺตมฺปิ ปริสฺสยาตปทุกฺขปริรกฺขเณน มคฺคคมนสาธนนฺติ กตฺวา ‘‘ฉตฺตุปาหน’’นฺติอาทิ วุตฺตํ. เตน วุตฺตํ ‘‘ยํ กิญฺจิ คมนปจฺจย’’นฺติ. ปตฺถนํ กตฺวา…เป… ตตฺถ นิพฺพตฺตนฺติ จมฺเปยฺยนาคราชา วิยาติ ทฏฺฐพฺพํ.

ปณีตตรสุตฺตาทิวณฺณนา นิฏฺฐิตา.

นาคสํยุตฺตวณฺณนา นิฏฺฐิตา.