๙. สุปณฺณสํยุตฺตวณฺณนา

๓๙๒-๔๓๗. ปตฺตานนฺติ อุโภสุ ปกฺเขสุ ปตฺตานํ. วณฺณวนฺตตายาติ อติสเยน วิจิตฺตวณฺณตาย. อติสยตฺโถ หิ อยํ วนฺต-สทฺโท. ปุริมนเยนาติ นาคสํยุตฺเต ปฐมสุตฺเต วุตฺตนเยน. อุทฺธรนฺตีติ สมุทฺทโต อุทฺธรนฺติ, ปถวนฺตรปพฺพตนฺตรโต ปน เตสํ อุทฺธรณํ ทุกฺกรเมว. ปณีตตเรติ พเลน ปณีตตเร, พลวนฺเตติ อตฺโถ. อนุทฺธรณียนาคาติ อานุภาวมหนฺตตาย จ วสนฏฺฐานวิทุคฺคตาย จ อุทฺธริตุํ อสกฺกุเณยฺยา นาคา. เต ‘‘สตฺตวิธา’’ติ วตฺวา สรูปโต วสนฏฺฐานโต จ ทสฺเสนฺโต ‘‘กมฺพลสฺสตรา’’ติอาทิมาห. ตตฺถ กมฺพลสฺสตรา ธตรฏฺฐาติ อิเม ชาติวเสน วุตฺตา. สตฺตสีทนฺตรวาสิโนติ สตฺตวิธสีทสมุทฺทวาสิโน. ปถวิฏฺฐกาติ ปถวนฺตรวาสิโน, ตถา ปพฺพตฏฺฐกา. เต จ วิมานวาสิโน. เต นาเค โกจิ สุปณฺโณ อุทฺธริตุํ น สกฺโกตีติ สมฺพนฺโธ. เสสนฺติ ‘‘กาเยน ทฺวยการิโน’’ติอาทีสุ ยํ วตฺตพฺพํ, ตํ สพฺพํ นาคสํยุตฺเต วุตฺตนยเมว, ตตฺถ จ วุตฺตนเยเนว อตฺโถ เวทิตพฺโพติ อธิปฺปาโย.

สุปณฺณสํยุตฺตวณฺณนา นิฏฺฐิตา.