๓. วิกาลคามปฺปวิสนสิกฺขาปทํ

๕๐๘. ตติเย ‘‘ติรจฺฉานภูตํ กถ’’นฺติ อิมินา ‘‘ติรจฺฉานกถ’’นฺติ ปทสฺส ตุลฺยนิสฺสิตสมาสํ ทสฺเสติ. ราชปฏิสํยุตฺตนฺติ ราชูหิ ปฏิสํยุตฺตํ.

๕๑๒. สมฺพหุลา ภิกฺขูติ สมฺพนฺโธ. ตสฺมึ คาเมติ ตสฺมึ ปฐมปวิสนคาเม. ตํ กมฺมนฺติ ตํ อิจฺฉิตกมฺมํ. อนฺตราติ คามวิหารานมนฺตเร. ภุมฺมตฺเถ เจตํ นิสฺสกฺกวจนํ.

กุลฆเร วาติ ญาติกุลอุปฏฺฐากกุลฆเร วา. เตลภิกฺขาย วาติ เตลยาจนตฺถาย วา. ปสฺเสติ อตฺตโน ปสฺเส สมีเปติ วุตฺตํ โหติ. เตนาติ คามมชฺฌมคฺเคน. อโนกฺกมฺมาติ อโนกฺกมิตฺวา, อปกฺกมิตฺวาติ อตฺโถติ. ตติยํ.