๒. สปฺปาณกสิกฺขาปทํ

๓๘๗. ทุติเย สห ปาเณหีติ สปฺปาณกํ อุทกนฺติ ทสฺเสนฺโต อาห ‘‘เย ปาณกา’’ติอาทิ. หีติ สจฺจํ. ปตฺตปูรมฺปิ อุทกนฺติ สมฺพนฺโธ. ตาทิเสนาติ สปฺปาณเกน. โธวโตปิ ปาจิตฺติยนฺติ โยชนา. อุทกโสณฺฑินฺติ สิลามยํ อุทกโสณฺฑึ. โปกฺขรณินฺติ สิลามยํ โปกฺขรณึ. อุฏฺฐาปยโตปิ ปาจิตฺติยนฺติ สมฺพนฺโธ. ตโตติ โสณฺฑิโปกฺขรณีหิ. อุทกสฺสาติ อุทเกน, ปูเร ฆเฏ อาสิญฺจิตฺวาติ สมฺพนฺโธ. ตตฺถาติ อุทเก. อุทเกติ อุทกสณฺฐานกปเทเส อาสิญฺจิตอุทเก. ปติสฺสตีติ โสณฺฑิโปกฺขรณีหิ คหิตอุทกํ ปติสฺสตีติ. ทุติยํ.