๑๖. วจฺจปสฺสาวฏฺฐานิกนิทฺเทสวณฺณนา

๑๕๖. วจฺจปสฺสาวฏฺฐานิกนฺติ ฐานมฺหิ ฐาเน วา ภวํ วจฺจปสฺสาวฏฺฐานิกํ. ยถาวุฑฺฒํ วจฺจํ น กเรยฺยาติ สมฺพนฺโธ. เย เย วุฑฺฒา ยถาวุฑฺฒํ, อาคตปฺปฏิปาฏึ หิตฺวา วุฑฺฒปฺปฏิปาฏิยาติ อตฺโถ. วจฺจนฺติ อุปลกฺขณมตฺตํ, ปสฺสาวญฺจ นหานญฺจ น กเรยฺยาติ อธิปฺปาโย. ตเทว สมตฺเถติ ‘‘ยาตานุปุพฺพิยา’’ติอาทินา. ยาตานุปุพฺพิยาติ ยาตานํ คตานํ อนุปุพฺพิ อนุกฺกโม ยาตานุปุพฺพิ, ตาย. วจฺจ…เป… ติตฺถญฺจาติ เอตํ ตยํ ลพฺภตีติ อตฺโถ, ภิกฺขุนาติ วิญฺญายติ.

๑๕๗. อุพฺภชิตฺวา จ สหสา จ โน ปวิเสยฺยาติ สมฺพนฺโธ. อุพฺภชิตฺวาติ จีวรํ ทูรโตว อุกฺขิปิตฺวา. สหสาติ สีฆํ. อุกฺกาสิตฺวา ปวิเสยฺยาติ โยชนา.

๑๕๘. วจฺจปสฺสาวโทณีนํ พหีติ สมฺพนฺโธ. อุภยนฺติ วจฺจมฺปิ ปสฺสาวมฺปิ.

๑๕๙. กูเปติ วจฺจาวาเฏ. กฏฺฐนฺติ อวเลขนกฏฺฐํ. ผรุเสนาติ ขเรน อวเลขนกฏฺเฐน. อุหตญฺจาปีติ อตฺตนา วา ปเรน วา อุหตญฺจาปิ วจฺจมกฺขิตญฺจาปีติ อตฺโถ. โธวเยติ สติ อุทเก, อุทเก อสติ กฏฺเฐนปิ โสเธยฺย.

๑๖๐. น นิกฺขเมติ น นิกฺขเมยฺย. จปุ จปูติ อนุกรณํ, วิจฺฉายํ ทฺวิตฺเต จปุ จปุ กตฺวาติ กิริยาวิเสสนํ. นาจเมยฺยาติ น โธเวยฺย. สติ ปน อุทเก อาจมิตพฺพํ, อสติ เยน เกนจิ ปุญฺฉิตฺวา คนฺตพฺพํ, สพฺพสาธารณฏฺฐาเน จ อาจมนกุมฺภิยา อุทกํ น เสเสตพฺพํ. อุกฺลาปนฺติ กจวรํ. วิโสธเยติ วิหารโสธเน วิย วจฺจปสฺสาวกุฏิโย, ปริเวณโกฏฺฐเก จ สมฺมชฺเชยฺย. สพฺพตฺเถว จ ปน วตฺตเภเท ทุกฺกฏํ.

วจฺจปสฺสาวฏฺฐานิกนิทฺเทสวณฺณนา นิฏฺฐิตา.