๕. ปตฺตนิทฺเทโส

ปตฺโต จาติ –

๖๐. อโยปตฺโต ภูมิปตฺโต, ชาติยา กปฺปิยา ทุเว;

อุกฺกฏฺโฐ มชฺฌิโม เจว, โอมโก จ ปมาณโต.

๖๑. อุกฺกฏฺโฐ มคเธ นาฬิ-ทฺวยตณฺฑุลสาธิตํ;

คณฺหาติ โอทนํ สูปํ, พฺยญฺชนญฺจ ตทูปิยํ.

๖๒. มชฺฌิโม ตสฺสุปฑฺโฒว, ตโตปฑฺโฒว โอมโก;

อุกฺกฏฺฐโต จ อุกฺกฏฺโฐ, อปตฺโต โอมโกมโก.

๖๓. อติเรกปตฺโต ธาเรยฺโย, ทสาหปรมํ สโก;

กปฺโป นิสฺสคฺคิโย โหติ, ตสฺมึ กาเลตินามิเต.

๖๔. อจฺเฉททานคาเหหิ, วิพฺภมา มรณุทฺธฏา;

ลิงฺคสิกฺขาหิ ฉิทฺเทน, ปตฺตาธิฏฺฐานมุชฺฌติ.

๖๕. ปตฺตํ น ปฏิสาเมยฺย, โสทกํ น จ โอตเป;

อุเณฺห น นิทเห ภุมฺยา, น ฐเป โน จ ลคฺคเย.

๖๖. มิฑฺฒนฺเต ปริภณฺฑนฺเต, องฺเก วา อาตปตฺตเก;

ปาเทสุ มญฺจปีเฐ วา, ฐเปตุํ น จ กปฺปติ.

๖๗. น นีหเรยฺย อุจฺฉิฏฺโฐ-ทกญฺจ จลกฏฺฐิกํ;

ปตฺเตน ปตฺตหตฺโถ วา, กวาฏํ น ปณามเย.

๖๘. ภูมิอาธารเก ทารุทณฺฑาธาเร สุสชฺชิเต;

ทุเว ปตฺเต ฐเปยฺเยกํ, นิกฺกุชฺชิตฺวาน ภูมิยํ.

๖๙. ทารุรูปิยโสวณฺณ-มณิเวฬุริยามยา;

กํสกาจติปุสีสผลิกาตมฺพโลหชา.

๗๐. ฉวสีสมโย จาปิ, ฆฏีตุมฺพกฏาหชา;

ปตฺตา อกปฺปิยา สพฺเพ, วุตฺตา ทุกฺกฏวตฺถุกาติ.