๔๔. อุโปสถนิทฺเทโส

อุโปสโถติ –

๔๑๐. ทุเว อุโปสถา จาตุ-ทฺทโส ปนฺนรโส อิติ;

สุตฺตุทฺเทสมธิฏฺฐาน-ปาริสุทฺธิวสา ตโย.

๔๑๑. สุตฺตุทฺเทโสว สงฺฆสฺส, อธิฏฺฐานอุโปสโถ;

ปุคฺคลสฺเสว เสสานํ, ปาริสุทฺธิอุโปสโถ.

๔๑๒. ปุพฺพกิจฺเจ จ กรเณ, ปตฺตกลฺเล สมานิเต;

สุตฺตํ อุทฺทิสติ สงฺโฆ, ปญฺจธา โส วิภาวิโต.

๔๑๓. วินานฺตรายํ สงฺเขเป-นุทฺเทโส วินิวาริโต;

‘‘เถโรว อิสฺสโร ทฺวีสุ, อุทฺเทเสเสฺวตฺถ ตีสุ วา;

วิสเทสู’’ติ วุตฺตตฺตา, อวตฺตนฺเตปิ วฏฺฏติ.

๔๑๔. อาคจฺเฉยฺยุํ ยทิ สมา, อุทฺทิสนฺเต ว โถกิกา;

อุทฺทิฏฺฐํ ยํ สุอุทฺทิฏฺฐํ, โสตพฺพมวเสสกํ.

๔๑๕. อุทฺทิฏฺฐมตฺเต สกลา-เยกจฺจายุฏฺฐิตาย วา;

ปาริสุทฺธึ กเรยฺเยสํ, สนฺติเก พหุกาถ เจ;

กตฺวา สพฺพวิกปฺเปสุ, ปุพฺพกิจฺจํ ปุนุทฺทิเส.

๔๑๖. ปนฺนรโสวาสิกานํ, อิตรานํ สเจตโร;

สมาเนตเรนุวตฺตนฺตุ, ปุริมานํ สเจธิกา;

ปุริมา อนุวตฺตนฺตุ, เตสํ เสเสปฺยยํ นโย.

๔๑๗. ปาฏิปโทวาสิกานํ, อิตรานํ อุโปสโถ;

สมโถกานํ สามคฺคึ, มูลฏฺฐา เทนฺตุ กามโต.

๔๑๘. พหิ คนฺตฺวาน กาตพฺโพ, โน เจ เทนฺติ อุโปสโถ;

เทยฺยานิจฺฉาย สามคฺคี, พหูสุ พหิ วา วเช.

๔๑๙. ปาฏิปเทคนฺตุกานํ, เอวเมว อยํ นโย;

สาเวยฺย สุตฺตํ สญฺจิจฺจ, อสฺสาเวนฺตสฺส ทุกฺกฏํ.

๔๒๐. สมฺมชฺชิตุํ ปทีเปตุํ, ปญฺญาเปตุํ ทกาสนํ;

น กเรยฺย ตถา กลฺโล, มหาเถเรน เปสิโต.

๔๒๑. สมฺมชฺชิตฺวา ปทีเปตฺวา, ปฏฺฐเปตฺวา ทกาสนํ. คณญตฺตึ ฐเปเตฺววํ, กตฺตพฺโพ ตีหุโปสโถ. ‘‘สุณนฺตุ เม อายสฺมนฺตา, อชฺชุโปสโถ ปนฺนรโส, ยทายสฺมนฺตานํ ปตฺตกลฺลํ, มยํ อญฺญมญฺญํ ปาริสุทฺธิอุโปสถํ กเรยฺยามา’’ติ.

๔๒๒. เอกํสํ จีวรํ กตฺวา, นิสีทิตฺวา อุกฺกุฏิกํ,. เถเรน อญฺชลึ เตวํ, ปคฺคยฺห สมุทีริยา. ‘‘ปริสุทฺโธ อหํ อาวุโส, ปริสุทฺโธติ มํ ธาเรถา’’ติ, วเท ยาวตตียกํ.

๔๒๓. สมตฺตปุพฺพารมฺเภน, เต นเวเนวมีริยา. ‘‘ปริสุทฺโธ อหํ ภนฺเต, ปริสุทฺโธติ มํ ธาเรถา’’ติ, วเท ยาวตตียกํ.

๔๒๔. ทฺวีสุ เถเรน กตฺตพฺพํ, กเตฺววมีริโย นโว. ‘‘ปริสุทฺโธ อหํ อาวุโส, ปริสุทฺโธติ มํ ธาเรหี’’ติ ติกฺขตฺตุํ วตฺตพฺโพ.

๔๒๕. นเวน เถโร ติกฺขตฺตุํ, เอวมสฺส อุทีริโย;

‘‘ปริสุทฺโธ อหํ ภนฺเต, ปริสุทฺโธติ มํ ธาเรถา’’ติ.

๔๒๖. ปุพฺพกิจฺจํ สมาเปตฺวา, อธิฏฺเฐยฺเยวเมกโก. ‘‘อชฺช เม อุโปสโถ ปนฺนรโสติ วา จาตุทฺทโสติ วา อธิฏฺฐามี’’ติ วตฺตพฺพํ, โน เจธิฏฺเฐยฺย ทุกฺกฏํ.

๔๒๗. ยตฺถ วสนฺติ จตฺตาโร, ตโย วา ยทิ วา ทุเว;

ปาริสุทฺธึ หริตฺวาน, เอเกกสฺสิตรีตเร;

ตํ ตํ อุโปสถํ กยิรุํ, สิยา อาปตฺติ ทุกฺกฏํ.

๔๒๘. วคฺเค สมคฺเค วคฺโคติ, สญฺญิโน วิมติสฺส วา;

ทุกฺกฏํ กโรโต เภทา-ธิปฺปาเยน ถุลฺลจฺจยํ;

วคฺเค สมคฺเคนาปตฺติ, สมคฺโค อิติ สญฺญิโน.

๔๒๙. อุกฺขิตฺตสฺส คหฏฺฐสฺส, เสสานํ สหธมฺมินํ;

ปาราชิกสฺสาภพฺพสฺส, สิกฺขานิกฺขิตฺตกสฺส จ.

๔๓๐. นิสินฺนปริสายญฺจ, สภาคาปตฺติโก ตถา;

ฉนฺเทน ปริวุตฺเถน, ปาติโมกฺขํ น อุทฺทิเส.

๔๓๑. อเทสยิตฺวานาปนฺนํ, นาวิกตฺวาน เวมตึ;

นุโปสเถปิ วา กาตุํ, โปสโถ น จ กปฺปติ.

๔๓๒. อฏฺฐิโตโปสถาวาสา, น วเช ตทหู วินา;

อนฺตรายํ ว สงฺฆํ วา-ธิฏฺฐาตุํ สีมเมว วาติ.