๒๕. อกปฺปิยสยนนิทฺเทโส

อกปฺปิยสยนานีติ –

๑๘๗. อาสนฺที ตูลี ปลฺลงฺโก, ปฏิกํ โคนจิตฺตกํ;

ปฏลี วิกตี อุทฺท-โลมี เอกนฺตโลมิกา.

๑๘๘. กุตฺตํ โกเสยฺยํ กฏฺฏิสฺสํ, หตฺถิอสฺสรถตฺถรา;

ชินปฺปเวณิกทลี-มิคปฺปวรอตฺถรา.

๑๘๙. สโลหิตวิตานญฺจุ-ภโตรตฺตูปธานกํ;

อกปฺปิยานิ เอตานิ, ทุกฺกฏํ ปริภุญฺชโต.

๑๙๐. อาสนฺทาทิตฺตยา เสเส, ลพฺภเต คิหิสนฺตเก;

ธมฺมาสเน จ ภตฺตคฺเค, ฆเร จาปิ นิสีทิตุํ;

ภูมตฺถรณสงฺเขเป, สยิตุญฺจาปิ กปฺปติ.

๑๙๑. จตุรํสปีฐา สตฺตงฺคา, ปญฺจงฺคา อุจฺจปาทกา;

ตูโลนทฺธา ฆเรเยว, มญฺจปีฐา นิสีทิตุํ.

๑๙๒. โจฬวากุณฺณปณฺณานํ, ติณานญฺเจว ปูริตา;

จีวรจฺฉวิโย ปญฺจ, ภิสี สพฺพตฺถ กปฺปิยา.

๑๙๓. ตูลตฺตยํ ภิสิคพฺโภ, โลมานิ มิคปกฺขินํ;

พิมฺโพหเน อนุญฺญาตํ, ตูลวชฺชา มสูรเก.

๑๙๔. มนุสฺสโลมมุณฺณายํ, ปณฺเณ ปุปฺผํ ตมาลกํ;

สุทฺธํ น อาสนญฺเจว, ลพฺภมปฺปฏิเวกฺขิตนฺติ.