๘. ปฐมสหชีวินิสิกฺขาปทวณฺณนา

อฏฺฐเม สหชีวินินฺติ สทฺธิวิหารินึ. เนว อนุคฺคเณฺหยฺยาติ สยํ อุทฺเทสาทีหิ นานุคฺคเณฺหยฺย. น อนุคฺคณฺหาเปยฺยาติ ‘‘อิมิสฺสา, อยฺเย, อุทฺเทสาทีนิ เทหี’’ติ เอวํ น อญฺญาย อนุคฺคณฺหาเปยฺย. ปาจิตฺติยนฺติ ธุเร นิกฺขิตฺตมตฺเต ปาจิตฺติยํ.

สาวตฺถิยํ ถุลฺลนนฺทํ อารพฺภ เอวรูเป วตฺถุสฺมึ ปญฺญตฺตํ, เสสเมตฺถ ตุวฏฺฏวคฺเค ทุกฺขิตสหชีวินิสิกฺขาปเท วุตฺตสทิสเมวาติ.

ปฐมสหชีวินิสิกฺขาปทวณฺณนา นิฏฺฐิตา.