ติปุกฺขลนยวณฺณนา

อาฆาตาทีนํ อกรณวจเนน อโทสสิทฺธิ, ตถา ปาณาติปาตผรุสวาจาหิ ปฏิวิรติวจเนน. อานนฺทาทีนํ อกรณวจเนน อโลภสิทฺธิ, ตถา อพฺรหฺมจริยโต ปฏิวิรติวจเนน. อทินฺนาทานาทีหิ ปน ปฏิวิรติวจเนน อุภยสิทฺธิ. ‘‘ตยิทํ ภิกฺขเว ตถาคโต ปชานาตี’’ติอาทินา อโมหสิทฺธิ. อิติ ตีหิ อกุสลมูเลหิ คหิเตหิ ตปฺปฏิปกฺขโต, อาฆาตาทิอกรณวจเนน จ ตีณิ กุสลมูลานิ สิทฺธานิเยว โหนฺติ. ตตฺถ ตีหิ อกุสลมูเลหิ ติวิธทุจฺจริตสํกิเลสมลวิสมากุสลสญฺญาวิตกฺกาสทฺธมฺมาทิวเสน สพฺโพ อกุสลปกฺโข วิตฺถาเรตพฺโพ. ตถา ตีหิ กุสลมูเลหิ ติวิธสุจริตโวทานสมกุสลสญฺญาวิตกฺกปญฺญาสทฺธมฺมสมาธิ- วิโมกฺขมุขวิโมกฺขาทิวเสน สพฺโพ กุสลปกฺโข วิภาเวตพฺโพ. เอตฺถาปิ จ สจฺจโยชนา เวทิตพฺพา. กถํ? โลโภ สพฺพานิ วา กุสลากุสลมูลานิ สมุทยสจฺจํ, เตหิ ปน นิพฺพตฺตา เตสํ อธิฏฺฐานโคจรภูตา อุปาทานกฺขนฺธา ทุกฺขสจฺจนฺติอาทินา นเยน สจฺจโยชนา เวทิตพฺพาติ อยํ ติปุกฺขลสฺส นยสฺส ภูมิ.