๒. อภิธมฺมภาชนียวณฺณนา

๔๔๔. สาธิปติวารานิ อฏฺฐสตานิ, เตสุ ปจฺเจกํ จตฺตาโร อิทฺธิปาทา น สมฺภวนฺตีติ อาห ‘‘สาธิปติวารานํ ปริปุณฺณานํ อภาวา’’ติ. ตตฺถ การณมาห ‘‘น หิ อธิปตีนํ อธิปตโย วิชฺชนฺตี’’ติ. ยทิ หิ อธิปตี สิยุํ สาธิปตีติ อิทฺธิปาทเภเทน ทฺวตฺตึส นยสตานิ, สุทฺธิกานิ อฏฺฐาติ จตฺตาริ นยสหสฺสานิ ภเวยฺยุํ, ตํ ปน นตฺถีติ อธิปฺปาโย. ยตฺตกา ปน นยา อิธ ลพฺภนฺติ, ตํ ทสฺเสตุํ ‘‘เอเกกสฺมึ ปนา’’ติอาทิ วุตฺตํ. สุทฺธิกานิ อฏฺฐ นยสตานิ สาธิปติกานิปิ อฏฺเฐวาติ จตุนฺนํ มคฺคานํ วเสน โสฬส นยสตานิ.

อภิธมฺมภาชนียวณฺณนา นิฏฺฐิตา.