๔. จตุกฺกนิทฺเทสวณฺณนา

๙๓๙. เอวํ-สทฺเทนาติ นิทสฺสนตฺเถน เอวํ-สทฺเทนาติ อธิปฺปาโย. ภโว เอว อภิวุทฺโธ อภโว ยถา ‘‘อเสกฺขา ธมฺมา’’ติ (ธ. ส. ติกมาติกา ๑๑). ทุติยสฺมึ ปกฺเข ภวาภวสทฺเทน สมฺปตฺติวิปตฺติโย, วุทฺธิหานิโย วา วุตฺตาติ เวทิตพฺพา.

อคติยาติ อยุตฺตคติยา, อปฺปติรูปกิริยายาติ อตฺโถ.

โกธูปายาส…เป… มาตุคามา วา อูมิอาทิภยนฺติ โยชนา. ปญฺจกามคุณมาตุคามคฺคหเณติ ปญฺจกามคุณคฺคหเณ, มาตุคามคฺคหเณ จ.

‘‘สยํกตํ สุขทุกฺข’’นฺติอาทิกา ทิฏฺฐิ ยทิปิ อญฺเญสมฺปิ ทิฏฺฐิคติกานํ อตฺเถว, ติมฺพรุโก ปน ตถาทิฏฺฐิโก ภควนฺตํ อุปสงฺกมิตฺวา ปุจฺฉีติ สา ทิฏฺฐิ ‘‘ติมฺพรุกทิฏฺฐี’’ติ (สํ. นิ. ๒.๑๘) วุตฺตา. เตนาห ‘‘ติมฺพรุโก…เป… อาคตตฺตา’’ติ.

จตุกฺกนิทฺเทสวณฺณนา นิฏฺฐิตา.