๒๓. เตวีสติโม ปริจฺเฉโท

กิเลสปหานนิทฺเทสวณฺณนา

๑๓๗๕. อิธ ปน อิมสฺมึ ปนาธิกาเร การณูปจาเรน ลาภาทิการณสฺส โวหาเรน, ลาโภ อาทิ วตฺถุ ยสฺส อนุนยสฺสาติ ลาภาทิวตฺถุโก, ตสฺส.

สุขุมาติ กามราคปฏิฆา สุขุมา.

๑๓๗๖. เยน เยน ปฐมมคฺคาทิญาเณน โย โย สํโยชนาทิโก ปหาตพฺโพ ธมฺโม ฆาตํ วินาสํ ยาติ, โส โส ธมฺโม เตน เตน อเสเสน ญาเณน เอวํ สาธุ มยา สนฺทสฺสิโต.

๑๓๘๓. ปริญฺญาภิสมเยนาติ ปริจฺฉินฺทิตฺวา ชานเนน. ทุกฺขํ อภิสเมตีติ ทุกฺขํ ปฏิวิชฺฌติ.

๑๓๙๔. โย โยคี อิมํ วิทิตฺวา หิตภาวนํ วนํ วเนตพฺพํ วิทิตฺวา ชานิตฺวา เว เอกนฺเตน สุขสํหิตํ หิตํ อุเปติ, จิตฺตสฺส ตมํ อนุตฺตมํ หีนํ วิธูย วินาเสตฺวา อวิคฺคหกมฺปทํ ปทํ อวิคฺคหกํ สรีรรหิตํ ปทํ ปฏิปชฺชิตพฺพํ ญาตพฺพํ ปทํ นิพฺพานํ อุเปติ ปาปุณาติ จ.

อิติ อภิธมฺมาวตารฏีกาย

กิเลสปหานนิทฺเทสวณฺณนา นิฏฺฐิตา.

เตวีสติโม ปริจฺเฉโท.