๒๐. วีสติโม ปริจฺเฉโท

มคฺคามคฺคญาณทสฺสนวิสุทฺธินิทฺเทสวณฺณนา

๑๒๖๔. ปจฺจุปฺปนฺนสฺส ธมฺมสฺสาติ ปจฺจุปฺปนฺนสฺส นามรูปธมฺมสฺส.

๑๒๖๖-๘. อุปฺปชฺชโต อุปฺปชฺชนฺตสฺส นามรูปธมฺมสฺส ราสิโต นิจยโต อาคมนญฺจ นตฺถิ. ทิสาคมนนฺติ ทิสาย คมนํ. นิรุทฺธสฺสาปิ นามรูปธมฺมสฺส เอกสฺมึ ฐาเน นิจโยติ จ นตฺถิ.

๑๒๗๐-๑. อวิชฺชาสมุทยา รูปสมุทโย, อวิชฺชานิโรธา รูปนิโรโธ. ตณฺหาสมุทยา รูปสมุทโย, ตณฺหานิโรธา รูปนิโรโธ. กมฺมสมุทยา รูปสมุทโย, กมฺมนิโรธา รูปนิโรโธ. อาหารนิโรธา รูปนิโรโธ. ธมฺเมติ สงฺขารธมฺเม.

๑๒๘๐. สมฺปตฺตปฏิเวธสฺสาติ สมฺปตฺตโลกุตฺตรสงฺขาตมคฺคผลสฺส โสตาปนฺนาทิปุคฺคลสฺส. วิปฺปฏิปนฺนสฺสาติ ปฏิปตฺติยํ อปฺปฏิปนฺนสฺส, วิรุทฺธวเสน ปฏิปนฺนสฺส วา.

๑๒๘๖. กายจิตฺตานีติ กายาติ เวทนาสญฺญาสงฺขารา. จิตฺตนฺติ วิญฺญาณํ.

๑๒๙๐. ยโต ยโต ปจฺจยาทิโต. ยํ อมตํ นิพฺพานํ วิชานตํ วิชานนฺตานํ ปีติปาโมชฺชํ, เตหิ ลภิตพฺพํ อมตํ, อมตํ วิย ปีติปาโมชฺชํ วา.

๑๒๙๓. อปฺปตฺเตติ อตฺตนิ มคฺคผลสฺมึ อปฺปตฺเต. ปตฺตสญฺญีติ มคฺคผเล อหํ ปตฺโต อสฺมิ อิติ สญฺญิโต โหติ.

๑๒๙๗. สารเวทิโนติ สารชานนสีลา. ตนฺติ ตํ มคฺคามคฺคญาณทสฺสนํ. อิทํ ญาณํ มคฺคามคฺคญาณทสฺสนนฺติ มคฺคามคฺคญาณทสฺสนํ นาม.

อิติ อภิธมฺมาวตารฏีกาย

มคฺคามคฺคญาณทสฺสนวิสุทฺธินิทฺเทสวณฺณนา นิฏฺฐิตา.

วีสติโม ปริจฺเฉโท.