๑๘. อฏฺฐารสโม ปริจฺเฉโท

ทิฏฺฐิวิสุทฺธินิทฺเทสวณฺณนา

๑๑๗๕. ยา สญฺชานนมตฺตํว, สญฺญา นีลาทิโต ปนาติ สา สญฺญา นีลาทิวเสน สญฺชานนมตฺตํว กโรติ. ลกฺขณปฺปฏิเวธนฺติ อนิจฺจาทิลกฺขณปฏิพุชฺฌนํ.

๑๑๗๗. ตํ วิญฺญาณํ อุสฺสกฺกิตฺวา อุทฺธํ สกฺกํ กตฺวา สตฺเต มคฺคํ ปาเปตุํ น สกฺโกติ.

๑๑๗๘-๙. สพฺเพสํ ปน ธมฺมานํ สภาวปฏิเวธนํ อวิปรีตวเสน ปฏิพุชฺฌนํ ปญฺญาย ลกฺขณํ.

๑๑๘๐. สมาธิ อาสนฺนการณํ เอตายาติ สมาธาสนฺนการณา.

๑๑๘๑. ลกฺขเณเนกธาติ สพฺพธมฺมํ ปฏิพุชฺฌนลกฺขเณน ปญฺญาว เอกธา วุตฺตา.

๑๑๘๓. ภูริปญฺเญนาติ ภูเต อตฺเถ อวิปรีเต อตฺเถ รมตีติ ภูริ, ภูริ ปญฺญา เอตสฺสาติ ภูริปญฺโญ, เตน.

๑๑๘๖-๙๑. ตีสุ อตฺถธมฺมนิรุตฺตีสุ จ ญาเณสุ อตฺถธมฺมนิรุตฺตีสุ ชาเตสุ ญาเณสุ จ ญาณํ. ยํ กิญฺจิ ปจฺจยุปฺปนฺนํ ผลํ ธมฺมชาตํ. ภาสิตตฺโถติ ปาฬิยา อตฺโถ. เอเต ปญฺจ ธมฺมา อตฺถสญฺญิตา อตฺถนามกา. ผลนิพฺพตฺตโก เหตูติ ชนนโก ปจฺจโย. ภาสิตนฺติ ปาฬิ. ธมฺมสญฺญิตาติ ธมฺมนามกา. สภาวนิรุตฺตีติ อวิปรีตโวหาโร. ปริยตฺตีติ สิกฺขนํ. สวนาธิคเมหิ ปุพฺพโยเคน ปุพฺเพ ปวตฺตนาย.

๑๑๙๒. ภูมิภูเตสูติ วิปสฺสนาย ภูมิภูเตสุ.

๑๑๙๔. ชนนาทิโตติ ชาติอาทิโต ภีเตน ปญฺญา ภาเวตพฺพา.

๑๒๐๓. เอกาสีติยา จิตฺเตนาติ โลกุตฺตรจิตฺตวชฺชิเตน วิปสฺสนาภูมิภูเตน เอกาสีติยา จิตฺเตน.

๑๒๐๘. สตฺตสมฺโมหฆาตตฺถนฺติ สตฺโตติ สมฺโมหสฺส วินาสิตตฺถํ.

๑๒๑๑. นิรีหกนฺติ อีหวิรหิตํ พฺยาปารวิรหิตํ, ทารุรชฺชุสมาโยเค.

๑๒๑๕. อุโภ ภิชฺชนฺติ ปจฺจยาติ อญฺญมญฺญปจฺจยการณา.

๑๒๒๕. อนฺตทฺวยนฺติ กามสุขลฺลิกานุโยคอตฺตกิลมถานุโยคทฺวยํ. ภาวเยติ ทิฏฺฐิวิสุทฺธึ วฑฺเฒยฺย.

อิติ อภิธมฺมาวตารฏีกาย

ทิฏฺฐิวิสุทฺธินิทฺเทสวณฺณนา นิฏฺฐิตา.

อฏฺฐารสโม ปริจฺเฉโท.